ដំណឹងល្អ! ការលក់សំបុត្រតាម Online ចូលទស្សនាអង្គរនឹងចាប់ផ្តើមត្រីមាសទី២

February 28, 2018

ដោយគង់ សូរិយា

ភ្នំពេញ៖ ដំណឹងល្អសម្រាប់ភ្ញៀវទេសចរណ៍អន្តរជាតិ បានមកដល់ហើយ ដោយគ្រឹះស្ថានអង្គរគ្រោងដាក់ឱ្យដំណើរការ ប្រព័ន្ឋលក់សំបុត្រតាម Online ជូនភ្ញៀវទេសចរអន្តរជាតិនានា ដើម្បីចូលទស្សនារមណីយដ្ឋានអង្គរ នឹងដាក់ឲ្យអនុវត្តន៍នៅត្រីមាសទី២ឆ្នាំនេះ។

នៅក្នុងកិច្ចប្រជុំក្រុមប្រឹក្សាភិបាល អាណតិ្តទី១លើកទី៧ នៃគ្រឹះស្ថានអង្គរ នៅក្រសួងសេដ្ឋកិច្ច និងហិរញ្ញវត្ថុ ក្រោមវត្តមាន លោកអូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង រដ្ឋមន្ត្រីក្រសួងទេសចរណ៍លោកថោង ខុន។

ប្រមុខក្រសួងទាំងពីរ បានវាយតម្លៃខ្ពស់ដល់គ្រឹះស្ថានអង្គរ ដែលគ្រោងដាក់ឱ្យដំណើការប្រព័ន្ធព័ត៌មានវិទ្យាថ្មី និងសម្រួលដល់ការផ្តល់សេវាលក់ បណ្ណជូនភ្ញៀវទេសចរអន្តរជាតិ ឱ្យកាន់តែមានភាពងាយស្រួល ក៏ដូចជាការបង្កើនប្រសិទ្ធភាព នៃការគ្រប់គ្រងការលក់បណ្ណឱ្យកាន់តែប្រសើរថែមទៀត។

គ្រឹះស្ថានអង្គរ បានផ្តល់សេវាទូទាត់ការទិញបណ្ណចូលទស្សនា រមណីយ ដ្ឋានអង្គរ តាមរយៈប្រព័ន្ធអេឡិចត្រូនិករួចហើយ ដោយបានចាប់អនុវត្តន៍តាំងពីខែសីហា ឆ្នាំ២០១៧កន្លងមក ដោយភ្ញៀវទេសចរអន្តរជាតិ អាចប្រើប្រាស់បណ្ណឥណទាន (Credit Card) ឬបណ្ណឥណពន្ធ (Debit Card) ដូចជា Visa, Master, Union Pay, JCB និង Diners Club ជាដើម។

សេចក្តីប្រកាសរបស់គ្រឹះស្ថានអង្គរបានឲ្យដឹងថា ដើម្បីបង្កើនប្រសិទ្ធភាពនៃការផ្តល់សេវាការលក់ប័ណ្ណ ឱ្យកាន់តែប្រសើរឡើងថែមទៀត គ្រឹះស្ថានអង្គរ កំពុងធ្វើទំនើបកម្ម ប្រព័ន្ធលក់បណ្ណរបស់ខ្លួនឱ្យកាន់តែទំនើប ស្របតាមស្តង់ដាអន្តរជាតិ ដែលនឹងអាចផ្តល់តួលេខនៃការលក់បណ្ណបានភ្លាមៗ (Real-time) ជាការបង្ហាញនូវភាពច្បាស់លាស់ នៃការគ្រប់គ្រងទិន្នន័យ ធានាបានតម្លាភាព និងគណនេយ្យភាពផងដែរ។ ការលក់ Online នេះ នឹងធ្វើឱ្យភ្ញៀវទេសចរមានភាពងាយស្រួល អាចទិញសំបុត្របាននៅពេលណា ឬនៅទីកន្លែងណាក៏បាន៕

ដំណឹងល្អ!!! វិទ្យាស្ថានបណ្តុះបណ្តាលវិជ្ជាជីវៈអចលនទ្រព្យនឹងបើកនៅឆ្នាំនេះ

February 28, 2018

0

ដោយ ដែន ចែងចាំង

ភ្នំពេញ៖ ក្នុងគោលដៅបង្កើតវិទ្យាស្ថាន បណ្តុះបណ្តាលជំនាញអចលនទ្រព្យ និងដើម្បីនិរន្រភាពក្នុងឧស្សាហកម្មសំណង់ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានប្តេជ្ញា នឹងបង្កើតសាលាឲ្យបាននៅក្នុងឆ្នាំនេះ។

លោកបណ្ឌិតគីម ហ៊ាងប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងឲ្យដឹងតាមទូរស័ព្ទកាលពីម្សិលម៉ិញនេះថា រហូតមកទល់ពេលនេះមានក្រុមហ៊ុនចំនួន២០ហើយ បានសម្រេចបោះទុនរួមគ្នាដើម្បីបង្កើតវិទ្យាស្ថានបណ្តុះបណ្តាលវិជ្ជាជីវៈអចលនវត្ថុកម្ពុជា។ ក្រៅពីក្រុមហ៊ុនទាំង២០នេះ សមាគមនឹងបើកឲ្យសមាជិកដទៃទៀត និងក្រុមហ៊ុនឯកជននានា ដើម្បីចូលរួមក្នុងការបើកវិទ្យាស្ថាននេះឲ្យបានក្នុងឆ្នាំនេះ។

កាតដាក់ពាក្យស្នើសុំ ដើម្បីសុំបើកវិទ្យាស្ថាននេះ ទៅក្រសួងអប់រំ យុវជននិងកីឡា និងក្រសួងសេដ្ឋកិច្ច និងហិរញ្ញវត្ថុនឹងធ្វើឡើងនៅពេលឆាប់ៗនេះ។

