ដោយ វុត្ថា

ភ្នំពេញ៖ មន្ត្រីជាន់ខ្ពស់ក្រសួងសាធារណៈការនៃប្រទេសកម្ពុជា និងប្រទេសថៃនឹងជួបចចារគ្នានៅក្នុងប្រទេសកម្ពុជា ដើម្បីបញ្ចប់កិច្ចព្រមព្រៀងមួយចំនួនស្តីពី ការតភ្ជាប់ការដឹកជញ្ជូនតាមផ្លូវដែក ។

លោកទេសរដ្ឋមន្ត្រី ស៊ុន ចាន់ថុល ថ្លែងនៅក្នុងពិធីបើកឱ្យដំណើរការផ្លូវដែកទិសពាយ័ព្យ ភ្នំពេញ ពោធិ៍សាត់ជាបណ្ដោះអាសន្ននៅថ្ងៃទី៤ ខែកក្កដាឆ្នាំ ២០១៨ នេះថា រដ្ឋមន្ត្រីក្រសួងសាធារណៈការ និងដឹកជញ្ជូនរបស់ប្រទេសថៃលោក Arkhom Termpittayapaisith នឹងដឹកនាំគណប្រតិភូមកបំពេញទស្សនកិច្ចផ្លូវការ ក្នុងប្រទេសកម្ពុជា ដើម្បីចចារជាលើកចុងក្រោយ ក្នុងការសម្រួលដល់ការដឹកជញ្ជូនទំនិញ និងដឹកអ្នកដំណើរទៅវិញទៅមក។

លោកបន្តថា ក្រោយមានការចចារបានបញ្ចប់នូវកិច្ចព្រមព្រៀនេះ នាយករដ្ឋមន្ត្រីនៃប្រទេសទាំងពីនេះ ដែលមានសម្តេចតេជោ ហ៊ុន សែន និង លោកប្រាយុទ្ធ ចាន់អូចា នាយរដ្ឋមន្ត្រីនៃប្រទេសថៃ នឹងធ្វើពិធីសម្ពោធដាក់អោយប្រើប្រាស់ជាផ្លូវការ ដោយធ្វើដំណើរតាមរថភ្លើងឆ្លងកាត់ព្រុំដែន នៃប្រទេសទាំងពីរនាពេលខាងមុខនេះ។ លោកបន្តថា មិនយូមិនឆាប់ប្រជាពលរដ្ឋ នឹងអាចធ្វើដំណើរពីភ្នំពេញទៅកាន់ប្រទេសថៃ ពីប្រទេសថៃទៅកាន់ប្រទេសសឹង្ហបុរី តាមរយៈរថភ្លើងដែលដាក់អោយដំណើរនៅពេលនេះ។

លោក Arkhom Termpittayapaisith រដ្ឋមន្ត្រីក្រសួងដឹកជញ្ជូនរបស់ប្រទេសថៃ បានថ្លែងប្រាប់សារព័ត៌មានក្នុងស្រុក កាលពីខែមិថុនាកន្លងមកថា ផ្លូវដែករវាងប្រទេសថៃ និងកម្ពុជានឹងរត់តាមស្រុក Aranyaprathet នៃខេត្តSa Kaeo ចូលមកស្ថានីយរថភ្លើងក្រុងប៉ោយប៉ែត អាចត្រូវបើកដំណើរការក្នុងរយៈពេល២ខែទៀតប៉ុណ្ណោះ។

លោកស៊ុន ចាន់ថុល ក៏ធ្លាប់មានបានឲ្យដឹងដែរថា ផ្លូវដែកកម្ពុជាបានតភ្ជាប់ជាមួយផ្លូវដែករបស់ប្រទេសថៃរួចរាល់ហើយ នៅរង់ចាំតែចុះកិច្ចព្រមព្រៀងរវាងកម្ពុជា និងថៃ ដែលមានពាក្យពេចន៍ មួយចំនួនក្នុងកិច្ចព្រមព្រៀងនោះ នៅមិនទាន់ឯកភាពគ្នានៅឡើយ​។ ពាក្យមួយម៉ាត់ៗក្នុងកិច្ចព្រមព្រៀងនោះ គឺសំខាន់ណាស់ អាចប៉ះពាល់ដល់បូរណភាពទឹកដី។ ដូច្នេះហើយនៅមានពាក្យពេចន៍មួយចំនួន ភាគីទាំងសងខាងនៅមិនទាន់ឯកភាពគ្នា»។

