កម្ពុជាស្នើឲ្យសហភាពអារ៉ាប់រួមវិនិយោគលើវិស័យសំណង់ និងអចលនទ្រព្យ

November 15, 2018

ដោយវុត្ថា

ភ្នំពេញ: មន្ត្រីជាន់ខ្ពស់នៃក្រសួងពាណិជ្ជកម្ម បានស្នើដល់មន្ត្រីជាន់ខ្ពស់នៃប្រទេសអារ៉ាប់រួមជួយកៀងគរវិស័យឯកជន នៃសហភាពអារ៉ាប់រួម មកបំពេញទស្សនកិច្ចនៅកម្ពុជា និងវិនិយោគលើវិស័យសំខាន់ៗ ហេដ្ឋារចនាសម្ព័ន្ធ សំណង់អគារ អគ្គិសនី និងទេសចរណ៍ ខណៈវិស័យទាំងនេះ កំពុងតែមានសក្តានុពលសេដ្ឋកិច្ចខ្លាំងនៅក្នុងប្រទេសកម្ពុជា។

នៅក្នុងជំនួបរវាងលោក Mohammad Ali Al Kamali នាយកប្រតិបត្តិរងនៃការិយាល័យនាំចេញឌុយបៃប្រទេសសហភាពអារ៉ាប់រួម នៅកាលពីព្រឹកថ្ងៃទី១៥ ខែវិច្ឆិកា ឆ្នាំ២០១៨ នេះ លោកស្រីតឹករ៉េត កំរង រដ្ឋលេខាធិការក្រសួងពាណិជ្ជកម្ម បានជម្រាបភាគីអារ៉ាប់អំពីគម្រោងទស្សនកិច្ចរបស់ប្រតិភូកម្ពុជា ដឹកនាំដោយលោក រដ្ឋមន្រ្តីក្រសួងពាណិជ្ជកម្ម សម្រាប់កិច្ចប្រជុំ“The 3rd IPM” ដែលនឹងប្រព្រឹត្តទៅនៅថ្ងៃទី២៦ និង២៧ ខែវិច្ឆិកា ឆ្នាំ២០១៨ នៅទីក្រុងឌុយបៃនាពេលខាងមុខ ព្រមទាំងវឌ្ឍនភាពនៃកំណើនសេដ្ឋកិច្ចកម្ពុជា ជាពិសេសឱកាសវិនិយោគ និងសក្តានុពលពាណិជ្ជកម្ម។

លោកស្រីក៏បានស្នើសហភាពអារ៉ាប់រួមចូលរួមព្រឹត្តិការណ៍ «ពិព័រណ៍ផលិតផលខ្មែរ និងផលិតផលនាំចេញនាំចូលកម្ពុជាលើកទី១៣» កម្រិតអន្តរជាតិ ដែលគ្រោងនឹងរៀបចំ ចាប់ពីថ្ងៃទី៨ដល់ទី១១ ខែធ្នូ ឆ្នាំ២០១៨ នៅមជ្ឈមណ្ឌលពិព័រណ៍កោះពេជ្រ រាជធានីភ្នំពេញ ដើម្បីពង្រឹងនិងពង្រីកកិច្ចសហប្រតិបត្តិការពាណិជ្ជកម្មទ្វេភាគី រវាងប្រទេសទាំងពីរ។

ជាការឆ្លើយតប លោក Mohammad Ali Al Kamali នាយកប្រតិបត្តិរងនៃការិយាល័យនាំចេញឌុយបៃ ប្រទេសសហភាពអារ៉ាប់រួម បានទទួលយកសំណើរនេះ ដោយបានសន្យាជួយផ្សព្វផ្សាយដំណឹង ទៅដល់វិស័យឯកជននៃសហភាពអារ៉ាប់រួម ដើម្បីចូលរួមព្រឹត្តិការណ៍អន្តរជាតិខាងលើ។ លោកនាយកប្រតិបត្តិរងរូបនេះ បានបន្ថែមទៀតថា នៅក្នុងឆ្នាំ២០១៩ ការិយាល័យនាំចេញឌុយបៃ គ្រោងរៀបចំកម្មវិធី Business Forum មួយនៅកម្ពុជា ដើម្បីនាំយកនូវក្រុមហ៊ុនល្បីៗ ពីសហភាពអារ៉ាប់រួមមកធ្វើបទបង្ហាញនិងស្វែងរកដៃគូធុរកិច្ច និងវិនិយោគថែមទៀត៕

ប្រទេសនៅអនុតំបន់ទន្លេមេគង្គពង្រីកកិច្ចសហប្រតិបត្តិលើវិស័យទេសចរតាមផ្កូវទឹក

November 15, 2018

0

ដោយ គង់ សូរិយា

ភ្នំពេញ៖ បណ្តាប្រទេសនៅអនុតំបន់ទន្លេមេគង្គ កម្ពុជា វៀតណាម និងថៃ ចាប់ផ្តើមពង្រីកកិច្ចសហប្រតិបត្តិការ នៃការតភ្ជាប់គម្រោងអភិវឌ្ឍន៍ នៃច្រករបៀងសេដ្ឋកិច្ចភាគខាងត្បូង ក្នុងគោលដៅជម្រុញការធ្វើពាណិជ្ជកម្ម ការដឹកជញ្ជូនភ្ញៀវទេសចរណ៍តាមផ្លូវទឹក ដើម្បីពង្រីកសក្តានុពលលើវិស័យទេសរចណ៍កាន់តែប្រសើរឡើង។

មន្ត្រីជាន់ខ្ពស់នៃប្រទេសទាំងបីនេះ បានចូលរួមក្នុងសន្និសីទអន្តរជាតិលើកទី១ ស្តីពីកិច្ចសហប្រតិបត្តិការសេដ្ឋកិច្ចកម្ពុជា-វៀតណាម-ថៃ (CVTEC) ដែលប្រារព្វធ្វើឡើងនៅទីក្រុងប៉ាតាយ៉ា ប្រទេសថៃ នៅថ្ងៃទី១៥ ខែវិច្ឆកា ឆ្នាំ២០១៨នេះ។ តំណាងវិស័យឯកជននៃប្រទេសទាំង៣ រួមមាន អាជ្ញាធរនៃខេត្តនៅជាប់តំបន់សមុទ្រនីមួយៗ បានធ្វើជាសាក្សីលើគម្រោងចុះហត្ថលេខាលើព្រមព្រៀងគ្នា ដោយមានគោលបំណងបង្កើតកិច្ចសហប្រតិបត្តិការ ជម្រុញការធ្វើទេសចរណ៍តាមផ្លូវទឹក ក៏ដូចជាការតភ្ជាប់គម្រោងអភិវឌ្ឍន៍នៃច្រករបៀងសេដ្ឋកិច្ច ខណៈដែលប្រទេសមហាអនុតំបន់ទាំង៣ កំពុងមានសក្តានុពលលើសេដ្ឋកិច្ច ពាណិជ្ជកម្ម និងទេសចរណ៍។

