តើដីនៅតាមខណ្ឌនីមួយៗក្នុងរាជធានីភ្នំពេញមានតម្លៃបែបណានៅឆមាសទី២?

ដោយ: គង់ លាងហួរ
ភ្នំពេញ: តម្លៃដីធ្លីនៅរាជធានីភ្នំពេញបានបន្តមានភាពខុសយ៉ាងខ្លាំងនៅតាមខណ្ឌនីមួយៗក្នុងឆមាសទី២ ឆ្នាំ២០២៤។ នេះបើយោងតាមទិន្នន័យចុងក្រោយបំផុតពីក្រុមហ៊ុនប្រឹក្សាអចលនទ្រព្យ CBRE Cambodia។

តួយ៉ាង តម្លៃដីជាមធ្យមនៅខណ្ឌដូនពេញ ដែលជាតំបន់មួយក្នុងចំណោមតំបន់ពាណិជ្ជកម្មដ៏សំខាន់បំផុតរបស់រាជធានីភ្នំពេញ បានបន្តមានស្ថិរភាពចាប់ពី៣.០០០ដុល្លារដល់៨.៥០០ដុល្លារក្នុងមួយម៉ែត្រការ៉េនៅឆមាសទី២។

ស្រដៀងគ្នានេះ តម្លៃដីជាមធ្យមនៅខណ្ឌចំការមន ដែលជាតំបន់ប្រមូលផ្តុំគ្នាដោយអចលនទ្រព្យលំនៅដ្ឋាន និងអាជីវកម្ម មានទំហំទឹកប្រាក់ចាប់ពី២.៥០០ដុល្លារទៅ៥.៥០០ដុល្លារក្នុងមួយម៉ែត្រការ៉េ។

ទន្ទឹមគ្នានោះ ខណ្ឌទួលគោក និងខណ្ឌសែនសុខ កំពុងទទួលបានការចាប់អារម្មណ៍កាន់តែខ្លាំងឡើងពីអ្នកអភិវឌ្ឍន៍ ដោយដីនៅខណ្ឌទួលគោកមានតម្លៃជាមធ្យមចន្លោះពី២.៥០០ដុល្លារ ទៅ៣.៥០០ដុល្លារក្នុងមួយម៉ែត្រការ៉េ ខណៈដីនៅក្នុងខណ្ឌសែនសុខមានតម្លៃជាមធ្យមចាប់ពី៩០០ដុល្លារទៅ១.៣០០ដុល្លារក្នុងមួយម៉ែត្រការ៉េ។

ដោយឡែក ដីនៅខណ្ឌជ្រោយចង្វារ និងខណ្ឌដង្កោមានតម្លៃទាបជាងបើធៀបនឹងខណ្ឌនៅចំកណ្តាលរាជធានីភ្នំពេញ។

តួយ៉ាង ដីនៅជាប់មាត់ទន្លេក្នុងខណ្ឌជ្រោយចង្វារមានតម្លៃជាមធ្យមចន្លោះពី១.៥០០ដុល្លារទៅ២.៥០០ដុល្លារក្នុងមួយម៉ែត្រការ៉េ ហើយដីនៅខណ្ឌដង្កោមានតម្លៃជាមធ្យមចាប់ពី២០០ដុល្លារទៅ៦០០ដុល្លារប៉ុណ្ណោះក្នុងមួយម៉ែត្រការ៉េ។

ចំណែក ដីនៅខណ្ឌឬស្សីកែវ និងខណ្ឌកំបូលក៏មានតម្លៃសមរម្យផងដែរ។ ក្នុងនោះ ដីនៅខណ្ឌឬស្សីកែវមានតម្លៃជាមធ្យមចាប់ពី៨០០ដុល្លារទៅ១.០០០ ដុល្លារក្នុងមួយម៉ែត្រការ៉េ ខណៈដីនៅខណ្ឌកំបូលមានតម្លៃជាមធ្យមចន្លោះពី៨០ដុល្លារទៅ១៥០ដុល្លារក្នុងមួយម៉ែត្រការ៉េ។

លោកស្រី គឹម គិនកេសា អគ្គនាយិកានៃក្រុមហ៊ុន CBRE Cambodia បានលើកឡើងថា “ទីផ្សារអចលនទ្រព្យនៅរាជធានីភ្នំពេញបន្តបង្ហាញពីភាពធន់ និងការសម្របខ្លួន។ តម្លៃដីខុសៗគ្នានៅតាមខណ្ឌនីមួយៗ ឆ្លុះបញ្ចាំងពីឱកាសវិនិយោគដ៏ចម្រុះនៅរាជធានីភ្នំពេញសម្រាប់អ្នកវិនិយោគ”៕ប្រភព: CBRE Cambodia៕

ប្រទេសចិនសម្រុកសាងសង់ផ្លូវហាយវេរូងក្រោមដីវែងជាងគេលើពិភពលោកក្រោមទុនជាង៣ពាន់លានដុល្លារ ដើម្បីអាចដាក់ឱ្យចរាចរណ៍នៅឆ្នាំក្រោយ

ដោយ: គង់ លាងហួរ
អន្តរជាតិ: ប្រទេសចិនកំពុងសម្រុកជីកកកាយដីភ្នំ ដើម្បីធ្វើការសាងសង់ផ្លូវហាយវេក្រោមដីវែងជាងគេលើពិភពលោក។ នេះជាគម្រោងដ៏មានមហិច្ឆតាស្ថិតក្រោមទំហំទុនវិនិយោគចំនួន៣ពាន់លានផោន(ប្រហែល៣,៧៥ពាន់លានដុល្លារ)។

គម្រោងផ្លូវរូងក្រោមដីនេះមានឈ្មោះថា “Tianshan Shengli”។ នៅពេលសាងសង់រួចរាល់ ផ្លូវនេះនឹងជួយកាត់បន្ថយពេលវេលាធ្វើដំណើរឆ្លងកាត់ជួរភ្នំដ៏វែងបំផុតមួយនៅក្នុងពិភពលោក។

