ដោយ ៖ រ៉ាវី

ភ្នំពេញ ស្ថិតនៅក្នុងបរិបទនៃភាពពុះកញ្ជ្រោល លើការវិនិយោគក្នុងវិស័យអចលនទ្រព្យនាពេលបច្ចុប្បន្ននេះ គេសង្កេតឃើញថាវិស័យនេះមានការរីកដុះដា​លគ្រប់ទីកន្លែង ជាពេលដែលអ្នកមានធនធានបានវិនិយោគលើផ្នែកផ្សេងៗក្នុងវិស័យនេះ ដូចជាទិញផ្ទះ ទិញដី ទិញខុនដូទុកលក់យកចំណេញជាដើម។

អ្នកវិនិយោគមានក្ដីរំពឹងទទួលបានភាគលាភ និងប្រាក់ចំណេញនៅថ្ងៃអនាគត ខណៈដែលអ្នកវិនិយោគមួយចំនួន បានធ្វើឡើងទាំងភាពប្រថុយប្រថាន។ ចង់ដឹងទេថា តើគួរសិក្សា និងពឹងផ្អែកទៅលើចំណុចគន្លឹះអ្វីខ្លះ ទើបអាចទទួលបានប្រាក់ចំណេញពីការវិនិយោគ និងគេចផុតពីការខាតបង់ ? សូមស្វែងយល់នូវគន្លឹះខ្លីៗ តែមានប្រយោជន៍ដូចខាងក្រោមជាមួយគេហទំព័រអចលនទ្រ ព្យ និងសេដ្ឋកិច្ចឈានមុខគេនៅកម្ពុជា www.propertyarea.asia។

-​សិក្សា​ទៅលើ​ទីតាំង

មិនថាលោកអ្នកទិញ​លំនៅ​ឋាន​សម្រាប់​ស្នាក់​នៅ  ឬទិញសម្រាប់ការវិនិយោគបន្តនោះទេ ចំណុចដែលគួរពិចារណាមុនគេនោះ គឺគួរតែ​សិក្សា​ឱ្យ​បាន​លម្អិត​អំពី​ទីតាំង​ជា​មុន​សិន។ ត្រូវដឹងពីព័ត៌មាននានា​ឱ្យ​បាន​ច្រើន​បំផុត ​ដូច​ជា បរិយាកាស​ទូទៅ កត្តាប្រជាសាស្រ្ត និងកម្រិតជីវភាពក្នុងតំបន់ ភាព​ងាយស្រួល​ក្នុង​ការ​ធ្វើ​ដំណើរ ជាពិសេស ​សេវា​សាធារណៈ ដូច​ជា​ សាលារៀន មន្ទីរពេទ្យ ធនាគារ ជាដើម។

-​ប្រៀបធៀប​ព័ត៌មាន

នៅពេល​បាន​សិក្សា​លម្អិត និង​ទទួល​បាន​ព័ត៌មានពាក់ព័ន្ធទាំងអស់ ដូចបានរៀបរាប់ខាង​នេះហើយ លោកអ្នក ​អាច​យក​ព័ត៌មាន​ទាំងនោះ​ទៅពិចារណា​ ដោយធ្វើការប្រៀបធៀបគ្នាជាមួយទីតាំងផ្សេងទៀត ដែ​លស្ថិតនៅក្នុងជម្រើសរបស់លោកអ្នកថា តើតំបន់ ឬទីតាំង​ណាមួយ ​ដែល​មានភាពទាក់ទាញ​ មានការ​ចាប់អារម្មណ៍​ច្រើន​ជាង ដោយដោយសំអាងទៅលើចំណង់​ចំណូលចិត្ត​របស់​ខ្លួន​ផ្ទាល់ ដែលជាចំណុច​សំខាន់។