ស្ពានផ្លូវដែកមិត្តភាពកម្ពុជា ថៃនេះ ត្រូវបានបើកការដ្ឋានសាងសង់នៅឆ្នាំ២០១៤ ក្នុងទំហំទឹកប្រាក់ប្រមាណ១លានដុល្លារ ដែលជាថវិការបស់ភាគីថៃ៕

​ដោយវុត្ថា

​ភ្នំពេញ: អ្នកវិនិយោគជប៉ុនក៏ដូចជាអ្នកវិនិយោគដទៃទៀត នៅតែទទួលបានការស្វាគមន៍យ៉ាងកក់ក្តៅពីរដ្ឋាភិបាលកម្ពុជា នៅពេលពួកគេមានបំណងឬចូលមកវិនិយោគ​នៅប្រទេសនេះ។

រដ្ឋមន្ត្រីក្រសួងពាណិជ្ជកម្ម លោកប៉ាន សូរស័ក្តិ បានមានប្រសាសន៍ក្នុងជំនួបជា​មួ​យលោកMasashi Kono ប្រធានអង្គការពាណិជ្ជកម្មក្រៅស្រុកជប៉ុន (JETRO) ដែលត្រូវបញ្ចប់អាណត្តិការងារនៅថ្ងៃទី ៤ ខែកក្កដា ឆ្នាំ២០១៨នេះថា រដ្ឋាភិបាលកម្ពុជានៅតែបន្តផ្តល់ការគាំទ្រគ្រប់បែបយ៉ាងជូនវិនិយោគិនជប៉ុន ដែលមានបំណងបណ្តាក់ទុនលើវិស័យធុរកិច្ចផ្សេងៗនៅកម្ពុជា ដើម្បីពង្រឹងកិច្ចសហប្រតិបត្តិការពាណិជ្ជកម្ម សេដ្ឋកិច្ច និងវិនិយោគរវាងប្រទេសកម្ពុជា និងជប៉ុន។

លោករដ្ឋមន្ត្រីបានស្វាគមន៍ ចំពោះលោកប្រធានអង្គការ JETROថ្មី និងបានលើកឡើងអំពីទំនាក់ទំនងល្អរវាងប្រទេសទាំងពីរ ដែលបច្ចុប្បន្នបានក្លាយជាដៃគូយុទ្ធសាស្ត្រលើផ្នែកការទូត សេដ្ឋកិច្ច និងពាណិជ្ជកម្ម។

រដ្ឋមន្រ្តីពាណិជ្ជកម្មកម្ពុជា ក៏បានស្នើលោកប្រធានអង្គការJETROថ្មី ជំរុញវិនិយោគិ​នជប៉ុន ពង្រឹងកិច្ចសហការជាមួយសហគ្រាសធុនតូច និងធម្យមកម្ពុជា ដើម្បីអភិវឌ្ឍន៍ផលិតផលខ្មែរឲ្យមានគុណភាព និងស្តង់ដារខ្ពស់ សំដៅឆ្លើយតបតម្រូវការទីផ្សារក្នុងស្រុក និងនាំចេញទៅកាន់ទីផ្សារជប៉ុន។

លោកបន្តថា “កម្ពុជាកំពុងត្រូវការវិនិយោគិនជប៉ុន មកសហការជាមួយ SME ក្នុងការអភិវឌ្ឍខ្សែសង្វាក់តម្លៃផលិតផលមួយចំនួន ឲ្យមានគុណភាពខ្ពស់ និងស្តង់ដារបែបជប៉ុន ដើម្បីដាក់លក់នៅផ្សារ AEON និងនាំចេញ”។