ប្រទេសកម្ពុជា វៀតណាម ថៃ បានផ្តោតយ៉ាងសំខាន់លើគម្រោងតភ្ជាប់ការដឹកជញ្ជូនទំនិញ គម្រោងជម្រុញអភិវឌ្ឍន៍បណ្តាញដឹកជញ្ជូនភ្ញៀវទេសចរណ៍ផ្លូវទឹក ការបង្កើតឲ្យមានកំពង់ផែរទេសចរណ៍ និងការជម្រុញបង្កើតបន្ថែមលើផ្នែកភោជនីយដ្ឋាន និងសណ្ឋាគារកម្រិតមធ្យម និងខ្ពស់ រួមជាមួយការបង្កើតក្រុមមធ្យោបាយដឹកជញ្ជូន ដើម្បីផ្តល់សេវា ខណៈភ្ញៀវទេសចរណ៍អញ្ជើញទៅតាមគោលដៅនីមួយៗ ប្រកបដោយសុវត្ថិភាព។

ពាក់ព័ន្ធកិច្ចការចុះកិច្ចព្រមព្រៀងនេះ តំណាងសភាពាណិជ្ជកម្មរវាងប្រទេសចំនួន២ គឺកម្ពុជា និងថៃ បានចុះអនុស្សារណៈជាមួយគ្នា ខណៈដែលភាគីវៀតណាមសុំត្រឹមជាអ្នកសង្កេតការណ៍ ពោលគឺមិនបានចូលរួមក្នុងការចុះកិច្ចព្រមព្រៀងនេះឡើយ៕

ក្រុមហ៊ុនអចលនទ្រព្យលំដាប់ពិភពលោកមួយចាប់ផ្តើមឈានជើងចូលទីផ្សារកម្ពុជាពេញលេញ

November 15, 2018

0

ដោយ ស៊ីវ ម៉េង

ភ្នំពេញ៖ ក្រុមហ៊ុនអចលទ្រព្យលំដាប់ពិភពលោក ERA បានចាប់ផ្តើមឈានជើងប្រឡូកយ៉ាងពេញលេញក្នុងទីផ្សារអចលនទ្រព្យនៅកម្ពុជា ដែលធ្វើឲ្យគុណភាពសេវាកម្ម ទិញ លក់ជួលកាន់តែមានគុណភាព ប៉ុន្តែទីផ្សារនេះក៏កំពុងប្រឈមការប្រកួតប្រជែងកាន់តែតានតឹងផងដែរ។

ការសម្ភោធជាផ្លូវការនៃក្រុមហ៊ុនអចលនទ្រព្យ ERA Cambodia បានប្រារព្ធឡើងកាលពីថ្ងៃទី១១ ខែវិច្ឆិកា ឆ្នាំ២០១៨ នៅសណ្ឋាគារ Raffles Le Royal Hotel ត្រូវបានចូលរួមដោយថ្នាក់ដឹកនាំក្រុមហ៊ុនERA ដ៏មានឥទ្ធិពលមកពីបណ្តាប្រទេសក្នុងតំបន់អាស៊ីប៉ាស៊ីហ្វិក។

លោក Jack Chua អគ្គនាយកក្រុមហ៊ុន ERA Singapore និង Asia Pacific ដែលមានភ្នាក់ងារចំនួន ៦១២០នាក់ លោក Darmadi Darmawangsa អគ្គនាយកក្រុមហ៊ុន ERA Indonesia ដែលមានភ្នាក់ងារចំនួន៦៥៣០នាក់ លោក Voradet Sivatachanon អគ្គនាយកក្រុមហ៊ុន ERA Thailand រួមជាមួយនឹងថ្នាក់ដឹកនាំក្រុមហ៊ុន Century 21មកពីគ្រប់ការិយាល័យ នឹងត្រូវបានអញ្ជើញចូលរួមកម្មវិធីនេះផងដែរ។

លើសពីនេះទៅទៀត យើងក៏បានអញ្ជើញម្ចាស់ក្រុមហ៊ុនអចលនទ្រព្យ ដែលមានអញ្ញាបណ្ណ័ ដែលជាសមាជិកសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា CVEA ផងដែរ។ កម្មវិធីដ៏មានសារសំខាន់មួយនេះនេះ ក៏នឹងមានការចូលរួមពីសំណាក់មន្ត្រីជាន់ខ្ពស់ក្នុងរដ្ឋាភិបាល និងសមាគមផ្សេងៗដូចជាក្លឹបអ្នកវិនិយោគកម្ពុជា CIC ជាដើម។ ក្រុមហ៊ុន ERA មានវត្តមាននៅបណ្តាតំបន់មួយចំនួនរួចមកហើយដូចជា Africa, Caribbean, Europe, Middle East, and Asia-Pacific។

នៅអាស៊ីERA បានបោះទីតាំងនៅប្រទេស Singapore, Indonesia, Japan, Korea, Malaysia, Taiwan, Thailand និង Vietnam។ យើងមានការិយាល័យចំនួន ៦៣៨ ជាមួយនឹងភ្នាក់ងារ ១៧០០០នាក់ នៅក្នុងតំបន់ រួមទាំងប្រទេសកម្ពុជានៅពេលដែលយើងប្រកាសជាផ្លូវការជាដៃគូរពាណិជ្ជកម្មនៅក្នុងអាណាចក្រមួយនេះ។

នាពេលបច្ចុប្បន្ នERA មានវត្តមាននៅ៤៥រដ្ឋ នៅសហរដ្ឋអាមេរិក និង៣២ប្រទេសទូទាំងសកលលោក ជាមួយនឹងការិយាល័យចំនួន២២៥០ និងភ្នាក់ងារ៣៩, ៥៥៧នាក់។

លោកខន គង្គា អគ្គនាយកក្រុមហ៊ុន ERA Cambodia មានប្រសាសន៍ថា “អ្វីដែលយើងបាននឹងកំពុងធ្វើនៅក្នុងប្រទេសកម្ពុជា គឺក្នុងគោលបំណងលើកកំពស់វិជ្ជាជីវៈ និងភាពស្មោះត្រង់នៃភ្នាក់ងារបស់យើង ដើម្បីឲ្យប្រាកដថាពួកគេអាចផ្តល់សេវាកម្មគួរជាទីគាប់ចិត្តជូនដល់អតិថិជន និងអ្នកអភិវឌ្ឍន៍។

