តម្លៃហាងឆេងមាសបានងើបឡើងថ្លៃនៅថ្ងៃព្រហស្បតិ៍នេះ

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃវិញក្នុងការជួញដូរនៅព្រឹកថ្ងៃព្រហស្បតិ៍នេះ ក្រោយពេលតម្លៃមាសប្រភេទ Spot Gold បានធ្លាក់ចុះមកនៅត្រឹមទំហំទឹកប្រាក់ចំនួន៣២៧៤,៧៤ដុល្លារអាមេរិកក្នុងមួយអោនគិតត្រឹមពេលបិទការជួញដូរកាលពីថ្ងៃពុធម្សិលមិញ។

តួយ៉ាង តម្លៃមាស Spot Gold បានងើបឡើង០,៦៤ភាគរយដល់៣២៩៥,៧៧ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,១៤ភាគរយមកនៅត្រឹម៣២៩១,៣០ដុល្លារក្នុងមួយអោនគិតត្រឹមម៉ោង១០:២៩នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៥៦,៨ភាគរយ ដែលធនាគារកណ្តាលអាមេរិក (Fed) នឹងបន្តរក្សាទុកអត្រាការប្រាក់ឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៧ ខែកញ្ញាខាងមុខ។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៩,៨៤ពិន្ទុនៅព្រឹកថ្ងៃព្រហស្បតិ៍នេះ បន្ទាប់ពីបានបិទការជួញដូរត្រឹម៩៩,៨២ពិន្ទុកាលពីថ្ងៃពុធម្សិលមិញ៕

លោកឧកញ៉ាបណ្ឌិតគីម ហ៊ាងលើកឡើងពីសក្តានុពលអចលនទ្រព្យនៅជុំវិញព្រលានយន្តហោះអន្តរជាតិតេជោ

ដោយៈ ស៊ីវ ម៉េង

ភ្នំពេញៈ បើទោះបីព្រលានយន្តហោះបើកដំណើរការក្តី ប៉ុន្តែតម្លៃដីធ្លីនៅជុំវិញតំបន់នេះ នឹងមិនឡើងថ្លៃទេ តែសកម្មភាពទិញលក់មានច្រើនជាងមុន។ នេះបើតាមការបញ្ជាក់របស់លោកឧកញ៉ាបណ្ឌិតគីម ហ៊ាងអ្នកជំនាញ និងជាស្ថាបនិកបុរីវិមានសំណាង។

លោកឧកញ៉ាបានមានប្រសាសន៍ឲ្យដឹង កាលពីល្ងាចថ្ងៃទី៥ មិថុនាថា សកម្មភាពទិញ លក់នឹងកើនឡើង ប៉ុន្តែដីធ្លីមិនទាន់ឡើងថ្លៃទេ តែតាមបទពិសោធន៍ តម្លៃដីធ្លីជុំវិញព្រលានយន្តហោះអន្តរជាតិតេជោ និងគំរោងព្រែកជីកហ្វូណនតេជោ កំពុងសាងសង់ដីអាចនឹងឡើងថ្លៃ ប៉ុន្តែការពិត តម្លៃដីបានកើនឡើងកាលពីមួយឆ្នាំមុន។ ចំណែកព្រលានយន្តហោះថ្មី ពីមុនអាចលក់មិនបាន ប៉ុន្តែនៅពេលព្រលានបើកដំណើរការ អាចលក់ចេញបាន នៅពេលមានតម្រូវការពិតប្រាកដ។

លោកឧកញ៉ាបណ្ឌិតបានបន្តថា តាមបទពិសោធន៍របស់លោក នៅពេលអ្នកវិនិយោគខ្មែរ និងបរទេស មុនសម្រេចចិត្តទិញដីចាប់ពី១លានដុល្លារឡើង ពួកគេបានជួលក្រុមហ៊ុនចុះវាយតម្លៃ ដែលមានទិន្នន័យច្បាស់លាស់ ពួកគេអាចសម្រេចចិត្តទិញ ដោយគ្រាន់តែចំណាយលើថ្លៃសេវាកម្មចន្លោះពី៥០០ ទៅ១០០០ដុល្លារ។

លោកឧកញ៉ាបណ្ឌិតគីម ហ៊ាងបានបន្តថា “អ្នកវិនិយោគ ពួកគេហ៊ានចំណាយតម្លៃខាងលើ ដើម្បីមានមូលដ្ឋានសម្រេចចិត្ត ច្បាស់លាស់ មុនសម្រេចចិត្តទិញ”។

