ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី ក្រសួងសាធារណការ និងដឹកជញ្ជូន នឹងអញ្ជើញជាអធិបតីភាពនៅក្នុងពិធីបើកឲ្យប្រើប្រាស់ជាបណ្តោះអាសន្ន គម្រោងកាណូតដឹកអ្នកដំណើរព្រែកព្នៅ-ភ្នំពេញ-តាខ្មៅ ដែលនឹងប្រព្រឹត្តិទៅនៅ ថ្ងៃសុក្រ ទី០៦ ខែមេសា ឆ្នាំ២០១៨ វេលាម៉ោង ៧ ព្រឹក នៅស្ថានីយនាវាដឹកអ្នកដំណើរឬស្សីកែវ (គីឡូម៉ែត្រលេខ ៦ ចំណុចទីលានប្រជាធិបតេយ្យថ្មី)។

ការដាក់ឲ្យប្រើប្រាស់ជាបណ្តោះអាសន្នគម្រោងកាណូតដឹកអ្នកដំណើរព្រែកព្នៅ-ភ្នំពេញ-តាខ្មៅនេះ បានចូលរួមចំណែកដល់ការផ្តល់មធ្យោបាយធ្វើដំណើរបន្ថែមទៀតជូនប្រជាពលរដ្ឋ ចំណេញពេលវេលា និងកាត់បន្ថយការចំណាយរបស់ប្រជាពលរដ្ឋ ព្រមទាំងចូលរួមកាត់បន្ថយការកកស្ទះចរាចរណ៍នៅតាមដងផ្លូវផងដែរ។ ប្រជាពលរដ្ឋ អាចធ្វើដំណើរតាមកាណូតដឹកអ្នកដំណើរនេះ ដោយឥតគិតថ្លៃ ចាប់ពីថ្ងៃទី ៦ ខែ មេសា រហូតដល់ថ្ងៃទី ១ ខែសីហា ឆ្នាំ២០១៨។

ក្រសួងសាធារណការ និងដឹកជញ្ជូន សូមគោរពអញ្ជើញអ្នកសារព័ត៌មានទាំងអស់ អញ្ជើញចូលរួម និងចុះទៅ ផ្តិតយកព័ត៌មាននៃពិធីដាក់ឲ្យប្រើប្រាស់ជាបណ្តោះអាសន្ននេះដោយផ្ទាល់៕

កិច្ចប្រជុំកំពូលគណៈកម្មការទន្លេមេគង្គ(MRC) លើកទី៣ បានចាប់ផ្តើមនៅព្រឹកថ្ងៃទី ០៥ ខែមេសា ឆ្នាំ ២០១៨នេះ ដែលប្រទេសកម្ពុជាធ្វើជាម្ចាស់ផ្ទះ ក្រោមប្រធានបទ “ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពនៅក្នុងអាងទន្លេមេគង្គ-ទន្លេមេគង្គតែមួយ ស្មារតីតែមួយ” ដែលមានការចូលរួមពីថ្នាក់ដឹកនាំជាន់ខ្ពស់នៃប្រទេសដែលជាប់នឹងទន្លេមេគង្គមានដូចជា ប្រទេសកម្ពុជា វៀតណាម ឡាវ ប្រទេសចិន និងមីយ៉ាន់ម៉ា ព្រមទាំងដៃគូអភិវឌ្ឍន៍នានាជាច្រើនរូបផងដែរ។

កិច្ចប្រជុំដែលប្រារព្វធ្វើឡើងនៅក្នុងទឹកដីនៃខេត្តសៀមរាប នឹងពិនិត្យឡើងវិញនូវវឌ្ឍនភាព និងសមិទ្ធផលដែលគណៈកម្មការទន្លេមេគង្គសម្រេចបានកន្លងមក ក្នុងការជំរុញកិច្ចសហប្រតិបត្តិការតំបន់ ពិភាក្សាលើបញ្ហាប្រឈមក្នុងអាងទន្លេមេគង្គ និងដាក់ចេញទិសដៅជាយុទ្ធសាស្រ្តដើម្បីជំរុញ និងលើកកម្ពស់កិច្ចខិតខំប្រឹងប្រែងរួមគ្នានូវកិច្ចសហប្រតិបត្តិការ និងភាពជាដៃគូ ដើម្បីសម្រេចបានគោលដៅអភិវឌ្ឍន៍ប្រកបដោយចីរភាពក្នុងអាងទន្លេមេគង្គ។

