ខេត្តមួយរបស់ចិនវិនិយោគទឹកប្រាក់៣៣៥លានដុល្លារនៅកម្ពុជា

November 14, 2018

ដោយ វុត្ថា

ភ្នំពេញ៖ អ្នកវិនិយោគមកពីខេត្តជាំងស៊ូ នៃប្រទេសចិនលើគំរោងចំនួន៤៦ និងមានទុនវិនិយោគ៣៣៥លានដុល្លារអាមេរិកនៅកម្ពុជា ខណៈអ្នកវិនិយោគចិនបាននិងកំពុងក្លាយជាអ្នកវិនិយោគច្រើនជាងគេនៅកម្ពុជា។

យោងតាមតួលេខដែលកត់ត្រាដោយក្រុមប្រឹក្សាអភិវឌ្ឍន៍កម្ពុជា បានបញ្ជាក់ឲ្យដឹងថា ការវិនិយោគរបស់ជាំងស៊ូរនៅកម្ពុជាចាប់តាំងពីឆ្នាំ១៩៩៤ ដល់ឆ្នាំ២០១៧ មានចំនួន ៤៦គម្រោង មានទុនវិនិយោគសរុបប្រមាណ ៣៣៥លានដុល្លារអាមេរិក។ គំរោងវិនិយោគទាំងនោះផ្តោតលើវិស័យជាច្រើន ដូចជាវិស័យ កាត់ដេរសម្លៀកបំពាក់ ស្បែកជើង កាបូប និងឧស្សាហកម្មដទៃទៀត។

លោកជា វុទ្ធី អគ្គលេខាធិការរងគណៈកម្មាធិការវិនិយោគ នៃក្រុមប្រឹក្សាអភិវឌ្ឍន៍កម្ពុជាឲ្យដឹង នៅក្នុងជំនួបពិភាក្សាការងារជាមួយគណៈប្រតិភូសហព័ន្ធ នៃឧស្សាហកម្ម និងពាណិជ្ជកម្មខេត្ដជាំងស៊ូ ដឹកនាំដោយលោក គូ វ័នហ្វឹង (Gu WanFeng) អនុរដ្ឋមន្ដ្រីនៃនាយកដ្ឋានកិច្ចការជួរមុខ នៃគណៈកម្មាធិការខេត្ដជាំងស៊ូ មកស្វែងយល់ពីកាលានុវត្តភាពវិនិយោគលើវិស័យហេដ្ឋារចនាសម្ព័ន្ធ, បច្ចេកវិទ្យា និង សំណង់នៅកម្ពុជាកាលពីថ្ងៃទី១៣ ខែវិច្ឆិកាម្សិលមិញថា ប្រទេសកម្ពុជាមានភាពអំណោយផលនៃបរិយាកាសវិនិយោគ ជាពិសេស ស្ថិរភាពនយោបាយនិងស្ថិរភាពម៉ាក្រូសេដ្ឋកិច្ច ដែលបានផ្តល់លទ្ធភាពឱ្យកម្ពុជាសម្រេចបាននូវ កំណើនសេដ្ឋកិច្ចជាមធ្យម៧.៧ភាគរយក្នុងមួយឆ្នាំ ក្នុងរយៈពេលជាង ២ទសវត្សរ៍កន្លងទៅ។

លោកបន្តថា “កំណើនដ៏រឹងមាំនេះបានធ្វើឱ្យកម្ពុជា ធ្វើដំណើរយ៉ាងក្លៀវក្លាក្នុងការអភិវឌ្ឍសេដ្ឋកិច្ច ដោយផ្ដល់ទំនុកចិត្ដដល់អ្នកវិនិយោគបរទេស ឱ្យបណ្តាក់ទុនលើគ្រប់វិស័យ។

លោកជា វុទ្ធី ក៏បានវាយតម្លៃខ្ពស់ចំពោះការសម្រេចចិត្ដ របស់អ្នកវិនិយោគខេត្ដជាំងស៊ូ ដែលបានជ្រើសរើសកម្ពុជាជាគោលដៅវិនិយោគ ដ៏មានសក្ដានុពលខ្ពស់ក្នុងការចាប់ផ្ដើមឬពង្រីកអាជីវកម្មរបស់ខ្លួន។

លោកគូ វ័នហ្វឹង បានសម្តែងនូវអំណរគុណ ចំពោះការធ្វើបដិសណ្ឋារកិច្ចស្វាគមន៍របស់ក្រុមប្រឹក្សាអភិវឌ្ឍន៍កម្ពុជា ហើយបានទទួលស្គាល់ និងសម្តែងនូវការអបអរសាទរចំពោះរាជរដ្ឋាភិបាល ក្នុងការដឹកនាំប្រទេសដែលធ្វើឱ្យមានការរីកចម្រើនលូតលាស់ និងមានកំណើនយ៉ាងខ្លាំង។ លោកបានសន្យានឹងខិតខំធ្វើការទាក់ទាញ និងផ្សព្វផ្សាយឱ្យអ្នកវិនិយោគជាំងស៊ូ ឱ្យមកបណ្តាក់ទុននៅកម្ពុជាឱ្យបានកាន់តែច្រើនថែមទៀត ដើម្បីបន្តរឹតចំណងមិត្តភាពនិងទំនាក់ទំនងសេដ្ឋកិច្ចនៃប្រជាជាតិទាំងពីរ៕

ចំណេះដឹងថ្មី! តើកិច្ចប្រជុំកំពូលអាស៊ានលើកទី៣៣នៅប្រទេសសិង្ហបុរីនិយាយពីអ្វីខ្លះ?

