ដោយស៊ីវ ម៉េង

ភ្នំពេញ: គំរោងជាច្រើនបានឆ្ពោះទៅកាន់ភាគខាងត្បូងរាជធានីភ្នំពេញ ពិសេសសកម្មភាពអភិវឌ្ឍន៍បានផ្តោតលើទីក្រុងរណប ING CITY ទំហំជាង២០០០ហិកតា ដែលជាទីក្រុងមានទំហំធំជាងគេនៅទីក្រុងភ្នំពេញ។

ក្រុងរណប ING City ដែលស្ថិតនៅតំបន់ភាគខាងត្បូងរាជធានីភ្នំពេញ និងមានផ្លូវសម្តេចតេជោហ៊ុន សែនឬហៅថាផ្លូវ៦០ម៉ែត្រ ពុះកាត់ចំកណ្ដាលនិងផ្លូវធំៗចំនួនពីរចេញពីផ្លូវជាតិលេខ២ ឆ្ពោះភ្ជាប់ទៅកាន់ផ្លូវ២៧១ និងមហាវិថីមួយទៀតចេញពីម្តុំរង្វង់មូល មុខសាលាខេត្តកណ្តាលឆ្ពោះទៅកាន់ផ្លូវលេខ៣៧១បាន និងកំពុងសាងសង់យ៉ាងសក ម្ម។

បច្ចុប្បន្នគំរោងអភិវឌ្ឍន៍ជាច្រើនបានឆ្ពោះទៅកាន់តំបន់នេះ ដូចជាគំរោង កសាងទីក្រុង និងមជ្ឈមណ្ឌលពាណិជ្ជកម្ម នៃក្រុមហ៊ុន R&F Property ដែលបាននិងកំពុងបើកការដ្ឋានសាងសង់គំរោងរបស់ខ្លួន ក្នុងតម្លៃទឹកប្រាក៧០០លានដុល្លារអាមេរិក។

គំរោងបុរីWoodland , បុរី ប៉េង ហួត ដែកកាលពីសប្តាហ៍មុន ក្រុមហ៊ុន បុរី ប៉េង ហួត បានសម្ពោធបុកគ្រឹះសាងសង់គម្រោងផ្សារទំនើបថ្មីមួយរបស់ខ្លួនPH Diamond Place ដោយបានវិនិយោគប្រមាណ ៦០លានដុល្លារអាមេរិក នៅលើផ្ទៃដីជិត៦ហិកតា។

សាលាអន្តរជាតិISPP និងសាលតាំងបង្ហាញរថយន្តម៉ាកម៊ែកសឺដេសក៏បានបើកការិយាល័យរបស់ខ្លួននៅតំបន់នេះផងដែរ។

ផ្សារទំនើប PH Diamond Place ដែលសង់លើផ្ទៃដីជិត៦ហិកតា ផ្សារទំនើបនៃបុរីជីព ម៉ុង និងគំរោងផ្សារទំនើបAEON MALL3កាន់តែធ្វើឲ្យតំបន់នេះកាន់តែរសរវើកនាពេលអនាគត។

លោកជា សុផារ៉ា ទេសរដ្ឋមន្ត្រី រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ បានលើកឡើងថា តំបន់ទីក្រុងរណប ING City នេះ គឺជាតំបន់ដែលមានសក្ដានុពលខ្លាំង ក្នុងការសាងសង់លំនៅដ្ឋាន និងអគារពាណិជ្ជកម្មចម្រុះ ដើម្បីពង្រីកកំណើនសេដ្ឋកិច្ចសង្គមទៅថ្ងៃអនាគត។

លោកបន្តថា “ទោះយ៉ាងណាការលូតលាស់ នៃការអភិវឌ្ឍក្នុងតំបន់នេះ ហាក់នៅមានកម្រិតនៅឡើយ ខណៈដែលគម្រោងភាគច្រើនមានតែក្នុងគំនូររូបភាព តែមិនទាន់ឃើញសាងសង់ចេញជារូបរាងនៅឡើយទេ”។

លោកជា សុផារ៉ាបានបន្តថា តំបន់នេះគឺជាតំបន់មួយ ដែលលោកឧកញ៉ា អ៊ឹង ប៊ុនហ៊ូវ ជាអ្នករៀបចំការអភិវឌ្ឍ ហើយការអភិវឌ្ឍដែលជាដុំកំភួននោះ គឺផ្លូវ ៦០ម៉ែត្រ ហើយការអភិវឌ្ឍផ្លូវនេះទៀតសោត គឺធ្វើឡើងលក្ខណៈបដិភាគ មានន័យថា អភិវឌ្ឍឆ្លងកាត់ដីនរណា បដិភាគកន្លែងហ្នឹង ហើយការអភិវឌ្ឍនេះ តាំងពីជំនាន់អភិបាលក្រុងឯកឧត្តម ប៉ា សុជាតិវង្ស មកម្ល៉េះ ដោយមានការពិភាក្សាគ្នារវាងខេត្តកណ្ដាល និងរាជធានីភ្នំពេញ។ ឥឡូវនេះ អត់ទាន់ក្លាយទៅជាការពិត ដូចគម្រោងនៅឡើយ។

លោកឧកញ៉ាអ៊ឹង ប៊ុនហូវមិនអាចទាក់ទងសុំការអត្ថាធិប្បាយបានទេ។

អ្នកនាំពាក្យសាលាក្រុងភ្នំពេញ លោកមាស ម៉េតភ័ក្តីបានថ្លែងបដិសេធប
ញ្ជាក់លំអិតពីគំរោងអភិវឌ្ឍន៍នេះ ភ្ជាប់គ្នាជាមួយផ្លូវក្រវ៉ាត់ក្រុងទីបីឬយ៉ាងណាទេ
ដោយលោកបានមានប្រសាសន៍ថា គំរោងអភិវឌ្ឍន៍នៅភាគខាងត្បូងក្រុងភ្នំពេញ និងទីក្រុងរណបING CITYធ្វើឡើងតាមប្លង់គោល(master Plan)របស់ក្រុងភ្នំពេញ ហើយគំរោងអភិវឌ្ឈន៍ណាក៏ដោយ ក៏ត្រូវគោរពតាមប្លង់គោលរបស់ក្រុងភ្នំពេញ។

អតីតវិរស្ថាត្យករកម្ពុជា លោកវណ្ណ ម៉ូលីវណ្ណដែលបានទទួលមរណៈភាពទៅហើយនោះធ្លាប់បានថ្លែងថា ទីក្រុងភ្នំពេញគួរអភិវឌ្ឍន៍ឆ្ពោះទៅភាគខាងត្បូងរាជធានី ដោយសារតំបន់នោះមានសណ្ឋានដីល្អ មានលក្ខខ័ណ្ឌអាកាសធាតុល្អ និងមិនប្រឈមមុខនឹងការលិចទឹក។

អគ្គនាយកក្រុមហ៊ុនCentury21 Mekong លោកច្រឹក សុខនីមបានថ្លែងថា តំបន់ភាគខាងត្បូងក្រុងភ្នំពេញ ពិសេសទីក្រុងរណបING CITY ជាតំបន់ដ៏មានសក្តានុពលមួយ ដែលបច្ចុប្បន្នស្ទើរតែស្ថិតនៅកណ្តាលក្រុងរួចទៅហើយ ដោយសារទី១ ទីតាំងនេះជាទីតាំងBest of The bestឬនិយាយពីការវិនិយោគគឺគេនិយាយពីទីតាំង ទីតាំង ទី២ វាជាតំបន់ថ្មីដែលអាចសាងសង់អាគារបានខ្ពស់ៗ និងផ្សារទំនើបនានាងាយស្រួល។ ទី៣ ជាតំបន់មានសណ្ឋានដីល្អ និងជាតំបន់តភ្ជាប់ជាមួយក្រុងតាខ្មៅ និងស្ថិតនៅកៀកនឹងស្ថាប័នរដ្ឋាភិបាលនានា។

