ដោយ វុត្ថា

ភ្នំពេញ៖ ទិន្នន័យលំនៅដ្ឋានថ្មីរបស់ធនាគារកណ្តាល របស់ប្រទេសហ្វីលីពីនបានបង្ហាញថា ទីផ្សារលំនៅឋាននៅប្រទេសក្នុងប្រទេសមួយនេះ បានមានកំណើនខ្លាំងក្នុងត្រីមាសទី១ឆ្នាំនេះ ដោយបានកើនឡើង៤៤,២% និង១៣,៨% ពីមួយឆ្នាំទៅមួយឆ្នាំ។

យោងតាមសន្ទស្សន៍តម្លៃអចលនទ្រព្យលំនៅឋាន (RREPI) បានចេញផ្សាយកា​ល​ពីសប្ដាហ៍មុនដោយក្រុមហ៊ុន Bangko Sentral ng Pilipinas (BSP) បានឲ្យដឹងថា តំបន់រដ្ឋធានីជាតិ (NCR) ដែលមានលំនៅដ្ឋានបានចុះបញ្ជីរ បានកើនឡើងតម្លៃ ៤៥៦,៨ភាគរយក្នុងឆ្នាំ២០១៨នេះ។ នៅត្រីមាសនៃឆ្នាំនេះ តម្លៃបានកើនឡើងទ្វេដងដោយបានកើនឡើងខ្ពស់រហូតដល់៦៦,២ ភាគរយ។

នៅក្នុងតំបន់ Areas Outside NCR តម្លៃលំនៅដ្ឋានមានកំណើនប្រចាំឆ្នាំ៦,១ ភាគរយ ខណៈនៅតំបន់ជាយក្រុងបានកើនឡើង១៥,៦ ភាគរយ។

តម្លៃអចលនទ្រព្យផ្នែកលំនៅឋាននៅទូទាំងប្រទេសហ្វីលីពីន បានកើនឡើងនៅក្នុងត្រីមាសទី១ នៃឆ្នាំនេះប៉ុន្តែមានល្បឿនយឺតបន្តិច។ តម្លៃលំនៅដ្ឋានគ្រប់ប្រភេទបានកើនឡើង២,១ភាគរយពីមួយឆ្នាំទៅមួយឆ្នាំ នៅឆមាសទី១ឆ្នាំ២០១៨ ពោលគឺធ្លាក់ចុះពីកំណើន៦,៥ ភាគរយដែលបានចុះបញ្ជីនៅក្នុងត្រីមាសដូចគ្នាកាលពីឆ្នាំមុន។

ប្រសិនជាមើលពីតម្លៃខុនដូក្នុងប្រទេសនេះ បានសាងសង់ក្នុងតម្លៃល្អប្រសើរផងដែរ ដោយមួយយូនីតលក់ក្នុងតម្លៃចន្លោះពី៣ទៅ៤ម៉ឺនដុល្លារអាមេរិកប៉ុណ្ណោះ។ ចំណែកតម្លៃលំនៅដ្ឋានធម្មតាមានតម្លៃចន្លោះពី៦ទៅ១០ម៉ឺនដុល្លារអាមេរិក។

រំលឹកទៅឆ្នាំ២០១៧វិញ តម្លៃលំនៅដ្ឋានធម្មតាមបានធ្លាក់ចុះ០,៩ភាគរយ នៅក្នុងរយៈពេល៣ខែគិតត្រឹមខែមីនា ដែលជាការធ្លាក់ចុះប្រចាំត្រីមាសដ៏ធំបំផុត។ សន្ទស្សន៍នេះត្រូវបានប៉ាន់ប្រមាណថា មានចំនួន១១៦,៣ភាគរយ នៅក្នុងត្រីមាសទី ១ ធៀបនឹងត្រីមាសទី៤ ឆ្នាំ ២០១៧ មានចំនួន១១៧,៤ ភាគរយ៕

