​ដោយគង់ សូរិយា​

​ភ្នំពេញ: ចង់ដឹងឬទេថា តើទិញផ្ទះយ៉ាងដូចម្តេចដើម្បីស្នាក់នៅប្រកប​ដោយភាពសុខដុមរមនា ឬទិញវិនិយោគយកប្រាក់ចំណេញសូមសិក្សាចំណុចសំខាន់ ៗទាំងនេះសិន។

​ឥឡូវនេះវេបសាយPROPERTYAREA.ASIA បានក្លាយជាអ្នកប្រឹក្សាយោ​បល់ជាមួយអ្នកបានហើយ តាមរយៈការបង្ហាញចំណេះដឹង និងវិធីសាស្រ្តសម្បូរបែប និងប្រកបដោយជំនាញច្បាស់លាស់ ដើម្បីអាចឲ្យលោកអ្នក យកទៅអនុវត្ត​ន៍បានមានប្រសិទ្ឋិភាពខ្ពស់។

​ទិញផ្ទះដែលទើបសាងសង់

​ហេតុអ្វី លោកអ្នក ត្រូវទិញផ្ទះទើបនឹងសាងសង់ ព្រោះម្ចាស់គំរោងខ្លះពួកគេ មិនសូវមានទុនច្រើនសម្រាប់បង្វិលទេ។ ទើបផ្ទះពួកគេត្រូវការទុន ដើម្បីសាងសង់គំរោងលំនៅដ្ឋានរបស់ពួកគេ ហេតុនេះដំណាក់កាលតំបូងផ្ទះរបស់ពួកគេមានតំលៃធូរថ្លៃជាងផ្ទះធ្វើរួចហើយ ឬធ្វើជិតរួច។

​ធម្មតាផ្ទះតែងតែឡើងថ្លៃ

​មិនថាតែអ្នកវិនិយោគមានប្រាក់តិច ឬមានប្រាក់ច្រើនទេ តែងតែលក់ផ្ទះរបស់ខ្លួនឡើងថ្លៃ តាមដំណាក់កាលនៅពេលផ្ទះរបស់ ពួកគេសាងសង់បានកាន់​តែច្រើន។ ហេតុនេះការទិញគំរោងតំបូង លោក អ្នកអាចចំណេញចន្លោះពី១០ទៅ២០ភាគរយនៃតំលៃលំនៅដ្ឋានរបស់ខ្លួន។

​ទិញផ្ទះដែលអ្នកស្រលាញ់

​ធម្មតាផ្ទះដែលអ្នកស្រលាញ់ ក៏អាចអ្នកដទៃស្រលាញ់ ព្រោះជាផ្ទះអាចប្រកបអាជីវកម្មបាន ឬជាផ្ទះដែលស្ថិតនៅទីតាំងមិនសូវអ៊ូអរ ដែលជាការនិយម​របស់មនុស្សដែលនិយមភាពស្ងប់ស្ងាត់ និងមិនមានបំណងចង់ធ្វើអាជីវកម្មអ្វីមួយ។

​គិតពីហុងស៊ុយ

​ជំនឿហុង ស៊ុយមានសារៈសំខាន់ណាស់ ក្នុងផ្នត់គំនិតជនជាតិចិន និងជន​ជាតិខ្មែរផងដែរ ព្រោះផ្ទះបែរមុខទៅទិសខាងលិច ជាផ្ទះមិនសូវមានការពេញនិយមទេ។ ពិសេសផ្ទះលែងមានលូនៅចំពីមុខ ឬពីចំហៀង មិនសូវទទួលបាន​ការចាប់អារម្មណ៍ពីអ្នកទិញឡើយ ព្រោះពួកគេមានជំនឿថា មិនសូវមានសិរីសួស្តី និងសុខមាលភាពក្នុងការរស់នៅ។

​ទិញផ្ទះអាចរកស៊ីបាន

​តាមធម្មតាផ្ទះនៅខាងមុខ អាចរកស៊ីបានតែងមានតំលៃខ្ពស់ជាងគេបន្តិច ប៉ុន្តែក៏ជាផ្ទះឡើងថ្លៃលឿនជាងគេ និងចំណេញច្រើនជាងគេផងដែរ ព្រោះផ្ទះប្រកបអាជីវកម្មបាន ជាប្រភេទផ្ទះដែលមានមនុស្សច្រើនឆ្លងកាត់ និងងាយទទួ​ល​បានការចាប់អារម្មណ៍។

