ការសាងសង់អាគារកំពស់៧៨ជាន់ស្ថិតក្នុងភាពមិនច្បាស់លាស់

November 20, 2018

ដោយ ស៊ីវ ម៉េង

ភ្នំពេញ: មជ្ឈមណ្ឌលពាណិជ្ជកម្មដ៏ធំ The Glory ដែលអាចជាអំនួតមួយសម្រាប់ទីក្រុងភ្នំពេញបានស្ថិតក្នុងភាពមិនច្បាស់លាស់ ខណៈគំរោងនេះត្រូវបានតំណាងក្រុមហ៊ុនយានឆ័ងប្រចាំកម្ពុជាធ្លាប់បានឲ្យដឹងថា គំរោងនេះត្រូវបានកែប្រែប្លង់ស្ថាបត្យកម្មមួយចំនួន។

តំណាងក្រុមហ៊ុន យាន ឆ័ង ប្រចាំកម្ពុជាលោក ផូ ប៊ីលសម្បត្តិបានថ្លែងឲ្យដឹងតាមទូរស័ព្ទកាលពីពេលថ្មីៗនេះថា ការសាងសង់អាគារនេះ នឹងចាប់ផ្តើមនៅចុងឆ្នាំ២០១៨ ព្រោះបច្ចុប្បន្នក្រុមហ៊ុនកំពុងឌីសាញរូបរាងអាគារ និងគ្រឿងបង្គុំរបស់អាគារដ៏ធំនេះឡើងវិញ។ ប៉ុន្តែរហូតមកទល់ពេលនេះមិនឃើញមានសកម្មភាពសាងសង់នោះទេ។

លោកបន្តថា ដោយសារវាជាអាគារខ្ពស់ ទើបក្រុមហ៊ុនបាននិងកំពុងគិតគូរ យ៉ាងយកចិត្តទុកដាក់ពីមូលដ្ឋានគ្រឹះ និងគ្រឿងបង្គុំរបស់អាគារនេះដោយម៉ត់ចត់បំផុត ដើម្បីបញ្ចៀសហានិភ័យផ្សេងៗ។

លោកបន្តថា “ការសាងសង់អាគារនេះ គ្រោងចំណាយទឹកប្រាក់ជាង២០០លានដុល្លារ និងចំណាយរយៈពេលសាងសង់៤ទៅ៥ឆ្នាំ ដូច្នេះ យើងរំពឹងថាឆ្នាំ២០២៣ ឬ២០២៤ទើបអាគារនេះអាចដំណើរការបាន។លោកបន្តថា“អាគារនេះនឹងជាមជ្ឈមណ្ឌលពាណិជ្ជកម្មចម្រុះ ដែលរួមបញ្ចូលនូវផ្សារទំនើប អាផាតម៉ិន ខុនដូ សណ្ឋាគារ និងការិយាល័យជាដើម។
ទីតាំងមជ្ឈមណ្ឌលពាណិជ្ជកម្ម GLORY កំពស់៧៨ជាន់នេះ ស្ថិតនៅជាប់អាគារ The Bridge ស្ថិតក្នុងសង្កាត់ទន្លេបាសាក់ ខ័ណ្ឌចំការមករាជធានីភ្នំពេញ។

អ្នកឯកទេសផ្នែកនគរូបនីយកម្ម លោកបណ្ឌិត វ៉ាន់ វ៉ាតបានថ្លែងថា កម្ពុជាមានបទបញ្ញត្តិស្តីពី ការកំណត់កំពស់អាគាររួចហើយ ដូច្នេះប្រសិនជាយើងអនុវត្តន៍ច្បាប់បញ្ញត្តិដែលមានបានល្អ វាមិនត្រឹមតែជួយការពារបាននូវបេតិកភ័ណ្ឌក្នុងទីក្រុងនោះទេ តែវានឹងរក្សាបាននូវទេសភាព សោភ័ណភាព និងកាត់បន្ថយបាននូវផលប៉ះពាល់បរិស្ថានផងដែរ។លោកបន្តថា តាមធម្មតាការសាងសង់អាគារខ្ពស់បែបនេះ ក្រុមហ៊ុនបានសិក្សាពីបទ ដ្ឋានបច្ចេកទេសអស់ហើយ។លោកបន្តថា ចំណែកក្រសួងជំនាញគ្រាន់តែជាអ្នក ពិនិត្យលើបទដ្ឋានសំណង់ ដើម្បីធ្វើឲ្យប្រាកដថាក្រុមហ៊ុនគោរពបានតាមគោលការ ណ៍ស្នើសុំឬអត់ប៉ុណ្ណោះ។

លោកបន្តថា “ការមានអាគារខ្ពស់ៗបែបនេះ វាជាមោទនភាពជាតិ ព្រោះវាមិនត្រឹមតែជួយដល់សេដ្ឋកិច្ចនោះទេ តែវាក៏ផ្តល់ការងារនិងប្រាក់ចំណូលដល់ប្រជាពលរដ្ឋផងដែរ”។

ទោះជាយ៉ាងណាគេហទំព័រPropertyarea.asia នឹងផ្សព្វផ្សាយជូននូវបច្ចុប្បន្នភាពព៌តមានបន្ថែមទៀត ពេលអាគារនេះចាប់ផ្តើមសាងសង់៕

វិនិយោគខ្មែរ-អ៊ីស្រាអែល បោះទុនជាង ១៥លានដុល្លារ សាងសង់ខុនដូភ្លោះនៅក្រុងព្រះសីហនុ

November 19, 2018

0

ដោយ គង់ សូរិយា

ភ្នំពេញ៖ អ្នកវិនិយោគខ្មែរ និងខ្មែរកាត់អ៊ីស្រាអែលបានសម្រេចចិត្តបោះទុនវិនិយោគលើគំរោង LZ Seaview Resident តម្លៃជាង១៥លានដុល្លារ ដើម្បីសាងសង់អាគារខុនដូកំពស់២១ជាន់នៅក្រុងព្រះសីហនុ ជាការឆ្លើយតបនឹងកំនើននៃសេវាស្នាក់នៅកើនឡើងឥតឈប់ឈរនៅក្រុងព្រះសីហនុ។