លោកបន្តថា “វាមិនមែនជាតំបន់ទើបមានសក្តានុពលទេ តែជាតំបន់មានសក្តានុពលយូរហើយ”។

ទាក់ទងនឹងការបំពុលផ្សែងពីរោងចក្រ សហគ្រាសនៅតំបន់នេះ លោកសុខនីមបានថ្លែងថា ដោយសារដីឡើងថ្លៃ នាពេលអនាគតរោងចក្រ សហគ្រាសទាំងនោះនឹងរើចេញពីតំបន់នេះមិនខាន ហេតុនេះលោកជឿថា រោងចក្រ សហគ្រាសនៅតំបន់នេះ មិនប៉ះពាល់ដល់ការសម្រេចចិត្តទិញ ឬវិនិយោគពីក្រុមហ៊ុនអភិវឌ្ឍន៍នានានោះទេ។

លោកបន្តថា “តាមធម្មតាគំរោងសាងសង់និមួយៗ ទម្រាំសាងសង់ចប់ចំណាយពេលបីទៅ៥ឆ្នាំ ហេតុនេះទម្រាំគំរោងទាំងនោះសាងសង់ចប់ រោងចក្រ ទាំងនោះនឹងរើចាកចេញហើយ”។

អ្នកនាំពាក្យសាលារាជធានីភ្នំពេញ លោកម៉េត មាសភក្តីបានបដិសេធមិនលើកឡើងពីគម្រោងប្រព័ន្ឋបង្ហូរទឹកចេញពីរាជធានីចូលតំបន់នេះ ដែលត្រូវបានក្រុមហ៊ុនING CITYចាក់ខ្សាច់លុបនោះទេ។

កន្លងមកសាលារាជធានីភ្នំពេញបានសម្រេចរួចហើយ ជាមួយក្រសួងស្ថាប័នពាក់ព័ន្ឋ ដោយកាត់ផ្ទៃបឹងមួយចំនួនចេញពីគំរោងអភិវឌ្ឈន៍នេះ ដើម្បីរក្សាបឹងស្តុកទឹកភ្លៀង និងទឹកសំអុយដែលបង្ហូរចេញពីរាជធានីភ្នំពេញ ទៅកាន់តំបន់នេះ៕

ដោយគង់ សូរិយា

ភ្នំពេញ : ជាទឹកដីដែលមានអាកាសធាតុអំណោយផល មានទន្លេព័ទ្ឋជុំវិញមានដីពោរពេញដោយជីវជាតិ និងមានការត្បាញហូលផាមួង កោះដាច់ប្រហែលមិនស្ថិតនៅឆ្ងាយទៀតទេ នៅពេលរដ្ឋាភិបាលសាងសង់ស្ពានភ្ជាប់ទៅកាន់សង្កាត់ ដែលទើបកាត់ចូលដែនដីរាជធានីភ្នំពេញកាលពីដើមអាណត្តិទី៥កន្លងមកនេះ។

ចៅសង្កាត់កោះដាច់ លោកប៉ាត់ អ៊ែលបានថ្លែងឲ្យដឹងតាមទូរស័ព្ទកាលពីពេលថ្មីៗនេះថា ប្រជាពលរដ្ឋពិតជាត្រេកអរខ្លាំងណាស់ នៅពេលលឺពីគំរោងសាងសង់ស្ពាន របស់រដ្ឋាភិបាលមកកាន់ដីកោះនេះ ហើយមានប្រជាពលរដ្ឋមួយចំនួន បានដំឡើងថ្លៃដីរបស់ពួកគាត់ខ្លះៗផងដែរ ប៉ុន្តែមិនមានឈ្មួញចុះសាកសួររកទិញដីគគ្រឹកគគ្រេងនោះទេ។លោកបន្តថា តំលៃដីនៅជាប់ផ្លូវបេតុង នៅលើកោះមានតំលៃចន្លោះពី៤០ ទៅ៨០ដុល្លារ និងនៅតាមផ្លូវលំតូចៗមានតំលៃចន្លោះពី១០ ទៅ២០ដុល្លារក្នុងមួយម៉ែត្រការ៉េ។

លោកបន្តថា “នៅកោះដាច់មានដីធំៗច្រើន សម្រាប់លក់ឲ្យតែមានតម្រូវការ ប៉ុន្តែការឡើងថ្លៃដីបច្ចុប្បន្ន ប្រជាជនចេះតែទាមទារខ្លួនឯងប៉ុណ្ណោះ”។លោកបន្តថា “ខ្ញុំ និងប្រជាជនដទៃទៀតនៅលើកោះនេះពិតជាសប្បាយរីករាយ នឹងគំរោងសាងសង់ស្ពានេះ តែមិនដឹងថាការសាងសង់នឹងចាប់ផ្តើមនៅពេលណាទេ”។

សង្កាត់កោះដាក់មានភូមិចំនួន៥ និងមានប្រជាពលរដ្ឋរស់នៅជាង១៣០០០នាក់នាពេលបច្ចុប្បន្ននេះ។
កាលពីដើមខែឧសភានេះ លោកប៉ា សុជាតិវង្សអភិបាលរាជធានីភ្នំពេញធ្លាប់បានប្រកាសពីគំរោងសាងសង់ស្ពានភ្ជាប់ទៅកាន់សង្កាត់កោះដាច់ និងស្ពានភ្ជាប់ទៅតំបន់ស្វាយជ្រុំ និងតំបន់អរិយក្សត្រភ្ជាប់មកតំបន់ក្តីតាកុយ ស្ថិតនៅតាមបណ្តោយផ្លូវជាតិលេខ១។ លោកអភិបាលក្រុងបានថ្លែងថា បច្ចុប្បន្នមានក្រុមហ៊ុនកំពុងសិក្សាពីគំរោងសាងសង់ស្ពានទាំងបីនេះហើយ។

ប្រធានក្រុមប្រឹក្សាភិបាលនៃក្រុមហ៊ុនអចលនទ្រព្យDaily Realty Groupលោកហៃ រ៉ាវីបានថ្លែងថា ព៌តមានពីការសាងសង់ស្ពានទៅកាន់តំបន់នេះ មានជាយូរមកហើយ ប៉ុន្តែការសាងសង់ពេលណាមិនទាន់ដឹងជាក់លាក់នៅឡើយទេ ហេតុនេះទើបមិនសូវមានតម្រូវការដីធ្លីនៅតំបន់នេះ បើទោះតំបន់នេះមានដីមានជីវជាតិល្អ មានខ្យល់អាកាសល្អ និងមានទន្លេព័ទ្ឋជុំវិញក្តី។

លោកបន្តថា “តំបន់នេះអភិវឌ្ឍន៍លឿន ឬយឺតអាស្រ័យលើស្ពានសាងសង់រួចនៅពេលណា ប៉ុន្តែខ្ញុំគិតថាតំបន់នេះទាមទាររយៈពេល៥ ទៅ១០ឆ្នាំទៀតទើបមានសកម្មភាពអភិវឌ្ឍន៍ផ្សេងៗ”។លោកបន្តថា “ដីនៅក្បែរៗក្រុងនៅសល់ច្រើននៅឡើយ ហើយការអភិវឌ្ឍនៅតំបន់ក្បែរក្រុងក៏មិនទាន់អស់ដីដែរ ហេតុនេះខ្ញុំគិតថាតំបន់នេះនឹងមិនមានការអភិវឌ្ឍន៍ឆាប់រហ័សទេ”។