លោកបន្តថា “យើងត្រូវការទុនប្រមាណ២០ម៉ឺនដុល្លារអាមេរិក ដើម្បីបើកវិទ្យាស្ថាននេះ ដោយសហការជាមួយ University Of Technology Malaysia និងសហការជាមួយក្រសួងទាំងពីរ។លោកបន្តថា“វគ្គសិក្សានឹងមានរយៈពេល១៥០ម៉ោងសម្រាប់ជំនាញធ្វើជាភ្នាក់ងារអចលនទ្រព្យ និង១៨០ម៉ោងសម្រាប់ជំនាញជាភ្នាក់ងារវាយតម្លៃអចលនទ្រព្យ។

កម្មវិធីសិក្សានេះនឹងយកមកពីប្រទេសថៃ ម៉ាឡេស៊ី និងសឹង្ហបុរី យកមកច្របាច់បញ្ចូលគ្នា ដើម្បីប្រើប្រាស់ក្នុងកម្មវិធីសិក្សា ដែលមានការទទួលស្គាល់កម្រិត ជាតិ និងអន្តរជាតិ។

លោកគីម ហ៊ាងបន្តថា អ្នកដែលបញ្ចប់ការសិក្សាពីវិទ្យាស្ថាននេះ នឹងទទួលបានវិញ្ញាបនបត្រមួយ ដើម្បីយកទៅដាក់ឆ្លងនិងប្រលងនៅក្រសួងសេដ្ឋកិច្ច និងហិរញ្ញវត្ថុ ហើយនៅពេលពួកគេប្រលងជាប់ ពួកគេនឹងទទួលបានវិញ្ញាបនបត្រពីក្រសួង ទើបអាចធ្វើការងារក្នុងវិស័យនេះបាន។លោកបន្តថា តាមគម្រោងវគ្គប ណ្តុះបណ្តាលនេះ នឹងប្រើប្រាស់គ្រូក្នុងស្រុកដែលមានសញ្ញាបត្រ និងបទពិសោធន៍ខ្ពស់៥០ភាគរយ និងគ្រូបរទេស៥០ភាគរយផងដែរ។

សាលានេះនឹងត្រូវគ្រប់គ្រង ដោយក្រុមប្រឹក្សាភិបាលសាលាមួយដែលត្រូវបង្កើតឡើង ដោយមាននាយកម្នាក់ដែលធ្វើការងារដោយឯករាជ្យ។

លោកគីម ហ៊ាងបានបន្តថា “គោលដៅនៃការបើកវិទ្យាស្ថាននេះ មិនមែន ដើម្បីប្រាក់ចំណេញទេ ប៉ុន្តែដើម្បីពង្រឹងធនធានមនុស្ស និងទ្រទ្រង់ឧស្សាហកម្មសំណង់ និងអចលនវត្ថុឲ្យមានការរីកចម្រើនប្រកបដោយនិរន្តរភាព។លោកបន្តថា“ប្រសិនជាយើងបង្កើតសាលានេះបានក្នុងកម្រិតអាស៊ាន វាពិតជាប្រសើរណាស់ ព្រោះយើងនឹងអាចទាក់ទាញអ្នកសិក្សា មកពីបណ្តាប្រទេសក្នុងតំបន់បាននាពេលអនាគត។

ទោះជាយ៉ាងណាសមាគមមិនទាន់កំណត់តម្លៃសិក្សា សម្រាប់វគ្គបណ្តុះបណ្តាលនិមួយៗនៅឡើយទេ៕

ក្រុមហ៊ុនឯកជនលូកដៃជួយពង្រឹងធនធានមនុស្សក្នុងឧស្សាហកម្មសំណង់

February 28, 2018

0

ដោយ ដែន ចែងចាំង

ភ្នំពេញ៖ ក្រុមហ៊ុន អេសស៊ីជី (SCG) បានចាប់ផ្តើមនូវគម្រោងបណ្តុះបណ្តាលជាងសំណង់ ដែលជាគំនិតផ្តួចផ្តើមមួយ មានគោលបំណងពង្រឹងជំនាញរបស់ជាងសំណង់ទាំងអស់ ក៏ដូចជាលើកកម្ពស់គុណភាពសំណង់ ក្នុងប្រទេសកម្ពុជា។

លោក Pongdhana Dejvittayaporn នាយកផ្នែកលក់ និងទីផ្សាររបស់ក្រុមហ៊ុនអេសស៊ីជី បានឲ្យដឹងបន្ទាប់ពីពិធីចុះហត្ថលេខាលើអនុស្សរណៈយោគយល់គ្នា ជាមួយមជ្ឈមណ្ឌលបណ្តុះបណ្តាលវិជ្ជាជីវៈ ចំនួន២របស់ប្រទេសកម្ពុជាគឺវិទ្យាស្ថានជាតិពហុបច្ចេកទេសកម្ពុជា (NPIC) និងវិទ្យាស្ថានអភិវឌ្ឍន៍មុខជំនាញកម្ពុជា កាលពីម្សិលម៉ិញនេះថា ក្នុងនាមជាអ្នកជំនាញផ្នែកផលិតផលស៊ីម៉ង់ត៍ និងជាអ្នកផ្គត់ផ្គង់សម្ភារសំណង់ផ្សេងៗ ក្រុមហ៊ុនក៏ផ្ដោតការយកចិត្តទុកដាក់ ដល់ការតបស្នងដល់សហគមន៍ក្នុងប្រទេសកម្ពុជា តាមរយៈការចែករំលែកជំនាញ និងចំណេះដឹងរបស់យើង។ ដូច្នេះហើយ ទើបបានជាយើងបង្កើតនូវកម្មវិធី បណ្ដុះបណ្ដាលក្រុមជាងនេះឡើង។