November 14, 2018

0

ដោយ វុត្ថា

ភ្នំពេញ៖ ជាថ្មីម្តងទៀតប្រទេសសឹង្ហបុរី កំពុងធ្វើម្ចាស់ផ្ទះរៀបចំកិច្ចប្រជុំកំពូលអាស៊ានជាលក្ខណៈវិលជុំ ដែលជាកិច្ចប្រជុំដ៏សំខាន់សម្រាប់តំបន់ដែលមានប្រជាជនជាង៦៣០លាននាក់ និងមានសេដ្ឋកិច្ចរីកចម្រើនដ៏លឿននេះ។

តើមេដឹកនាំកំពូលអាស៊ានទាំង១០ និងប្រទេសជាដៃគូអាស៊ាននឹងផ្តោតកិច្ចពិភាក្សាលើបញ្ហាអ្វីខ្លះ Propertyarea.asia នឹងបង្ហាញត្រួសៗនូវព៌តមានដ៏មានសារៈសំខាន់នេះ។

ការពិតកិច្ចប្រជុំកំពូលអាស៊ានលើកទី៣៣ ក្រោមប្រធានបទ «ការកសាងនវានុវត្តន៍ និងភាពរឹងមាំរបស់អាស៊ាន» ដែលបានប្រារព្ឋធ្វើនៅមជ្ឈមណ្ឌលពិព័រណ៍ និងសន្និសីទអន្តរជាតិសាន់តិច សាធារណរដ្ឋសិង្ហបុរី ដោយមានការចូលរួមពីបណ្តាប្រមុខរដ្ឋ ប្រមុខរដ្ឋាភិបាល នៃប្រទេសអាស៊ាន ក្រោមកិច្ចស្វាគមន៍ពី លោក លី ស៊ានឡុង នាយករដ្ឋមន្ត្រី សិង្ហបុរី និងជាប្រធានកិច្ចប្រជុំកំពូលអាស៊ានលើកទី៣៣ផងដែរ។

លោកលី ស៊ានឡុង នាយករដ្ឋមន្ត្រីសិង្ហបុរីបានគូសបញ្ជាក់ អាស៊ានមានសមត្ថភាពចូលរួម និងសហការជាមួយបណ្ដាប្រទេសធំៗ និងអង្គការអន្តរជាតិនានា រួមទាំងការរៀបចំកិច្ចប្រជុំអាស៊ាននានា ដូចជាអាស៊ានបូកបី និង EAS ជាដើម។ នៅថ្ងៃនេះអាស៊ានគឺជាតួអង្គសេដ្ឋកិច្ចដ៏សំខាន់មួយនៅក្នុងពិភពលោក។ ជាមួយនឹងកំណើនយុវជនវ័យកណ្ដាល និងយុវជនវ័យពេញធ្វើការ អាស៊ាននឹងកា្លយជាមហាអំណាចសេដ្ឋកិច្ចធំទី៤ នៅលើពិភពលោកនៅឆ្នាំ២០៣០ ពោលគឺអនាគតអាស៊ានកំពុងមានភាពភ្លឺស្វាង។

លោកលីបន្តថា “នៅពេលនេះ យើងត្រូវតែដោះស្រាយបញ្ហាប្រឈមថ្មីៗដោយផ្អែកលើយុទ្ធសាស្ត្រថ្មី និងការផ្លាស់ប្ដូរសំខាន់ៗតាមរយៈបច្ចេកវិទ្យាឌីជីថល។ បច្ចេកវិទ្យាឌីជីថលបានរំខានដល់សេដ្ឋកិច្ចរបស់យើង និងបានផ្លាស់ប្ដូរទម្លាប់ការរស់នៅការធ្វើការ និងការទំនាក់ទំនងរបស់យើង រួមមានទាំងការវាយប្រហារតាមព័ត៌មានវិទ្យាទៀតផង។ លោកបន្តថា “ព្រមពេលជាមួយគ្នានេះ ការគំរាមកំហែងពីភេរវកម្ម និងការប្រែប្រួលអាកាសធាតុក៏ជាក្ដីកង្វល់របស់យើងផងដែរ។ ភេរវកម្មគឺមិនមែនត្រឹមតែគំរាមកំហែងដល់សន្តិសុខតែមួយមុខប៉ុណ្ណោះទេ ប៉ុន្តែវាក៏បង្កជាការគំរាមកំហែងធ្ងន់ធ្ងរដល់ជាតិសាសន៍នានា និងសាសនាជាច្រើននៃបណ្ដាប្រទេសជាសមាជិកអាស៊ាន។

បញ្ហាបម្រែបម្រួលអាកាសធាតុ កំពុងធ្វើឱ្យបណ្ដាប្រទេសអាស៊ានមួយចំនួនងាយរងគ្រោះនឹងការកើនឡើងនៃកម្ពស់ទឹកសមុទ្រ។ ការកើនឡើងសីតុណ្ហភាព និងកំដៅផែនដី កំពុងបង្កផលប៉ះពាល់ជាមួយនឹងការបង្កជាជំងឺតំបន់ត្រូពិក ដែលគំរាមកំហែងដល់អាយុជីវិត និងការរស់នៅរបស់ប្រជាជន។ ទាំងអស់នេះមានន័យថាកិច្ចសហប្រតិបត្តិការពហុភាគីគឺមានសារៈសំខាន់ និងជាបន្ទាន់បំផុតជាងពេលណាៗទាំងអស់។ ការប្រឈមមុខនឹងបញ្ហារួមនេះ គឺមានភាពស្មុគស្មាញនឹងមិនធ្លាប់មាន ហើយដំណោះស្រាយក៏មិនមានប្រទេសណាមួយអាចដោះស្រាយបញ្ហាទាំងនេះ តែម្នាក់ឯងបាននៅឡើយដែរ។ ពោលគឺយើងត្រូវតែរួមចិត្តរួមកម្លាំង ដោះស្រាយបញ្ហាទាំងនេះជាមួយគ្នា។ នេះហើយគឺមូលហេតុរុញឱ្យប្រទេសសិង្ហបុរីជ្រើសរើសភាពរឹងមាំ និងការច្នៃប្រឌិតជាមូលដ្ឋានសម្រាប់អាស៊ានរបស់យើង។លោកលីបញ្ជាក់។

លោកនាយករដ្ឋមន្ត្រីសិង្ហបុរី បានសម្តែងការកោតសរសើរចំពោះ ប្រទេសជាសមាជិកទាំងអស់ បានអនុវត្តន៍ទ្វេឡើងនូវកិច្ចខិតខំប្រឹងប្រែង ដែលបានសម្រេចចេញនូវដំណោះស្រាយដ៏ល្អប្រសើរនានា ដែលបង្ហាញអំពីលទ្ធផលនៃការរួបរួម ប្រសិទ្ធភាព និងសម្ព័ន្ធភាពក្នុងនាមជាអាស៊ាន។ ទន្ទឹមនឹងនោះដែរ អាស៊ានបានបញ្ជាក់ឡើងវិញនូវការ ប្តេជ្ញាធ្វើពាណិជ្ជកម្មពហុភាគី និងបោះជំហានទៅមុខឲ្យបានលឿន ឆ្ពោះទៅរកការបញ្ចប់កិច្ចចរចានានា ទៅលើភាពជាដៃគូសេដ្ឋកិច្ចថ្នាក់តំបន់ប្រកបដោយផ្លែផ្កា។ បណ្តាញទីក្រុងឆ្លាតវៃរបស់អាស៊ាន(ASCN) នឹងក្លាយជាវេទិកាសម្រាប់ទីក្រុងនៃបណ្តាប្រទេសអាស៊ានទាំងអស់ធ្វើការផ្សាយភ្ជាប់គ្នា ចែករំលែកបទពិសោធន៍ និងធ្វើការងាររួមគ្នាដើម្បីលើកស្ទួយគុណភាពរស់នៅដែលជាប្រយោជន៍របស់ប្រជាជន។

