ដោយ គង់ សូរិយា

ភ្នំពេញ៖ អភិបាលក្រុងភ្នំពេញ លោកឃួង ស្រេងបានថ្លែងឲ្យដឹងថា ការយកពន្ឋលើការទិញលក់អចលនវត្ថតែមួយលើក នឹងបញ្ចប់នៅថ្ងៃទី៣១ ធ្នូ ឆ្នាំ២០១៨ខាងមុខនេះ ហេតុនេះប្រជាពលរដ្ឋត្រូវរួសរាន់ ដើម្បីរៀនចំបញ្ចប់ឯកសារនិតិវិធីរបស់ខ្លួន។

មានប្រសាសន៍ក្នុងពេលប្រគល់ប័ណ្ណកម្មសិទ្ឋ ដល់ប្រជាពលរដ្ឋជាង៤០០គ្រួសារ នៅក្នុងសង្កាត់និរោធ ខ័ណ្ឌច្បារអំពៅលោកឃួង ស្រេងបានមានប្រសាសន៍ថា ដោយបានដឹងពីការលំបាករបស់ប្រជាពលរដ្ឋ ទាក់ទងនឹងការផ្ទេរកម្មសិទ្ឋអចលនទ្រព្យ ត្រូវបង់ពន្ឋជាច្រើនលើក សម្តេចតេជោហ៊ុន សែននាយករដ្ឋមន្រ្តីកម្ពុជាបានជួយសម្រួលការងារនេះ ដោយតម្រូវឲ្យប្រជាពលរដ្ឋបង់ពន្ឋតែលើការទិញលក់ ឬការផ្ទេរអចលនវត្ថុតែមួយលើកប៉ុណ្ណោះ ប៉ុន្តែការទទួលបានការសម្រួលបែបនេះ នឹងបញ្ចប់ត្រឹមដំណាច់ខែធ្នូ ឆ្នាំ២០១៨ប៉ុណ្ណោះ។

លោកបន្តថា “ហេតុនេះប្រជាពលរដ្ឋត្រូវរួសរាន់ ដើម្បីធ្វើការងារនេះ ដើម្បីបញ្ចៀ​សការបង់ពន្ឋច្រើនលើកនៅពេលដែលបញ្ចប់សុពលភាព នៃការកំណត់នេះ”។ លោកបន្តថា “ប្រជាពលរដ្ឋអាចដាក់ពាក្យស្នើសុំប្លង់រ៉ឹង ឬប្លង់អ៊ិលម៉ាបដោយចំណាយត្រឹម៦០ម៉ឺន​រៀលប៉ុណ្ណោះ”។

ទោះជាយ៉ាងណាលោកមិនបញ្ជាក់ឲ្យដឹងពីពេលវេលា នៃការអនុវត្តនិតិវិធីខាងលើ​នេះលំអិតឡើយ៕

ដោយ គង់ សូរិយា

ភ្នំពេញ៖ ក្រសួងសេដ្ឋកិច្ចនិងហិរញ្ញវត្ថុ និងសមាគមអ្នកវាយតម្លៃ និងភ្នាក់ងារអចល​នវត្ថុបានចុះហត្ថលេខារួមគ្នា ដើម្បីឲ្យសមាគមនេះចាប់ផ្តើមបើកបណ្តុះបណ្តាលជំនាញវិជ្ជាជីវៈអចលនវត្ថុ និងវិជ្ជាជីវៈវាយតម្លៃអចលនវត្ថុ។

កម្មវិធីនេះកំពុងប្រព្រឹត្តិទៅនៅព្រឹកថ្ងៃទី២៨ មិថុនានេះ នៅទីស្តីការក្រសួងសេដ្ឋកិច្ច ដោយមានការចូលរួមពីលោកម៉ី វ៉ាន់ប្រតិភូរាជរដ្ឋាភិបាលទទួលបន្ទុកជាអគ្គនាយកឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ និងលោកបណ្ឌិតគីម ហ៊ាងប្រធា​នសមាមគមអ្នកវាយតម្លៃ និងភ្នាក់ងារអចលនវត្ថុ និងសមាជិកសមាគមជាច្រើនទៀត។

កម្មវិធីបណ្តុះបណ្តាលនេះនឹងសហការរវាងសមាគម និងសាកលវិទ្យាល័យសេដ្ឋកិច្ចនិងហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។

សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានជូនដំណឹងពីវគ្គបណ្តុះបណ្តាលនេះកាលពីថ្ងៃទី២៦ មិថុនាកន្លងមកនេះ។

