ដោយ វុត្ថា

ភ្នំពេញ: ក្រុមហ៊ុន Savills Vietnam បានបង្ហាញរបស់ការណ៍របស់ខ្លួនកាលពីពេលថ្មីៗថា ទីផ្សារលំនៅដ្ឋានអាផាតមិនៅក្នុងខេត្តDanang របស់ប្រទេសវៀតណាម មានសន្ទុះឡើងខ្លាំងគួរអោយភ្ជាក់ផ្អើល ក្នុងពាក់កណ្តាលឆ្នាំ២០១៨នេះ។

យោងតាមទិន្ន័យក្នុងរបាយការណ៍នេះ អត្រាជាមធ្យមបានកើនឡើងខ្ពស់រហូតដល់៩៣ភាគរយ នៃការលក់ចេញនូវលំនៅដ្ឋានអាផាតម៉ិន ពោលគឺកើនឡើងរហូតដល់ ៣ដង បើធៀបនឹងឆ្នាំ២០១៧កន្លងទៅនេះ។

របាយការណ៍នេះ ក៏បានបង្ហាញពីតំលៃលំនៅដ្ឋានអាផាតម៉ិន ដែលគិតជាមធ្យម ១៨០០ដុល្លារ ក្នុងមួយម៉ែត្រការ៉េនៅក្នុងឆមាសទី១នៃឆ្នាំនេះ ពោលគឺកើនឡើងរហូតដល់២៨ភាគរយធៀបរយៈពេលដូចគ្នាកាលពីឆ្នាំមុន។

នៅក្នុងខេត្ត Danang លំនៅដ្ឋានអាផាតម៉ិន បានកើនឡើងពី១៩ភាគរយជារៀងរាល់ឆ្នាំ ដោយសារតែមានគម្រោងសាងសង់ចំនួន២០ និងមានអាផាតម៉ិនចំនួន៨៣០ យូនីតបានដាក់ចូលទៅក្នុងទីផ្សារ ដែលចេញពីគម្រោងថ្មីចំនួន៣បន្ថែមទៀត។

ចំណែកខុនដូនៅក្នុងខេត្តDanangវិញ អាផាតម៉ិនបានធ្លាក់ចុះ៨ភាគរយពីមួយឆ្នាំទៅមួយឆ្នាំ ដោយសារតែតម្លៃកើនឡើង១៩ភាគរយក្នុងឆមាសទី១ ពោលគឺអាផាតម៉ិនបានកើនតម្លៃដល់២,១០០ដុល្លារក្នុងមួយម៉ែត្រការ៉េ ហើយខុនដូចំនួន១,៥៧០យូនីត ត្រូវបានដាក់ចូលក្នុងទីផ្សារពីគម្រោងថ្មីៗ៕

ដោយវុត្ថា

ភ្នំពេញ: រដ្ឋាភិបាលប្រទេសថៃ បានចាប់ផ្តើមសាងសង់ពង្រីកស្ថានីយ៍ព្រលានយន្តហោះអន្តរជាតិKhon Kaen ដោយវិនិយោគទំហំទឹកប្រាក់ចំនួន២ពាន់លានបាត សម្រាប់ចំណាយទៅលើការសាងសង់ពង្រីកបន្ថែមនេះ។

យោងតាមការចុះផ្សាយពីកាសែតបាងកកបុស្តិ៍បានអោយដឹងថា ការពង្រីកស្ថានីយ៍ព្រលានយន្តហោះថ្មីនេះ ត្រូវបានរដ្ឋាភិបាលអនុម័តយល់ព្រមកាលពីខែតុលា ឆ្នាំ ២០១៧ កន្លងទៅ ។ តាមគម្រោងព្រលានយន្តហោះនេះ នឹងពង្រីកទំហំដីពី១៦,៥០០ ម៉ែត្រការ៉េ ទៅ៤៤,៥០០ម៉ែត្រការ៉េ ដែលអាចផ្ទុកអ្នកធ្វើដំណើរបានចំនួនពី១០០០ នាក់ទៅ២០០០នាក់ក្នុងមួយម៉ោង ឬ ក៏ប្រហែល៥លាននាក់ក្នុងមួយឆ្នាំ ព្រមទាំងមានការពង្រីកអគារចំណតរយន្តផងដែរ ដែលបច្ចុប្បន្នអាចផ្ទុករថយន្តបានចំនួន៤៥០គ្រឿង ទៅ អាចផ្ទុករយន្តបានចំនួន១,១៦០រថយន្ត។