– ភាពចាំបាច់​នៃ​ការ​ទិញ​លំនៅ​ដ្ឋាន

ការ​ទិញ​​លំនៅដ្ឋាន​សម្រាប់វិនិយោគដើម្បីទទួលបានចំណេញ ប្រសិនបើលោកអ្នកមានធនធានគ្រប់គ្រាន់ លើការទិញទុកវិនិយោគនោះ ដូចជា មិនសូវបញ្ហានោះទេ ប៉ុន្តែបើចំពោះអ្នកវិនិយោគដោយការបង់រំលស់ ឬពឹងផ្អែកទៅលើកម្ចីពីស្ថាប័នហិរញ្ញវត្ថុ គួរតែ​គិត​ឱ្យ​បាន​ដិត​ដល់​ ដែលវាអាចជាពី​បញ្ហាហានិភ័យខ្ពស់ និងអាចកើតមានជាយថាហេតុដោយប្រការណាមួយ។

ដូច្នេះលោក អ្នកគួរតែមានការត្រៀមទុក នូវដំណោះស្រាយលើផ្នែកហិរញ្ញវត្ថុឱ្យបានរួចរាល់ជាស្រេច។​ចំណុច​សំខាន់ និងចាំបាច់មួយចំណុចទៀត គឺប្រភពចំណូលដែលត្រៀមបង់រំលស់ប្រកបដោយស្ថិរភាព។

-​ពិគ្រោះ​យោបល់​ជាមួយអ្នកជំនាញ

ដើម្បីជួយ​ឱ្យ​ការ​ទិញសម្រាប់វិនិយោ​គរបស់លោក អ្នកអាចមានភាពរលូនទៅបាន លោក អ្នកគួរ​តែរក​អ្នកជំនាញផ្នែកវិស័យនេះ ដើម្បី​ជួយ​ផ្តល់​ជាយោបល់មុនពេលសម្រេចចិត្តទិញ ពីព្រោះ​ថាការសុំពិគ្រោះពីសំណាក់អ្នកជំនាញ ក្រៅពី​អាច​ជួយ​កាត់​បន្ថយ​ហានិភ័យ​ហើយ​នោះ ថែម​ទាំង​ធ្វើ​ឱ្យ​ការ​ទិញ​ ​លក់​លំនៅ​ដ្ឋានរបស់លោក អ្នក​មានភាព​ជឿជាក់​ និងប្រាកដថាការសម្រេចចិត្ត មិនត្រូវធ្វើឡើងទាំងភាពប្រថុយប្រថាននោះទេ៕

ដោយ វុត្ថា

ភ្នំពេញ៖ កាសែត The Sun ដែលមានមូលដ្ឋាននៅក្នុងចក្រភពអង់គ្លេស (UK) បានចុះផ្សាយនាពេលថ្មីៗនេះថា អគារភ្លោះ ដែលមានកំពស់១៣៣ជាន់ ដែលគ្រោងសាងសង់ នៅក្នុងទីក្រុងភ្នំពេញនៃប្រទេសកម្ពុជា នឹងបំបែកឯទត្តកកម្មពិភពលោកជាអគារភ្លោះខ្ពស់ជាងគេក្នុងតំបន់អស៊ាន។

អគារភ្លោះដែលខ្ពស់កប់ពពក និងធំជាងគេនៅក្នុងតំបន់អាស៊ាន នឹងដុះឡើងនៅតាមបណ្តោយមាត់ទន្លេងមេគង្គ ក្នុងរាជធានីភ្នំពេញនាពេលខាងមុខ ដែលអគារភ្លោះនេះ នឹងត្រូវចំណាយពេលសាងសង់៥ឆ្នាំ ក្នុងទំហំទឹកប្រាក់ប្រ​មា​ណជា២.៧ពាន់លានដុល្លារ។ ដែលអាគារនេះនឹងក្លាយជាមជ្ឈមណ្ឌលពាណិជ្ជកម្មចម្រុះ ដូចជាផ្សារទំនើប អាផាតមិន រោងភាពយន្ត សណ្ឋាគារ ការិយាល័យធ្វើការ ភោជនីដ្ឋាន និងកន្លែងតាំងពិព័រណ៍ជាដើម។

