ដោយៈ គង់ សូរិយា

       ភ្នំពេញៈ វិស័យអចលនទ្រព្យ នៅតែជាវិស័យល្អខ្លាំងនាពេលបចុប្បន្ននេះ តែវិស័យនេះត្រូវបានលាបពណ៌ប្រផេះ ដោ​យអ្នកប្រឡូកក្នុងវិស័យនេះដូចគ្នា។

លោកCooler Tanម្ចាស់គំរោងអភិវឌ្ឍន៍ដីឡូត៍បូកគោលែន និងគំរោងឆ្នេរសមុទ្រកោងកាង នៅក្នុងខេត្តកំពត និងខេត្តកែបបានបង្ហាញទស្សនៈយល់ឃើញរបស់ខ្លួនថា ម្ចាស់គម្រោងខ្លះចាប់ផ្តើមឈានជើងប្រឡូកក្នុងវិស័យនេះ ហើយក៏ចាប់ផ្តើមចូលរួមសំលាប់វិស័នេះផងដែរ ដោយបន្សល់ទុករបួសស្នាមដ៏ឈឺចាប់ ដល់អ្នកស្រលាញ់វិស័យអចលនទ្រព្យ អ្នកទិញលែងហ៊ានទិញ អ្នកលក់លែងហ៊ានលក់។

លោកបញ្ជាក់ថា “សំរាប់ទស្សនៈរបស់ខ្ញុំផ្ទាល់ យើងត្រូវញែកចេញ រវាងអ្នកអភិវឌ្ឈន៏អចលនទ្រព្យល្អ និងអ្នកអភិវឌ្ឈន៏អចលនទ្រព្យមិនល្អ ពេលខ្លះយើងទិញចំប៉ះគម្រោងអ្នកអភិវឌ្ឈន៏អចលនទ្រព្យមិនល្អ លទ្ធផលទទួលបានគឺខាតបង់ បាត់​បង់ របួស និងឈឺចិត្ត”។ លោកបន្ថែមថា “យើងមិនត្រូវដោយសាតែរឿងនេះ ធ្វើអោយយើងបោះបង់ចោលគំនិត វិនិយោគអចលនទ្រព្យទេ អ្វីដែលត្រូវកែគឺត្រូវរៀនសូត្យ ពីរបៀបស្គាល់អោយច្បាស់នូវគម្រោងអភិវឌ្ឈន៏ល្អ និងគម្រោងអភិវឌ្ឈន៏មិនល្អ ពេលចេះជំនាញនេះច្បាស់ហើយ យើងលែងខាតបង់ទៀតហើយ ព្រោះអ្នកដែលគេចេះច្បាស់ គេកំពុងទទួលបានផលជាទីគាប់ចិត្ត សប្បាយចិត្ត និងបន្តទិញថែម និយាយអោយខ្លីបើយើងចេះយើងទិញចំណេញ បើមិនចេះគឺទិញខាតបើមិនយល់​មិនស្គាល់ទិញអត់បានទ្រព្យទេ គេបោកអស់”។

លោកបន្តថា ចំពោះអ្នកលក់អចលនទ្រព្យវិញ ពុំគួរផ្តោតតែលើផលប្រយោជន៏ជាធំទេ ត្រូវផ្តោតលើគម្រោងអភិវឌ្ឈន៍ល្អជាធំ មិនទាមទាបានប្រយោជន៏ច្រើនពេកទេ តែទាមទាបានប្រយោជន៍រហូតយូអង្វែង។ អ្នកលក់ពូកែមិនមែនអោយតែលក់ចេញគឺពូកែទេ ទាល់តែលក់ឈ្នះ ឈ្នះ ឈ្នះ ទាំង3ទើបពូកែ ពោលគឺម្ចាដ់ដីក៏ចំណេញ អ្នកទិញក៏ចំណេញ យើងអ្នកលក់ក៏ចំណេញ បើភាគីណាមួយខាត លក់អត់បានយូទេ ផលក៏អត់បានវែងដែរ។

លោកCooler Tanបានបន្ថែមថា បើយើងមិនចេះបែងចែកគម្រោងល្អ និងគម្រោងមិនល្អទេ យើងនឹងងាយធ្លាក់ចូលផ្លូវទាល់ក្នុងវិស័យលក់អចលនទ្រព្យ នៅពេលគម្រោងមានបញ្ហា ភ្ញៀវមានបញ្ហា យើងក៏មានបញ្ហាដែរ ហើយយើងនឹងក្លាយខ្លួនជាអ្នកចូលរួមសំលាប់វិស័អចលនទ្រព្យដូចគ្នា។

