ដោយ វុត្ថា

ភ្នំពេញ៖ ស្ពានអាកាសមិត្តភាពកម្ពុជា-ចិន សែនសុខប្រវែង ៩៤២ម៉ែត្រ (ស្ពានអាកា​សផ្សារដីហុយ) ត្រូវបានសម្ពោធដាក់ឱ្យប្រើប្រាស់ជាផ្លូវការថ្ងៃនេះ នឹងចូលរួមកាត់បន្ថយការកកស្ទះចរាចរណ៍ គ្រោះថ្នាក់ចរាចរណ៍ នៅរាជធានីភ្នំពេញ។

សម្តេចតេជោហ៊ុន សែននាយករដ្ឋមន្រ្តីកម្ពុជា និងលោកស្យង់ ប៉ូឯកអគ្គរដ្ឋទូតចិន​ប្រចាំកម្ពុជាបានអញ្ជើញជាអធិបតីក្នុងពិធីសម្ភោធស្ពានអាកាស ដែលមានប្រវែងវែងជាងគេនៅក្នុងទីក្រុងភ្នំពេញ ដែលចំណាយពេលសាងសង់រយៈពេល២៤ខែនាព្រឹកថ្ងៃទី២ កក្កដានេះ។

បើលោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីសាធារណការ និងដឹកជញ្ជូនបានឲ្យ​ដឹងថា ស្ពានអាកាសមិត្តភាពកម្ពុជា-ចិនសែនសុខ មានបណ្ដោយប្រវែង៩៤២ម៉ែត្រ ទទឹង ១៦,៥ ម៉ែត្រ ក្រាលបេតុងកៅស៊ូ (AC) ចំណាយថវិកាសាងសង់សរុបប្រមាណ ១៧ លានដុល្លារអាមេរិក ជាហិរញ្ញប្បទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សាងសង់ដោយក្រុមហ៊ុនសំណង់សៀងហៃគ្រុប ខូអិលធីឌី (Shanghai Construction Group Co., Ltd) និងត្រួតពិនិត្យបច្ចេកទេសដោយក្រុមហ៊ុន ទីប្រឹក្សាសំណង់ ក្វាងចូវវ៉ានអាន (Guangzhou Wanan Contructiontion Supervision Co., Ltd) ដោយប្រើរយៈពេលសាងសង់ចំនួន២៤ខែ។

លោកបន្តថា “សុខសន្តិភាព និងស្ថេរភាពនយោបាយដ៏រឹងមាំ ក្រោមការដឹកនាំប្រក​ប​ដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជារក្សាបានកំណើនសេដ្ឋកិច្ចប្រចាំឆ្នាំ ក្នុងរង្វង់៧ភាគរយ ដែលកំណើនសេដ្ឋកិច្ចនេះ ជាកត្ដាជំរុញឱ្យមានកំណើនមធ្យោបាយដឹកជញ្ជូនទីក្រុងកាន់តែច្រើន”។

លោកស៊ុន ចាន់ថុលបានបន្តថា ស្ពាននេះ ដើរតួយ៉ាងសំខាន់ក្នុងការដឹកជញ្ជូនរបស់ប្រជាពលរដ្ឋ ចំណាយពេលតិច  ព្រមទាំងរួមចំណែកកាត់បន្ថយការកកស្ទះចរាចរ​ណ៍ គ្រោះថ្នាក់ចរាចរណ៍ និងកាត់បន្ថយភាពក្រីក្ររបស់ប្រជាជនផងដែរ។

សម្តេចអគ្គមហាសេនាបតីតេជោហ៊ុន សែន បានថ្លែងអំណរគុណមហាមិត្តចិន និងបានលើកឡើងពីប្រវត្តិនៃទីក្រុងភ្នំពេញកាលពីអតីតកាល ព្រមទាំងកត្តាសុខសន្តិភាពដែលធ្វើឲ្យកម្ពុជាមានលទ្ឋភាព អភិវឌ្ឍន៍ប្រទេសបានជាបន្តបន្ទាប់រហូតដល់សព្វថ្ងៃនេះ ពិសេសឆ្នាំនេះជាខួបលើកទី២០ ដែលកម្ពុជាទទួលបានសុខសន្តិភាពពេញលេញ និងជា​ខួបលើកទី៦០នៃទំនាក់ទំនងមិត្តភាពកម្ពុជា ចិន។

ជាមួយនឹងការដាក់ឲ្យប្រើប្រាស់ស្ពាននេះ សម្តេចតេជោហ៊ុន សែនបានសំណូមពរឱ្យបងប្អូនប្រជាពលរដ្ឋគោរពច្បាប់ចរាចរណ៍ ឱ្យបានខ្ជាប់ខ្ជួន ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ ព្រមទាំងសំណូមពរដល់អ្នកប្រើប្រាស់ផ្លូវថ្នល់ ឱ្យចូលរួមថែរក្សាសម្បត្តិដ៏មានតម្លៃវិសេសវិសាលនេះផងដែរ៕