លោកវ៉ន ចាន់ថនអគ្គនាយកក្រុមហ៊ុនTown City Real Estateមានសុទិដ្ឋិនិយមជាងនេះ ដោយលោកបានថ្លែងថា ប្រសិនជាស្ពានសាងសង់ភ្ជាប់ទៅកាន់តំបន់នេះ តំលៃដីពិតជាឡើងថ្លៃមិនខាន ព្រោះជាធម្មតានៅពេលហេដ្ឋារចនាសម្ព័ន្ឋរបស់រដ្ឋាភិបាលសាងសង់ទៅដល់ទីណា ប្រជាពលរដ្ឋនៅតំបន់នោះនឹងទទួលបានផលប្រយោជន៍ ហើយតំបន់នោះនឹងមានការអភិវឌ្ឍ ព្រោះបើធៀបនឹងតំបន់អរិយក្សត្រ តំបន់នេះមានចម្ងាយជិត និងមានភាពអំណោយផលជាង។
លោកបន្តថា “ប្រសិនជាស្ពានសាងសង់រួច តំបន់នេះគួរអភិវឌ្ឍន៍ជាលំនៅ ដ្ឋានលំដាប់high class និងគួរកែច្នៃឲ្យដូចជាកោះបាលីរឹតតែល្អ ព្រោះតំបន់នេះមានខ្យល់អាកាសល្អ និងមានទន្លេព័ទ្ឋជុំវិញ”។

លោកបន្តថា “សណ្ឋាគារ បឹងហ្កាឡូ ផ្ទះបែបសម្រាកកំសាន្ត ទាំងគេទាំងខ្ញុំនឹងចាប់អារម្មណ៍ទៅរស់នៅតំបន់នេះនាពេលអនាគត”។

សង្កាត់កោះដាច់ ស្ថិតនៅប្របដងទន្លេមេគង្គលើ និងមានចម្ងាយប្រមាណ៥គីឡូម៉ែត្រពីស្ពានជ្រោយចង្វារ។ សង្កាត់កោះដាច់ស្ថិតក្នុងខ័ណ្ឌជ្រោយចង្វារ រាជធានីភ្នំពេញ៕

ដោយ ស៊ីវ ម៉េង

ភ្នំពេញ: ការឌីសាញខុនដូថ្មីមួយ ដែលមានទំហំបន្ទប់តូចល្មម និងតំលៃសមរម្យដើម្បីឆ្លើយតបប្រជាជនមានជីវភាពមធ្យម ជាអ្វីដែលអ្នកវិនិយោគក្នុងស្រុកនិងបរទេសមួយចំនួនកំពុងចាប់អារម្មណ៍។

លោកទុយ ប៊ុនអគ្គនាយកទទួលបន្ទុកផ្នែកបច្ចេកទេសនៃក្រុមហ៊ុនលំនៅដ្ឋានL កម្ពុជាភ្នំពេញបានថ្លែងឲ្យដឹងកាលពីពេលថ្មីៗនេះថា ការវិនិយោគខុនដូរបស់ក្រុមហ៊ុនលោកដែលផ្តោតលើប្រជាជនថ្នាក់កណ្តាល ដោយសារហេតុផលចំនួនពីរ ទី១ ទីតាំងរបស់លោកមិនអាចទាក់ទាញអ្នកមានប្រាក់ច្រើន និងទី២ ផ្តោតលើប្រជាជនមានជីវភាពមធ្យម ដែលប្រជាជនក្នុងស្រទាប់នេះ មានចំនួនច្រើនជាងទីផ្សារសម្រាប់អ្នកមានជីវភាពធូរធារ។លោកបន្តថា ខុនដូរបស់លោកបានលក់ចាប់ពីតំលៃ៤ ដល់៨ម៉ឺនដុល្លារអាមេរិកអាស្រ័យលើចំនួនបន្ទប់ និងជាន់និមួយៗ។

លោកបន្តថា “មនុស្សអាចរស់នៅខុនដូច្រើននាពេលអនាគត ប៉ុន្តែវាអាស្រ័យលើទីកន្លែងការងាររបស់ពួកគេផងដែរ ប្រសិនជាការងារពួកគេផ្លាស់ប្តូរទៅជាយក្រុងច្រើន ការស្នាក់នៅខុនដូក៏មិនមានចំនួនច្រើនទេ”។លោកបន្តថា “ក្រុមហ៊ុនបានផ្តល់ការបង់រំលោះនូវលក្ខខ័ណ្ឌសមស្រប ដែលអតិថិជនមានប្រាក់ចំណូលមធ្យមអាចមានលទ្ឋភាពបង់បាន”។

ក្រុមហ៊ុនលំនៅដ្ឋានLកម្ពុជាភ្នំពេញ បានធ្វើការវិនិយោគសាងសង់ខុនដូចំនួន៥ទីតាំងខុសៗគ្នា ក្នុងនោះពីរទីតាំងបានអនុញ្ញាត្តឲ្យអតិថិជនចូលស្នាក់នៅរួចហើយ និងអាគារទីបី គ្រោងបញ្ចប់នៅដើមឆ្នាំ២០១៧ខាងមុខនេះ និងពីរទីតាំងទៀតត្រៀមបញ្ចប់ការសាងសង់នៅឆ្នាំ២០១៨។ អាគារទី១ ដែលអនុញ្ញាត្តឲ្យអតិថិជនចូលស្នាក់នៅ មានអ្នកចូលទៅរស់នៅប្រមាណ៨០ភាគរយ និងអាគារទី២មានអ្នកចូលស្នាក់នៅប្រមាណ១០ភាគរយប៉ុណ្ណោះ ដោយសារទើបបើកឲ្យអតិថិជនចូលទៅរស់នៅ។លោកទុយ ប៊ុនបញ្ជាក់ឲ្យដឹង។

លោកបន្តថា“ការវិនិយោគខុនដូរបស់យើងធ្វើឡើងសម្រាប់គ្រួសារតូច ព្រោះបន្ទប់មានទំហំចាប់ពី៣០ម៉ែត្រ ទៅ៥០ម៉ែត្រការ៉េប៉ុណ្ណោះ ដូច្នេះគ្រួសារដែលមានសមាជិកត្រឹម៣នាក់ ជាការសមស្របក្នុងការរស់នៅខុនដូបែបនេះ”។

ជាក់ស្តែងអត្រាមានកូនក្នុងចំណោមប្រជាពលរដ្ឋកម្ពុជា កាន់តែមានទំហំតូច ដោយការអង្កេតប្រជាសាស្រ្ត និងសុខភាពរបស់ក្រសួងសុខាភិបាលបានរកឃើញថា អត្រាមានកូនក្នុងចំណោមប្រជាពលរដ្ឋកម្ពុជាជាមធ្យមបានថយចុះពី៣.0នាក់កាលពីឆ្នាំ២០១០ មកនៅត្រឹម២.៧នាក់នៅឆ្នាំ២០១៤។

អ្នកនាងអាន សុធីតានាយិកាក្រុមហ៊ុនCBRE Cambodiaបានថ្លែងថា ខុនដូដែលមានទំហំតូចៗ មិនសមស្របសម្រាប់រស់នៅរយៈពេលវែងនោះទេ តែសមស្របសម្រាប់ការរស់នៅសម្រាប់អ្នកមកពីខេត្តមកសិក្សា ហើយអាគារបន្ទប់តូចៗបែបនេះ គេហៅថាអាផាតម៉ិន មិនមែនខុនដូទេ ព្រោះខុនដូសំដៅអាគារមានលក្ខណៈទំនើប និងមានការបំពាក់សម្ភារៈបរិក្ខាទំនើប។អ្នកនាងបន្តថា តំលៃចាប់ពីជាង២ម៉ឺនដុល្លារឡើង សមស្របសម្រាប់ប្រជាពលរដ្ឋថ្នាក់កណ្តាល ដែលជាទីផ្សារធំសំរាប់វិស័យនេះ។