លោកArkhom Termpittayapaisith  រដ្ឋមន្ត្រីក្រសួងដឹកជញ្ជូនថៃ បានប្រាប់កាសែ​តបាងកកបុស្តិ៍ ខណៈលោកទៅចូលរួមពិធីបុកគ្រឹះថា គម្រោងពង្រីកព្រលានយន្តហោះនេះនឹងត្រូវប្រើពេលសាងសង់រយៈ៣ឆ្នាំ។ លោករដ្ឋមន្ត្រីរូបនេះបញ្ជាក់ទៀតថា ព្រលានយន្តហោះអន្តរជាតិ Khon Kaen  នាពេលបច្ចុប្បន្ននេះ បានទទួលយន្តហោះចុះចត ១៨គ្រឿង និងចេញដំណើរ១៨គ្រឿងក្នុងមួយថ្ងៃ ដែលហោះហើរក្នុងតំបន់ និងនៅពេលអនាគត ព្រលានយន្តហោះនេះនឹងផ្តល់សេវាហោះហើរ ទៅកាន់ទីក្រុងរបស់ចិនជាច្រើនផ្សេងទៀត ។  

លោកបន្តថា ស្ថានីយ៍សម្រាប់អ្នកធ្វើដំណើរថ្មី នឹងបើកសម្ពោធដាក់អោយប្រើប្រា​ស់ជាផ្លូវការនៅក្នុងឆ្នាំ២០២១ ដោយភ្ជាប់ពីរថភ្លើងល្បឿនលឿន Nakhon Ratchsima-Nong Khai ដែលកំពុងសាងសង់នោះផងដែរ៕

ដោយ ​ដួង ចន្រ្ទា

​ភ្នំពេញ: ស្របពេលទីផ្សារអចលនទ្រព្យមានសកម្មភាពផុសផុល ការវិនិ​យោគលើ​វិស័យនេះទាមទារភាពឆ្លាតវៃផងដែរ ដើម្បីទទួលបានឳកាសចំណេញ និងកាត់​បន្ថយហានិភ័យ។

​លោកច្រឹក សុខនីមអគ្គនាយកក្រុមហ៊ុនCentury21 Mekongដែលមានជំ​នា​ញទិញលក់លំនៅដ្ឋាននៅតាមបុរីនានាបានថ្លែងថា ការទិញអចលនទ្រព្យទាំងនេះ វាអាស្រ័យលើលក្ខខ័ណ្ឌប្រាក់ចំណូល និងលំហូរសាច់ប្រាក់របស់អ្នកវិនិយោគនិមួយៗ។

​វិនិយោគទិញដី

​ប្រសិនជាចង់វិនិយោគលើដីធ្លី អ្នកវិនិយោគត្រូវដឹងថា ការវិនិយោគបែបនេះមិនមានលំហូរសាច់ប្រាក់ភ្លាមៗនោះទេ។ហេតុនេះអ្នកវិនិយោគលើដីធ្លីត្រូវមើលលក្ខខ័ណ្ឌប្រាក់ចំណូលរបស់ខ្លួន ព្រោះប្រសិនជាខ្ចីលុយពីធនាគារទិញដី ហើយស្ថានភាពលំហូរសាច់ប្រាក់របស់ខ្លួន មិនមានភាពល្អប្រសើរគួរកុំទិញអី។ ផ្ទុយទៅវិញ ប្រសិនជាអ្នកវិនិយោគមានសាច់ប្រាក់៥០ភាគរយ ហើយខ្ចីលុយធនាគារ៥០ភាគរយ និងមានលំហូរសាច់ប្រាក់អាចដំណើរការបាន គួរវិនិយោគលើដីធ្លីមានឳកាសចំណេញច្រើនជាង។

​ការវិនិយោគលើដីធ្លីគួរមើលតំបន់ ដែលស្ថិតក្នុងផែនការអភិវឌ្ឍន៍របស់      រដ្ឋាភិបាល គួរពិនិត្យលើប្លង់ដីឲ្យបានច្បាស់លាស់ ដើម្បីបញ្ចៀសជម្លោះណាមួយ និងគួរមើលពីសក្តានុពលនៅទីតាំងដីរបស់ខ្លួន។