ក្រុមហ៊ុនERAបានចូលមកក្នុងទីផ្សារកម្ពុជា នៅក្នុងបែបផែនមួយដែលផ្លែកពីគេ និងមានទស្សនៈវិស័យខុសពីគេ ហើយយើងបាននាំយកមកជាមួយនឹងប្រពន្ធ័ប្រតិបត្តិការស្តង់ដាអន្តរជាតិ ដែលបានកែច្នៃធ្វើយ៉ាងណាឲ្យស្របទៅតាមបរិបទប្រទេសកម្ពុជា ហើយទទួលបានលទ្ធផលខ្ពស់បំផុត។

លោកខន គង្គាបានមានប្រសាសន៍ថា “ភ្នាក់ងាររបស់យើងបានទទួលការបណ្តុះបណ្តាលជាប្រចាំ ហើយយើងមានវគ្គបណ្តុះបណ្តាលជាច្រើន ទាក់ទងទៅនឹងយុទ្ធសាស្ត្រផ្នែកលក់ ដែលអាចធ្វើឲ្យភ្នាក់ងាររបស់យើង ទទួលបានលទ្ធផលលឿននិងច្រើនបំផុត។

យោងទៅតាមលោក គង្គា ក្រុមហ៊ុនERA បេជ្ញានាំយកអាជីវកម្មមួយនេះឆ្ពោះទៅកំរិតស្តង់ដាអន្តរជាតិ។

លោកចង់ឃើញភ្នាក់ងាររបស់ក្រុមហ៊ុនតាំងចិត្ត និងខិតខំប្រឹងប្រែង ១០០ភាគរយ ក្នុងការធ្វើការប្រកបដោយវិជ្ជាជីវៈខ្ពស់ទាំងក្នុងស្រុក និងនៅលើឆាកអន្តរជាតិ។

លោកខន គង្គាបានបន្ថែមទៀតថា យើងបេជ្ញាផ្តល់សេវាកម្មចំណាត់លេខ១ ទទួលបានលទ្ធផលលេខ១ និងការពេញចិត្តលេខ១ ពីសំណាក់អតិថិជន។ ដៃគូអាជីវកម្ម ERA នឹងទទួលបានការគាំទ្រយ៉ាងសកម្មពីក្រុមហ៊ុនតាមរយៈការបណ្តុះបណ្តាលឈានមុខគេលើវិស័លអចលទ្រព្យ។ អតិថិជន និងអ្នកអភិវឌ្ឍន៍ នឹងមានទំនុកចិត្តខ្ពស់ក្នុងការសហការជាមួយភ្នាក់ងារដែលមានវិជ្ជាជីវៈ ដែលផ្តល់នូវសេវាកម្ម និងភាពស្មោះត្រង់ខ្ពស់បំផុតពីក្រុមហ៊ុនអចលទ្រព្យ ERA៕

ស្វែងរកភាពអស្ចារ្យពីក្រុងឌូបៃ! តោះទៅមើលស្ថាបត្យកម្មនៃសតវត្សរ៍ទី២១របស់ទីក្រុងនេះ

November 15, 2018

0

ដោយ វុត្ថា

ភ្នំពេញ៖ ទីក្រុងឌូបៃមានអ្វីអស្ចារ្យ ដែលអ្នកមិនធ្លាប់បានគិតដល់ជាច្រើនដោយសារទីក្រុងនេះ ពោពេញទៅដោយការប្រមូលផ្តុំនូវអាគារខ្ពស់ៗ និងមានរចនាបថស្ថាបត្យកម្មជាច្រើនប្រភេទ ដែលស្ថាបត្យកម្មទាំងនោះគឺជាស្ថាបត្យកម្មសំណង់សម័យទំនើប ហើយភាកច្រើនគឺជាស្ថាបត្យកម្ម តាមបែបបទសាសនាអ៊ីស្លាមនៅក្នុងពិភពឥស្លាមនៅក្នុងទីក្រុងឌូបៃ។

ការរីកចម្រើនផ្នែកស្ថាបត្យកម្ម និងសំណង់នៅក្នុងពិភពអារ៉ាប់ត្រូវបានគាំទ្រដោយក្រុមហ៊ុនរចនាស្ថាបត្យកម្ម និងវិស្វកម្មកំពូលៗរបស់អារ៉ាប់ និងអន្តរជាតិដូចជា ក្រុមហ៊ុន Al Hashemi និង Aedas និងមានការគាំទ្រដោយក្រុមហ៊ុនធំៗ មកពីបុរីញូវយ៉ក និងឈីកាហ្គោរបស់សហសហរដ្ឋអាមេរិកផងដែរ។

ជាលទ្ធផលនៃការរីកចំរើនរបស់ស្ថាបត្យកម្មអ៊ីស្លាម និងស្ថាបត្យកម្មសម័យទំនើបនេះ ត្រូវបានគេរចនាគួបផ្សំដោយបច្ចេកវិទ្យាទំនើប។ នាពេលបច្ចុប្បន្ននេះទីក្រុងឌូបៃ មានអគារខ្ពស់ជាច្រើន និងមានកំពស់រហូតដល់ជិត១ពាន់ម៉ែត្រខ្ពស់ជាងទីក្រុងណាៗទាំងអស់ក្នុងពិភពលោក។

គេហទំព័រ propertyarea.asia បានបង្ហាជូននូវអគាខ្ពស់ៗជាច្រើនទាំងនៅក្នុងពិភពអារ៉ាប់និងពិភពលោក។ សម្រាប់ពេលនេះគេហទំព័រ propertyarea.asia ដែលជាគេហទំព័រឈានមុខគេ ផ្នែកអចលនទ្រព្យ នឹងបន្តបង្ហាញជូននូវអគារ Cayan Tower មួយបន្ថែមទៀត។

អគារ Cayan ដែលគេស្គាល់ថាជាអគារ Infinity Tower មុនពេលបើកសម្ពោធគឺមានកម្ពស់៣០៦ ម៉ែត្រនិង៧៥ជាន់ ស្ថិតនៅទីក្រុងDubai ប្រទេសអារ៉ាប់រួមដែលវិនិយោគ ដោយក្រុមហ៊ុនអចលនទ្រព្យដ៏ធំគឺ Cayan។ អគារនេះត្រូវបានរចនាឡើង ដោយក្រុមស្ថាបត្យកម្មល្បីល្បាញគឺ Skidmore, Owings និង Merrill SOM ដែលជាក្រុមតែមួយដែលបានរចនាប្លង់សម្រាប់អគារ Burj Khalifa នៅក្នុងទីក្រុង Dubai និង អគារ Trump Tower នៅក្នុងទីក្រុងឈីកាហ្គោសហរដ្ឋអាមេរិក។