លោកលី សៀនឡុងបានបន្តថា “យើងបានពង្រឹងមូលដ្ឋាន សម្រាប់បរិស្ថានតំបន់ដែលយកច្បាប់ជាមូលដ្ឋាន ជាមួយនឹងការសន្និដ្ឋាននៃសន្ធិសញ្ញា បណ្តោះអាសន្នជាគំរូរបស់អាស៊ាន។ យើងបានបង្កើនភាពជាដៃគូសកម្មរួមគ្នារបស់យើង ប្រឆាំងនឹងការគំរាមកំហែងឆ្លងដែន រួមទាំងការវាយប្រហារតាមអ៊ីនធើណេត និងការប្រែប្រួលអាកាសធាតុ។ លទ្ធផលទាំងនេះ បង្ហាញពីជំនឿយ៉ាងរឹងមាំរបស់អាស៊ាន ចំពោះគំនិតបែបពហុភាគីនិយម គឺជាមូលដ្ឋានដ៏សំខាន់មួយសម្រាប់កិច្ចសហប្រតិបត្តិការអន្តរជាតិ និងសម្រាប់ការរីកចំរើន និងស្ថេរភាពនៃតំបន់”៕

ដំណឹងល្អ! កម្ពុជា ថៃ ច្រកទ្វារព្រំដែន២៤ម៉ោងអំឡុងថ្ងៃបុណ្យសមុទ្រ ៣ថ្ងៃ

November 14, 2018

0

ដោយដែន ចែងចាំង

ភ្នំពេញ៖ ក្នុងគោលដៅសម្រួលការធ្វើដំណើរ និងទាក់ទាញភ្ញៀវទេសចរណ៍ ប្រទេសកម្ពុជា និងថៃគ្រោងបើកច្រកទ្វារព្រំដែន២៤ម៉ោង ក្នុងរយៈពេលបីថ្ងៃ ដែលជាថ្ងៃកម្ពុជារៀបចំពិធីបុណ្យសមុទ្រនៅខេត្តកោះកុង។

អភិបាលខេត្តកោះកុងលោកជំទាវ មិថុនា ភូថង បានមានប្រសាសន៍ឲ្យដឹងកាលពីថ្ងៃទី១៣ វិច្ឆិកាកន្លងមកថា កម្ពុជា និងភាគីថៃ នឹងបើកច្រកទ្វារព្រំដែនអន្តរជាតិ២៤ម៉ោង លើ២៤ម៉ោង រយៈពេល៣ថ្ងៃអំឡុងថ្ងៃបុណ្យសមុទ្រ។ ការបើកច្រកទ្វារយ៉ាងដូច្នេះ ធ្វើឡើងដើម្បីអនុញ្ញាតសម្របសម្រួលដល់ការស្នាក់នៅរបស់ប្រជាពលរដ្ឋដែលលេងកម្សាន្តក្នុងពិធី ប្រសិនបើមានការខ្វះខាតទីកន្លែងស្នាក់នៅ។

លោកជំទាវបានបន្តថា “នេះជារឿងដ៏ល្អប្រសើរ និងឆ្លុះបញ្ចាំងពីទំនាក់ទំនងយ៉ាងជិតស្និទ្ឋរវាងប្រទេសទាំងពីរកាន់តែមានភាពប្រសើរឡើង។

ជាមួយគ្នានេះ លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ចូន ចុះត្រួតពិនិត្យការដ្ឋានជួសជុលផ្លូវជាតិលេខ៤៨ថា អាជ្ញាធរខេត្តកោះកុង កំពុងតែទំនាក់ទំនងសម្របសម្រួលជាមួយអាជ្ញាធរខេត្តត្រាត ប្រទេសថៃ ដើម្បីផ្តល់ភាពងាយស្រួលដល់ប្រជាពលរដ្ឋទាំងពីរបានចេញចូលលេងកម្សាន្ត និងស្នាក់នៅ អំឡុងថ្ងៃបុណ្យសមុទ្រ៣ថ្ងៃ តាមច្រកទ្វារអន្តរជាតិព្រំដែនចាំយាម។

លោកបន្តថា “ការពង្រីក និងពង្រឹងកិច្ចសហប្រតិបត្តិការរវាងប្រទេសជិតខាងទាំងពីរ នឹងធ្វើឲ្យការអភិវឌ្ឍន៍រវាងប្រជាជន និងប្រទេសទាំងពីរពិតជារឿងប្រសើរ។

ពិធីបុណ្យសមុទ្រលើកទី៧ ជុំទី២ នៅខេត្តកោះកុង នឹងប្រព្រឹត្តឡើងទៅតាមការត្រៀមទុក រយៈពេល៣ថ្ងៃ ចាប់ពីថ្ងៃទី១៤ដល់១៦ ខែធ្នូ ឆ្នាំ២០១៨ ដោយមានការអញ្ជើញក្រោមអធិបតីភាពដ៏ខ្ពស់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

រដ្ឋមន្ត្រីក្រសួងទេសចរណ៍ លោកថោង ខុន បានសម្តែងសុទិដ្ឋិនិយមថា ពិធីបុណ្យសមុទ្រក្នុងខេត្តកោះកុង នឹងអាចមានភ្ញៀវទេសចរជាតិ និងអន្តរជាតិចន្លោះពី២៥ម៉ឺននាក់ ដល់៣០ម៉ឺននាក់មកលេងកម្សាន្ត៕