អ្នកនាងបន្តថា “ប្រជាជនថ្នាក់កណ្តាលជាអតិថិជនរបស់អ្នកវិនិយោគខុនដូ ដែលផ្តោតលើក្រុមប្រជាជនលំដាប់នេះ ដែលមានចំនួនច្រើន ហើយពួកគេនឹងរស់នៅខុនដូច្រើន”។អ្នកនាងបន្ថែមថា “ប្រជាពលរដ្ឋកម្ពុជាចាប់ផ្តើមវិវត្តន៍ពីរស់នៅតាមផ្ទះល្វែង វីឡាមករស់នៅខុនដូ ដោយសារដីក្នុងទីក្រុងចង្អៀត និងកាន់តែឡើងថ្លៃ និងចរាចរណ៍កាន់តែចង្អៀត”។

ប្រធានសមាគមអ្នកវាយតំលៃ និងភ្នាក់ងារអចលនវត្ថុកម្ពុជាលោកគីម ហ៊ាងបានថ្លែងថា ពេលនិយាយពីខុនដូ ត្រូវមានចំណតរថយន្ត មានសន្តិសុខ សុវត្ថិភាព មានកន្លែងសាធារណៈដែលអាចប្រើប្រាស់រួម មានអាងហែលទឹក និងកន្លែងហាត់ប្រាណផ្សេងៗ តែបើមិនមានសេវាទាំងនេះ ប្រៀបបីដូចជាយកស្រាសដាក់ក្នុងកំប៉ុងប៊ឺយ៉ែរ។

លោកបន្តថា “បើសាងសង់ខុនដូមិនមានសេវាទាំងអស់នេះទេ ហើយបន្ទប់មានទំហំត្រឹម១៦ម៉ែត្រការ៉េ គឺជាបន្ទប់សម្រាប់លក់មិនមែនខុនដូទេ កុំយកពាក្យខុនដូមកប្រើ នាំឲ្យខូចកេរ្ត៍ឈ្មោះខុនដូរបស់គេ”។លោកបន្តថា “ខុនដូដែលមានទំំហំ៣០ម៉ែត្រការ៉េទៅជាការសមរម្យ ហើយលក់ក្នុងតំលៃចន្លោះពី៤ទៅ៦ម៉ឺនដុល្លារអាចទទួលយកបានហើយ”។

ដោយ គង់ សូរិយា

ភ្នំពេញ៖ ថ្នាក់ដឹកនាំ​ជាន់ខ្ពស់​នៃ​ក្រុមហ៊ុន​អចលនទ្រព្យ​យក្ស​ចិន Prince Real Estate Group បាន​បង្ហើប​ថា ក្រុមហ៊ុន​នេះ​គ្រោង​ពង្រីក​ទុន១០ពាន់​លាន​ដុល្លារ​បន្ថែមទៀត សម្រាប់១០ឆ្នាំ​ខាងមុខ​និង​ជ្រើស​យក​ប្រទេស​កម្ពុជា ធ្វើជា​ទីតាំង​យុទ្ធសាស្ត្រ​ស្នូល ដើម្បី​ពង្រីក​វិសាលភាព​អាជីវកម្ម​របស់ខ្លួន​ទៅកាន់​តំបន់។

លោក លី ម៉ិញ នាយក​ប្រតិបត្តិ​នៃ​ក្រុមហ៊ុន​បាន​មានប្រសាសន៍​ឲ្យ​ដឹង​ក្នុង​ពិធី​សម្ភោ​ធ​ការដ្ឋាន​សាងសង់​ការិយាល័យ​កណ្តា​ល​របស់ខ្លួន នៅ​ទីក្រុង​កោះ​ពេជ្រ​កាលពី​ថ្ងៃទី១៩ វិច្ឆិកា​កន្លងមកនេះ បាន​មានប្រសាសន៍​ឲ្យ​ដឹងថា ក្នុង​រយៈពេល១០ឆ្នាំ​ខាងមុខនេះ ក្រុមហ៊ុន​នឹង​យក​ប្រទេស​កម្ពុជា​ជាទី​តាំង​យុទ្ធសាស្ត្រ​ស្នូល ក្នុងការ​វិនិយោគ​លើ​វិស័យ​អចលនទ្រព្យ ដោយ​ក្រុមហ៊ុន នឹង​បន្ត​បណ្តាក់ទុន​យ៉ាងតិច​ចំនួន១០ពាន់​លាន​ដុល្លារ​អាមេរិក​បន្ថែម ដើម្បី​ពង្រីក​វិសាលភាព​ក្រុមហ៊ុន ទៅកាន់​ប្រទេស​សឹង្ហ​បុរី ប្រទេស​ថៃ និង​ប្រទេស​ម៉ាឡេស៊ី​ជាដើម។

លោក​បន្តថា “Prince នឹង​ក្លាយខ្លួន​ទៅជា​ក្រុមហ៊ុន​មួយ ក្នុងចំណោម​ក្រុមហ៊ុន​ខ្នាត​អន្តរជាតិ ដែលមាន​ឥទ្ធិពល​ជាងគេ​ក្នុង​តំបន់​អាស៊ីអាគ្នេយ៍ ខណៈ​លោក​មើលឃើញថា កម្ពុជា​ជា​ប្រទេសមួយ​ស្ថិតនៅ​ចំ​កណ្ដាល​នៃ​ប្រទេស​ជា​សមាជិក​អាស៊ាន។

វត្តមាន​រយៈពេល​បី​ឆ្នាំ ក្នុងប្រទេស​កម្ពុជា​ក្រុមហ៊ុន ព្រី​នស៍ រៀល អ៊ី​ស្ទេ​ត គ្រុប មាន​ស្ថាប័ន និង​ក្រុមហ៊ុន​បុត្រ​សម្ព័ន្ធ​ចំនួន៣០ក្រុមហ៊ុន ដែល​បាន​វិនិយោគទុន​ជា​ទឹ​ប្រាក់​សរុប​លើសពី២០០០ លាន​ដុល្លារ​អាមេរិក និង​មាន​ដី​បម្រុង​សរុប​ជាង ១០លាន​ម៉ែត្រការ៉េ សម្រាប់ធ្វើ​ការអភិវឌ្ឍ ដែល​ស្មើនឹង​ទំហំ​គម្រោង​អភិវឌ្ឍន៍​សរុប​ចំនួន១៥លាន​ម៉ែត្រការ៉េ។

លោក លី ម៉ិ​ញ បាន​បន្ថែមថា ដើម្បី​បង្ក​ភាពងាយស្រួល និង​ទំនុកចិត្ត​ក្នុងការ​វិនិយោគ​នៅ​កម្ពុជា ក្រុមហ៊ុន​បាន​សាងសង់​អគារ​ទីស្នាក់ការ​កណ្តាល​រួមមួយ​របស់​ក្រុមហ៊ុន ព្រី​នស៍ ហូល ឌី​ង គ្រុប ដើម្បី​ប្រមូលផ្តុំ​ក្រុមហ៊ុន​បុត្រ​សម្ព័ន្ធ​ទាំងអស់​របស់ខ្លួន​ក្នុងប្រទេស​កម្ពុជា អាចធ្វើ​ការ​ជារួម​ជុំគ្នា នៅ​ទីតាំង​តែមួយ ដោយ​អគារ​ទាំងមូល​បាន​ប្រើប្រាស់​រចនាបថ​បែប​ថ្មី​ទំនើប ដោយ​រួមបញ្ចូល​គ្នា ជាមួយនិង​ការិយាល័យ​លក្ខណៈ​អេកូឡូស៊ី និង​សន្សំសំចៃ​ថាមពល ដែលជា​កាត់បន្ថយ​ការបំពុល​បរិស្ថាន៕