លោក ម៉ាសាស្ហិ កូណូ និងលោក មីយ៉ាអុ ម៉ាសាហ៊ិរ៉ុ បានថ្លែងអំណរគុណដល់រដ្ឋមន្រ្តីពាណិជ្ជកម្មកម្ពុជា ដែលចែករំលែកនូវព័ត៌មានល្អៗ ស្តីពីទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសកម្ពុជា និងជប៉ុន ព្រមទាំងផ្តល់ការគាំទ្រជានិច្ចចំពោះវិនិយោគិន និងធុរជប៉ុន ក្នុងការប្រកបធុរកិច្ចនៅក្នុងប្រទេសកម្ពុជា។

លោក មីយ៉ាអុ ម៉ាសាហ៊ិរ៉ុ ប្រធានអង្គការJETROថ្មី បានសន្យាខិតខំផ្សព្វផ្សាយអំពីឱកាស និងសក្តានុពលវិនិយោគរបស់ប្រទេសកម្ពុជា ដល់សហគមន៍ធុរកិច្ចនៅក្នុងប្រទេ​សជប៉ុន ដើម្បីកៀងគរវិនិយោគិនជប៉ុន ឲ្យចូលមកបណ្តាក់ទុនកាន់តែច្រើន លើវិស័យ SME និងវិស័យអទិភាពផ្សេងៗរបស់កម្ពុជា សំដៅរួមចំណែកជាមួយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ៕

ដោយវុត្ថា

ភ្នំពេញ: សសៃឈាមសេដ្ឋកិច្ចផ្លូវដែកជាប្រវត្តិសាស្រ្តថ្មីមួយ ដែលបានបោះបង់ចោល៤៥ឆ្នាំ ត្រូវបានតភ្ជាប់រវាងភាគពាយ័ព្យប្រទេស មកកាន់រាជធានីភ្នំពេញ ដើម្បីជំរុញការដឹកជញ្ជូន និងលើកស្ទួយកំណើនសេដ្ឋកិច្ចជាតិ។

លោកទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបើកឱ្យដំណើរការផ្លូវដែកទិសពាយ័ព្យ ភ្នំពេញនាព្រឹកថ្ងៃទី៤ កក្កដានេះ។

ផ្លូវដែកពោធិ៍សាត់ ភ្នំពេញមានប្រវែង១៦៦គ.ម ឆ្លងកាត់ខេត្តពោធិ៍សាត់ កំពង់ឆ្នាំង-កំពង់ស្ពឺ-កណ្តាល និងរាជធានីភ្នំពេញ ដែលត្រូវចំណាយអស់ទឹកប្រាក់២៣.៤ លានដុល្លារដែលចំណាយដិយថវិកាជាតិ។ កំណាត់ផ្លូវដែកពីពោធិ៍សាត់-ភ្នំពេញនេះ ប្រើដែករ៉ៃចាស់(បារាំង) កំណល់ដែកដែលអាចបើកបរបានក្នុងល្បឿន៣០គ.ម/១ម៉ និងអាចទ្រទំងន់បាន១៥តោន ក្នុង១ភ្លៅកង់ហើយមានស្ថានីយចំនួន២០ រួមមាន ពោធិ៍សាត់-ទទឹងថ្ងៃ កំរ៉ែង បំណក់ ក្តុល ក្រាំងស្គារ រមាស បារាំង ក្រាំងល្វា មានក(Meanork)-ត្បែងខ្ពស់-ដំណាក់ស្មាច់-ត្រាចទង-បាត់ដឹង-ទួលលៀប-ត្រពាំងត្នោត-សំរោង-ផ្លូវបំបែក-ពោធិ៍ចិនតុង-ភ្នំពេញ។

