ដោយ: គង់ លាងហួរ
អន្តរជាតិ: ប្រធានាធិបតីជាប់ឆ្នោតរបស់សហរដ្ឋអាមេរិកលោក ដូណាល់ ត្រាំ បានរិះគន់ចំពោះការយកកម្រៃពីកប៉ាល់អាមេរិក ដែលឆ្លងកាត់ព្រែកជីកប៉ាណាម៉ា ដោយលោកបានចាត់ទុកថា នេះជារឿងមិនយុត្តិធម៌។ ព្រែកជីកប៉ាណាម៉ាតភ្ជាប់ផ្លូវទឹកពាណិជ្ជកម្មរវាងមហាសមុទ្រអាត្លង់ទិក និងប៉ាស៊ីហ្វិក។

ដោយសារតែការមិនពេញចិត្តនឹងឥទ្ធិពលរបស់ព្រែកជីកប៉ាណាម៉ា ដែលអាចជះផលប៉ះពាល់លើផលប្រយោជន៍អាមេរិក លោកដូណាល់ ត្រាំ បានគំរាមទាមទារគ្រប់គ្រងផ្លូវទឹកនេះឡើងវិញ។

ព្រែកជីកប៉ាណាម៉ា ជាផ្លូវដឹកជញ្ជូនដ៏សំខាន់មួយដែលជួយសន្សំពេលវេលាធ្វើដំណើរវាងមហាសមុទ្រប៉ាស៊ីហ្វិក និងអាត្លង់ទិក។ ព្រែកជីកនេះ ត្រូវបានសាងសង់ដោយអាមេរិកក្នុងឆ្នាំ១៩១៤ ហើយប្រគល់ឱ្យប្រទេសប៉ាណាម៉ាគ្រប់គ្រងក្រោមកិច្ចព្រមព្រៀងនៅឆ្នាំ១៩៧៧ ហើយប្រទេសប៉ាណាម៉ាបានគ្រប់គ្រងព្រែកជីកនេះទាំងស្រុងនៅឆ្នាំ១៩៩៩។

យ៉ាងណាមិញ ប្រធានាធិបតីអាមេរិកជិតចូលកាន់តំណែងលោក ដូណាល់ ត្រាំ បានបង្ហាញការពេញចិត្តចំពោះតម្លៃធ្វើដំណើរឆ្លងកាត់។ លោកត្រាំ បានសរសេរបង្ហោះនៅលើបណ្ដាញសង្គម Truth Social ថា កងទ័ពជើងទឹក និងកប៉ាល់ពាណិជ្ជកម្មរបស់សហរដ្ឋអាមេរិកទទួលរងភាពអយុត្តិធម៌បំផុត។

ប្រធានាធិបតីអាមេរិកជាប់ឆ្នោតរូបនេះ គំរាមថា ប្រសិនបើប៉ាណាម៉ាមិនអាចធានាបាននូវប្រតិបត្តិការប្រកបដោយសុវត្ថិភាព ប្រសិទ្ធភាព និងអាចទុកចិត្តបានទេ សហរដ្ឋអាមេរិកនឹងទាមទារយកព្រែកជីកប៉ាណាម៉ាមកដាក់ក្រោមការគ្រប់គ្រងរបស់អាមេរិកវិញ។

ទាក់ទិននឹងរឿងនេះ អាជ្ញាធរ​​គ្រប់គ្រងព្រែកជីកប៉ាណាម៉ា​ មិន​ទាន់បានធ្វើការឆ្លើយតប​ចំពោះការគំរាមរបស់​លោក ត្រាំ នៅឡើយទេ។

ទោះបីជាមិនទាន់ស្បថចូលកាន់តំណែងជាផ្លូវការយ៉ាងណាក្តី លោក ត្រាំ តែងបានប្រកាសគោលនយោបាយផ្សេងៗក្នុងន័យគំរាម ដើម្បីបង្ហាញថា លោកជាថ្នាក់ដឹកនាំ​ប្រយុទ្ធ​ដើម្បី​ផលប្រយោជន៍​​របស់អាមេរិក។