​ទិញផ្ទះល្វែង

​ការទិញផ្ទះល្វែង ក៏មានឳកាសចំណេញផងដែរ ហើយក៏ជាការវិនិយោគមានលំហូរសាច់ប្រាក់ផងដែរ ព្រោះផ្ទះល្វែងអាចជួលបាន ប៉ុន្តែអ្នកទិញក៏គួរពិនិ​ត្យមើលលំហូរសាច់ប្រាក់របស់ខ្លួន និងទំហំឥណទានដែលត្រូវខ្ចី និងសងត្រលប់ទៅធនាគារបាន។ ការទិញផ្ទះល្វែងនៅតំបន់សម្រាប់រស់នៅ និងតំបន់ពាណិជ្ជ​កម្ម ផ្ទះល្វែងនៅតំបន់ពាណិជ្ជកម្ម មានឳកាសចំណេញខ្ពស់ជាង ប៉ុន្តែក៏មានតំលៃថ្លៃជាងតំបន់លំនៅដ្ឋានសម្រាប់រស់នៅធម្មតាផងដែរ។

​ការទិញផ្ទះល្វែង ក៏គួរពិនិត្យទៅលើទីតាំង និងលក្ខខ័ណ្ឌច្បាប់ផងដែរ ដើម្បីបញ្ចៀសហានិភ័យ ដែលធ្វើឲ្យអត្រាចំណេញទាប និងមានហានិភ័យខ្ពស់។

​ការទិញខុនដូ

​ខុនដូជាវិស័យថ្មីមួយ ដែលទើបមានការពេញនិយមជាបណ្តើរៗនៅកម្ពុជា ។ការវិនិយោគលើខុនដូភាគច្រើនផ្តោតសម្រាប់ជួល យកប្រាក់ត្រលប់មកវិញ ប៉ុន្តែការទុកលក់យកចំណេញ មិនទាន់មានឳកាសចំណេញខ្ពស់ទេ ដោយសារ​លំនៅដ្ឋានជាប់ដី នៅតាមបុរីនានានៅតែមានតម្លសមស្រប និងមានចំនួនច្រើននៅឡើយ។

​ហេតុនេះការទិញខុនដូគួរតែវិនិយោគលើទីតាំង ដែលមានការពេញនិយម​ច្រើនពីអ្នកស្នាក់នៅ ដូចជា ក្នុងសង្កាត់ទន្លេបាសាក់ សង្កាត់ចតុមុខ សង្កាត់បឹងកេងកង១ជាដើម ដែលជាតំបន់មានមនុស្សរស់នៅច្រើន និងមានការពេញនិយម ពីជនបរទេស៕

ដោយស៊ីវ ម៉េង

ភ្នំពេញ:  រហូតមកទល់ពេលនេះការ​សាងសង់ហេដ្ឋារចនាសម្ព័ន្ឋ ដូចជាប្រព័ន្ឋផ្លូវដែលមានប្រវងសរុប៣០គីឡូម៉ែត្រ លូ៦០គីឡូម៉ែត្រ និងហេដ្ឋារចនាសម្ព័ន្ឋដទៃទៀតនៅទីក្រុងរណបជ្រោយចង្វារសម្រេចបាន៧០ភាគរយហើយ ដោយចំណាយទុនវិនិយោគប្រមាណ១៥០លានដុល្លារអាមេរិក។

លោកទូច សំណាងអគ្គនាយករងក្រុមហ៊ុនOCICបានមានប្រសាសន៍ឲ្យដឹងកាលពីពេលថ្មីៗនេះថា ទុនវិនិយោគក្នុងទឹកប្រាក់១៥០លានដុល្លារនេះ មិនទាន់រាប់បញ្ចូលការចាក់ខ្សាច់បំពេញផ្ទៃដីជាង១០០ហិកតា នៅក្នុងទីក្រុងរណបនេះ ដែលយើងគ្រោងរៀបចំទីក្រុងនេះ ជាតំបន់ពាណិជ្ជកម្មដូចតំបន់ស្ថិតនៅស្របមហាវិថីព្រះមុនីវង្ស នាពេលបច្ចុប្ប​ន្ននេះ”។

​លោកបន្តថា “បច្ចុប្បន្នក្រុមហ៊ុនកំពុងសាងសង់ផ្ទះល្វែងតម្លៃចាប់ពី១៥ ទៅ២៥ម៉ឺនដុល្លារ និងអាគារពាណិជ្ជកម្មកំពស់១០ទៅ១២ជាន់ និងការិយាល័យកណ្តាលរបស់OCIC កំពស់២០ជាន់នៅទីក្រុងរណបនេះ”។ លោកបន្តថា “ចំណែកដំណា​ក់កាលបន្ទាប់ទៀត យើងនឹងធ្វើឡើងបត់បែនស្របតាមការវិវិត្តនៃសេដ្ឋកិច្ចសង្គម​កម្ពុជា”។