នៅពេលបើកសម្ពោធនៅថ្ងៃទី១០ ខែមិថុនាឆ្នាំ២០១៣ អគារនេះបានក្លាយជាអគារខ្ពស់បំផុត នៅលើពិភពលោកជាមួយនឹងរង្វង់៩០ដឺក្រេ។ កំណត់ត្រានេះបានវ៉ាដាច់ដោយអគារសៀងហៃ ដែលបានបើកដំណើរការកាលពីខែកុម្ភៈឆ្នាំ ២០១៥ ។

អាគារ Cayan Tower មានផ្ទះល្វែងដ៏ប្រណីត ដែលមានរូបរាងរាងប្លែកដ៏គួរឱ្យចាប់អារម្មណ៍។ ជាន់នៃគារនីមួយៗ មានរាងកំណត់១.២ដឺក្រេ តាមទ្រនិចនាឡិកា ពីជាន់ខាងក្រោមធ្វើឱ្យប៉មនេះ មានទម្រង់ខុសប្លែកពីគ្នាតាមរចនាបទថ្មីប្រកបដោយប្រសិទ្ធភាព និងអាចធ្វើឡើងវិញបាន។ រូបរាងរបស់វាគឺជាការបង្ហាញយ៉ាងច្បាស់ នៃទំនាក់ទំនងរវាងសំណុំប្លង់ស្ថាបត្យកម្មអគារ និងគ្រោងការរចនាសម្ព័ន្ធ។

CAYAN Tower មានសោភ័ណភាពរូបរាងស្រស់បំព្រង ធ្វើឱ្យអាគារនេះលេចធ្លោចេញពីមាត់ទន្លេរឌូបៃ ដែលភាគច្រើនមានប៉មមិនច្បាស់លាស់។ បើនិយាយពីទីតាំង គឺស្ថិតនៅជិតទីក្រុងឌូបៃមានក្លិប (International Arab Emirates) និងទីស្នាក់ការកណ្តាលសាជីវកម្មtwisting។ វត្តមានអាគារដ៏អស្ចារ្យនេះ បង្ហាញពីទេសភាពគួរឱ្យចាប់អារម្មណ៍ នៃទីក្រុងឌូបៃម៉ារីណា និងឈូងសមុទ្រអារ៉ាប់ក៏ដូចជារក្សាទស្សនៈ សម្រាប់ប្រជាជនរស់នៅជិតអគារនោះ និងអាចធានាថាអគារ Cayan បង្កើតភាពដ៏អស្ចារ្យរបស់ខ្លួន។

ងាកទៅមើលប្រវត្តិនៃការសាងសង់វិញ គឺការសាងសង់អគារនេះត្រូវបានផ្អាកអស់រយៈពេលមួយឆ្នាំកន្លះ បន្ទាប់ពីទីតាំងគ្រឹះនៃអគារនេះ ត្រូវបានជន់លិចនៅពេលដែលជញ្ជាំង ដែលរារាំងនៅឌូបៃម៉ារីណា ត្រូវបានគេរំលោភបំពាននៅថ្ងៃទី ៧ ខែកុម្ភៈឆ្នាំ ២០០៧ ហើយចាប់ផ្តើមបន្តការសាងសង់ឡើងវិញ នៅខែកក្កដា ឆ្នាំ ២០០៨ ។

Cayan Tower ត្រូវបានសម្ពោធដាក់ឲ្យដំណើការ ជាផ្លូវការកាលពីថ្ងៃទី ១០ ខែមិថុនា ឆ្នាំ២០១៣ ហើយជាអគារដែលខ្ពស់ជាងគេបំផុតនៅលើពិភពលោកក្នុងពេលនោះ។ អគារនេះត្រូវបានប្តូរឈ្មោះពីអគារ Infinity Tower ទៅកាន់ Cayan Tower ដោយសារតែមានអគារឈ្មោះ Infinity ច្រើនពេកនៅលើពិភពលោក៕

ដំណឹងល្អ! ក្រុមហ៊ុនផ្សារទំនើប Aeon គ្រោងវិនិយោគផ្សារទំនើបខ្នាតតូច ៣០ទៀតនៅកម្ពុជា

November 15, 2018

0

ដោយ វុត្ថា

ភ្នំពេញ៖ ក្រុមហ៊ុនផ្សារទំនើប EAON MALL Group បានប្រកាសពីគំរោងវិនិយោគផ្សារទំនើប AEON Mall ខ្នាតតូចចំនួន៣០ទីតាំងបន្ថែមទៀត នៅប្រទេសកម្ពុជា ដោយសារកំនើនប្រាក់ចំណូល និងអំណាចនៃការទិញកើនឡើង។

យោងតាម Asian Investment Report 2018 បានអោយដឹងនៅក្នុងរបាយការណ៍របស់ខ្លួនមួយបានបញ្ជាក់ថា ក្រុមហ៊ុនផ្សារទំនើបAeon មានគម្រោងបើកផ្សារទំនើបអោយបានជាង៣០បន្ថែមទៀត នៅក្នុងប្រទេសកម្ពុជាក្នុងឆ្នាំ២០២០ ខាងមុខនេះខណៈត្រឹមតែពីរឆ្នាំគឺនៅក្នុង២០១៧ និងនៅក្នុងឆ្នាំ២០១៨ កន្លងទៅនេះ បានម្ពោធផ្សារចំនួន២រួចហើយ។

របាយការណ៍នេះបន្ថែមថា ក្រមហ៊ុនមួយនេះ ក៏មានគម្រោងពង្រីផ្សាររបស់ខ្លួននៅក្នុងប្រទេសវៀតណាមអោយបានជាង២០ បន្ថែមទៀតផងដែរ នៅក្នុងឆ្នាំ២០២៥ ខាងមុខ។ រហូតមកដល់ពេលនេះមានផ្សារប្រហែល១១ ហើយដែលបានចូលនៅក្នុងទីផ្សារវៀតណាមចាប់តាំងពីឆ្នាំ២០១៧ និងបន្តសម្ពោធដាក់អោយដំណើរថែមទៀតនៅទីនោះ។

ទំហំទុនវិនិយោគផ្ទាល់ពីបរទេស របស់ប្រទេសជប៉ុនមកកាន់តំបន់អាស៊ានកើនឡើង១៨ភាគរយពោល គឺកើនឡើង៦,១ពាន់លានដុល្លារ ហើយការវិនិយោគរបស់ប្រទេសជប៉ុនលើពាណិជ្ជកម្មលក់រាយ និងដុំកើនឡើង៥០ភាគរយ ពោលគឺមានទំហំទឹកប្រាក់ចំនួន៤,៣ពាន់លានដុល្លារ ដោយឡែងប្រទេសជប៉ុន ក៏គ្រោងនឹងសម្ពោធដាក់អោយដំនើររការផ្សារលក់រាយបន្ថែមទៀត នៅក្នុងតំបន់អាស៊ានផងដែរ។