លោកបន្តថា ការចុះហត្ថលេខាលើអនុស្សរណៈយោគយល់គ្នាទាំងពីរនេះ ក្រុមហ៊ុនអេសស៊ីជី បានធ្វើការជាមួយមជ្ឈមណ្ឌលទាំងពីរ ដើម្បីបង្កើតមេរៀនសម្រាប់ កម្មវិធីបណ្ដុះបណ្ដាលផ្នែកសំណង់ ហើយក៏បានកសាងបន្ទប់រៀនមួយ សម្រាប់កម្មវិធីបណ្ដុះបណ្ដាលនេះ។ ការចូលរួមវគ្គបណ្ដុះបណ្ដាលនេះសិក្ខាកាមទាំងអស់ នឹងបានសិក្សាជំនាញពាក់ព័ន្ធ និងត្រឹមត្រូវ ដើម្បីអាចយកទៅអនុវត្ត បាននៅក្នុងអាជីពជំនាញរបស់ខ្លួន។ គោលបំណងនៃវគ្គបណ្ដុះបណ្ដាលនេះ គឺមិនត្រឹមតែលើកកម្ពស់គុណភាពសំណង់ ក្នុងប្រទេសកម្ពុជាតែមួយនោះទេ ប៉ុន្តែថែមទាំងជួយបង្កើនសក្ដានុពល ក្នុងការរកប្រាក់ចំណូលរបស់សិក្ខាកាមជាជាងសំណង់ ដែលបានបញ្ចប់វគ្គបណ្ដុះបណ្ដាលនេះផងដែរ។

នាយកវិទ្យាស្ថានជាតិពហុបច្ចេកវិទ្យា (NPIC) លោកប៊ុន ភារិន មានប្រសាសន៍ថា កិច្ចសហប្រតិបត្តិការនេះ នឹងធ្វើឲ្យគុណភាពនៃការបណ្ដុះបណ្ដាល របស់វិទ្យាស្ថានជាតិពហុបច្ចេកទេសកម្ពុជា កាន់តែរឹងមាំ ហើយអាចឆ្លើយតបបានទាន់ពេលវេលានូវតម្រូវការទីផ្សារការងារនៅកម្ពុជា។

កម្មវិធីនេះនឹងបើកស្វាគមន៍សម្រាប់ជាងសំណង់ណា ដែលចាប់អារម្មណ៍ ហើយអាចដាក់ពាក្យបាន ដោយទូរស័ព្ទទៅក្រុមហ៊ុនអេសស៊ីជី ហើយវគ្គបណ្ដុះបណ្ដាលនេះពុំតម្រូវឲ្យបង់ថ្លៃសិក្សា ឬថ្លៃដាក់ពាក្យចុះឈ្មោះអ្វីឡើយ៕

លោកឧកញ៉ាលី ហួរបង្ហើបពីមូលហេតុដីបន្តឡើងថ្លៃ

February 28, 2018

0

ដោយ គង់ សូរិយា

ភ្នំពេញ៖ នៅពេលនិយាយពីដីឡើងថ្លៃ ប្រជាពលរដ្ឋជាច្រើនក៏មានចម្ងល់ពីការកើនឡើងនូវតម្លៃអចលនទ្រព្យប្រភេទនេះឥតឈប់ឈរ ប៉ុន្តែការឡើងតម្លៃដី ធ្លីក៏ផ្តល់ផលប្រយោជន៍ច្រើនដែរ ដល់ម្ចាស់ដីនានា។

ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ាលី ហួរបានថ្លែងឲ្យដឹងតាមទូរស័ព្ទកាលពីព្រឹកថ្ងៃទី២៧ កុម្ភៈកន្លងមកថា ការលក់និងការអភិវឌ្ឍន៍លំនៅដ្ឋាននៅឆ្នាំនេះ ស្ថិតក្នុងសភាពទ្រឹង ប៉ុន្តែដីនៅតែឡើងថ្លៃ ព្រោះនៅតែមានតម្រូវការដីធ្លីច្រើនពីអ្នកវិនិយោគនានា ដោយលោកធៀបពីតម្រូវការនេះថា “អ្នកវិនិយោគមិនអាចរង់ចាំដល់ស្រូវអស់ពីជម្រុក ទើបស្វែងរកស្រូវថ្មីនោះទេ” គឺពួកគេត្រូវតែមានដីត្រៀម សម្រាប់អភិវឌ្ឍន៍គំរោងថ្មីៗបន្ថែមទៀត។

លោកឧកញ៉ាបានបន្តថា “ដីមិនកើតទេ មនុស្សកើតជារៀងរាល់ថ្ងៃ តម្រូវការនៅតែកើនឡើងជាប្រចាំ ពិសេសសម្រាប់ក្រុមអ្នកមានប្រាក់ចំណូលទាប។លោកឧកញ៉ាបន្តថា “បច្ចុប្បន្នយើងត្រូវការលំនៅដ្ឋានតម្លៃទាប ប្រមាណ១ម៉ឺនខ្នងក្នុងមួយឆ្នាំ ប៉ុន្តែអ្នកអភិវឌ្ឍន៍ភាគច្រើនផ្តោតតែលើលំនៅដ្ឋាន ដែលមានតម្លៃថ្លៃ។

លោកឧកញ៉ាលី ហួរបានបន្តថា ដរាបណាសេដ្ឋកិច្ចកម្ពុជានៅតែរក្សាបានកំនើនល្អប្រសើរបែបនេះ ហើយសន្តិភាព និងស្ថិរភាពនយោបាយនៅតែមាននៅកម្ពុជា វិស័យសំណង់ និងអចលនវត្ថុកម្ពុជានៅតែមានភាពរីកចម្រើនរយៈពេលវែងបន្តទៀត ដោយសារកំនើនប្រាក់ចំណូលរបស់ប្រជាពលរដ្ឋ និងកំនើនប្រជា ជនវ័យក្មេង ដែលត្រូវមានគ្រួសារច្រើន ហេតុនេះតម្រូវការលំនៅដ្ឋាននៅតែមាននិងជារឿងចាំបាច់ដែលពួកគេត្រូវការ៕

ចង់ក្លាយជាអ្នកភ្នាក់ងារអចលនទ្រព្យត្រូវមានអ្វីជាគោលសំខាន់ ?

