ដោយ គង់ សូរិយា

ភ្នំពេញ៖ អ្នកជំនាញអចលនទ្រព្យកម្ពុជាលោក Ken Lo អគ្គនាយកក្រុមហ៊ុន Century21 Imperial Realty បានសម្តែងសុទិដ្ឋិនិយមថា ទីផ្សារអចលនទ្រព្យកម្ពុជានឹង​បន្តរីកចម្រើននៅរយៈពេល៥ទៅ១០ឆ្នាំទៀត។

លោកបានមានប្រសាសន៍ក្នុងកិច្ចសម្ភាសន៍កាលពីថ្ងៃទី១៨ កក្កដាកន្លងមកថា ទីផ្សារអចលនទ្រព្យនៅប្រទេសកម្ពុជា នឹងបន្តរីកចម្រើនសម្រាប់រយៈពេល៥ទៅ១០ឆ្នាំទៀត ព្រោះកម្ពុជាមានសុខសន្តិភាព ស្ថិរភាពនយោបាយ និងកំនើនសេដ្ឋកិច្ចនៅបន្តមានភាព​រ៉ឹងមាំ ដែលធ្វើឲ្យប្រទេសកម្ពុជា នៅតែជាប្រទេសដែលទាក់ទាញការវិនិយោគ ពិសេ​សអ្នកវិនិយោគមកពីប្រទេសចិន។

លោកបន្តថា “បរិយាកាសវិនិយោគនៅកម្ពុជាកាន់តែប្រសើរឡើង ច្បាប់វិនិយោគ​និងច្បាប់ពន្ឋរបស់កម្ពុជានៅតែមានភាពអនុគ្រោះ និងទាក់ទាញ ដែលធ្វើឲ្យអ្នកវិនិយោគនៅតែមានទំនុកចិត្ត”។លោកបន្តថា “អ្នកវិនិយោគអន្តរជាតិនៅតែមើលឃើញទីផ្សារនេះអាចរកផលចំណេញបាន និងមានឳកាសរីកចម្រើន”។

លោក Ken Lo បានបន្តថា ជាក់ស្តែងកំឡុងការបោះឆ្នោតជ្រើសតាំងតំណាងរាស្រ្តអាណត្តិទី៦នេះ ប្រជាពលរដ្ឋកម្ពុជាពួកគេមិនមានការបារម្ភណាមួយនោះទេ ព្រោះពួកគេសុំានឹងព្រឹត្តិការណ៍នេះហើយថា អ្វីៗនឹងមានភាពល្អប្រសើរ និងមានស្ថិរភាព ហេតុនេះទើបពួកគេបន្តសម្រេចចិត្តវិនិយោគនៅក្នុងទីផ្សារនេះ ជាមួយអ្នកវិនិយោកអន្តរជាតិ។លោកបន្តថា តម្លៃអចលនទ្រព្យ ពិសេសតម្លៃដីបាននិងកំពុងបន្តកើនឡើងនៅស្ទើរគ្រប់ទី​កន្លែង។ លោកបន្តថា នេះជាចំណុចពិសេសមួយ ដែលប្រជាជនកម្ពុជាជឿជាក់លើការដឹកនាំរបស់ប្រមុខរដ្ឋាភិបាល និងស្ថានភាពនយោបាយរបស់កម្ពុជាកាន់តែមានភាពចាស់ទុំជាងមុន។

សម្តេចតេជោហ៊ុន សែននាយករដ្ឋមន្រ្តីកម្ពុជាកាលពីចុងខែឧសភាកន្លងមកនេះបានថ្លែងថា ទីផ្សារអចលនទ្រព្យនៅកម្ពុជានៅតែមានស្ថិរភាព និងមិនធ្លាក់ចុះតម្លៃនោះទេ ហើយវិស័យនេះនៅតែបន្តរីកចម្រើន ខុសពីការបោះឆ្នោតអាណត្តិមុនៗដែលទីផ្សារអចលនទ្រព្យនៅកម្ពុជាដាំក្បាលចុះ៕

ដោយ គង់ សូរិយា

ភ្នំពេញ៖ នៅពេលនិយាយពីអាផាតម៉ិន គេសំដៅដល់ការសាងសង់អាគារ​សម្រាប់ជួល និងប្រើប្រាស់ដោយមនុស្សច្រើន ប៉ុន្តែមានម្ចាស់តែម្នាក់ ខុសពីខុនដូដែលមានម្ចាស់ច្រើន។ ប៉ុន្តែនៅក្នុងវិស័យអាផាតម៉ិន មានការបែងចែកគ្នារវាងសេវាអាផាតម៉ិន និង​អាផាតម៉ិនផងដែរ។

តើសេវាអាផាតម៉ិន និងអាផាតម៉ិនខុសគ្នាដូចម្តេច? អ្នកនាងអាន សុធីតា​នាយិកាប្រចាំប្រទេសនៃក្រុមហ៊ុន CBRE Cambodia បានថ្លែងឲ្យដឹងដូចខាងក្រោមនេះ។