នាយកក្រុមហ៊ុន អ៊ិលស្សេត (LZ) លោកសៀង ឆាយ បានមានប្រសាសន៍ឲ្យដឹង ក្នុងពិធីបើកការដ្ឋានសាងសង់ សាងសង់គំរោងខាងលើកាលពីថ្ងៃទី១៨ វិច្ឆិកាកន្លងមកថា នេះគឺជាគម្រោងអាគារខុនដូទំនើមស្ដង់ដារអន្ដរជាតិ មានកំពស់២១ជាន់ មានចំនួន ៣២០បន្ទប់។ គំរោងនេះក្រៅពីខុនដូ ក៏មានសួនច្បារ បរិស្ថានល្អ ទីធ្លាចតឡានធំទូលាយ មានអាងហែលទឹក និងអាចមើលឃើញទេសភាពសមុទ្រដ៏ស្រស់ស្អាតផងដែរ។ លោកបន្តថា នៅក្នុងរយៈពេលក្រុងពាលីបើកការដ្ឋានសំណង់នេះ និងមានកម្មវិធីលក់បញ្ចុះតម្លៃពិសេស។ សម្រាប់ជំហ៊ានដំបូងនេះ ក្រុមហ៊ុនលក់បានចំនួន៥០% នៃគម្រោងអាគារA។

យោងតាមការសិក្សាពីក្រុមហ៊ុន VITRUST Appraisal កាលពីឆ្នាំមុនបានរកឃើញថា ក្រុងព្រះសីហនុមានខុនដូជាង៤៧០០យូនីត ដែលបាននិងកំពុងសាងសង់ ដែលចំនួននេះមិនទាន់រាប់បញ្ចូលគំរោងដែលបានប្រកាសសាងសង់នៅឆ្នាំ២០១៨នេះនៅឡើយទេ។

លោក Yariv Lerner អគ្គនាយកក្រុមហ៊ុន LZ Seaview Resident បានសម្តែងសុទិដ្ឋិនិយមលើសុខសន្តិភាព និងស្ថិរភាពនយោបាយនៅកម្ពុជា ដែលបានផ្ដល់ឱកាសឲ្យអ្នកវិនិយោគក្នុងការរកស៊ីចំណេញ និងបង្វិលប្រាក់ទៅស្រុកកំណើតវិញបានដោយងាយ។ លោកបានចូលមករកស៊ីនៅព្រះរាជាណាចក្រកម្ពុជា ជាពិសេសខេត្ដព្រះសីហនុអស់រយៈពេល៨ឆ្នាំកន្លងមកហើយ។ គំរោងខុនដូនLZ នេះ គឺជាគម្រោងវិនិយោគទី២ ដែលបានផ្តល់នូវកន្លែងស្នាក់នៅល្អប្រណីត ផាសុខភាព សំណង់តាមស្ដង់ដារអន្ដរជាតិ ប្រកបដោយគុណភាព និងសុវត្ថិភាពខ្ពស់ ហើយនឹងអាចមានប្ដបន្ទាប់ទៀត។

ជាមួយគ្នានេះ អភិបាលខេត្ដព្រះសីហនុ លោកយន្ត មីនបានមានប្រសាសន៍ថា រយៈពេលប៉ុន្មានឆ្នាំនេះ គឺចុងឆ្នាំ២០១៧ ដើមឆ្នាំ២០១៨ អ្នកវិនិយោគជាតិ-អន្ដរជាតិចូលមកសិក្សាស្វែងរកឱកាសវិនិយោគ និងដាក់ទុនរកស៊ីជាបន្ដបន្ទាប់លើវិស័យនានា ដូចជាឧស្សាហកម្មទេសចរណ៍ ជាពិសេសវិស័យសំណង់ បានបង្ហាញរូបរាងលេចធ្លោជាច្រើន ទាំងតូច ធំពាសពេញខេត្ដព្រះសីហនុ ដែលមានអាគារធំៗ ខ្ពស់ៗរាប់សិបជាន់។ កំណើននៃការវិនិយោគលើសំណង់នេះ បានបង្ហាញនូវផលវិជ្ជមានច្រើន គឺប្រយោជន៍ដល់ប្រជាពលរដ្ឋ និងសេដ្ឋកិច្ចរបស់ខេត្ដ៕

ស្វែងយល់ពីអាស៊ី! តោះទៅមើលស្ថាបត្យកម្មកំពូលៗចំនួន៤នៅទីក្រុងឌូបៃ

November 19, 2018

0

ដោយ វុត្ថា

ភ្នំពេញ៖ អគារខ្ពស់កប់ពពកជាច្រើន និងច្រើនប្រភេទបានដុះច្រូងច្រាងក្នុងទីក្រុងឌូបៃ ប៉ុន្តែមានអគារមិនច្រើនទេ ដែលល្បីល្បាញដែលក្រុមអ្នកទេសចរណ៍មិនអាចបំភ្លេចបាន នៅពេលដែលបានធ្វើដំណើរទៅលេងកម្សាន្ត ក្នុងទឹកដីនៃប្រទេសដែលសំបូរប្រេងនៅលើពិភពលោក។

គេហទំព័រ www.propertyarea.asia សូមលើកយកអាគារមួយចំនួនដែលភាពល្បីល្បាញបំផុតនៅក្នុងទីក្រុងឌូបៃ មកបង្ហាញជូនប្រិយមិត្តអ្នកអាន។

អគារ Burj Khalifa

អគារ Burj Khalifa ជាអគារដែលខ្ពស់បំផុតនៅក្នុងពិភពលោក ដែលមានកំពស់ប្រមាណជា៨២៩ ម៉ែត្រ។ អាគារនេះបានចាប់ផ្តើមនៅឆ្នាំ២០០៤ និងបញ្ចប់ទាំងស្រុងនៅក្នុងឆ្នាំ២០០៩ ព្រមទាំងត្រូវគេបានបើកដំណើរការជាផ្លូវការនៅក្នុងឆ្នាំ២០១។ អគារនេះដ៏អស្ចារ្យមួនេះ ត្រូវបានចំណាយថវិការអស់ចំនួន១៥០០លានដុល្លារ ហើយបានបំបែកកំណត់ត្រាពិភពលោកជាច្រើន ដែលមានប៉មខ្ពស់ជាងគេនៅលើពិភពលោក។