February 27, 2018

0

បច្ចុប្បន្ននេះ គេសង្កេតឃើញថា ខណៈពេលដែលវិស័យអចលនទ្រព្យកំពុងពុះកញ្ច្រោលខ្លាំង មានមនុស្សមិនតិចនាក់នោះទេដែលបានព្យាយាមប្រជ្រៀតខ្លួនចូលមកក្នុងវិស័យនេះ ក្នុងនាមជាភ្នាក់ងារ ដើម្បីទទួលបានកម្រៃជើងសារ ឬទទួលបានភាគចំណេញពីការផ្តល់ប្រឹក្សាជាដើម។ មានដឹងទេថា សម្រាប់អ្នកដែលអាចឈរជើងបានជាអ្នកប្រឹក្សា ឬជាភ្នាក់ងារអចលនទ្រព្យជោគជ័យ ត្រូវមានអ្វីខ្លះជាសំអាង ទើបអាចក្លាយជាអ្នកជោគជ័យក្នុងវិស័យនេះ ? ចម្ងល់ទាំងនេះ ត្រូវបានបកស្រាយយ៉ាងលម្អិតពីសំណាក់លោកឧកញ៉ា ចេង ខេង ដែលជាអ្នកជំនួញដ៏ល្បីឈ្មោះលើវិស័យអចលនទ្រព្យនៅកម្ពុជា និងជាអគ្គនាយកក្រុមហ៊ុនស៊ីភីអែល ខេមបូឌា ប្រភើធី លីមីតធីត (CPL Cambodia Properties Limited) ។

លោកឧកញ៉ា ចេង ខេង បានមានប្រសាសន៍យ៉ាងដូច្នេះថា ចំពោះបុគ្គលដែលអាចក្លាយជាភ្នាក់ងារអចលនទ្រព្យដែលមានសក្ដានុពល ប្រកបដោយជោគជ័យបានលុះត្រាតែ ៖

1-ការតាំងចិត្ត មុននឹងដាក់ចិត្ដចូលប្រឡូកក្នុងវិស័យអចលនទ្រព្យយើងត្រូវតែសួរខ្លួនឯងថា តើយើងស្រឡាញ់កិច្ចការនេះដែរ ឬទេ? ប្រសិនបើស្រឡាញ់ត្រូវតែប្រឹងប្រែងសិក្សា និងធ្វើកិច្ចការងារនេះឱ្យអស់ពីចិត្ដប្រកដោយឆន្ទៈបំផុត រួមជាមួយនឹងភាពច្បាស់ប្រាកដក្នុងចិត្តត្រូវ100% ។ ឧទាហរណ៍ នៅពេលអតិថិជន មករកយើង គឺមានន័យថាពួកគាត់មិនសូវបានជ្រាបច្បាស់ពីព័ត៌មានពាក់ព័ន្ធនឹងវិស័យនេះ ជាពិសេសគ្មានពេលវេលាគ្រប់គ្រាន់ក្នុងការស្រាវជ្រាវ ដូច្នេះក្នុងនាមជាភ្នាក់ងារអចលនទ្រព្យយើងត្រូវតែមានចំណេះដឹងទូលំទូលាយជាងអតិថិជន ក្នុងករណីបើយើងមានចំណេះដឹងផ្នែកនេះតិចជាងគាត់ ប្រាកដជាអតិថិជនគ្មានទំនុកចិត្ដលើយើងឡើយ។