ផ្លូវរូងក្រោមដីនេះគ្រោងនឹងបើកឱ្យធ្វើចរាចរណ៍នៅខែតុលា ឆ្នាំ២០២៥ខាងមុខ ហើយនឹងកាត់បន្ថយពេលវេលាធ្វើដំណើរឆ្លងកាត់ភ្នំ Tianshan មកត្រឹមប្រហែល២០នាទី។

ចំណែក ការធ្វើដំណើរពីទីក្រុង Urumqi ទៅកាន់ទីក្រុង Korla ដែលជាបណ្តាទីក្រុងមានប្រជាជនរស់នៅច្រើនជាងគេបំផុតក្នុងតំបន់សុីនជាំង នឹងត្រូវកាត់បន្ថយពីជាង៧ម៉ោងមកនៅត្រឹមប្រហែល៣ម៉ោង។

នៅពេលបញ្ចប់ការសាងសង់ កំណាត់ផ្លូវរូងក្រោមដីត្រូវបានគេរំពឹងថា នឹងមានប្រវែងសរុបចំនួន១៣,៧ម៉ាយ (ប្រហែល២២,១គីឡូម៉ែត្រ)។នេះបើយោងតាមកាសែត South China Morning Post។

លោក Xu Tianchen សេដ្ឋវិទូប្រចាំអង្គភាព The Economist Intelligence Unit បានលើកឡើងថា “គម្រោងនេះនឹងផ្តល់អត្ថប្រយោជន៍ដល់ការធ្វើពាណិជ្ជកម្ម និងកំណើនសេដ្ឋកិច្ចនៅក្នុងតំបន់សុីនជាំង”។

លោក Xu បានបន្ថែមថា ខណៈប្រទេសចិនកំពុងកសាងទំនាក់ទំនងការទូត និងសេដ្ឋកិច្ចកាន់តែជិតស្និទ្ធជាមួយតំបន់អាស៊ីកណ្តាល តំបន់សុីនជាំងនឹងក្លាយជាទីផ្សារសំខាន់កាន់តែខ្លាំងឡើង ព្រោះការដឹកជញ្ជូនទំនិញចិនទៅកាន់តំបន់អាស៊ីកណ្តាលត្រូវឆ្លងកាត់តានតំបន់សុីនជាំង។

ជាក់ស្ដែង រដ្ឋាភិបាលចិនគ្រោងនឹងបង្កើនការអភិវឌ្ឍន៍ហេដ្ឋារចនាសម្ព័ន្ធកាន់តែច្រើនដើម្បីជំរុញការតភ្ជាប់ទៅកាន់តំបន់អាសុីកណ្តាល រួមទាំងការសាងសង់ផ្លូវដែកចិន-កៀហ្ស៊ីស៊ីស្ថាន-អ៊ូសបេគីស្ថានជាដើម។

លោក Xu បានអះអាងថា “គំនិតផ្តួចផ្តើមខ្សែក្រវ៉ាត់ និងផ្លូវរបស់ប្រធានាធិបតីចិនលោក សុី ជីនពីង ផ្តោតការយកចិត្តទុកដាក់កាន់តែខ្លាំងលើហានិភ័យនៃប្រតិបត្តិការ និងផលចំណេញត្រឡប់មកវិញពីការវិនិយោគ”។

ក្នុងន័យនេះ តំបន់អាស៊ីកណ្តាលមានសក្តានុពលសម្រាប់ប្រទេសចិន ជាពិសេសតំបន់នេះមានទុនបម្រុងថាមពលដ៏ច្រើនសន្ធឹកសន្ធាប់ និងស្ថានភាពសន្តិសុខល្អប្រសើរ៕ប្រភព:The Sun៕

វៀតណាមយកលំនាំតាមអគាររាងទូកក្តោងយក្សដ៏ល្បីល្បាញមួយនៅទីក្រុងឌូបៃមកសាងសង់នៅកោះភូកុក

ដោយ: គង់ លាងហួរ
អន្តរជាតិ: ថ្មីៗនេះ ក្រុមហ៊ុន Sun Group បានបើកការដ្ឋានសាងសង់អគារ “Aspira Tower” នៅលើកោះ Hon Thom ក្នុងតំបន់ប្រជុំកោះភូកុក (Phu Quoc) ប្រទេសវៀតណាមក្រោមទំហំទុនវិនិយោគចំនួន១៣ទ្រីលានដុង (ប្រមាណ៥១២លានដុល្លារ)។

គម្រោងនេះមានទីតាំងនៅលើឆ្នេរ Bai Trao ក្នុងតំបន់ប្រព័ន្ធអេកូឡូស៊ី Sun Paradise Land ដែលត្រូវបានរចនាឡើងដើម្បីតំណាងឱ្យទូកក្តោងដ៏ធំមួយ ដោយយកលំនាំស្រដៀងគ្នានឹងសណ្ឋាគារផ្កាយ៥ “Burj Al Arab” របស់ទីក្រុងឌូបៃនៃប្រទេសអេមីរ៉ាត់អារ៉ាប់រួម។

នៅពេលសាងសង់រួចរាល់ អគារកម្ពស់២២០ម៉ែត្រនេះនឹងក្លាយជារមណីយដ្ឋានប្រណីត កន្លែងកម្សាន្ត និងតំបន់ពាណិជ្ជកម្ម ក្នុងគោលបំណងប្រែក្លាយប្រជុំកោះ Phu Quoc ទៅជាគោលដៅទេសចរណ៍ឈានមុខគេ។