ព៌តមានលំអិត proertyarea.asia នឹងផ្តល់ជូនបន្តទៀតនាពេលក្រោយទាក់ទងនឹងការបណ្តុះបណ្តាល កម្មវិធីសិក្សា និងពេលវេលាចាប់ផ្តើមការបណ្តុះបណ្តាលនេះ។

កាលពីសប្តាហ៍មុន ក្រសួងការងារនិងបណ្តុះបណ្តាលវិជ្ជាជីវៈ បានផ្តល់អាជ្ញាប័ណ្ណដល់អ្នកជំនាញអចលនវត្ថុកម្ពុជាមួយក្រុម ដើម្បីបើកមជ្ឈមណ្ឌលអចលនវត្ថុកម្ពុជាផងដែរ។

បើតាមលោកឃាង ពុទ្ឋីប្រធានក្រុមប្រឹក្សាភិបាលនៃមជ្ឈមណ្ឌលអចលនវត្ថុកម្ពុជាបានឲ្យដឹងថា មជ្ឈមណ្ឌលនេះនឹងបើកការបណ្តុះបណ្តាលនៅខែកញ្ញាខាងមុខនេះ ដែលការបណ្តុះបណ្តាលនេះនឹងធ្វើនៅក្នុងគំរោង One Park ស្ថិតតំបន់ Phnom Penh City Center (អតីតបឹងកក់)និងចាប់ផ្តើមចុះឈ្មោះចូលរៀនចាប់ពីខែសីហាខាងមុខនេះ។

លោកបន្តថា “ការបើកមជ្ឈមណ្ឌលអចលនវត្ថុកម្ពុជា ជាការឆ្លើយតបនឹងតម្រូវការ ធនធានមនុស្សក្នុងវិស័យអចលនវត្ថុកម្ពុជា ដែលកំពុងមានការរីកចម្រើនខ្លាំង ហើយត្រូវការធនធានមនុស្សដ៏ច្រើន ដើម្បីបំពេញតម្រូវការទីផ្សារ”។លោកបន្តថា “ការបើកសាលា​កាន់តែច្រើនកាន់តែល្អ ដែលមានន័យថាយើងអាចកសាងបានធនធានមនុស្សច្រើន សំ​រាប់បំរើឲ្យវិស័យនេះ”៕

ដោយ វុត្ថា

ភ្នំពេញ៖ ទសវត្សរ៍ចុងក្រោយនៃក្រុងភ្នំពេញ ត្រូវបានចាត់ទុកជាទសវត្សរ៍មាសសំរាប់កម្ពុជា ដោយសារប្រទេសនេះកំពុងមានការរីកចម្រើនខ្លាំងលើវិស័យសំណង់ ដែលជម្រុញឲ្យសេដ្ឋកិច្ចនៃប្រទេសមួយនេះងើបឡើងមួយកម្រិតទៀត ក្នុងចំណោមវិស័យអទិភាពផ្សេងទៀត។

ជាមួយគ្នានោះ អ្នកវិនិយោគជាច្រើន បាននិងក៏កំពុងចាប់យកលើការវិនិយោគវិស័យសំណងនេះផងដែរ ដោយគេសង្កេតឃើញថា មានគម្រោងសាងសង់អគារភ្លោះច្រើន ប៉ុន្តែថ្ងៃនេះគេហទំព័រ Propertyarea.asia សូមលើកយកតែគំរោងអាគារខ្ពស់ចំនួន៥ មកបង្ហាញសិន ដែលគំរោងទាំងនោះបាននិងកំពុងជិតបញ្ចប់ការសាងសង់ និងកំពុងសាងសង់ បន្ទាប់ពីទទួល​បានការអនុញ្ញាត្តិ ក្នុងការសង់សង់ពីសំណាក់រាជរដ្ឋាភិបាលកម្ពុជា។

គម្រោងអគារភ្លោះខ្ពស់កប់ពពកទាំង៥នេះ គ្រោងនឹងបញ្ចប់នៅក្នុងឆ្នាំ២០២០ខាងមុខនេះ ដែលនឹងធ្វើអោយប្រទេសកម្ពុជាជាពិសេសទីក្រុងភ្នំពេញ ក្លាយជាមជ្ឈ​មណ្ឌលពាណិជ្ជកម្ម វប្បធម៌ នយោបាយ និងសេដ្ឋកិច្ចកាន់តែមានភាពល្បីល្បាញ និងរីកមុខរីកមាត់ក្នុងតំបន់ និងពិភពលោក។

