ដោយ ៖ ដែន ចែងចាំង

ភ្នំពេញ ៖ ផ្ទះសម្រាប់ធ្វើអាជីវកម្មមួយ (shop house) កំពុងពេញនិយមនិងទាក់ទា​ញការវិនិយោគច្រើនពីប្រជាពលរដ្ឋក្នុងស្រុក ដោយមើលឃើញនិន្នាការនេះអ្នកវិនិយោគក្នុងស្រុកមួយរូប បានសម្រេចសាងសង់ផ្ទះ shop House ដើម្បីបំពេញតម្រូវការទីផ្សារ។

លោកស្រី តាំង ហួរ អគ្គនាយិកាក្រុមហ៊ុន AMATAK Property Service Co, Ltd ដែលទទួលបានសិទ្ឋិលក់ផ្តាច់មុខនៃគំរោងនេះ បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១ មិថុនានេះថា គំរោងលំនៅដ្ឋានប្រណីត ដែលជាផ្ទះសម្រាប់ធ្វើអាជីវកម្មនេះ​ស្ថិតនៅផ្លូវលេខ១៩៥៨ សង្កាត់ភ្នំពេញថ្មី ខ័ណ្ឌសែនសុខ រាជធានីភ្នំពេញ។ គំរោងនេះនឹងសាងសង់ផ្ទះប្រកបដោយគុណភាព និងសោភ័ណភាពខ្ពស់ ដែលប្រើប្រាស់ឥដ្ឋ ២០ ជា​ប្រភេទលំនៅដ្ឋាន ដែលអ្នកវិនិយោគបានផ្តោតលើភាពជាគម្រូ ដើម្បីផ្តល់ឲ្យអតិថិជនរស់នៅឬប្រកបអាជីវកម្មប្រកបដោយផាសុខភាព។

ផ្ទះបែបអាជីវកម្មនេះ មានទំហំដី ៤,៥០ ម៉ែត្រ និងបណ្តោយ​ ៣០ ម៉ែត្រ និងសាច់ផ្ទះ ៤,២៥ គុណនឹង ១៨ ម៉ែត្រ និងដាក់លក់ក្នុងតម្លៃ​ ៣៩៧,០០០ដុល្លារអាមេរិក។ ផ្ទះនិមួយ​ៗមានបន្ទប់ចំនួន១០។ គំរោងនេះមានផ្ទះសរុបចំនួន១៤ ដែលបាននិងកំពុងសាងសង់និងបញ្ចប់ក្នុងរយៈពេល១ឆ្នាំ។ អ្វីកាន់តែពិសេសគឺផ្ទះនិមួយៗ មានកំពស់៦ជាន់ និងមាន១០បន្ទប់។ លើសពីនេះផ្ទះនិមួយៗ ត្រូវបានរៀបចំប្រអប់សម្រាប់ជណ្តើរយន្តផងដែរ។

លោកស្រី តាំង ហួរ បានបន្តថា “លំនៅដ្ឋាននេះ មានភាពសមស្របសម្រាប់ធ្វើជាកា​រិយាល័យ អាផាតម៉ិន សណ្ឋាគារខ្នាតតូច និងផ្ទះសំណាក់ជាដើម”។ លោកស្រីបន្ថែមថា “លក្ខខ័ណ្ឌបង់ប្រាក់ក៏មានភាពងាយស្រួល ដោយអតិថិជនអាចបង់១០ភាគរយ តាមដំ​ណាក់កាលរហូតដល់បង់គ្រប់៣០ភាគរយ ពួកគេអាចប្រើប្រាស់ឥណទានរបស់ធនា​គារ​បាន”។

ជាមួយនឹងការគិតគូ និងផ្តល់ទំនុកចិត្តដល់អតិថិជន អ្នកវិនិយោគគំរោងនេះ ក៏នឹង​ផ្តល់សៀវភៅឯកសារមួយទាក់ទងនឹងសម្ភារៈសំណង់ និងបទដ្ឋានគុណភាពសំណង់សំ​រាប់បង្ហាញអតិថិជនផងដែរ។ លោកស្រីតាំង ហួរបញ្ជាក់ឲ្យដឹង។

