ដោយ ស៊ីវ ម៉េង
ភ្នំពេញ៖ ខណៈមានការត្អូញត្អែរពីកំនើននៃជនជាតិចិន និងមានបាតុភាពមិនប្រក្រតីមួយចំនួនកើតឡើងនៅក្រុងព្រះសីហនុ ទន្ទឹមនឹងគ្នានេះរឿងល្អៗជាច្រើនបាននិងកំពុងកើតមាននៅលើទឹកដីនេះផងដែរ។
យោងតាមការសិក្សារបស់ក្រុមហ៊ុន FURI TIMES SQAURE ដែលបានបញ្ចប់កាលពីពេលថ្មីៗនេះបានរកឃើញថា ខេត្តព្រះសីហនុមានការរីកចម្រើនលឿនស្ទើរមិនគួរឲ្យជឿ និងមានកំនើនប្រជាពលរដ្ឋយ៉ាងច្រើន ក្នុងប៉ុន្មានឆ្នាំចុងក្រោយនេះ ពិសេសកំនើននៃជនជាតិចិន ដែលបានមកវិនិយោគ និងរស់នៅក្នុងទីក្រុងដ៏ស្រស់ស្អាតនេះ។
វិស័យទេសចរណ៍
ការសិក្សានេះបានរកឃើញថា ចំនួនភ្ញៀវទេសចរណ៍ជាតិ អន្តរជាតិទៅទស្សនាក្នុងក្រុងព្រះសីហនុ មានចំនួនចន្លោះពី ៧០០០ ទៅ ៩០០០នាក់ ក្នុងមួយថ្ងៃ ក្នុងនោះទេសចរណ៍អន្តរជាតិម្នាក់ចំណាយ១៥០ដុល្លារក្នុងមួយថ្ងៃ ហើយរយៈពេលជាមធ្យមពួកគេស្នាក់នៅចំនួន១សប្តាហ៍។
ជាមួយនឹងកំនើនភ្ញៀវទេសចរណ៍ជាប្រចាំនេះ លោកតាំង សុចិត្រគ្រឹស្នាប្រធានមន្ទីរទេសចរណ៍ខេត្តព្រះសីហនុ បានអំពាវនាវឲ្យអ្នកវិនិយោគជាតិ អន្តរជាតិបន្តវិនិយោគសាងសង់សណ្ឋាគារ ឬផ្ទះសំណាក់ក្នុងខេត្តឲ្យបានច្រើនថែមទៀត ដើម្បីឆ្លើយតបនឹងកំនើននៃតម្រូវការប្រើប្រាស់របស់ភ្ញៀវជាតិ អន្តរជាតិ។
កំនើនប្រាក់ចំណូល
ជាមួយនឹងកំនើននៃការវិនិយោគ និងទេសចរណ៍បានធ្វើឲ្យអ្នករស់នៅក្រុងព្រះសីហនុភាគច្រើនទទួលបានផលប្រយោជន៍ តាមរយៈការលក់ដីដែលមានតម្លៃកើនឡើងខ្ពស់លើសការរំពឹងទុក។ ការជួលផ្ទះដែលទទួលបានតម្លៃថ្លៃ ដោយផ្ទះល្វែងមាន៤ទៅ៥បន្ទប់ ប្រជាពលរដ្ឋអាចជួលបានចន្លោះ ៤០០០ ទៅ ៥០០០ដុល្លារ ក្នុងមួយខែ ឬច្រើនជាងនេះប្រសិនជាផ្ទះស្ថិតនៅជាប់ផ្លូវឯករាជ្យ ដែលជាផ្លូវមេក្នុងទីក្រុងនេះ។
ការសិក្សារបស់ក្រុមហ៊ុន FURI TIMES SQUARE ក៏បានរកឃើញផងដែរថា អ្នករកការងារធ្វើនៅក្រុងព្រះសីហនុ ក៏ទទួលបានប្រាក់ខែ និងប្រាក់ចំណូលច្រើនជាងបណ្តាខេត្តដទៃផងដែរ ដែលធ្វើឲ្យលំហូរអ្នកស្វែងរកការងារធ្វើកើនឡើងខ្លាំង រហូតដល់ខេត្តនេះមានមនុស្សរស់នៅជាង៣០ម៉ឺនាក់។
ដីឡើងថ្លៃលឿនលើសការរំពឹងទុក