បច្ចុប្បន្ន ចំណែកប្រមាណ៥ភាគរយនៃចរាចរណ៍ផ្លូវសមុទ្រនៅលើពិភពលោក បានឆ្លងកាត់ព្រែកជីកប៉ាណាម៉ា ដែលអនុញ្ញាតឱ្យកប៉ាល់ដឹកជញ្ជូនធ្វើដំណើររវាងតំបន់អាស៊ី និងឆ្នេរខាងកើតអាមេរិក ដោយជៀសវាងផ្លូវដ៏វែងឆ្ងាយ និងគ្រោះថ្នាក់នៅជុំវិញតំបន់អាមេរិកខាងត្បូង។

បណ្តាប្រទេសធំៗ ដែលប្រើប្រាស់ផ្លូវទឹកនេះ រួមមានសហរដ្ឋអាមេរិក ចិន ជប៉ុន និងកូរ៉េខាងត្បូង។ កាលពីខែតុលា ឆ្នាំ២០២៤ អាជ្ញាធរប៉ាណាម៉ាបានរាយការណ៍ថា ផ្លូវទឹកនេះទទួលបានប្រាក់ចំណូលជិត៥ពាន់លានដុល្លារក្នុងឆ្នាំសារពើពន្ធចុងក្រោយខ្លួន៕ប្រភព: AFP៕

ដោយៈ គង់ សូរិយា

    ភ្នំពេញៈ សម្តេចមហាបវរធិបតី ហ៊ុន ម៉ាណែតនាយករដ្ឋមន្ត្រី នៃកម្ពុជា បានបញ្ជាក់ថា ការសម្រេចចិត្តក្នុងការដកខ្លួន ចេញពីប្រទេសអភិវឌ្ឍន៍តិចតួចរបស់កម្ពុជា គឺដើម្បីបង្ហាញពីសមត្ថភាព ពង្រឹងសមត្ថភាពកម្ពុជាកាន់តែរឹងមាំ ទុកចិត្តលើខ្លួនឯង និងមានភាពម្ចាស់ការលើខ្លួនឯង។

សម្តេចបានថ្លែងបែបនេះ ក្នុងពិធីសំណេះសំណាលជាមួយសិស្សនិទ្ទេសA នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡ​ងសញ្ញាបត្របច្ចេកទេស និងវិជ្ជាជីវៈកម្រិត៣ នៅថ្ងៃចន្ទទី២៣ ខែធ្នូ ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា មុនការសម្រេចចិត្តក្នុងការដកខ្លួនចេញនេះដែរ ធនាគារពិភពលោក ក៏បានមកសួរកម្ពុជាផងដែរ តែកម្ពុជានៅតែសម្រេចចិត្តចាកចេញពីប្រទេសអភិវឌ្ឍន៍តិចតួចដដែល ដើម្បីពង្រឹងសមត្ថភាពកម្ពុជាឱ្យកាន់តែខ្លាំង។

សម្តេចធិបតី ហ៊ុន ម៉ាណែតបញ្ជាក់ថា “ប្រសិនបើកម្ពុជា នៅតែបន្តរក្សាស្ថានភាពរបស់ខ្លួន ស្ថិតនៅជាប្រទេសអភិវឌ្ឍន៍តិចតួច នោះប្រទេសជាច្រើន នឹងបន្តផ្ដល់ជំនួយដល់កម្ពុជា និងបន្តទទួលបានលក្ខខណ្ឌអនុគ្រោះ ពីប្រទេសជាច្រើនទៀតផងដែរ”។ សម្តេចបន្ថែមថា” ប៉ុន្តែកម្ពុជាមានគោលការណ៍របស់ខ្លួន ក្នុងការពង្រឹងភាពជាម្ចាស់ការរបស់ខ្លួន”៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃនៅព្រឹកថ្ងៃច័ន្ទនេះ ខណៈសន្ទស្សន៍ថ្លៃចំណាយលើការប្រើប្រាស់ផ្ទាល់ខ្លួន(PCE) ដែលជាសូចនាករអតិផរណាដ៏សំខាន់មួយរបស់ធនាគារកណ្តាលអាមេរិក (Fed) បានបង្ហាញពីការកើនឡើងត្រឹមតែ០,១%ប៉ុណ្ណោះក្នុងខែវិច្ឆិកាបើធៀបនឹងខែតុលា។

