ដោយ: គង់ លាងហួរ

អន្តរជាតិ: យោងតាមទិន្នន័យរបស់រដ្ឋាភិបាល បានបង្ហាញឱ្យដឹងនៅថ្ងៃព្រហស្បតិ៍ថា សេដ្ឋកិច្ចរបស់ប្រទេសជប៉ុន បានធ្លាក់ចូលទៅក្នុងវិបត្តិបន្ទាប់ពីបានធ្លាក់ចុះ ដោយមិននឹកស្មានដល់ម្តងទៀតនៅក្នុងត្រីមាសទី៤។

ផ្អែកលើមូលដ្ឋានប្រចាំឆ្នាំ ផលទុនជាតិសរុប(GDP)របស់ប្រទេ សជប៉ុន បានធ្លាក់ចុះ០,៤% នៅក្នុងត្រីមាសទី៤ ឆ្នាំ២០២៣ បើធៀបនឹងឆ្នាំ២០២២ បន្ទាប់ពីធ្លាក់ចុះ៣,៣% ក្នុងត្រីមាសទី៣ គិតចាប់ពីខែកក្កដា ដល់ខែកញ្ញា។

ផ្អែកលើមូលដ្ឋានប្រចាំត្រីមាស សេដ្ឋកិច្ចជប៉ុនបានធ្លាក់ចុះ០,១% នៅក្នុងត្រីមាសទី៤ បើធៀបនឹងត្រីមាសទី៣ ខណៈសេដ្ឋកិច្ចជប៉ុនបានធ្លាក់ចុះ០,៨% នៅក្នុងត្រីមាសទី៣ បើធៀបនឹងត្រីមាសទីពីរ។ការប្រើប្រាស់ឯកជននៅប្រទេសមួយនេះ បានធ្លាក់ចុះ០,២ភាគរយ នៅក្នុងត្រីមាសទី៤ បើធៀបនឹងត្រីមាសទី៣ ដែលខុសផ្ទុយស្រឡះ ទៅនឹងការព្យាករណ៍ជាមធ្យម សម្រាប់កំណើន០,១ភាគរយ។

អតិផរណាស្នូល ដែលមិនរាប់បញ្ចូលតម្លៃអាហារ និងតម្លៃថាមពល ស្ថិតក្នុងកម្រិតលើសពីគោលដៅ២% របស់ធនាគារកណ្តាលជប៉ុន (BOJ) អស់រយៈពេល១៥ខែជាប់ៗគ្នា គិតមកទល់ពេលនេះ។ ប៉ុន្តែ ទោះជាយ៉ាងណាក្តី ធនាគារBOJ បានរក្សាទុកគោលនយោបាយអត្រាការប្រាក់អវិជ្ជមាន ក្នុងរង្វង់-០,១ភាគរយដដែលកាលពីខែមករាកន្លងទៅ។

ទិន្នន័យបន្តថា “ការកើនឡើងនៃអត្រាអតិផរណា បានកាត់បន្ថ យតម្រូវការក្នុងស្រុក និងការប្រើប្រាស់ឯកជន នៅក្នុងប្រទេសជប៉ុន”។ ជាមួយគ្នានេះ ប្រទេសអាល្លឺម៉ង់បានវ៉ាដាច់ជប៉ុន ដោយក្លាយជាមហាអំណាចសេដ្ឋកិច្ចធំបំផុតទី៣របស់ពិភពលោក។

ផលទុនជាតិសរុបចារឹក (Nominal GDP) របស់ប្រទេសជប៉ុនក្នុងឆ្នាំ២០២៣ មានទំហំទឹកប្រាក់ចំនួន៥៩១,៤៨ទ្រីលានយ៉េន (ប្រហែល៤,២១ទ្រីលានដុល្លារអាមេរិក)។

ទីភ្នាក់ងារសារព័ត៌មានជាតិក្យូដូបានរាយការណ៍ថា តួលេខនេះបានបង្ហាញថា ប្រទេសជប៉ុនបានបាត់បង់ឋានៈ ជាមហាអំណាចសេដ្ឋកិច្ចទី៣របស់ពិភពលោក ទៅឱ្យប្រទេសអាល្លឺម៉ង់ ដែលមានទំហំផលទុនជាតិសរុបចារឹក (Nominal GDP) ប្រហែល៤,៤៦ទ្រីលានដុល្លារ៕

ដោយ: គង់ លាងហួរ

អន្តរជាតិ: ក្រុមហ៊ុន Westports ដែលជាប្រតិបត្តិករកំពង់ផែខ្នាតយក្សរបស់ប្រទេសម៉ាឡេស៊ី គ្រោងរៃអង្គាសប្រាក់ចំនួន៣៩,៦ពាន់លានរីងហ្គីត (ប្រហែល៨,៣ពាន់លានដុល្លារ) ដើម្បីផ្តល់មូលនិធិដល់គម្រោងពង្រីកកំពង់ផែរបស់ខ្លួន។