ដោយ ដែន ចែងចាំង

       ភ្នំពេញ៖ អាគារការិយាល័យបែបសហកម្មសិទ្ធជាច្រើន បាននិងកំពុងដាក់និងត្រៀ​ម​ដាក់ចូលទីផ្សារនៅឆ្នាំនេះ ដែលជាការធ្វើតេស្តទីផ្សារនៅកម្ពុជាជាលើកតំបូង ខណៈដែ​លការិយាល័យប្រភេទនេះកំពុងមានរសនិយមរួចទៅហើយ។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាបានមានប្រសាសន៍ឲ្យដឹងតាមទូរស័ព្ទនាថ្ងៃទី៣ កក្កដានេះថា អាគារការិយាល័យបែបសហកម្មសិទ្ឋជាច្រើនបាននិងកំពុងដាក់ចូលទីផ្សារ និងត្រៀមដាក់ចូលទីផ្សារនៅឆ្នាំនេះ ដែល​ជាទស្សនទានអភិវឌ្ឍន៍ថ្មីមួយនៅកម្ពុជា ដែលធ្វើឲ្យយើងមានការព្រួយបារម្ភ ដោយសារ​វាជាទីផ្សារថ្មី និងជាទស្សនទានអភិវឌ្ឍន៍ថ្មីនៅក្នុងប្រទេសនេះ។

អ្នកនាងបន្តថា “សំរាប់អាគារការិយាល័យដែលមានម្ចាស់តែមួយ មិនមានបញ្ហានៅ​ក្នុងទីផ្សារទេ តែអាគារការិយាល័យបែបសហកម្មសិទ្ឋដែលមានការផ្គត់ផ្គង់ច្រើន កំពុងនាំ​ឲ្យមានការបារម្ភ”។ អ្នកនាងបន្តថា “ការបារម្ភដោយសារវាជាផលិតផលថ្មី សំរាប់ទីផ្សារនេះ ហេតុនេះយើងនឹងរង់ចាំមើលពីផលិតផលថ្មីនេះ”។

អាគារការិយាល័យបែបសហកម្មសិទ្ឋមានដូចជា TK Royal One ស្ថិតនៅលើមហាវិថីសហព័ន្ឋរុស្ស៊ី (ទល់មុខសាកលវិទ្យាល័យភូមិន្ទភ្នំពេញ) អាគារការិយាល័យ Downtwon93 ស្ថិតនៅលើមហាវិថីព្រះមុនីវង្ស ស្ថិតក្នុងសង្កាត់ទន្លេបាសាក់ ខ័ណ្ឌចំការ​មន (ក្បែរទីស្នាក់ការកាសែតរស្មីកម្ពុជា)ជាដើម។

លោក Chenyi Liu នាយកគ្រប់គ្រងទូទៅនៃអាគារ TK Royal One បានថ្លែងថា យើងមិនមានការព្រួយបារម្ភពីទីផ្សារនេះទេ ដោយសារអាគាររបស់យើងមានការប្រើប្រា ស់ចម្រុះទាំងខុនដូ និងការិយាល័យ ហើយរហូតមកទល់ពេលនេះការជួល និងលក់របស់យើងកំពុងសម្រេចបានជោគជ័យ។ លោកបន្តថា ទីផ្សារនេះកំពុងមានភាពរីកចម្រើ​នដោយសារការចូលមកដល់នៃក្រុមហ៊ុនអន្តរជាតិ និងក្រុមហ៊ុនក្នុងស្រុកបង្កើតថ្មីកាន់តែ  ​ច្រើន។

លោកបន្តថា “អ្វីដែលយើងផ្តផោតគឺសេវាកម្មល្អ អាគារមានគុណភាពនិងសោភ័​ណភាព និងស្ថិតនៅទីតាំងងាយស្រួលរបស់អ្នករស់នៅនិងអ្នកធ្វើការ”៕

ដោយ វុត្ថា

       ភ្នំពេញ៖ ប្រទេសម៉ាឡេស៊ីកំពុងជួបប្រទះហានិភ័យយ៉ាងធ្ងន់ធ្ងរ ដោយសារតែទីផ្សាលក់អចលនទ្រព្យមួយនេះលក់មិនចេញ ក្នុងពាក់កណ្តាលឆ្នាំ២០១៨ បន្ទាប់ពីបានសាងសង់រួចរាល់ចំនួន៣៤,៥៣២ផ្ទះ ដែលមានតម្លៃរហូតដល់៥,៥ពាន់លានដុល្លារ។ នេះបើយោងតាមការចេញផ្សាយរបាយការណ៍ របស់រដ្ឋាភិបាលកាលពីចុងសប្តាហ៍នេះ ។