លោកស្រីបន្តថា អ្នកណាចាប់អារម្មណ៍គំរោងនេះមុនគេ នឹងទទួលបានការបញ្ចុះ​តម្លៃពិសេសផងដែរ។ ប្រ​សិនជាអតិថិជនចាប់អារម្មណ៍ អាចទាក់ទងលេខទូរស័ព្ទ ០៨៦ ៦០១ ៤៧២ និង០១២ ៦០១ ៤៧២៕

ដោយ គង់ សូរិយា

ភ្នំពេញ៖ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជានឹងបើកវគ្គបណ្តុះបណ្តាលមួយ ដើម្បីផ្តល់ជំនាញដល់អ្នកមានបំណងចង់ប្រឡូកក្នុងវិស័យអចលនទ្រព្យ និងសមាជិកសមាគម ដែលមិនទាន់មានជំនាញច្បាស់លាស់។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិតគីម ហ៊ាងបានថ្លែងក្នុងកិច្ចប្រជុំប្រចាំត្រីមាស របស់សមាគមខាងលើកាលពីម្សិលម៉ិញនេះថា បច្ចុ​ប្បន្នមានអ្នករកស៊ីក្នុងវិស័យអចលនទ្រព្យច្រើន បានធ្វើជាភ្នាក់ងារអចលនវត្ថុដោយគ្មាន​អាជ្ញាប័ណ្ណ និងជំនាញវិជ្ជាជីវៈត្រឹមត្រូវ ហេតុនេះដើម្បីអាចដោះស្រាយបញ្ហានេះ សមាគ​មនឹងបើកវគ្គបណ្តុះបណ្តាលមួយនៅពាក់កណ្ដាលខែមិថុនាខាងមុខនេះ។

លោកបន្តថា “សមាគមនឹងបើកវគ្គបណ្ដុះ​បណ្ដាល​រយៈពេល៧៥ម៉ោងមួយ ដើម្បីអូសទាញអ្នកមិនទាន់មានអាជ្ញាប័ណ្ណ ​ឲ្យមានរៀន​សូត្រ​ត្រឹម​ត្រូវ ដើម្បីទទួលបានអាជ្ញាប័ណ្ណស្រប់ច្បាស់ ដែលទទួលស្គាល់ដោយក្រសួងសេដ្ឋកិច្ច និងហិ​រ​ញ្ញ​វត្ថុ និងស្ថាប័នពាក់ព័ន្ធ”។

កាលពីពេលថ្មីៗនេះក្រសួងសេដ្ឋកិច្ច និងហិរញ្ញវត្ថុ បានចេញប្រកាសមួយ ដែលតម្រូវឲ្យអ្នករកស៊ីក្នុងវិស័យនេះ ត្រូវតែមានសញ្ញាបត្រជំនាញវិជ្ជាជីវៈច្បាស់លាស់ ទើបពួកគេអាចទទួលបានអាជ្ញាប័ណ្ណពីក្រសួង។

លោកឃាង ពុទ្ឋីអនុប្រធានសមាគមអ្​នកវាយតម្លៃ និងភ្នាក់ងារអចលនវត្ថុកម្ពុជានិងជាអគ្គនាយកក្រុមហ៊ុនអចលនទ្រព្យស្លឹករឹតបានថ្លែងថា ការបើកសាលាឬវគ្គបណ្តុះបណ្តាលវិជ្ជាជីវៈក្នុងវិស័យនេះច្រើន ជាការគួរឲ្យលើកទឹកចិត្ត មិនថាអ្នកណាបើកនោះទេ ព្រោះបើយើងបង្កើតសាលាបានច្រើន យើងនឹងបណ្តុះបណ្តាលធនធានមនុស្សបានច្រើនដែលវានឹងជួយដល់វិស័យនេះបានកាន់តែល្អប្រសើរ។

លោកបន្តថា “ពេលណាមានធនធានមនុស្សច្រើនក្នុងវិស័យនេះ នឹងធ្វើឲ្យការអភិ​វឌ្ឍក្នុងវិស័យនេះកាន់តែមានភាពល្អប្រសើរ និងធានាបាននូវទំនុកចិត្តពីអ្នកវិនិយោគ”៕