បច្ចុប្បន្ននេះ ក្រុមហ៊ុន Westports គឺជាប្រតិបត្តិកររបស់កំពង់ផែ Port Klang ដែលជាច្រកផ្លូវសមុទ្រដ៏សំខាន់ របស់ប្រទេសម៉ាឡេស៊ី។

យោងតាមរបាយការណ៍ពីសារពត៌មាន Bloomberg បានឱ្យដឹងថា ក្រុមហ៊ុនគ្រោងនឹងពង្រីកសមត្ថភាព ចំណតផែកុងតឺន័ររបស់កំពង់ផែ Port Klang ពី១៤លាន TEUទៅដល់២៧លាន TEU។

ទន្ទឹមនឹងនេះដែរ ប្រទេសសិង្ហបុរីកំពុងសាងសង់កំពង់ផែ Tuas ដែលមានតម្លៃ១៩,៩ពាន់លានដុល្លារ។  កំពង់​ផែ​នេះ ​កំពុង​ត្រូវ​បាន​សាងសង់ឡើង​ជា​៤ដំណាក់​កាល ខណៈការ​សាង​សង់​បាន​ចាប់​ផ្តើម​នៅ​ឆ្នាំ២០២០។ ដំណាក់​កាលទាំង​៤នេះ ត្រូវ​បាន​គេ​រំពឹង​ថា​ នឹង​បញ្ចប់​រួចរាល់នៅ​ត្រឹមឆ្នាំ២០៤០។

ដំណាក់កាលទី១ នៃកំពង់ផែTuas របស់ប្រទេសសិង្ហបុរី គ្រោងនឹងសាងសង់បញ្ចប់រួចរាល់ និងបើកដាក់ឱ្យដំណើរការយ៉ាងពេញលេញ នៅឆ្នាំ២០២៧ខាងមុខ ដែលនឹងមានសមត្ថភាពចំណតផែកុងតឺន័រចំនួន២០លាន TEUs។

បើក្រឡេកមកមើលប្រទេសថៃវិញ គេសង្កេតឃើញថា ចាប់តាំងពីឡើងកាន់អំណាចមក លោកនាយករដ្ឋមន្ត្រីថៃ សេដ្ឋា ថាវីស៊ីន បាននិងកំពុងទាក់ទាញ ការវិនិយោគពីវិស័យឯកជនសម្រាប់គម្រោង Landbridge  ដែលនឹងតភ្ជាប់កំពង់ផែទឹកជ្រៅ នៅខេត្តចំនួនពីរគឺ ខេត្ត Ranong នៅម្ខាង និងខេត្តChumphon នៅម្ខាងទៀត។

គម្រោង Land Bridge នេះនឹងអនុញ្ញាតឱ្យកប៉ាល់អាចបើកជៀសពីច្រកសមុទ្រម៉ាឡាកា បានទាំងស្រុង ខណៈថវិកាដែលត្រូវចំណាយដើម្បីសាងសង់គម្រោង មានទំហំទឹកប្រាក់ប្រហែល២៨ពាន់លានដុល្លារអាមេរិក៕

ដោយ: គង់ លាងហួរ

ភ្នំពេញ: ទោះបីជារបាយការណ៍ប្រចាំឆ្នាំ របស់ធនាគារជាតិនៃកម្ពុជា (NBC) បានផ្តល់ការព្យាករណ៍អវិជ្ជមាន សម្រាប់វិស័យអច​ល​នទ្រព្យ និងសំណង់យ៉ាងណាក្តី ប៉ុន្តែអ្នកជំនាញបានធ្វើការវាយតម្លៃផ្សេងៗគ្នា អំពីស្ថានភាពសេដ្ឋកិច្ច និងទីផ្សារអចលនទ្រព្យពាណិជ្ជកម្មនៅកម្ពុជា។

លោក Pawel Siudecki នាយកប្រតិបត្តិក្រុមហ៊ុន The Room Architecture & Design បានលើកឡើងថា បច្ចុប្បន្ននេះ ទីផ្សារស្ថិតក្នុងដំណាក់កាលវិវត្តន៍ ដែលសម្គាល់ដោយទិដ្ឋភាពជាមូលដ្ឋាន និងមានលក្ខណៈដដែលៗ ជាមួយនឹងការអភិវឌ្ឍ ដែលឆ្លុះបញ្ចាំងគ្នាទៅវិញទៅមក។លោកបានបញ្ជាក់ថា “តាមទស្សនៈរបស់ស្ថាបត្យករ នេះគឺជាឱកាសដ៏ល្អមួយ ក្នុងការចាក់បញ្ចូលការអភិវឌ្ឍន៍ និងការច្នៃប្រឌិតផ្សេងៗទៅក្នុងវិស័យនេះ ជាពិសេសតាមរយៈការដាក់ឱ្យដំណើរការគម្រោងអភិវឌ្ឍន៍ពហុមុខងារ ដែលសមស្របទៅតាមទីផ្សារ”។