​ទីក្រុងរណបជ្រោយចង្វារដំបូងឡើយមានផ្ទៃដី៣៨៧ហិកតា ប៉ុន្តែក្រោយពេលកាត់ជូនប្រជាពលរដ្ឋ និងកាត់ចេញនូវហេដ្ឋារចនាសម្ព័ន្ឋនានា ផ្ទៃដីទីក្រុងរណបនេះនៅសល់តែ១៤០ហិកតាប៉ុណ្ណោះ ក្នុងនោះផ្ទៃដី១០ភាគរយនឹងទុកជូនម្ចាស់ដីនៅតំបន់នេះ ដែលពួកគេអាចមកទទួលយកបានគ្រប់ពេល។នេះបើតាមការបញ្ជាក់ឲ្យដឹងពីលោកទូច សំណាង។

​លោកទូច សំណាងបានបន្តថា ទីក្រុងរណបជ្រោយចង្វារ ទីក្រុងនៃអនាគតជាតំបន់ដែលស្ថិតនៅលើទីតាំងដ៏ល្អ​ប្រសើរបំផុត ដោយសារតំបន់នេះមានទន្លេរពីអមសង​ខាង ដែលផ្តល់នូវលក្ខខ័ណ្ឌអាកា​សធាតុដ៏ល្អបំផុត ពិសេសការសាងសង់ទីក្រុងនៅស្របតាមមាត់ទន្លេឬមាត់សមុទ្រ គឺជាជម្រើសទី១របស់អ្នកវិនិយោគនានា ដើម្បីទាក់ទាញអតិថិជន ក៏ដូចជាអ្នកជំនួញអាចប្រ​កបអាជីវកម្ម និងរស់នៅប្រកបដោយភាពសុខដុម។

​អគ្គនាយកក្រុមហ៊ុនCentury21 Mekongលោកច្រឹក សុខនីមបានថ្លែងថា តំបន់ជ្រោយចង្វារ ជាតំបន់ដ៏ល្អដោយសារវាមានទីតាំងនៅជិតតំបន់ពាណិជ្ជកម្មកណ្តាលក្រុង ជាងគេ ជាតំបន់មានលក្ខខ័ណ្ឌអាកាសធាតុល្អ និងមានការតភ្ជាប់ហេដ្ឋារចនាសម្ព័ន្ឋយ៉ាងប្រសើរ ដែលងាយស្រួលចេញចូល និងងាយស្រួលធ្វើលំហូរចរាចរណ៍។លោកបន្តថា ដោយសារតំបន់នេះមានលក្ខខ័ណ្ឌអំណោយផលបែបនេះ ទើបគំរោងអភិវឌ្ឍន៍ទីក្រងរណបថ្មីៗ និងគំរោងខុនដូ អាផាតម៉ិនជាច្រើនបាននិងកំពុងដុះដាលនៅតំបន់នេះ។

​លោកបន្តថា “ខ្ញុំជឿថាគំរោងរបស់OCICនឹងទទួលបានជោគជ័យ ដោយសារក្រុមហ៊ុនមានមូលដ្ឋានអតិថិជនស្រាប់ និងមានកេរ្ត៍ឈ្មោះល្អ ដែលធ្វើឲ្យគំរោងអភិវឌ្ឍន៍​របស់ពួកគេតែងតែទទួលបានជោគជ័យ”៕

ដោយ ស៊ីវ ម៉េង

ភ្នំពេញ៖ មន្រ្តីជំនាញរដ្ឋលេខាធិការដ្ឋានអាកាសចរណ៍ស៊ីវិលបានអះអាងថា ក្រុមហ៊ុនTianjin Union Development Group (TUDG) បានពន្យាពេលសាងសង់ព្រលានយន្តហោះអន្តរជាតិខេត្តកោះកុងមួយរយៈខ្លី ដោយសារការធ្លាក់ភ្លៀងខ្លាំង។