ក្រសួងការបរទេស និងសហប្រតិបត្តិការអន្តរជាតិនៃប្រទេសកម្ពុជា បានអោយដឹងថា កិច្ចប្រជុំកំពូលនេះ នឹងអនុម័តសេចក្ដីថ្លែងការណ៍ក្រុងសៀមរាប ដែលឆ្លុះបញ្ចាំងនូវការប្តេជ្ញាចិត្តផ្នែកនយោបាយកម្រិតខ្ពស់របស់ប្រទេសជាសមាជិកគណៈកម្មការទន្លេមេគង្គ ក្នុងការបន្តធ្វើឲ្យប្រសើរនូវកិច្ចសហប្រតិបត្តិការតំបន់ ដើម្បីការអភិវឌ្ឍប្រកបដោយចីរភាពក្នុងអាងទន្លេមេគង្គ។ នៅចុងបញ្ចប់នៃកិច្ចប្រជុំកំពូល សម្តេចតេជោ ហ៊ុន សែន នឹងធ្វើសន្និសីទសារព័ត៌មានអំពីលទ្ធផលនៃកិច្ចប្រជុំកំពូលគណៈកម្មការទន្លេមេគង្គ លើកទី៣ផងដែរ។

លោក តែ ណាវុធ អគ្គលេខាធិការគណៈកម្មាធិការជាតិទន្លេមេគង្គកម្ពុជា បានឲ្យដឹងថា កិច្ចប្រជុំកំពូលគណៈកម្មការទន្លេមេគង្គ គឺជាព្រឹត្តិការណ៍ នយោបាយកម្រិតខ្ពស់បំផុត ដ៏មានសារៈសំខាន់ ដែលបានផ្ដួចផ្តើមឡើងដោយប្រទេសជាសមាជិកទាំងបួនរួមមាន៖ កម្ពុជា ថៃ ឡាវ និងវៀតណាម។ កិច្ចប្រជុំកំពូលរៀបចំធ្វើឡើងរៀងរាល់ ៤ឆ្នាំម្ដង ដែលជាវេទិកាកម្រិតតំបន់សម្រាប់ប្រមុខរដ្ឋាភិបាលនៃប្រទេសទាំងបួនធ្វើការផ្លាស់ប្ដូរទស្សនៈ ពិភាក្សាលើដំណោះស្រាយចំពោះបញ្ហាប្រឈមសំខាន់ៗដែលជួបប្រទះក្នុងតំបន់ និងពិនិត្យឡើងវិញលើវឌ្ឍនភាព និងសមិទ្ធផលដែលគណៈកម្មការទន្លេមេគង្គសម្រេចបាន ក្នុងការលើកកម្ពស់កិច្ចសហប្រតិបត្តិការពហុភាគី ដើម្បីការគ្រប់គ្រងប្រកបដោយចីរភាពក្នុងអាងទន្លេមេគង្គ ដូចមានចែងក្នុងកិច្ចព្រមព្រៀងមេគង្គ ដែលត្រូវបានចុះហត្ថលេខាដោយប្រទេសទាំងបួនកាលពីថ្ងៃទី០៥ ខែមេសា ឆ្នាំ១៩៩៥។
លោក ណាវុធ បានឲ្យដឹងទៀតថា ចាប់តាំងពីឆ្នាំ១៩៩៥ រហូតមកដល់ពេលនេះ មានការរៀបចំកិច្ចប្រជុំកំពូលចំនួនពីរលើករួចមកហើយ ដោយកិច្ចប្រជុំកំពូលលើកទី១ ត្រូវបានរៀបចំឡើងក្នុងឆ្នាំ២០១០ ដែលមានប្រទេសថៃធ្វើជាម្ចាស់ផ្ទះ ក្នុងខេត្តហួហ៊ីន និងកិច្ចប្រជុំលើកទី២ ក្នុងឆ្នាំ២០១៤ ធ្វើជាម្ចាស់ផ្ទះដោយប្រទេសវៀតណាម ក្នុងទីក្រុងហូជីមិញ។