ដោយឡែងសម្រាប់វិនិយោគផ្ទាល់ពីបរទេស (FDI) របស់សហរដ្ឋអាមេរិកវិញនៅក្នុងតំបន់អាស៊ាន ហាក់មានការធ្លាក់ចុះចាប់តាំងពីឆ្នាំ២០១៦ ពី ១៧ពាន់លានដុល្លារមកនៅត្រឹម២,១ពាន់លានដុល្លារសហរដ្ឋអាមេរិក៕

ក្រុមហ៊ុនចិនដ៏ធំមួយគ្រោងវិនិយោគរោងចក្រផលិតសម្ភារៈអគ្គិសនីនៅក្រុងព្រះសីហនុ

November 15, 2018

0

ដោយ គង់ សូរិយា

ភ្នំពេញ៖ ក្រុមហ៊ុនដ៏ធំមួយរបស់ប្រទេសចិន បាននិងកំពុងសិក្សាស្វែងរកឳកាសវិនិយោគបង្កើតរោងចក្រផលិតឧបករណ៍សម្ភារៈអគ្គិសនី នៅក្នុងតំបន់សេដ្ឋកិច្ចពិសេសខេត្តព្រះសីហនុ ដើម្បីផ្គត់ផ្គង់ទីផ្សារក្នុងស្រុក និងការនាំចេញទៅក្រៅប្រទេស ។

លោក Hongjian Wang ប្រធានក្រុមហ៊ុន Suzhou Zhongchu Puhua Electric Tecnology មកពីទីក្រុង Suzhou ខេត្ត Jiangsu ប្រទេសចិន បានមានប្រសាសន៍ឲ្យដឹងក្នុងជនួបជាមួយលោកបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មកាលពីដើមសប្តាហ៍នេះថា ក្រុមហ៊ុនរបស់លោក បានបង្កើតឡើងតាំងពីឆ្នាំ១៩៨៣ ជាក្រុមហ៊ុនបានផលិតឧបករណ៍អគ្គិសនី ដូចជាប្រអប់ភ្លើង និងកុងតាក់បិទបើកភ្លើងជាដើម បច្ចុប្បន្នក្រុមហ៊ុនបានកំពុងចែកចាយ ទៅកាន់ទីផ្សារសហរដ្ឋអាមេរិក និងសហគមន៍អឺរ៉ុបផងដែរ ។

លោកបន្តថា “ក្រុមហ៊ុនមានគម្រោងវិនិយោគបង្កើតរោងចក្រផលិត ឧបករណ៍សម្ភារៈអគ្គិសនីនៅកម្ពុជា ហើយខ្ញុំមានជំនឿជឿទុកចិត្តយ៉ាងខ្លាំង អំពីការចែកចាយក្នុងតំបន់ និងការនាំចេញទៅកាន់ទីផ្សារក្រៅស្រុក ព្រោះការនាំចេញនូវមុខទំនិញរាប់ពាន់មុខពីកម្ពុជា គឺរួចពន្ធ និងមិនជាប់កូតា ដោយកម្ពុជាទទួលបានភាពអនុគ្រោះពាណិជ្ជកម្ម ពីប្រទេសអភិវឌ្ឍន៌ និងប្រទេសជាដៃគូជាច្រើន។

លោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មបានថ្លែងថា ក្នុងគោលនយោបាយអភិវឌ្ឍន៍សេដ្ឋកិច្ចរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ មកដល់បច្ចុប្បន្នបានកំពុងពូនជ្រុំយ៉ាងរឹងមាំជាមួយមិត្តចិន ក្នុងការចូលរួមអភិវឌ្ឍន៍ក្រោមក្របខ័ណ្ឌគំនិតផ្តួចផ្តើម ផ្លូវមួយ ខ្សែរក្រវ៉ាត់មួយរបស់ប្រធានាធិបតីចិន ស៊ី ជីងពីង ។លោកបន្តថា ពាក់ព័ន្ធវិស័យឧស្សាហកម្មចាប់តាំងពីឆ្នាំ២០១៥មក វិស័យនេះមានអត្រាកំណើនខ្ពស់ ជាងវិស័យកសិកម្ម ដោយមានកំណើនប្រមាណពី១០ ទៅ១២ភាគរយក្នុងមួយឆ្នាំ ស្របពេលដែលវិស័យកសិកម្ម មានកំណើនត្រឹម ១ទៅ ២ភាគរយប៉ុណ្ណោះ។

លោកបន្តថា ចំពោះគោលបំណងរបស់ក្រុមហ៊ុន ដែលចង់បង្កើតរោងចក្រនៅតំបន់សេដ្ឋកិច្ចពិសេស ខេត្តព្រះសីហនុ ឯកឧត្តមកិទេសរដ្ឋមន្ត្រីបានគាំទ្រពេញទំហឹង ព្រោះខេត្តព្រះសីហនុទាំងមូល រាជរដ្ឋាភិបាលកម្ពុជាបានកំណត់ជា តំបន់សេដ្ឋកិច្ចពិសេសពហុបំណង ដែលមានការសម្រួលសេវារដ្ឋបាលគ្រប់បែបយ៉ាង តាមរយៈយន្តការច្រកចេញចូលតែមួយ៕

ឧកញ៉ាសៀ រិទ្ធី បង្ហើបពីវិធីសាស្ត្រជោគជ័យក្នុងការវិនិយោគលើវិស័យអចលនទ្រព្យ

November 15, 2018

0

ដោយ ស៊ីវ ម៉េង

ភ្នំពេញ៖ អ្នកវិនិយោគនិមួយៗ តែងមានយុទ្ឋសាស្ត្រស្រដៀងគ្នាឬខុសគ្នា អាស្រ័យលើសមត្ថភាព និងចំណេះដឹងរបស់ពួកគេ ប៉ុន្តែថ្ងៃនេះយើងនឹងលើកយកវិធីសាស្ត្រចំនួន៤របស់លោកឧកញ៉ាសៀ រិទ្ឋីដែលបានបង្ហាញពីគន្លឹះជោគជ័យក្នុងការវិនិយោគលើវិស័យអចលនទ្រព្យ។

លោកឧកញ៉ាដែលកំពុងទទួលជោគជ័យ លើការអភិវឌ្ឍន៍វិស័យខុនដូនៅកម្ពុជា បានប្រាប់នូវវិធីសាស្ត្រចំនួន៤ ដល់គេហទំព័រ Propertyarea.asia ដើម្បីចែករំលែកដល់អ្នកចង់វិនិយោគលើវិស័យអចលនទ្រព្យ។