លោក Nguyen Thanh Nhan អនុប្រធានអចិន្ត្រៃយ៍នៃគណៈកម្មាធិការប្រជាជនខេត្តគៀនយ៉ាង (Kien Giang) បានលើកឡើងពីសារៈសំខាន់នៃគម្រោងនេះក្នុងការពង្រឹងភាពទាក់ទាញរបស់កោះ Phu Quoc។

លោកបានអះអាងថា “ការស្ថាបនាអគាររាងទូកក្តោងយក្សនេះមានទិសដៅស្របតាមចក្ខុវិស័យរបស់ខេត្តគៀនយ៉ាងក្នុងការបង្កើនសក្តានុពលរបស់កោះ Phu Quoc សំដៅទាក់ទាញភ្ញៀវទេសចរណ៍អន្តរជាតិ ដែលនិយមចំណាយប្រាក់ច្រើន និងពង្រឹងវត្តមានរបស់វៀតណាមនៅក្នុងទីផ្សារទេសចរណ៍ក្នុងតំបន់ និងពិភពលោក”។

អគារ Aspira Tower នឹងចូលរួមចំណែកទាក់ទាញភ្ញៀវទេសចរណ៍ជាមួយគម្រោងសំខាន់ៗផ្សេងទៀតរបដស់ក្រុមហ៊ុន Sun Group នៅកោះ Phu Quoc ដូចជា កន្ត្រកយោងដោយខ្សែកាបលើអាកាសវែងជាងគេលើពិភពលោក(Hon Thom Cable Car) ដែលមានចំនួន៣ខ្សែ។

ចំណែក ស្ពាន “Love Bridge”និងអគារ Sunset Town ក៏ត្រូវបានធ្វើការអភិវឌ្ឍន៍ដោយក្រុមហ៊ុនSun Group ផងដែរ។ ហេដ្ឋារចនាសម្ព័ន្ធទាំងនេះមានគោលបំណងធ្វើឱ្យកោះ Phu Quoc ក្លាយជាគោលដៅប្រកួតប្រជែងទេសចរណ៍ប្រណីត៕ប្រភព: Vnexpress៕

អ្នកជំនាញអន្តរជាតិអះអាងថា ទីផ្សារអចលនទ្រព្យនៅតំបន់អាសុីមានភាពធន់នឹងហានិភ័យនយោបាយ

ដោយ: គង់ លាងហួរ
អន្តរជាតិ: នាពេលបច្ចុប្បន្ននេះ ភាពតានតឹងផ្នែកនយោបាយកំពុងកើនឡើងនៅទូទាំងពិភពលោក មិនថា ជាជម្លោះ ឬក៏សង្គ្រាមបង្ហូរឈាមគ្នា និងវិបត្តិនយោបាយផ្ទៃក្នុង។ បញ្ហាប្រឈមនេះបានជះឥទ្ធិពលអវិជ្ជមានលើស្ថានភាពសេដ្ឋកិច្ចសកល។

នៅពេលសេដ្ឋកិច្ចពិភពលោកដាំក្បាលចុះ វិស័យផ្សេងៗទៀតក៏រងផលប៉ះពាល់ទៅតាមបរិបទទាំងអស់នោះផងដែរ។

យ៉ាងណាមិញ ហានិភ័យផ្នែកនយោបាយហាក់ពុំមានសារៈសំខាន់ខ្លាំងលើទីផ្សារអចលនទ្រព្យនៅតំបន់អាស៊ីទេ។ នេះបើយោងតាមលោក Nicholas Spiro ដៃគូនៅក្រុមហ៊ុនជំនាញផ្នែកអចលនទ្រព្យ និងប្រឹក្សាម៉ាក្រូសេដ្ឋកិច្ច Lauressa Advisory ដែលមានមូលដ្ឋាននៅទីក្រុងឡុងដ៍ ប្រទេសអង់គ្លេស។

តួយ៉ាង ភាពចលាចលនយោបាយថ្មីៗនេះនៅប្រទេសកូរ៉េខាងត្បូង ដោយសារការប្រកាសច្បាប់អាជ្ញាសឹក ដែលនាំទៅដល់ការបោះឆ្នោតទម្លាក់តំណែងប្រធានាធិបតីរបស់លោក Yoon Suk-yeol បានប៉ះពាល់ដល់ទស្សនៈយល់ឃើញរបស់ក្រុមអ្នកវិនិយោគអំពីស្ថិរភាពនយោបាយក្នុងប្រទេសប្រជាធិបតេយ្យមួយនេះ។

កំណើននៃតម្លៃផ្ទះ និងការលក់អចលនទ្រព្យនៅទីក្រុងសេអ៊ូល អាចនឹងធ្លាក់ចុះបន្ថែមទៀតក្នុងរយៈពេលប៉ុន្មានខែខាងមុខនេះ។ លោក Nicholas Spiro បញ្ជាក់ថា ការធ្លាក់ចុះនេះមិនមែនដោយសារតែវិបត្តិនយោបាយនោះទេ។

ប៉ុន្តែ ផ្ទុយទៅវិញ វាបណ្តាលមកពីចំណាត់ការរបស់រដ្ឋាភិបាលកូរ៉េខាងត្បូងក្នុងការទប់ស្កាត់មិនឱ្យតម្លៃលំនៅដ្ឋានក្នុងទីផ្សារហក់ឡើងថ្លៃខ្ពស់ពេក តាមរយៈការចាត់វិធានការរឹតបន្តឹងស្តង់ដារផ្តល់ប្រាក់កម្ចី និងការបង្កើនការផ្គត់ផ្គង់។

ជាមួយគ្នានេះ គេអាចទាញយកឧទាហរណ៍ផ្សេងទៀត ដូចជាភាពតានតឹងនយោបាយនៅទីក្រុងហុងកុង ដោយសារការផ្ទុះបាតុកម្មតវ៉ាទ្រង់ទ្រាយធំនៅឆ្នាំ២០១៩។ ប៉ុន្តែ តម្លៃអចលនទ្រព្យនៅហុងកុងនៅតែបន្តរក្សាភាពធន់ និងបានហក់ឡើងដល់កម្រិតកំពូលក្នុងខែសីហា ឆ្នាំ២០២១។