ការសិក្សាដដែលបានរកឃើញថា តម្លៃដីនៅក្រុងព្រះសីហនុបានកើនឡើងកប់ពពកនៅតាមតំបន់ជាច្រើន ជាក់ស្តែងដីនៅតំបន់អូរឈើទាល ក្រុងព្រះសីហនុបានកើនតម្លៃពី១៥០០ ទៅ២៥០០ដុល្លារ បានកើនដល់ចន្លោះ២០១៥ ២០១៧ បច្ចុប្បន្នឡើងពី២០០០ដល់៤០០០ដុល្លារក្នុងមួយម៉ែត្រការ៉េ។
ចំណែកដីនៅតំបន់អូរត្រេសបានកើនពី៣០០ ទៅ៥០០ដុល្លារកាលពីឆ្នាំ២០១៥ ដល់ ចន្លោះពី១៥០០ទៅ២៨០០ដុល្លារមួយម៉ែត្រការ៉េផងដែរ។
ទំនិញឡើងថ្លៃឬ
មានពាក្យចចាមអារ៉ាមបានកើតមានឡើងខ្លាំងនៅក្រុងព្រះសីហនុ ពិសេសប្រជាជនមានការលើកឡើងថា តម្លៃទំនិញសព្វសារពើនៅក្រុងព្រះសីហនុ បានកើនឡើងទ្វេរដងឬច្រើនជាងនេះ ដែលធ្វើឲ្យប្រជាជនមានការលំបាកក្នុងការរស់នៅ ឬត្រូវចំណាយទ្វេរដង សម្រាប់ជីវភាពប្រចាំថ្ងៃ។
ប៉ុន្តែលោកវុទ្ឋី ស៊ានជាប្រជាពលរដ្ឋរស់នៅក្នុងក្រុងព្រះសីហនុបានមានប្រសាសន៍ឲ្យដឹងតាមទូរស័ព្ទថាវាជាពាក្យចចាមអារ៉ាម ដែលនិយាយតគ្នាពីមាត់មួយទៅមាត់មួយប៉ុណ្ណោះ ការពិតទំនិញមិនបានឡើងថ្លៃខ្ពស់ដូចការលើកឡើងនោះទេ ប៉ុន្តែលោកទទួលស្គាល់ថា ទំនិញពិតជាឡើងថ្លៃ តែឡើងក្នុងរង្វង់១០ភាគរយប៉ុណ្ណោះ។
លោកបន្តថា “ពាក្យចចាមអារ៉ាម ពិតជាគួរឲ្យខ្លាច រហូតដល់ប្រជាពលរដ្ឋមួយចំនួនមិនហ៊ានមកលេងក្រុងព្រះសីហនុ ដោយសារពាក្យបំភ្លើស និងបំភ្លៃខុសពីការពិត។
សន្តិសុខសុវត្ថិភាព
ពាក្យសន្តិសុខ សុវត្ថិភាព ជារឿងដែលគួរឲ្យខ្លាចជាងគេ ប៉ុន្តែការពិតមិនមានរឿងអ្វីដែលគួរឲ្យបារម្ភនោះទេ ព្រោះរដ្ឋាភិបាលមានយន្តការ មានសមត្ថកិច្ចគ្រប់គ្រងច្បាស់លាស់ហើយ មិនមែនបណ្តោយឲ្យជនបរទេស មកធ្វើអ្វីតាមចិត្តលើទឹកដីយើងនោះទេ។
លោកវុទ្ឋី ស៊ានបានមានប្រសាសន៍ថា ធម្មតានៅប្រទេសមួយ នៅពេលមានជនបរទេសចូលមករស់នៅ និងវិនិយោគច្រើន បាតុភាពតិចតួច ពិតជាកើតមានឡើងជៀសមិនផុតនោះទេ។ នេះជារឿងធម្មតានៅក្នុងប្រទេសមួយ មិនមានអ្វីចម្លែកឬគួរឲ្យបារម្ភពេកនោះទេ។
ស្នងការនគរបាលខេត្តព្រះសីហនុធ្លាប់បានមានប្រសាសន៍ថា សមត្ថកិច្ចតែងតែតាមដានជាប់ជាប្រចាំ ដើម្បីការពារភ្ញៀវទេសចរណ៍ និងអ្នកវិនិយោគឲ្យមានភាពកក់ក្តៅ ដោយមិនឲ្យមានបាតុភាពមិនប្រក្រតីណាមួយកើតឡើងនោះទេ ព្រោះប្រទេសមានច្បាប់ ហេតុនេះយើងអនុវត្តន៍ច្បាប់ ដើម្បីសន្តិសុខ សណ្តាប់ធ្នាប់មានភាពល្អប្រសើរ និងមិនឲ្យបាតុភាពមិនប្រក្រតីកើតឡើងនោះទេ៕