លោកឧកញ៉ាសៀ រិទ្ឋីអគ្គនាយកក្រុមហ៊ុន World Bridge Groupបានថ្លែងថា ប្រសិនជាអ្នកចង់អភិវឌ្ឍន៍លើការសាងសង់ខុនដូលក់ ត្រូវគិតលើកត្តាមួយចំនួន ទី១ អ្នកអភិវឌ្ឍន៍ត្រូវសិក្សាថា អ្នកណាគេជាសក្តានុពលទីផ្សាររបស់យើង។ បើយើងសិក្សាទីផ្សារមិនច្បាស់ យើងជួបបញ្ហាហើយ។ ទី២ យើងត្រូវដឹងថា ចិនត្រូវការបែបណា ជប៉ុនត្រូវការបែបណា សាំងហ្កាពួរ ឬហុងកុងត្រូវការបែបណា? យើងត្រូវសិក្សាឲ្យច្បាស់។

ទី៣ បើយើងចាប់យកអតិថិជនទាំងអស់ យើងត្រូវរៀបចំគំរោងបែបណា ដើម្បីឲ្យពួកគេទទួលបានទាំងអស់គ្នា។ អ្នកអភិវឌ្ឈន៍ត្រូវឆ្លាតចំណុចហ្នឹង។ ទី៤ យើងត្រូវរៀបចំក្រុមហ៊ុនរបស់ខ្លួនឲ្យមានតម្លាភាព មានគណនេយ្យភាព និងបង់ពន្ឋជូនរដ្ឋឲ្យបានត្រឹមត្រូវ ព្រោះបើយើងរៀបចំក្រុមហ៊ុនមិនបានល្អ និងតម្លាភាពទេ យើងមិនអាចចាប់ដៃគូវិនិយោគពីក្រៅប្រទេសបានទេ។

លោកឧកញ៉ាសៀ រិទ្ឋីបានបន្តថា “ដោយសារខ្ញុំធ្វើឲ្យក្រុមហ៊ុនមានតម្លាភាព និងគណនេយ្យភាពត្រឹមត្រូវ គោរពច្បាប់ប្រទេស ទើបមានក្រុមហ៊ុនអន្តរជាតិជាច្រើនចង់ចាប់ដៃគូជាមួយខ្ញុំ”៕

វគ្គបណ្តុះបណ្តាលពិសេស! តើគួរវិនិយោគលើវិស័យអចលនទ្រព្យដូចម្តេចដើម្បី បញ្ចៀសហានិភ័យ

November 15, 2018

0

ដោយ ស៊ីវ ម៉េង

ភ្នំពេញ៖ វគ្គបណ្តុះបណ្តាលពិសេសមួយ ដោយផ្តោតលើការស្វែងរកព៌តមានជាក់លាក់ និងអាចទុកចិត្តបាន និងវិធីសាស្ត្រវិនិយោគលើវិស័យអចលនទ្រព្យ ដើម្បីបញ្ចៀសហានិភ័យ នឹងចាប់ផ្តើមនៅថ្ងៃទី៨ធ្នូខាងមុខនេះ នៅក្នុងមជ្ឈមណ្ឌលកិច្ចសហប្រតិបត្តិការកម្ពុជា ជប៉ុន (CJCC)។

ដោយសារកង្វល់ទាក់ទងនឹងការវិនិយោគ ដែលអាចប្រឈមហានិភ័យ អ្នកជំនាញមួយក្រុមនឹងផ្តល់នូវវគ្គបណ្តុះបណ្តាលពិសេសមួយ ដើម្បីពួកគេបានយល់ដឹងពីវិនិសាស្ត្រវិនិយោគ ដើម្បីទទួលបានផលចំណេញ និងជាការវិនិយោគត្រឹមត្រូវតាមអ្វីដែលពួកគេចង់បាន។

ស្ថាបនិកនិងជាអគ្គនាយកនៃក្រុមហ៊ុនគេហទំព័រ Propertyarea.asia លោកយិន លាងគង់បានមានប្រសាសន៍ឲ្យដឹងនាព្រឹកថ្ងៃទី១៥ វិច្ឆិកានេះថា វគ្គបណ្តុះបណ្តាលនេះ ពិតជាមានសារៈសំខាន់ ដោយសារយើងនាំយកនូវជំនាញ ដើម្បីធ្វើជាមូលដ្ឋានគ្រឹះសំរាប់វិនិច្ឆ័យ ការស្វែងរកព៌តមានត្រឹមត្រូវ និងប្រកបដោយលក្ខណៈវិទ្យាសាស្ត្រ ដើម្បីធ្វើជាមូលដ្ឋានពិចារណា មុនសម្រេចចិត្តវិនិយោគ។លោកបន្តថា ព៌តមានពិត និងអាចទុកចិត្ត បានមានសារៈសំខាន់ណាស់ សម្រាប់ធ្វើជាមូលដ្ឋាននៃការសម្រេចចិត្តវិនិយោគលើវិស័យអ្វីមួយ។

លោកបន្តថា “ខ្ញុំនឹងប្រើប្រាស់ជំនាញ និងបទពិសោធន៍រយៈពេលជាង២០ឆ្នាំក្នុងវិស័យសារព៌តមាន ដើម្បីបង្ហាញនូវមូលដ្ឋានគ្រឹះទាក់ទងព៌តមានពិត និងមិនពិត និងសារៈសំខាន់នៃសារព៌តមាន ដែលគួរជ្រើសរើសសម្រាប់អាន។ លោកបន្តថា “ក្នុងពិភពព៌តមា

នអាចមានព៌តមានពិត និងព៌តមានមិនពិត ហេតុនេះយើងនឹងផ្តល់នូវមូលដ្ឋានគ្រឹះនៃព៌តមាន ដើម្បីដឹងពីសារៈសំខាន់នៃតួនាទីសារព៌តមាន ដែលជាព៌តមានអាចទុកចិត្តបាន និងប្រើប្រាស់ជាមូលដ្ឋានសំរាប់គិតពិចារណា។

តើព៌តមានពិត និងសរសេរព៌តមានទាក់ទងវិស័យអចលនទ្រព្យយ៉ាងដូចម្តេចដើម្បីទាក់ទាញអ្នកអាន អាចទុកចិត្តបានត្រូវផ្អែកលើមូលដ្ឋានអ្វីខ្លះ យើងនឹងបកស្រាយក្នុងវគ្គបណ្តុះបណ្តាលពិសេសនេះ។