ម្យា៉ងវិញទៀត ទីផ្សារលំនៅដ្ឋាន និងការិយាល័យរបស់ប្រទេសឥណ្ឌានៅតែបន្តកើនឡើងឥតឈប់ឈរ ទោះបីជាគណបក្សកាន់អំណាច Bharatiya Janata របស់លោកនាយករដ្ឋមន្ត្រី Narendra Modi បានបាត់បង់អាសនៈភាគច្រើនក្នុងសភានៅក្នុងការបោះឆ្នោតសកលនៃឆ្នាំ២០២៤នេះយ៉ាងណាក្តី។

ចំណែកឯ នៅក្នុងប្រទេសជប៉ុន ពុំមានសូចនាករណាមួយបង្ហាញថា អស្ថិរភាពនយោបាយ ដែលកើតឡើងបន្ទាប់ពីការបោះឆ្នោតសភាក្នុងខែតុលា បានធ្វើឱ្យទីផ្សារអចលនទ្រព្យពាណិជ្ជកម្មរបស់ប្រទេសនេះធ្លាក់ចុះនោះទេ។

ផ្ទុយទៅវិញ បណ្តាវិនិយោគិនបរទេសបានបន្តដាក់ទុនចូលទៅកាន់ប្រទេសជប៉ុន តាមរយៈការទិញអចលនទ្រព្យក្នុងទំហំទឹកប្រាក់ដ៏ច្រើន។

ទោះជាយ៉ាងណាក្តី គេសង្កេតឃើញមានភស្តុតាង ដែលបង្ហាញថា គោលនយោបាយរបស់រដ្ឋាភិបាលមានឥទ្ធិពលខ្លាំងលើទីផ្សារអចលនទ្រព្យ។ តួយ៉ាង ការរឹតបន្តឹងរបស់រដ្ឋាភិបាលចិនក្នុងការផ្តល់ប្រាក់កម្ចីដល់អ្នកអភិវឌ្ឍន៍ បានបង្កឱ្យមានវិបត្តិទីផ្សារលំនៅដ្ឋាន ហើយនេះជាឧទាហរណ៍មួយដ៏សំខាន់បំផុត។

នយោបាយ និងគោលនយោបាយមានភាពខុសផ្សេងពីគ្នា។ នៅប្រទេសសិង្ហបុរី បទប្បញ្ញត្តិទីផ្សារលំនៅដ្ឋានជាប្រធានបទដ៏ក្តៅ។

រដ្ឋាភិបាលសិង្ហបុរីបានព្យាយាមដាក់ចេញវិធានការនានា ដូចជាការដំឡើងពន្ធប្រថាប់ត្រាលើជនបរទេស ដែលទិញផ្ទះរបស់ក្រុមហ៊ុនអភិវឌ្ឍន៍ឯកជននៅសិង្ហបុរី ដើម្បីធ្វើយ៉ាងណាមិនឱ្យតម្លៃផ្ទះហក់ឡើងខ្ពស់កប់ពពក។

ផ្ទុយទៅវិញ ប្រជាជនសិង្ហបុរីបានសម្រុកទិញផ្ទះល្វែងប្រភេទទី២(Second-hand) ដែលសាងសង់ដោយក្រុមប្រឹក្សាលំនៅដ្ឋាន និងអភិវឌ្ឍន៍ (HDB) ក្រោមការគ្រប់គ្រងដោយរដ្ឋ។នេះជាបញ្ហារសើបសម្រាប់រដ្ឋាភិបាលសិង្ហបុរី។

តម្លៃផ្ទះល្វែង HDB សម្រាប់លក់ចេញបន្ត (Resale) បានកើនឡើងចំនួន១៨ត្រីមាសជាប់គ្នាដល់កម្រិតខ្ពស់បំផុតមិនធ្លាប់មាន។

ចំណែកឯ ចំនួនផ្ទះល្វែងសម្រាប់លក់បន្តក្នុងតម្លៃយ៉ាងតិច៧៤៥.០០០ដុល្លារអាមេរិកក្នុងមួយយូនីត ត្រូវបានព្យាករណ៍ថា នឹងមានចំនួនលើសពី១.០០០យូនីតនៅឆ្នាំ២០២៤នេះ កើនឡើងជាង២ដងបើធៀបនឹងចំនួនសរុបកាលពីឆ្នាំមុន។ នេះបើយោងតាមក្រុមហ៊ុន PropNex Realty។

លោក Nicholas Spiro បានបន្ថែមថា វិធានការគោលនយោបាយមានឥទ្ធិពលលើទីផ្សារអចលនទ្រព្យ ខ្លាំងជាងការវិវត្តន៍ផ្នែកនយោបាយ។ប៉ុន្តែគោលនយោបាយជាច្រើនត្រូវបានជំរុញបង្កើតឡើងដោយអ្នកនយោបាយ៕ប្រភព: SCMP៕

ប្រាសាទអង្គរវត្តឈរនៅលេខរៀងទី៣ ក្នុងចំណោមគោលដៅទេសចរណ៍ល្អបំផុតទាំង២២នៅតំបន់អាស៊ី

ដោយ: គង់ លាងហួរ
អន្តរជាតិ: ប្រាសាទអង្គរវត្តដ៏ល្បីល្បាញរបស់ប្រទេសកម្ពុជាស្ថិតនៅភាគពាយ័ព្យនៃខេត្តសៀមរាបបានឈរនៅរៀងទី៣ ក្នុងចំណោមគោលដៅទេសចរណ៍ល្អបំផុតទាំង២២នៅតំបន់អាស៊ីសម្រាប់ទស្សនា។ នេះបើយោងតាមក្រុមហ៊ុនប្រព័ន្ធផ្សព្វផ្សាយ Lonely Planet។