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថាបានថ្លែងឲ្យដឹងនៅដើមសប្តាហ៍នេះថា ភាគីក្រុមហ៊ុនសាងសង់ព្រលាន​យន្តហោះនេះបានមកជួបជាមួយមន្រ្តីជំនាញ និងមន្រ្តីជាន់ខ្ពស់រដ្ឋលេខាធិការដ្ឋា​នអាកាសចរណ៍ស៊ីវិលចំនួនពីរលើកមកហើយ ដើម្បីបង្ហាញពីគំរោងរបស់ពួកគេ និងសកម្មភាពនៃការចាប់ផ្តើមគំរោងនេះ។លោកបន្តថា ប៉ុន្តែបច្ចុប្បន្នព្រលានយន្តហោះនេះសាងសង់យឺត ដោយសារភ្លៀងធ្លាក់ខ្លាំង។

ក្រុមហ៊ុន Tianjin Union Development Group បានទទួលដីសម្បទានពីរដ្ឋាភិ​បាលជាង៥ម៉ឺនហិកតា ដែលគ្របដណ្តប់ស្រុកស្រុកពីររបស់ខេត្តកោះកុង ជាអ្នក​សាងសង់ព្រលានយន្តហោះអន្តរជាតិថ្មីនេះ។ ក្រុមហ៊ុននេះគ្រោងបោះទុនវិនិយោគប្រមាណ៥០០០លានដុល្លារអាមេរិក ហើយនៅពេលថ្មីៗនេះក្នុងជំនួបជាមួ​យរដ្ឋមន្រ្តីក្រសួងពាណិជ្ជកម្មថ្នាក់ដឹកនាំក្រុមហ៊ុននេះ បានប្រកាសគំរោងវិនិយោគដាច់ដោយឡែកមួយ គឺសាងសង់លំនៅដ្ឋាន មជ្ឈមណ្ឌលពាណិជ្ជកម្មសំ​រាប់វិស្សមកាលតម្លាំ១២០០លានដុល្លារអាមេរិក។

លោកស៊ិន ចាន់សិរីវុត្ថាបានបន្តថា សកម្មភាពឈូសឆាយទីតាំងសាងសង់ ព្រលានយន្តហោះអន្តរជាតិថ្មីនេះ បានចាប់ផ្តើមតាំងពីដើមឆ្នាំនេះមកម្លេស ប៉ុន្តែសកម្មភាពហាក់មានភាពយឺតៗ ដោយសាររដូវភ្លៀង ប៉ុន្តែនៅពេលបញ្ចប់រដូវភ្លៀងសកម្ម​ភាពនៃការសាងសង់នឹងត្រូវពន្លឿនហើយ។

ទោះជាយ៉ាងណាតាមព៌តមានរបស់ក្រុមហ៊ុននេះ នាពេលកន្លងមកបានឲ្យដឹងថា រដ្ឋាភិបាល​កម្ពុជាបានអនុម័ត នូវគំរោងសាងសង់ព្រលានយន្តហោះអន្តរជាតិថ្មី ដែលវិនិយោ​គដោយក្រុមហ៊ុន Tianjin Union Development Group ជាក្រុមហ៊ុនដែលបាន និងកំពុងវិនិយោគលើរមណីយដ្ឋាន​ទេសចរណ៍លំដាប់អន្តរជាតិនៅខេត្តកោះកុង។

តំណាងក្រុមហ៊ុន Tainjin Union Development Group លោកស្រីប៊ែលឡា ហ្សាងធ្លាប់បានមានប្រសាសន៍ឲ្យដឹងថា ការធ្វើផែមការសាងសង់ព្រលាន​យន្តហោះលំដាប់អន្តរជាតិនេះ បានបញ្ចប់ហើយ និងកំពុងត្រៀមរៀបចំផែនការដើម្បីធ្វើការសាងសង់។ ព្រលានយន្តហោះនេះ អាចទទួលអ្នកដំណើរបាន១០លាននាក់ក្នុងមួយឆ្នាំ និងអាចចុះចតយន្តហោះខ្នាតធំ Boeing 380 ហើយក្រុមហ៊ុនបានធ្វើការសិក្សាពីភូមិសាស្រ្ត និងកំណត់ទីតាំងសម្រាប់ព្រលានយន្តហោះ​នេះរួចហើយ។

តាមព៌តមានរបស់ក្រុមហ៊ុនដដែលនេះបានឲ្យដឹងថា បច្ចុប្បន្នក្រុមហ៊ុនបាននិងកំពុងដំណើរការគំរោងរមណីយដ្ឋាន លំដាប់ប្រណីតនៅខេត្តកោះកុងរួចហើយ ដែលរួមមានសណ្ឋាគារលំដាប់ផ្កាយ៥ភោជនីយដ្ឋាន ទីលានវាយកូនហ្គោលលំដាប់អន្តរជាតិជាដើម។​