កំណាត់ផ្លូវដែកពោធិ៍សាត់ ភ្នំពេញ គឺធ្វើឡើងដើម្បីតភ្ជាប់ទាំងស្រុងផ្លូវដែកភាគខាងជើងភ្នំពេញ ប៉ោយប៉ែតដែលមានប្រវែង ៣៨៦គ.ម។ ផ្លូវដែកនេះបានចាប់ផ្ដើមការសាងដំបូងក្នុងឆ្នាំ១៩២៩ ហើយត្រូវបានបំផ្លាញដោយសង្គ្រាម។ ក្រោមនយោបាយឈ្នះ ឈ្នះ និងការដឹកនាំប្រកបដោយគតិបណ្ឌិត របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្លូវដែកនេះត្រូវបានចាប់ផ្តើមស្តារឡើងវិញនៅឆ្នាំ២០០៩  ដោយចាប់ផ្ដើមសាងសង់ជាដំណាក់ៗ ហើយការតភ្ជាប់ពីពោធិ៍សា​ត់មកភ្នំពេញជាដំណាក់កាលចុងក្រោយ ក្នុងការតភ្ជាប់ផ្លូវដែកពីភ្នំពេញទៅប៉ោយប៉ែត។

លោកទេសរដ្ឋមន្ត្រីស៊ុន ចានថុលបានគូសបញ្ជាក់ថា ផ្លូវដែកភាគខាងជើងនេះ គឺជាផ្លូវសេដ្ឋកិច្ចមួយដ៏មានសក្ដានុពល ក្នុងការដឹកជញ្ជូនផលិតផលនានារបស់បងប្អូនទៅកាន់ទីផ្សារក្នុងតំបន់ និងពិសេសលើសពីនេះទៅទៀត គឺការធ្វើពាណិជ្ជកម្មជាមួយប្រទេ​សថៃ ដែលបងប្អូនប្រជាពលរដ្ឋអាចដឹកទំនិញពីកម្ពុជាទៅថៃ និងដឹកទំនិញពីប្រទេសថៃមកកម្ពុជាវិញ ប្រកបដោយភាពងាយស្រួល សុវត្ថិភាពខ្ពស់ និងចំណាយតិច ព្រោះថាផ្លូវដែកនេះ នឹងត្រូវតភ្ជាប់ជាមួយផ្លូវដែកនៃព្រះរាជាណាចក្រថៃនាពេលខាងមុខដ៏ខ្លីនេះ។ មួយផ្នែកទៀត ផ្លូវនេះបានចូលរួមចុះណែកយ៉ាងសំខាន់ ក្នុងការកាត់បន្ថយការកកស្ទះចរាចរណ៍ គ្រោះថា្នក់ចរាចរណ៍ និងផ្ដល់ការប្រកួតប្រជែងក្នុងវិស័យដឹកជញ្ជូន។

លោកបន្ថែមថា រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា នឹងមានគម្រោងជាច្រើនទៀត ក្នុងការធ្វើទំនើបកម្មលើផ្លូវដែកនេះ ដូចជា៖ ការសាងសង់និងជួសជុលស្ថានីយ៍រថភ្លើង ព្រមទាំងបំពាក់ស្លាកសញ្ញាសុវត្ថិភាពផ្លូវដែកពីភ្នំពេញ-ប៉ោយប៉ែត ការសាងសង់ទីលានកុងតែន័រផ្លូវដែកនៅស្ទឹងបត់។ ការសិក្សាដើម្បីរៀបចំឲ្យមានរថភ្លើងលើអាកាសដំណើរការ ដោយស្វ័យប្រវត្តិនៅក្នុងក្រុងភ្នំពេញ ការតភ្ជាប់ផ្លូវដែកពីភ្នំពេញទៅកំពង់ផែស្វយ័តភ្នំពេញថ្មី ការតភ្ជាប់ផ្លូវដែកទៅតំបន់សេដ្ឋកិច្ចពិសេស ដូចជាពីស្ថានីយ៍ទូកមាសទៅរោងចក្រស៊ីម៉ង់ត៍ចក្រីទីង ពីស្ថានីយ៍វាលរេញទៅកំពង់ផែកែវផុស ការជំរុញឱ្យមានការវិនិយោគផ្លូវដែក ភាគខាងជើងភ្នំពេញ-ស្នូល-ស្ទឹងត្រែង ប្រវែង២៤៨គ.ម ការជំរុញឱ្យមានការវិនិយោគផ្លូវដែកពីភ្នំពេញ-សៀមរាប សិរីសោភ័ណ និងការជំរុញឱ្យមានការវិនិយោគផ្លូវដែក តភ្ជាប់ទៅប្រទេសវៀតណាម៕