ក្រុមហ៊ុនបានលើកឡើងថា ភ្ញៀវទេសចរណ៍ដែលធ្វើដំណើរទៅកាន់តំបន់អាស៊ី ក៏គួរតែអញ្ជើញទៅទស្សនាប្រាសាទអង្គរវត្ត ដែលជាមោទនភាពជាតិរបស់កម្ពុជា។

ប្រាសាទបុរាណដ៏ធំល្វឹងល្វើយនេះ ត្រូវបានសាងសង់ឡើងកាលពីជិត៩០០ឆ្នាំមុន ដោយលាតសន្ធឹងលើព្រៃត្រូពិច អមជាមួយនឹងចម្លាក់យ៉ាងល្អប្រណីត និងកំពូលប្រាសាទអង្គរវត្ត។

ភ្ញៀវទេសចរណ៍អាចចំណាយពេលយ៉ាងតិចកន្លះថ្ងៃជាមួយមគ្គុទ្ទេសទេសចរណ៍ ដើម្បីទស្សនា និងស្វែងយល់អំពីវិចិត្រសាលរបស់ប្រាសាទ ដែលរួមមានរូបចម្លាក់អប្សរារាប់ពាន់ត្រូវបានឆ្លាក់លើជញ្ជាំង និងសសររបស់ប្រាសាទ។

ប្រសិនបើលោកអ្នកមានពេលវេលាច្រើន លោកអ្នកអាចទស្សនាប្រាសាទផ្សេងទៀត ដែលស្ថិតនៅក្នុងរមណីយដ្ឋានបុរាណអង្គរទំហំ៤០០គីឡូម៉ែត្រការ៉េ។ នេះបើយោងតាមការលើកឡើងដោយក្រុមហ៊ុន Lonely Planet ដែលមានមូលដ្ឋាននៅទីក្រុងមែលប៊ននៃប្រទេសអូស្ត្រាលី។

រមណីយដ្ឋានបុរាណអង្គរត្រូវបានអង្គការ UNESCO ចុះបញ្ជីជាសម្បត្តិបេតិកភណ្ឌរបស់ពិភពលោក និងត្រូវបានចាត់ទុកថា ជា “ការប្រមូលផ្តុំលក្ខណៈពិសេស ដែលបញ្ជាក់ពីអារ្យធម៌ដ៏អស្ចារ្យ”។

ទីតាំងងផ្សេងទៀត ដែលបានជាប់ក្នុងបញ្ជីគោលដៅទេសចរណ៍ល្អបំផុតនៅតំបន់អាសុីរួមមាន ទីក្រុងហ្លួងព្រះបាងរបស់ប្រទេសឡាវបានឈរនៅលេខរៀងទី១ ខណៈទីក្រុងបាងកករបស់ថៃឈរនៅលំដាប់ទី២។

ចំណែក ទីក្រុង Hoi An របស់ប្រទេសវៀតណាមបានឈរនៅលេខរៀងទី៤ បន្ទាប់ពីប្រាសាទអង្គរវត្តរបស់កម្ពុជា ដែលឈរនៅលេខរៀងទី៣ ខណៈទីក្រុង Hunza Valley របស់ប្រទេសប៉ាគីស្ថានឈរនៅលេខរៀងទី៥៕

ប្រភព: Lonely Planet៕

Cambodia’s Data Centre Market Set for Exponential Growth

Cambodia’s data centre sector is on the cusp of significant expansion, according to the latest report from Knight Frank.

The sector’s rapid growth is fueled by the country’s increasing digitalization, including advancements in e-commerce, e-banking, and government-led digital initiatives.

With the rise of major operators and an expected shift in government legislation, Cambodia’s data centre market is set to grow exponentially over the next decade.

Cambodia has seen impressive GDP growth, averaging 7% annually from 1995 to 2019, spurred by the development of key sectors like e-commerce and e-banking.

These advancements, coupled with government initiatives focused on digital platforms, have created a fertile ground for the rise of data centre operators such as ByteDC, Chaktomuk Data Centre (CDC), and Daun Penh Data Centre (DPDC).

Although the transition from traditional in-house data centres to external colocation facilities was initially met with some hesitation, the demand for secure data storage has driven the shift, particularly in Cambodia’s banking and financial sectors. These industries prioritize data security and customer protection, making the need for high-quality, reliable data centres critical.

Knight Frank’s report forecasts significant expansion in Cambodia’s data centre capacity, with a new $30 million project led by the Ministry of Posts and Telecommunications (MPTC) set to come online by 2025.

Furthermore, the Cambodian government is expected to introduce legislation mandating that companies store data within the country, which will likely expedite growth in the sector in the medium and long term.

Source: Knight Frank

ក្រុមហ៊ុនជំនាញផ្នែកច្បាប់ជំរុញឱ្យជនបរទេស ដែលចង់វិនិយោគក្នុងទីផ្សារអចលនទ្រព្យថៃ ប្រុងប្រយត្ន័ចំពោះការឆបោក

ដោយ: គង់ លាងហួរ
បាងកក: ទីផ្សារអចលនទ្រព្យនៅប្រទេសថៃកំពុងរីកចម្រើន ហើយក៏មានការក្លែងបន្លំឆបោក(Fraud)តាមរូបភាពផ្សេងៗផងដែរ។ ក្នុងករណីនេះ ក្រុមអ្នកជំនាញផ្នែកច្បាប់បានណែនាំឱ្យបណ្តាវិនិយោគិនបរទេស ជាពិសេសវិនិយោគចិនត្រូវសម្រេចចិត្តដោយប្រយ័ត្នប្រយែង។