ការផ្ដល់អាទិភាពជូនអតិថិជន មានន័យថាយើងត្រូវព្យាយាមយល់ចិត្ដអតិថិជនថា គាត់ចង់បានអី្វ? គាត់ប្រញាប់ចង់លក់ ឬទិញអចលនវត្ថុបែបណា? ដូច្នេះយើងត្រូវតែផ្ដល់អាទិភាពជូនគាត់ ឬបម្រើសេវាកម្មជូនគាត់ប្រកបដោយប្រសិទ្ធភាព និងភាពស្មោះត្រង់។ តាមរយៈបទពិសោធន៍ខ្ញុំដឹងថា មានអតិថិជនមួយចំនួនគាត់ខ្លាចយើង (ភ្នាក់ងារអចលនទ្រព្យ) ដាក់តម្លៃលើសឬមិនស្មោះត្រង់ជាមួយគាត់ ដូច្នេះយើងត្រូវតែធ្វើឱ្យអតិថិជនមានជំនឿចិត្ដលើយើង ទើបគាត់ចង់ធ្វើការជាមួយយើងរហូត។
3. ការយកចិត្តទុកដាក់ចំពោះអតិថិជន មានន័យថា បន្ទាប់ពីយើងបានបម្រើសេវាកម្មជូនដល់អតិថិជន ឬម្ចាស់អចលនវត្ថុហើយ យើងត្រូវចេះសួររកព័ត៌មានមកវិញ ដើម្បីឱ្យដឹងថា តើទង្វើ ឬកិច្ចការដែលយើងធ្វើជូនពួកគាត់គ្រប់គ្រាន់ទៅតាមអ្វីដែលគាត់ចង់បានហើយ ឬនៅ? យើងត្រូវធ្វើបែបនេះគ្រប់ពេល ព្រោះមានតែអតិថិជនទេដែលជា កញ្ចក់ឆ្លុះបញ្ចាំងពីចំណុចខ្វះខាតរបស់យើង។
4.ការសម្របសម្រួល នៅពេលម្ចាស់កម្មសិទ្ធិ ផ្តល់លទ្ធភាពដល់យើងជាភ្នាក់ងារអចលនទ្រព្យជំនាញ ជាសំអាងឱ្យគាត់ ដូចជា ជួយលក់ ឬជួល យើងត្រូវដឹងថា អ្នកទិញតែងចង់បានតម្លៃថោក រីឯអ្នកលក់តែងចង់បានតម្លៃថ្លៃ គំនិតអ្នកទាំងពីរផ្ទុយគ្នា100% ដូច្នេះក្នុងនាមយើងជាភ្នាក់ងារត្រូវចេះសម្របសម្រួល និងចេះផ្គូរផ្គងតម្លៃរវាងអ្នកទិញ និងអ្នកលក់ឱ្យមានតម្លាភាព ។
5. ភាពឆ្លាតវៃក្នុងការសម្គាល់អត្តចរឹតអតិថិជន ការស្គាល់អតិថិជន ឬរក្សាអតិថិជនទុក គឺជារឿងសំខាន់ ព្រោះនៅពេលយើងមានអចលនទ្រព្យមួយមានតម្លៃល្អ មានទីតាំងល្អ យើងងាយនឹងផ្ដល់ព័ត៌មានដល់ពួកគាត់ដើម្បីឱ្យការទិញលក់ប្រព្រឹត្ដទៅដោយងាយស្រួល។
6.ការរៀបចំឯកសារផ្លូវច្បាប់ គ្រប់ប្រតិបត្តិការទាំងអស់ត្រូវតែធ្វើឡើងដោយមានឯកសារជាលាយលក្ខអក្សរជាដាច់ខាត ដើម្បីជួយសម្រួលដល់ការផ្គូរផ្គងតម្លៃរវាងអ្នកលក់ និងអ្នកទិញ ជាពិសេសនៅពេលមានបញ្ហាយើងងាយរកភាគីទី3 ឱ្យជួយដោះស្រាយ។
7. ការចរចា ជារឿងសំខាន់ខ្លាំងណាស់ដែរ ព្រោះអ្នកខ្លះគាត់មានសមត្ថភាពអាចធ្វើការងារច្រើន និងបានល្អទៀតផង ប៉ុន្តែគាត់មានចំណុចខ្សោយក្នុងការចរចា។ ការចរចាយើងអាចចាត់ទុកថាជាចំណុចកំពូលសម្រាប់ភ្នាក់ងារអចលនទ្រព្យទូទៅ ដែលត្រូវតែព្យាយាមធ្វើឱ្យបានល្អបំផុត ព្រោះបើយើងធ្វើនៅសល់តែ1ចំណុច (99% គឺនៅតែបរាជ័យ)។ សរុបមកចំណុចទាំងប៉ុន្មានខាងលើដែលខ្ញុំបានបង្ហាញ វាជាបទពិសោធន៍ជាក់ស្តែងដែលធ្វើឱ្យខ្ញុំទទួលបានជោគជ័យក្នុងវិស័យអចលនទ្រព្យរយៈពេលជាង20ឆ្នាំកន្លងមកនេះ៕

តើចក្រភពអង់គ្លេសមានស្ថាបត្យកម្មសំណង់អ្វីគួរឲ្យចាប់អារម្មណ៍?

February 27, 2018

0

ប្រែសម្រួលដោយ វុត្ថា

ភ្នំពេញ៖ ចក្រភពអង់គ្លេស គឺជាប្រទេសមហាអំណាចសេដ្ឋកិច្ចមួយក្នុងចំណោមមហាអំអាចសេដ្ឋកិច្ចទាំង៨នៅលើពិភពលោក ព្រមទាំងមានអាវុធយុទ្ធភណ្ឌ និងបច្ចេកវិទ្យាទំនើបៗ។

ប៉ុន្តែថ្ងៃនេះគេហទំព័រ Propertyarea.asia សូមនាំលោក អ្នកទៅពិនិត្យមើលសំណង់ស្ថាបត្យកម្មក្នុងប្រទេសមួយនេះ តើមានអច្ឆរិយភាពសម្រាប់បង្អួតពិភពលោកដូចម្តេច?

អង់គ្លេសមិនចាញ់បណ្តាប្រទេស ដែលមានសេដ្ឋកិច្ចរីកចម្រើនដល់កំពូលនោះទេ ប្រទេសនេះបានសាងសង់អគារ The Shard ឬ ហៅថា Shard London Bridge ដែលកាលពីមុនគេហៅអគារនេះថា London Bridge Tower មានកំពស់ ៩៥ ជាន់ និង៣០៩.៦ ម៉ែត្រ ត្រូវបានគូប្លង់ដោយស្ថាបត្យករល្បីល្បាញជនជាតិអ៊ីតាលី លោក Renzo Piano។

អាគារដ៏អស្ចារ្យនេះស្ថិតនៅក្នុងតំបន់ Southwark ក្នុងទីក្រុងឡុងដ៏ប្រទេសអង់គ្លេស។ អគារនេះ គឺជាអគារខ្ពស់បំផុតក្នុងប្រទេសអង់គ្លេស និងតំបន់សហភាពអឺរ៉ុប និងខ្ពស់លំដាប់ទី៥ក្នុងតំបន់អឺរ៉ុបទាំងមូល។ អគារនេះផងដែរ គឺជាស្ថាបត្យកម្មសំណងល្អឯងទី២ បន្ទាប់ពីអគារស្ថានីយ៍បញ្ជូនបណ្តាញ Emley Moor ក្នុងប្រទេសអង់គ្លេស។