តួយ៉ាង តម្លៃមាស Spot Gold បានងើបឡើង០,០៩ភាគរយដល់២៦២៣,១៦ដុល្លារក្នុងមួយអោន។ យ៉ាងណាមិញ តម្លៃហាងឆេងមាសរបស់អាមេរិក U.S. gold futures បានធ្លាក់ចុះ០,២២ភាគរយដល់២៦៣៩,៤០ដុល្លារក្នុងមួយអោន គិតត្រឹមម៉ោង១០:៣៧នាទីព្រឹក។

គិតត្រឹមពេលបិទការជួញដូរកាលពីថ្ងៃសុក្រសប្តាហ៍មុន តម្លៃមាស Spot Gold បានបិទនៅត្រឹម២៦២០,៧៧ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២៦៤៥,១០ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៨៩,៣ភាគរយ ដែលធនាគារកណ្តាលអាមេរិក (Fed) នឹងអាចរក្សាទុកអត្រាការប្រាក់ឱ្យនៅថេរក្នុងកិច្ចប្រជុំគោលនយោបាយរបស់ខ្លួននៅថ្ងៃទី២៩ ខែមករា ឆ្នាំ២០២៥ខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៧,៧៣ពិន្ទុនៅព្រឹកថ្ងៃច័ន្ទនេះ បន្ទាប់ពីបានបិទការជួញដូរក្នុងរង្វង់១០៧,៦២ពិន្ទុកាលពីថ្ងៃសុក្រសប្តាហ៍មុន។

តម្លៃលោហៈធាតុប្រាក់ Spot silver បានងើបឡើង០,៧៩%ដល់៣០,១៩ដុល្លារ ក្នុងមួយអោន ខណៈតម្លៃផ្លាទីនបានងើបឡើង០,៣២%ដល់៩៣៩,៤ដុល្លារក្នុងមួយអោន ហើយតម្លៃ palladium បានងើបឡើង០,០៣%ដល់៩១៩,៥ដុល្លារក្នុងមួយអោនគិតត្រឹមម៉ោង១០:៣៩នាទីព្រឹក៕

ដោយ: គង់ លាងហួរ
អន្តរជាតិ: ការផ្គត់ផ្គង់អាផាតមុិននៅតំបន់ភាគខាងត្បូងប្រទេសវៀតណាមកំពុងមានការកើនឡើងយ៉ាងគំហុក ខណៈអាផាតមុិនថ្មីៗរាប់ពាន់យូនីតអាចរកទិញបានចាប់ពីតម្លៃសមរម្យដល់តម្លៃខ្ពស់កប់ពពក។

ជាក់ស្ដែង គម្រោងលំនៅដ្ឋាន Bcons Solary ដែលមានទីតាំងនៅតំបន់ Binh Duong ដែលជាមជ្ឈមណ្ឌលឧស្សាហកម្មនៅជិតទីក្រុងហូជីមិញ បានចាប់ផ្តើមទទួលយកប្រាក់កក់ពីអតិថិជនដែលទិញអាផាតមុិនរបស់ខ្លួន។