ដោយ ដួង ចន្រ្ទា

ភ្នំពេញ៖ ក្រុមហ៊ុនអចលនទ្រព្យដ៏ធំមួយទៀត Yuetai Group បាននិងកំពុងចាប់ផ្តើមគំរោងដ៏ធំមួយទៀត នៅទីក្រុងភ្នំពេញ កន្លែងដែលមានរោងចក្រ សហគ្រាសនៅព័ទ្ឋជុំវិញ។

យោងតាមប្រភពព៌តមានពីគេហទំព័រ realestate.com.kh បានឲ្យដឹងកាលពីម្សិលម៉ិញនេះថា ក្រុមហ៊ុន Yuetai Group កំពុងអភិវឌ្ឈន៍គំរោងមួយទៀតឈ្មោះ Yuetai The Garden ដែលផ្តល់ជូនលំនៅដ្ឋាន និងអាជីវកម្មប្រកបដោយភាពឆ្លាតវៃ (Smart Home) ដំបូងគេនៅក្នុងរាជធានីភ្នំពេញ ជាមួយនឹងយូនីតខុនដូប្រណិត ដែលមានទំហំចាប់ពី៣៥ម៉ែត្រការ៉េទៅ៦៤ម៉ែត្រការ៉េ បន្ទាប់ពីក្រុមហ៊ុននេះបានអភិវឌ្ឍន៍គម្រោងចំនួនពីរគឺគម្រោង EAST ONE និងគម្រោង EAST VIEW SOHO​  ដែលជាគម្រោងខុនដូ ការិយាល័យពាណិជ្ជកម្ម  និងលំនៅដ្ឋាននៅក្នុងទីក្រុង ហើយគម្រោងទាំងនេះបានទាក់ទាញកំណើនវិនិយោគទុនពីតៃវ៉ាន់ សិង្ហបុរី ហុងកុងព្រមទាំងចិនដីគោកជាច្រើន។

គម្រោង Yuetai The Garden មានទីតាំងនៅតាមបណ្តោយផ្លូវវេងស្រេង (តំបន់មួយដែលគេស្គាល់ថាផ្លូវលូប្រាំ) ជិតវិមានសុភមង្គល និងមានទីតាំងនៅជិតព្រលានយន្តហោះភ្នំពេញ។ ​

ប្រភពព៌តមានដដែលបានឲ្យដឹងថា លំនៅដ្ឋាន Yuetai The Garden របស់ហ៊ុនYuetai Group រចនាឡើងជាមួយរចនាបទបែបទំនើបរួមជាមួយសេវាកម្ម​ និងបរិក្ខារប្រ​ណីតៗដូចជា កន្លែងពាណិជ្ជកម្ម អាងហែលទឹក ចំណតរថយន្ត កន្លែងកម្សាន្តតំបន់បៃតងដែលនៅតាមផ្លូវមានអមដោយដើមឈើ រួមជាមួយសំណង់នានាដើម្បីបង្កើតទៅជាលំនៅដ្ឋានដ៏ឆ្លាតវៃ។

លើសពីនេះទៀតក្រុមហ៊ុនបានធ្វើការយ៉ាងសកម្មក្នុងសកម្មភាពអប់រំ និងការបណ្តុះបណ្តាល និងសេវាកម្មឧស្សាហកម្មទេសចរណ៍ វប្បធម៌ ដើម្បីជួយបង្កើនកម្រិតជីវភាពរស់នៅរបស់ប្រជាជនសកម្ពុជា។

ក្រុមហ៊ុននេះបានចូលមកកាន់រាជធានីភ្នំពេញ នៅក្នុងឆ្នាំ២០១១ក្រុមហ៊ុន Yuetai Group កំណត់យកយកទីក្រុងនេះ ជាតំបន់គោលដៅវិនិយោគក្រៅប្រទេសរបស់ខ្លួ​នដោយបានបង្កើតជាក្រុមហ៊ុនបុត្រសម្ព័ន្ធ១នៅកម្ពុជាឈ្មោះ Eastland Development, Co,Ltd និងបានសហការគ្នាររវាងក្រុមហ៊ុន Guangdong-Thai Property Management Co., Ltd និង ក្រុមហ៊ុនរបស់កម្ពុជា៕