សេវាអាផាតម៉ិន
សេវាអាផាតម៉ិន (Service Apartment )សំដៅដល់អាផាតម៉ិនកម្រិត A ឬ B ដែលអ្នកវិនិយោគ បាន​ផ្តល់សេវាពេញលេញដល់អ្នកជួល ដូចជា អាងហែលទឹក កន្លែងហាត់ប្រាណ ស្ទីម សោណា សន្តិសុខ២៤ម៉ោង អ៊ីនធើណេតល្បឿនលឿនជាដើម។ លើសពីនេះ​សេវាអាផាតម៉ិន ក៏មានភោជនីយដ្ឋាននៅលើអាកាស និងមានមីនីម៉ាតនៅជាន់​ខាងក្រោមផងដែរ។

បច្ចុប្បន្នសេវាអាផាតម៉ិន ដែលមានសេវាកម្មពេញលេញបែបនេះ អាចជួ​ល​បានតម្លៃ២០ដុល្លារ ក្នុងមួយម៉ែត្រការ៉េ។

អាផាតម៉ិនឬអាផាតម៉ិនធម្មតា

អាផាតម៉ិនបែបនេះ មានច្រើនជាងសេវាអាផាតម៉ិន ដោយសារអ្នកអភិវឌ្ឍ​ន៍ពួកគេមានជម្រើសច្រើន និងមិនសូវពិបាកក្នុងការផ្តល់សេវាកម្មច្រើនដល់អតិថិជនរបស់ខ្លួន។ អាផាតម៉ិនធម្មតាបែបនេះ មិនមានអាងហែលទឹក ស្ទីម សោ ណា និងភោជនីយដ្ឋាន ឬមីនីម៉ាតនោះទេ។

អាផាតម៉ិនធម្មតាបែបនេះ អាចជួលបានក្នុងតម្លៃចន្លោះពី១០ ទៅ១៥ដុល្លា​រ​អាមេរិកក្នុងមួយម៉ែត្រការ៉េ៕

ដោយ ដែន ចែងចាំង

ភ្នំពេញ៖ នៅពេលនិយាយពីខុនដូ អ្នកជំនាញនិងអ្នកអភិវឌ្ឍន៍បាននិយាយហាក់ស្រដៀងគ្នាផង និងខុសគ្នាផងទាក់ទងនឹងស្ថានភាពទីផ្សារលំនៅដ្ឋាន បែបសហកម្មសិទ្ឋនេះ ខណៈខុនដូចំនួន២០,០០០យូនីតទៀត នឹងដាក់ចូលក្នុងទីផ្សារនៅដំណាច់ឆ្នាំនេះ។

នដអ្នកជំនាញនិងអ្នកអភិវឌ្ឍន៍បាននិយាយហាក់ស្រដៀងគ្នាផង និងខុសគ្នាផងទាក់ទងនឹងស្ថានភាពទីផ្សារលំនៅដ្ឋាន បែបសហកម្មសិទ្ឋ​នេះ ខណៈខុនដូចំនួន២០,០០០យូនីតទៀត នឹងដាក់ចូលក្នុងទីផ្សារនៅដំណាច់ឆ្នាំនេះ។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៩ កក្កដានេះថា ទីផ្សារខុនដូនៅកម្ពុជានៅតែមានស្ថានភាពល្អប្រសើរ ដោយយើងសង្កេតឃើញតម្រូវការ និងការផ្គត់ផ្គង់មានស្ថិ​រភាពល្អនាពេលបច្ចុប្បន្ន ប៉ុន្តែប្រសិនជាយើងប្រមើលមើលរហូតដល់ឆ្នាំ២០២០ ជាពេល​ដែលការផ្គត់ផ្គង់គំរោងធំៗបានកើតឡើង ជាអ្វីដែលធ្វើឲ្យយើងមានការបារម្ភទាក់ទងគំរោងធំៗខ្លះ ដែលគំរោងខ្លះមានផ្ទះរហូតដល់៥០០០យូនីត។

អ្នកនាងបន្តថា “ការផ្គត់ផ្គង់គម្រោងធំៗបែបនេះ គឺមិនទាន់រួចរាល់សម្រាប់ទីផ្សារក្នុងស្រុកទេ ប៉ុន្តែគំរោងទាំងនោះភាគច្រើនពឹងផ្អែកលើទីផ្សារក្រៅប្រទេស”។អ្នកនាងបន្តថា “បច្ចុប្បន្នទោះជាការលក់ខុនដូកើនឡើងយឺត តែទីផ្សារនៅតែមានស្ថិរភាពល្អប្រសើរ ហើយអ្នកទិញខុនដូបច្ចុប្បន្ន បានងាកទៅកាន់គំរោងដែលជិតបញ្ចប់ការសាងសង់ និងជិត​បញ្ចប់ការសាងសង់”។

មន្រ្តីផ្នែកទីផ្សារជាន់ខ្ពស់នៃក្រុមហ៊ុន R&F Properties លោក RAYSON ដែលបាននិងកំពុងវិនិយោគខុនដូ ជាច្រើនពាន់យូនីតនៅទីក្រុងភ្នំពេញបានថ្លែងឲ្យដឹងកាលពី ពេលថ្មីៗនេះថា កំនើនសេដ្ឋកិច្ចរបស់កម្ពុជា ស្ថិរភាពនយោយបាយ គោលនយោបាយផ្លូវ​សូត្រ និងទំនាក់ទំនងដ៏ល្អរបស់មេដឹកនាំកម្ពុជា ចិនបានធ្វើឲ្យយើងមានទំនុកចិត្តក្នុងការ ឈានចូលមកកាន់ទីផ្សារនេះ។