អគារភ្លោះទាំង ៥ រួមមានៈ

១ អគារភ្លោះ Thai Boon Roong Twin Tower

អគារភ្លោះ Thai Boon Roong Twin Tower នឹងមានវត្តមាននៅក្នុងទីក្រុងភ្នំពេញ ហើយប្រសិនបើគម្រោងនេះបានបញ្ចាប់ វានឹងក្លាយជាអគារពាណិជ្ជកម្មដ៏ខ្ពស់ជាងគេនៅក្នុងប្រទេសអាស៊ាន ក៏ដូចជាពិភពលោក។

អគារកប់ពពកនេះ ជាការបោះទុនវិនិយោគរួមគ្នារវាងក្រុមហ៊ុនThai Boon Roong Group និងក្រុមហ៊ុនអភិវឌ្ឍអចលនទ្រព្យនៅទីក្រុងម៉ាកាវ Sun Kian Ip Group ហើយសាងសង់ និងគ្រប់គ្រងដោយក្រុមហ៊ុនសំណង់ Hsin Chong Construction Group Ltd។ គម្រោងអភិវឌ្ឍន៍នេះនឹងចំណាយទឹកប្រាក់ប្រមាណ៦០០០លានដុល្លារ ដែលមានកំពស់៥៦១ម៉ែត្រ ដោយមិនទាន់បូកបញ្ចូលអង់តែនកំពស់២៨ម៉ែត្រ ទៀតនៅ​ឡើយ។

២ អគារភ្លោះ The Royal One

គម្រោងអគារភ្លោះ Royal One របស់ក្រុមហ៊ុន The Royal Group ដែលមានកម្ពស់៦២ជាន់ ដោយគ្រោងបោះទុនវិនិយោគ១៥០លានដុល្លារអាមេរិក។ គំរោងនេះគ្រោងនឹងសាងសង់ នៅលើមហាវិថីមុនីវង្សនៅជិតផ្សារធំថ្មី និងអគារកាណាឌីយ៉ា អគារភ្លោះនឹងមានកម្ពស់២៣០ ម៉ែត្រហើយសាងសង់លើផ្ទៃដីជាង៤០០០ ម៉ែត្រការ៉េ។

អគារភ្លោះនឹងសាងសង់ជាខុនដូមួយអគារ និងការិយាល័យមួយអគារ។ អគារទាំ​ង​ពីរនេះ នឹងមានចំណតរថយន្តក្រោមដីជាច្រើនជាន់ និងមានផ្សារទំនើបនៅជាន់ទី២ និងទី ៣ ដែលចំណុចពិសេសនៃគម្រោងដ៏ធំនេះ។

៣ អគារភ្លោះ KOWLOON Bay

អគារ KOWLOON Bay ជាមជ្ឈមណ្ឌលពាណិជ្ជកម្មភ្លោះកំពស់៥៩ជាន់ ស្ថិតនៅលើផ្លូវសុធារស ស្ថិតក្នុងសង្កាត់ទន្លេបាសាក់ ខ័ណ្ឌចំការមករាជធានីភ្នំពេញ។ គម្រោងនេះគឺជាការបណ្តាក់ទុនរួមគ្នារវាងក្រុមហ៊ុន Star City Cambodia និង World Bridge Land ។ អគារនេះ នឹងត្រូវសាងសង់លើទំហំផ្ទៃដីសរុបចំនួន១,៥០ហិកតា។

អគារនេះ នឹងក្លាយជាគម្រោងអភិវឌ្ឍន៍ចម្រុះ រួមមាន ទាំងខុនដូ និងផ្សារទំនើប។

៤ អគារភ្លោះ Diamond Twin Tower

អគារភ្លោះ Diamond Twin Tower ៣២ជាន់កម្ពស់១៣៦ម៉ែត្រ តម្លៃជាង៦០ លានដុល្លារ បានសាងសង់ឡើងក្នុងទីតាំងយុទ្ធសាស្ត្រពិសេស របស់មជ្ឈមណ្ឌលសេដ្ឋកិច្ចកោះពេជ្រ នៃទីក្រុងភ្នំពេញ។ អគារភ្លោះ Diamond Twin Tower ត្រូវបានសម្ពោធការដ្ឋានសាងសង់ជាផ្លូវការ កាលពីព្រឹកថ្ងៃទី៨ ខែកញ្ញា ឆ្នាំ២០១៥ នេះ។

៥ អគារភ្លោះ Prince Royal One

អគារភ្លោះ Prince Royal One របស់ក្រុមហ៊ុន Prince Real Estate Group បានប្រកាសពីគំរោងសាងសង់សណ្ឋាគារ និងមជ្ឈមណ្ឌលពាណិជ្ជកម្មភ្លោះកំពស់៦០ជាន់ នៅតាមបណ្តោយមហាវិថីព្រះនរោត្តមនៅពេលខាងមុខនេះ។