ទីប្រឹក្សាសភាពាណិជ្ជកម្មកម្ពុជាលោកហូ វណ្ឌីបានថ្លែងថា ការមានព្រលានយន្តហោះថ្មីមួយទៀត នឹងហុចសក្តានុពលសម្រាប់វិស័យអាកាសចរណ៍នៅកម្ពុជា ជាពិសេសផ្តល់ឲ្យមានជម្រើសកាន់តែច្រើនថែមទៀត សម្រាប់ក្រុមហ៊ុនអាកាសចរ​ណ៍នានា ដែលអាចហោះហើរត្រង់មកកម្ពុជា ហើយប្រសិនជាព្រលាន​ថ្មីនេះមានស្តង់ដាអន្តរជាតិ វានឹងអាចទាក់ទាញក្រុមហ៊ុនអាកាសចរណ៍មកពីប្រទេសថៃ និងខេត្តរបស់ថៃដែលជាប់នឹងកម្ពុជា អាចភ្ជាប់បណ្តាញហោះហើរទៅវិញទៅមក។

លោកបន្តថា “ខ្ញុំស្វាគមន៍គំរោងវិនិយោគដ៏ល្អនេះ ដែលវានឹងជួយជំរុញកំនើនសេដ្ឋកិច្ច និងទាក់ទាញទេសចរណ៍មកទស្សនាកម្ពុជា កាន់តែច្រើនថែមទៀត”។

ការវិនិយោគនេះជាផ្នែកមួយនៃវិថីសូត្រ ខ្សែក្រវ៉ាត់មួយ ផ្លូវមួយរបស់ប្រទេ​សចិន មកកម្ពុជា ដែលរដ្ឋាភិបាលប្រទេសទាំងពីរ បានគាំទ្រគ្នាទៅវិញទៅមក​ ហើយកម្ពុជារំពឹងថា នឹងទទួលបានភ្ញៀវទេសចរណ៍ចិន២លាននាក់នៅឆ្នាំ២០២០ខាងមុខនេះ៕

ដោយ គង់ សូរិយា

ភ្នំពេញ៖ ក្រុមហ៊ុនក្នុងស្រុកធំជាងគេនៅកម្ពុជា OCIC គ្រោងវិនិយោគជាង ៣០០០លានដុល្លារអាមេរិក ដើម្បីទីក្រុងរណបជ្រោយចង្វារជាទីក្រុងពាណិជ្ជកម្មនាពេលអនាគត នឹងេរៀបចំទីក្រុងនេះមានលក្ខណៈជា Smart City។

អគ្គនាយករងក្រុមហ៊ុន OCIC លោក ទូច សំណាង បានមានប្រសាសន៍ឲ្យដឹងកាលពីពេលថ្មីៗនេះថា ទីក្រុងនេះនឹងរៀបចំឡើងតាមបែប Smart City ដោយប្រព័ន្ឋហេដ្ឋារចនាសម្ព័ន្ឋត្រូវបានរៀបចំជាពិសេស ដោយខ្សែភ្លើងនឹងត្រូវកប់ក្រោមដីទាំងអស់ អំពូលភ្លើងនឹងប្រើប្រាស់ប្រភេទអំពូល LED ដែលមានការបំពាក់កាមេរ៉ានិងទឹកកខ្វក់ទាំ​ង​អស់ចេញពីទីក្រុងនេះ នឹងត្រូវឆ្លងកាត់ការចម្រោះទាំងអស់មុននឹងបង្ហូរចេញ។

លោកបន្តថា “ការវិនិយោគទីក្រុងបែបស្មាតស៊ីធី ត្រូវចំណាយប្រាក់ច្រើន ប៉ុន្តែដើ ​ម្បីនិរន្តរភាពបរិស្ថាន និងភាពសុខសាន្ត ក៏ដូចជាផាសុខភាពដល់ប្រជាពលរដ្ឋ ពិតជាអ្វី ដែលយើងត្រូវផ្តោត”។