កិច្ចប្រជុំកំពូលគណៈកម្មការទន្លេមេគង្គលើកទី៣នេះ នឹងផ្តោតលើគោលបំណងបីសំខាន់ៗចំនួន៣រួមមាន ទី១ ដើម្បីគូសបញ្ជាក់សារជាថ្មីអំពីតួនាទី ភារកិច្ច និងបេសកកម្មរបស់គណៈកម្មការទន្លេមេគង្គ និងដើម្បីលើកកម្ពស់ជាបន្ថែមទៀតនូវការពិគ្រោះយោបល់ជាចំហ និងកិច្ចសហប្រតិបត្តិការ ក្នុងអាងទន្លេមេគង្គ។ ទី២ ដើម្បីទទួលស្គាល់នូវវឌ្ឍនភាព ការរួមចំណែក និងសមិទ្ធិផលដែលគណៈកម្មការទន្លេមេគង្គសម្រេចបាន ក្នុងការលើកកម្ពស់កិច្ចសហប្រតិបត្តិការ និងការថែរក្សាសន្ដិភាព បើទោះបីជាប្រទេសជាសមាជិកមានផលប្រយោជន៍ គោលជំហរ និងការអភិវឌ្ឍខុសៗគ្នាយ៉ាងណាក៏ដោយ។ ទី៣ ដើម្បីជំរុញលើកកម្ពស់ជាបន្តនូវកិច្ចខិតខំប្រឹងប្រែងរួមគ្នា ដើម្បីដោះស្រាយនូវបញ្ហាប្រឈមនានាដែលកំពុងបន្ដកើតមាន និងច្បាមយកកាលានុវត្ថភាព ដើម្បីអាងទន្លេមេគង្គមួយមានភាពចម្រុងចម្រើនផ្នែកសេដ្ឋកិច្ច យុត្ដិធម៌សង្គម និងបរិស្ថានល្អ ដែលរួមចំណែកសម្រេចបាននូវគោលដៅអភិវឌ្ឍន៍ប្រកប ដោយចីរភាពរបស់សហប្រជាជាតិ លើផ្នែកការកាត់បន្ថយភាពក្រីក្រ កំណើនសេដ្ឋកិច្ច សន្ដិសុខស្បៀង ការផលិតថាមពលក្នុងតម្លៃសមស្របនិងអាចជឿទុកចិត្តបាន និងបម្រែបម្រួលអាកាសធាតុ៕

ដួង ចន្រ្ទា

​ភ្នំពេញ ប្រទេសកម្ពុជាកំពុងធ្វើជាម្ចាស់ផ្ទះ រៀបចំកិច្ចប្រជុំកំពូលនៃគណកម្មាធិការទន្លេមេគង្គ នៅខេត្តសៀមរាប ដែនដីដ៏ពិសិដ្ឋ ដែលនឹងមានការអញ្ជើញចូលរូមពីបណ្តាមេដឹកនាំបណ្តាប្រទេសក្នុងតំបន់នេះ។
​កិច្ចប្រជុំកំពូលនៃគណកម្មការធិកាទន្លេមេគង្គ បានចាប់ផ្តើមពីថ្ងៃទី៤ដល់ទី៥ មេសាខាងមុខនេះ។
​ថ្ងៃនេះគេហទំព័រPropertyarea.asia សូមនាំលោកអ្នកទៅស្វែងយល់ពីសក្តានុពលសេដ្ឋកិច្ច កត្តាប្រជាសាស្រ្តនៃបណ្តាប្រទេស៤នៃដងទន្លេមេគង្គ រួមទាំងប្រទេសភូមាផងដែរ។

​ប្រទេសកម្ពុជា
​ប្រទេសកម្ពុជាមានកំនើបសេដ្ឋកិច្ច៧,៧ភាគរយ ក្នុងរយៈពេលជាងពីរទស​វត្សរ៍កន្លងមកនេះ។ ប្រទេសនេះស្ថិតក្នុងចំណោមប្រទេស៨ ដែលមានសេដ្ឋកិច្ច​រីកលូតលាស់លឿនជាងគេនៅលើពិភពលោក។
ប្រទេសកម្ពុជា មានចំនួនប្រជាជនសរុបចំនួនប្រមាណ១៦លាននាក់ ប្រជាជនប្រទេសនេះ មានប្រាក់ចំណូល១៤៣៥ដុល្លារក្នុងម្នាក់ ក្នុងមួយឆ្នាំកាលពីឆ្នាំ​២០១៧។