យោងតាមទិន្នន័យបានឱ្យដឹងថា ជនជាតិចិនមានចំណែកជិត៥០ភាគរយនៃការទិញខុនដូសរុបទាំងអស់ដោយជនបរទេសកាលពីឆ្នាំមុននៅក្នុងប្រទេសថៃ ហើយជនជាតិចិនក៏បានស្ថិតក្នុងចំណោមជនរងគ្រោះជាច្រើន ដោយសារការឆបោកផងដែរ។

ក្នុងនោះ លោកស្រី Zoe Yu ជាជនរងគ្រោះម្នាក់មានអាយុ៤៥ឆ្នាំ ប្រកបមុខរបរជាជាងថតរូបមកពីទីក្រុង Ningbo ស្ថិតនៅភាគអាគ្នេយ៍នៃប្រទេសចិន។ លោកស្រីបានជួបប្រទះបញ្ហា ក្នុងអំឡុងពេលវិនិយោគអចលនទ្រព្យនៅទីក្រុងឈៀងម៉ៃ ដែលជាទីក្រុងធំបំផុតទីពីររបស់ប្រទេសថៃ បន្ទាប់ពីទីក្រុងបាងកក។

ដោយមើលឃើញថា ការអប់រំលំដាប់អន្តរជាតិ និងថ្លៃចំណាយលើការរស់នៅក្នុងតំបន់ទេសចរណ៍ភាគខាងជើងមានតម្លៃសមរម្យ លោកស្រីបានសម្រេចចិត្តចុះកិច្ចសន្យាក្នុងខែមករា ឆ្នាំ២០២៣ ដើម្បីទិញផ្ទះវីឡាតម្លៃ១០លានបាត (២៩៣.០០០ដុល្លារអាមេរិក)នៅទីក្រុងឈៀងម៉ៃ។

ក្រោយមក ទើបលោកស្រី Yu បានដឹងថា ជនបរទេសត្រូវបានហាមឃាត់មិនឱ្យមានដី ឬផ្ទះផ្ទាល់ខ្លួនក្នុងប្រទេសថៃទេ។ ទោះបីជាកិច្ចសន្យានោះខ្វះការការពារផ្លូវច្បាប់យ៉ាងណាក្តី ក៏លោកស្រីបានធ្វើការតវ៉ា និងទទួលបានការសងប្រាក់ត្រឡប់មកវិញក្នុងខែកក្កដា ឆ្នាំ២០២៤នេះ។

ក្រុមហ៊ុនច្បាប់របស់ប្រទេសថៃ “House Condo” ដែលមានឯកទេសក្នុងការវិនិយោគអចលនទ្រព្យបានលើកឡើងថា “ជាអកុសល ទីផ្សារបានក្លាយជាគោលដៅនៃការក្លែងបន្លំ ដោយសារអ្នកវិនិយោគថ្មីមួយចំនួនមានចំណេះដឹងតិចតួចអំពីបទប្បញ្ញត្តិ”។

ក្រុមហ៊ុន House Condo អះអាងថា ការចេញប័ណ្ណកម្មសិទ្ធិក្លែងបន្លំ និងការលក់ដីខុសច្បាប់អាចបណ្តាលឱ្យមានការខាតបង់យ៉ាងច្រើន ហើយក្រុមហ៊ុននេះធ្លាប់ជួបប្រទះករណីមួយ ដែលអ្នកវិនិយោគម្នាក់បានខាតបង់ប្រាក់អស់ចំនួន៤០០លានបាត។

ក្រុមហ៊ុនក៏បានគូសបញ្ជាក់ផងដែរអំពីបញ្ហានៃរចនាសម្ព័ន្ធអ្នកឈរឈ្មោះខុសច្បាប់(Nominee)។

ក្នុងករណីនេះ ជនបរទេសត្រូវបានល្បួងឱ្យជឿថា ពួកគេអាចកាន់កាប់ដីធ្លីបាននៅប្រទេសថៃ ដោយការចុះបញ្ជីក្រោមឈ្មោះរបស់អ្នកឈរឈ្មោះតំណាងជាជនជាតិថៃ។ ក្រុមហ៊ុន House Condo បញ្ជាក់ថា ការធ្វើបែបនេះខុសច្បាប់ ហើយអាចបណ្តាលឱ្យអ្នកវិនិយោគបរទេសខាតបង់ ប្រសិនបើអ្នកឈរឈ្មោះនោះទាមទារកម្មសិទ្ធិ ឬប្រសិនបើអាជ្ញាធរថៃបើកការស៊ើបអង្កេតឃើញ៕ប្រភព: SCMP៕

Hong Kong hoteliers brace for ‘worrying’ trends as lodging tax, US trade war dent tourism

Hong Kong’s hotel industry is likely to face more headwinds next year. A new lodging tax and heightened geopolitical tensions are among “worrying” issues that could further erode the city’s appeal as a tourist destination, analysts said.

The government will impose a 3 per cent tax on hotel guests from January 1, while president-elect Donald Trump will occupy the White House next month to usher in another rocky period for US-China trade and tourism.

The city’s reliance on Chinese tourists have yielded poorer results in recent years as the mainland economy struggled to generate growth after the end of the Covid-19 pandemic. They spent less and stayed for shorter days while the nation’s currency weakened, government data showed.

A 3 per cent tax on hotel guests on January 1 and looming troubles from the Trump presidency could undermine the city’s tourism sector.