ដោយ រតនៈ

ភ្នំពេញ៖ គេហដ្ឋាន​ជាទី​កន្លែង​ដែល​ផ្តល់នូវ​សេចក្តីសុខ​សុភមង្គល ភាពកក់ក្តៅ សម្រាប់​រស់នៅ​ដល់​គ្រួសារ ។ ទន្ទឹង​នឹង​នោះ ការជ្រើសរើស​គេហដ្ឋាន​ប្រកបដោយ​គុណ​តម្លៃ ផ្តល់ជូន​នូវ​ភាព​ប្រណីត​ទាន់សម័យ និង​ផាសុកភាព ក៏​ជា​ផ្នែក​មួយ​សំខាន់ សម្រាប់​គ្រួសារ​ផងដែរ។

ដើម្បី​ផ្តល់ជូន​អតិថិជន​នូវ​គេហដ្ឋាន ប្រកបដោយ​ការ​រចនា​ម៉ូដ​ដ៏​ល្អ​ឯក​ដែល​ផ្អែកទៅលើ​គុណភាព​នៃ​សោ​ភណ្ឌ​ភាព បុរី ប៉េង ហួត​បាន​សាងសង់ វីឡា​ឃ្វី​ន ដែលជា​ប្រភេទ វីឡា​ទោល​យ៉ាង​ពិសេស ល្អឥតខ្ចោះ​នៃ​ការរួម​ប​ញ្ជូ​ល​រចនាបទ​អឺរ៉ុប​បែប​បុរាណ និង​ស្របទៅនឹង​វប្ប​ធ​ម៍​របស់​ខ្មែរ។

ដោយ​ផ្អែកទៅលើ​គុណភាព សោ​ភណ្ឌ​ភាព និង​ភាព​ច្នៃប្រឌិត​ខ្ពស់ សក្តិសម​សម្រាប់​គ្រួសារ​ទាន់សម័យ។ គេហដ្ឋាន​ប្រភេទ​នេះ មាន​ទំហំ 12ម x 12ម កម្ពស់ ៣ជាន់
ដែល​បែង​ចែកជា​បន្ទប់​គេង៥  បន្ទប់ទឹក៦ បន្ទប់ទទួលភ្ញៀវ២ បន្ទប់​ចម្អិន​អាហារ១ បន្ទប់​ទទួល​អាហារ១ ជាមួយនឹង​ទីធ្លា​ចត​រថយន្ត​ធំ​ទូលាយ ថែម​ទៀតផង។

មិន​ត្រឹមតែ​ប៉ុណ្ណោះ យើងខ្ញុំ​ក៏មាន​សម្ភារៈ​បន្ថែម​ជូន ដូចជា ទូ​តាំង​ទូរទស្សន៍ ទូ​តាំង​សម្ភារៈ​ស៊ុម​ច្រកចូល ទូ​ចង្ក្រាន​លើ​ក្រោម ស៊ី​ង​លាងចាន​និង​ម៉ាស៊ីន​បឺត​ផ្សែង និង​ទូរ​សម្លៀកបំពាក់​ក្នុង​បន្ទប់​មេ​គ្រួសារ​ផងដែរ។

វីឡា​ឃ្វី​ន​មាន​ទីតាំង​ស្ថិតនៅក្នុង គម្រោង​ដឹ​ស្តា​អ៊េ​មឺ​រ៉​ល​ដ៏២ ស្ថិតនៅតាម​បណ្តោយ​ផ្លូវ​ឧកញ៉ា​បណ្ឌិត​ម៉ុង រិទ្ធី ចំងាយ​ប្រមាណ៦០០ម៉ែត្រ​ប៉ុណ្ណោះ ពី​រង្វង់​មូល​កាំ​កូ​ស៊ី​ធី។   គម្រោង​នេះ​ជា​តំបន់​អភិវឌ្ឍ​ក្នុង​ប្លង់​មេ ភាគ​ពាយព្យ​នៃ​រាជធានី​ភ្នំពេញ ប្រមូលផ្តុំ​ដោយ​ហេដ្ឋារចនាសម្ព័ន្ធល្អៗ មាន​ផ្លូវថ្នល់ធំៗខ្វាត់ខ្វែង ដែលជា​ច្រក​សេដ្ឋកិច្ច ត​ភា្ជ​ប់​ជាមួយ​ផ្លូវជាតិសំខាន់ៗ ដូចជា​ផ្លូវជាតិ​លេខ៣ លេខ៤ និង​លេខ៥ ព្រមទាំង​ជា​បណ្តុំ​នៃ​ទីប្រជុំជន ដែលមាន សាលារៀន មន្ទីរពេទ្យ ខុន​ដូ ជាពិសេស ដែលមាន​ចំងាយ​ត្រឹមតែ ១គីឡូម៉ែត្រ​ប៉ុណ្ណោះ ពី​ផ្សារ​ទំនើប អ៊ី​អន ២ និង​ផ្សារ​ម៉ាក្រូ ជាទី​ប្រជុំជន​ដ៏​ធំ​មួយ បាន​ស្រូប​ទាញ​និង​មាន​សក្តានុពល សម្រាប់​ការធ្វើ​ពាណិជ្ជកម្ម។

លោក អ្នកទំនាក់ទំនង​មកកាន់​ការិយាល័យ​លក់​របស់​យើង ដើម្បី​ទទួលបាន​ប្រូ​ម៉ូ​សិន​ពិសេស ដោយ​លោកអ្នក​ធ្វើការ​បង់​រំលស់ ដោយ​គ្មាន​ប្រាក់​កក់ ដែលមាន​សុពលភាព​រហូតដល់​ដំណាចខែ​វិច្ឆិកា​នេះ​តែ​ប៉​ណ្ណោះ។ សម្រាប់​ព័ត៌មាន​បន្ថែម​សូម​ទាក់ទង​ទៅ​លេខ015 90 6789, Email:  [email protected] ឬ​ចូល ទៅ​គេហទំព័រ Facebook ៖  www.facebook.com/boreypenghuoth group៕

ដោយ វុត្ថា

ភ្នំពេញ៖ ប្លុក​អាស៊ាន ជា​តំបន់​មាន​សេដ្ឋកិច្ច​រីកចម្រើន​លូតលាស់​លឿន​ជាងគេ​មួយ​ក្នុង​ពិភពលោក ដែល​ធ្វើ​ឲ្យ​បណ្តា​ប្រទេស​ជា​សមាជិក​សហគមន៍​ដែលមាន១០ប្រទេស​នេះ​កំពុង​ប្រកួតប្រជែង​គ្នា ក្នុង​ការកសាង​កិត្យានុភាព និង​ឧត្តមភាព​របស់ខ្លួន​តា​មរយៈ​ការសាងសង់​អាគារ​កប់​ពពក​បង្អួត​គ្នា។

យោងតាម​ទិន្ន័យ​អគារ​ខ្ពស់​ពិភពលោក​នៃ​ក្រុមប្រឹក្សា​ស្តីពី អគារ​ខ្ពស់ និង​លំនៅ​ដ្ឋា​ទីប្រជុំជន (Council on Tall Buildings and Urban Habitat) ដែល​បានធ្វើ​ការសិក្សា​ស្រាវជ្រាវ​ព័ត៌មាន​ចុងក្រោយ​ស្តីពី​អការ​ខ្ពស់ ការអភិវឌ្ឍន៍​ទីប្រជុំ​ជន និង​ការសាងសង​ប្រកបដោយ​ចីរភាព​នៅ​ជុំវិញ​ពិភពលោក​បានបង្ហាញ​ថា មាន​អគារ​ខ្ពស់កប់ពពក​ចំនួន ១០០ ដែលមាន​រចនាសម្ព័ន្ធ​ខ្ពស់​ជាងគេ​នៅក្នុង​តារាង​របស់ខ្លួន ដោយ​ក្នុងនោះ​អគារ​ខ្ពស់កប់ពពក​ជាច្រើន​បាន​នឹង​កំពុង​សាងសង់ និង​បានស្នើរ​សុំ​សាងសង់​រួចរាល់​នៅក្នុង​តំបន់​អាស៊ាន។

តើ​អគារ​ខ្ពស់​ទាំងនេះ​ស្ថិតនៅក្នុង​ប្រទេស​ណាខ្លះ?