​ប្រទេសនេះបានចាកចេញ ពីប្រទេសអភិវឌ្ឍន៍តិចតួចបំផុតកាលពីឆ្នាំ២០១៥ និងក្លាយជាប្រទេសមានប្រាក់ចំណូលមធ្យមកម្រិតទាប ហើយនឹងក្លាយ ជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមាន​ប្រាក់ចំណូលខ្ពស់នៅឆ្នាំ២០៥០។

​សេដ្ឋកិច្ចកម្ពុជាពឹងផ្អែកលើវិស័យវាយណភ័ណ កាត់ដេរសម្លៀកបំពាក់ ស្បែកជើង វិស័យសំណង់ វិស័យទេសចរណ៍ សេវាកម្ម និងវិស័យកសិកម្ម។
​ប្រទេសឡាវ
​កំណើនសេដ្ឋកិច្ច៦,៨ភាគរយកាលពីឆ្នាំ២០១៧ និងកើនដល់៧ភាគរយនៅឆ្នាំនេះ។

​ចំនួនប្រជាជនជិត៧លាននាក់នៅឆ្នាំ២០១៧
ប្រាក់ចំណួលក្នុងមនុស្សម្នាក់ ក្នុងមួយឆ្នាំជាង១៦៤២ដុល្លារកាលពីឆ្នាំ២០១៦។

​ សេដ្ឋកិច្ចប្រទេសឡាវពឹងផ្អែកលើធនធានធម្មជាតិ ការនាំចេញផលិតផល​កសិកម្ម សេវាកម្ម និងវិស័យទេសចរណ៍។

​ប្រទេសថៃ
​សេដ្ឋកិច្ចប្រទេសថៃកើន៤,៣ភាគរយកាលពីឆ្នាំ២០១៧។
​តាមការព្យាករណ៍ចំនួនប្រជាជនថៃ នឹងកើនដល់ចំនួនជាង៦៩លាននាក់នៅឆ្នាំ២០១៨នេះ។
​ចំណូលសម្រាប់មនុស្សម្នាក់ក្នុងឆ្នាំ២០១៦ មានទឹកប្រាក់៥៩០១ដុល្លារ។

​សេដ្ឋកិច្ចប្រទេសថៃមួយផ្នែកធំ ពឹងផ្អែកលើការនាំចេញទំនិញប្រើប្រាស់ ផលិតផលកសិកម្ម សេវាកម្ម ទេសចរណ៍ វិស័យសំណង់ និងអចលទ្រព្យ ជលផល និងវិស័យយានយន្តផងដែរ។

​វៀតណាម
​ប្រជាជនវៀតណាមបានកើនឡើងដល់ជាង៩៦លាននាក់នៅឆ្នាំ២០១៧។
​ចំណូលសម្រាប់មនុស្សម្នាក់មាន១៧៧០ដុល្លារសម្រាប់មនុស្សម្នាក់ កាលពីឆ្នាំ២០១៧។

​កំនើនសេដ្ឋកិច្ចមានប្រមាណ៦,២៨ភាគរយ និងរំពឹងកើនដល់៧ភាគរយនៅឆ្នាំ២០១៨។

​វិស័យសេដ្ឋកិច្ចវៀតណាម ពឹងផ្អែកលើការនាំចេញផលិតផលប្រើប្រាស់ ផលិតផលកសិកម្ម ជលផល វត្ថុធាតុដើម ទេសចរណ៍ និងវិស័យសំណង់ និងអចលនទ្រព្យ។

​ភូមា
​ប្រជាជនភូមា រំពឹងនឹងកើនដល់ជាង៥៤លាននាក់នៅឆ្នាំ២០១៨។
​កំនើនសេដ្ឋកិច្ចល្អប្រសើរកាលពីឆ្នាំមុន ដោយប្រទេសនេះសម្រេចបានកំ​នើនសេដ្ឋកិច្ច៧ភាគរយ។
​ប្រាក់ចំណូលសម្រាប់មនុស្សម្នាក់ នៅប្រទេសភូមាមានចំនួន១៤២០ដុល្លា​រកាលពីឆ្នាំ២០១៦។

​ប្រទេសភូមាពឹងផ្អែកលើធនធានធម្មជាតិ សេវាកម្ម ការនាំចេញផលិតផល​កសិកម្ម និងវិស័យវាយណភ័ណផងដែរ៕