សារព័ត៌មាននេះចុះផ្សាយថា នៅពេលសាងសង់បញ្ចប់ អគារនេះនឹងជាប់ជាអគារភ្លោះខ្ពស់ជាងគេ ក្នុងពិភពលោកបន្ទាប់ពីអគារ Petronas Twin Towers របស់ប្រទេស ម៉ាឡេស៊ីដែលមានកំពស់ត្រឹមតែ៤៥២ ម៉ែត្រ។

ក្រុមហ៊ុនសាងសង់ចិនចំនួន២ នឹងសាងសង់អគារនេះ ដែលត្រូវចំណាលពេល៥ឆ្នាំលើទំហំដី១.៥លានម៉ែត្រការ៉េ។ អគារនេះនឹងក្លាយទៅជាអគារមជ្ឈ​មណ្ឌលពាណិជ្ជកម្មធំបំផុតនៅអាស៊ីអាគ្នេយ៍ មិនត្រឹមតែនៅក្នុងប្រទេសកម្ពុជានោះទេ។

ទោះជាយ៉ាងណាក៏ដោយ ក៏មិនអាចប្រៀបធៀបនឹងអាគារខ្ពស់បំផុតនៅលើពិភពលោកបានទេ គឺអគារ Burj Khalifa នៅក្នុងទីក្រុងឌូបៃបានដែរ ដែលជាប់កំណត់ត្រាមានកម្ពស់២,៧១៧ ហ្វីត  បន្ទាប់មកអគារ Shangai Tower in China នៅក្នុងប្រទេសចិន និងអាគារ Abraj Al-Bait Clock Tower នៅទីក្រុងមេកាសាប្រទេសអារ៉ាប៊ីសាអ៊ូឌីត។

កាលពីឆ្នាំមុនផែនការសាងសង់អគារខ្ពស់ កប់ពពកក្នុងតំលៃ៨00លានដុល្លារនៅទីក្រុងឡុងដ៍ត្រូវបានគេដាក់បង្ហាញដែរ ដែលគ្រោងសាងសង់ដោយក្រុមហ៊ុន Spire London ដែលមានមូលដ្ឋាននៅក្នុងប្រទេសចិន ។ អគារនេះ ត្រូវបានគេសាងសង់ទៅជាផ្ទះល្វែងដ៏ប្រណីតជាច្រើន សម្រាប់អ្នកមានទ្រព្យសម្បត្តិច្រើនប៉ុណ្ណោះ ។ អគារនេះ នឹងត្រូវគេសាងសង់ក្នុងកម្រិតកំពស់៧៧០ ម៉ែត្រនឹងក្លាយជាអគារលំនៅដ្ឋានខ្ពស់បំផុតនៅអឺរ៉ុបខាងលិច ដែលគ្រោងបញ្ចប់នៅក្នងឆ្នាំ២០២០។

ប្រសិនជាសាងសង់បញ្ចប់ និងធ្វើឡើងតាមគំរោងដើម អាគារពាណិជ្ជកម្ម​លំដាប់ពិភពលោក Thai Bunrong Twin Tower មិនត្រឹមតែមានជាអាគារខ្ពស់ចំនួនពីរនោះទេ ប៉ុន្តែមានអាគាររណបកំពស់៤៥ជាន់ ចំនួន៤នៅជុំវិញបន្ថែមទៀត ដែលវានឹងក្លាយជាអាគារឬមជ្ឈមណ្ឌលពាណិជ្ជកម្មធំជាងគេ ក្នុងតំបន់អា​ស៊ាន និងពិភពលោកផងដែរ៕