អគ្គលេខាធិការរង​នៃ​គណៈស្ថាបត្យករ​កម្ពុជា និង​ជា​ស្ថាបត្យករ​អាស៊ានលោក ទួស សាភឿនបាន​មាន​ប្រសាសន៍​ថា ​ទីក្រុង​ឆ្លាតវៃ​តម្រូវ​ឲ្យ​មាន​ផែនការ​ធំ​ទូលាយ​សម្រាប់​ទីក្រុង​ទាំងមូល ​មិនមែន​ត្រឹម​ទីក្រុង​រណប​នោះទេ​។ ទីក្រុង​ឆ្លាតវៃ គួរ​តែ​មាន​ចន្លោះ​បៃតង ដូចជា​ សួនច្បារ​ដែល​ព័ទ្ធ​ជុំវិញ​អគារ​សាធារណៈ ​ដើម្បី​ឱ្យ​មនុស្ស​អាច​សម្រាក និង​ទទួល​បាន​ខ្យល់​អាកាស​បរិសុទ្ធ​​។

លោក​បាន​បន្ថែម​ថា “​ទីក្រុង​ឆ្លាតវៃ​អាច​កើតឡើង​បាន​លុះត្រា​តែ​មាន​ មេដឹកនាំ​ពូកែ​ដែល​ធ្វើការ​លើ​ផែនការមេ​ដ៏ទូលំទូលាយ​ក្នុង​ការ​អភិវឌ្ឍ​ ទីក្រុង​ពោល​គឺ​មាន​ផែនការមេ​តាម​ផ្លូវ​ច្បាប់​ច្បាស់លាស់​ដែល​គ្រប់គ្រង​លើ ​ការប្រើប្រាស់​ដីសំណុំ​បែបបទ ការ​រចនា ឬ​ ការប៉ុនប៉ង​គ្រប់គ្រង​លើ​ការអភិវឌ្ឍ​ទីក្រុង”​។លោកបន្តថា “តំបន់​នីមួយៗ​ត្រូវ​តែ​កំណត់​ឲ្យ​បាន​ច្បាស់​ថា ជា​តំបន់​លំនៅឋាន ពាណិជ្ជកម្ម ឬ​ឧស្សាហកម្ម​ដែល​នឹង​អាច​ពង្រីក​ឱកា​ស​នៅក្នុង​ការអភិវឌ្ឍ​ទីក្រុង និង​ដែល​អាច​ជួយ​ដល់​ការរស់នៅរបស់ប្រជាជន នៅក្នុងទីក្រុង​កាន់​តែ​ប្រសើរ​ឡើង​។

តាមការព្យាករណ៍របស់ក្រសួងរៀបចំដែនដី នគរូបនីយកម្មនិងសំណង់បានឲ្យដឹងថា គិត​ត្រឹម​ឆ្នាំ២០៣០ខាងមុខ ប្រជាជន​ជិត​៨​លាន​នាក់​ត្រូវ​គេ​រំពឹងថា នឹង​រស់នៅ​ក្នុង​ទីក្រុង ហើយ​ភាគច្រើន​នៃ​ពួកគេ​នឹង​មក​រស់នៅ​ក្នុង​ទីក្រុង​ភ្នំពេញ​។

រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់លោកសាស្រ្តាចារ្យ ភឿង សុភ័ណ្ឌបានថ្លែងថា ការសាងសង់អាគារធំៗ និងការគិតគូរពីបញ្ហាបរិស្ថានជាការ​ងាររបស់យើង ដែលត្រូវផ្តោតយកចិត្តទុកដាក់លើអ្វីដែលគេឲ្យឈ្មោះថា Smart City ព្រោះទីក្រុងបែបឆ្លាតវៃនេះ ទាមទារការគិតគូរច្រើនណាស់ ដើម្បីសម្រេចបាននូវស្តង់ដាទីក្រុងមួយ ដែលមានភាពទាក់ទាញ និងផ្តល់ភាពសុខសាន្តដល់ប្រជាពលរដ្ឋ។

លោកបន្តថា “ការសាងសង់អាគារត្រួវតែធ្វើឡើង ដោយមានទីធ្លាបៃតង កន្លែងលេង​កំសាន្ត ការទាញយកពន្លឺព្រះអាទិត្យ មកប្រើជំនួសឬកាត់បន្ថយការប្រើប្រាស់ថាម​ពលអគ្គិសនី ការដាំដើមឈើក្នុងអាគារ និងប្រព័ន្ឋចម្រោះទឹកកខ្វក់ជាដើម សុទ្ឋតែជារឿងចាំបាច់ ដើម្បីធានានិន្តរភាពនៃការអភិវឌ្ឍ ដោយត្រូវគោរពនូវពាក្យស្លោកការអភិរក្ស ត្រូវដើរទន្ទឹមគ្នានឹងការអភិរ័ក្ស”៕