• ដោយ : ដួង ចន្រ្ទា
  ភ្នំពេញ : ធនាគារធំជាងគេមួយនៅកម្ពុជា បានសម្រេចកំនើនល្អប្រសើរ ក្នុងនាមជាធនា​គារឈានមុខគេមួយលើទំហំប្រាក់កម្ចី ការដាក់ប្រាក់បញ្ញើរ និងទំហំនៃការិយាល័យប្រតិបត្តិការ។
  ប្រធាននាយកប្រតិបត្តិធនាគារអេស៊ីលីដា ភីអិលស៊ី លោកអ៊ិន ចាន់នី បានថ្លែងឲ្យដឹងកាលពីម្សិលម៉ិញនេះថា នៅក្នុងវិស័យហិរញ្ញវត្ថុទាំងមូល ក្នុងរយៈពេល៥ឆ្នាំកន្ល​ង​មកនេះ ដោ​យ​គិតពីឆ្នាំ២០១៣-២០១៧ ធនាគារអេស៊ីលីដាទទួលកំណើនពីប្រាក់បញ្ញើរសន្សំ និងឥណ​ទាន គិតជាមធ្យមជាង២០ភាគរយ។ លោកបន្តថា គិតក្នុងរយៈពេល៥ឆ្នាំមកនេះ ជាមធ្យមប្រាក់បញ្ញើរសន្សំមានកំនើនប្រមាណ១៩ភាគរយ រីឯឥណទានមានកំនើនគិតជាមធ្យមមានប្រមាណ២០ភាគរយ។
  លោកបន្តថា “ធនាគារអេស៊ីលីដាពេលបច្ចុប្បន្ន បានផ្តល់សេវាប្រើប្រាស់តាមបែបឌីជីថលច្រើន និងល្អប្រសើរជាងមុន ដើម្បីបំពេញនូវសេចក្តីត្រូវការរបស់អតិថិជន ដែលសេវាកម្មទាំងនោះ អាចជួយឲ្យអតិថិជនចំណេញទាំងពេលវេលា ងាយស្រួល សុវត្ថិភាព និងទំនើ​បទាន់សម័យ ដោយពុំចាំបាច់ធ្វើដំណើរដល់សាខាធនគារនោះទេ”។លោកបន្ថែមថា “ភាពរីកចម្រើនរបស់ធនគារ ក៏ដូចជាការផ្តល់សេវាកម្មបែបឌីជីថលឥតឈប់ឈរ ដោយសារតែការមើលឃើញពីការអភិវឌ្ឍន៍ និងស្ថានភាពសេដ្ឋកិច្ចរបស់ប្រទេសកាន់តែកើនឡើង”។
• 
  គិតមកដល់ពេលនេះ ធនាគារអេស៊ីលីដាភីអ៊ិលស៊ី បានធ្វើប្រតិតបត្តិការជាង២០ឆ្នាំហើយ ដើម្បីបម្រើសេវាកម្មហិរញ្ញវត្ថុជូនដល់សាធារណជន និងអតិថិជនទាំងវិស័យឯកជន និងវិស័យសាធារណៈ តាមរយៈហេដ្ឋារចនាសម្ព័ន្ធអេឡិចត្រូនិច ដែលភ្ជាប់បណ្តាញប្រតិបត្តិការទូទាំងសលកលោក។ ក្នុងនោះអេស៊ីលីដា មានកម្មករ និយោជិត បម្រើការងារសរុបចចំនួនជាង១ម៉ឺននាក់ កំពុងបម្រើការនៅតាមបណ្តាសាខាចំនួន២០០ការិយាល័យ នៅទូទាំងប្រទេសកម្ពុជា។
  ប្រធានសមាគមធនាគារកម្ពុជាស្តីទី លោកឆារស៍ វ៉ាន់បានថ្លែងថា សេវាកម្មធនាគារនៅកម្ពុជាមានភាពរីកចម្រើន ហើយវិស័យនេះ កំពុងចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ច ព្រោះនៅពេលសេដ្ឋកិច្ចរីកចម្រើន ត្រូវការលំហូរទុនកាន់តែច្រើន ដើម្បីធ្វើឲ្យសកម្មភាព និងចរន្តសេដ្ឋកិច្ចដំណើរការ ដូច្នេះធនាគារពិតជាដើរតួនាទីចាំបាច់ណាស់ ក្នុង​សេដ្ឋកិច្ចកម្ពុជា។
  លោកបន្តថា “ទោះជាការប្រកួតប្រជែងកើនឡើងខ្លាំងក្តី ប៉ុន្តែវិស័យនេះនៅតែដំនើរការដោយល្អប្រសើរ ព្រោះការ​ប្រកួតប្រជែងស្ថិតក្នុងក្របខ័ណ្ឌមួយប្រកបដោយក្រមសីលធ៌ម”៕