ទិន្ន័យរបស់រដ្ឋាភិបាលបានកត់សម្គាល់ថា ការលក់លំនៅដ្ឋានមិនចេញបានកើនឡើងរហូតដល់៦៧,៨២ភាគរយ ដែលប្រការនេះបានធ្វើអោយមានការរង្គោះរង្គើរលើទីផ្សារវិស័យអចលនទ្រព្យ។ មជ្ឈមណ្ឌលព័ត៌មានអចលនទ្រព្យជាតិ ដែលជាអ្នកចងក្រងទិន្ន័យនេះ ក៏បាននរួមបញ្ចូលទាំងការិយាល័យតូច ធំ និងសេវកម្មផ្ទះល្វែងក៏លក់មិនចេញផងដែរ។

របាយការណ៍ដដែលបង្ហាញទៀតថា កុំថាឡើយតម្លៃអចលនទ្រព្យដែលមានតម្លៃខ្ពស់ ប៉ុន្តែលំនៅដ្ឋានតម្លៃមធ្យម និងទាបមានតម្លៃត្រឹមតែ៣០០,០០០ ទៅ ៤០០,០០០ រីងហ្គីត ស្មើរនឹង៧ទៅ៨ម៉ឺដុល្លារ ក៏លក់មិនចេញដែរ។ជាមួយគ្នានោះដែរទីក្រុងដែលមានការលក់យឺតនោះគឺទីក្រុង Kelantan ទីក្រុង Kedah និងទីក្រុង Terengganu ។

ទីក្រុងដែលមានអត្រាលក់មិនដាច់សោះ គឺទីក្រុង Penang ទីក្រុង Johor ទីក្រុង Selangor និងទីក្រុង Kuala Lumpor ។

លោកSarkunan Subramaniam នាយកគ្រប់គ្រងក្រុមហ៊ុន Knight Frank ប្រចាំប្រទេសម៉ាឡេស៊ីបានឱ្យដឹងថា ការលក់អចនលទ្រព្យមិនចេញនេះ មិនបង្កអោយមានការការព្រួយបារម្ភខ្លាំងក្លានោះទេ។

លោកបានបន្ថែមថា “អ្វីដែលគួរឱ្យព្រួយបារម្ភ គឺនៅពេលដែលមានគម្រោងលក់មិនចេញ ហើយនឹងត្រូវគេបោះបង់ចោល ឬអ្នកអភិវឌ្ឃន៍មានធ្លាក់ចុះ”។

ទោះជាយ៉ាងណាលោកបានសម្តែងសុទិដ្ឋិនិយមផងដែរថា “ទីផ្សារអចលនទ្រព្យនឹងមានសន្ទុះឡើងវិញ និងមានទំនុកចិត្តនៅឆ្នាំក្រោយនេះ ដើម្បីកាត់បន្ថយស្ថានភាពដ៏អាក្រក់នេះ”៕

ដោយ គង់ សូរិយា

       ភ្នំពេញ៖ ទីផ្សារការិយាល័យមិនទាន់ឆ្អែតនៅឡើយទេ ដោយអាគារការិយាល័យថ្មី​កប់ពពកមួយស្ថិតនៅលើមហាវិថីព្រះនរោត្តម នឹងបើកដំណើរការនៅចុងត្រីមាសទី៣ខាងមុខនេះ។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia ដែលទទួលសិទ្ឋិគ្រប់គ្រងការជួលផ្តាច់មុខ នៃគំរោងនេះបានឲ្យដឹងតាមទូរស័ព្ទនារសៀលថ្ងៃទី២ កក្កដានេះថា អាគារការិយាល័យប្រណីត Key Stone នឹងបើកដំណើរការនៅចុងត្រីមាសទី៣ឆ្នាំនេះ ដែលវានឹងក្លាយជាអាគារការិយាល័យលំដាប់B Plusថ្មីមួយសម្រាប់ទី​ក្រុងភ្នំពេញ។ គំរោងនេះនឹងដាក់ជួលក្នុងតម្លៃ២២ដុល្លារ បូកនឹងថ្លៃសេវាកម្មគ្រប់គ្រងចំ​នួន៤ដុល្លារក្នុងមួយម៉ែត្រការ៉េ។