លោកបន្តទៀតថា “អ្នកទិញដី ចំណេញលឿន លក់ចេញលឿន ប៉ុន្តែអ្នកទិញហើយលោភលន់ ពួកគេអាចជាប់គាំងក្នុងរឿងដីធ្លី”។ លោកបន្ថែមថា “ប៉ុន្តែបើអ្នកទិញយកចំណេញលឿន លក់ចេញលឿន ពួកគេនឹងមិនប្រឈមការជាប់គាំងនោះទេ”៕

ការវិនិយោគអចលនទ្រព្យលើពិភពលោកនឹងសម្រេចបានទំហំទឹកប្រាក់៩៥២ពាន់លានដុល្លារក្នុងឆ្នាំ២០២៥នេះ

ដោយ: គង់ លាងហួរ
អន្តរជាតិ: យោងតាមក្រុមហ៊ុនប្រឹក្សាយោបល់អចលនទ្រព្យ Savills បានព្យាករណ៍ថា ការវិនិយោគអចលនទ្រព្យសរុបទូទាំងពិភពលោកនឹងសម្រេចបានទំហំទឹកប្រាក់ចំនួន៩៥២ពាន់លានដុល្លារក្នុងឆ្នាំ២០២៥នេះ ហក់ឡើង២៧ភាគរយធៀបនឹងឆ្នាំ២០២៤។

ទីផ្សារលំនៅដ្ឋាន ដូចជា លំនៅដ្ឋានរបស់សិស្ស-និស្សិត និងលំនៅដ្ឋានសម្រាប់មនុស្សចាស់ នៅតែទទួលបានការវិនិយោគច្រើនបំផុតនៅទូទាំងពិភពលោក។ ទំហំនៃការវិនិយោគលើប្រភេទលំនៅដ្ឋានទាំងនេះនៅសហរដ្ឋអាមេរិកបានកើនឡើងដល់លើស២២ពាន់លានដុល្លារកាលពីត្រីមាសទី១។

ទីផ្សារអចលនទ្រព្យពាណិជ្ជកម្មកំពុងងើបឡើងវិញ។ ទោះជាយ៉ាងណា តម្រូវការការិយាល័យនៅតែមានស្ថានភាពយឺត។ ប៉ុន្តែ តម្រូវការអចលនទ្រព្យផ្នែកឧស្សាហកម្មនៅតែមានសភាពរឹងមាំ។ ការវិនិយោគលើលំនៅដ្ឋាន និងសណ្ឋាគារនៅតំបន់អឺរ៉ុបបានកើនឡើង ខណៈសកម្មភាពជួលការិយាល័យបានបន្តធ្លាក់ចុះ។

នៅត្រីមាសទី១ ឆ្នាំ២០២៥ ទំហំនៃការវិនិយោគអចលនទ្រព្យសរុបនៅតំបន់អាសុីប៉ាសុីហ្វិកបានដាំក្បាលចុះ៤៥ភាគរយបើប្រៀបធៀបនឹងត្រីមាសទី៤ ឆ្នាំ២០២៤។ លំហូរមូលធនបរទេសបានគ្របដណ្តប់ចំណែក៣១ភាគរយនៃការវិនិយោគសរុប ខណៈវិនិយោគិនបរទេសភាគច្រើនមានប្រភពមកពីតំបន់អាមេរិកខាងជើង។

ទីក្រុងឌូបៃនៃប្រទេសអេមីរ៉ាត់អារ៉ាប់រួមបានសម្រេចកិច្ចព្រមព្រៀងអចលនទ្រព្យ ដែលមានតម្លៃសរុបចំនួន១១៧ពាន់លានដុល្លារអាមេរិកក្នុងឆមាសទី១ ឆ្នាំ២០២៥ ដោយសារការកែទម្រង់គោលនយោបាយទិដ្ឋាការ និងការលើកទឹកចិត្តចំពោះកម្មសិទ្ធិបរទេស៕ប្រភព: PwC & Savills៕

កាសែតអន្តរជាតិឯករាជ្យចុះផ្សាយថា បទឈប់បាញ់រវាងកម្ពុជា និងថៃនៅតែរក្សាបានជាធរមាន ទោះជាមានការចោទប្រកាន់