ជាមួយគ្នានេះលោកឌិត ចណ្ណាអគ្គនាយកក្រុមហ៊ុន Lucky Realty Group ដែលមានបទពិសោធន៍ជាច្រើនឆ្នាំលើការទិញលក់ វិនិយោគក្នុងវិស័យអចលនទ្រព្យនៅកម្ពុជាបានមានប្រសាសន៍ឲ្យដឹងផងដែរថា មុនសម្រេចចិត្តវិនិយោគ ការទទួលបានព៌តមានគ្រប់ជ្រុងជ្រោយ និងត្រូវពិនិត្យលើកត្តាអ្វីខ្លះ ទាក់ទងនឹងលំហូរសាច់ប្រាក់ ទីតាំងភូមិសាស្ត្រ និងមូលដ្ឋានអ្វីខ្លះ មុនសម្រេចចិត្តវិនិយោគ ដើម្បីបញ្ចៀសហានិភ័យ ពិតជាមានសារៈសំខាន់ណាស់ សម្រាប់ភ្នាក់ងារ ក៏ដូចជាអ្នកវិនិយោគនានាធ្វើការសម្រេចចិត្ត។

លោកបន្តថា “អ្នកមានចំណេះដឹង អ្នកយល់ពីទីផ្សារនឹងទទួលបានជោគជ័យលើការវិនិយោគរបស់ខ្លួន ហេតុនេះអ្នកវិនិយោគដែលចង់បញ្ចៀសហានិភ័យ គួរចូលរួមវគ្គបណ្តុះបណ្តាលនេះ។

អគ្គនាយកក្រុមហ៊ុន Century21 Dream Propertyលោកគាម សៀកឡុងដែលបានចាប់ផ្តើមក្រុមហ៊ុន ដោយមិនសូវមានមូលដ្ឋានទុន ចំណេះដឹង ប៉ុន្តែរហូតមកទល់ពេលនេះលោកទទួលបានជោគជ័យ និងក្លាយជាក្រុមហ៊ុនភ្នាក់ងារទិញ លក់ ជួលអចលនទ្រព្យឈានមុខគេមួយ ក្នុងចំណោមក្រុមគ្រួសារ Century21 ដែលមានការិយាល័យច្រើនជាង១០ក្រុមហ៊ុននៅកម្ពុជា នឹងបង្ហាញបទពិសោធន៍ពីការចាប់ផ្តើម រហូតដល់ទទួលបានភាពជោគជ័យរបស់លោកក្នុងវគ្គបណ្តុះបណ្តាលពិសេសនេះ។

លោកបន្តថា “ភាពជោគជ័យទាំងអស់ផ្តើមចេញពីមូលដ្ឋានចំណេះដឹង មូលដ្ឋាននៃការសម្រេចចិត្តត្រឹមត្រូវ ហេតុនេះការវិនិយោគដែលអាចបញ្ចៀសបានហានិភ័យ ជាបំ ណងប្រាថ្នារបស់អ្នកវិនិយោគនានា។លោកបន្តថា “ខ្ញុំនឹងចែករំលែកបទពិសោធន៍នៃភាពជោគជ័យនិងមូលដ្ឋានគ្រឹះនានា ដើម្បីឈានទៅទទួលបានជោគជ័យក្នុងវគ្គបណ្តុះបណ្តាលពិសេសនេះ”៕

ស្វែងយល់អាស៊ាន! មេដឹកនាំអាស៊ានចាត់ទុកទំនាក់ទំនងសេដ្ឋកិច្ច-ពាណិជ្ជកម្មរវាងអាស៊ាន-ចិនមិនអាចខ្វះបាន

November 15, 2018

0

ដោយ វុត្ថា

ភ្នំពេញ៖ ប្រមុខរដ្ឋ ប្រមុខរដ្ឋាភិបាលនៃប្រទេសអាស៊ាន បានសំដែងសុឆន្ទៈ និងជំនឿយ៉ាងមុតមុំាបំផុតចំពោះទំនាក់ទំនងសេដ្ឋកិច្ច-ពាណិជ្ជកម្ម និងទំនាក់ទំនងជាយុទ្ធសាស្ត្រគ្រប់ជ្រុងជ្រោយរវាងអាស៊ាន-ចិន ដោយមេដឹកនាំទាំងនោះបានវាយតម្លៃខ្ពស់ចំពោះសមិទ្ធផលផ្លែផ្កាជាច្រើន ដែលបានកើតចេញពីកិច្ចសហប្រតិបត្តិការអាស៊ាន-ចិន ដែលបាននឹងកំពុងចូលរួមចំណែកក្នុងបុព្វហេតុស្ថិរភាព សន្តិសុខ សេដ្ឋកិច្ច ពាណិជ្ជកម្ម វិនិយោគ ការតភ្ជាប់ ចំណងការទូត និងទំនាក់ទំនងរវាងប្រជាជន និងប្រជាជន។

លោក លី ស៊ានឡុង នាយករដ្ឋមន្រ្តី សិង្ហបុរីឪ្យដឹងនៅក្នុងកិច្ចប្រជុំកំពូលអាស៊ាន-ចិនលើកទី២១ ដែលប្រព្រឹត្តិទៅក្រោមប្រធានបទ «ការពិនិត្យឡើងវិញនូវកិច្ច សហប្រតិបត្តិការអាស៊ាន-ចិន និងទិសដៅអនាគត»នៅថ្ងៃទី ១៤ ខែវិច្ឆិកាឆ្នាំ ២០១៨នេះថា សេដ្ឋកិច្ចរវាងអាស៊ា-ចិនត្រូវតែធ្វើឡើងដោយបើកចំហរ និងតភ្ជាប់ដើម្បីទទួលបានផលប្រយោជន៍ទៅវិញទៅមក ដោយឈរលើប្រព័ន្ធពាណិជ្ជកម្មចម្រុះភាគី (multilateral trading system)។
លោកលី បន្តថា ទំហំពាណិជ្ជកម្មរបស់ប្រទេសចិននៅក្នុងតំបន់អាស៊ានឈរនៅលេខរៀងទី ១ អស់រយៈពេល ៨ ឆ្នាំកន្លងមកហើយ ដោយគិតត្រឹមឆ្នាំ ២០១៧ ទំហំពាណិជ្ជកម្មរវាងអាស៊ាន-ចិនកើនដល់ ៤៤២ ពាន់លានដុល្លារពោលស្មើរ ១៧ ភាគរយ នៃ ទំហំពាណិជ្ជកម្មអាស៊ានសរុប។

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាក៏បានគូសបញ្ជាក់ថា កម្ពុជាមានជំនឿយ៉ាងមុតមាំថា ចិនគឺជាដៃគូយុទ្ធសាស្រ្តមួយមិនអាចខ្វះបានរបស់អាស៊ាន ទោះស្ថិតនៅក្នុងកាលៈទេសៈ និងបរិការណ៍ណាក៏ដោយ ហើយសង្ឃឹមថាទំនាក់ទំនងនេះនឹងកាន់តែស្ថិតស្ថេរជ្រាលជ្រៅក្នុងស្មារតីតម្កល់ផលប្រយោជន៍រួម និងការអភិវឌ្ឍប្រកបដោយចីរភាព និងបរិយាប័ន្នជូនប្រជាជាតិទាំងអស់។