ដោយ ដែន ចែងចាំង

ភ្នំពេញ៖ ដើម្បីឆ្លើយតបតាមតម្រូវការចាំចាច់ នៃការរីកចម្រើនសេដ្ឋកិច្ចជាតិ ក្រសួងនឹងចាប់ផ្តើមសាងសង់មន្ទីរពិសោធន៍ខ្នាតធំលើកតំបូង ដើម្បីជួយឲ្យវិស័យឧស្សាហកម្មនៅកម្ពុជា ឈានឆ្ពោះទៅមុខប្រកបដោ​យប្រសិទ្ធភាព។

លោកទេសរដ្ឋមន្រ្តី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានលើកឡើងកាលពីថ្ងៃទី ៣ ខែកក្កដា ឆ្នាំ២០១៨កន្លងមកថា ក្រសួងឧស្សាហកម្ម និងសិប្បកម្មបានជួបប្រទះការខ្វះខាត ឧបករណ៍ពិសោធន៍ជាច្រើន ក្នុងការបម្រើសេវាលើផ្នែកឧស្សា​ហកម្ម ជូនសហគ្រាស បណ្តារោងចក្រឧស្សាហកម្ម និងសិប្បកម្មនានាជាដើម។ លោកបន្តថា កន្លងមកមានប្រទេសជាដៃគូរ មានបំណងចង់ជួយផ្តល់ឧបករណ៍ពិសោធន៍ជាច្រើន ប៉ុន្តែមន្ទីរពិសោធន៍ដែលកំពុងដំណើរបច្ចុប្បន្នមានទំហំតូច និងមិនអាចដាក់ឧបករណ៍បានច្រើន ដូច្នេះការចាប់ផ្តើមសាងសង់មន្ទីរពិសោធន៍នៅទីតាំងនេះ។

លោកបន្តថា​ “គំរោងបង្កើតមន្ទីរពិសោធន៍ខ្នាតធំ ដើម្បីឆ្លើយតបតាមតម្រូវការចាំចាច់ នៃការរីកចម្រើនសេដ្ឋកិច្ចជាតិយើង និងជាការចាំបាច់របស់សហគ្រាស ក្រុមហ៊ុន ឧស្សាហកម្ម និងសិប្បកម្ម ជាពិសេសដើម្បីជួយឲ្យវិស័យទាំងនោះ ឈានឆ្ពោះទៅមុខប្រកបដោយប្រសិទ្ធភាព”។

តាមព៌តមានដែលpropertyarea.asiaទទួលបានឲ្យដឹងថា គម្រោងសាងសង់មន្ទីរពិសោធន៍ នឹងចាប់ផ្តើមសាងសង់ក្នុងរយៈពេលឆាប់ៗខាងមុខនេះ ដោយគ្រោងសាងសង់អាគារមានទំហំ២០ គុណ នឹង៣០ម៉ែត្រ កម្ពស់៧ជាន់ នៅលើផ្ទៃដីជាង៦ពាន់ម៉ែត្រការរ៉េ។ ក្រៅពីការសាងសង់អាគារក្រសួងឧស្សាហកម្មនិងសិប្បកម្ម ក៏មានគម្រោងសាងសង់អាងប្រព្រឹត្តកម្មទឹកស្អាត សួនច្បារ និងរួមបញ្ចូលចំណតរថយន្តផ្សេងៗផងដែរ៕