ដោយ គង់ សូរិយា

ភ្នំពេញ៖ ដោយសារតែទទួលបានការជឿទុកចិត្ត​ពីអតិថិជន​ បានធ្វើឲ្យគំរោងលំនៅ​ដ្ឋាន​ក្រុមហ៊ុនអ័រគីដេវីឡា​ ទទួលបានជោគជ័យក្នុងការលក់គំរោងរបស់ខ្លួន ខណៈទីផ្សារ​លំនៅដ្ឋាន​​នៅតែមានភាពល្អប្រសើរ។

ជាការតបស្នងដល់អតិថិជន​ក្រុមហ៊ុនអ័រគីដេវីឡា​ បានរៀបចំ​កម្មវិធីអបអរសាទ​រ​ការលក់អស់ ១០០ភាគរយ សំរាប់គម្រោងអ័រគីដេវីឡា ដឹរ៉ូយ៉ាល់ ជូនអតិថិជនរបស់ខ្លួន ដែលបានទិញផ្ទះ​វីឡាប្រភេទផ្សេងៗ ក្នុងគម្រោងមួយនេះ។

យោងតាមសេចក្តីប្រកាសព៌តមានពីកម្មវិធីនេះបានឲ្យដឹងថា ក្រោយពីក្រុមហ៊ុន អ័រគីដេវីឡាទទួលជោគជ័យ ក្រុមហ៊ុននេះនឹងប្រកាស​បើកលក់គម្រោងថ្មីរបស់ខ្លួន​ នៅ​ក្នុងពេលឆាប់ៗខាងមុខនេះ។​ ដូច្នេះអតិថិជនដែលស្រលាញ់ និងជឿជាក់លើក្រុមហ៊ុន​ អ័រគីដេវីឡា​ អាចសាកសួរព័ត៌មានបន្ថែមរឺរក្សាទុកឈ្មោះ លេខទូរស័ព្ទ ដើម្បីទទួលបា​ន​ព័ត៌មានអាទិភាព រឺអាចទៅកាន់នៅការិយាល័យលក់ ទីតាំងណាមួយដែលនៅក្បែរលោ​កអ្នកបំផុត។

ក្រុម​ហ៊ុន​ អ័រគីដេវីឡា​បានចាប់ផ្តើមគម្រោងដំបូង​ ដែលមានឈ្មោះថា​ អ័រគីដេវីឡា​ ដឹហ្គ្រេន​ ដែលត្រូវបានលក់អស់​ក្នុងរយៈពេលត្រឹមតែ៣ខែប៉ុណ្ណោះ​។ នេះសរបញ្ជាក់ឲ្យ​ឃើញថា​ អ័រគីដេវីឡា​បានផ្តល់ជូនអតិថិជន​ នៅផ្ទះដ៏ល្អប្រណីត​ និងស្របទៅតាមតម្រូវ​ការទីផ្សារ។​

អគ្គនាយកក្រុមហ៊ុន Century21 Mekong លោកច្រឹក សុខនីមបានថ្លែងថា ទីផ្សារ លំនៅដ្ឋាននៅកម្ពុជានៅតែមានភាពល្អប្រសើរ ទោះជាមានការកើនឡើងនូវលំនៅដ្ឋាន​ច្រើនក្នុងទីផ្សារក្តី ប៉ុន្តែតម្រូវការនៅតែមានខ្ពស់ ដោយសារកំណើនសេដ្ឋកិច្ច កំណើនប្រាក់ចំណូលរបស់ប្រជាពលរដ្ឋ និងកំណើន​ប្រជាជន​ចូលមករស់នៅក្នុងទីក្រុងមានការ​កើន​ឡើងជាប្រចាំ។

លោកបន្តថា​​ “ការកើនឡើងនូវតម្រូវការលំនៅដ្ឋាន ក្នុងទីផ្សារនេះនៅតែបន្តកើន​ឡើងរយៈពេលវែងបន្តទៀត ដោយសារស្ថានភាពនយោបាយ និងសេដ្ឋកិច្ចនៅតែមាន​ភាពល្អប្រសើរ”។លោកបន្តថា “ការផ្តល់ឥណទានពីគ្រឹះស្ថានហិរញ្ញវត្ថុនានា ក៏ជាផ្នែក​មួយជួយជំរុញវិស័យនេះឲ្យរីកចម្រើន”។