សម្តេចបន្តថា កម្ពុជាគាំទ្រការបន្តពង្រឹង និងពង្រីកវិសាលភាព កិច្ចសហប្រតិបត្តិការ ក្នុងវិស័យពាណិជ្ជកម្ម ការវិនិយោគ និងទេសចរណ៍ រវាងអាស៊ាននិងចិនឲ្យកាន់តែខ្លាំងឡើងមួយកម្រិតទៀត ដើម្បីជំរុញការអភិវឌ្ឍសេដ្ឋកិច្ច និងសង្គមរបស់យើងប្រកបដោយចីរភាព និងបរិយាប័ន្ន។

នៅក្នុងកិច្ចប្រជុំកំពូលអាស៊ាន-ចិនលើកទី២១ ថ្ងៃនេះ គឺអង្គប្រជុំបានឯកភាពគ្នាក្នុងការចេញសេចក្តីប្រកាសព័ត៌មានរួមរបស់ប្រធានកិច្ចប្រជុំអាស៊ាន-ចិន លើកទី២១, ចក្ខុវិស័យភាពជាដៃគូយុទ្ធសាស្រ្តអាស៊ាន-ចិន ឆ្នាំ២០៣០, សេចក្តីប្រកាសរួមស្តីពីកិច្ចសហប្រតិបត្តិការផ្នែកវិទ្យាសាស្រ្ត បច្ចេកទេស និងនវានុវត្តន៍អាស៊ាន-ចិន, និង របាយការណ៍វឌ្ឍនភាពស្តីពីការអនុវត្តផែនការសកម្មភាព២០១៦-២០២០ ដើម្បីអនុវត្តសេចក្តីថ្លែងការណ៍រួម ស្តីពីភាពជាដៃគូយុទ្ធសាស្រ្តអាស៊ាន-ចិន ដើម្បីសន្តិភាព និងវិបុលភាព រួមទាំងបញ្ជីសកម្មភាពសម្រាប់រំលឹកខួបអនុស្សាវរីយ៍១៥ឆ្នាំ នៃទំនាក់ទំនងដៃគូយុទ្ធសាស្រ្តអាស៊ាន-ចិន និងបញ្ជីសកម្មភាពសម្រាប់ឆ្នាំនៃនវានុវត្តន៍អាស៊ាន-ចិន៕

ស្វែងយល់ពីអាស៊ាន! ទំហំពាណិជ្ជកម្មអាស៊ាន-អូស្ត្រាលីកើនដល់ ៥៩០០លានដុល្លារអាមេរិក

November 14, 2018

0

ដោយ វុត្ថា

សឹង្ហបុរី៖ កំណើននៃទំហំពាណិជ្ជកម្មរវាងតំបន់ទាំងពីររវាងអាស៊ាន និងអូស្ត្រាលីកើនដល់៥៩០០លានដុល្លារ ដោយគិតត្រឹមឆ្នាំ២០១៧អាមេរិក កើនជាង១១,៧ភាគរយ ប្រៀបធៀបនិងឆ្នាំ២០១៦ ហើយការវិនិយោគដោយផ្ទាល់របស់អូស្ត្រាលី មកកាន់តំបន់អាស៊ានគឺកើនឡើងប្រមាណ៣៣,៤ភាគរយ។

ប្រមុខរដ្ឋ ប្រមុខរដ្ឋាភិបាលនៃប្រទេសអាស៊ាន បានគូសបញ្ជាក់ថា នេះគឺជាសញ្ញាវិជ្ជមានមួយដែលអាស៊ាន និងអូស្ត្រាលី ត្រូវតែបន្តជំរុញនិងគាំទ្របន្ថែមទៀត តាមរយះការលើកកម្ពស់សកម្មភាពនៃការផ្សព្វផ្សាយធុរកិច្ច និងការពង្រឹងការតភ្ជាប់រវាងវិស័យឯកជន និងឯកជន ក៏ដូចជាវិស័យសាធារណៈ និងឯកជនដោយផ្តោតជាពិសេសលើសហគ្រាសធុនតូច និងមធ្យម។

នៅក្នុងកិច្ចប្រជុំកំពូលក្រៅផ្លូវការព្រឹកនេះ បណ្តាមេដឹកនាំអាស៊ានក៏បានស្វាគមន៍ចំពោះការពង្រីកផែនការកូឡំបូថ្មីរបស់អូស្ត្រាលី ដល់បណ្តាប្រទេសសមាជិកអាស៊ានទាំងអស់ ដើម្បីលើកកម្ពស់ថែមទៀតនូវការតភ្ជាប់រវាងប្រជាជន និងប្រជាជនឲ្យកាន់តែទូលំទូលាយដោយជួយគាំទ្រដល់សិស្ស និស្សិតអូស្ត្រាលីមកសិក្សា និងអនុវត្តការងារនៅក្នុងបណ្តាប្រទេសសមាជិកអាស៊ាន។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាថ្លែងនៅក្នុងកិច្ចប្រជុំកំពូលក្រៅផ្លូវការអាស៊ាន-អូស្ត្រាលីនៅថ្ងៃទី១៤ ខែវិច្ឆិកា ឆ្នាំ២០១៨នេះថា ទំនាក់ទំនង និងកិច្ចសហប្រតិបត្តិការរវាងតំបន់ទាំងពីរ អាស៊ាន-អូស្ត្រាលី ពិសេសគឺការជំរុញកំណើនសេដ្ឋកិច្ច ពាណិជ្ជកម្ម និងការតភ្ជាប់ពីគ្រប់ផ្នែកទាំងអស់ រវាងអាស៊ាននិងអូស្ត្រាលីពិតជាមានសារៈសំខាន់ណាស់។

កិច្ចប្រជុំកំពូលអាស៊ានលើកទី៣៣ ដែលបានប្រារព្ឋធ្វើនៅមជ្ឈមណ្ឌលពិព័រណ៍ និងសន្និសីទអន្តរជាតិសាន់តិច សាធារណរដ្ឋសិង្ហបុរីនេះ ក្រោមប្រធានបទ «ការកសាងនវានុវត្តន៍ និងភាពរឹងមាំរបស់អាស៊ាន» មានការចូលរួមពីបណ្តាប្រមុខរដ្ឋ ប្រមុខរដ្ឋាភិបាល នៃប្រទេសអាស៊ា និងប្រទេសជាដៃគូជាច្រើន៕