ដោយគង់ សូរិយា

ភ្នំពេញ៖ អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម បានអំពាវនាវដល់សាធារណៈជនសូមកុំទិញនិងទទួលទានផលិ​តផល Kellogg’s HoneySmack cereal ដោយក្រុមហ៊ុន Kellogg Company របស់សហរដ្ឋអាមេរិកក្រោយក្រុមហ៊ុនរកឃើញថាមានសារជាតិពុលនិងមេរោគចម្លង។

យោងតាមសេចក្តីជូនដំណឹងរបស់អគ្គនាយកដ្ឋានកម្ពុជា ត្រួតពិនិត្យទំនិញនីហរ័ណ អាហរ័ណ និងបង្រ្កាបការក្លែងបន្លំ (កាំកុងត្រូល) ឲ្យដឹងនៅរសៀលថ្ងៃទី៣ ខែកក្កដា ឆ្នាំ២០១៨នេះ បានធ្វើការជម្រាបជូនដល់សាធារណៈ ពាណិជ្ជករ នាំចូល អាជីវករលក់ដុំ លក់រាយជ្រាបថា រដ្ឋបាលឱសថ និងម្ហូបអាហារសហរដ្ឋអាមេរិក បានជូនដំណឹងអំពីការប្រមូលត្រឡប់មកវិញ ពីទីផ្សារសហរដ្ឋអាមេរិកដោយស្ម័គ្រចិត្ត នូវផលិតផល ខេឡូក ហាន់នី ម៉្មេកហ្សឺរៀល បន្ទាប់ពីរដ្ឋបាលឱសថនិងម្ហូបអាហារ រួមជាមួយមជ្ឈមណ្ឌលត្រួតពិនិត្យនិងការពារជម្ងឺឆ្លងសហរដ្ឋអាមេរិក បានស្រាវជ្រាវរកឃើញប្រភពនៃការពុលម្ហូបអាហារបណ្តាលមកពីការទទួល ទានផលិតផលខាងលើដែលចែកចាយដោយក្រុមហ៊ុនអាមេរិក មានសក្តានុពលចម្លងចូលបាក់តេរីសាម៉ុនណេឡា (Salmonella)។

ការទទួលទានអាហារ ដែលមានការចម្លងចូលបាក់តេរីនេះ បណ្តាលឲ្យមានជម្ងឺប្រព័ន្ធរំលាយអាហារ គ្រុនពោះវៀន។ល។ ស្រ្តីមានផ្ទៃពោះ ទារក កុមារតូច និងមនុស្សចាស់ គឺជាជនរងគ្រោះ។

សេចក្តីជូនដំណឹងដដែលបានបន្តថា ជុំវិញបញ្ហានេះអគ្គនាយកដ្ឋានកាំកុងត្រូលបាននឹងកំពុងចាត់វិធានការ រួមមាន រាំងខ្ទប់មិនឲ្យនាំចូលផលិតផលដូចបានអធិប្បាយ, ផ្តល់ព័តមានដល់ក្រុមហ៊ុននាំចូលដល់អាជីវករលក់ដុំ និងរាយក្នុងករណីមាននាំចូលនិងមានចរាចរលើទីផ្សារ និងត្រួតពិនិត្យនៅតាមទីផ្សារធំ តូច ផ្សារទំនើប ដើម្បីសម្របសម្រួ​ល និងមានវិធានការតាមនីតិវិធីប្រសិនបើមានការដាក់តាំងលក់។

សេចក្តីជូនដំណឹងដដែលបានបន្តព្រមានថា “ដើម្បីទប់ស្កាត់គ្រោះថ្នាក់ ដែលអាចប៉ះពាល់ដល់សុខភាពជាយថា​ហេតុ អគ្គនាយ​កដ្ឋានកាំកុងត្រូល បានអំពាវនាវដល់សាធារណៈជន សូមកុំទិញផលិតផលដូចជម្រាបជូនខាងលើ និងសូមជួយសហការផ្តល់ព័តមាន ដល់មន្រ្តីមានសមត្ថកិច្ចក្នុងករណីបងប្អូនប្រជាពលរដ្ឋបានជួបប្រទះ”៕