ដោយ គង់ សូរិយា

ភ្នំពេញ៖ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ហៅកាត់ CVEA កំពុ​ង​ស្វែង​រក​ដំ​ណោះស្រាយសមស្របមួយ ចំពោះអ្នករកស៊ីឬធ្វើជាភ្នាក់ងារអចលនវត្ថុ ​ដោយ​គ្មានអាជ្ញា​ប័ណ្ណ​ត្រឹមត្រូវ។

ប្រធានសមាគម CVEA និងជាអគ្គនាយ​កក្រុម​ហ៊ុនខ្មែរ រៀលអ៊ីស្ទេត   លោកបណ្ឌិត គីម ហ៊ាង បានលើកឡើងក្នុងកិច្ចប្រជុំប្រចាំត្រីមាសរបស់សមាគម កាលពីថ្ងៃទី៣០ ឧសភាកន្លងមកថា បច្ចុប្បន្នពិតជាមានអ្នករកស៊ីអចលនទ្រព្យ​ គ្មានអាជ្ញាប័ណ្ណច្រើន ដែលបង្កហានិភ័យដល់វិស័យនេះ ព្រោះការរកស៊ីដោយគ្មានច្បាប់ត្រឹមត្រូវ នឹងធ្វើឲ្យ​ការ​ផ្តល់សេវាកម្មក្នុងវិស័យនេះគ្មានគុណភាព និងមិនអាចទុកចិត្តបាន។

លោកបន្តថា “ដើម្បីដោះស្រាយបញ្ហា​ច្រកចេញចំពោះមុខ សមាគមត្រូវចាប់​ផ្ដើម​អនុវត្តន៍ ដើម្បីកាត់បន្ថយការរកស៊ីវិស័យដីធ្លីដោយគ្មានអាជ្ញាប័ណ្ណ គឺតាមរយៈការ​បង្កើត​សា​លា​រៀនដីធ្លី”។

លោកឧកញ៉ា ចេង ខេងប្រធានក្រុមប្រឹក្សាភិបាល នៃសមាគម CVEA បានថ្លែង​ ថា ដោយសារកម្ពុជាមិនទាន់មានច្បាប់ កំណត់ពីជំនាញអ្នករកស៊ីដីធ្លី ដូចបណ្ដា​ប្រទេ​សជាច្រើនលើពិភពលោក ទើបអ្នកគ្មានអាជ្ញាប័ណ្ណ អាចចូលមកប្រកួតប្រជែងអ្នក​រកស៊ី​មាន​អាជ្ញាប័ណ្ណបាន។ តែលោករំពឹងថា នៅថ្ងៃអនាគតសមាគម និងស្ថាប័នពាក់ព័ន្ធ នឹងពួត​ដៃគ្នា ដើម្បីដោះស្រាយបញ្ហានេះ ហើយផ្ដល់ភាពកក់ក្ដៅដល់អ្នក​រកស៊ីស្រប​ច្បាស់ ដែលមាន​អា​ជ្ញាប័ណ្ណទទួលស្គាល់ក្រសួងត្រឹមត្រូវ។

លោកបន្តថា “អ្នករកស៊ីគ្មានអាជ្ញាប័ណ្ណបានបង្កហានិភ័យច្រើនណាស់ ក្នុងវិស័យ​នេះ ហេតុនេះអ្នកមានបំណងចង់ជួល ទិញលក់ គួរស្វែងរកការពិគ្រោះយោបល់ជាមួយ​ក្រុមហ៊ុនអចលនវត្ថុដែលមានអាជ្ញាប័ណ្ណត្រឹមត្រូវ”។លោកបន្តថា “ការធ្វើការជាមួយអ្នក​រកស៊ីដែលមានអាជ្ញាប័ណ្ណ និងមានជំនាញច្បាស់លាស់ នឹងធ្វើឲ្យពួកគេអាច​កាត់បន្ថ​យហានិភ័យ និងអាចស្វែងរកផល​ចំណេញក្នុងវិស័យនេះបាន”៕

ដោយគង់ សូរិយា

ភ្នំពេញ៖ ព៌តមានផ្លូវការនិងអាចជឿជាក់បានបង្ហាញហើយ ដោយប្លង់ស្ថាបត្យកម្ម​នៃផ្សារទំនើបAEON MALLទី៣បានបង្ហាញហើយ ដោយមន្រ្តីសាលារាជធានីភ្នំពេញ ដែលគំរោងនេះ នឹងសាងសង់នៅតាមបណ្តោយ មហាវិថីសម្តេចតេជោហ៊ុន សែននាពេលខាងមុខនេះ។