អគារ Burj Khalifa អគារនេះ គឺជាអគារប្រើប្រាស់ពាណិជ្ជកម្មចម្រុះ ហើយជាផ្នែកមួយនៃការអភិវឌ្ឍនៃទីក្រុងឌូបៃមួយទៀត ហើយមានលក្ខណៈទ្រង់ទ្រាយធំ និងទាក់ទាញបំផុតដែលក្រុមអ្នកទេសចរណ៍មិនអាចបំភ្លេចបាន។

អគារ Almas Tower

អគារ Almas Tower មានកំពស់៨៦ជាន់ និង៣៦៨ម៉ែត្រ ដែលសាងសង់នៅមាត់បឹង Jemeirah នៅក្នុងទីក្រុងឌូបៃ ។ អគារនេះ ត្រូវបានសាសង់នៅក្នុងឆ្នាំ ២០០៥ និងបញ្ចប់នៅក្នុងឆ្នាំ ២០០៩ ដែលចំណាយថវិកាអស់ថវិកាចំនួន៣,៦ពាន់លានលុយអារ៉ាប់រួម ជាប្រភេទអគារការិយាល័យពាណិជ្ជកម្ម។ អគារនេះ មានរូបរៀងដែលទាក់ទាញបំផុតដែលឆ្នៃឡើងប្រកបដោយស្ថាបត្យកម្មទំនើប និងបច្ចេកវិទ្យាខ្ពស់។

អគារ Cayan Tower

អគារ Cayan ដែលគេស្គាល់ថាជាអគារ Infinity Tower មានកម្ពស់៣០៦ម៉ែត្រនិង៧៥ជាន់ស្ថិតនៅទីក្រុង Dubai ប្រទេសអារ៉ាប់រួម ដែលវិនិយោគដោយក្រុមហ៊ុនអច លនទ្រព្យដ៏ធំ គឺ Cayan ។

អគារនេះត្រូវបានរចនាឡើង ដោយក្រុមហ៊ុនស្ថាបត្យកម្មល្បីល្បាញគឺ Skidmore Owings និង Merrill SOM។ អាគារ Cayan Tower ជាប្រភេទអគារផ្ទះល្វែងដ៏ប្រណីតដែលមានរូបរាងរាងប្លែកដ៏គួរឱ្យចាប់អារម្មណ៍។ ជាន់នៃគារនីមួយៗ មានរាងកំណត់១.២ ដឺក្រេ តាមទ្រនិចនាឡិកាពីជាន់ខាងក្រោម ដែលធ្វើឱ្យប៉មនេះមានទម្រង់ខុសប្លែកពីគ្នាតាមរចនាបទថ្មីប្រកបដោយប្រសិទ្ធភាព និងអាចធ្វើឡើងវិញបាន។

អគារ Cayan ត្រូវបានសម្ពោធដាក់អោយដំណើការជាផ្លូវការ កាលពីថ្ងៃទី១០ ខែមិថុនាឆ្នាំ២០១៣ ។

អគារ Princess Tower

អគារPrincess Tower មានកំពស់១០១ ជាន់ និង៤១៣ ម៉ែត្រ ដែលស្តិតនៅក្នុងតំបន់ Marina ទីក្រុងឌូបៃប្រទេសអារ៉ាប់រួម។ អគារនេះជាប្រភេទអគារស្នាក់នៅ ហើយមានកំពស់លំដាប់ទី៣ បន្ទាប់ពីអគារអគារផ្សេងទៀតនៅក្នុងទីក្រុង ។ អគារនេះ បានជាប់កំណត់ត្រា ជាអគារដែលជាអគារស្នាក់នៅខ្ពស់ជាងគេនៅក្នុងពិភពលោក កាលពីឆ្នាំ ២០១២ រហូត២០១៥ ។

មិនត្រឹមតែប៉ុណ្ណោះអគារនេះ មានរចនាបទប្រកបដោយស្ថាបត្យកម្មទំនើប និងទាក់ទាញ។ អគារនេះចាប់ផ្តើមសាងសង់នៅក្នុងឆ្នាំ ២០០៦ និងបញ្ចប់នៅក្នុងឆ្នាំ ២០១២ ៕

មជ្ឈមណ្ឌលពាណិជ្ជកម្មអន្តរជាតិតម្លៃ ៥០០លានដុល្លារ នឹងបញ្ចប់ការសាងសង់នៅឆ្នាំ២០២០

November 19, 2018

0

ដោយ គង់ សូរិយា

ភ្នំពេញ៖ មជ្ឈមណ្ឌលពាណិជ្ជកម្មលំដាប់អន្តរជាតិ ដែលបោះទុនវិនិយោគរហូតដល់៥០០លានដុល្លារអាមេរិក The PeAk នឹងបញ្ចប់ការសាងសង់ព្រមទាំងដាក់ឲ្យដំណើរការនៅឆ្នាំ២០២០ខាងមុខនេះ។

គំរោងនេះមិនត្រឹមតែជាខុនដូប្រណីតទេ តែមានសណ្ឋាគារ Shangri_La ការិយាល័យលំដាប់ផ្កាយ៥ ផ្សារទំនើបលំដាប់អន្តរជាតិ និងសេវាកម្មអាផាតម៉ិនពិសេសផងដែរ។

នាយកផ្នែកទីផ្សារនៃក្រុមហ៊ុន FURI Real Estate ដែលជាក្រុមហ៊ុនបានទិញអាគារការិយាល័យក្នុងគំរោងនេះ កញ្ញាលឹម សុខាដាវីនបានមានប្រសាសន៍ឲ្យដឹងកាលពីពេលថ្មីៗនេះថា គំរោងនេះបាននិងកំពុងសាងសង់យ៉ាងសកម្ម ដោយធ្វើទាំងយប់ទាំងថ្ងៃ ជាលទ្ឋផលគឺមួយអាទិត្យក្រុមហ៊ុនសាងសង់ អាចសាងសង់ឡើងមួយជាន់បានក្នុងមួយអាទិត្យ។

កញ្ញាបន្តថា “រហូតមកទល់ពេលនេះ គំរោងនេះសាងសង់បានដល់ជាន់ទី៣១ហើយ ខណៈគំរោងនេះគ្រោងបញ្ចប់នៅឆ្នាំ២០២០ខាងមុខនេះ។