លោកបន្តថា “គំរោងខុនដូរបស់យើងផ្តោតលើអតិថិជនជនជាតិចិន និងសហគមន៍​ចិនដែលបានវិនិយោគនៅកម្ពុជា និងប្រជាជនកម្ពុជាដែលចង់បានបែបផែនជីវិតស៊ីវិល័យ ហើយរស់នៅសហគមន៍មួយដែលផ្តល់ភាពងាយស្រួលដល់ពួកគេ”។លោកបន្តថា “នៅ​ប្រទេសចិន ក៏ដូចប្រទេសក្នុងតំបន់ផ្សេងទៀត កាលពីមុនពួកគេមិនចង់រស់នៅតាមខុនដូ​ទេ តែនៅពេលបច្ចុប្បន្នប្រជាជនចិនចាប់ផ្តើមចូលចិត្តខុនដូ ហើយប្រជាជនកម្ពុជានឹងមាន​ការផ្លាស់ប្តូរបែបផែន នៃការរស់នៅរបស់ពួកគេនាពេលអនាគតផងដែរ”។

អគ្គនាយកក្រុមហ៊ុន Century21 Mekong លោកច្រឹក សុខនីមបានថ្លែងថា ស្ថានភាពទីផ្សារខុនដូនៅកម្ពុជា នៅតែមានសញ្ញាគួរឲ្យសុទិដ្ឋិនិយម ដោយសារប្រជាជនកម្ពុជាក្នុងរយៈពេល៥ឆ្នាំចុងក្រោយនេះ បានទិញខុនដូរស់នៅកាន់តែច្រើន តែកំនើននេះមិនកើនគំហុកនោះទេ ហេតុនេះទីផ្សារនេះត្រូវការរយៈពេល៥ទៅ១០ឆ្នាំទៀត ទើបកាន់តែ​មានភាពពេញនិយមសម្រាប់ទីផ្សារខុនដូនៅកម្ពុជា។

លោកបន្តថា “ខ្ញុំនៅតែមានសុទិដ្ឋិនិយមពីទីផ្សារខុនដូ ព្រោះវានឹងបន្តរីកចម្រើនក្នុងរយៈពេលវែងខាងមុខ”។

យោងតាមការសិក្សារបស់ក្រុមហ៊ុន Urban living Solution បានព្យាករណ៍ថា ចំនួនប្រជាពលរដ្ឋរស់នៅក្រុងភ្នំពេញ នឹងកើនឡើងដល់៤ទៅ៤,៥លាននាក់នៅឆ្នាំ២០៣០ខាងមុខនេះ ដែលពេលនោះប្រជាជននឹងផ្លាស់ប្តូរផ្នត់គំនិតមករស់នៅតាមខុនដូ​កាន់តែច្រើន ដោយសារស្ថានភាព និងបញ្ហាសង្គមចាប់បង្ខំ ដូចជា ការកើនឡើងនូវការ​កកស្ទះចរាចរណ៍ ការកើនឡើងនូវតម្លៃលំនៅដ្ឋាន និងអចលនទ្រព្យក្នុងទីក្រុង ភាពងាយស្រួលនៃការទទួលបានសេវាកម្មនានា តាមរយៈការរីកចម្រើនបច្ចេកវិទ្យា និងការយល់ដឹងរបស់ប្រជាពលរដ្ឋកាន់តែប្រសើរជាងមុន៕

ដោយ គង់ សូរិយា

ភ្នំពេញ៖ ទុនវិនិយោគក្នុងវិស័យសំណង់ និងអលនទ្រព្យក្នុងរយៈពេល៥ខែដើមឆ្នាំនេះ មានទំហំទឹកប្រាក់១៧៨០លានដុល្លារអាមេរិក និងមានគំរោងវិនិយោគ១៣៧០គំរោង ដែលបានអនុម័តដោយក្រសួងរៀបចំដែនដី នគរូបនីយកម្មនិងសំណង់។

យោងតាមរបាយការណ៍របស់ក្រុមហ៊ុន CBRE Cambodia ដែលបានចេញផ្សាយ​កាលពីពេលថ្មីៗនេះបានឲ្យដឹងថា ជាមួយនឹងគំរោងវិនិយោគដ៏ច្រើននេះ របាយការណ៍​នេះបានកត់សំគាល់ឃើញថា ក្នុងដំណាច់ត្រីមាសទី២ឆ្នាំនេះ ចំនួនខុនដូដែលបានបញ្ចប់ការ​សាងសង់ និងដាក់ចូលក្នុងទីផ្សាររំពឹងនឹងកើនដល់២ម៉ឺនយូនីតនៅដំណាច់ឆ្នាំនេះ។

របាយការណ៍ដដែលបានបង្ហាញថា ជាមួយនឹងកំនើនតម្រូវការ និងការវិនិយោគ​បានធ្វើឲ្យទីផ្សារការិយាល័យ ស្ថិតនៅតាមតំបន់ពាណិជ្ជកម្មមានកំនើន៦ភាគរយ និង៣,៤ភាគរយ សម្រាប់ការិយាល័យលំដាប់B និងការិយាល័យលំដាប់C។ ជាមួយគ្នានេះ ទំហំផ្សារទំនើបបានកើនឡើង៤៣ភាគរយផងដែរ ធៀបនឹងរយៈពេលដូចគ្នាកាលពីឆ្នាំមុន។

អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានថ្លែងឲ្យដឹងតាមទូរស័ព្ទនាព្រឹកថ្ងៃទី១៩ កក្កដានេះថា ស្ថានភាពនៃការអភិវឌ្ឍន៍ និងទីផ្សារអចលនទ្រព្យនៅកម្ពុជា មិនមានសញ្ញាណាមួយមានបញ្ហានោះទេ គឺអ្វីៗនៅតែដំណើរការ​យ៉ាងល្អប្រសើរ ដោយសារការផ្គត់ផ្គង់ និងតម្រូវការនៅមានស្ថិរភាពល្អ។ អ្នកនាងបន្តថា ការចុះបញ្ជីរវិនិយោគក្នុងវិស័យនេះ ហាក់ថយថយបន្តិច ប៉ុន្តែវាមិនមែនជាបញ្ហាដោយ​សារការបោះឆ្នោតទេ តែជាបញ្ហាទីផ្សារខ្លួនឯង ដែលមានន័យថា ការផ្គត់ផ្គង់បានកើនច្រើនក្នុងប៉ុន្មានឆ្នាំមកនេះ ហេតុនេះទីផ្សារត្រូវការពេលវេលាបន្តិចដើម្បីស្រូបយកនូវអ្វីដែលបានអភិវឌ្ឍន៍រួចហើយ។

អ្នកនាងបន្ថែមថា “អ្វីៗនៅតែដំណើរការល្អប្រសើរ សុខភាពក្នុងវិស័យនេះនៅតែ​មានកំនើនរ៉ឹងមាំបន្តទៀត”។

លោក ខេន ឡូ (Ken Lo) អគ្គនាយកក្រុមហ៊ុន Century21 Imperial Realty បានយល់ស្រប​នឹងការលើកឡើងខាងលើ ដោយបានមានប្រសាសន៍ថា លោកនៅតែមើលឃើញថា វិស័​យអចលនទ្រព្យសម្រាប់រយៈពេល៥ ទៅ១០ឆ្នាំខាងមុខ នឹងនៅរីកចម្រើនបន្តទៀត ដោ​យសារកត្តាសុខសន្តិភាព ស្ថិរភាពនយោបាយ និងកំនើនសេដ្ឋកិច្ចកម្ពុជានៅតែមានភាព​រ៉ឹងមាំល្អប្រសើរ។

លោកបន្តថា “កម្ពុជានៅតែស្ថិតក្នុងក្រសែភ្នែកអ្នកវិនិយោគអន្តរជាតិ ដែលពួកគេមើលឃើញថាទីផ្សារនេះនៅតែមានភាពទាក់ទាញ និងរកឳកាសចំណេញបានច្រើនពីការបោះទុនវិនិយោគរបស់ពួកគេ”៕

ដោយ ដួង ចន្រ្ទា

ភ្នំពេញ៖ កំនើនប្រជាសាស្រ្ត ការកកស្ទះចរាចរណ៍កាន់តែខ្លាំងនៅក្រុង ភ្នំពេញ កំនើនតម្លៃដីធ្លី និងភាពស៊ីវិល័យនៃស្តង់ដារស់នៅកំពុងជំរុញឲ្យ​ប្រជា​ពលរដ្ឋខ្មែរកាន់តែច្រើនរស់នៅតាមខុនដូ។

នាយក​ក្រុមហ៊ុនស្លឹក​ប្ញទ្ធរៀល​ធីលោកឃាង ពុទ្ឋីបាន​និយាយឲ្យដឹងតាមទូរ​ស័ព្ទកាលពីពេលថ្មីៗនេះថា មិនយូរ​ទេ​និន្នាការ​រស់នៅ​តាម​ខុនដូ​ របស់​ប្រជា​ពល​រដ្ឋ​ខ្មែរ​នឹង​កើន​ឡើងដោយសារកត្តាខាងលើនេះ។ អ្នក​ដែល​រស់​នៅ​ខុនដូ ភាគ​ច្រើន​​ជា​អ្នក​ដែល​ធ្លាប់​បាន​ទៅ​រស់​នៅ ឬ​សិក្សា​នៅ​ក្រៅ​ប្រទេស​។ ការ​រស់នៅ​ខុនដូ គឺ​មាន​ភាព​ឯករាជ្យ និង​មាន​សុវត្ថិ​ភាព​ខ្ពស់​។

លោក​បាន​បន្តថា បច្ចុប្បន្ន​នេះ​មាន​ប្រជា​ពល​រដ្ឋ​ខ្មែរ ​ដែល​មាន​ប្រាក់​ចំណូ​ល​ពី​មធ្យម​ទៅ​ខ្ពស់​កាន់​តែ​ច្រើន ​បាន​ងាក​មក​​ចាប់​អារម្មណ៍​ចំពោះ​ការ​ស្នាក់នៅ​ខុន​​ដូ​វិញ ពីព្រោះ​ខុនដូ​មាន​ទីតាំង​នៅកណ្តាល​ក្រុង ស្របពេលការ​កក​ស្ទះ​ចរាច​រ​ណ៍ និង​ការ​កើន​ឡើង​នៃ​តម្លៃ​ដី ក៏​បាន​ចូល​រួម​ចំណែក​ធ្វើ​ឱ្យ​ការ​គិត​របស់​ប្រជា​ពល​រដ្ឋ​ប្រែ​ប្រួល​ផងដែរ​។