១/ អគារ TRADEWINDS SQUARE TOWER A

អគារ TRADEWINDS SQUARE TOWER A មាន​កំពស់ ៧៧៥ម៉ែត្រ ស្ថិតនៅក្នុង​ទីក្រុង​កូ​ឡា​ឡាំ​ពួ ក្នុងប្រទេស​ម៉ាឡេស៊ី ដែល​កំពុង​សាងសង់​នៅ​ចំ​កណ្តាល​នៃ​បេះ​ដូ​ទីក្រុង​កូ​ឡា​ឡាំ​ពួ។ អគារ​នេះ​នឹង​ក្លាយជា​និមិត្តរូប​ថ្មី​របស់​ប្រទេស​ម៉ាឡេស៊ី និង​ជា​ផ្នែក​មួយ​នៃ​ការរីកចម្រើន​រចនាសម្ព័ន្ធ និង​ស្ថាបត្យកម្ម​សំណង់​ដ៏​ទំនើប​បំផុត របស់​ប្រទេស​ម៉​ឡេ​ស៊ី។

២/ អគារ JAKARTA SIGNATURE TOWER

អគារ JAKARTA SIGNATURE TOWER មាន​កំពស់ ៦៣៨ ម៉ែត្រ​ស្ថិតនៅក្នុង​ទីក្រុង​Jakarta ប្រទេស​ឥណ្ឌូនេស៊ី ដែល​ត្រូវបាន​គូ​ប្លង់​ដោយ​ក្រុមហ៊ុន Smallwood ក្រុមហ៊ុន Reynoldsក្រុមហ៊ុន Stevward and Stevwart Assoaiction ។ អគារ​នេះ ត្រូវបាន​គេ​រំពឹងថា ជា​អគារ​ខ្ពស់កប់ពពក​មួយ​នៅក្នុង​តំបន់​អាស៊ីអាគ្នេយ៍ ហើយ​ត្រូវបាន​សាងសង់​នៅក្នុង​ពាណិជ្ជកម្ម​របស់​ទីក្រុង​របស់​ប្រ​ទេ​ម៉ាឡេស៊ី។

៣/ អគារ RAMA IX SUPER TOWER

អគារ RAMA IX SUPER TOWER ជា​អគារ​ខ្ពស់កប់ពពក​មួយ ស្ថិតក្នុង​កំពុង​សាងសង់ ដែលមាន​កំពស់៦១៥ ម៉ែត្រ​ស្ថិតនៅក្នុង​ទីក្រុង​បាងកក​ប្រទេស​ថៃ។ អគារ​នេះ​នឹង​ក្លាយជា​អគារ​ខ្ពស់បំផុត​ក្រោយពី​សាងសង​រួច​នៅក្នុង​ប្រទេស​ថៃ​បន្ទាប់​អគារ Mahanakhorn ។

៤/ អគារ THAI BOON ROONG TWIN TOWER

អគារ​ភ្លោះ​THAI BOON ROONG TWIN TOWER នេះ មាន​កំពស់៥៦១ ម៉ែត្រ​ដែល​កំពុង​សាង​នៅក្នុង​ទីក្រុង​ភ្នំពេញ​ប្រទេស​កម្ពុជា។ អគារ​នេះ​គ្រោង​ចំណាយលុយ​សាងសង់​ប្រហែល២ពាន់​លា​នុដ​ល្លារ។

៥/ អគារ PERTAMINA ENERGY TOWER

អគារ​PERTAMINA ENERGY TOWER នេះ គឺជា​អគារ​ខ្ពស់កប់ពពក​ដែលមាន​កំពស់​ចំនួន៥៣០ ម៉ែត្រ និង​កំពុង​សាងសង់​ស្ថិតនៅក្នុង​ទីក្រុង​ហ្សា​កាតា ប្រទេស​ឥណ្ឌូនេស៊ី គ្រោង​នឹង​បញ្ចប់​សាងសង់​នៅក្នុង​ឆ្នាំ២០២០ខាងមុខនេះ។

៦/ អគារ LANDMARK 81 

អគារ LANDMARK 81មាន​កំពស់៤៦២ ម៉ែត្រ​កំពុង​សាងសង់​ស្ថិតនៅក្នុង​ទីក្រុង​ហូ​ជី​មី​ញ ប្រទេស​វៀតណាម។ អគារ​នេះ គឺជា​និមិត្តរូប​នៃ​ការលូតលាស់​នៃ​ស្ថាបត្យកម្ម​របស់​ប្រទេស​វៀតណាម ហើយនឹង​ក្លាយជា​អគារ​ដែល​ប្រើប្រាស់​រួម ដូចជា សណ្ឋាគារ កន្លែង​ស្នាក់នៅ និង បន្ទប់​ការិយាល័យ​ជួល។

៧/ អគារ BANGKOK OBSERVATION TOWER

អគារ BANGKOK OBSERVATION TOWER មាន​កំពស់៤៥៩ ម៉ែត្រ​ស្ថិតនៅក្នុង​ទីក្រុង​បាងកក​ប្រទេស​ថៃ ។ ការសាងសង់​អគារ​នេះ ឡើង​ក្នុង​គោលបំណង​ទាក់ទាញ​ភ្ញៀវ​ទេសចរណ៍ អោយមក​ចូល​លេង​កម្សាន្ត​នៅក្នុង​ប្រទេស​ស មិន​ត្រឹមតែ​ប៉ុណ្ណោះ​រចនាបទ​នៃ​អគារ​នេះ ជា​និមិត្តរូប​នៃ​អតិ​ត​ព្រះមហា​ក្ស​ត្ស Bhumibol Adulydej ក្នុងចំណោម​អាគារ​ផ្សេងទៀត៕

ដោយ : ស៊ីវ ម៉េង

ភ្នំពេញ : គំរោងខុនដូប្រណីត រួមនឹងមជ្ឈមណ្ឌលកីឡា ក្រោមការបោះទុនវិនិយោគ​៧០០លានដុល្លារ នៅតាមបណ្តោយមហាវិថី៦០ម៉ែត្រ ដែលវិនិយោគដោយក្រុមហ៊ុន R&F Properties បានប្រកាសលក់ជាមួយជំនឿចិត្ត។

លោក WANG ZHI HAO ប្រធានប្រឹក្សាភិបាល នៃក្រុមហ៊ុន R&F គ្រុបបានថ្លែងឲ្យ​ដឹង​កាលពីថ្ងៃទី១៩ វិច្ឆិកា កន្លងមកថា ក្នុងរយៈពេល២៤ឆ្នាំកន្លងមកនេះ ក្រុមហ៊ុន​លោក​តែងតែប្រកាន់ខ្ជាប់នូវផ្នត់គំនិតសហគ្រាស គឺ «បង្កើតភាពអច្ឆរិយ» រួមគ្នា​អភិវឌ្ឍន៍ជីវភាព ឲ្យកាន់តែល្អប្រសើរ ខិតខំប្រឹងប្រែងស្ថាបនាអាគារស្នាក់នៅ មាន​គុណភាពខ្ពស់ប្រកបដោយវិជ្ជាជីវៈ និងមានលក្ខណៈទាន់សម័យ ដើរស្របនិងរបត់នៃ​ភាពរីកចំរើន នៃវិស័យសំណងរបស់ពិភពលោក។