កញ្ញាបន្តថា “គំរោងនេះជាមជ្ឈមណ្ឌលពាណិជ្ជកម្មចម្រុះ ដែលរួមមានខុនដូជាង១១០០យូនីត ផ្សារទំនើប សណ្ឋាគារ Shangri_La កម្រិតផ្កាយ៥លំដាប់អន្តរជាតិ អាងហែលទឹក និងអាគារការិយាល័យកម្រិតផ្កាយ៥ Plus ផងដែរ។

The PeAk ជាគំរោងអភិវឌ្ឍន៍រួមគ្នាដោយក្រុមហ៊ុន World Bridge Land និងក្រុមហ៊ុនOxley Holding ដែលមានមូលដ្ឋាននៅប្រទេសឹង្ហបុរី។

លោកឧកញ៉ាសៀ រិទ្ឋីប្រធានក្រុមប្រឹក្សាភិបាលនៃក្រុមហ៊ុន World Bridge Land ធ្លាប់បានមានប្រសាសន៍ឲ្យដឹងថា រហូតមកទល់ពេលនេះការលក់របស់យើងបានសម្រេចគោលដៅហើយ ដោយយើងផ្តោតអតិថិជនជាជនជាតិខ្មែរជាអាទិភាព។លោកបន្តថា គំរោងរបស់លោកតែងតែទទួលបានជោគជ័យ ព្រោះបើមិនជោគជ័យយើងមិនធ្វើនោះទេ។

លោកបន្តថា “ការសាងសង់ខុនដូត្រូវផ្តោតលើទីតាំង ទីតាំង និងទីតាំង ហើយយើងអាចផ្តល់ជូនអតិថិជននូវសេវាកម្មចម្រុះ ដែលអាចឲ្យពួកគេអាចរកសេវាកម្មចាំបាច់បាននៅក្នុងអាគារដែលពួកគេស្នាក់នៅ។ លោកបន្តថា “ជាក់ស្តែងគំរោង The PeAk ត្រូវបានអភិវឌ្ឍន៍តាមទស្សនទានថ្មី ដោយមានស្ទើរគ្រប់សេវាកម្មនៅទីនេះ ដែលមានទាំងផ្សារទំនើប ក្លឹបហាត់ប្រាណ ការិយាល័យធ្វើការ និងសណ្ឋាគារជាដើម។

គំរោង The PeAk ស្ថិតនៅក្បែរកោះពេជ្រ ក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ៕

លោកច្រឹក សុខនីម បង្ហើបពីគន្លឹះជោគជ័យសម្រាប់ភ្នាក់ងារអចលនទ្រព្យ

November 19, 2018

0

ដោយ រ៉ាវី

ភ្នំពេញ៖ ដើម្បីក្លាយជាក្រុមហ៊ុនភ្នាក់ងារអចលនទ្រព្យឈានមុខគេមួយ មិនមែនជារឿងសាមញ្ញពេកនោះទេ ហេតុនេះការសិក្សាពីមនុស្សជោគជ័យ ជាអ្វីដែល Propertyarea.asia តែងតែលើកយកមកបង្ហាញ។

នៅក្នុងចំណោមក្រុមហ៊ុនទាំង១៣ ដែលបានទទួលពានរង្វាន់ពីក្រុមហ៊ុនអចលនទ្រព្យលំដាប់ពិភពលោក Century21 Cambodia ក្រុមហ៊ុនភ្នាក់ងារអចលនទ្រព្យ Century 21 Mekong បានក្លាយជាក្រុមហ៊ុននាំមុខគេ ក្នុងចំណោមក្រុមហ៊ុនដៃគូប្រកួតក្នុងក្រុមប្រចាំកម្ពុជា។

ជាមួយនឹងភាពមមាញឹកក្នុងការងារ និងការធ្វើអ្វីមានបែបផែន និងយុទ្ឋឋសាស្ត្រត្រឹមត្រូវ លោកច្រឹក សុខនីម អគ្គនាយកក្រុមហ៊ុន Century 21 Mekong នៅកម្ពុជាបានបង្ហើបប្រាប់ថា មុនពេលប្រគល់ពានរង្វាន់ប្រចាំឆ្នាំខាងលើនេះ ក្រុមហ៊ុនមេ ដែលជាអ្នកវាយតម្លៃ បានសិក្សាយ៉ាងច្បាស់លាស់ ទៅលើប្រតិបត្តិការ រួមជាមួយសមិទ្ធផលដែលទទួលបាន តាមរយៈប្រតិបត្តិការយ៉ាងសកម្មប្រកបដោយប្រសិទ្ធភាពខ្ពស់របស់ក្រុមហ៊ុន Century 21 Mekong យ៉ាងលម្អិតបំផុត ។

លោកបន្តថា មានចំណុចសំខាន់ៗចំនួន3 ដែលធ្វើឱ្យ Century 21 Mekong អាចឡើងទទួលបានពានប្រចាំឆ្នាំនោះ គឺ ភាពសកម្មទៅលើដំណើរប្រតិបត្តិការទៅលើការទិញ លក់ និងជួលប្រកបដោយប្រសិទ្ធភាព បរិមាណទឹកប្រាក់ប្រតិបត្តិការមានចំនួនច្រើន រួមជាមួយនឹងប្រសិទ្ធភាព នៃសេវាផ្តល់ប្រឹក្សាចំពោះអតិថិជន។

លោកច្រឹក សុខនីម បានបញ្ជាក់ទៀតថា « ក្រៅពីមានចំណុចសំខាន់ៗចំនួនបីខាងលើនេះ វានៅមានចំណុចបន្ទាប់បន្សំមួយចំនួនទៀត ដែលចំណុចតូចៗទាំងនេះ ក៏ជាចំណែករួមផ្សំយ៉ាងសំខាន់ ដែលអាចធ្វើឱ្យក្រុមហ៊ុន Century 21 Mekong ទទួលបានជោគជ័យដូចពេលនេះ»។

លោកបានបញ្ជាក់ថា «នៅក្នុងវិស័យអចលនទ្រព្យ មានផ្នែកជាច្រើនខុសៗគ្នា ហេតុនេះយើងជាភ្នាក់ងារអចលនទ្រព្យ ឬចង់វិនិយោគក្នុងវិស័យនេះ ត្រូវមានជំនាញជាក់លាក់ ទើបយើងអាចធ្វើបានតាមគោលដៅរបស់យើង អាចទទួលបានប្រាក់ចំណេញ និងបញ្ចៀសបាននូវហានិភ័យចំពោះមុខ។