ចំណែកលោក Tom O’Sullivan នាយកប្រតិបត្តិនៃគេហទំព័រ Realestate.com.kh បានអះអាងថា ម្ចាស់អចលនទ្រព្យបែបពាណិ​ជ្ជកម្ម ត្រូវតែមានភាពបត់បែនខ្លាំង ចំពោះអ្នកជួលដែលមានស្រាប់ ក៏ដូចជាការទាក់ទាញអ្នកជួលថ្មីផងដែរ។

ជាមួយគ្នានេះ លោកស្រី Jolyda Sou នាយកគ្រប់គ្រងក្រុមហ៊ុន Prestige Consulting បានបញ្ជាក់ថា ទីផ្សារអចលនទ្រព្យពាណិជ្ជកម្មនៅតែបន្តដាំក្បាលចុះ ខណៈដំណើរការនិងសកម្មភាពសាងសង់មានភាពយឺតយ៉ាវ និងការផ្គត់ផ្គង់លើសកម្រិត ដែលបានបង្កើតឡើង ក្នុងអំឡុងពេលមុនផ្ទុះវិបត្តិជំងឺរាតត្បាត។លោកស្រីបានបន្តថា “ក្រៅពីកម្ពុជា បណ្តាប្រទេសសមាជិកអាស៊ានផ្សេងទៀត ក៏ជួបប្រទះនឹងបញ្ហាពិបាក ក្នុងការស្តារវិស័យនេះឱ្យងើបឡើងវិញផងដែរ ស្របពេលដែលលក្ខខណ្ឌហិរញ្ញវត្ថុ កាន់តែមានភាពតឹងរ៉ឹង”។ទោះជាយ៉ាងណាក្តី លោកស្រីលើកឡើងថា ចំពោះប្រទេសកម្ពុជា យើងកំពុងមើលឃើញនិន្នាការជាច្រើន ឆ្ពោះទៅរកអចលនទ្រព្យពាណិជ្ជកម្ម ដោយគិតពីនិរន្តរភាព និងប្រសិទ្ធភាពនៃការចំណាយ។លោកស្រីបន្ថែមថា លើសពីនេះ កំណើនសេដ្ឋកិច្ចរបស់កម្ពុជានៅតែបន្តសម្រេចបាន ក្នុងរង្វង់ប្រហែល៥ភាគរយ ដែលបង្ហាញពីគន្លងឆ្ពោះទៅរកការស្ទុះងើបឡើងវិញ។

លើសពីនេះ លោក ឡោ វិចិត្រ  ប្រធាន​សមាគម​ Global Real Estate Phnom Penh បាន​ថ្លែងថា វិស័យ​អចលនទ្រព្យ​ពាណិជ្ជកម្ម​ នៅក្នុង​ប្រទេស​កម្ពុជា ​អាចផ្តល់ផលចំណេញខ្ពស់​ជាងគេ បំផុត​មួយ​លើ​ការវិនិយោគ​ បើប្រៀបធៀបនឹងបណ្តា ប្រទេសអាស៊ាន​ផ្សេងទៀត។លោកបន្តថា “មូលហេតុគឺដោយ​សារ ​តែប្រទេស​កម្ពុជា​បាន​ប្រើ​ប្រាក់​ដុល្លារ​អាមេរិក ​ជា​មធ្យោបាយ​​​សម្រាប់​កំណត់​តម្លៃ សម្រាប់​​ទូទាត់និងសម្រាប់​សន្សំ ខណៈប្រាក់ដុល្លារមានឥទ្ធិពលខ្លាំង បើធៀបនឹងរូបិយប័ណ្ណ របស់បណ្តាប្រទេសអាស៊ានផ្សេងទៀត”។

ម្យ៉ាងវិញទៀត លោក ឡោ វិចិត្រ បន្ថែមថា អចលនទ្រព្យកាន់តែមានតម្លៃសមរម្យសម្រាប់អ្នកទិញ ដោយសារតែស្ថានភាពទីផ្សារដែ​​លកំពុងរីកចម្រើនរបស់កម្ពុជា ហើយយើងមានសក្តានុពលដ៏ធំសម្រា​ប់ទស្សនវិស័យកំណើន ដោយសារតែការកើនឡើង នៃអត្រានគរូបនីយកម្មនៅក្នុងទីក្រុង។