អាគារ Key Stone នឹងមានការប្រើប្រាស់ចម្រុះផងដែរ ដែលមានធនាគារនៅជាន់ខាងក្រោម និង Sky Bar នៅជាន់ខ្ពស់ជាងគេនៃអាគារ ដែលមានកំពស់សរុប២០ជាន់នេះ។

អ្នកនាងអាន សុធីតាបានបន្តថា គំរោងនេះត្រូវបានវិនិយោគដោយក្រុមហ៊ុនក្នុងស្រុក និងក្រុមហ៊ុន ដែលមានមូលដ្ឋាននៅកោះតៃវ៉ាន់ ហើយប្រើប្រាស់សេវាកម្មរបស់ CBRE Cambodia ជាភ្នាក់ងារជួលផ្តាច់មុខ។ អ្នកនាងបន្តថា ទីផ្សារការិយាល័យដែលមានម្ចាស់តែមួយ មិនមានបញ្ហានៅក្នុងទីផ្សារទេ ប៉ុន្តែយើងមានការព្រួយបារម្ភពីទីផ្សារការិយាល័យបែបសហកម្មសិទ្ឋ ដែលមានការផ្គត់ផ្គង់ច្រើនរហូតដល់ជាង៦០,០០០ម៉ែត្រ​ការ៉េនៅក្នុងឆ្នាំនេះ។

អាគារការិយាល័យ Key Stone ស្ថិតនៅលើមហាវិថីព្រះនរោត្តម ក្នុងសង្កាត់បឹងកេងកង១ ខ័ណ្ឌចំការមន ជាតំបន់បណ្តុះទៅដោយសកម្មភាពពាណិជ្ជកម្ម សេវាកម្មយ៉ាងរសរវើក។

ការកើនឡើងនូវការផ្គត់ផ្គត់អាគារការិយាល័យថ្មីៗ កំពុងឆ្លើយតបការរីកចម្រើនសេដ្ឋកិច្ចកម្ពុជា ពិសេសការកើនឡើងនូវក្រុមហ៊ុនក្នុងស្រុកថ្មីៗ និងការកើនឡើងនៃក្រុម​ហ៊ុនអន្តរជាតិ ដែលបានចូលមកកាន់ទីផ្សារកម្ពុជាយ៉ាងគំហុក៕

ដោយ វុត្ថា

ភ្នំពេញ៖ មហាយក្សចិននៅមិនស្កប់ឡើយ នៅពេលវិស័យអចលនទ្រព្យក្នុងប្រទេ​សរបស់ខ្លួន មានភាពមិនប្រក្រតីដោយអ្នកអភិវឌ្ឍន៍ និងទីភ្នាក់ងារអចលនទ្រព្យមួយចំនួនធ្វើសកម្មភាពដោយគ្មានច្បាប់ទម្លាប់ ឬមិនបានសុំការអនុញ្ញាពីអាជ្ញាធរ។

យោងតាមការចុះផ្សាយរបស់សារព័ត៌មានចិន Xinhua បានអោយដឹងកាលពីពេលថ្មីៗនេះថា អជ្ញាធរលំនៅដ្ឋានចិន កំពុងចាត់វិធានការក្តៅនៅទូទាំងប្រទេស ទៅលើអ្នកអភិវឌ្ឍន៍ និងទីភ្នាក់ងារអចលនទ្រព្យដែលមិនបានគោរពច្បាប់អោយបានត្រឹមត្រូវ។

តាមរបាយការណ៍របស់ក្រសួងលំនៅដ្ឋាន និងការអភិវឌ្ឍន៍ជនបទ និងទីប្រជុំជនរបស់ចិនបានឲ្យដឹងថា មានទីក្រុងចំនួន៣០នៃប្រទេសចិន នឹងត្រូវធ្វើការត្រួតពិនិត្យចំពោះភាពមិនប្រក្រតីខាងផ្នែកអចលនទ្រព្យ ដោយសារមានក្រុមហ៊ុនមួយចំនួនបានធ្វើសកម្មភាពផ្សព្វផ្សាយជាសាធារណៈ នូវពាណិជ្ជកម្មមិនពិតក្នុងការផ្តល់វិញ្ញាបនបត្រក្លែងក្លាយ ការប្រឌិតព័ត៌មានអំពីការលក់លំនៅដ្ឋាន អតិផរណាសិប្បនិម្មិតនៃតម្លៃផ្ទះ ការប្រើប្រាស់ប្រាក់កម្ចីខុសច្បាប់ និងឧបករណ៍ហិរញ្ញវត្ថុផ្សេងៗទៀត។