លោក​បាន​លើក​ទឹក​ចិត្ត​ឱ្យ​ប្រជាពលរដ្ឋ​ខ្មែរ ​ត្រូវ​តែ​មាន​គំនិត​សុទិដ្ឋិនិយម​ចំពោះ​ភាព​រីក​ចម្រើន​នៃ​វិស័យ​ខុនដូ និង​ត្រូវនាំគ្នា​គាំទ្រ ព្រោះ​បើ​យើង​មានគំនិត​អវិជ្ជមាន​ប្រាកដ​ណាស់​ថា វា​នឹង​ធ្វើ​ឱ្យ​ប៉ះពាល់​ដល់​ដំណើរការ​នៃ​ការអភិវឌ្ឍ​ប្រ​ទេស​​​ជា​មិន​ខាន​ ខណៈ​ប្រទេស​ជិត​ខាង​កម្ពុជា គេ​បាន​ធ្វើ​ដំណើរ​លឿន​ជាង​ប្រទេ​ស​​យើង​ឆ្ងាយ​ណាស់​ទៅ​ហើយ ចំពោះផ្នត់គំនិតនៃការ​រស់​នៅ​ខុនដូ ដូច្នេះ​យើង​មិន​ត្រូវ​គិត​ថា ការ​សាងសង់​នេះ​វា​លើស​តម្រូវការ​ទេ ព្រោះ​បើ​លើស​មែន​រាជរដ្ឋាភិ​បាល​នឹង​មាន​វិធានការណ៍​ដោះស្រាយ​ជា​មិន​ខាន។

យោងតាមការសិក្សារបស់ក្រុមហ៊ុន VTRUST Appraisal ដែលបានដាក់​បង្ហាញកាលពីសប្តាហ៍មុនបានឲ្យដឹងថា ចំនួនខុនដូនៅរាជធានីភ្នំពេញបានកើន​ដល់៦០៥០០០យូនីត និងខេត្តព្រះសីហនុមានចំនួន៥០០០យូនីត ក្នុងនោះខុនដូ​ដែលបានដាក់ឲ្យដំនើរការមានចំនួន៨៧០០យូនីត។

នាយក​ក្រុមហ៊ុន Spring CJW Development លោក Anthony Ong ដែល​កំពុង​វិនិយោគ​លើ​គម្រោង​ខុនដូ Axis Residences ដែល​មាន​ចំនួន​៥៦៦​យូនីត ស្ថិត​នៅ​តាម​បណ្តោយ​ផ្លូវ2004 ជិត​ព្រលាន​យន្តហោះ​អន្តរជាតិ​ភ្នំពេញ បាន​លើក​ឡើង​កាល​ពី​ពេល​ថ្មីៗ​នេះ​ថា“ប្រជាពល​រដ្ឋ​​ខ្មែរ​ នៅ​តែ​ជា​សសរ​គ្រឹះ​ដ៏​រឹង​មាំ​នៃ​កំណើន​សេដ្ឋកិច្ច និង​អចលនវត្ថុ​ក្នុង​ប្រទេស​កម្ពុជា”។ លោក​បន្តថា “យើង​ពិតជា​មាន​ការ​ជឿជាក់ និង​ចង់​ឱ្យ​ប្រជា​ពល​ដ្ឋ​ខ្មែរ​ ទទួល​បាន​កន្លែង​រស់នៅ​ដ៏​ស្អាត​កម្រិត​ស្តង់ដា”។

លោក Anthony បញ្ជាក់ថា “យើង​ពិតជា​ចង់​ចូល​រួម​ជួយ​លើក​កម្ពស់​ការ​រស់នៅ​របស់​ប្រជាពលរដ្ឋ​ខ្មែរ តាម​រយៈ​កាល​ផ្តល់​ជូន​នូវ​កន្លែង​រស់​នៅ​មួយ​ដ៏​ល្អ​ដូច​នៅ​ប្រទេស​សឹង្ហបុរី”។ លោកបន្តថា“គោលបំណង​ដែល​យើង​ធ្វើការ​វិនិយោគ​ខុនដូ Axis Residences គឺ​មិន​គ្រាន់​តែ​ដើម្បី​បង្កើត​ជា​ផ្ទះ​ស្នាក់នៅ​រួម​នោះទេ តែ​ការ​ពិត​វា​ជា​លំនៅឋាន​ដែល​គួរ​ឱ្យ​ចង់​រស់​នៅ និង​មាន​អ្វីៗ​គ្រប់​យ៉ាង​​ជា​តម្រូវការ​របស់​អ្នក​ស្នាក់​នៅ”។

អ្នកនាងអាន សុធីតានាយិកាប្រចាំប្រទេសក្រុមហ៊ុន CBRE Cambodia​បានថ្លែងថា ប្រជាពលរដ្ឋរស់នៅខុនដូ ​និងបានទិញខុនដូបានកើនឡើងសន្សឹមៗប៉ុន្តែនិន្នាការនេះកំពុងវិវត្តន៍ល្អប្រសើរ ដោយអតិថិជនជាជនជាតិខ្មែរភាគច្រើន​ទិញសម្រាប់រស់នៅ និងទុកជួល ប៉ុន្តែជនបរទេសទិញភាគច្រើនទុនសម្រាប់ជួលនិងលក់ចេញនៅពេលទទួលបានផលចំណេញ។