Source: SCMP

អ្នកអភិវឌ្ឍន៍អចលនទ្រព្យធំៗបង្ហាញសុទិដ្ឋិនិយមលើការងើបឡើងវិញលើទីផ្សារអចលនទ្រព្យ បន្ទាប់ពីធនាគារបញ្ចុះអត្រាការប្រាក់ មកត្រឹម៨ភាគរយ

ដោយៈ ស៊ីវ ម៉េង

ភ្នំពេញៈ ក្រុមអ្នកអភិវឌ្ឍន៍អចលនទ្រព្យធំៗ បានបង្ហាញសុទិដ្ឋិនិយមថា ទីផ្សារលំនៅដ្ឋាន និងអចលនទ្រព្យដទៃទៀតនឹងងើបឡើងវិញនៅឆ្នាំ២០២៥ បន្ទាប់ពីធនាគារនានាបានសម្រេចបញ្ចុះ អត្រាការប្រាក់មកត្រឹម៨ភាគរយ។

លោកឧកញ៉ាបណ្ឌិតគីម ហ៊ាងស្ថាបនិកបុរីវិមានសំណាង និងបុរីKS Residenceបានមានប្រសាសន៍ឲ្យដឹង កាលពីរសៀលថ្ងៃទី២០ ធ្នូនេះថា លោកបានតាមដានព័ត៌មាននេះ ដែលរដ្ឋាភិបាលសហការជាមួយធនាគារ និងមីក្រូហិរញ្ញវត្ថុ ដោយទម្លាក់អត្រាការប្រាក់មកត្រឹម៨ភាគរយ សម្រាប់ទិញលំនៅដ្ឋាន និងអ្នកអភិវឌ្ឍន៍ គឺល្អណាស់ ព្រោះកន្លងមកធនាគារ មីក្រូហិរញ្ញវត្ថុផ្តល់ការប្រាក់ខ្ពស់ ឬមិនឲ្យកម្ចីតែម្តង តែបើទម្លាក់បែបនេះ នឹងមានមនុស្សទិញលំនៅដ្ឋានច្រើន។

លោកឧកញ៉ាបណ្ឌិតបានបន្តថា “បើសិនជាគោលការណ៍នេះអាចអនុវត្តន៍បាន ក្នុងអត្រាការប្រាក់ត្រឹម៨ភាគរយ គឺនឹងជួយឲ្យអត្រាទិញលក់ មានដំណើរការឡើងវិញ”។

ជាមួយគ្នានេះ អ្នកឧកញ៉ាសំ សុខនឿនប្រធានសម្ព័ន្ឋក្រុមហ៊ុនSAM SN Group ដែលជាអ្នកអភិវឌ្ឍន៍មួយរូប បានមានប្រសាសន៍ឲ្យដឹងក្នុងពេលដំណាលគ្នាថា ដូចយើងបានដឹងហើយថា ប៉ុន្មានឆ្នាំមកនេះ ធនាគារបានបិទកម្ចីលើវិស័យអចលនទ្រព្យ ស្របពេលលំហូរវិនិយោគពីបរទេសនៅក្នុងវិស័យនេះ នៅមានកម្រិតផងដែរ។

អ្នកឧកញ៉ាបន្តថា “ហេតុនេះប្រសិនជាធនាគារ ចាប់ផ្តើមផ្តល់កម្ចីធំៗ សម្រាប់វិស័យអចលនទ្រព្យវិញ នោះអ្នកទិញនឹងអាចទិញបាន ហើយគេនឹងយកលុយពីធនាគារ ទៅវិនិយោគបន្តទៀត ដែលនឹងធ្វើឲ្យវិស័យនេះ មានលំហូរប្រសើរជាងមុន”។ អ្នកឧកញ៉ាបានបន្តថា “លើសពីនេះ បើសិនជាមានការទិញ លក់ ទៅវិញទៅមកវិស័យអចលនទ្រព្យនឹងមានភាពកាន់តែប្រសើរ”។

អ្នកឧកញ៉ាសំ សុខនឿនបានបន្តថា អ្នកជាប់គាំងក្នុងវិស័យអចលនទ្រព្យ អាចយកអចលនទ្រព្យទៅដាក់ ដើម្បីយកកម្ចីមកអភិវឌ្ឍន៍ នឹងធ្វើឲ្យវិស័យនេះ ដើរដោយរលូនដូចសព្វដង។ ជាមួយនេះ បើសិនជាធនាគារអាចឲ្យអតិថិជន ឬអ្នកវិនិយោគមានលទ្ឋភាពខ្ចីទិញដី នោះវិស័យអចលនទ្រព្យរបស់យើង នឹងមានភាពប្រសើរ ឬអាចមានសញ្ញាងើបលឡើងវិញបណ្តើរៗ។

អ្នកឧកញ៉ាបន្តថា “ បើទោះបីជាមានអត្រាការប្រាក់ទាបជាងមុនក្តី តែវិស័យនេះត្រូវការពេលវេលា ដើម្បីឲ្យវិស័យនេះងើបឡើងវិញសន្សឹម មិនមែនងើបមួយថ្ងៃឬមួយឆ្នាំនោះទេ គឺត្រូវការពេលវេលានិងតាមតម្រូវការជាក់ស្តែង។

លើសពីនេះ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និងជាអ្នកអភិវឌ្ឍន៍បុរីវិមានភ្នំពេញ លោកអ្នកឧកញ៉ា លី ហួរបានមានប្រសាសន៍ឲ្យដឹងបន្ថែមថា ការបញ្ចុះអត្រាការប្រាក់នេះ នឹងវិស័យនេះបានច្រើន ពិសេសអ្នកទិញលំនៅដ្ឋាន ដែលអត្រាការប្រាក់ពី១២ មក៨ភាគយ គឺមានអត្រា២ភាគ៣ហើយ ព្រោះបើពីមុនបង់១២០០ ឥលូវបង់តែ៨០០ទេ។

ទាក់ទងនឹងការបន្ឋូរបន្ថយលក្ខខ័ណ្ឌ នៃការផ្តល់ឥណទានឬយ៉ាងណា លោកអ្នកឧកញ៉ាលី ហួរបានបញ្ជាក់ថា ការងារនេះគឺលោកឧបនាយករដ្ឋមន្រ្តីសាយ សំអាល់បានធ្វើការជាមួយអគ្គទេសាភិបាលធនាគារជាតិហើយ ព្រោះការងារនេះបានធ្វើឡើង ជាលក្ខណៈអន្តរក្រសួង។