យុទ្ធនាការចុះបង្ក្រាបចំពោះករណីមិនប្រក្រតីនេះ បានចាប់ផ្តើមពីថ្ងៃទី ១ ខែកក្កដាដល់ថ្ងៃទី៣១ ខែធ្នូខាងមុខនេះ។ សាធារណជនទូទៅ និងអជ្ញាធរពាក់ព័ន្ធត្រូវបានលើកទឹកចិត្តឱ្យចូលរួមជាមួយអាជ្ញាធរចិន ដើម្បីចាត់វិធានការចំពោះភាពមិនប្រក្រតីចំពោះវិស័យអចលនទ្រព្យមួយនេះ ដែលកំពុងមានការរីកចម្រើនក្នុងតំបន់អាស៊ី។

ទីក្រុងធំៗ ដូចជា ទីក្រុង Wuhan និង ទីក្រុង Chengdu ព្រមទាំងទីក្រុងតូចៗដូចជា ទីក្រុង Yichang និង ទីក្រុង Foshan ត្រូវបានគេចាត់បញ្ចូល ដែលមានភាពមិនប្រក្រតីលើវិស័អចលទ្រព្យខ្លាំងជាងគេ ក្រៅពីទីក្រុងប៉េកាំង និងសៀងហៃជាដើម។

ការបង្រ្កាបនេះបង្ហាញពីជំហ៊ានថ្មីមួយទៀត ដែលធ្វើឡើងដោយក្រុងប៉េកាំង ដើម្បីទប់ស្កាត់ការកើនឡើងតម្លៃលំនៅឋាន នៅទូទាំងទាំងប្រទសចិន ក៏ដូចជាធ្វើឱ្យមានលក្ខណៈស្តង់ដារលើវិស័យអចលនទ្រព្យ៕

ដោយ គង់ សូរិយា     

ភ្នំពេញ៖ អ្នកមានលុយ មិនប្រាកដថាវិនិយោគទទួលបានជោគជ័យនោះទេ ហេតុ​នេះអ្នកគួរសិក្សាពីហានិភ័យចំពោះមុខជាមុន ដើម្បីយកមកធ្វើការវិភាគពិចារណា មុនសម្រេចចិត្តវិនិយោគលើអចលនទ្រព្យនានា។

ជាអ្នកអភិវឌ្ឍន៍និងមានជំនាញផ្នែកអចលនទ្រព្យលោកង៉ែត ជូបានមានប្រសាស​ន៍ឲ្យដឹងនាពេលថ្មីៗនេះថា ការវិនិយោគអចលនទ្រព្យមិនទទួលបានជោគជ័យ ដោយ​សារកត្តាសំខាន់ៗចំនួន៥ ដូចជា ទី១ មិនបានដឹងថាដីធ្លីជាទ្រព្យសកម្មរយៈពេលវែង (Long Term Asset) ហើយយល់ថាទិញ១រយៈពេលខ្លី រួចលក់យកចំណេញ។ តាមពិតទ្រព្យសកម្មរយៈពេលវែង មិនអាច (ឬពិបាក) លក់យកជាសាច់ប្រាក់ក្នុងរយៈពេលខ្លី (តិចជាង១ឆ្នាំ)ណាស់។

ទី២ វិនិយោគនៅពេលទីផ្សារពុះកញ្ជោលខ្លាំង: ចេះតែតាមគេតាមឯង គ្មានគោល

ដៅច្បាស់លាស់។ ខណៈបែបហ្នឹងងាយនឹងបរាជ័យណាស់។ សំរាប់ខ្ញុំ ខ្ញុំចូលចិត្តស្ទូចត្រីនៅកន្លែងដែលគ្មានអ្នកស្ទូច។ ទី៣ ទៅសំកុកចាំយូរពេក: កុំដាំដើមត្នោតយកផ្លែ គួរទិញដើមត្នោតដែលជិតផ្លែ ទើបងាយបានផល។ កុំវិនិយោគឆ្ងាយពេក នាំកប់យូរ។ ត្រឹម ៣០-៤០គម ពីក្រុងជាការល្អ។