កក្តាសំខាន់ដំបូង គឺការកសាងកេរ្តិ៍ឈ្មោះជាមុនសិន ព្រោះកេរ្តិ៍គឺជារឿងចាំបាច់ក្នុងរយៈពេលវែង។លោកសុខ នីមបញ្ជាក់ឲ្យដឹង។

លោកបន្តថា “នៅក្នុងក្រុមហ៊ុន Century21 Mekong មុនចេញទៅធ្វើការ បុគ្គលិកត្រូវទទួលការបណ្តុះបណ្តាលចំនួន៤ចំណុចជាមុនសិន ដូចជា ជំនាញក្នុងការនិយាយ ជំនាញក្នុងការទំនាក់ទំនងភ្ញៀវ ជំនាញក្នុងការដោះស្រាយបញ្ហារបស់អតិថិជន និងជំនាញក្នុងការទិញ លក់ ជួលដោយជោគជ័យ។

បន្ទាប់មកផ្តល់ទំនុកចិត្ត និងភាពជឿជាក់ដល់អតិថិជន ដូចជាចំណេះដឹងពាក់ព័ន្ធ ទៅនឹងវិស័យអចលនទ្រព្យនៅក្នុងតំបន់ ទាំងផ្នែកច្បាប់ ដឹងច្បាស់ពីនីតិវិធីនានាក្នុងការផ្ទេរកម្មសិទ្ធិ ផ្តល់ប្រឹក្សាយោបល់ទៅដល់ដល់អតិថិជនប្រកបដោយក្រមសីលធម៌ ដែលជាអ្នកឈរនៅកណ្តាល ដែលបង្ហាញពីភាពស្មោះត្រង់ទៅលើវិជ្ជាជីវៈ។ បន្ថែមពីនេះ នៅមានចំណុចបន្ទាប់បន្សំផ្សេងៗទៀត ដូចជាការផ្ដល់ពិគ្រោះយោបល់ដល់អតិថិជន នៅពេលខ្វះថវិកាទៅកាន់បណ្តាស្ថាប័នហិរញ្ញវត្ថុ ឬធនាគាដែលជាដៃគូជាដើម៕

ដំណឹងល្អ! គំរោងអាគារ Diamond Tower កំពស់ ៥៥៥ម៉ែត្រ នឹងចាប់សាងសង់នៅឆ្នាំ២០២០

November 19, 2018

0

ដោយ គង់ សូរិយា

ភ្នំពេញ៖ គំរោងសាងសង់អាគារពាណិជ្ជកម្មខ្ពស់ជាងគេនៅទីក្រុងកោះពេជ្រ ដែលគ្រោងដំឡើងកំពស់ពី៥៥៥ម៉ែត្រ ទៅ៦០០ម៉ែត្រនឹងចាប់ផ្តើមសាងសង់នៅឆ្នាំ២០២០ខាងមុខនេះ ប្រសិនជាគ្មានការប្រែប្រួលទេនោះ។

បុគ្គលិកជាន់ខ្ពស់នៃក្រុមហ៊ុន Morgan Group បាននិយាយក្នុងលក្ខខ័ណ្ឌមិនបញ្ចេញឈ្មោះបានឲ្យដឹងកាលពីថ្ងៃទី១៨ វិច្ឆិកាកន្លងមកថា គំរោងសាងសង់អាគារខ្ពស់ជាងគេនៅទីក្រុងកោះពេជ្រនេះ នឹងចាប់ផ្តើមសាងសង់នៅឆ្នាំ២០២០ខាងមុខ ដោយគំរោងនេះ នឹងសហការវិនិយោគរវាងក្រុមហ៊ុន OCIC ជាមួយក្រុមហ៊ុនមកពីប្រទេសចិន ដែលក្រុមហ៊ុននេះមានវត្តមាននៅប្រទេសកម្ពុជារួចហើយ។ ប៉ុន្តែទោះជាយ៉ាងណាកញ្ញាមិនបញ្ជាក់ឲ្យដឹងពីឈ្មោះក្រុមហ៊ុន ដែលនឹងចាប់ដៃជាមួយក្រុមហ៊ុន OCIC នោះទេ។

កញ្ញាបន្តថា “រដ្ឋាភិបាលចិនចង់ផ្តល់ចំណងដៃដល់ទីក្រុងភ្នំពេញ តាមការអនុញ្ញាត្តឲ្យក្រុមហ៊ុនមកពីប្រទេសចិនសចិន ចាប់ដៃគូជាមួយក្រុមហ៊ុនកម្ពុជា។

អគ្គនាយករងក្រុមហ៊ុន OCIC លោកទូច សំណាងធ្លាប់បានថ្លែងឲ្យដឹងកាលពីពេលថ្មីៗនេះថា គម្រោងសាងសង់អាគារកប់ពពកនេះ អាចនឹងមានការដំឡើងកំពស់ខ្ពស់ជាង៥៥៥ម៉ែត្រ ប៉ុន្តែនៅពេលសម្ភាសន៍តាមទូរស័ព្ទនាព្រឹកថ្ងៃទី១៩ វិច្ឆិកានេះលោកបានបដិសេធមិនអត្ថាធិប្បាយ ដោយបានមានប្រសាសន៍ថា លោកមិនទាន់មានព៌តមានលំអិតពីគំរោងនេះនៅឡើយទេ ប៉ុន្តែគំរោងនេះពិតប្រាកដណាស់ នឹងមិនត្រូវបានលុបចោលនោះទេ។

បើតាមលោកទូច សំណាងបញ្ជាក់នាពេលកន្លងមក Diamond Tower នឹងសាងសង់តាមខ្សែស្របពិសេសមួយ ដោយវានឹងស្ថិតនៅនៅក្បាលទីតាំងកោះពេជ្រ ហើយអាគារនេះនឹងរត់ស្របគ្នានឹងរូបសំណាកសម្តេចសង្ឃជួន ណាត និងរូបសំណាកព្រះបរមរតនកោដិ និងវិមានឯករាជ្យផងដែរ៕