ដោយ គង់ សូរិយា

ភ្នំពេញ  ប្រទេសកម្ពុជា និងទួគីគ្រោងបង្កើនទំហំពាណិជ្ជកម្មឲ្យដល់៥០០លានដុល្លារនៅឆ្នាំ២០២០ខាងមុខ ខណៈប្រទេសនេះគ្រោងភ្ជាប់ការហោះហើរត្រង់មកកម្ពុជាផងដែរ។

ក្នុងជំនួបជាមួយលោកទេសរដ្ឋមន្រ្តី អូន ព័ន្ឋមុនីរ័ត្នរដ្ឋមន្រ្តីក្រសួងសេដ្ឋកិច្ច​និងហិរញ្ញវត្ថុ លោកជំទាវ Ayda Unlu ឯកអគ្គរដ្ឋទូតសាធារណរដ្ឋតួគីប្រចាំកម្ពុជា បានថ្លែងថា ប្រទេសតួគី និងកម្ពុជា មានទំនាក់ទំនងកិច្ចសហប្រតិ​បត្តិ​ការជាយូរណាស់មកហើយ ហេតុនេះដើម្បីឲ្យកិច្ចសហប្រតិបត្តិការ កាន់តែទូលំទូលាយ និងស៊ីជំរៅថែមទៀតនោះ លោកជំទាវនឹងខិតខំបន្តជម្រុញពង្រឹង និងពង្រីកទំនា​ក់​ទំនងរវាងរដ្ឋាភិបាល និងប្រជាជននៃប្រទេសទាំងពីរ។

លោកជំទាវបន្តថា ប្រទេសតួគីមានបំណងអញ្ជើញថ្នាក់នាំ នៃរាជរដ្ឋាភិបាលកម្ពុជា ក៏ដូចជាធុរៈជនកម្ពុជា ទៅទស្សនៈកិច្ចស្វែងយល់អំពីសក្តានុពលសេដ្ឋកិច្ច និងឳកាសវិនិយោគក្នុងប្រទេសតួគី ក្នុងន័យរឹតចំណងចំណងមិត្តភាព និងលើកកម្ពស់កិច្ចសហប្រតិ​បត្តិការរវាងប្រទេសទាំងពីរ ឲ្យកាន់តែមានទំនាក់ទំនងល្អ ក្រៅពីនោះប្រទេសតួគី ក៏មានបំណងនិងកំពុងសិក្សាលទ្ធភាព ក្នុងការបង្កើតឲ្យមានជើងយន្តហោះ ហោះហើរត្រង់ពីប្រទេសតួគីមកកម្ពុជាផងដែរ។

លោកអូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្ត្រីក្រសួងសេដ្ឋ​កិច្ច និងហិរញ្ញវត្ថុ បានស្វាគមន៍ចំពោះការផ្តួចផ្តើម ក្នុងការជម្រុញទំនាក់ទំនងប្រ​ទេសទាំងពីរ និងស្នើឲ្យគ្រប់ភាគីពាក់ព័ន្ធ ខិតខំបន្តជំរុញកិច្ចសហប្រតិបត្តិការ ក្នុងការបង្កើនទំហំពាណិជ្ជកម្មទ្វេភាគី ឲ្យដល់៥០០លានដុល្លារអាមេរិកនៅក្នុងឆ្នាំ២០២០ ដើម្បីជំរុ​ញ​កំនើនសេដ្ឋកិច្ច និងប្រជាជននៃប្រទេសទាំងពីរផងដែរ៕