ដោយ: គង់ លាងហួរ
ភ្នំពេញ: កាសែតបរទេសឯករាជ្យនានាបានចុះផ្សាយនូវការបដិសេធរបស់ភាគីកម្ពុជាចំពោះភាគីថៃ ដែលបានចោទប្រកាន់ថា កម្ពុជាបានរំលោភបទឈប់បាញ់ ដែលត្រូវបានឯកភាពគ្នា ក្រោមការសម្របសម្រួលដោយសហរដ្ឋអាមេរិក ប្រទេសម៉ាឡេសុី និងប្រទេសចិន។

កាសែត Reuters បានរាយការណ៍ថា ខណៈពេលដែលប្រទេសថៃបានចោទប្រកាន់កម្ពុជាពីការរំលោភលើបទឈប់បាញ់ កម្ពុជាបានបដិសេធការចោទប្រកាន់នេះ ដោយអះអាងថា កងទ័ពរបស់ខ្លួនបានគោរពយ៉ាងម៉ឺងម៉ាត់ចំពោះបទឈប់បាញ់។

កាសែត Reuters បានកត់សម្គាល់ថាបទឈប់បាញ់នៅតែត្រូវបានគោរពជាផ្លូវការ បន្ទាប់ពីមានអន្តរាគមន៍ការទូត ដោយកម្ពុជាបានច្រានចោលការចោទប្រកាន់របស់ភាគីថៃអំពីការរំលោភបទឈប់បាញ់ និងបញ្ជាក់ពីការអនុលោមតាមច្បាប់ពេញលេញ។

កាសែត The Guardian ក៏បានបញ្ជាក់ថា កម្ពុជាបានច្រានចោលការចោទប្រកាន់នេះ ដោយកម្ពុជាអះអាងថា ខ្លួនបានគោរពតាមកិច្ចព្រមព្រៀងនេះ។ បទឈប់បាញ់ត្រូវបានគេចាត់ទុកថា មានភាពផុយស្រួយ។ ទោះជាយ៉ាងណា បទឈប់បាញ់នៅតែអាចរក្សាបានជាធរមាន មកទល់ពេលនេះ។

យោងតាមសារព័ត៌មាន AP បានចុះផ្សាយថា ខណៈបទឈប់បាញ់ត្រូវបានសាកល្បង ហើយប្រទេសថៃបានធ្វើការចោទប្រកាន់ ភាគីទាំង២ បានឯកភាពផ្អាកការចល័តទ័ព និងបញ្ចៀសការកើនឡើងកំដៅនៃភាពតានតឹង។

លោក Sean O’Neill បេក្ខភាពឯកអគ្គរដ្ឋទូតអាមេរិកប្រចាំនៅប្រទេសថៃបានអះអាងថា ជម្លោះព្រំដែនរវាងថៃជាមួយកម្ពុជានាពេលថ្មីៗនេះ មិនមានផលប្រយោជន៍សម្រាប់ប្រជាជនថៃ ឬសម្ព័ន្ធភាពរបស់ប្រទេសថៃជាមួយសហរដ្ឋអាមេរិកនោះទេ។

លោក Sean O’Neill បានលើកឡើងបែបនេះក្នុងព្រឹទ្ធសភាអាមេរិក នៅពេលលោកត្រូវបានគេសាកសួរអំពីការប្រយុទ្ធគ្នាអស់រយៈពេល៥ថ្ងៃរវាងប្រទេសថៃ និងកម្ពុជា។

នៅពេលសាកសួរថា តើលោកនឹងធ្វើដូចម្តេចដើម្បីធានាថា បទឈប់បាញ់នឹងក្លាយជាកិច្ចព្រមព្រៀងសន្តិភាពរយៈពេលវែង លោក O’Neill បានអះអាងថា “ខ្ញុំគិតថា រឿងដំបូងដែលខ្ញុំនឹងធ្វើ គឺខ្ញុំចង្អុលប្រាប់ទៅកាន់ថៃ ដែលជាសម្ព័ន្ធមិត្តរបស់យើងនៅតំបន់អាស៊ីថា សង្រ្គាមបែបនេះ ជម្លោះបែបនេះ មិនមានផលប្រយោជន៍សម្រាប់ប្រជាជនថៃនោះទេ”៕ប្រភព: CNA & The Guardian & Reuters & AP៕