​កេរ្ត៍ឈ្មោះបុរី ឬគុណភាពសំណង់

​អ្នកត្រូវប្រាកដថា បុរីដែលអ្នកបានទិញជាបុរីមិនមានបញ្ហា និងតែងតែផ្តល់ទំនុកចិត្តដល់អតិថិជន លើគុណភាពសំណង់របស់ផ្ទះនិមួយៗ ព្រោះការទិញផ្ទះឬគំរោងលំនៅដ្ឋាន ដែលមិនបានគិតគូរម៉ត់ចត់ពីគុណភាពសំណង់ ធ្វើឲ្យអ្នកត្រូវជួបផលវិបាកជាច្រើន លើការជួសជុលមិនចេះចប់មិនចេះហើយ និងពិបាកក្នុងការលក់ ឬស្វែងរកអតិថិជនផងដែរ ប្រសិ​នជាទិញប៉ះចំលំនៅដ្ឋានបែបនេះ៕

ដោយ លាងគង់

       ភ្នំពេញ៖ ខុនដូជាផ្នែកថ្មីមួយ ដែលស្ថិតនៅក្នុងវិស័យអចលនទ្រព្យកម្ពុជា និយាយពី​ខុនដូ គេតែងនឹកឃើញដល់អាគារខ្ពស់ៗ ដែលកំពុងលេចវត្តមាននៅទីក្រុងភ្នំពេ​ញ និងខេត្តព្រះសីហនុ។

ហេតុអីបានជាអ្នកវិនិយោគជាតិ និងអន្តរជាតិវិនិយោគលើខុនដូ ដែលជា អាគារសហកម្មសិទ្ធច្រើន? លោកឧកញ៉ា សៀ រិទ្ធី អគ្គនាយកក្រុមហ៊ុន World Bridge Group ដែលបាននិងកំពុងសាងសង់ខុនដូ THe Bridge, The PeAk តំលៃជិត១០០០លានដុល្លារអាមេរិកបានថ្លែងថា មុនសម្រេចចិត្តសាងសង់ខុនដូ តំបូង​គេត្រូវគិតពីទីតាំង ព្រោះទីតាំងមានសារៈសំខាន់ណាស់ ដើម្បីកំណត់ភាពជោគ ជ័យរបស់ក្រុមហ៊ុនណាមួយ។

ចំណុចមួយទៀត គេត្រូវសិក្សាទីផ្សារឲ្យបានច្បាស់លាស់ ដើម្បីកំណត់ថាអ្នកណាជាអតិថិជនរបស់ខ្លួន និងចំណុចចុងក្រោយ គឺនិយាយពីមូលធនថវិកា និងគុណភាពសំណង់។

លោកបន្តថា គំរោងដែលខ្ញុំធ្វើមិនដែលបរាជ័យទេ បើមិនជោគជ័យខ្ញុំមិនធ្វើនោះទេ”។

នេះជាពាក្យសម្តីប្រកបដោយភាពជឿជាក់ និងមានមូលដ្ឋានគ្រប់គ្រាន់សំ​រាប់ការអះអាងបែបនេះ ដោយលោកឧកញ៉ាបានបញ្ជាក់ថា ខុនដូរបស់លោកគឺ​លក់ lifestyle មិនមែនលក់បន្ទប់គេង និងគ្រែដេកមួយមុខទេ ព្រោះអ្នកទិញខុនដូ​ភាគច្រើនជាអ្នកធ្លាប់ចេញទៅរស់នៅបរទេស ឬធ្លាប់ទៅកំសាន្តនៅបរទេស ហេតុនេះ ពួកគេនឹងពីការរស់នៅខុនដូមានសភាពដូចម្តេច។ លោកបន្តថា អ្នក​ស្នាក់នៅខុនដូចង់បានអ្វីដែលងាយស្រួល និងអាចរកបាននៅកន្លែងតែមួយ គឺOne Stock Service ដូចជា ពួកគេមានផ្សារទំនើប មានមន្ទីរសម្រាកព្យាបាល មានហាងថែររក្សាសម្រស់ មានភោជនីយដ្ឋាន មានសេវាកម្មមេធាវីនៅលើអាគារដែល​ពួកគេរស់នៅជាដើម។

លោកឧកញ៉ាសៀ រិទ្ឋីបានបញ្ជាក់ថា “នេះជាអ្វីដែលពួកគេចង់បាន ហើយជាអ្វីដែលអ្នកវិនិយោគខុនដូត្រូវគិតគូ ព្រោះនៅលើពិភពលោកបច្ចុប្បន្ន គេវិនិយោគលើភាពចម្រុះបែបនេះ”។លោកបន្តថា “ប្រសិនជាមានដីត្រឹមទំហំ២០គុណ​នឹង៣០ម៉ែត្រ ហើយសាងសង់ខុនដូលក់ ខ្ញុំមិនលើកទឹកចិត្តឲ្យធ្វើទេ ព្រោះបើសា​ងសង់តែបន្ទប់គេងលក់ គ្មានអ្នកណាទៅរស់នៅនោះទេ”៕