ដោយគង់ សូរិយា

ភ្នំពេញ រឿងដែលគេទន្ទឹងជាយូរមកហើយ មានដំណឹងល្អ ដោយផ្ទះ​មានតម្លៃសមរម្យតំបូងគេ បានប្រកាសទទួលកក់ប្រាក់ជាផ្លូវការពីអតិថិជនហើ​យ។

លោកឧកញ៉ានួន រិទ្ឋីអគ្គនាយកក្រុមហ៊ុនKhmer Foundation Appraisal​(KFA )ដែលទទួលសិទ្ឋលក់គំរោងនេះ ជាផ្លូវការបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៥ មករានេះថា ក្រុមហ៊ុនបានបើកទទួលការកក់ប្រាក់ពីអតិថិ​ជនហើយ ដោយផ្ទះក្នុងគំរោងនេះមានតម្លៃចាប់ពី២៥,០០០ដុល្លារ ដល់ជាង៣០,០០០ដុល្លារអាមេរិក។ លោកបន្តថា អតិថិជនអាចកក់ប្រាក់ចន្លោះពី៥ទៅ៣០ភាគរយ និងទទួលបានការអនុគ្រោះ មិនយកការប្រាក់រយៈពេល២៤ខែ និងបន្ទាប់ពីនេះ អតិថិជនអាចប្រើប្រាស់ឥណទានធនាគារ ដោយក្រុមហ៊ុនជាអ្នកជួយសម្របសម្រួលជូន។

អតិថិជនអាចស្វែងរកការិយាល័យ ស្ថិតនៅដីឡូត៍លេខ៦៤៤បេ ភូមិទួល​រកា សង្កាត់ចក្រអង្រែក្រោម ខ័ណ្ឌមានជ័យ រាជធានីភ្នំពេញ។

ចំណែកគំរោងលំ​នៅដ្ឋាននេះស្ថិតនៅភូមិ កោះគរ ឃុំរកាខ្ពស់ ស្រុកស្អាង ខេត្តកណ្តាល។

លោកឧកញ៉ានួន រិទ្ឋីបានបន្តថា បច្ចុប្បន្ននេះក្រុមហ៊ុនWorld Bridge កំពុង​ចាប់ផ្តើមសាងសង់លំនៅដ្ឋាននេះហើយ ដែលមានផ្ទះសរុបចំនួន២៤៥៧ផ្ទះ ស្ថិតនៅលើផ្ទៃដីជាង២០ហិកតា និងគ្រោងចំណាយពេលសាងសង់រយៈពេលចំនួន២០ខែ។

យោងតាមសេចក្តីប្រកាសព៌តមានរបស់ក្រុមហ៊ុនវើលដ័ប្រីដ ហូមឯកដែ​លជាបុត្រសម្ព័ន្ឋរបស់ក្រុមហ៊ុនWorld Bridge Groupបានឲ្យដឹងថា ដើម្បីជួយសម្រួលបន្ទុកនការបង់ប្រាក់កក់របស់អតិថិជន សម្រាប់គំរោងលំនៅដ្ឋានតម្លៃស​មរម្យ របស់ក្រុមហ៊ុនរបស់យើងខ្ញុំ ក្រុមហ៊ុននឹងអនុញ្ញាត្តឲ្យអតិថិជនបង់ប្រាក់កក់​តំបូងតែ៥ភាគរយ ឬ១០ភាគរយនៃតម្លៃផ្ទះប៉ុណ្ណោះ ហើយអាចបង់បង្រ្គប់ឲ្យគ្រប់​ចំនួន២០ភាគរយ ឬ២៥ភាគរយ ឬ៣០ភាគរយរហូតដល់២៤ខែ ដោយគ្មានការ​ប្រាក់អ្វីទាំងអស់ជាមួយក្រុមហ៊ុន។

ក្នុងន័យនេះអតិថិជន នឹងត្រូវបង់ប្រាក់ចន្លោះពី១០៥ដុល្លារអាមេរិក ទៅ២៤៤​ដុល្លារអាមេរិកប៉ុណ្ណោះក្នុងមួយខែ អាស្រ័យតាមតម្លៃផ្ទះនិងជម្រើសបង់ប្រាក់កក់។