លោកឧកញ៉ានួន រិទ្ឋីអគ្គនាយកក្រុមហ៊ុន Khmer Foundation Appraisal បានថ្លែងឲ្យដឹងកាលពីថ្ងៃម្សិលម៉ិញនេះថា ក្រុមហ៊ុនជប៉ុនយក្សមួយនេះបានទិញដីនៅក្នុងគំ​រោងទីក្រុងរណប ING CITY តម្លៃជាង១០០លានដុល្លាររួចហើយ ដើម្បីសាងសង់ផ្សារទំ​នើបរបស់ខ្លួននៅពេលខាងមុខនេះ។លោកបន្តថា តាមអ្វីដែលក្រុមហ៊ុននេះវិនិយោគ ផ្សារទំនើបរបស់ខ្លួនទី៣នេះ មានទំហំធំជាងផ្សារទី១និងទី២ ដែលអាចបោះទុនវិនិយោគ​រហូតដល់ប្រមាណ៣០០លានដុល្លារអាមេរិក។

លោកបន្តថា “ការចូលមកដល់នៃអ្នកវិនិយោគជប៉ុន និងក្រុមហ៊ុនជប៉ុនធំៗដទៃទៀត ឆ្លុះបញ្ចាំងពីកត្តាសុខសន្តិភាព ស្ថិរភាពនយោបាយ និងបរិយាកាសវិនិយោគនៅ​កម្ពុជាកាន់តែមានភាពប្រសើរឡើង”។លោកបន្តថា “ក្រុមហ៊ុនជប៉ុនមិនងាយចូលទៅវិនិ​យោគនៅប្រទេសណាទេ ប៉ុន្តែនៅពេលពួកគេមកវិនិយោគ គឺពួកគេបានសិក្សាច្បាស់លា​ស់ហើយ ទើបពួកគេសម្រេចចិត្តចូលទៅកាន់ប្រទេសណាមួយ”។

បើតាមគម្រោងផែនការមេ របស់ក្រុមហ៊ុនវិនិយោគផ្សារទំនើបអ៊ីអនរបស់ជប៉ុន គ្រោងនឹង​សាងសង់​ផ្សារទំនើបអ៊ីអនចំនួន៤ទីតាំងធំៗ ស្ថិតនៅតំបន់ផ្សេងៗគ្នា ក្នុងរាជធានីភ្នំពេញប្រទេសកម្ពុជា។

ក្រុមហ៊ុន​នេះ បានសម្រេចចិត្ត​វិនិយោគ​សាងសង់ផ្សារ​ទំនើបអ៊ីអន​ទី៣ នៅភាគ​ខាងត្បូង​រាជធានីភ្នំពេញ ក្រុមហ៊ុន​​ទើបតែ​សម្រេចចិត្តទិញ​ដីរួចរាល់​ហើយ ដើម្បី​សាងសង់​ផ្សារ​ទំនើប​នៅតំបន់នោះ ហើយមិនយូរ​ទៀតទេផ្សារទំនើប​អ៊ីអន​ទី៣នេះ នឹងលេច​រូបរាង​ឡើង នៅតាម​បណ្តោយ​ផ្លូវ៦០ម៉ែត្រ បន្ទាប់ពីផ្សារអ៊ីអនទី២ នឹងបើក​សម្ពោធ​នៅចុង​ខែឧសភា​ឆ្នាំនេះ។

ទោះជាយ៉ាងណាមិនទាន់មានការបញ្ជាក់ ពីការសាងសង់គំរោងថ្មីនេះពីថ្នាក់ដឹកនាំក្រុមហ៊ុននេះនៅឡើយទេ។

អ្នកនាំពាក្យរដ្ឋបាលសាលារាជធានីភ្នំពេញ លោកម៉េត មាសភ័ក្តីបានថ្លែងថា លោក​មិនទាន់បានទទួលដំណឹងនេះ និងមិនទាន់ឃើញមានសំណើរណាមួយពីក្រុមហ៊ុន​វិនិយោគផ្សារទំនើបនេះ ដាក់ទៅកាន់រដ្ឋបាលសាលាក្រុងភ្នំពេញនៅឡើយទេ៕