ក្នុងសម័យកាលបចុន្បន្ននេះ បើយើងកំពុងតែបន្តសក​ម្មភាពលក់យ៉ាងសកម្ម មានន័យថាយើងកំពុងខិតខំ លើកស្ទួយវិស័យអចលនទ្រព្យខ្លាំដូចគ្នា ត្រូវខិតខំ តស៊ូ ប្រឹងប្រែងបន្ថែមទៀត ទោះវិស័នេះ ប្រឡាក់ព៌ណប្រផេះខ្លះក៏ដោយ ក្រោយពេលភ្លៀងធាតុដើមព៌ណអ្វី នៅតែជាព៌ណណឹងដដែល។

លោកCooler Tanបានបន្តទៀតថា ប្រសិនបើយើងកំពុងប្រឡូកហើយបាក់ទឹកចិត្ត ចង់បោះបង់ចោល កុំទាន់អស់សង្ឃឹ​ម ពេលខ្លះមិនមែនយើងលក់មិនចេញទេ មកពីយើងនៅជាមួ​យអ្នកលក់មិនចេញដូចគ្នា។ អ្នកនិយាយថាពិបាកលក់ មកពីគាត់លក់មិនចេញ មិនមែនគ្រប់គ្នាសុទ្ធតែលក់មិនចេញទេ។ អ្នកនិយាថាវិស័អចលនទ្រព្យអត់ល្អ មកពីគាត់មិនមានលុយទិញអចលនទ្រព្យទុក។ អ្នកនិយាយថាគម្រោងលក់ដីគឺបោក មកពីគាត់មិនទាន់ ស្គាល់គម្រោងស្រពច្បាប់គឺបែបណា?  អោយតែយើងចេះរើសគម្រោងល្អ នៅជាមួយអ្នកពូកែលក់ មានមេដឹកនាំល្អ យើងនឹងចាប់ផ្តើមលក់ចេញ លែងបាក់ទឹកចិត្តទៀតហើយ។

ឆ្លើយតបចំពោះអ្នកបោះបង់ លោកCooler Tanបានលើកឡោះងថា ចំពោះអ្នកបានបោះបង់អាជីព អ្នកលក់អចលនទ្រព្យរួចហើយ កុំមានគំនិតអវិជ្ជមានពេក បើស្រលាញ់ចូលចិត្តអាចសាកល្បងម្តងទៀត។ ជួនកាលមិនមែនមកពីយើងធ្វើវាមិនបានទេ គឺមកពីយើងចាប់ផ្តើមធ្វើវា តាមផ្លូវមិនត្រឹមត្រូវតាំងពីដំបូងម្លេស។ មិនមែនអោយតែចូលគឺចេះទេ បើចូលមិនត្រូវក្បួនទោះចូល១០ឆ្នាំ ក៏នៅតែមិនបានផលដែរ។

លោកបញ្ជាក់ថា “ទាល់តែយើងរកផ្លូវត្រូវឃើញសិន ទើបអាចបង្កើនល្បឿនបាន បើដើផ្លូវខុស ល្បឿនកាត់តែលឿនខុសកាន់តែខ្លាំង តែទោះជាយ៉ាងណាក៏ដោយ អ្វីៗអាចចាប់ផ្តើមថ្មីបានទាំងអស់ អោយតែមានភាពក្លាហាន ក្រោកឈរឡើងម្តងទៀត ស្រពពាក្យចាស់ថា ឆាប់ខុសឆាប់ត្រូវ ក្រខុសក្រត្រូវ អត់ខុសអត់ត្រូវដូចគ្នា”៕

ដោយ: គង់ លាងហួរ
អន្តរជាតិ: ទីក្រុងប៉េកាំង និងទីក្រុងសៀងហៃរបស់ប្រទេសចិនបានប្រកាសពីការបន្ធូរបន្ថយពន្ធដើម្បីជំរុញការទិញផ្ទះ ខណៈបញ្ហាក្នុងវិស័យអចលនទ្រព្យនៅតែបន្តអូសបន្លាយ និងជះផលអវិជ្ជមានលើកំណើនសេដ្ឋកិច្ចចិន។

ចំណែក បណ្តាទីក្រុងធំៗផ្សេងទៀតនៅក្នុងប្រទេសចិនក៏ត្រូវបានគេរំពឹងថា នឹងអនុវត្តន៍តាមទីក្រុងទាំង២ខាងលើផងដែរ។នេះបើយោងតាមការដកស្រង់ចុះផ្សាយដោយទីភ្នាក់ងារសារពត៌មាន Reuters។