ដោយ វុត្ថា

ភ្នំពេញ៖ តាមរបាយការណ៍ដ៏គួរឱ្យភ្ជាក់ផ្អើលមួយបានបង្ហាញថា សម្រាប់ឆ្នាំ ២០១៨នេះ ក្រុមអ្នកស្រឡាញ់ភេទដូចគ្នាជាជនជាតិចិន (LGBT) កំពុងតែសម្រុកទៅអចលនទ្រព្យនៅក្នុងប្រទេសថៃ ដោយក្នុងនោះ មាននៅក្នុងទីក្រុងសំខាន់ចំនួន ២ គឺទីក្រុងបាងកក និងទីក្រុងភូកេត ដែលជាគោលដៅទិញអចលនទ្រព្យរបស់ពួកគេ។

យោងតាមការចុះផ្សាយរបស់សារព័ត៌មាន Bangkok Post បានដកស្រង់គេហទំព័ររបស់ក្រុមហ៊ុនអចលនទ្រព្យអន្តជាតិរបស់ចិនដ៏ល្បីមួយឈ្មោះថា Juwai.com ឱ្យដឹងថា ភាគច្រើននៃការទិញរបស់គេគឺទិញខុនដូរសម្រាប់រស់នៅ និងវិនិយោគបន្ត ។

លោក Carrie Law ប្រធាននាយកប្រតិបត្តិគេហទំពរ័ Juwai.com បានអោយដឹងថា ក្រុមស្រឡាញ់ភេទដូចគ្នាជនជាតិចិន ដែលបានសួរមានប្រមាណជា ៥ ទៅ ៨ភាគរយ បានទិញអចលនទ្រព្យក្នុងទីក្រុងបាកក។ អ្នកទិញអចលនទ្រព្យជាជនជាតិចិន បានចំណាយលុយចំនួនជិត ១ពាន់លានដុល្លារ ក្នុងរយៈពេល ១៨ខែ សម្រាប់ឆ្នាំ ២០១៨នេះ ដោយក្នុងនោះ ៥០ ទៅ ៨០លាន គឺជាលុយរបស់ក្រុមអ្នកស្រឡាញ់ភេទដូចគ្នា។

ឥទ្ធិពលនៃការទិញរបស់ក្រុមអ្នកស្រឡាញ់ភេទដូចគ្នា បានកើនឡើង ៣ដងក្នុងរយៈពេល២ ឆ្នាំចុងក្រោយនេះ មានចំនួនរហូតដល់ ៩៣៨ ពាន់លានដុល្លារចាប់តាំងពីឆ្នាំ ២០១៧ កន្លងមកនេះ ដោយសារចំណូលមធ្យមប្រចាំខែរបស់ក្រុមនេះមានចំនួន ៥ ដងនៃចំណូលមធ្យមរបស់ជាតិ។

លោក Law បញ្ជាក់ទៀតថាចំណូលច្រើនបែបនេះ ដោយសារពួកគេគ្មានកូនចៅសម្រាប់ចំណាយ។ និងដោយសារការរស់នៅក្នុងប្រទេសចិនកមានការលំបាក ទើបពួកគេសម្រុកទិញលំនៅដ្ឋាននៅក្នុងប្រទេសថៃនាពេលនេះ។

ណាមួយប្រទេសថៃហាក់មានភាពអាធ្យាស្រ័យខ្ពស់ចំពោះការក្រុមអ្នកស្រឡាញ់ភេទដូចគ្នាក្នុងតំបន់អាស៊ីអាគ្នេយ៍។
តម្លៃខុនដូនមួយក្នុងប្រទេសថៃដែលមានតម្លៃទាប់បំផុតចាប់ពី ១៣៣,០០០ ដុល្លារសហរដ្ឋអាមេរិក៕

ដោយ ៖ រ៉ាវី

ភ្នំពេញ ៖ ស្របពេលដែលអចលនទ្រព្យក្នុងក្រុងភ្នំពេញឡើងថ្លៃខ្ពស់កាន់តែខ្លាំង បានជំរុញឱ្យតម្លៃដីនៅតំបន់ជាយក្រុងមានសន្ទុះឡើងខ្លាំងផងដែរ។ តួយ៉ាងដូចជាសកម្មភាពពុះដីឡូតិ៍លក់នៅជុំផ្សារអង្គស្នួល កំពុងតែមានសកម្មភាពកញ្ជ្រោលឡើងៗនៅត្រឹមរយៈពេលប៉ុន្មានខែចុងក្រោយនេះ។