លោកណារិទ្ឋ ចនប្រជាពលរដ្ឋរស់នៅក្រុងភ្នំពេញ ដែលបានទិញខុនដូមួយ​នៅតំបន់បឹងត្របែកបាននិយាយថា លោកសម្រេចចិត្តទិញខុនដូ ព្រោះចង់ផ្លាស់​ប្តូររបៀបនិងបែបផែននៃការរស់នៅ ដោយសារលោកមានផ្ទះរួចហើយ ហេតុ​នេះទើបលោកទិញខុនដូមួយទៀត សម្រាប់លំហែរ។លោកបន្តថា លោកឃើញ​មានប្រជាជនខ្មែរកាន់តែច្រើនបានទុញខុនដូ ដោយសារពួកគេចង់បានជីវិតស៊ី​វិល័យ និងផាសុខភាព។

លោកបន្តថា “ខ្ញុំគិតថាប្រជាពលរដ្ឋខ្មែរកាន់តែច្រើន នឹងរស់នៅតាមខុនដូ​នាពេលអនាគត ព្រោះពួកគេជាមនុស្សសម័យថ្មី និងចង់បានជីវិតបែបស៊ីវិ​ល័យ”៕

ដោយ គង់ សូរិយា

ភ្នំពេញ៖ កាលពីទសវត្សរ៍មុន អ្នកវិនិយោគអន្តរជាតិបានសម្លឹងមើលមកកម្ពុជាក្នុងរូបភាពខុសពីបច្ចុប្បន្ន។ ពេលនោះបានចាប់ផ្តើមគំរោងវិនិយោគរបស់ខ្លួន ដោយផ្តោតលើប្រជាជនជាអ្នកមានប្រាក់ច្រើននៅក្នុងស្រុក និងជនបរទេសចូល​មកកាន់ប្រទេ​សនេះ ប៉ុន្តែពេលនេះអ្វីៗបានចាប់ផ្តើមប្រែប្រួលហើយ ដោយសារស្ថានភាពអ​ចលនទ្រព្យ ពិសេសខុនដូថ្លៃបានស្ថិតក្នុងសភាពទ្រឹងនៅក្នុងទីផ្សារ ដែលទើបនឹងងើបឡើងមួយនេះ។

ឥឡូវនេះអ្នកវិនិយោគ និងអ្នកជំនាញសុទ្ឋតែបានចង្អុលបង្ហាញថា ទីផ្សារនេះកំពុងមានការប្រែប្រួលហើយ ព្រោះចំនួនខុនដូប្រណីតកំពុងផ្គត់ផ្គង់លើសតម្រូវការជាក់ស្តែង ប៉ុន្តែទីផ្សារលំនៅដ្ឋាន ពិសេសខុនដូសម្រាប់ប្រជាជនមានជីវភាពទាប និងមធ្យម បាននិងកំពុងហុចផលច្រើនដល់អ្នកវិនិយោគ ស្របពេលតម្រូវការកំពុងកើនឡើងនៅក្នុងក្រុមប្រជាជន ដែលមានប្រាក់ចំណូលមធ្យកំពុងកើនឡើង។

លោកឧកញ៉ា សៀ រិទ្ឋី អគ្គនាយកក្រុមហ៊ុន World Bridge Land ដែលបានបោះទុន១០០លានដុល្លារ វិនិយោគលើលំនៅដ្ឋាននៅជាយក្រុងភ្នំពេញ ដោយផ្តោតលើ​អ្នកមានប្រាក់ចំណូលទាប និងមធ្យមបានថ្លែងថា លោកវិនិយោគគំរោងនេះ ដើម្បីជួយប្រជាជនឲ្យមានលទ្ឋភាព មានលំនៅដ្ឋានសមរម្យសម្រាប់ស្នាក់នៅ ដោ យមិនគិតពីប្រាក់ចំណេញជាធំនោះទេ ព្រោះបើគិតពីប្រាក់ចំណេញជាធំ លោកនឹងមិនវិនិយោគគំរោងនេះទេ។

លោកបន្តថា “ខ្ញុំចង់ជួយប្រជាជនឲ្យមានលំនៅដ្ឋានសមរម្យសម្រាប់រស់នៅ បើខ្ញុំចង់យកប្រាក់ចំណេញច្រើន ខ្ញុំនឹងសាងសង់ខុនដូនៅកណ្តាលក្រុងហើយ”។​

លោកឧកញ៉ារូបនេះ បានវិនិយោគដោយជោគជ័យនូវអាគារខុនដូ The Bridge និងគំរោង The PeAk ជាមួយក្រុមហ៊ុន Oxley Holding ដែលមានមូលដ្ឋា​ននៅប្រទេសឹង្ហបុរី ក្នុងតំលៃទុនវិនិយោគជិត១០០០លានដុល្លារ ដើម្បីចាប់យក​អតិថិជនជាអ្នកមានប្រាក់ចំណូលខ្ពស់ ជាលទ្ឋផលគំរោងរបស់លោកជោគជ័យ ព្រោះរហូតមកទល់ពេលនេះខុនដូ The Bridge លក់អស់១០០ភាគរយហើយ ហើយគំរោងខុនដូ និងសណ្ឋាគា Shagri-la ក៏លក់បានជោគជ័យផងដែរ។