ដោយ គង់ សូរិយា

ភ្នំពេញ៖ ក្រុមហ៊ុនដែលមានទុនវិនិយោគ៥០០០លានដុល្លារនៅក្នុងដៃ គ្រោងនឹង​សាងសង់សណ្ឋាគារខ្ពស់ជាងគេនៅរាជធានីភ្នំពេញ ដែលមានកំពស់៦០ជាន់នៅតាមបណ្តោយមហាវិថីព្រះនរោត្តម។

លោក Li Min អគ្គនាយកក្រុមហ៊ុនព្រីនស៍រៀល អ៊ីស្ទេត បានមានប្រសាសន៍ក្នុង ពិធីដាក់ឲ្យដំណើរការខុនដូ និងមជ្ឈមណ្ឌលពាណិជ្ជកម្មរបស់ខ្លួនកាលពីម្សិលម៉ិញនេះ​ថា ក្រុមហ៊ុន Prince Real Estate Group នឹងសាងសង់គម្រោងដ៏ធំមួយទៀតសណ្ឋា​គា​រកម្ពស់៦០ជាន់ នៅជាប់នឹងគម្រោងទី១របស់ខ្លួន តាមបណ្ដោយផ្លូវនរោត្តមក្បែរស្ពា​ន​អាកាសក្បាលថ្នល់ ក៏ដូចជា ការបន្ដបោះទុនវិនិយោគលើគម្រោងខុនដូ និងសណ្ឋាគារ នៅទីតាំងជាច្រើនទៀត ទាំងរាជធានីភ្នំពេញ ខេត្តសៀមរាប និងខេត្តព្រះសីហនុ​ជាដើម​ផងដែរ។

ទោះជាយ៉ាងណាលោកមិនបញ្ជាក់ឲ្យដឹង ពីទុនវិនិយោគក្នុងគំរោងសណ្ឋាគារដ៏ខ្ពស់នេះ និងចាប់ផ្តើមសាងសង់នៅពេលណានៅឡើយទេ។

ជាមួយគ្នានេះ ក្រុមហ៊ុន Prince Real Estate Group ក៏គ្រោងបើកដំណើរការសណ្ឋាគារកម្រិតផ្កាយ៥នៅខេត្តព្រះសីហនុក្នុងឆ្នាំនេះផងដែរ។

លោកស្រីឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានថ្លែងស្វា កមន៍នូវគំរោងវិនិយោគដ៏ធំនេះ ខណៈលោកស្រីអំពាវនាវឲ្យក្រុ​មហ៊ុនឯកជនវិនិយោគ​លើរមណីយដ្ឋានកែច្នៃឲ្យបានច្រើន ដើម្បីទាក់ទាញភ្ញៀវទេសចរណ៍អន្តរជាតិមកទស្សនា​នៅរាជធានីភ្នំពេញ និងស្នាក់នៅបានយូរ ព្រោះបច្ចុប្បន្នភ្ញៀវទេសចរណ៍អន្តរជាតិស្នាក់នៅតែមួយយប់ឬពីរយប់ប៉ុណ្ណោះនៅរាជធានីភ្នំពេញ ដោយសារយើងមិនមានកន្លែងកំសាន្តនៅក្នុងទីក្រុងនេះ។

លោកស្រីបន្តថា “នៅរាជធានីភ្នំពេញមិនមានកន្លែងកំសាន្តច្រើននោះទេ ក្រៅពីរម ណីយដ្ឋានវត្តភ្នំ ព្រំបរមរាជវាំង សារៈមន្ទីរ និងសារៈមន្ទីរទួលស្លែង និងជើងឯក”។លោក​ស្រីបន្តថា “សម្រាប់ពេលរាត្រីវិញ យើងមិនមានកន្លែងកំសាន្ត និងទាក់ចិត្តភ្ញៀវទេសចរ​ណ៍នៅឡើយទេ ខុសពីខេត្តសៀមរាបដែលមានតំបន់ Pub Street និងកន្លងែងទាក់ទាញដទៃទៀត”។