ទី៤ ក្តាប់ពត៌មានមិនជុំដោយខ្វះបណ្តាញទំនាក់ទំនង: ដោយសារដីធ្លីជាទ្រព្យសកម្មរយៈពេលវែង មិនងាយលក់ ការក្តាប់បានពត៌មានសំខាន់ណាស់។ ទី៥ មិនយល់ពីសក្តានុពលរបស់ដី និងតំរូវការ អាចសមនឹងយកទៅអភិវឌ្ឍជាអ្វី? អ្នកណាជាអ្នកនឹងទិញបន្តរ? គេមានលទ្ធភាពផ្នែកហិរញ្ញវត្ថុបែបណា។

ទាក់ទងនឹងការវិនិយោគលើដីធ្លី ដើម្បីទទួលបានផលចំណេញវិញ លោកឧកញ៉ាសៀ រិទ្ឋីអគ្គនាយកក្រុមហ៊ុន World BridgeLand Group បានថ្លែងថា ការវិនិយោគលើដីធ្លីដើម្បីទទួលបានផលចំណេញ ត្រូវពឹងផ្អែកលើកត្តាសេដ្ឋកិច្ច ស្ថានភាពនយោបាយល្អ​ប្រសើរ ប៉ុន្តែអ្វីជាពិសេសនោះអ្នកវិនិយោគត្រូវរកព៌តមានឲ្យបានមុនគេ ពីគំរោងឬផែន​ការអភិវឌ្ឍន៍របស់រដ្ឋាភិបាល ទិញដីនៅក្នុងតម្លៃទាប ព្រោះបើទិញនៅក្នុងតម្លៃខ្ពស់ ហើយ​ព៌តមានគេដឹងគ្រប់គ្នាហើយ យើងមិនទទួលបានផលចំណេញច្រើននោះទេ។

លោកបន្តថា “ការសិក្សាពីផែនការអភិវឌ្ឍន៍ហេដ្ឋារចនាសម្ព័ន្ឋ ដឹងព៌តមានមុនគេ ទិញឲ្យបានមុនគេ យើងនឹងទទួលបានជោគជ័យហើយ”៕

ដោយ គង់ សូរិយា

       ភ្នំពេញ៖ ពានរង្វាន់សំរាប់ក្រុមហ៊ុនអចលនទ្រព្យនៅកម្ពុជា ជាលើកតំបូងនឹងប្រកាស និងផ្តល់ជូនក្រុមហ៊ុនអចលនវត្ថុឆ្នើមនៅកម្ពុជាជាលើកតំបូងនៅចុងសប្តាហ៍នេះហើយ។

ក្រុមហ៊ុនគេហទំព័រ Realestate.com.kh សហការជាមួយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងក្រសួងសេដ្ឋកិច្ចនិងហិរញ្ញវត្ថុជាអ្នកសហការរៀបចំពានរង្វាន់អចលនវត្ថុកម្ពុជាឆ្នាំ២០១៨ (Cambodia real estate award 2018)

យោងតាមសេចក្តីប្រកាសព៌តមានរបស់គេហទំព័រ Realestate.com.khដែលបានចែកជូនបណ្តាញអ្នកសារព៌តមាន ក្នុងសន្និសីទសារព៌តមានកាលពីពេលថ្មីៗនេះថា ការរៀបចំពានរង្វាន់នេះ ដើម្បីជំរុញដល់វិស័យអចលនវត្ថុ ដែលជាការលើ​ក​ទឹកចិត្តដល់អ្នកខិតខំប្រឹងប្រែង និងមានជំនាញវិជ្ជាជីវៈច្បាស់លាស់។ ក្រុមហ៊ុន អ្នកអភិវឌ្ឍន៍ និងភ្នាក់ងារអចលនវត្ថុ អាចដាក់ពាក្យចូលរួមកម្មវិធីនេះដោយឥតគិតថ្លៃ។ នេះជាលើកតំបូងនៅក្នុងប្រវត្តិសាស្រ្ត ដែលការខិតខំប្រឹងប្រែងនិងភាពជោគជ័យ នៃវិស័យអចលនវត្ថុត្រូវត្រួវទទួលស្គាល់ជាសាកល។