វិធានការដ៏សំខាន់នេះត្រូវបានដាក់ចេញ បន្ទាប់ពីក្រសួងហិរញ្ញវត្ថុរបស់ប្រទេសចិនបានប្រកាសឱ្យដឹងពីផែនការបន្ធូរបន្ថយពន្ធមួយចំនួនលើប្រតិបត្តិការទិញផ្ទះ និងដីធ្លីកាលពីសប្តាហ៍មុន។

យោងតាមសេចក្តីថ្លែងការណ៍របស់អាជ្ញាធរមូលដ្ឋានបានបង្ហាញថា ប្រជាជនទីក្រុងប៉េកាំង និងសៀងហៃដែលមានបំណងដាក់លក់អចលនទ្រព្យរបស់ពួកគេ នឹងត្រូវបានលើកលែងពីការបង់ពន្ធអាករលើតម្លៃបន្ថែម ដរាបណាពួកគេកាន់កាប់អចលនទ្រព្យនោះបានលើសពី២ឆ្នាំ។

ក្រុមមន្ដ្រីបង្កើតគោលនយោបាយចិនកំពុងទប់ស្កាត់ទីផ្សារអចលនទ្រព្យរបស់ខ្លួនមិនឱ្យបន្តដាំក្បាលចុះ ខណៈវិស័យនេះធ្លាប់ជាកត្តាជំរុញដ៏សំខាន់នៃកំណើនសេដ្ឋកិច្ចចិន។

យ៉ាងណាមិញ ការធ្លាក់ចុះនៃទំនុកចិត្តអ្នកប្រើប្រាស់ និងវិនិយោគិនបានធ្វើឱ្យអ្នកដែលមានបំណងទិញផ្ទះនាពេលអនាគតពិបាកធ្វើការសម្រេចចិត្ត។

ការដាក់ចេញវិធានការថ្មីក្នុងខែវិច្ឆិកានេះបានបូកបន្ថែមពីលើចំណាត់ការកាលពីខែកញ្ញា ដូចជាការកាត់បន្ថយចំនួនប្រាក់កក់អប្បបរមាមកនៅត្រឹម១៥% សម្រាប់ប្រភេទលំនៅដ្ឋានទាំងអស់ និងការបន្ធូរបន្ថយការរឹតបន្តឹងការទិញផ្ទះ។

លោក Xu Tianchen សេដ្ឋវិទូជាន់ខ្ពស់នៅក្រុមហ៊ុន Economist Intelligence Unit បានលើកឡើងថា “ការជំរុញគោលនយោបាយចាប់តាំងពីខែកញ្ញា មានប្រសិទ្ធភាពក្នុងការស្តារតម្រូវការ ព្រមទាំងផ្តល់ការគាំទ្រដល់តម្លៃលំនៅដ្ឋាន និងភាគហ៊ុន”។

ទោះជាយ៉ាងនេះក្តី លោកបានគូសបញ្ជាក់ថា “សេដ្ឋកិច្ចរបស់ប្រទេសចិនមិនទាន់មានជំហររឹងមាំនៅឡើយ ហើយការគាំទ្រគោលនយោបាយត្រូវតែមានភាពច្បាស់លាស់ និងមាននិរន្តរភាពដើម្បីស្តារទំនុកចិត្តរបស់អ្នកទិញផ្ទះឡើងវិញ”៕ប្រភព: Reuters៕

ដោយ: គង់ លាងហួរ
ភ្នំពេញ: យោងតាមរបាយការណ៍ថ្មីពីក្រុមហ៊ុនប្រឹក្សាអចលនទ្រព្យសកល Knight Frank បានឱ្យដឹងថា ការកើនឡើងនៃតម្រូវការលំនៅដ្ឋានតម្លៃសមរម្យនៅក្នុងស្រុក ជាពិសេសនៅទីក្រុងភ្នំពេញ នឹងក្លាយជានិន្នាការជំរុញវិស័យលំនៅដ្ឋានរបស់កម្ពុជាក្នុងរយៈពេលប៉ុន្មានឆ្នាំខាងមុខ។