ក្រុមហ៊ុន Century21 កម្ពុជា ចិន ចាប់ដៃគ្នាលក់អាគារពាណិជ្ជកម្មតម្លៃ ១៦០លានដុល្លារ

November 19, 2018

0

ដោយ ស៊ីវ ម៉េង

ភ្នំពេញ៖ ក្រុមហ៊ុន Century21 Cambodia និងក្រុមហ៊ុន Century21 មកពីប្រទេសចិនបានចាប់ដៃគ្នា ដើម្បីលក់អាគារពាណិជ្ជកម្ម Morgan Tower តម្លៃ ១៦០ដុល្លារអាមេរិក ដែលបាននិងកំពុងសាងសង់នៅទីក្រុងកោះពេជ្រ រាជធានីភ្នំពេញ។

មានប្រសាសន៍ក្រោយពីបញ្ចប់ ការចុះហត្ថលេខាលើអនុស្សរណៈដោយអនុញ្ញាត្តឲ្យក្រុមហ៊ុន Century21 ប្រចាំកម្ពុជា និងក្រុមហ៊ុន Century21 មកពីប្រទេសចិនលក់គំរោងនេះផ្តាច់មុខកាលពីរសៀលថ្ងៃទី១៨ វិច្ឆិកា ឆ្នាំ២០១៨កន្លងទៅ នៅរាជធានីភ្នំពេញ លោក Hu Sheng Gong អនុប្រធានក្រុមហ៊ុន Morgant Tower បានបញ្ជាក់ថា បានជាលោកចាប់អារម្មណ៍វិនិយោគនៅកម្ពុជានេះ ដោយសារយុទ្ធសាស្ត្រខ្សែក្រវ៉ាត់ និងផ្លូវជាចម្បងនៃប្រទេសចិន និងជំរុញដោយគោលនយោបាយអាស៊ាន កម្ពុជាបានក្លាយជាប្រទេសដេលពេញនិយមនិងចាប់អារម្មណ៍។ ជាងនេះទៀតដោយសារស្ថានភាពនយោបាយរបស់កម្ពុជាមានស្ថេរភាព ពិសេសរដ្ឋាភិបាល បានបង្កើតបរិយាកាសធុរកិច្ច សុវត្ថិភាពដែលគាំទ្រវនិយោគអាជីវកម្មល្អ។

លោកបន្តថា ទំនាក់ទំនងល្អរវាងប្រមុខរដ្ឋាភិបាលនៃប្រទេសទាំងពីរ ដែលរ៉ឹងមាំប្រៀបដូចដែកថែប ក៏ជាផ្នែកមួយយ៉ាងសំខាន់ ដែលជម្រុញឲ្យលោកវិនិយោគគម្រោងដ៏ធំនេះ នៅរាជធានីភ្នំពេញផងដែរ។

អ្នកវិនិយោគគំរោងនេះ បានផ្តល់សិទ្ធិទៅភ្នាក់ងារលក់អចលនទ្រព្យដល់ក្រុមហ៊ុន Century21 Cambodia និង Century21 China ដើម្បីសហការគ្នាផ្សព្វផ្សាយលក់គម្រោង Morgantឲ្យទទួលបានភាពជោគជ័យ។

Morgant Tower គឺជាអគារការិយាល័យស្តង់ដារ អេប្រាំ (A5) ដែលនឹងក្លាយជាតំបន់ពាណិជ្ជកម្មពិសេសក្នុងក្រុងភ្នំពេញ មានកម្ពស់រហូតដល់៤៦ជាន់ ស្មើនឹងកម្ពស់២១០ម៉ែត្រ ដែលបាននិងកំពុងដំណើរការសាងសង់យ៉ាងសកម្ម។

លោក Seraj Sutton ប្រធានប្រតិបត្តិការិយាល័យនៃក្រុមហ៊ុន Century21 Cambodia ដែលជាក្រុមហ៊ុនភ្នាក់ងារអចលនទ្រព្យអន្តរជាតិ បានថ្លែងឲ្យដឹងផងដែរថា ក្រុមហ៊ុនអចលនទ្រព្យ Century21 Cambodia មានកិត្តិយសយ៉ាងខ្ពង់ខ្ពស់ដែល Morgan Tower ផ្តល់សិទិ្ធជាភ្នាក់ងារលក់យ៉ាងសំខាន់សម្រាប់គំរោងមួយនេះ។លោកបន្តថា ការសហការគ្នាក្នុងការលក់ និងជួលគំរោងនេះជាមួយក្រុមហ៊ុនCentury21មកពីប្រទេសចិន ដោយសារប្រទេសចិនជាគោលដៅវិនិយោគដ៏មានសក្តានុពល មានអតិថិជនច្រើន មានឳកាសច្រើន ពិសេសក្រុមហ៊ុនទាំងនោះមានបទពិសោធន៍ច្រើន និងមានការិយាល័យលក់ច្រើននៅប្រទេសចិន។

ម្យ៉ាងវិញទៀត ការសហការមួយនេះ ជាការសហការយូរអង្វែង ដោយ Centuy21 Cambodia តាមរយះការិយាលយទាំង ២១របស់ខ្លួនក្នុងប្រទេសកម្ពុជា នឹង ផ្តល់សេវាកម្មអចលនទ្រព្យបន្ថែមទៀត ចំពោះគម្រោង Morgan Tower នេះ ដូចជា ការដាក់ជួល និងលក់បន្តសម្រាប់អ្នកដែលបានវិនិយោគគំរោងនេះនាពេលអនាគតផងដែរ។

យោងតាមសេចក្តីប្រកាសព៌តមានបានឲ្យដឹងថា អ្នកវិនិយោគគំរោងនេះ នឹងទទួលបានការជួលត្រលប់មកវិញ និងទទួលបានប្រាក់ចំណេញពីការវិនិយោគ៨ភាគរយក្នុងមួយឆ្នាំ(Return of Investment) សម្រាប់រយៈពេល ៥ឆ្នាំ។ គំរោងនេះនឹងជា Landmark ថ្មីមួយសម្រាប់ទីក្រុងភ្នំពេញ ហើយ Morgan Tower ជាគំរោងអាគារការិយាល័យ ខុនដូប្រកបដោយប្រណីតភាព និងទាន់សម័យ ដែលអ្នកស្នាក់នៅនឹងទទួលអារម្មណ៍ថាមានផាសុខភាព និងអាចគយគន់ទិដ្ឋភាពដ៏ប្រណីតនៃរាជធានីភ្នំពេញ៕

