ដោយ : គង់ សូរិយា
ភ្នំពេញ ៖ ខណៈចំនួនភ្ញៀវទេសចរកើនឡើងជាបន្តបន្ទាប់ បានធ្វើឲ្យអ្នកវិនិយោគក្នុងស្រុក និងអន្តរជាតិបានចាប់ផ្តើមវិនិយោគលើសណ្ឋាគារ ផ្ទះសំណាក់ និងភោជនីយដ្ឋានកើនឡើងជាបន្តបន្ទាប់។
ខេត្តបាត់ដំបងមានលក្ខណៈពិសេសមួយ នៃបណ្តាខេត្តស្ថិតនៅភូមិភាគពាយ័ព្យប្រទេស ដែលខេត្តនេះ សម្បូរនូវរមណីយដ្ឋានបែបវប្បធម៌ប្រវត្តិសាស្ត្រ រមណីយដ្ឋានធម្មជាតិ និងរមណីយដ្ឋានកសិកទេសចរណ៍ជាដើម។
អនុប្រធានមន្ទីរទេសចរណ៍ខេត្តបាត់ដំបង លោក នួន ថា បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី៩ ធ្នូកន្លងមកថា នៅខេត្តបាត់ដំបង មានសណ្ឋាគារដល់ត្រឹមលំដាប់ផ្កាយ៣ ដែលសណ្ឋាគារខ្លះ មានសាលាប្រជុំ សេវាកម្មម៉ាស្សា ស្ទឹម សូណា មានអាងហែលទឹក ស្កាយបារ អាហារសម្រាប់ភ្ញៀវពេលព្រឹក ថ្ងៃត្រង់ និងល្ងាច ព្រមទាំងមានសេវាកម្មមួយចំនួនទៀត ទៅតាមលំដាប់សណ្ឋាគារ ។
លោកបានបន្តថា ចំពោះសណ្ឋាគារទាំងអស់នេះ ខាងមន្ទីរទេសចរណ៍តែងតែចុះបណ្ដុះបណ្ដាលពួកគាត់ ពីវិធីសាស្ត្រទាក់ទាញភ្ញៀវ បម្រើសេវាកម្មជូនភ្ញៀវ ព្រមទាំងការណែនាំឲ្យមានការទុកដាក់សំរាម ឲ្យបានសមរម្យកុំឲ្យប៉ះពាល់ដល់ភ្ញៀវជាដើម។ លោកបន្តថា បាត់ដំបងមានសណ្ឋាគារ៤៩កន្លែង ផ្ទះភ្ញៀវ៨៥កន្លែង ផ្ទះស្នាក់២កន្លែង ភោជនីយដ្ឋាន និងអាហារដ្ឋាន៦៩កន្លែង រង្គសាល៣កន្លែង ខារ៉ាអូខេ២១កន្លែង ម៉ាស្សា និស្ប៉ា ៧កន្លែង ទីភ្នាក់ងារទេសចរណ៍ ៤កន្លែង និងកីឡាទេសចរណ៍៣កន្លែង។
លោក ផល សម្ផស្ស អ្នកគ្រប់គ្រងសណ្ឋាគារស្កាយផាលេប៊ូតិក ស្ថិតក្នុងក្រុងបាត់ដំបង បានលើកឡើងថា ខេត្តបាត់ដំបង គឺជាខេត្តមួយស៊ីវិល័យ ដោយភ្ញៀវទេសចរណ៍ភាគច្រើន មកជាលក្ខណៈដំណើរកម្សាន្ត ឬបំពេញការងារ ហើយកំណើនភ្ញៀវជាបន្តបន្ទាប់នេះ ពេលខាងមុខស្កាយផាលេសប៊ូតិក ក៏នឹងរៀបចំឲ្យមានសេវាមួយចំនួនទៀត ដែលជាតម្រូវការរបស់ភ្ញៀវ ។
ជាមួយគ្នានេះ ក្រុមអ្នកបម្រើសេវាកម្មជូនភ្ញៀវទេសចរក្នុងខេត្តបាត់ដំបង ក៏បានអំពាវនាវដល់អាជ្ញាធរខេត្ត បន្តពង្រីកសន្តិសុខខេត្តឲ្យកាន់តែល្អប្រសើរ ដើម្បីជាប្រយោជន៍ដល់ការកើនឡើងនៃភ្ញៀវទេសចរមកលេងកម្សាន្ត មកស្នាក់នៅខេត្តបាត់ដំបងកាន់តែច្រើនឡើង។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា ខេត្តបាត់ដំបងជាខេត្តមានលក្ខណៈពិសេសមួយ ដោយមានផលិតផលទេសចរណ៍សម្បូរបែបទាំងរមណីយដ្ឋានទេសចរណ៍វប្បធ៌ម ប្រវត្តិសាស្រ្ត និងរមណីយដ្ឋានទេសចរណ៍ធម្មជាតិ ពិសេសនៅក្រុងបាត់ដំបងមានដានប្រវត្តិសាស្រ្តច្រើន ទាំងផ្ទះបុរាណ វត្តអារ៉ាម និងសំណង់សម័ងអាណានិគម ដែលសុទ្ឋតែបានទាក់ទាញភ្ញៀវទេសចរ ពិសេស ភ្ញៀវទេសចរលោកខាងលិច ដែលនិយមទៅទស្សនានៅខេត្តនេះច្រើនជាងទេសចរណ៍ដទៃទៀត។
លោកបន្តថា “ទោះជាយ៉ាងណាគុណភាពនៃសេវាកម្មបដិសណ្ឋារកិច្ច ហាក់នៅមានកម្រិត ដែលទាមទារឲ្យអ្នកវិនិយោគលើវិស័យនេះផ្តោតលើគុណភាព និងពង្រឹងស្តង់ដារបស់ពួកគេបន្ថែមទៀត”៕