រយៈពេល៩ខែការវិនិយោគនៅកម្ពុជាមានទំហំទឹកប្រាក់ជិត៥០០០លានដុល្លារ

November 14, 2018

0

ដោយគង់ សូរិយា

ភ្នំពេញ៖ ទំហំទុនវិនិយោគនៅកម្ពុជា ក្នុងរយៈពេល៩ខែឆ្នាំ២០១៨នេះ សម្រេចបានទឹកប្រាក់ជិត៥០០០លានដុល្លារអាមេរិក ដែលគំរោងវិនិយោគទាំងនោះបានបង្ហាញថា អ្នកវិនិយោគចិននៅតែនាំមុខគេនៅកម្ពុជា។

យោងតាមទិន្នន័យពីក្រុមប្រឹក្សាអភិវឌ្ឍន៍កម្ពុជា(CDC) បានឱ្យដឹងនាព្រឹកថ្ងៃទី១៤ វិច្ឆិកានេះថា កម្ពុជាទទួលបានគម្រោងវិនិយោគសរុបចំនួន១៧០ នៅក្នុងរយៈពេល៩ខែដើមឆ្នាំ២០១៨នេះ ដែលគិតជាទឹកប្រាក់មានចំនួនជាង៤,៧ពាន់លានដុល្លារ។ ក្នុងចំណោមគំរោងវិនិយោគនោះ មានគម្រោងក្រៅតំបន់សេដ្ឋកិច្ចពិសេសមានចំនួន១១៤ ដែលគិតជាទឹកប្រាក់ចំនួន៤ពាន់លានដុល្លារ និងគម្រោងក្នុងតំបន់សេដ្ឋកិច្ចពិសេសមានចំនួន៥៦គម្រោង ដែលគិតជាទឹកប្រាក់ចំនួនជិត៧រយលានដុល្លារ។

គម្រោងនៃការវិនិយោគឆ្នាំនេះ មានការកើនឡើងចំនួន២៨គម្រោង ធៀបរយៈពេលដូចគ្នាកាលពីឆ្នាំមុន។ គំរោងវិនិយោគទាំងនេះបាននិងកំពុងបង្កើតការងារចំនួនជិត៣៦០០០កន្លែងនៅកម្ពុជាផងដែរ។ ក្នុងចំណោមគំរោងវិនិយោគនេះ អ្នកវិនិយោគក្នុងស្រុកបានគ្របដណ្តប់៣៥ភាគរយ នៃទុនវិនិយោគសរុប។

ទិន្នន័យដដែលបានឲ្យដឹងទៀតថា ក្នុងចំណោមគំរោងវិនិយោគឆ្នាំនេះ ការវិនិយោ គលើគម្រោងឧស្សាហកម្ម និងកម្មន្តសាល គឺជាគម្រោងដែលអ្នកវិនិយោគចាប់អារម្មណ៍ច្រើនជាង ដែលមានរហូតដល់១៤៥គម្រោង គម្រោងវិនិយោគលើវិស័យកសិកម្ម និងកសិឧស្សាហកម្មមានចំនួន១២គម្រោង។ ហេដ្ឋារចនាសម្ព័ន្ធ និងទេសចរណ៍មាន១៣គម្រោង។

របាយការណ៍ដដែលនេះបានបង្ហាញឲ្យដឹងផងដែរថា ទោះជាគម្រោងវិនិយោគឆ្នាំនេះ មានកំនើនចំនួន២៨គម្រោង ប៉ុន្តែទំហំទុនវិនិយោគមានការធ្លាក់ចុះជាង១ពាន់លានដុល្លារ។

អ្វីដែលគួរឲ្យកត់សំគាល់ គឺទិន្នន័យនេះបានបង្ហាញថា ប្រទេសចិននៅតែជាប្រទេសនាំមុខគេ ដែលបានវិនិយោគនៅកម្ពុជា ដោយអ្នកវិនិយោគមកពីប្រទេសនេះបានក្តោបក្តាប់ការវិនិយោគចំនួនជាង៦០ភាគរយ និងតាមពីក្រោយដោយអ្នកវិនិយោគមកពីប្រទេសជប៉ុន ថៃ ម៉ាឡេស៊ី និងអង់គ្លេសជាដើម៕

កម្មវិធីពានរង្វាន់អចនទ្រព្យអាស៊ីផ្តល់ពានរង្វាន់ចំនួន៦ដល់បុរីប៉េងហួត

November 14, 2018

0

ដោយ គង់ សូរិយា

ភ្នំពេញ៖ កម្មវិធីប្រកាសពានរង្វាន់អចលនទ្រព្យអាស៊ីរៀបចំឡើងដោយក្រុមហ៊ុន Property Guru បានផ្តល់ពានរង្វាន់ដ៏មានកិត្យានុភាពចំនួន៦ ដល់បរីប៉េង ហួត ដែលជាបុរីធំជាងគេនៅកម្ពុជា។

កម្មវិធីផ្តល់ពានរង្វាន់នេះធ្វើឡើងនៅសណ្ឋាគារ The Athenee Hotel នាទីក្រុងបាងកកប្រទេសថៃ ដែលមានការចូលរួមពី១៧ប្រទេស ហើយក្រុមហ៊ុនប៉េងហួតគ្រុប ទទួលបានជ័យលាភីចំនួន៦ បន្ទាប់ពីគណកម្មការផ្តល់ពានរង្វាន់បានធ្វើការសិក្សា ពិនិត្យលក្ខខ័ណ្ឌគុណភាពសំណង់ សោភ័ណភាព រចនាបទរបស់បុរីនេះ។

ពានរង្វាន់ទាំង៦នោះរួមមាន ទី១ ពានរង្វាន់ក្រុមហ៊ុនអភិវឌ្ឍន៍ល្អជាងគេ ប្រចាំប្រទេសកម្ពុជា Best Developer (Cambodia) ទី២ ពានអភិវឌ្ឍន៍ខុនដូល្អជាងគេ ប្រចាំប្រទេសកម្ពុជា The Star Polaris 23: Best Condo Development (Cambodia) ទី៣ពានរង្វាន់អភិវឌ្ឍន៍ចំរុះល្អជាងគេ ប្រចាំប្រទេសកម្ពុជា Greater Euro Ville: Best Mixed Use Development (Cambodia) ទី៤ ពានរង្វាន់ឌីហ្សាញផ្នែកក្នុងលំនៅ
ឋានល្អជាងគេ ប្រចាំប្រទេសកម្ពុជា The Star Platinum Euro Ville (Housing): Best Housing Interior Design (Cambodia)