គម្រោង​ដែល​កំពុង​ស្ថិតក្រោមការដ្ឋានសាងសង់​នេះមាន​អគារ​ចំនួន៤ ដែលមានអាផាតមុិនសរុប​ចំនួន២.៦៥០យូនីតជាមួយនឹងតម្លៃចាប់ពី៣៣លានដុង ឬ១.៣០០ដុល្លារអាមេរិកក្នុងមួយម៉ែត្រការ៉េ។ គម្រោងនេះគ្រោងនឹងបញ្ចប់រួចរាល់នៅឆ្នាំ២០២៧។

ជាមួយគ្នានេះ គម្រោង Saigon Riverpark នៅខេត្តឡុងអាន បានប្រកាសសាងសង់អាផាតមុិនចំនួន១.២២៩យូនីត ដែលមានតម្លៃចាប់ពី២០លានដុងក្នុងមួយម៉ែត្រការ៉េ។

ដោយឡែក អាផាតមុិន ដែលនៅសេសសល់ចុងក្រោយក្នុងគម្រោង Citi Grand នៅទីក្រុងហូជីមិញ ត្រូវបានដាក់លក់ក្នុងតម្លៃចាប់ពី៥០លានដុងក្នុងមួយម៉ែត្រការ៉េ។

គម្រោងមួយទៀតឈ្មោះ “Fiato Uptown”នឹងចាប់ផ្តើមទទួលយកប្រាក់កក់ពីអតិថិជនក្នុងពេលឆាប់ៗនេះ ជាមួយនឹងតម្លៃអាផាតមុិនចាប់ពី៥៥លានដុងក្នុងមួយម៉ែត្រការ៉េ។

ចំណែក គម្រោង Conic Boulevard ដែលមានអាផាតមុិនចំនួន៩៧៦យូនីត នឹងទទួលប្រាក់កក់ចាប់ពីខែធ្នូនេះ ដែលមានតម្លៃយ៉ាងតិចចំនួន៤០លានដុងក្នុងមួយម៉ែត្រការ៉េ។

លោក Nguyen Van Dinh ប្រធានសមាគមអ្នកអចលនវត្ថុវៀតណាមបានមានប្រសាសន៍ឱ្យដឹងថា រដ្ឋាភិបាលវៀតណាមបានស្រាយចំណងផ្លូវច្បាប់ជាច្រើន ដើម្បីជំរុញការស្តារទីផ្សារអចលនទ្រព្យឡើងវិញ។

លោកបានបន្ថែមថា ដូច្នេះ បណ្តាអ្នកអភិវឌ្ឍន៍មានទំនុកចិត្តក្នុងការចាប់ផ្តើមបើកលក់គម្រោង ខណៈពួកគេរំពឹងថា តម្រូវការនឹងកើនឡើង ហើយគម្រោងអាផាតមុិនជាច្រើនទៀតដែលមានតម្លៃសមរម្យនឹងត្រូវបានផ្គត់ផ្គង់បន្ថែមជាពិសេសនៅក្នុងតំបន់ក្បែរទីក្រុងហូជីមិញ៕ប្រភព: vnexpress៕

ដោយ: គង់ លាងហួរ
អន្តរជាតិ: ប្រទេសឥណ្ឌូនេស៊ីបានប្រកាសដាក់ចេញកញ្ចប់ជំរុញសេដ្ឋកិច្ចចំនួន៨២៧ទ្រីលានរូពៀ (ប្រហែល៥១,៦៥ពាន់លានដុល្លារ) សម្រាប់ឆ្នាំ២០២៥ ដើម្បីកាត់បន្ថយបញ្ហាប្រឈមសេដ្ឋកិច្ច និងដោះស្រាយការធ្លាក់ចុះអំណាចនៃការទិញ។