អ្នកនាង អាន សុធីតា នាយិកាក្រុមហ៊ុន CBRE CAMBODIA បានថ្លែងថា ទីផ្សារនេះកំពុងវិវត្តន៍មកកាន់ប្រជាជនថ្នាក់កណ្តាល ព្រោះតំលៃខុនដូសម្រាប់ក្រុមប្រជាជនថ្នាក់កណ្តាល អាចឲ្យអតិថិជនក្នុងស្រុកអាចទទួលយកបាន ព្រោះនាពេល​អនាគតប្រជាជនក្នុងស្រុកនឹងរស់នៅតាមខុនដូកាន់តែច្រើន។អ្នកនាងបន្តថា កន្លងមកអ្នកអភិវឌ្ឍន៍ បានផ្តោតការសាងសង់លើខុនដូលំដាប់ប្រណីត ដែលកំពុងមាននិន្នាការកើនឡើងលើសតម្រូវការរួចទៅហើយ។

អ្នកនាងបន្តថា “ខ្ញុំគិតថាអ្នកអភិវឌ្ឍន៍គួរផ្តោតលើខុនដូសម្រាប់ប្រជាជនថ្នាក់កណ្តាល ព្រោះចំនួនប្រជាជនមានជីវភាពកម្រិតមធ្យមមានចំនួនច្រើន ជាមូលដ្ឋាន​ទីផ្សាររឹងមាំសម្រាប់ធានានិរន្តរភាពវិស័យនេះ”។អ្នកនាងបន្ថែមថា “ការអភិវឌ្ឍប្រ​សិនជាធ្វើឡើងត្រូវទីផ្សារ មានតំលៃសមស្រប មានគុណភាពល្អពិតជាល្អប្រសើរ ប៉ុន្តែអ្វីជាហានិភ័យគឺការដាក់ផលិតផលមិនត្រូវចំណែកទីផ្សារ”។

រដ្ឋាភិបាលបានទទួលស្គាល់ពីបញ្ហានេះរួចទៅហើយ ក្នុងពេលវិស័យនេះកំពុង​មានល្បឿនរីកចំរើនយឺតយ៉ាវជាងមុន។

លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងថា ទីផ្សារអចលនទ្រព្យនៅតែបន្តរីកចំរើន ដោយស្ថិរភាព មិនកាត់បន្ថយបាននូវហានិភ័យហើយ ដោយសារអ្នកវិនិយោគបានងាកមកកាន់ទីផ្សារ សម្រាប់ប្រជាជនថ្នាក់កណ្តាល ស្របពេលការលក់លំនៅដ្ឋានតាមបុរីនានាបានធ្លាក់ចុះ ប៉ុន្តែតំលៃលំនៅដ្ឋាន​នៅតាបបុរីនិមួយៗនៅតែកើនឡើង។

ស្របពេលជាមួយគ្នានេះ គំរោងយក្សមួយស្ថិតនៅខាងមុខស្តាតអូឡាំពិកគឺគំរោង Olympia CITY ក៏បានប្រកាសពីការកាត់បន្ថយ កំពស់អាគារខ្ពស់បំផុតក្នុងគំរោងនេះ ពី៦៥ជាន់មក៤៥ជាន់ និងកាត់បន្ថយអាគារមួយទៀតពីកំពស់៤៥ជាន់មកនៅត្រឹម៣៨ជាន់ផងដែរ។

លោកម៉េង ចំរើនប្រធានគំរោង Olympia CITY បានថ្លែងថា ការកាត់បន្ថយកំពស់អាគារនេះ ដោយសារស្ថានភាពទីផ្សារមិនអំណោយផល ដែលធ្វើឲ្យក្រុមហ៊ុនបារម្ភពីការលំបាកក្នុងការប្រមូលធនធានត្រលប់មកវិញ។

ទោះជាយ៉ាងណា ការបារម្ភនិងទិន្នន័យវិនិយោគជាក់ស្តែងហាក់ផ្ទុយគ្នាដូចមេឃនិងដី ជាក់ស្តែងទុនវិនិយោគក្នុងវិស័យនេះ កាលពីឆ្នាំ២០១៦មានទំហំរហូតដល់​៨៥៣៤​លាន​ដុល្លារ​អាមេរិក កើន​ឡើង​១៥៥,៦៨​ ភាគរយ​ធៀប​រយៈពេល​មួយ​ឆ្នាំ​ ដូច​គ្នា​កាល​ពី​ឆ្នាំ​២០១៥​ ជាកំណើនមួយដែលអ្នកជំនាញក្នុងវិស័យនេះ​សុទ្ឋតែមានការភ្ញាក់ផ្អើល និងបានលើជាសំណួរថា តើទឹកប្រាក់ប៉ុន្មានពិតប្រាកដដែលបានហូរចូលមកប្រទេសនេះ។