សេចក្តីប្រកាសព៌តមានដដែលបានបន្តថា អតិថិជន​ដែលមានបំណងទិញលំនៅដ្ឋានក្នុងគំរោងនេះ ត្រូវភ្ជាប់ឯកសារចំនួន៣ គឺទី១ ពាក្យស្នើសុំទិញលំនៅដ្ឋាន​​តម្លៃសមរម្យជាមួយក្រុមហ៊ុន ទី២ អត្តសញ្ញាណសញ្ជាតិខ្មែរ និងប័ណ្ណសម្គាល់មន្រ្តីរាជការ និងទី៣ សំបុត្រអាពាហ៍ពិពាហ៍ឬសៀវ​ភៅស្នាក់នៅ និងសៀវភៅគ្រួសារ៕

ដោយ ដែន ចែងចាំង

ភ្នំពេញ៖ ស្របពេលការផ្គត់ផ្គង់កើនឡើង ធ្វើឲ្យចំនួនទំហំការិយាល័យកើន​ឡើងក្តី ប៉ុន្តែទីផ្សារជួលនៅតែមានតម្លៃល្អប្រសើរនៅឡើយ ដោយសារកំនើននៃ​ការវិនិយោគ។

ការសិក្សាថ្មីមួយធ្វើឡើងដោយក្រុមហ៊ុន CBRE Cambodia ដែលទើបបានបង្ហាញកាលពីសប្តាហ៍មុនបានរកឃើញថា យោងទៅលើការព្យាករណ៍សម្រាប់ឆ្នាំ ២០១៨ និងឆ្នាំ២០១៩ និងចំនួនអាគារការិយាល័យមានការកើនឡើង ដោយមានការិយាល័យចំនួន៥​ នៅក្នុងទីក្រុងភ្នំពេញត្រូវបានបញ្ច​ប់​ការសាងសង់នៅក្នុងឆ្នាំ២០១៧ និង​មាន​ការិយាល័យចំនួន៩គំរោង សម្រាប់ឆ្នាំ២០១៨ និងឆ្នាំ២០១៩។

ការសិក្សាដដែលបានរកឃើញថា ក្នុងការរំពឹងគិតតម្លៃជួលនៅមានស្ថេ​រភាពដូចធម្មតាដដែល។ ម្យ៉ាងទៀតនៅក្នុងឆ្នាំ២០១៨​នេះ នឹងមានការផ្គត់ផ្គង់អាគារការិយាល័យ ដែលមានកម្មសិទ្ធចំណែកឯកជន៦០,០០០ម៉ែត្រការ៉េថែមទៀត ដែលនឹងដាក់ចូលទីផ្សារផងដែរ។

ការិយាល័យដែលនៅតែមានប្រជាប្រិយភាពជាងគេ នៅរាជធានីភ្នំពេញ នៅតែជាអាគារការិយាល័យកម្រិតB និងអាគារការិយាល័យC ដែលតម្លៃជួល​មាន​ភាពសមរម្យ សម្រាប់ក្រុមហ៊ុនទើបបង្កើតថ្មីៗ និងសម្រាប់ក្រុមហ៊ុនមានខ្នាតមធ្យម ដែលពួកគេមិនចង់ចំណាយច្រើនលើការិយាល័យរបស់ខ្លួន។នេះបើតាមការឲ្យដឹងពីលោក គុយ វ៉ាត ប្រធានក្រុមប្រឹក្សាភិបាលនៃក្រុមហ៊ុន Century21 Cambodia៕