បុរី VIP ចាប់ផ្តើមប្រកាសលក់គំរោងលំនៅដ្ឋានតម្លៃសមរម្យនៅក្រុងព្រះសីហនុនៅថ្ងៃនេះ

November 17, 2018

0

ដោយ គង់ សូរិយា

ភ្នំពេញ: បុរីតម្លៃសមរម្យដំបូងគេនៅខេត្តព្រះសីហនុ ដែលស្ថិតនៅលើផ្ទៃដីជាង៦០ហិកតាបានប្រកាសលក់ជាផ្លូវការនៅថ្ងៃទី១៧នេះហើយ និងកំពុងទទួលបានការចាប់អារម្មណ៍និងជាវច្រើនពីអតិថិជន។

លោកយ៉ែន សុខលីនប្រធានផ្នែកទីផ្សារនៃបុរីVIPបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៧ វិច្ឆិកានេះថា គ្រាន់តែប្រកាសលក់ភ្លាម រហូតមកទល់ពេលនេះមានអ្នកបញ្ជាទិញ និងកក់ជាង២០០ល្វែងហើយ។ គំរោងនេះស្ថិតនៅឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ពោលគឺស្ថិតនៅស្របតាមផ្លូវជាតិលេខ៤។
គំរោងបុរីVIP ផ្ទះល្វែងកូនកាត់ ជាង 4000 ល្វែង មានផ្សារ សាលារៀន ក្លឹបហាត់ប្រាណ សួនកំសាន្ត ផ្លូវចូលធំទូលាយ សល់មុខផ្ទះ៥ម៉ែត្រ និងលើសពីនេះអាស្រ័យតាមទីតាំងនិមួយៗ។

លំនៅដ្ឋានក្នុងគំរោងនេះមានតម្លៃចាប់ពី២៧៩០០ដុល្លារអាមេរិកឡើងទៅ ដោយតម្លៃផ្ទះនិមួយៗមានភាពខុសគ្នាអាស្រ័យលើទីតាំង និងទំហំព្រមទាំងប្រវែងផ្ទះ។

លោកយ៉ែន សុខលីនបានបន្តថា គំរោងនេះមិនត្រឹមតែមានបុរីនោះទេ ប៉ុន្តែក៏មានមជ្ឈមណ្ឌលពាណិជ្ជកម្ម រោងចក្រ សហគ្រាសនានា ដែលអាចទទួលកម្មករ និយោជិតចូលបំរើការងារបានប្រមាណ៥០,០០០នាក់ផងដែរ។លោកបន្តថា មូលហេតុដែលក្រុមហ៊ុនសម្រេចចិត្តវិនិយោគគំរោងនេះ ដោយសារខេត្តព្រះសីហនុមានការរីកចម្រើនលឿន មានកំនើនប្រជាពលរដ្ឋយ៉ាងឆាប់រហ័ស ពិសេសការកើនឡើងនូវកំនើនអ្នកវិនិយោគអន្តរជាតិ ដែលធ្វើឲ្យប្រជាពលរដ្ឋមានការងារធ្វើ និងប្រាក់ចំណូលកើនឡើងខ្ពស់ ធៀបនឹងបណ្តាខេត្ត ក្រុងដទៃទៀត។

យោងតាមការសិក្សារបស់ក្រុមហ៊ុន FURI Real Estate បានឲ្យដឹងថា បច្ចុប្បន្នក្រុងព្រះសីហនុមានប្រជាពលរដ្ឋរស់នៅជាង២០ម៉ឺននាក់ និងមានកាស៊ីណូកើនឡើងច្រើន ពិសេសភ្ញៀវទេសចរណ៍ជាតិ អន្តរជាតិទៅទស្សនាកំសាន្តនៅក្នុងខេត្តនេះបានកើនឡើងចន្លោះពី៨០០០ទៅ៩០០០នាក់ក្នុងមួយថ្ងៃ។ ការសិក្សានេះក៏បានរកឃើញផងដែរថា ប្រជាពលរដ្ឋពិសេសអ្នកបំពេញការងារមានប្រាក់ខែច្រើនជាងខេត្តដទៃ ហើយការជួលលំនៅដ្ឋានបានកើនឡើង ដែលពីមុនផ្ទះមួយល្វែងមាន៤ទៅ៥បន្ទប់អាចជួលបានចន្លោះពី៤០០ទៅ៦០០ដុល្លារ បច្ចុប្បន្នអាចជួលបានចន្លោះពី៤០០០ទៅ៦០០០ដុល្លារអាមេរិកក្នុងមួយចឲខែ៕

+6

អ្នកវិនិយោគថៃគ្រោងវិនិយោគរមណីដ្ឋាននិងលំនៅដ្ឋាននៅតាមបណ្តោយផ្លូវជាតិលេខ៣

November 17, 2018

0

ដោយវុត្ថា

ភ្នំពេញ: អ្នកវិយោគថៃមួយក្រុមសហការជាមួយ នឹងអ្នកវិយោគខ្មែរកំពុងសិក្សាបង្កើតរម្មណីយដ្ឋាន សាងសង់ផ្ទះល្វែង និងខុនដូរនៅតាមណ្តោយផ្លូវជាតិលេខ៣នាពេលខាងមុខនេះ។

បើតាមប្រភពដែលគួរអោយទុកចិត្តបញ្ជាក់ថា ក្រុមអ្នកវិនិយោគថៃមួយក្រុមនេះ នឹងមកដល់ប្រទេសកម្ពុជានៅចុងខែនេះ ដើម្បីសិក្សាពីផែនការវិនិយោគ និងទីតាំងវិនិយោគអោយបានច្បាស់លាស់ ដើម្បីចូលរួមអភិវឌ្ឍន៍លើវិស័យទេសចរណ៍ជាមួយរាជរដ្ឋាភិបាលកម្ពុជា និងកាត់បន្ថយភាពក្រីក្រជូនប្រជាពលរដ្ឋ។
ប្រភពដដែលបបន្តថា ដោយសារប្រទេសកម្ពុជាមានសុខសន្តិភាព ការអភិវឌ្ឍន៍ និងសក្តានុពលទេសចរណ៍ ទើបមានក្រុមអ្នកវិយោគបរទេស មកពីបណ្តាប្រទេសនៅក្នុងអាស៊ានជាច្រើន បានចាប់អារម្មណ៍មកបណ្តាក់ទុននិវិយោគ នៅក្នុងប្រទេសកម្ពុជាលើវិស័យផ្សេងៗជាច្រើនទៀត មិនថាក្រុមវិយោគថៃនោះទេ។