ទី៥ ពានរង្វាន់ឌីហ្សាញ ផ្នែកក្នុងខុនដូ ប្រចាំប្រទេសកម្ពុជា The Star Polaris 23 (Condo): Best Condo Interior Design (Cambodia) និងទី៦ ពានរង្វាន់ស្ថាបត្យកម្មឌីហ្សាញទេសភាពគម្រោងពាណិជ្ជកម្មល្អជាងគេ ប្រចាំប្រទេសកម្ពុជា Euro Park (Commercial): Best Commercial Landscape Architectural Design (Cambodia)។

លោកឧកញ៉ាថៃ ម៉េងលីអគ្គនាយកក្រុមហ៊ុនបុរីប៉េង ហួតគ្រុបធ្លាប់បានមានប្រសាសន៍ឲ្យដឹងថា ដោយសារក្រុមហ៊ុនបុរីប៉េង ហូតចង់ធ្វើអ្វីឲ្យប្លែក ធ្វើអ្វីឲ្យល្អសម្រាប់ប្រទេសជាតិ ទើបយើងកសាងបុរីនេះឡើងគិតពីបរិស្ថាន សួនបៃតង និងរចនាផ្ទះដែលស្អាតៗជូនអតិថិជនទាំងអស់។ យើងចង់ឲ្យខ្មែរមានមោទនភាពថា ខ្មែរយើងក៏អាចសាងសង់ផ្ទះបានល្អ ដូចប្រទេសផ្សេងៗបានដែរ។

លោកបន្តថា “អ្វីដែលយើងផ្តោត គឺអតិថិជនចាប់ពីអ្នកមានជីវភាពមធ្យម រហូតដល់អ្នកមានជីវភាពលំដាប់ខ្ពស់។ លោកបន្តថា “អ្វីដែលជោគជ័យរហូតមកទល់ពេលនេះ ដោយសារក្រុមហ៊ុនបុរីប៉េង ហូត តែងតែធ្វើអ្វីលើសពីការរំពឹងទុករបស់អតិថិជន។ មានន័យថា អ្វីយើងនិយាយគឺធ្វើ ហើយយើងបានធ្វើ និងធ្វើបានស្អាតជាងអ្វីដែលយើងបានសន្យា”៕

ឧកញ៉ាទៀ វិចិត្របោះទុនជាង១៤លានដុល្លារសាងសង់សណ្ឋាគារនៅខេត្តព្រះសីហនុ

November 14, 2018

0

ដោយវុត្ថា

ភ្នំពេញ : លោកឧកញ៉ា ទៀ វិចិត្របានបោះទុនវិនិយោគ១៤លានដុល្លារសាងសង់ សណ្ឋាគារកំពស់១៨ជាន់ មានបន្ទប់ស្នាក់នៅជាង៣០០នៅក្រុងព្រះសីហនុ ដែលជាខេត្តកំពុងមានតម្រូវការបន្ទប់ស្នាក់នៅកើនឡើងខ្ពស់។

លោកឧកញ៉ាទៀ វិចិត្រដែលជាកូនប្រុសសម្តេចពិជ័យសេនាទៀ បាញ់បានមានប្រសាសន៍ឲ្យដឹង ក្នុងពិធីបញ្ចុះបឋមសិលាសាងសង់សណ្ឋាគារនេះ នាព្រឹកថ្ងៃទី១៣ វិច្ឆិកានេះថា ក្រៅពីការវិនិយោគលើសណ្ឋាគារប្រណីតខាងលើ លោកក៏គ្រោងបំពាក់បន្ថែមនូវហេដ្ឋារចនាសម្ពន្ធ័មួយចំនួនទៀត ដែលមានទីតាំងនៅក្នុងសង្កាត់លេខ៤ ក្រុងព្រះសីហនុ ក្នុងគោលបំណងដើម្បីបំរើសេចក្តីត្រូវការរបស់ប្រជាពលរដ្ឋ និងភ្ញៀវទេសចរជាតិ-អន្តរជាតិ ព្រមជាមួយគ្នានេះលោកឧញ៉ា ក៏នឹងសាងសង់អាគារផ្សារទំនើបលំដាប់អន្តរជាតិមួយកន្លែងទៀត នៅក្បែរសណ្ឋាគារប្រណីតនោះទៀតផងដែរ។

លោកឧកញ៉ាបន្តថា សណ្ឋាគារនេះ គ្រោងចំណាយពេលសាងសង់រយៈពេល២ឆ្នាំ ហើយការវិនិយោគសាងសង់សណ្ឋាគារខ្នាតធំនេះ ក៏ដើម្បីជាការចូលរួមចំណែកអភិវឌ្ឍន៍វិស័យទេសចរណ៍ ក្នុងខេត្តព្រះសីហនុ ស្របពេលបច្ចុប្បន្នភាព ខេត្តទេសចរណ៍មជាប់សមុទ្រមួយនេះ កំពុងខ្វះបន្ទប់ស្នាក់នៅ សម្រាប់ភ្ញៀវទេសចរ ដែលចូលមកទស្សនាខេត្តព្រះសីហនុ មានការខ្វះខាត ជាពិសេសក៏ស្របពេលកំណើនអ្នកវិនិយោគពីបរទេស បានកើនឡើងច្រើននាពេលបច្ចុប្បន្ននេះ។

លោកឧកញ៉ាទៀ វិចិត្របានបញ្ជាក់ថា នេះជាគម្រោងទី២ ក្នុងវិស័យទេសចរណ៍ បន្ទាប់ពីក្រុមហ៊ុនរបស់លោក បានស្ថាបនារមណីយដ្ឋាន”ម៉ាហ្វីយ៉ារីហ្សត” មានទីតាំងនៅឆ្នេរឋានសួគ៌ សង្កាត់កោះរ៉ុង និងកំពុងបើកបំរើសេវាស្នាក់នៅជូនភ្ញៀវទេសចរសម្រុះជាតិសាសន៍។ សម្រាប់ប្រតិបត្តិការសេវាកម្មសណ្ឋាគារសាងសង់ថ្មីនេះ លោកឧកញ៉ា បញ្ជាក់ថា ធ្វើឡើងដោយផ្តោតជាសំខាន់ សម្រាប់បម្រើសេចក្តីត្រូវការរបស់ប្រជាពលរដ្ឋ និងភ្ញៀវទេសចរជាតិ ដែលចូលមកកម្សាន្តខេត្តព្រះសីហនុនាថ្ងៃខាងមុខ។