​តាម​ការ​កំណត់​និយមន័យ​របស់​ធនាគារ​ពិភពលោក​បាន​បង្ហាញ​ថា ប្រជា​ពល​រដ្ឋ​ដែល​មាន​ប្រាក់​ចំណូល​ចន្លោះ​ពី​១.០៤៥ ដល់​៤.១២៥​ ដុល្លារ​ក្នុង​មួយ​ឆ្នាំ ត្រូវ​ចាត់​ចូល​ជា​ប្រជាជន​មាន​ប្រាក់​ចំណូល​មធ្យម​កម្រិត​ទាប​ និងប្រជាជន​មាន​ប្រាក់​ចំណូ​ល​ចន្លោះ​ពី៤.១២៥​ ដល់​១២.៧៤៦ ​ដុល្លារ​ក្នុង​មួយ​ឆ្នាំ​ត្រូវ​ចាត់​ចូល​ជា​ប្រជាពលរដ្ឋ​មាន​ប្រាក់​ចំណូល​ មធ្យម​កម្រិត​ខ្ពស់ និង​ប្រជាជន​ដែល​មាន​ប្រាក់​ចំណូល​ក្នុង​មួយឆ្នាំ​ច្រើន​ជាង​១២.៧៤៦​ដុល្លារ ត្រូវបាន​គេ​ចាត់​ចូល​ជា​ប្រជាជន​មាន​ប្រាក់​ចំណូ​ល​ខ្ពស់។

ក្រុមហ៊ុនក្នុងស្រុកមួយ ទំនងជាបានចាប់យកឳកាសទីផ្សារខុនដូសម្រាប់ប្រ ជា​ជនមានប្រាក់ចំណូលមធ្យមមុនគេ និងមើលឃើញទីផ្សារនេះសម្រាប់គំរោង​វិនិយោគរបស់ខ្លួន។

លោកទុយ ប៊ុន អគ្គនាយក​ទទួល​បន្ទុក​ផ្នែក​បច្ចេកទេស​នៃ​ក្រុមហ៊ុន​លំនៅឋាន L កម្ពុជា​ភ្នំពេញ ដែលបានសាងសង់ខុនដូសម្រាប់ប្រជាពលរដ្ឋមានប្រាក់ចំណូលមធ្យមនៅទីតាំងខុសៗគ្នាជាច្រើនបាន​ថ្លែង​ថា ការ​វិនិយោគ​ខុនដូ​របស់​ក្រុមហ៊ុន​លោ​ក​ដែល​ផ្តោត​លើ​ប្រជាជន​ថ្នាក់​កណ្តាល ដោយ​សារ​ហេតុ​ផល​ចំនួន​ពីរ ទី១ ទីតាំង​របស់​លោក​មិន​អាច​ទាក់ទាញ​អ្នក​មាន​ប្រាក់​ច្រើន និង​ទី​ ២ ផ្តោត​លើ​ប្រជាជន​មាន​ជីវភាព​មធ្យម ដែល​ប្រជាជន​ក្នុង​ស្រទាប់​នេះ​មាន​ចំនួន​ច្រើនជាង​ទីផ្សារ​សម្រាប់​អ្នក​ មាន​ជីវភាព​ធូរធារ​។

ខុនដូ L ​បាន​លក់​ចាប់​ពី​តម្លៃ៤ ​ដល់​៨​ម៉ឺន​ដុល្លារ​អាមេរិក អាស្រ័យ​លើ​ចំនួន​បន្ទប់ និង​ជាន់​និមួយៗ​។

​លោក ​ទុយ ប៊ុន បានបន្ត​ថា​“​ប្រជាជនកម្ពុជានឹង​អាច​រស់នៅ​ខុន​ដូ​ច្រើន​នា​ពេល​អនាគត តាមទីកន្លែងការងារដែលពួកគេធ្វើការ ហេតុនេះទើបក្រុមហ៊ុនបាន​ផ្តល់​ការ​បង់​រំលស់​នូវ​លក្ខ​ខណ្ឌ​សមស្រប ដែល​អតិថិជន​មាន​ប្រាក់​ចំណូល​មធ្យម​អាច​មាន​លទ្ធ​ភាព​បង់​បាន”។

លោក​បន្ត​ថា​ “​ការ​វិនិយោគ​ខុនដូ​របស់​យើង​ធ្វើ​ឡើង​ សម្រាប់​គ្រួសារ​តូច ព្រោះ​​បន្ទប់​មាន​ទំហំ​ចាប់​ពី​៣០ ​ម៉ែត្រ ទៅ​៥០​ម៉ែត្រ​ការ៉េ​ប៉ុណ្ណោះ ដូច្នេះ​គ្រួសារ​ដែល​មាន​សមាជិក​ត្រឹម​៣​នាក់ ជា​ការ​សមស្រប​ក្នុង​ការ​រស់នៅ​ខុន​ដូ​បែប​នេះ​”។

ទំហំគ្រួសារកម្ពុជាកាន់តែមានការបង្រួមតូចពីមួយឆ្នាំទៅមួយឆ្នាំ ដោយសារស្ថានភាពសង្គម និងសេដ្ឋកិច្ចរបស់ប្រទេសនេះ ព្រោះយោងតាម​ការ​អង្កេត​ប្រជាសាស្ត្រ និង​សុខភាព​របស់​ក្រសួង​សុខាភិបាលបាន​រក​ឃើញ​ថា អត្រា​មាន​កូន​​ក្នុង​ចំណោម​ប្រជា​ពលរដ្ឋ​កម្ពុជា ​ជា​មធ្យម​បាន​ថយ​ចុះ​ពី៣នាក់កាល​ពី​ឆ្នាំ​២០១០ មក​នៅ​ត្រឹម​២,៧០​នាក់​នៅ​ឆ្នាំ​២០១៤​៕