លោក សុខ ប៊ុនធឿន ប្រធានផែ្នកលក់នៃគម្រោងអចលនទ្រព្យ និងដីពុះឡូត៍នៅមុខផ្សារអង្គស្នួលបានឱ្យដឹងថា ដោយសារផ្សារអង្គស្នួលក្នុងស្រុកអង្គស្នួល ខេត្តកណ្តាល ជាទីប្រជុំជនធំមួយនៅជាប់ផ្លូវជាតិលេខ៤ បានធ្វើឱ្យអតិថិជនចូលទៅបណ្តាក់ទុនរកស៊ីកាន់តែច្រើនឡើងៗ ហើយរោងចក្រវាយណភ័ណ្ឌ ក៍បានពង្រាយខ្លួននៅទីនោះច្រើនឡើងដែរ ដែលធ្វើឱ្យតម្លៃដីនៅទីនោះហក់ឡើងខ្ពស់ខ្លាំង នៅរយៈពេលចុងក្រោយនេះ។

លោកថា តម្លៃដីក្នុងមួយឡូតិ៍ ៥ម៉ែត្រគុណនឹង២០ម៉ែត្រ នៅមុខក៍ដូចជានៅក្រោយផ្សារអង្គស្នួល កាលពីឆ្នាំមុន មានតម្លៃចន្លោះពី២០០០ដុល្លារទៅ៣០០០ដុល្លារប៉ុណ្ណោះ ប៉ុន្តែស្របពេលដែលរោងចក្រពង្រីកខ្លួនកាន់តែច្រើនទីនោះ បានធ្វើឡើយតម្លៃដីកើនឡើងទ្វេរដង ក្នុងមួយឡូតិ៍តម្លៃដល់ទៅជាង៦០០០ដុល្លារ។ ហើយថាគម្រោងពុះដីឡូតិ៍ទំហុំ២ទៅ៣ហិកតា គេពុះលក់ត្រឹមតែជាង១ខែទៅ២ខែ នឹងលក់អស់មិនខា។

សម្រាប់ក្រុមហ៊ុនរបស់លោក ដោយសារពុះដីឡូត៌លក់នៅចំពីមុខរោងចក្រកាត់ដេរ មានស្រាប់និងកំពុងសាងសង់សន្ថែម ហើយមានក្រុមហ៊ុនសាងសង់ផ្ទះល្វែងលក់ផងនោះ បានធ្វើឱ្យដីឡូតិ៍ទីនោះលក់ដាច់ខ្លាំង គ្រាន់តែអតិថិជនទៅឃើញទីតាំងកក់លុយទិញតែម្តង។  លោកថាលោកមានបំណងចង់ពុះដីឡូតិ៍បន្ថែមទៀត ប៉ុន្តែបច្ចុប្បន្នប្រជាជនលក់ឡើងថ្លៃ១គុណនឹង២ ទើបធ្វើឱ្យក្រុមហ៊ុនរារែក ក្នុងការទិញដីពង្រីកបន្ថែម។

លោកថា អ្វីដែលធ្វើអតិថិជនទទួលបានចំណេញភ្លាមៗ ពីការទិញដីឡូតិ៍គឺដោយសារតែអតិថិជនអាចសាងសង់ផ្ទះល្វែងលើដីនោះ សម្រាប់រស់នៅផ្ទាល់ខ្លួនក៍បាន សម្រាប់លក់ឬជួលក៍បាន ដោយសារនៅពេលមានរោងចក្រសង់ថ្មីរួចរាល់ប្រាកដជាមានមនុស្សនៅច្រើន ដីឡើងថ្លៃលឿន។

ជាមួយគ្នានេះ លោក លឹម ចាន់សុភី ប្រធានមន្ទីរដែនដី នគរូបនីយកម្ម និងសូរិយោដីខេត្តកណ្តាលមានប្រសាសន៍ទទួលស្គាល់ថា សកម្មភាពពុះដីឡូតិ៍លក់តំបន់នោះ ពិតជាមានការកើនឡើងមែន ដោយមន្ទីរទទួលបានសំណើពុះដីឡូតិ៍លក់ កើនឡើងគួរឱ្យកត់សម្គាល់។ លោកអះអាងថា ធម្មតាទីប្រជុំជននៅពេលមានមនុស្សរស់នៅកាន់តែច្រើនឡើងៗ និងមានការអភិវឌ្ឍន៍វិស័យផ្សេងៗ ដូចជាសំណង់ និងវិស័យវាយណភណ្ឌកើនឡើង ប្រាកដជាធ្វើឱ្យតម្លៃដីមានការកើនឡើងមិនខាន៕