យោងតាមសិក្សារបស់ក្រុមហ៊ុន Vtrust Appraisal បានរកឃើញថា ចាប់ពីឆ្នាំ​២០០០ ដល់ឆ្នាំ២០១៧មានលំនៅដ្ឋានជាង១៣ម៉ឺនខ្នងបានសាងសង់ចប់ និងដាក់លក់​នៅក្នុងទីក្រុងភ្នំពេញ៕

ដោយ គង់ សូរិយា

       ភ្នំពេញ៖ កាលពីថ្ងៃម្សិលម៉ិញ សម្តេចតេជោហ៊ុន សែននាយករដ្ឋមន្រ្តីកម្ពុជាបានប្រ​កាលពីការចុះហត្ថលេខាជាមួយចិន ដើម្បីសាងសង់ផ្លូវក្រវ៉ាត់ក្រុងទី៣នាពេលឆាប់ៗខាងមុខនេះ។

នេះជាគំរោងផ្លូវក្រវ៉ាត់ក្រុងទី៣ ដ៏មានសក្តានុពលមួយទៀត ដើម្បីសម្រួលការដឹក ជញ្ជូន ក៏ដូចជា ពង្រីកសក្តានុពលសេដ្ឋកិច្ចនៃក្រុងភ្នំពេញ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រ​សា​សន៍ឲ្យដឹងកាលពីម្សិលម៉ិញថា គំរោងផ្លូវក្រវ៉ាត់ក្រុងទី៣នេះ មានគំរូចំនួនបីដែលត្រូវជ្រើសរើស ប៉ុន្តែមិនទាន់ដឹងពីការសម្រេចរបស់ប្រមុខរដ្ឋាភិបាលយកគំរោងណាមួយនៅឡើយទេ ប៉ុន្តែតាមគំរោងកន្លងមក ផ្លូវក្រវ៉ាត់ក្រុងទី៣នេះ នឹងចាកចេញពីតំបន់កប់ស្រូវឆ្លងកាត់ផ្លូវជាតិលេខ៤ ឆ្លងកាត់ផ្លូវជាតិលេខ៤ ឆ្ពោះមកកាន់ផ្លូវលេខ២១ ដោយឆ្លងកាត់ ទឹកដីខ័ណ្ឌដង្កោ ឆ្ពោះមកកាន់កោះអន្លង់ចិន ខេត្តកណ្តាល និងមានស្ពានមួយឆ្លងកាត់ទន្លេនេះ មកកាន់ឃុំឈើទាល ក្នុងស្រុកកៀនស្វាយ។

បន្ទាប់ពីនេះផ្លូវនេះនឹងលូនកាត់ស្រុកកៀនស្វាយ ឆ្ពោះទៅកំពង់ផែអន្តរជាតិភ្នំពេ​ញ ស្ថិតក្នុងស្រុកកៀនស្វាយ ឆ្ពោះមកកាត់ស្រុកល្វាឯម ស្រុកខ្សាច់កណ្តាល និងឆ្ពោះមកកាត់ស្ពានព្រែកតាមាក់ ហើយបន្តអូសកាត់មកឆ្លងកាត់ស្ពានលឺ យ៉ុងផាត់នៅតំបន់ព្រែកព្នៅ មុនភ្ជាប់មកតំបន់កប់ស្រូវវិញ។

លោកវ៉ា ស៊ីមសូរិយាបានបន្តថា រហូតមកទល់ពេលនេះ លោកមិនដឹងពីគំរោងចំណាយលើការសាងសង់ផ្លូវនេះនៅឡើយទេ ប៉ុន្តែគំរោងនេះត្រូវចំណាយច្រើនដោយ​សារមានការសាងសង់ស្ពានច្រើន និងជាផ្លូវធំមួយ ដើម្បីសម្រួលដល់ការដឹកជញ្ជូនវាងទី​ក្រុងភ្នំពេញ។

បើតាមរបាយការណ៍ការងាររបស់គណកម្មការជំនាញរៀបចំគូរប្លង់ និងសិក្សាពីគំរោងផ្លូវនេះបានឲ្យដឹងស្រដៀងគ្នាថា គំរោងផ្លូវក្រវ៉ាត់ក្រុងទី៣ ដែលចាកចេញពីតំបន់ព្រែកព្នៅ តភ្ជាប់តាមខ័ណ្ឌដង្កោ ខ័ណ្ឌពោធិសែនជ័យ មុនភ្ជាប់មកស្រុកកៀនស្វាយ ស្ថិតក្នុងតំបន់កំពង់ផែស្វយ័ត្នក្រុងភ្នំពេញបាន គឺជាផ្នែកនៃខ្សែក្រវ៉ាត់ក្រុងភាគខាងជើងឆៀងខាងលិច និងតភ្ជាប់មកភាគខាងត្បូងរាជធានីភ្នំពេញ។