លោកតាំង សុចិត្រគ្រឹះស្នាប្រធានមន្ទីរទេសចរណ៍ខេត្តព្រះសីហនុ ជារឿយៗបានអំពាវនាវឲ្យអ្នកវិនិយោគជាតិ អន្តរជាតិបន្តវិនិយោគសាងសង់សណ្ឋាគារក្នុងខេត្តនេះដើម្បីឆ្លើយតបកង្វះបន្ទប់សណ្ឋាគារ ដែលតែងតែកើតឡើងជាប្រចាំ ព្រោះសណ្ឋាគារភាគច្រើនក្នុងខេត្តត្រូវបានជួលឲ្យក្រុមហ៊ុនចិន ដើម្បីធ្វើជាកាស៊ីណូនិងរមណីយដ្ឋានកំសាន្តនានា៕

ស្វែងយល់ពីអាស៊ាន! ក្រុមហ៊ុនថៃសម្ពោធផ្សារទំនើបតម្លៃ១៦០០លានដុល្លារ

November 13, 2018

0

ដោយ វុត្ថា

ភ្នំពេញ៖ ផ្សារទំនើបលំដាប់អន្តរជាតិមួយ ដែលបោះទុនវិនិយោគ១៦០០លានដុល្លារ ត្រូវបានប្រទេសថៃបានសម្ពោធដាក់អោយប្រើប្រាស់ជាផ្លូវការ ដែលផ្សារនេះត្រូវបានដាក់ឈ្មោះថា Iconsiam ។

ផ្សារទំនើបដ៏ធំនេះ បានបើកដំណើរការកាលពីថ្ងៃសៅរិ៍ចុងសប្តាហ៍កន្លងទៅនេះដែលមានទីតាំងស្ថិត នៅខាងលិចនាមាត់ទន្លេរ Chao Phrya ដែលជាតំបន់ដែលមានការប្រកួតប្រជែងបំផុតនៅក្នុងទីក្រុងបាកក។

ផ្សារទំនើប Iconsiam ត្រូវកសាងសង់រយៈពេល៦ឆ្នាំ នៅលើទំហំដី៥២៥,០០០ ម៉ែត្រការ៉េ ដែលធំជាងផ្សារទំនើប Central World នៅកណ្តាលទីក្រុងបាងកក។ ផ្សារទំនើបនេះ ជាប្រភេទផ្សារលក់រាយ និងអភិវឌ្ឍន៍ដោក្រុមហ៊ុន Siam Piwat ដែលជាម្ចាស់ និងប្រតិបត្តិករនៃផ្សារ Siam Paragon និងផ្សារទំនើប Bangkok។

បន្ថែមពីនេះក៏មានក្រុមហ៊ុន Charoen Pokphand Group និង Magnolia Guality Development ចូលរួមអភិវឌ្ឍន៍ផងដែរ។

លោក Chadatip Chutrakul អគ្គនាយកនៃក្រុមហ៊ុន Siam Piwat និងជាប្រធានផ្សារIcon siam បានបញ្ជាក់ថា ផ្សារទំនើបនេះផ្តល់នូវភាពសប្បាយរីករាយ និងការដើរទិញឥវ៉ាន់ជូនប្រជាពលរដ្ឋ និងអ្នកទេសចរណ៍។ លោកបន្តថា ផ្សារទំនើបនេះមានស្តង់ ៥០០ ភោជនីយដ្ឋាន១០០ រោងកុន១៤ទីតាំង។ អគារអាផាតមិនទំនើប និងកន្លែងលេងកម្សាន្តជាច្រើនផ្សេងទៀត។

លោករំពឹងថា ផ្សារទំនើបIcon siam នឹងទទួលអ្នកមកលេងកម្សាន្តនិងដើរផ្សារចំនួន១៥០,០០០នាក់ជារៀងរាល់ថ្ងៃ នៅក្នុងនោះ៦៥ ទៅ៧០ភាគរយ ជាប្រជាពលរដ្ឋក្នុងស្រុក និង៣០ ទៅ៣៥ ភាគរយជាជនបរទេស៕

ធនាគារពិភពលោក៖ ទីក្រុងភ្នំពេញកំពុងប្រឈមបញ្ហាធំៗចំនួន៦ ខណៈអ្នកជំនាញជំរុញឲ្យសិក្សាលំអិត

November 13, 2018

0

ដោយ ស៊ីវ ម៉េង

ភ្នំពេញ៖ អ្នកជំនាញផ្នែកណគរូបនីយកម្មបានជំរុញឲ្យរដ្ឋាភិបាលសិក្សាពីផែនការប្រើប្រាស់ដីលំអិតនៅតាមសង្កាត់និមួយៗ ខណៈធនាគារពិភពលោកបានលើកឡើងបញ្ហាប្រឈមធំៗចំនួន៦ ដែលត្រួវត្រូវដោះស្រាយ។

យោងតាមការសិក្សារបស់ធនាគារពិភពលោកស្តីពី ការអភិវឌ្ឍទីក្រុងភ្នំពេញដែលបានចេញផ្សាយកាលពីចុងឆ្នាំមុនបានឲ្យដឹងថា ការរីកលូតលាសដ៏ឆាប់រហ័សនៃទីក្រុងភ្នំពេញ ក្នុងរយៈពេល១០ឆ្នាំចុងក្រោយនេះ ពិតជាមានរួមចំណែកយ៉ាងច្រើន ក្នុងការបង្កើតឳកាសការងារ ប៉ុន្តែទន្ទឹមនឹងការអភិវឌ្ឍទីក្រុងនេះ មានបញ្ហាប្រឈមជាច្រើន ក្នុងការផ្តល់សេវាកម្មមូលដ្ឋាន ដែលរួមមានប្រព័ន្ឋបង្ហូរទឹកស្អុយ ស្ថានីយ៍កែច្នៃទឹកស្អុយ សេវាកម្មសាធារណៈ ការគ្រប់ គ្រងកាកសំណល់រឹង ការគ្រប់គ្រង និងការផ្តល់ហិរញ្ញប្បទានលើការរៀបចំទីក្រុង ការពង្រឹងអភិបាលកិច្ច និងនិងការគ្រប់គ្រងលើការអភិវឌ្ឍហេដ្ឋារចនាសម្ព័ន្ឋជារឿងចាំបាច់។