ការដាំក្បាលចុះនៃប្រាក់យ៉េនជំរុញឱ្យទុនវិនិយោគអចលនទ្រព្យ និងភ្ញៀវទេសចរណ៍បរទេសសម្រុកហូរចូលប្រទេសជប៉ុន

ដោយ: គង់ លាងហួរ
អន្តរជាតិ: ប្រទេសជប៉ុនបានឈានចូលដល់ដំណាក់កាលនៃការផ្លាស់ប្តូរយ៉ាងសុីជម្រៅ។ អត្រាអតិផរណានៅក្នុងប្រទេសជប៉ុនបានងើបឡើងវិញ ខណៈទំនាក់ទំនងរវាងទីក្រុងតូក្យូជាមួយសហរដ្ឋអាមេរិកបានធ្លាក់ចុះយ៉ាងគំហុក។

លើសពីនេះ ប្រទេសជប៉ុនប្រឈមមុខនឹងហានិភ័យនយោបាយ បន្ទាប់ពីគណបក្សប្រជាធិបតេយ្យសេរី ដែលកំពុងកាន់អំណាច និងគណបក្ស Komeito ដែលជាដៃគូសម្ព័ន្ធយុវជនបានបាត់បង់សំឡេងភាគច្រើននៅសភាជាន់ខ្ពស់ក្នុងការបោះឆ្នោតកាលពីថ្ងៃទី២០ ខែកក្កដា។

តម្លៃប្រាក់យ៉េនរបស់ប្រទេសជប៉ុនបានដាំក្បាលចុះ២៨ភាគរយធៀបនឹងប្រាក់ដុល្លារអាមេរិកគិតចាប់តាំងពីខែមីនា ឆ្នាំ២០២២។ ការណ៍នេះបានជំរុញឱ្យអតិផរណាលើតម្លៃទំនិញនៅក្នុងប្រទេសជប៉ុនមានការកើនឡើង។

ប៉ុន្តែ ស្របពេលជាមួយគ្នានេះ ការដាំក្បាលចុះនៃតម្លៃប្រាក់យ៉េនបានធ្វើឱ្យភ្ញៀវទេសចរណ៍បរទេសហូរចូលមកកាន់ប្រទេសជប៉ុនកាន់តែច្រើន និងធ្វើឱ្យវិស័យអចលនទ្រព្យជប៉ុនមានភាពរីកចម្រើន។ ទីផ្សារអចលនទ្រព្យពាណិជ្ជកម្មនៅប្រទេសនេះបានគ្របដណ្តប់នូវចំណែកជាង១ភាគ៣នៃការវិនិយោគសរុបក្នុងតំបន់អាសុីប៉ាសុីហ្វិកនៅត្រីមាសទី១។

លើសពីនេះ តម្លៃជួលការិយាល័យកម្រិត A នៅក្នុងទីក្រុងតូក្យូ បានកើនឡើងក្នុងល្បឿនលឿនបំផុត ក្នុងចំណោមបណ្តាទីក្រុងផ្សេងទៀតនៅក្នុងតំបន់អាស៊ីប៉ាស៊ីហ្វិកកាលពីត្រីមាសទី២ ខណៈតម្លៃជួលអាផាតមុិននៅក្នុងទីក្រុងតូក្យូក៏បានកើនឡើងផងដែរ៕ប្រភព: SCMP៕

សហព័ន្ឋធុរកិច្ចសឹង្ហបុរីចាប់អារ្មណ៍លើការវិនិយោគនៅកម្ពុជា

ដោយៈ ម៉ាណា

ភ្នំពេញៈ រដ្ឋមន្រ្តីក្រសួងពាណិជ្ជកម្ម លោកជំទាវ ចម និម្មល បានអនុញ្ញាតជូនលោក Soo Wei Chieh នាយកប្រតិបត្តិផ្នែកធុរកិច្ចអន្តរជាតិ និងជាប្រធានគណៈប្រតិភូសហព័ន្ធធុរកិច្ចសិង្ហបុរី (Singapore Business Federation) និងសហការី ចូលជួបសម្តែងការគួរសម និងពិភាក្សាការងារ។

ក្នុងឱកាសនោះ លោកជំទាវរដ្ឋមន្រ្តី បានសម្តែងការស្វាគមន៍ និងថ្លែងអំណរគុណជូន លោក Soo Wei Chieh និងគណៈប្រតិភូសហព័ន្ធធុរកិច្ចសឹង្ហបុរី ដែលបានចូលជួបពិភាក្សាការងារ និងបង្ហាញពីចំណាប់អារម្មណ៍ លើការធ្វើធុរកិច្ចនិងវិនិយោគនៅកម្ពុជា។