ផ្លូវក្រវ៉ាត់ក្រុងទី៣ ដែលតភ្ជាបពីកំពង់ផែស្វយ័ត្នក្រុងភ្នំពេញ នឹងកាត់ទៅតំបន់វិហារសួគ៌ក្នុងស្រុកខ្សាច់កណ្តាល ខេត្តកណ្តាល និងតភ្ជាប់មកកាន់តំបន់មួយចំនួនក្នុងស្រុកពញ្ញាឮ ខេត្តកណ្តាល តភ្ជាប់មកកាន់ស្រុកអង្គស្នួល ឆ្លងកាត់ផ្លូវជាតិលេខ៤ ផ្លូវជាតិលេខ៣ តាមរយៈការសាងសង់ផ្លវអាកាសចំនួនពីរ ឆ្លងកាត់ផ្លូវជាតិដ៏សំខាន់នេះ ដើម្បីតភ្ជាប់មកកាន់ខ័ណ្ឌមួយចំនួននៃក្រុងភ្នំពេញ៕

ដោយ វុត្ថា

ភ្នំពេញ៖ មហាយក្សចិនពិតជាមិនស្កប់ចិត្ត ចំពោះការអភិវឌ្ឍន៍អគារខ្ពស់កប់ពពកនៅក្នុងប្រទេសខ្លួន និងតំបន់អាស៊ីឡើយ ដោយប្រទេសនេះកាលពីពេលថ្មីនេះ បានចុះហត្ថលេខាបោះទុនវិនិយោគ សាងសង់អគារខ្ពស់កប់ពពកកំពស់៣២០ម៉ែត្រ ដែលមានឈ្មោះថា Pinnacle Towers ក្នុងប្រទេសតំបន់អាហ្វ្រិក ជាមួយនឹងទឹកប្រាក់ ២០០លានដុល្លារ ស្របតាមគោលនយោបាយ ផ្លូវមួយ និងខ្សែក្រវ៉ាត់មួយ របស់ប្រធានាធិបតី ស៊ី ស៊ីភីង។

ក្រុមហ៊ុន China State Construction Engineering Corporation (CSCEC) ដែលជាក្រុមហ៊ុនរបស់រដ្ឋាភិបាលចិនដ៏ធំ បានឈ្នះការដេញថ្លៃក្នុងសាងសង់អគារខ្ពស់កប់ពពកនេះ ក្នុងទីក្រុងNairobi ប្រទេសកេនយ៉ា ក្នុងចំណោមក្រុមហ៊ុអភិវឌ្ឍន៍អចលនទ្រព្យល្បីៗចំនួន១០នៅលើពិភពលោក។ នេះបើតាមការចុះផ្សារដោយ Global Construction Review។

អគារនេះ គឺជាអគារខ្ពស់កប់កពពក់មួយ ក្នុងចំណោមអគារផ្សេងទៀតក្នុងប្រទេសអាហ្វ្រិក ដែលខ្ពស់ជាងអគារCarlton Centre ដែលមានកំពស់ត្រឹមតែ២២៣ ម៉ែត្រស្ថិតនៅក្នុងទីក្រុងJohannesburg និង អគារ Britam Tower ដែលមានកំពស់២០០ម៉ែត្រ ស្ថិតនៅក្នុងទីក្រុង Nairobi ។

ការសាងសង់អគារ Pinnacle Towersដ៏ខ្ពស់នេះ គ្រោងនឹងបញ្ចប់សាងសងរបស់ខ្លួននៅក្នុងឆ្នាំ ២០២១។

អគារPinnacle Towers សាងសង់ឡើងសម្រាប់ជាមជ្ឈមណ្ឌលពាណិជ្ជកម្មចម្រុះរួមមាន ជាការិយាល័យ សណ្ឋាគារ អាផាតម៉ិនទំនើប២០០យូនីត ផ្សារទំនើប និងជាកន្លែងទស្សនាទេសភាពប្រទេស Kenya។

លោក ប្រធានាធិបតីប្រទេស Kenya  លោក Uhuru Kenyatta  បានថ្លែងនៅក្នុងពិធីបញ្ចុះបថមសិលា សាងសង់អាគារកប់ពពកនេះកាលពីពេលថ្មីនេះថា ការសាងសងស់អគារនេះ ដោយសារគេមានជំនឿចិត្ត លើកគោលនយោបាយកំណែទំម្រង់របស់ប្រទេ​ស Kenya ដើម្បីទាក់ទាញ និងប្រកួតប្រជែងវិស័យទេសចរណ៍ និងជាមូលដ្ឋានគ្រឹះសម្រាប់ទាក់ទាញវិនិយោគិន៕