បន្ថែមពីនេះវិស័យទេសចរណ៍ និងវិស័យសំណង់ នៅក្នុងប្រទេសកម្ពុជានាពេលបច្ចុប្បន្ន កំពុងរីកលូតលាស់ខ្លាំងនិងចាប់អារម្មណ៍ បំផុតពីសំណាក់ក្រុមអ្នកវិយោគក្នុងស្រុក និងក្រៅស្រុក។

បើតាមប្រភពដែលគួរទុកចិត្តនេះបញ្ជាក់ទៀតថា ការវិយោគទៅលើវិស័យរម្មណីយដ្ឋាន ផ្ទះល្វែងនិងខុនដូននេះ នៅមិនឆ្ងាយពីរាជធានីភ្នំពេញឡើយប្រហែលជា១៥ ទៅ ៣០គីឡូម៉ែត្រពីរង្វង់មូលចោមចៅ នៅតាមបណ្តោយផ្លូវជាតិលេខ៣ លើទំហំដីចំនួន២០ទៅ៣០ហិកតា តែយ៉ាងដោយលោកមិនបានបង្ហើបឲ្យដឹងពីឈ្មោះក្រុមហ៊ុនថៃ និងក្រុមហ៊ុនខ្មែរដែលសហការ បោះទុនវិនិយោគក្នុងទំហំទឹកប្រាក់បុន្មាននោះទេ ព្រោះស្ថិតនៅក្នុងដំណាក់កាលចរចារ និងសិក្សាគម្រោងវិយោគ តែលោកបញ្ជាក់យ៉ាងខ្លីថាគឺជាក្រុមហ៊ុនធំលំដាប់ទី២នៅក្នុងប្រទេសថៃ៕

ដំណឹងល្អៈទីក្រុងរណបក្រុងបាវិតនឹងចាប់ផ្តើមសាងសង់នៅខែធ្នូចុងឆ្នាំនេះហើយ

November 17, 2018

0

ដោយ ស៊ីវ ម៉េង

ភ្នំពេញ: ទីក្រុងរណបស្ថិតក្នុងក្រុងបាវិត ខេត្តស្វាយរៀងនឹងចាប់ផ្តើមបើកការដ្ឋានសាងសង់នៅខែធ្នូចុងឆ្នាំនេះហើយ សម្រាប់គំរោងដំណាក់កាលទី១ នៃគំរោងទីក្រុងរណបដែលស្ថិតនៅលើផ្ទៃដី៨០៣ហិកតា។

កាលពីថ្ងៃទី១៤ខែវិច្ឆកា កន្លងទៅនេះ ក្រុមហ៊ុនអភិវឌ្ឍន៍គំរោងដ៏ធំមួយដែលមានប្រភពមកពីប្រទេសចិន Empire World Group បានចុះហត្ថលេខាភាពជាដៃគូ ជាមួយក្រុមហ៊ុន Enterpreneur Reality Partners(Cambodia) Co., Ltd & ក្រុមហ៊ុន Alpha City Co., Ltd លើគំរោងទីក្រុងរណបថ្មីមួយដ៏ធំជាងគេ លើទឹកដីក្រុងបាវិត ខេត្តស្វាយរៀង។ ដោយមានការចូលរួមពី Mr. Chew Teck Kong (Business Consultant) & Mr. Eric Loo (CEO) នៃក្រុមហ៊ុន Empire World Group ផងដែរ។

លោកNguyen Phoung Hoang (Jay) តំណាងរបស់ Empire World Group បានមានប្រសាសន៍ឲដឹងថា គំរោងនេះសរុប៨០៣ហិចតា ប៉ុន្តែសម្រាប់ជំហ៊ានដំបូងគឺយើងចាប់ផ្តើមពី៥០ហិចតាសិន ដោយក្នុងនោះមានជា ទី១ Creative Park (មានដូចជា ផ្សារទំនើប អាហារដ្ឋាន ហាងនំ ហាងកាហ្វេ ជាដើម) ទី២ OBC (Online Business Concept) អគារសម្រាប់លក់ ឬជួល ទី៣ Technology Park អគារបណ្តុះបណ្តាលផ្នែកបច្ចេកវិទ្យាធំជាងគេនៅតំបន់អាស៊ីអាគ្នេយ៍ ទី៤ E-Sports Stadium កន្លែងកីឡាផ្សេងៗ ទី៥ Apartment អគារស្នាក់នៅទំនើបប្រណិត។
ទី៦ Casino & Hotel កាស៊ីណូ អូតែលដ៏ធំ។ គំរោងនេះចាប់ផ្តើមដំណើរការពីពេលនេះ និងបញ្ចប់ក្នុងរយះពេល៤ ទៅ៦ឆ្នាំខាងមុខ។

លោក សោម កែវម៉ាលីដា (Andy) នាយកក្រុមហ៊ុន Alpha City Co., Ltd និង ជាអនុប្រធានសមាគមអ្នកជំនាញអចលនទ្រព្យកម្ពុជា (Cambodia Real Estate Association) បានមានប្រសាសន៍ថា លោកពិតជាមានសេចក្តីរីករាយខ្លាំង ដែលបានក្លាយជាដៃគូសហការលក់លើគំរោងដ៏ធំមួយនេះ។ គំរោងនេះមិនត្រឹមតែលើកមុខមាត់ ក្រុងបាវិត ខេត្តស្វាយរៀងតែប៉ុណ្ណោះទេ វាថែមទាំងជួយបង្កើនការងារ ប្រាក់ចំណូល សេដ្ឋកិច្ច និងធ្វើឲគំរោងធំៗដ៏ទៃទៀតចាប់អារម្មណ៍លើទឹកដីដ៏វិសេសមួយនេះ។

លោកបន្តថា “ ខ្ញុំជឿជាក់ថាគំរោងនេះ និងផ្លាស់ប្តូរមុខមាត់ក្រុងបាវិត ខេត្តស្វាយរៀងឆាប់ៗនេះ។លោកបន្ថែមថា “ខ្ញុំជឿជាក់ថាគំរោងមួយនេះ នឹងដំណើរការតាមផែនការដោយរលូន”៕