ជាមួយគ្នានោះ លោកជំទាវរដ្ឋមន្រ្តី បានជម្រាបជូនអំពីកិច្ចខិតខំប្រឹងប្រែងរបស់រាជរដ្ឋាភិបាល ជាពិសេសក្រសួងពាណិជ្ជកម្មក្នុងនាមជាសេនាធិការបស់រាជរដ្ឋាភិបាល ក្នុងការបន្តធ្វើឱ្យប្រសើរទ្បើងនូវបរិយាកាសធុរកិច្ចនិងវិនិយោគ កិច្ចសម្រួលពាណិជ្ជកម្ម ការធ្វើពិពិធកម្មសេដ្ឋកិច្ច បង្កើនភាពប្រកួតប្រជែង និងការបន្តពង្រឹងទីផ្សារដែលមានស្រាប់ ពង្រីកនិងបង្កើតទីផ្សារថ្មី។

ជាការឆ្លើយតប លោក Soo Wei Chieh ប្រធានគណៈប្រតិភូសហព័ន្ធធុរកិច្ចសឹង្ហបុរី បានគោរពថ្លែងអំណរគុណយ៉ាងជ្រាលជ្រៅជូនលោកជំទាវរដ្ឋមន្រ្តី ដែលបានផ្តល់ឱកាសដ៏មានតម្លៃ ដើម្បីបានចូលជួបណែនាំសមាសភាពគណៈប្រតិភូ និងជម្រាបជូនអំពីទស្សនវិស័យនិងចំណាប់អារម្មណ៍ ក្នុងការមកធ្វើធុរកិច្ច និងវិនិយោគនៅកម្ពុជា។

លោក Soo Wei Chieh បានវាយតម្លៃខ្ពស់លើកិច្ចប្រឹងប្រែងរបស់រាជរដ្ឋាភិបាល ក្នុងការបន្តលើកស្ទួយតួនាទីដ៏សំខាន់ របស់វិស័យឯកជន ក្នុងការរុញច្រានកំណើនសេដ្ឋកិច្ច ជាពិសេសការបន្តគាំទ្រដល់ការធ្វើធុរកិច្ច និងវិនិយោគឱ្យកាន់តែប្រសើរទ្បើង តាមរយៈការផ្តល់ការលើកទឹកចិត្តរបស់រាជរដ្ឋាភិបាល និងការដាក់ចេញនូវគំនិតផ្តួចផ្តើមថ្មីៗដទៃទៀត។

លោកជំទាវរដ្ឋមន្រ្តី បានបញ្ជាក់ជូនជាថ្មីនូវ ការប្តេជ្ញាចិត្តរបស់ក្រសួងពាណិជ្ជកម្ម ក្នុងការបន្តសម្របសម្រួល និងគាំទ្រដល់ធុរកិច្ចនិងវិនិយោគិនសិង្ហបុរីនៅកម្ពុជា៕

ការសិក្សា: តើទីក្រុងធំៗចំនួន៥នៅសហរដ្ឋអាមេរិកមានតម្លៃលំនៅដ្ឋានប៉ុន្មានក្នុងមួយយូនីត?

ដោយ: គង់ លាងហួរ
អន្តរជាតិ: ការរស់នៅក្នុងទីក្រុងដ៏មានសភាពអ៊ូអរ និងរស់រវើកនៅសហរដ្ឋអាមេរិក ដែលពោរពេញទៅដោយឱកាសជាច្រើនក្នុងការកសាងជីវិត ជាក្តីសុបិនសម្រាប់មនុស្សជាច្រើន។ប៉ុន្តែ តម្លៃលំនៅដ្ឋាននៅតាមទីក្រុងទាំងនោះមានតម្លៃខ្ពស់កប់ពពក។

ខាងក្រោមនេះជាទីក្រុងធំៗចំនួន៥ នៅសហរដ្ឋអាមេរិក ដែលមានតម្លៃលំនៅដ្ឋានថ្លៃកប់ពពក :