ក្រុមហ៊ុន ដែលមានទីស្នាក់ការកណ្តាលនៅទីក្រុងឡុងដ៍ប្រទេសអង់គ្លេសមួយនេះបានសរសេរបន្តថា លំហូរវិនិយោគផ្ទាល់ពីបរទេសចូលក្នុងទីផ្សារអចលនទ្រព្យនៅកម្ពុជាបានបន្តដើរតួជាកត្តាសំខាន់នៅពីក្រោយកំណើនជារួមគិតត្រឹមឆ្នាំ២០២៤នេះ។

យោងតាមការវិភាគបង្ហាញថា បច្ចុប្បន្ន ចំនួនប្រជាជនកម្ពុជាដែលរស់នៅក្នុងតំបន់ទីក្រុងមានចំណែកត្រឹមតែ២៤,២ភាគរយប៉ុណ្ណោះនៃចំនួន
ប្រជាជនកម្ពុជាសរុបទូទាំងប្រទេស។

យ៉ាងណាមិញ ចំណែកនេះត្រូវបានគេព្យាករណ៍ថា នឹងកើនឡើងដល់ចំនួន៣០,៦ភាគរយនៅឆ្នាំ២០៣០ និងបន្តកើនឡើងបន្ថែមទៀតដល់ចំនួន៤១,១ភាគរយនៅឆ្នាំ២០៥០។

យោងតាមក្រុមហ៊ុន ​​Knight Frank បានបញ្ជាក់ឱ្យដឹងទៀតថា ការកើនឡើងយ៉ាងឆាប់រហ័សនៃនគរូបនីយកម្មនេះបង្ហាញពីតម្រូវការក្នុងការអភិវឌ្ឍន៍លំនៅដ្ឋានតម្លៃសមរម្យ ជាពិសេសនៅក្នុងរាជធានីភ្នំពេញ។

របាយការណ៍របស់ក្រុមហ៊ុន Knight Frank បានពន្យល់ថា ស្របពេលប្រជាជនវ័យក្មេងនៅតាមទីជនបទធ្វើចំណាកស្រុកមកកាន់ទីក្រុងដើម្បីទទួលបានឱកាសកាន់តែប្រសើរឡើង ក្នុងពេលដំណាលគ្នានេះ ពួកគេក៏នឹងជួយជំរុញតម្រូវការលំនៅដ្ឋានក្នុងស្រុកផងដែរ។

ដូច្នេះហើយ ការកើនឡើងនៃអត្រានគរូបនីយកម្មនៅក្នុងប្រទេសកម្ពុជា ជាពិសេសនៅទីក្រុងភ្នំពេញ ផ្តល់នូវទស្សនវិស័យវិជ្ជមានសម្រាប់បណ្តាអ្នកវិនិយោគ ដែលកំពុងស្វែងរកឱកាសបង្កើតប្រាក់ចំណេញរយៈពេលវែងលើការវិនិយោគអចលនទ្រព្យលំនៅដ្ឋាន។

លោក Ross Wheble នាយកក្រុមហ៊ុន Knight Frank Cambodia បានមានប្រសាសន៍ឱ្យដឹងថា ការវិនិយោគបរទេសនៅតែបន្តដើរតួជាកត្តាជំរុញដ៏សំខាន់សម្រាប់វិស័យអចលនទ្រព្យនៅកម្ពុជា។

លោក​បាន​បន្ត​ថា​ “ការ​វិនិយោគ​បាន​និង​កំពុង​ហូរ​ចូល​មក​កាន់កម្ពុជាពី​បណ្តាប្រទេស​ធំៗ​ដូច​ជា ជប៉ុន សិង្ហបុរី កូរ៉េខាងត្បូង ម៉ាឡេស៊ី ចិន​ដី​គោក តៃវ៉ាន់ និង​ហុងកុង”។

លោក​បាន​បន្ថែម​ថា​ “ការណ៍នេះឆ្លុះ​បញ្ចាំង​ឱ្យ​ឃើញ​ពី​ការ​ចាប់​អារម្មណ៍​យ៉ាងខ្លាំងពីបណ្តាវិនិយោគិនអន្តរជាតិ​ចំពោះ​ទីផ្សារ​របស់​យើង”។

ស្របពេលជាមួយគ្នានេះ លោកក៏បានកត់សម្គាល់ឃើញផងដែរថា បណ្តាអ្នកអភិវឌ្ឍន៍កំពុងធ្វើពិពិធកម្មផលិតផលរបស់ពួកគេកាន់តែខ្លាំងឡើង ដើម្បីទទួលបានភាពលេចធ្លោនៅលើទីផ្សារ៕ប្រភព: Knight Frank៕