កញ្ចប់ជំរុញនេះក៏មានគោលបំណងទប់ស្កាត់ផលប៉ះពាល់ពីការដំឡើងអាករលើតម្លៃបន្ថែម (VAT) ពីអត្រាចំនួន១១% កើនឡើងដល់ចំនួន១២% ដែលត្រូវបានកំណត់ឱ្យចូលជាធរមាននៅថ្ងៃទី១ ខែមករា ឆ្នាំ២០២៥ខាងមុខ។

លោកស្រី Sri Mulyani Indrawati រដ្ឋមន្ត្រីក្រសួងហិរញ្ញវត្ថុឥណ្ឌូនេស៊ីបានអះអាងថា វិធានការជំរុញនេះត្រូវបានរៀបចំឡើងយ៉ាងប្រុងប្រយ័ត្ន ដើម្បីផ្តល់ការគាំទ្រប្រកបដោយតុល្យភាព ជាពិសេសដល់ប្រជាជនដែលមានប្រាក់ចំណូលទាប ដើម្បីឱ្យពួកគេអាចធានាបាននូវស្ថិរភាពហិរញ្ញវត្ថុ។

តាមរយៈកញ្ចប់ជំរុញសេដ្ឋកិច្ចនេះ រដ្ឋាភិបាលឥណ្ឌូនេស៊ីគ្រោងវិភាជន៍ទុនវិនិយោគចំនួន២៦៥,៦ទ្រីលានរូពៀ ដើម្បីជំរុញវិស័យជាច្រើន រួមមាន សហគ្រាសធុនមីក្រូ ខ្នាតតូច និងមធ្យម (MSMEs) ការអប់រំ ការថែទាំសុខភាព ការដឹកជញ្ជូន ថាមពល លំនៅដ្ឋានតម្លៃទាប និងសេវាហិរញ្ញវត្ថុ។

ចំណែក តម្រូវការអាហារជាមូលដ្ឋានដូចជាអង្ករ សាច់ ត្រី ស៊ុត បន្លែ និងទឹកដោះគោ នឹងនៅតែបន្តត្រូវបានលើកលែងពីការបង់អាករលើតម្លៃបន្ថែម។

លោកស្រីរដ្ឋមន្ដ្រីបានបញ្ជាក់ថា រដ្ឋាភិបាល និងសភាតំណាងបានសម្រេចចិត្តមិនយកពន្ធលើតម្លៃបន្ថែមលើទំនិញសំខាន់ៗដែលសាធារណជនត្រូវការនោះទេ។ លោកស្រីបានបន្ថែមថា ទុនវិនិយោគចំនួន៣៩៤ទ្រីលានរូពៀត្រូវបានវិភាជន៍សម្រាប់ការឧបត្ថម្ភធនថាមពល។

ចំពោះទីផ្សារ​រថយន្ត រដ្ឋាភិបាល​នឹង​ផ្តល់​ការ​លើក​ទឹកចិត្ត​ផ្នែក​ពន្ធ​សម្រាប់​រថយន្ត​អគ្គិសនី និង​រថយន្ត​កូនកាត់។ យានជំនិះអគ្គិសនី និងរថយន្តកូនកាត់ នឹងទទួលបានការបន្ធូរបន្ថយពន្ធយ៉ាងច្រើន រួមមានទាំងការកាត់បន្ថយអត្រាពន្ធដាក់លើទំនិញប្រណីតចំនួន៣% សម្រាប់រថយន្តកូនកាត់។

ចំពោះទីផ្សារលំនៅដ្ឋាន រដ្ឋាភិបាលនឹងបន្តលើកលែងអាករលើតម្លៃបន្ថែមសម្រាប់ការទិញផ្ទះ។ ទីផ្សារលំនៅដ្ឋានមិនត្រឹមតែបំពេញតម្រូវការមូលដ្ឋានរបស់សាធារណៈជនប៉ុណ្ណោះទេ។ ប៉ុន្តែ វាថែមទាំងអាចបង្កើតការងារ និងជំរុញកំណើនសេដ្ឋកិច្ចផងដែរ៕ប្រភព: VNA ៕