ទី១: ទីក្រុង Boston រដ្ឋ Massachusetts

ជាមធ្យម ដើម្បីទិញអចលនទ្រព្យលំនៅដ្ឋាននៅទីក្រុង Boston គេត្រូវចំណាយប្រាក់ចំនួន៧០៣.៦០០ដុល្លារ ខណៈអត្រាភាពគ្មានការងារធ្វើនៅទីក្រុងមួយនេះស្ថុិតក្នុងរង្វង់៣,៩ភាគរយ។ ការជួលលំនៅដ្ឋាននៅទីក្រុង Boston មានតម្លៃប្រហែល៤.០៦៦ដុល្លារក្នុងមួយខែ។

ទី២: ទីក្រុង San Diego រដ្ឋកាលីហ្វ័រញ៉ា

ទីក្រុងនេះមានចំនួនប្រជាជនសរុបជិត១,៤លាននាក់ ហើយប្រាក់ចំណូលគ្រួសារជាមធ្យមមានចំនួន១០៥.៧៨០ដុល្លារ។ លំនៅដ្ឋាននៅក្នុងទីក្រុង San Diego មានតម្លៃជាមធ្យមប្រមាណ៩២៣.៩០០ដុល្លារ។

ទី៣: ទីក្រុងឡូសអេនជឺលេស រដ្ឋកាលីហ្វ័រញ៉ា

ទីក្រុងឡូសអេនជឺលេស សម្បូរទៅដោយលំនៅដ្ឋានរបស់តារាហូលីវូដជាច្រើននាក់ ហើយទីក្រុងនេះមានភាពល្បីល្បាញដោយសារភាពទាក់ទាញ និងរបៀបរស់នៅដ៏សម្បូរបែប។

ប្រាក់ចំណូលគ្រួសារជាមធ្យមនៅទីក្រុងឡូសអេនជឺលេសមានចំនួន៧៩.៧០១ដុល្លារ។ ទីក្រុង Los Angeles មានចំនួនប្រជាជនជិត៤លាននាក់ និងមានតម្លៃផ្ទះជាមធ្យមចំនួន៨២៨.៧០០ដុល្លារ។

ទី៤: សង្កាត់ Manhattan នៅចំកណ្តាលទីក្រុងញូវយ៉ក

សង្កាត់ Manhattan មានចំនួនប្រជាពលរដ្ឋរស់នៅប្រហែល១,៦លាននាក់ និងមានប្រាក់ចំណូលគ្រួសារជាមធ្យមចំនួន១០១.០៧៨ដុល្លារ។ ជាមធ្យម គេត្រូវចំណាយប្រាក់ចំនួន១.០១០.៨០០ដុល្លារអាមេរិកដើម្បីទិញលំនៅដ្ឋាននៅសង្កាត់នេះ។

ទី៥: ទីក្រុង Honolulu កោះហាវ៉ៃ

ទីក្រុងលើកោះដាច់ស្រយាលនេះមានចំនួនប្រជាជនរស់នៅជាង៣៤០.០០០នាក់ និងមានប្រាក់ចំណូលគ្រួសារជាមធ្យមចំនួន៨៤.៩០៧ដុល្លារ។ ទីក្រុង Honolulu មានតម្លៃផ្ទះជាមធ្យមចំនួន៨៣១.៦០០ដុល្លារអាមេរិក៕ប្រភព: livemint៕

តម្លៃអាផាតមុិនជាមធ្យមនៅទីក្រុងសេអ៊ូលហក់ឡើងដល់ជាង១លានដុល្លារក្នុងមួយយូនីតនៅខែកក្កដានេះ

ដោយ: គង់ លាងហួរ
អន្តរជាតិ: តម្លៃអាផាតមុិនជាមធ្យម ដែលត្រូវបានផ្ទេរទៅកាន់អតិថិជននៅក្នុងទីក្រុងសេអ៊ូលរបស់ប្រទេសកូរ៉េខាងត្បូង បានកើនឡើងដល់លើស១,៤ពាន់លានវ៉ុន (ប្រមាណ១,០១លានដុល្លារអាមេរិក)ក្នុងមួយយូនីតជាលើកដំបូងមិនធ្លាប់មាន។

យោងតាមទិន្នន័យដែលបានចងក្រងដោយធនាគារ KB Kookmin បានឱ្យដឹងថា តម្លៃអាផាតមុិនជាមធ្យម ដែលបានលក់ចេញនៅទីក្រុងសេអ៊ូលចាប់តាំងពីដើមខែកក្កដា មានទំហំទឹកប្រាក់ចំនួន១,៤១ពាន់លានវ៉ុន កើនឡើង១,២៨ភាគរយធៀបនឹងឆ្នាំមុន។