លោកស្រីឆាយ ស៊ីវលីនបានថ្លែងថា ការចូលរួមវិនិយោគពីវិស័យឯកជនមានសារៈសំខាន់ណាស់ ដើម្បីផ្តល់ផលិតផលទេសចរណ៍កាន់តែច្រើន ដល់ភ្ញៀវទេសចរណ៍អន្តរជាតិ។ ភ្ញៀវទេសចរណ៍អន្តរជាតិមកទស្សនាក្នុងក្រុងភ្នំពេញ ច្រើនជាភ្ញៀវស្ថិតក្នុងតំបន់អាស៊ាន ដែលស្នាក់នៅរយៈពេលខ្លី ហើយយើងកំពុងគិតគូធ្វើយ៉ាងណាទាក់ទាញភ្ញៀវ​ឲ្យស្នាក់នៅយូរក្នុងរាជធានីនេះ៕

ដោយ ដែន ចែងចាំង

ភ្នំពេញ៖ ខុនដូនិងមជ្ឍមណ្ឌលពាណិជ្ជកម្ម ដែលជាផ្នែកមួយនៃគំរោងវិនិយោគ​តម្លៃ៥០០០លានដុល្លារ ដែលក្រុមហ៊ុន Prince Real Estat Group វិនិយោគនៅ​កម្ពុជាបានបើកដំនើរការហើយ។​

គម្រោងខុនដូព្រីនស៍ផ្លាហ្សាកំពស់៣៧ជាន់​ និង​បោះ​ទុនវិនិយោគ​រហូត​ដល់​១៨០​លានដុល្លារ ស្ថិតនៅតាមបណ្តោយមហាវិថីព្រះនរោត្តម សង្កាត់ទន្លេបាសាក់​ខ័ណ្ឌចំ​កា​រ​មនេះ ក៏រួមបញ្ចូលនូវផ្សារទំនើបទំហំ៨៥០០ម៉ែត្រការ៉េ។

លោក Li Min អគ្គនាយកក្រុមហ៊ុនព្រីនស៍រៀល អ៊ីស្ទេត បានមានប្រសាសន៍ក្នុង ពិធីដាក់ឲ្យដំណើរការខុនដូ និងមជ្ឈមណ្ឌលពាណិជ្ជកម្មរបស់ខ្លួនកាលពីម្សិលម៉ិញនេះ​ថា គម្រោងខុនដូ និងមជ្ឍមណ្ឌលពាណិជ្ជកម្មកម្ពស់៣៧ជាន់នេះ បានចាប់​ផ្ដើមសា​ងសង នៅដើមខែសីហា ក្នុងឆ្នាំ២០១៥។ ខុនដូនេះមានបន្ទប់សរុបចំនួន១៧៨៦យូនីត ស្មើនឹង១០ម៉ឺនម៉ែត្រការ៉េ អមដោយការរចនាម៉ូដ និងបរិក្ខារទំនើបៗ ទាន់សម័យងាយ​ស្រួល​រស់​នៅ និងធ្វើពាណិជ្ជកម្ម ។

លោកបន្ដថា ការសាងសង់អាគារដ៏ខ្ពស់នេះ ដោយសារក្រុមហ៊ុនចង់ចូលរួម​ជាមួ​យ​នឹងភាពរីកចម្រើនរបស់ប្រទេសកម្ពុជាបច្ចុប្បន្ន ដោយផ្នែកលើប្លង់អភិវឌ្ឍន៍រាជធា​នី​ភ្នំពេញ នៅឆ្នាំ២០២០ រាជធានីភ្នំពេញនឹងពង្រីកផ្ទៃក្រឡាដល់៣៧៥ គីឡូម៉ែត្រការ៉េ ចំនួនប្រជាពលរដ្ឋនឹងកើនឡើងដល់៣លាននាក់ និងនៅឆ្នាំ២០៣៥ រាជធានីភ្នំពេញ នឹង​ពង្រីកបន្ថែមរហូតដល់៦៧៥គីឡូម៉ែត្រការ៉េ ជាមួនឹងកំណើនដង់ស៊ីតេប្រជា​ពលរដ្ឋ​សរុប​ជាង៥លាននាក់ ដែលកំណើននេះនឹងធ្វើឲ្យតម្រូវការលើវិស័យអចលនទ្រព្យ ជាពិសេ​ស​លំ​នៅដ្ឋាន និងអាគារខុនដូប្រណិតៗកាន់តែកើនឡើងបន្ថែមទៀត៕