ដោយ ស៊ីវ ម៉េង

ភ្នំពេញ៖ តម្រូវការការិយាល័យទំនើបនៅរាជធានីភ្នំពេញ ពិសេសការិយាល័យនៅតាមបណ្ដាគារខ្ពស់ៗមានការហក់ឡើងខ្លាំង ដោយសារកំនើននៃការវិនិយោគ និងក្រុមហ៊ុនថ្មីៗបង្កើតឡើងកាន់តែច្រើន។

កញ្ញាលីម សុខាដាវីន ប្រធានផ្នែគលក់នៃក្រុមហ៊ុន FURI Real Estate បានលើកក្នុងពិធីដាក់លក់ការិយាល័យកម្រិត A Plus របស់ខ្លួនដែលស្ថិតនៅក្នុងអាគារThe Peakកាលពីរាត្រីថ្ងៃទី២១ កញ្ញាកន្លងមកថា សព្វថ្ងៃតម្រូវការការរិយាល័យបែបប្រណីត តាមអាគារខ្ពស់ៗ មានកំណើនជាខ្លាំងក្នុងរាជធានីភ្នំពេញ ជាពិសេសនៅកណ្តាលរាជធានីភ្នំពេញ ស្របពេលដែលទីក្រុងភ្នំពេញ ពុំមានដីច្រើនដើម្បីសាងសង់ការិយាល័យ។ ម្យ៉ាងវិញទៀតការរិយាល័យប្រភេទនេះ ក៏បានទាក់ទាញការវិនិយោគ និងសកម្មភាពជាជីវកម្មច្រើនផងដែរ។

កញ្ញាបន្តថា ជាក់ស្ដែងគម្រោងលក់ការិយាល័យ ដែលចាប់ពីជាន់ទី១៣ដល់ជាន់ទី២៨ ចំនួន២៥០យូនីត ដែលចាប់ផ្ដើមលក់កាលពីដើមឆ្នាំរបស់ហ៊ុនមកទល់ពេលនេះ បានលក់ដាច់ជាច្រើនប្រមាណ៩០ភាគរយហើយ។ កញ្ញាបន្តថា អតិថិជនដែលសម្រេចទិញ ការិយាល័យពីក្រុមហ៊ុនមានទាំងជនជាតិខ្មែរ និងជនបរទេស ដោយក្នុងនោះអ្នកវិនិយោគជនជាតិចិនជាច្រើនបានទិញ ការិយាល័យសម្រាប់បម្រើការងាររបស់ខ្លួន។

អ្នកនាង ជិន ចាន់ឡែន នាយិកាក្រុមហ៊ុន FURI TIMES SQAURE បានមានប្រសា​សន៍ឲ្យដឹងផងដែរថា ទីផ្សារការិយាល័យ ពិតជាមានកំនើនតម្រូវការខ្ពស់ ពិសេសការិយា​ល័យស្ថិតនៅក្នុងគំរោងវិនិយោគចម្រុះបែបនេះ ដែលអតិថិជនអាចទិញវិនិយោគចំណេ​ញបានច្រើន ព្រោះគំរោង THE PEAK ជាគំរោងដែលរួមបញ្ចូលនូវសណ្ឋាគារប្រណីតលំ​ដាប់ផ្កាយ៥  Shangri_La, ផ្សារទំនើបលំដាប់អន្តរជាតិ ក្លឹបហាត់ប្រាណ និងសេវាកម្មជាច្រើនទៀត ពិសេសមានខុនដូជាង១១០០យូនីត ស្ថិតនៅក្នុងគំរោងនេះ។

អ្នកនាងបន្តថា អតិថិជនមួយចំនួនបានវិនិយោគលើគំរោងមួយចំនួនមិនបានទទួ​លជោគជ័យ ដោយសារពួកគេជ្រើសរើសគំរោង ដែលគ្មានការឌីសាញទាក់ទាញ មិនមាន​ការបំពាក់សម្ភារៈបរិក្ខាគ្រប់គ្រាន់ មិនមានចំណតយានយន្តសមស្រប ប៉ុន្តែសម្រាប់គំរោង THE PEAK គឺមានសេវាកម្មទាំងអស់នេះ៕