ទិន្នន័យបានបង្ហាញទៀតថា តម្លៃអាផាតមុិនជាមធ្យមនៅក្នុងសង្កាត់ទាំង១៤ នៅភាគខាងជើងទីក្រុងសេអ៊ូលមានទំហំទឹកប្រាក់ចំនួន១,០១ពាន់លានវ៉ុន ខណៈតម្លៃអាផាតមុិនជាមធ្យមនៅសង្កាត់ទាំង១១ នៅភាគខាងត្បូងនៃទីក្រុងសេអ៊ូលមានទំហំទឹកប្រាក់ចំនួន១,៧៦ពាន់លានវ៉ុន។

នៅទូទាំងប្រទេសកូរ៉េខាងត្បូង អាផាតមុិនថ្លៃបំផុតមានតម្លៃខ្ពស់ជាងអាផាតមុិនថោកបំផុតចំនួន១២ដង នៅក្នុងខែកក្កដា ឆ្នាំ២០២៥។ តួលេខនេះជាគម្លាតធំបំផុតមិនធ្លាប់មានគិតចាប់តាំងពីខែធ្នូ ឆ្នាំ២០០៨។

ក្នុងន័យនេះ គេប្រៀបធៀបរវាងតម្លៃអាផាតមុិនថ្លៃបំផុត(Most expensive) និងតម្លៃអាផាតមុិនថោកបំផុត(Cheapest)ដើម្បីគណនាគម្លាត។

ដោយឡែក នៅទីក្រុងសេអ៊ូល ដែលជារដ្ឋធានីរបស់ប្រទេសកូរ៉េខាងត្បូង គេសង្កេតឃើញថា ខាងត្បូង អាផាតមុិនថ្លៃបំផុតមានតម្លៃខ្ពស់ជាងអាផាតមុិនថោកបំផុតចំនួន៦,៥ដង នៅក្នុងខែកក្កដា ឆ្នាំ២០២៥៕ប្រភព: Korea Times៕

តើកំលាំងចលករអ្វីខ្លះកំពុងជម្រុញកំណើនសេដ្ឋកិច្ចអាមេរិក នៅឆ្នាំ២០២៥នេះ?

ដោយៈ គង់ សូរិយា

អន្តរជាតិៈ សេដ្ឋកិច្ចអាមេរិកត្រូវបានព្យាករណ៍ថា នឹងមានកំនើនក្នុងល្បឿនតិចតួចនៅឆ្នាំ២០២៥នេះ ដោយទុន្នន័យបានបង្ហាញថា សេដ្ឋកិច្ចប្រទេសនាំមុខគេនេះ មានអត្រាកំណើនប្រហែល 1.4% ទៅ 1.6% សម្រាប់ឆ្នាំ។

តើវិស័យកំណើនសំខាន់ៗ ដែលជំរុញការពង្រីកសេដ្ឋកិច្ចរបស់សហរដ្ឋអាមេរិកនៅឆ្នាំ2025 មានវិស័យអ្វីខ្លះ?

១ បច្ចេកវិទ្យា និងការវិនិយោគអាជីវកម្ម

ម្ចាស់អាជីវកម្មនានា កំពុងពន្លឿនការវិនិយោគលើផ្នែកទន់

ឧបករណ៍ដំណើរការព័ត៌មាន និងR&D ដែលរួមគ្នាគិតជាពាក់កណ្តាលនៃការចំណាយដើមទុនអាជីវកម្ម ហើយបានបន្តរីកចម្រើនលើសពីមុន ជំងឺរាតត្បាតកូវីដ១៩បានមកដល់។

នៅក្នុងឆមាសទី១ឆ្នាំនេះ ការវិនិយោគលើបរិក្ខារបានកើនឡើងសរុប10.3% ដែលត្រូវបានដឹកនាំដោយការកើនឡើង73% នៅក្នុងឧបករណ៍ដំណើរការព័ត៌មាន ដែលរួមចំណែកដល់ការប៉ាន់ស្មាន១ ភាគរយដល់កំណើនGDP។

AI cloud computing និង machine learning គឺជាកត្តាសំខាន់ដែលជំរុញផលិតភាព និងសមត្ថភាពរយៈពេលវែង។