ការសាងសង់អគារនេះ បានចាប់ផ្តើមនៅក្នុងឆ្នាំ២០០៩ និងបញ្ចប់នៅថ្ងៃទី ៣០ ខែមីនា ឆ្នាំ ២០១២ ព្រមទាំងបើកឲ្យដំណើរការជាផ្លូវវការនៅថ្ងៃទី៥ខែកក្កដា ឆ្នាំ២០១២ និងបើកអោយសាធារណៈជនចូលទស្សនា និងមើលទេសភាពទីក្រុងនៅក្នុងឆ្នាំ ២០១៣។

ប៉មនៃអគារនេះ មានរាង្គជាពីរ៉ាមីត ដែលមានកញ្ចក់ព័ទ្ធជុំវិញនៅជាន់ទី៧២ ក្នុងកម្រិតកម្ពស់២៤៤ម៉ែត្រ ដែលអាចឲ្យសាធារណៈជនមើលទេសភាពទីក្រុងទាំងមូល និងស្រូបយកខ្យល់អាកាសបានដោយរីករាយ។

អគារ The Shard បានសាងសង់ឡើងដោយក្រុមហ៊ុន Sellar Property Group ក្នុងនាមក្រុមហ៊ុន LBQ Ltd និងត្រូវបានគ្រប់គ្រងរួមគ្នាដោយ ក្រុមហ៊ុន Sellar Propertyចំនួន៥ភាគរយ និងរដ្ឋកាតាចំនួន៩៥ភាគរយ។អគារ The Shard ត្រូវបានគ្រប់គ្រងដោយក្រុមហ៊ុនអចលនទ្រព្យ (UK) Limited ក្នុងនាមជាម្ចាស់ផ្ទាល់។ អគារដែលខ្ពស់កប់ពពកមួយនេះ ត្រូវបានគេបោះទុនវិនិយោគក្នុងការសាងសង់ក្នុងទំហំទឹកប្រាក់ចំនួន៤៣៥ លានផោន។

ស្ថាបត្យកម្មដល់កំពូលនេះ ត្រូវបានគេប្រើប្រាស់ចម្រុះ មានទាំងការិយាល័ធ្វើការ ភោជនីយដ្ឋាន សណ្ឋាគារ អាផាតម៉ិន និងកន្លែងតាំងពីព័ណរូបថត រួមជាមួយនឹងកន្លែងទស្សនា និងស្រូបយកខ្យល់អកាសបរិសុទ្ធផងដែរ។ អគារនេះផងដែរ ត្រូវបានគេហុំព័ទ្ធដោយកញ្ចក់ និងដែកដែលត្រូវបានគេរចនាដើម្បីអាចទស្សនាពីលើកអាកាសបាន។ អគារនេះស្ថិតនៅជិត ស្ថានីយ៍រថភ្លើង London Bridge Station ដែលជាតំបន់មមាញឹកឆ្លងកាត់របស់អ្នកដំណើរ ។ អគារ The Shard គឺជាផ្នែកមួយដ៏សំខាន់ ក្នុងការបង្កើតឡើងវិញរបស់ធនាគារ South Bank របស់ទីក្រុងឡុងដ៍។

អាគារដែលឈរចំកណ្តាលក្រុងមួយនេះ គឺជានិមិត្តរូបនៃទីក្រុងឡុងដ៍ និងអន្តរជាតិ៕

តើប្រទេសណាសាងសង់អាគារមានសភាពរមួលទី១លើលោក?

February 27, 2018

0

ប្រែសម្រួល វុត្ថា

ភ្នំពេញ៖ ការបង្អួតពីកិត្យានុភាព ឬសំណង់ស្ថាបត្យកម្មដែលសម្គាល់ជា Landmark របស់ខ្លួន សុទ្ឋតែជារឿងប្រកួតប្រជែងក្នុងដើមសតវត្សរ៍ទី២១នេះ ហេតុនេះទើបប្រទេសនិមួយៗ ព្យាយាមបង្អូតពីសំណង់ស្ថាបត្យកម្ម និងបេតិកភ័ណ្ឌរូបិយ និងអរូបិយរបស់ខ្លួន។

ថ្ងៃនេះគេហទំព័រ Propertyarea.asia ដែលនាំមុខគេផ្នែកព៌តមានអចលន ទ្រព្យ និងសេដ្ឋកិច្ច សូមនាំលោកអ្នកទៅកាន់ប្រទេសស៊ុយអ៊ែត ថាតើប្រទេសនេះមានសំណង់ស្ថាបត្យកម្មអស្ចារ្យបែបណា យើងទៅទស្សនាអគារ Turning Torso ទាំងអស់គ្នា ជាអាគារដែលមានភាពរមួលទី១នៅលើលោក។

វាគឺជាអគារលំនៅដ្ឋានខ្ពស់កប់ពពកក្នុងប្រទេស Sweden ឬ ស៊ុយអ៊ែត និងជាអគារខ្ពស់ជាងគេ នៅក្នុងទីក្រុង Scandinavia ស្ថិតនៅក្នុងតំបន់ Malmo ។ អគារនេះ ត្រូវបានគេសាងសង់ឡើង និងជាសហកម្មសិទ្ធប្រតិបត្តិករជាមួយក្រុមហ៊ុន HSB ។

អគារដ៏អស្ចារ្យ នេះ ត្រូវបានគេចាត់ទុកថា ជាអគារខ្ពស់កប់ពពកមានរាងរមួលទី១ ក្នុងពិភពលោក ដែលគូប្លង់ដោយស្ថាបត្យករជនជាតិអេស្បាញ វិស្វករសំណង់ ដោយលោក Santiago Calatrava ។

អគារដែលកំពស់ប្រមាណជា១៩០ម៉ែត្រ និង៥៤ជាន់នេះ មានអាផាតមិនចំនួន១៤៧យូនីត និងត្រូវបានគេបើកឲ្យប្រើប្រាស់ជាផ្លូវការនៅក្នុងឆ្នាំ ២០០៥។