ដោយ ដែន ចែងចាំង

ភ្នំពេញ៖ ក្រុមអ្នកវិនិយោគជប៉ុនដែលបានវិនិយោគនៅកម្ពុជាបានទទួលស្គាល់ពីភាពបើកចំហររបស់កម្ពុជា និងបរិយាកាសវិនិយោគនៅប្រទេសនេះកាន់​តែមានភាពអំណោយផល។ នេះបើតាមការលើកឡើងរបស់លោក Masashi KANOប្រធានអង្គការពាណិជ្ជកម្មក្រៅប្រទេសជប៉ុន ហៅកាត់ JETRO ប្រចាំកម្ពុជា។

ក្នុងជំនួបជាមួយលោកទេសរដ្ឋមន្រ្តីអូន ព័ន្ឋមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក Masashi KANO ប្រធានអង្គការពាណិជ្ជកម្មក្រៅប្រទេសជប៉ុនប្រ​ចាំ​នៅកម្ពុជាបានថ្លែងថា កំណើនសេដ្ឋកិច្ចកម្ពុជាមានភាពរឹងមាំ សម្រាប់រយៈពេលមធ្យមទៅមុខ ហើយអ្នកវិនិយោគិនជប៉ុនបានចាត់ទុកប្រទេសកម្ពុជា ជាប្រទេសដែលមានទីផ្សារបើកចំហរខ្លាំង និងមានបរិយាកាសវិនិយោគអំណោ​យផលច្រើន ដែលជាកត្តាជំរុញ និងលើកទឹកចិត្តអ្នកវិនិយោគបរទេស មកបណ្តាក់ទុននៅកម្ពុជាកាន់តែច្រើន និងជំរុញលំហូរវិនិយោគពីក្រៅប្រទេសមកកម្ពុជា ព្រមទាំងបានរុញសេដ្ឋកិច្ចកម្ពុជា អោយកាន់តែមានសន្ទុះខ្លាំងក្លាថែមទៀត។

លោកបន្តថា បច្ចុប្បន្នមានអ្នកវិនិយោគិនជប៉ុនថ្មីៗមួយចំនួន បាននិងកំពុងពិភាក្សាលម្អិតជាមួយ JETRO នៅកម្ពុជា អំពីចំណា​​ប់អារម្មណ៍ និងឱកាសវិនិយោ​គនៅកម្ពុជា ហើយលោកបាននិងកំពុងព្យា​យា​មពន្យល់ផ្សព្វផ្សាយ អំពីឱកាសវិនិយោគនៅកម្ពុជា ដើម្បីទាក់ទាញវិនិយោគិនជប៉ុនទាំងនោះ ឲ្យមកបណ្តាក់ទុន​នៅកម្ពុជាប្រកបដោយភាពជឿជាក់។

លោកអូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងថា ដើម្បីទាក់ទាញវិនិយោគិនបរទេស ឲ្យកាន់តែមានទំនុកចិត្តមកប ណ្តាក់ទុននៅកម្ពុជា រដ្ឋាភិបាលកម្ពុជាកំពុងផ្តល់បន្ថែម លើគោលនយោបា​យនៃការអនុគ្រោះ និងគាំពារវិនិយោគពីបរទេស ដែលកំពុងអនុវត្តន៍បច្ចុប្បន្ន ហើយកម្ពុជាបាននិងកំពុងខិតខំកែទម្រង់ និងរៀបចំនូវបរិ​យាកាសធុរកិច្ចអំណោ​យផ​ល ដល់វិនិយោគគិនបរទេសទាំងអស់ រួមមាន ការលើកទឹកចិត្តបន្ថែមទៀត និងបង្កលក្ខណៈសម្បត្តិគ្រប់គ្រាន់ ដើម្បីឲ្យអ្នកវិនិយោ​គិនបរទេសគ្រប់រូបមកបណ្តាក់ទុន នៅកម្ពុជាប្រកបដោយភាពទុកចិត្ត ស្របពេលដែលប្រទេសកម្ពុជាកំពុងមានសុខ​សន្តិភាពពេញលេញ។

JETRO គឺជាអង្គភាពមួយស្ថិតក្រោមចំណុះក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ដែលបានបង្កើតឡើងក្នុងឆ្នាំ១៩៥៨ ។ JETRO មានបណ្តាញការិយាល័យចំនួន៧៤ នៅក្នុងប្រទេសចំនួន៥៥លើពិភពលោក និងមានការិ​យាល័យចំនួន៤៤នៅក្នុងប្រទេសជប៉ុន៕