២ ការថែទាំសុខភាព និងវិទ្យាសាស្ត្រជីវិត

ការងារថែទាំសុខភាព និងជំនួយសង្គម និងការចំណាយនៅតែមានទំហំធំ និងធន់ – ការថែទាំសុខភាពមានជិត18% នៃផលិតផលក្នុងស្រុកសរុបក្នុងឆ្នាំ2024 ជាមួយនឹងកំណើនបន្តរំពឹងទុកដោយសារនិន្នាការប្រជាសាស្រ្ត និងការទទួលយកបច្ចេកវិទ្យារីកចម្រើននៅក្នុងវិស័យនេះ។
ការវិនិយោគលើការច្នៃប្រឌិតផ្នែកថែទាំសុខភាព ការវិភាគព្យាករណ៍ និងសុខភាពឌីជីថល កំពុងរួមចំណែកដល់ការបង្កើនការងារ និងផលិតភាព។

៣ សេវាកម្មអចលនទ្រព្យ និងលំនៅឋាន

វិស័យអចលនទ្រព្យ រួមទាំងសេវាកម្មលំនៅដ្ឋាន ដូចជា ការជួល ការវិនិយោគលើលំនៅឋាន និងសកម្មភាពឈ្មួញកណ្តាល មានចំនួន ~13.8% នៃផលិតផលក្នុងស្រុកសរុប ក្នុងឆ្នាំ 2024 ហើយនៅតែជាអ្នករួមចំណែកយ៉ាងសំខាន់នៅឆ្នាំ២០២៥នេះ។

ទោះបីជាការសាងសង់លំនៅឋាន មានការយឺតយ៉ាវដោយសារការខ្ចីប្រាក់ខ្ពស់ក៏ដោយ សេវាកម្មលំនៅដ្ឋាន (ជាពិសេសការជួល) នៅតែបន្តគាំទ្រដល់សន្ទុះសេដ្ឋកិច្ចទាំងមូល។

៤ ហិរញ្ញវត្ថុ និងធានារ៉ាប់រង

តំណាងឱ្យប្រហែល៧ទៅ៨ភាគរយ នៃផលិតផលក្នុងស្រុកសរុប ឧស្សាហកម្មហិរញ្ញវត្ថុ និងធានារ៉ាប់រងគាំទ្រដល់អាជីវកម្ម និងសកម្មភាពគ្រួសារកាន់តែទូលំទូលាយ ហើយការងារក្នុងសេវាកម្មបច្ចេកទេសវិជ្ជាជីវៈត្រូវបានគេរំពឹងថា នឹងកើនឡើងក្នុងរយៈពេលមធ្យម។

៥ សំណង់ និងឧស្សាហកម្ម

ស្របពេលដែលនៅតែតូចជាងដោយចំណែក (~4.5% នៃផលិតផលក្នុងស្រុកសរុប) ការសាងសង់-ជាពិសេសលំនៅដ្ឋាន និងហេដ្ឋារចនាសម្ព័ន្ធស៊ីវិល-ត្រូវបានគេរំពឹងថា នឹងគាំទ្រដល់កំណើនការងារ (~5% រហូតដល់ឆ្នាំ 2033) និងផ្តល់នូវការកើនឡើងកម្រិតមធ្យមនៅឆ្នាំ 2025៕

តម្លៃហាងឆេងមាសបានងើបឡើងថ្លៃនៅថ្ងៃពុធនេះ

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃពុធនេះ ក្រោយពេលតម្លៃមាសប្រភេទ Spot Gold បានជួញដូរក្នុងទំហំទឹកប្រាក់ចំនួន៣៣២៦,៣១ដុល្លារអាមេរិកក្នុងមួយអោនគិតត្រឹមពេលបិទការជួញដូរកាលពីថ្ងៃអង្គារម្សិលមិញ។

តួយ៉ាង តម្លៃមាស Spot Gold បានងើបឡើង០,០៦ភាគរយដល់៣៣២៨,៤២ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានស្ថិតនៅទ្រឹងត្រឹម៣.៣២៤ដុល្លារក្នុងមួយអោនគិតត្រឹមម៉ោង១០:២៦នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៧,៤ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់ឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី៣០ ខែកក្កដានេះ។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម៩៨,៧២ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរត្រឹម៩៨,៨៩ពិន្ទុកាលពីថ្ងៃអង្គារម្សិលមិញ៕

1...299300301...3,377 Page 300 of 3,377