លោកអ្នកឧកញ៉ាលី ហួរបានបញ្ជាក់ថា “នេះជាការប្រសើរមួយ ដែលរាជរដ្ឋាភិបាល បានជួយសម្របសម្រួល ដើម្បីជួយវិស័យអចលនទ្រព្យបានល្អឡើងវិញ”។ អ្នកឧកញ៉ាបន្ថែមថា “ទោះជាយ៉ាងណាទីផ្សារមិនល្អភ្លាមៗនោះទេ តែវាទៅមុខ វាល្អ ខណៈពីមុនលឺវិស័យអចលនទ្រព្យគេមិនមើលផង តែការទម្លាក់អត្រាការប្រាក់នេះ វាជួយបានច្រើន”៕

ទីផ្សារមជ្ឈមណ្ឌលទិន្នន័យនៅកម្ពុជាមានសក្តានុពលខ្ពស់ក្នុងការពង្រីកខ្លួនឆ្ពោះទៅមុខបន្ថែមទៀត

ដោយ: គង់ លាងហួរ
អន្តរជាតិ: យោងតាមរបាយការណ៍ថ្មីរបស់ក្រុមហ៊ុនប្រឹក្សាអចលនទ្រព្យ Knight Frank បានឱ្យដឹងថា ទីផ្សារមជ្ឈមណ្ឌលទិន្នន័យរបស់កម្ពុជាកំពុងស្ថិតក្នុងដំណាក់កាលមួយដ៏សំខាន់។

ការរីកចម្រើនយ៉ាងឆាប់រហ័សរបស់ទីផ្សារនេះត្រូវបានជំរុញ ដោយការធ្វើឌីជីថលូនីយកម្មរបស់ប្រទេសកម្ពុជា រួមទាំងការជឿនលឿនផ្នែកពាណិជ្ជកម្មអេឡិចត្រូនិក ធនាគារអេឡិចត្រូនិក និងគំនិតផ្តួចផ្តើមឌីជីថលរបស់រដ្ឋាភិបាល។

ស្របពេលមានការកើនឡើងនៃបណ្តាក្រុមហ៊ុនប្រតិបត្តិករធំៗ និងការកែសម្រួលច្បាប់របស់រដ្ឋាភិបាល ទីផ្សារមជ្ឈមណ្ឌលទិន្នន័យរបស់ប្រទេសកម្ពុជាត្រូវបានព្យាករណ៍ថា នឹងកើនឡើងយ៉ាងឆាប់រហ័សនៅក្នុងទសវត្សរ៍ក្រោយ។

ចាប់ពីឆ្នាំ១៩៩៥ ដល់ឆ្នាំ២០១៩ កម្ពុជាសម្រេចបានកំណើនសេដ្ឋកិច្ចក្នុងរង្វង់ជាមធ្យម៧%ជារៀងរាល់ឆ្នាំ ដោយសារការជំរុញការអភិវឌ្ឍន៍វិស័យសំខាន់ៗដូចជា ពាណិជ្ជកម្មអេឡិចត្រូនិក និងធនាគារអេឡិចត្រូនិក។

ភាពជឿនលឿនទាំងនេះ គួបផ្សំនឹងគំនិតផ្តួចផ្តើមរបស់រដ្ឋាភិបាលកម្ពុជា ដែលផ្តោតលើវេទិកាឌីជីថល បានជំរុញការកើនឡើងនៃប្រតិបត្តិករមជ្ឈមណ្ឌលទិន្នន័យដូចជា ByteDC មជ្ឈមណ្ឌលទិន្នន័យចតុមុខ (CDC) និងមជ្ឈមណ្ឌលទិន្នន័យដូនពេញ (DPDC)។

តម្រូវការនៅក្នុងការរក្សាទុកទិន្នន័យឱ្យមានសុវត្ថិភាព បានជំរុញឱ្យមានការផ្លាស់ប្តូរ ជាពិសេសក្នុងវិស័យធនាគារ និងហិរញ្ញវត្ថុរបស់កម្ពុជា។ ឧស្សាហកម្មទាំងនេះផ្តល់អាទិភាពដល់សុវត្ថិភាពទិន្នន័យ និងការការពារអតិថិជន ដែលជំរុញតម្រូវការមជ្ឈមណ្ឌលទិន្នន័យដែលមានគុណភាពខ្ពស់ និងគួរឱ្យទុកចិត្តបាន។

របាយការណ៍របស់ក្រុមហ៊ុន Knight Frank បានព្យាករណ៍ថា សមត្ថភាពមជ្ឈមណ្ឌលទិន្នន័យរបស់កម្ពុជានឹងកើនឡើងយ៉ាងឆាប់រហ័ស ខណៈគម្រោងថ្មីមួយក្រោមទំហំទុនវិនិយោគចំនួន៣០លានដុល្លារដែលដឹកនាំដោយក្រសួងប្រៃសណីយ៍ និងទូរគមនាគមន៍ (MPTC) គ្រោងនឹងដាក់ឱ្យប្រើប្រាស់នៅឆ្នាំ២០២៥។

លើសពីនេះ រដ្ឋាភិបាលកម្ពុជាត្រូវបានគេរំពឹងថា នឹងដាក់ចេញច្បាប់តម្រូវឱ្យបណ្តាក្រុមហ៊ុននានាត្រូវរក្សាទុកទិន្នន័យនៅក្នុងស្រុក។ ការណ៍នេះអាចនឹងពន្លឿនកំណើននៃទីផ្សារមជ្ឈមណ្ឌលទិន្នន័យនៅកម្ពុជាក្នុងរយៈពេលមធ្យម និងរយៈពេលវែង៕ប្រភព: Knight Frank៕

1...466467468...3,378 Page 467 of 3,378