អគារនេះបានទទួលរង្វាន់កាលពីឆ្នាំ ២០១៥ (10 Year Award) ពីក្រុមប្រឹក្សាលំនៅដ្ឋាន និងអគាខ្ពស់ (CTBUH) និងទទួលបានពានរង្វាន់មេដាយមាស Emporis Skyscraper Award ផងដែរ កាលពីឆ្នាំ២០០៥ ជាអគាររមួលទី១ក្នុងពិភពលោក ។

អគារនេះ ត្រូវបានគេសាងសង់ឡើងកាលពីឆ្នាំ ២០០១ និងបញ្ចប់នៅក្នុងឆ្នាំ២០០៥ សម្រាប់បំរើសកម្មភាពពាណិជ្ជកម្ម និងអាផាតម៉ិនជួលជាដើម៕

សមាគមអ្នកអភិវឌ្ឍន៍លំនៅដ្ឋាននឹងពិនិត្យវឌ្ឈនភាពការងារក្នុងវិស័យលំនៅដ្ឋាន

February 27, 2018

0

ដោយ ដែន ចែងចាំង

ភ្នំពេញ៖ សមាគមអ្នកអភិវឌ្ឍន៍លំនៅដ្ឋានកម្ពុជា នឹងរៀបចំមហាសន្និបាតរបស់ខ្លួន ដើម្បីពិនិត្យពីវឌ្ឍនភាពការងាររបស់ខ្លួនកាលពីឆ្នាំមុន និងលើកទិសដៅការងារថ្មីសម្រាប់ឆ្នាំ២០១៨។

មហាសន្និបាតដែលនឹងប្រារពធ្វើនៅថ្ងៃទី២៧ កុម្ភៈនេះ នឹងមានការចូលរួមជាអធិបតីពីលោកទេសរដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ និងអ្នកអភិវឌ្ឍន៍វិស័យលំនៅដ្ឋានជាច្រើនទៀត។

លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី២៧ កុម្ភៈនេះថា បន្ទាប់ពីបានបង្កើតឡើងកាលពីចុងឆ្នាំ២០១៥ សមាគមនេះបានសម្រេចជោគជ័យលើកិច្ចការជាច្រើន ដូចជា ជួយដោះស្រាយបញ្ហាពន្ឋដាជាមួយក្រសួងសេដ្ឋកិច្ច និងហិរញ្ញវត្ថុ ជួយសម្របសម្រួល ទាក់ទងនឹងបណ្តាញអគ្គិសនីជាមួយអាជ្ញាធរអគ្គិសនីកម្ពុជា បណ្តាញទឹកស្អាត និងបណ្តាញហេដ្ឋារចនាសម្ព័ន្ឋជាមួយក្រសួងរៀបចំដែនដី នគរូបនីយកម្ម និងសំណង់ និងការងារពាក់ព័ន្ឋការអភិវឌ្ឍន៍លំនៅដ្ឋានជាច្រើនទៀត។

លោកឧកញ៉ាបានបន្តថា ជាមួយគ្នានេះ លោកក៏បានដឹកនាំសមាជិកសមាគមបានដឹកនាំសមាជិកទៅទស្សនកិច្ច ដកស្រង់បទពិសោធន៍ការងារជាមួយបណ្តាប្រទេសជាសមាជិកអាស៊ាន ដូចជាប្រទេសថៃ ជាដើម។ លើសពីនេះកាលពីពេលថ្មីៗនេះ សមាគមបានទទួលពានរង្វាន់ឆ្នើមBID ពីចក្រភពអង់គ្លេសផងដែរ។លោកបន្តថា សមាគមនឹងបោះឆ្នោតជ្រើសរើសប្រធានដឹកនាំថ្មី នៅចុងឆ្នាំ២០១៨នេះផងដែរ។

យោងតាមលក្ខន្តិកៈរបស់សមាគមនេះបានឲ្យដឹងថា ប្រធានសមាគមនេះមានអាណត្តិការងារចំនួន៣ឆ្នាំ ហើយប្រធាននិមួយៗអាចឈរឈ្មោះឲ្យគេបោះឆ្នោតឲ្យបានតែពីរអាណត្តិប៉ុណ្ណោះ៕

ក្រុមហ៊ុនយក្សចិនគ្រោងសាងសង់ទីក្រុងថ្មីមួយនៅខេត្តកោះកុង

February 27, 2018

0

ដោយ គង់ សូរិយា

ភ្នំពេញ៖ ក្រុមហ៊ុន Tianjin Union Development Group ជាក្រុមហ៊ុនយក្សមួយមានមូលដ្ឋាននៅប្រទេសចិន បាននិងកំពុងដំណើរការសាងសង់ទីក្រុងមួយនៅក្នុងខេត្តកោះកុង ខណៈបច្ចុប្បន្នក្រុមហ៊ុននេះបាននិងកំពុងសាងសង់ព្រលានយន្តហោះនិងហេដ្ឋារចនាសម្ព័ន្ឋជាច្រើនទៀត។

តាមប្រភពព៌តមានពីប្រភពគួរឲ្យទុកចិត្តមួយបានឲ្យដឹងថា ក្រុមហ៊ុនខាងលើនេះបាន និងកំពុងប្រែក្លាយទឹកដីមួយផ្នែកនៃក្រុមបុទុមសាគរ និងស្រុកថ្មបាំង ខេត្តកោះកុង ជាទីក្រុងទំនើបខ្នាតអន្តរជាតិមួយ ដោយរួមមានកំពង់ផែទឹកជ្រៅ ព្រលានយន្តហោះ មជ្ឈមណ្ឌលពាណិជ្ជកម្ម ដែលនឹងសាងសង់នៅលើផ្ទៃសមុទ្រ និងហេដ្ឋារចនាសម្ព័ន្ឋជាច្រើនទៀត ដោយដាក់ឈ្មោះទីក្រុងនេះថា តារាសាគរ។