ឆ្លើយតបនឹងកង្វល់នេះ ធនាគារពិភពលោកបានផ្តល់អនុសាសន៍ចំនួន៤ចំណុច ដើម្បីអភិវឌ្ឍន៍ទីក្រុងនេះប្រកបដោយភាពសុខដុម ដូចជា ត្រូវកែលំអរ ស្ថាប័ន និងអភិបាលកិច្ច ដើម្បីឲ្យទីក្រុងអាចអភិវឌ្ឍន៍ទៅបាន ប្រកបដោយភាពសុខដុម និងមានប្រសិទ្ឋិភាពជាងមុន។ ត្រូវកែលំអរផែនការរៀបចំទីក្រុង និងការអនុវត្តន៍ផែនការតាមរយៈ ការបង្កើតបទដ្ឋានគតិយុត្តិ ក្របខ័ណ្ឌច្បាប់ និងពង្រឹងផែនការរៀបចំទីក្រុងដែលមានស្រាប់។ ត្រូវវិនិយោគលើហេដ្ឋារចនាសម្ព័ន្ឋទីក្រុង ប្រកបដោយនិរន្តរភាពដើម្បីលើកកំពស់ជីវភាពរស់នៅ និងការប្រកួតប្រជែងនិងត្រូវធានាថាការរៀបចំទីក្រុង ត្រូវគិតគូរឲ្យបានគ្រប់ជ្រុងជ្រោយ ដើម្បីជៀសវាងវិសមភាព។

ទីក្រុងភ្នំពេញបានរៀបចំផែនការមេរួចហើយ សម្រាប់ឆ្នាំ២០១៥ ២០៣៥ ដែលបាននិងកំពុងអនុវត្តន៍ ប៉ុន្តែអ្នកជំនាញបានមើលឃើញថា ការអភិវឌ្ឍន៍ទីក្រុងនេះតាមផែនការមេមិនបានធ្វើដោយរលូននៅឡើយទេ។

យោងតាមការសិក្សារបស់ក្រសួងរៀបចំដែនដី នគរូបនីយកម្មនិងសំណង់កាលពីឆ្នាំ២០១៣ បានរកឃើញថា តង់ស៊ីតេប្រជាពលរដ្ឋរស់នៅក្រុងភ្នំពេញមានចំនួន ២៨០០នាក់ ក្នុងមួយគីឡូម៉ែត្រ ខណៈទីក្រុងបាងកកមាន៨០០០នាក់ និងទីក្រុងហូជីម៉ិញ ប្រទេសវៀតណាមមាន៤០០០នាក់ក្នុងមួយគីឡូម៉ែត្រ។

លោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម និងជាអនុប្រធានមន្ទីររៀបចំដែនដី នគរូបនីយកម្មនិងសំណង់ បានថ្លែងតាមទូរស័ព្ទនារសៀលថ្ងៃទី១២ វិច្ឆិកាកន្លងមកថា ក្រុងភ្នំពេញពិតជាមានការអភិវឌ្ឍលឿន ហេតុនេះបញ្ហាប្រឈមក៏កើតមានទន្ទឹមគ្នា ដែលទាមទារឲ្យក្រុងនេះ រៀបចំផែនការប្រើប្រាស់ដីលំអិត នៅតាមសង្កាត់ និងខ័ណ្ឌនិមួយៗ ព្រោះប្លង់គោលរបស់ទីក្រុងនេះ ដែលផ្តោតលើចន្លោះឆ្នាំ២០១៥ ២០៣០ជាប្លង់ច្បោលៗ គ្មានភាពជាក់លាក់នោះទេ។

លោកបន្តថា “ការសិក្សាពីផែនការការប្រើប្រាស់ដីលំអិត យើងចំណេញនិងអាចដឹងថាបញ្ហាអ្វីដែលកើតឡើងចំពោះមុខ ជាជាងអង្គុយចាំនៅពេលបញ្ហាកើតឡើង។លោកបន្តថា “ការប្រើប្រាស់ដីធ្លី និងទាញយកសេដ្ឋកិច្ចពីដីធ្លី នឹងមិនអាចបានអស់សក្តានុពលនោះទេ បើសិនជាគ្មានផែនការប្រើប្រាស់ដីលំអិត នៅតាមមូលដ្ឋាននិមួយៗឲ្យបានច្បាស់លាស់”៕

ការពង្រីកហេដ្ឋារចនាសម្ព័ន្ឋទាក់ទាញការវិនិយោគទៅកាន់តំបន់ជាយក្រុងសៀមរាប

November 13, 2018

0

ដោយស៊ីវ ម៉េង

ភ្នំពេញ: ការពង្រីកហេដ្ឋារចនាសម្ព័ន្ឋរបស់រដ្ឋាភិបាល ពិសេសផ្លូវក្រវ៉ាត់ក្រុងទី២នៃក្រុងសៀមរាប បានធ្វើឲ្យសកម្មភាពអភិវឌ្ឍន៍គំរោងធំៗជាច្រើន បាននិងកំពុងពង្រីកទៅកាន់តំបន់ជាយក្រុង ដែលធ្លាប់តែជាទឹកដីវាលស្រែនេះយ៉ាងលឿន។

អគ្គនាយកក្រុមហ៊ុនGoal Property Service Co, Ltd លោកចៅ សេងថៃបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៣ វិច្ឆិកានេះថា ពីមុនបើគិតចម្ងាយពី៣ ទៅ៥គីឡូម៉ែត្រ ចេញពីកណ្តាលក្រុងសៀមរាប តំបន់នោះពិតជាមានភាពស្ងប់ស្ងាត់ និងជាតំបន់សល់ដីទំនេរច្រើន ប៉ុន្តែដោយសារហេដ្ឋារចនាសម្ព័ន្ឋត្រូវបានតភ្ជាប់ និងពង្រីកជាបន្តបន្ទាប់ ជាមូលហេតុធ្វើឲ្យតំបន់ជាយក្រុងនេះមានការអភិវឌ្ឍយ៉ាងលឿន។

លោកបន្តថា តំបន់ស្ថិតក្នុងសង្កាត់ស្រង៉ែ ក្រុងសៀមរាប មានការអភិវឌ្ឍលឿនជាងគេ ដោយសារកត្តាជាច្រើនដូចជា ទី១ មានសណ្ឋាគារកម្រិតផ្កាយ៥ មន្ទីរពេទ្យជប៉ុន និងស្ថិតនៅក្បែរព្រលានយន្តហោះ ទី២ អ្នកវិនិយោគចិនកំពុងរៀបចំគំរោងសាងសង់ទីក្រុងបែបបៃតងនៅតំបន់នេះ ទី៣ វិថីសម្តេចប៊ុន រ៉ានីហ៊ុន សែនបានសាងសង់បញ្ចប់ ហេតុនេះអ្នកទិញដីឡូត៍ ដែលធ្វើឡើងតាមការបំពុលព៌តមានមួយចំនួន ពិតជាមិនគួរធ្វើនោះទេ ព្រោះការវិនិយោគដែលគ្មានមូលដ្ឋានព៌តមានត្រឹមត្រូវ និងច្បាស់លាស់អាចប្រឈមមុខនឹងហានិភ័យច្រើន។