លោកបានអះអាងថា តាមរយៈការអភិវឌ្ឍន៍យ៉ាងឆាប់រហ័ស អស់រយៈពេលជាច្រើន​ឆ្នាំ R&F បានបង្កើតគម្រោងជាង២២០នៅក្នុងទីផ្សាប្រទេសចិន ក៏ដូចជាទីផ្សារក្រៅ​ប្រទេស ដែលគ្របដណ្តប់លើទីក្រុង និងតំបន់ចំនួន៦៩។ លោកថា គំរោង អ&អេហ្វ ហ័រហ្វូ (R&F) ដែលជាគំរោងទី២ របស់ក្រុមហ៊ុន អ&អេហ្វគ្រុប នេះ បានឆ្លើយតបទៅ​នឹងយុទ្ធសាស្ត្រអភិវឌ្ឍន៍ សេដ្ឋកិច្ចអន្តរជាតិខ្សែក្រវ៉ាត់១ ផ្លូវ១ ដែលត្រូវចាត់ទុកថាជា ស្នួលនៃអាស៊ាន និងខ្លាថ្មីនៃទ្វីបអាស៊ី។

រដ្ឋលេខាធិការក្រសួងបរិស្ថាន លោក ផៃ ប៊ុនឈឿន ដែលអញ្ជើញជាអធិបតី​ក្នុងពិធី​នោះបានថ្លែងថា វត្តមានរបស់គម្រោង R&F មិនត្រឹមតែឆ្លុះបញ្ចាំងពីជំនឿទុកចិត្ត មក​លើគោលនយោបាយកម្ពុជានោះទេ ប៉ុន្តែក៏ជាការយល់ឃើញដ៏ឆ្លាសវៃរបស់ចិនចំពោះ​សក្តានុពលខ្ពស់របស់កម្ពុជា ដែលមានភាពអំណោយផល សម្រា​ប់ការវិនិយោគផ្ទាល់​ពីបរទេស។ លោកបន្តថា ការរីកចម្រើនវិស័យអចលទ្រព្យ វិស័យសំណង់ គឺជា​បដិវត្តន៍​ថ្មីសម្រាប់ទីផ្សារលើវិស័យអចលនទ្រព្យនៅកម្ពុជា ជាក់ស្តែងក្នុងរយៈពេល​ដ៏ខ្លីកម្ពុជាបានរីកមុខមាត់ ដោយមានអាគាខ្ពស់ៗស្កឹមស្កៃជាច្រើន ជាពិសេសនៅ​រាជធានីភ្នំពេញ។ លោកបន្តថា គិតត្រឹមដើមខែតុលាឆ្នាំ២០១៨ រាជធានីភ្នំពេញមាន​ទីក្រុងរណប បុរីលំនៅស្ថាន និងលំនៅស្ថានប្រមាណ២១២ទីតាំង ហើយចំនួននេះនឹង​នៅតែបន្តកើនឡើងបន្ថែមទៀតក្នុងរយៈពេលដ៏ខ្លីខាងមុខ ប្រសិនបើលក្ខខណ្​ឌសុខសន្តិភាព និងស្ថេ​រភាពនយោបាយត្រូវបានធានា ។

តំណាងសភាពាណិជ្ជកម្មកម្ពុជាលោក ហេង វិទ្ឋី បានមានប្រសាសន៍ឲ្យដឹងផងដែរថា ការ​បោះទុនវិនិយោគ របស់វិនិយោគិនចិនរហូតដល់៧០០លានដុល្លារអាមេរិកនេះ បង្ហាញ​ឲ្យឃើញពីទំនាក់ទំនងដ៏ល្អប្រសើររវាងកម្ពុជា-ចិន ក្នុងការធ្វើកិច្ច​សហប្រតិបត្តិការ​ល្អជាមួយគ្នា ពិសេសវិនិយោគចិនបានទុកចិត្តការដឹកនាំ របស់ប្រមុខ​រាជរដ្ឋាភិបាល ដែ​លរក្សាបានសន្តិ​សុខ សុវត្ថិភាពដល់អ្នកវិយោគ៕

ដោយ  : គង់ សូរិយា

ភ្នំពេញ : មជ្ឈមណ្ឌលពាណិជ្ជកម្មដ៏ធំ និងជាកន្លែងដើរកំសាន្តនៅរាជធានីភ្នំពេញ​ដំបូងគេ The City Gate ដែលវិនិយោគដោយ​ក្រុម​ហ៊ុន​​ Yuetai Groupនឹងចាប់ផ្តើម​សាងសង់នៅដើមឆ្នាំ២០១៩ខាងមុខនេះ។

មជ្ឈមណ្ឌលពាណិជ្ជកម្មនេះ ខណៈ​គម្រោង​មួយ​ចំ​នួន​​បាន​លក់​អស់​ទាំង​ស្រុងរួ​ច​ហើយមកទល់ពេលនេះ។ គម្រោង​អភិ​វឌ្ឍន៍​ចម្រុះនេះ ​​ទទួល​បាន​សម្ប​ទាន​ជួល​រយៈ​ពេល​ ៥០ ឆ្នាំ ​ពី​កំពង់​ផែ​ស្វ​យ័ត​ក្រុង​​ភ្នំ​ពេញ​នេះ ស្ថិត​ក្រោម​ការ​អភិ​វឌ្ឍ​ដោយ​ក្រុម​ហ៊ុន ចៀន ឈឹង ថៃ គ្រុប ដែល​ជា​បុត្រ​សម្ព័ន្ធ​របស់ Yuetai Group​។

ក្រុម​ហ៊ុន ចៀន ឈឹង ថៃ គ្រុប ជា​បុត្រ​សម្ព័ន្ធ​របស់​ក្រុមហ៊ុន Yuetai Group ដែល​ជា​ក្រុម​ហ៊ុន​​អ​ច​ល​ន​ទ្រព្យ​ដ៏​ធំ​មក​ពី​ខេត្ត​ក្វាងចូវ​ ប្រទេស​ ចិន។ Yuetai Group ជា​ម្ចាស់​គម្រោង​អគារ​ធំ​ៗ​ចំ​នួន​៣ ក្នុង​រាជ​ធា​នី​ភ្នំ​ពេញ​​​រួម​មាន East One, East view និង​Yuetai The Garden។​ Phnom Penh Harbour​ នឹង​ត្រូវ​សាង​សង់​នៅ​លើ​​ផ្ទៃ​ដី​​ ៩២,៥៣៨ ម៉ែត្រ​ការ៉េ​ ដែល​​ជា​ទី​តាំង​ជួល​ពី​កំ​ពង់​ផែ​ស្វយ័ត​ភ្នំ​ពេញ​ ក្នុង​តម្លៃ ​១៦,៥ ​លាន​​ដុល្លារ​ ​រហូត​ដល់​ឆ្នាំ​ ២០៦៨ ។ គម្រោង​នេះ​​​លាត​សន្ធឹង​ ចាប់​​ពី​គល់​​​ស្ពាន​ជ្រោយ​ចង្វារ​​ទៅ​ដល់​​ផ្សារ ​រាត្រី​។​

តាម​ផែន​ការ​ Phnom Penh Harbour នឹង​មាន​អគារ​ខ្ពស់​ៗ​ចំ​នួន​២៨​។ ក្នុង​​គម្រោង​នេះ​រួម​​មាន ​អគារ​កា​រិ​យា​ល័យ មជ្ឈ​​មណ្ឌល​សិល្បៈ ទី​ធ្លា​សម្តែង​​ សួន​បាញ់​ទឹក ផ្សារ​បណ្តែត​​ទឹក ទីធ្លា​កម្សាន្ត ទី​ធ្លា​សម្តែង​វប្បធម៌​សិល្បៈ សណ្ឋា​គារ​លំ​ដាប់​ផ្កាយ​​​ ៥ សាល​តាំង​ពិ​ព័រណ៍ និង​​សួន​ច្បារ​សាធា​រណៈ​ជា​ដើម​។