បច្ចុប្បន្នក្រុមហ៊ុន Tianjin Union Development Group បានបញ្ចប់ការសាងសង់ហេដ្ឋារចនាសម្ព័ន្ឋមួយចំនួនហើយ ដូចជា សណ្ឋាគារលំដាប់ផ្កាយ៥ ទីលានវាយកូនហ្គោល លំនៅដ្ឋានប្រណីត នៅប្រជុំកោះស្តេច និងកំពុងចាប់ផ្តើមសាងសង់ព្រលានយន្តហោះខ្នាតអន្តរជាតិ នៅក្នុងទឹកដីនេះ ដែលក្រុមហ៊ុននេះបានទទួលដីសម្បទានពីរដ្ឋាភិបាលប្រមាណ៥០,០០០ហិកតា។

តាមគំរោងក្រុមហ៊ុននេះ គ្រោងចំណាយថវិកា៥០០០លានដុល្លារអាមេរិក ដើម្បីវិនិយោគលើទីក្រុង និងបង្កើតរមណីយដ្ឋានទេសចរណ៍ខ្នាតអន្តរជាតិនៅ

លើទឹកដីដ៏ស្រស់ស្អាតនេះ។

ទាក់ទងនឹងការសាងសង់ព្រលានយន្តហោះថ្មីនេះ អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោកស៊ិន ចាន់សិរីវុត្ថាបានថ្លែងថា ការសាងសង់ព្រលានយន្តហោះខ្នាតអន្តរជាតិរបស់ក្រុមហ៊ុននេះ បាននិងកំពុងចាប់ផ្តើមហើយ និងកំពុងចាប់ផ្តើមយ៉ាងសកម្មតាមផែនការរបស់ខ្លួន។

ទោះជាយ៉ាងណាលោក មិនបញ្ជាក់ព៌តមានលំអិតពីគំរោងនេះទេ ដោយសារក្រុមហ៊ុមវិនិយោគព្រលានយន្តហោះកម្ពុជា ដែលវិនិយោគដោយជនជាតិបារាំងនៅព្រលានយន្តហោះទាំងបីនៅកម្ពុជា កំពុងតែជជែកជាមួយរដ្ឋាភិបាលលើបញ្ហានេះ។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា ការសាងសង់ព្រលានយន្តហោះថ្មីនៅខេត្តកោះកុង វាជាជម្រើសថ្មីមួយទៀតសំរាប់វិស័យអាកាសចរណ៍ និងក្រុមហ៊ុនអាកាសចរណ៍នានាអាចភ្ជាប់ជើងហោះហើរទៅកាន់ព្រលាននេះ និងអាចតភ្ជាប់ការហោះហើរជាមួយប្រទេសក្នុងតំបន់ផងដែរ។

លោកបន្តថា “ការអភិវឌ្ឍន៍ និងការមានជម្រើសច្រើន នឹងកាន់តែប្រសើរសម្រាប់កម្ពុជា ហើយយើងរំពឹងថាក្រុមហ៊ុននេះនឹងជួយទាក់ទាញក្រុមហ៊ុនអាកាសចរណ៍ថ្មីៗបន្ថែមទៀត មកកាន់ព្រលានយន្តហោះរបស់ខ្លួននាពេលខាងមុខ”៕

ហាង MacDonald’s ត្រៀមខ្លួនចូលមកកាន់ទីផ្សារកម្ពុជាស្ងាត់ៗ

February 27, 2018

0

ដោយ ដែន ចែងចាំង

ភ្នំពេញ៖ ហាងអាហាររហ័សទាន់ចិត្ត Macdonald’s ដ៏ល្បីល្បាញនៅលើពិភពលោក បាននិងកំពុងត្រៀមខ្លួនឈានជើងចូលទីផ្សារកម្ពុជាស្ងាត់ៗ បន្ទាប់ពីការចចារដើម្បីនាំយកនូវសិទ្ឋអាជីវកម្មរបស់ក្រុមហ៊ុននេះជិតបញ្ចប់។

តាមប្រភពព៌តមានដែលនិយាយ ក្នុងលក្ខខ័ណ្ឌមិនបញ្ចេញឈ្មោះបានឲ្យដឹងថា អ្នកវិនិយោគក្នុងស្រុកមួយរូប កំពុងធ្វើការចចាយ៉ាងស្វិតស្វាញ ដើម្បីនាំយកហាងអាហាររហ័សទាន់ចិត្ត Macdonald’s មកកម្ពុជា ហើយគេរំពឹងថា ការនាំ Franchise នេះមកកម្ពុជានឹងទទួលបានជោគជ័យនៅក្នុងឆ្នាំនេះ។

ទស្សនវិទ្យារបស់ MacDonald’s គឺតម្រូវឲ្យអ្នកទិញ Franchise និមួយៗ ត្រូវទៅលាងបន្ទប់ទឹកនៅក្រុមហ៊ុនមេ របស់ក្រុមហ៊ុននេះនៅសហរដ្ឋអាមេរិក។

ហាងអាហាររហ័សទាន់ចិត្ត Macdonald’s មានសាខាចំនួន១២០ប្រទេស ក្នុងពិភពលោក និងមានមនុស្សទទួលទានអាហារនេះ ចំនួន៦៨លាននាក់ក្នុងមួយថ្ងៃ មានភោជនីយដ្ឋានសរុប៣៦៨៩៩ទីតាំង និងផ្តល់ការងារដល់ប្រជាពលរដ្ឋចំនួន៣៧៥ពាន់នាក់កាលពីដំណាច់ឆ្នាំ២០១៦៕