លោកសេងថៃបានបន្តថា យ៉ាងណាដីឡូត៍នៅតំបន់ជាយក្រុងសៀមរាប បាននិងកំពុងមានតម្លៃកើនឡើង ដែលនាពេលអនាគត អតិថិជនមិនអាចស្វះស្វែងរកទិញដីឡូត៍ក្នុងតម្លៃប្រមាណ៥០០០ដុល្លារក្នុងមួយឡូត៍នោះទេ ដោយសារតំបន់ជាយក្រុងនានាមានការអភិវឌ្ឍលឿន ព្រោះកំនើននៃការវិនិយោគរបស់អ្នកវិនិយោគចិន និងអ្នកវិនិយោគ អន្តរជាតិដទៃទៀត។

បច្ចុប្បន្នផ្សារទំនើបចំនួនពីរបាននិងកំពុងដំណើរការ ដូចជា Heritage Walkបានបើកដំណើរការរួចហើយនៅក្រុងសៀមរាប និងផ្សារទំនើបសម្រាប់ទិញទំនិញធំមួយទៀត គឺផ្សារMAKRO នឹងបើកដំណើរការចុងឆ្នាំនេះ ឬដើមឆ្នាំ២០១៩ខាងមុខនេះ។

អគ្គនាយកក្រុមហ៊ុនCentury21 Mekongលោកច្រឹក សុខនីមបានមានប្រសាសន៍ថា ក្រុងសៀមរាបឲ្យតែចេញផុតពីតំបន់ ដែលស្ថិតក្នុងការអភិរ័ក្សរបស់អាជ្ញាធរអប្សរា ជាតំបន់មានការអភិវឌ្ឍលឿន ប៉ុន្តែល្បឿននៃការអភិវឌ្ឍក្រុងសៀមរាប មិនលឿនដូចក្រុងព្រះសីហនុ ឬក្រុងប៉ោយប៉ែតនោះទេ តែការអភិវឌ្ឍបាននិងកំពុងធ្វើឡើងដោយសន្សឹមៗ។លោកបន្តថា ដោយសារក្រុងសៀមរាប កាន់តែមានការអភិវឌ្ឍលឿន ការកកស្ទះចរាចរណ៍កំពុងកើនឡើង ការពង្រីកហេដ្ឋារចនាសម្ព័ន្ឋទៅតំបន់ជាយក្រុង ជាដំណោះស្រាយសមស្របមួយ។

លោកបន្តថា “នៅពេលហេដ្ឋារចនាសម្ព័ន្ឋរបស់រដ្ឋាភិបាល អភិវឌ្ឍន៍នៅតំបន់ណាតំបន់នោះនឹងទាក់ទាញការវិនិយោគ និងធ្វើឲ្យតម្លៃដីធ្លីកើនឡើងផងដែរ”៕

Property Management ជួយឲ្យអ្នកវិនិយោគទទួលបានជោគជ័យដូចម្តេច

November 13, 2018

0

ដោយ គង់ សូរិយា

ភ្នំពេញ៖ ស្របពេលកម្ពុជាមិនទាន់មានក្រុមហ៊ុនច្រើន មានជំនាញខាងការគ្រប់ គ្រងអចលនទ្រព្យ (Property Management) អ្នកអភិវឌ្ឈន៍មួយចំនួនមិនសូវមានការយល់ដឹង ពីផ្នែកដ៏មានសារៈសំខាន់នេះនោះទេ ខណៈសេវាគ្រប់គ្រងអចលនទ្រព្យ គឺជាសេវាមួយដែលបានជួយផ្តល់ទំនុកចិត្ត និងទាក់ទាញការវិនិយោគ។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍ឲ្យដឹងតាមទូរស័ព្ទ កាលពីពេលថ្មីៗនេះថា បើអាគារខុនដូ អាគារការិយា ល័យ ឬអាផាតម៉ិនណាមួយមានអ្នកជំនាញគ្រប់គ្រងបានល្អ ផ្តល់សុវត្ថិភាព ផ្តល់ការថែរទាំ នឹងធ្វើឲ្យអចលនទ្រព្យកើនឡើង និងធ្វើឲ្យអាគារនោះមានភាពថ្មីជានិច្ច ព្រោះសេវាគ្រប់គ្រងអចលនទ្រព្យ នឹងផ្តល់ការថែរទាំ ជួលជុសអាគារនោះ។

អ្នកនាងបន្តថា “ការមានក្រុមហ៊ុនជំនាញធ្វើការលើផ្នែកនេះ នឹងធ្វើឲ្យអចលនទ្រ ព្យនោះទាក់ទាញអ្នកជួល និងទាក់ទាញអ្នកទិញអាគារនោះកាន់តែច្រើន ប៉ុន្តែយ៉ាងណាក៏ដោយនៅកម្ពុជា មិនសូវមានក្រុមហ៊ុនជំនាញគ្រប់គ្រងអចលនទ្រព្យបែបនេះច្រើននៅឡើយ។

អ្នកនាង អាន សុធីតា បានបន្តថា ការផ្តល់សេវាគ្រប់គ្រងអាគារឬអចលនទ្រព្យណាមួយ ធ្វើឡើងដោយមានកិច្ចព្រមព្រៀងរវាងម្ចាស់អាគារ និងក្រុមហ៊ុនគ្រប់គ្រងអចលនទ្រព្យ ដែលយកកម្រៃសេវាកម្មពីអ្នកស្នាក់នៅលើអាគារ តាមតម្លៃសមរម្យមួយ ដែលមានការឯកភាពរវាងអ្នកគ្រប់គ្រង និងអ្នកវិនិយោគ ហើយថវិកានោះ នឹងបែងចែងប្រើប្រាស់លើការថែរទាំ ការជួសជុលអាគារ និងបែងចែកភាគលាភផ្សេងៗទៀត ដល់ក្រុមហ៊ុនគ្រប់គ្រងអចលនទ្រព្យនោះ៕