អគ្គនាយកក្រុមហ៊ុនគេហទំព័រ realestate.com.kh លោក Tom O’sullivanបានថ្លែងថា​ នេះគឺជាឳកាសដែលក្រុមហ៊ុន realestate.com.kh ដើម្បីជម្រុញវិស័យ​អចលនវត្ថុកម្ពុជា ដោយផ្តល់ឳកាសដល់ក្រុមហ៊ុនទាំងអស់នៅក្នុងវិស័យ ដើ​ ម្បីឲ្យពួកគេបង្ហាញពីសមិទ្ឋិផល ដែលធ្វើបានកន្លងមក។លោកបន្តថា យើងមានភាពរីករាយ ក្នុងការប្រកាសធ្វើពានរង្វាន់អចលនវត្ថុ២០១៨ ក្រោមការគាំទ្រពីក្រ​សួងសេដ្ឋកិច្ចនិងហិរញ្ញវត្ថុ ហើយយើងសង្ឃឹមយ៉ាងមុតមាំថា ពានរង្វាន់ប្រចាំឆ្នាំ​នេះ នឹងក្លាយជាសករាជថ្មីមួយ និងឧត្តមភាពមួយសម្រាប់វិស័យអចលនវត្ថុកម្ពុជាទាំងមូល។

គណៈកម្មការរៀបចំពានរង្វាន់នេះ នឹងផ្តល់រង្វាន់ចំនួន៣០ដល់ក្រុមហ៊ុននានា ដែលបានចូលរួម និងជាប់ក្នុងកម្មវិធីនេះ។

ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានឧស្សាហ​កម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុលោកម៉ី វ៉ាន់បានថ្លែងថា កម្មវិធីនេះគឺជាវេទិកាមួយ ដើម្បីលើកទឹកចិត្ត និងផ្តល់រង្វាន់ដល់ភ្នាក់ងារ ក្រុមហ៊ុនភ្នាក់​ងារអចលនវត្ថុ ដែលធ្វើប្រតិបត្តិការប្រកបដោយក្រមសីលធ៌មវិជ្ជាជីវៈ និងអនុ​លោមតាមច្បាប់ និងបទបញ្ញត្តិដែលមានជាធរមាននៅកម្ពុជា។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិតគីម ហ៊ាងបានថ្លែងថា “វាមិនមែនជាពានរង្វាន់របស់ CVEA មិនមែនពានរង្វាន់របស់ Realestate.com.kh ទេ តែសម្រាប់កម្ពុជា សម្រាប់វិស័យអចលនវត្ថកម្ពុជា”។

លោកបណ្ឌិតសុក ស៊ីផាន់ណាទីប្រឹក្សារាជរដ្ឋាភិបាល និងជាប្រធានគណកម្មការវាយតម្លៃពានរង្វាន់នេះបានមានប្រសាសន៍ថា ពានរង្វាន់នេះមានសារសំ​ខាន់ណាស់ ដែលវានឹងលើកស្ទួយកិត្យានុភាពកម្ពុជា ក្នុងកម្រិតតំបន់និងពិភព​លោក ហេតុនេះពានរង្វាន់នេះនឹងធ្វើឡើងដោយសុក្រិតភាពបំផុត និងឈរលើយុត្តិធ៌ម គុណតម្លៃ និងឯករាជ្យភាព។លោកបន្តថា ក្នុងការងារជាសាស្រ្តាចារ្យ ជាអ្នកផ្តល់ពិន្ទុ លោកមិនមែនជាមនុស្សដែលងាយផ្តល់ពិន្ទុល្អនោះទេ ហេតុនេះអ្នក​ចូលរួមក្នុងកម្មវិធីនេះ និងទទួលបានពានរង្វាន់នឹងកសាងកេរ្ត៍ឈ្មោះរបស់ខ្លួនបាន៕