ដោយ ដួង ចន្រ្ទា

ភ្នំពេញ ស្របពេលការសាងសង់បន្តសកម្មភាពជារៀងរាល់ថ្ងៃ ចំនួនអាគារ​ខ្ពស់ៗនៅក្រុងភ្នំពេញបានបន្តកើនឡើង ជាពិសេសអាគារខុនដូចំនួន១៧គំរោង​ទៀតនឹងបញ្ចប់ការសាងសង់នៅឆ្នាំនេះ។

យោងតាមការសិក្សារបស់ក្រុមហ៊ុន CBRE Cambodia ដែលបានបង្ហាញ​កាលពីសប្តាហ៍មុនបានរកឃើញថា មានខុនដូចំនួន ១៧ ដែលគ្រោងនឹងបញ្ចប់ការសាងសង់នៅអំឡុងឆ្នាំ ២០១៨ ខាងមុខនេះ ខណៈកាលពីឆ្នាំមុនចំនួនខុនដូនៅក្នុងទីក្រុងភ្នំពេញ មានចំនួន៨៦០០បន្ទប់គិតមកដល់ឆ្នាំ២០១៧។ នៅក្នុងឆ្នាំ២០១៧មានខុនដូចំនួន៩ បានប្រកាសសាងសង់។

ចំណែកឯតម្លៃរបស់ខុនដូត្រូវបានធ្លាក់ចុះ១១ភាគរយ សម្រាប់ខុនដូខ្នាតមធ្យម និង៤ភាគរយសម្រាប់ខុនដូខ្នាតកណ្តាល ក៏ប៉ុន្តែតម្លៃសម្រាប់ខុនដូខ្នាតខ្ពស់ មានការកើនឡើងរហូតដល់៣ភាគរយ។​ ការសិក្សាបានរកឃើញផងដែរថា នៅក្នុងឆ្នាំ២០១៨នេះអត្រាជួលមានការធ្លាក់ចុះសម្រាប់ខុនដូ។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodiaបានថ្លែងថា ទីផ្សារខុនដូកាន់តែមានភាពប្រកួតប្រជែងខ្លាំងជាងមុន ដែលធ្វើឲ្យតម្លៃខុនដូបានធ្លាក់ចុះបន្តិចបន្តួច ប៉ុន្តែមិនមានសញ្ញានៃហានិភ័យខ្លាំងក្នុងវិស័យនេះទេ។អ្នកនាងបានបន្តថា ធៀបជាមួយអាផាតម៉ិនដែលដាក់ជួលនិងគំរោងបញ្ចប់ការសាងសង់កើនឡើងផងដែរ ជាហេតុធ្វើឲ្យការប្រកួតប្រជែងកើនឡើង។

ការសិក្សារបស់ក្រុមហ៊ុន VTRUST Appraisalបានបញ្ចប់កាលពីពេលថ្មីៗនេះបានរកឃើញផងដែរថា ចំនួនខុនដូនៅកម្ពុជាបានកើនឡើងជិត៦ម៉ឺនយូនីត ភាគច្រើនជាខុនដូដែលមានទីតាំងនៅរាជធានីភ្នំពេញ។

អគ្គនាយកក្រុមហ៊ុន Century21Mekongលោកច្រឹក សុខនីមបានថ្លែងថា ទីផ្សារខុនដូមានសភាពធម្មតា គ្រាន់តែដំណើរការលក់មានភាពយឺតយ៉ាវជាងមុន​បន្តិច ប៉ុន្តែចំនួននៃការលក់នៅតែកើនឡើង ពិសេសខុនដូដែលមានតម្លៃមធ្យម និងផ្តោតលើប្រជាជនមានប្រាក់ចំណួលមធ្យម។

លោកបន្តថា “និន្នាការទិញខុនដូពីសំណាក់ប្រជាពលរដ្ឋខ្មែរបានកើនឡើងដោយបច្ចុប្បន្នខុនដូ៣០ភាគរយ ត្រូវបានទិញដោយប្រជាពលរដ្ឋខ្មែរនិង៧០ភាគ​រយគ្រប់គ្រងដោយជនបរទេស”៕