កញ្ញា ស្រី ពេជ្រ អ្នក​គ្រប់​គ្រង​ផ្នែក​លក់​នៃ​គម្រោង Phnom Penh Harbour បាន​ប្រាប់​ភ្នំ​ពេញ ប៉ុស្តិ៍​ នៅ​កា​រិ​យា​ល័យ​កណ្តាល​របស់​ក្រុម​ហ៊ុន​ កាល​ពី​​ថ្ងៃ​ម្សិល​មិញ​​ថា តាម​ផែន​ការ​ការ​សាង​សង់​គម្រោង Phnom​ Penh Harbour ត្រូវ​​​ចែក​ចេញ​​​ជា​៤​គម្រោង​​ ​ដោយ​គម្រោង​​ទី​ ៣ ដែល​​រួម​មាន​ផ្ទះ​អា​ជីវ​កម្ម និង​​ខុន​ដូ​ចំ​នួន​ ៩ នឹង​ត្រូវ​សាង​សង់​មុន​គេ​ ដោយ​មាន​អគារ​ខ្ពស់​បំ​ផុត​៥០ជាន់។ កញ្ញា​បានបន្ត​ថា “​សក្តា​នុ​ពល​​ទី​តាំង​ភូមិ​សាស្រ្ត​បាន​ធ្វើ​ឲ្យ​ការ​លក់​ប្រ​ភេទ​ផ្ទះ​អា ​ជីវ​កម្ម ដែល​មាន​ចំ​នួន​ ១៦០​ ត្រូវ​បាន​លក់​អស់​ក្នុង​រយៈ​ពេល​ត្រឹម​តែ​៣​ខែ​ប៉ុ​ណ្ណោះ”​៕ 

ដោយគង់ សូរិយា

ភ្នំពេញ: ខុនដូប្រណីតSea Gate Suiteដែលគ្រោងបោះទុនវិនិយោគ២០០លានដុល្លារអាមេរិកបានចាប់ផ្តើមប្រកាសលក់ ជាមួយនឹងស្ថានភាពទីផ្សារក្នុងវិស័យនេះមានភាពអំណោយផល សម្រាប់អ្នកវិនិយោគដែលកំពុងមានការចាប់អារម្មណ៍ខ្លាំងនឹងលំនៅដ្ឋានបែបសហកម្មសិទ្ឋបែបនេះនៅតំបន់ឆ្នេរ។

ស្របពេលទីផ្សារខុនដូមានតម្រូវការល្អប្រសើរ ការលក់ខុនដូក្នុងគំរោងSea Gate Suiteបាន និងកំពុងទទួលការចាប់អារម្មណ៍ច្រើនពីអតិថិជន ទាំងអតិថិជនក្នុងស្រុកនិងជនបរទេស។ ខុនដូSea Gate Suiteជាគំរោងខុនដូមានកំពស់រហូតដល់៤៣ជាន់ ស្ថិតនៅតាមបណ្តោយឆ្នេរជ័យជំនះ ជាតំបន់ផ្លូវប្រសព្វ ដែលជាទីតាំងអាចគយគន់ទេសភាពសមុទ្រ បានយ៉ាងប្រណីត។

ខេត្តព្រះសីហនុ ជាទីតាំងមានសក្តានុពលសម្រាប់វិនិយោគ ស្របពេលអ្នកវិនិយោគអន្តរជាតិ ពិសេសអ្នកវិនិយោគចិនចូលទៅកាន់តែច្រើន ហើយអ្វីកាន់ពិសេសលក្ខខ័ណ្ឌបង់ប្រាក់មានភាពអំណោយផល”។ ស្របពេលដែលតម្លៃស្នាក់នៅតាមសណ្ឋាគារឡើងថ្លៃ បន្ទប់សណ្ឋាគារកំពុងខ្វះខាត ការវិនិយោគខុនដូសម្រាប់ជួលពិតជាល្អប្រសើរ ដោយអ្នកទិញហើយអាចជួលត្រលប់បានទទួល៨ភាគរយនៃទុនវិនិយោគរបស់ពួកគេ”។

ខុនដូSea Gate Suiteបានចាប់ផ្តើមជាមួយតម្លៃចាប់ពី៧ម៉ឺនដុល្លារឡើងទៅ និងតម្លៃខ្ពស់ជាងនេះអាស្រ័យលើទំហំបន្ទប់ និងជាន់និមួយៗ។ អ្នកទិញតម្រូវឲ្យបង់ប្រាក់ត្រឹម១ភាគរយសម្រាប់ឆ្នាំទី១ បង់២ភាគរយសម្រាប់ឆ្នាំទី២ និង៣ភាគរយសម្រាប់ឆ្នាំទី៣។

តំណាងក្រុមហ៊ុនវិនិយោគគំរោងនេះបានឲ្យដឹងផងដែរថា អតិថិជនជាវខុនដូនេះ នឹងទទួលបានការផ្តល់ជូននូវសម្ភារៈប្រើប្រាស់ក្នុងផ្ទះមួយឈុត ហើយលំនៅដ្ឋានរបស់ពួកគេប្រើប្រាស់ប្រព័ន្ឋបច្ចេកវិទ្យាSmart Home ដែលអាចបញ្ជាបិទបើកប្រព័ន្ឋអគ្គិសនី ដោយប្រើប្រាស់ត្រឹមទូរស័ព្ទដៃ និងការបញ្ជាពីចម្ងាយ។

បច្ចុប្បន្ននៅខេត្តព្រះសីហនុមានគំរោងខុនដូជាច្រើនកំពុងសាងសង់ដូចជាគំរោង Blue Bay, Sunshine Bay, DSeaview, Royal Bay,ជាដើម។

អ្នកនាងអាន សុធីនានាយិកាប្រចាំប្រទេសនៃក្រុមហ៊ុនCBRE Cambodiaបានថ្លែងថា ទីផ្សារខុនដូនៅខេត្តព្រះសីហនុ ដែលរំពឹងដាក់ចូលទីផ្សារឆ្នាំនេះ មានប្រមាណ៨០០យូនីត ខណៈគំរោងភាគច្រើនកំពុងសាងសង់ និងទទួលបានការចាប់អារម្មណ៍ច្រើនពីអ្នកវិនិយោគនានា។អ្នកនាងបន្តថា ចំនួនខុនដូនៅខេត្តព្រះសីហនុនៅមានកម្រិតនៅឡើយ ខណៈអ្នកវិនិយោគជាច្រើនកំពុងឆ្ពោះទៅកាន់ខេត្តនេះ ដែលធ្វើឲ្យមានតម្រូវការលំនៅដ្ឋានកើនឡើងយ៉ាងប្រសើរ។

អ្នកនាងបន្តថា “ទោះជាយ៉ាងណាអ្នកខេត្តព្រះសីហនុ មិនទាន់យល់និងចាប់អារម្មណ៍វិនិយោគលើខុនដូទេ អ្នកវិនិយោគភាគច្រើនៗតែអ្នកទៅពីចម្ងាយ និងជនបរទេស”។អ្នកនាងបន្តថា “តម្លៃខុនដូនៅទីនោះគិតជាមធ្យមមានតម្លៃចន្លោះពី១០០០ ទៅ១៨០០ដុល្លារក្នុងមួយម៉ែត្រការ៉េ ជាតម្លៃដែលខ្ញុំគិតថាមានភាពសមរម្យសម្រាប់ស្ថានភាព និងលក្ខខ័ណ្ឌសេដ្ឋកិច្ចរបស់ខេត្តនេះ”៕