លោក Tom O’Sullivan បានបន្ទរដា តំបន់ទីក្រុងមានទំនោរប្រមូលផ្តុំសកម្មភាពសេដ្ឋកិច្ច ដែលនាំទៅដល់ការបង្កើនផលិតភាព និងការច្នៃប្រឌិត។ រីឯនគរូបនីយកម្ម នឹងទាក់ទាញការវិនិយោគ បង្កើតឱកាសការងារ និងជំរុញកំណើនសេដ្ឋកិច្ចទាំងមូល ហើយវា​ជា​គន្លឹះ​សំខាន់ សម្រាប់​ប្រទេស​កម្ពុជាជាទូទៅ ហើយ​ប្រាកដ​ណាស់​ វាក៏ជាគន្លឹះ សម្រាប់​ទាំង​វិស័យអចលនទ្រព្យ​លំនៅដ្ឋាន និង​ពាណិជ្ជកម្មផងដែរ”។លោកបានបន្តថា “នគរូបនីយកម្មបានជួយកម្ពុជា ក្នុងការបង្កើតបរិយាកាស ហេដ្ឋារចនាសម្ព័ន្ធសមស្រប ដែលរួមចំណែកដល់តម្លៃអចលនទ្រព្យ និងទាក់ទាញការវិនិយោគពីបរទេស កាន់តែច្រើន​។  ទោះបីជាស្ថិតក្នុងនិន្នាការទីផ្សារបច្ចុប្បន្ន វិស័យនេះកំពុងមានការរីកចម្រើន និងការអភិវឌ្ឍន៍គួរឱ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ ខណៈអតិថិជនពេញចិត្ត អចលនទ្រព្យពាណិជ្ជកម្ម ដែលមានបំពាក់ឧបករណ៍ល្អ និងមានមុខងារចម្រុះ ដើម្បីអាចផ្គត់ផ្គង់ដល់សកម្មភាពអាជីវកម្មទូទៅ”។

ចំណែក លោក ឡោ វិចិត្រ បានមានប្រសាសន៍ឱ្យដឹងទៀតថា “ការធ្លាក់ចុះនៃតម្រូវការ អចលនទ្រព្យលំនៅដ្ឋាន បានជះឥទ្ធិពលតិចតួចប៉ុណ្ណោះ ទៅលើទីផ្សារអចលនទ្រព្យពាណិជ្ជកម្ម ដោយសារតម្រូវការទីផ្សារផ្សេងៗគ្នា និងការបែងចែកផលិតផលជាផ្នែកៗ”។

លោកបន្ថែមថា “តម្រូវការសម្រាប់ការជួលការិយាល័យ និងកន្លែងលក់រាយមានស្ថេរភាព និងផ្តល់រយៈពេលកិច្ចសន្យាយូរជាងមុន បើប្រៀបធៀបទៅនឹងការជួលអចលនទ្រព្យ ដែលជាធម្មតាមាន   រយៈពេលពី៦ ខែទៅដល់១ឆ្នាំ”៕

ដោយ: គង់ លាងហួរ

អន្តរជាតិ: នៅក្នុងអត្ថបទនេះ យើង​នឹងក្រឡេកមកមើល​អំពីប្រទេស​ ដែលមានប្រជាជនរួសរាយខ្លាំងបំផុតទាំង១៥ នៅ​ក្នុងតំបន់អាស៊ី ប្រចាំឆ្នាំ២០២៤ ក្នុងនោះក៏រួមបញ្ចូលកម្ពុជាផងដែរ។

បណ្តាប្រទេស ដែលមានប្រជាជនរួសរាយបំផុតទាំង១៥ នៅតំបន់អាស៊ី ត្រូវបានវាយតម្លៃចំណាត់ថ្នាក់ ដោយផ្អែកលើគេហទំព័រ Yahoo Finance និងគេហទំព័រ Insider Monkey។

លេខរៀងចំណាត់ថ្នាក់ទាំងនេះ ត្រូវបានវាយតម្លៃដោយផ្អែកលើពិន្ទុ ដែលប្រទេសទាំងនោះទទួលបាន។ ក្នុងករណីទទួលបានពិន្ទុដូចគ្នា ឬត្រួតគ្នា។ ដូច្នេះ ចំណាត់ថ្នាក់នឹងប្រែប្រួល ទៅតាមចំនួនភ្ញៀវទេសចរអន្តរជាតិ ដែលប្រទេសនោះទទួលបានកាលពីឆ្នាំមុន។

ខាង​ក្រោម​នេះ ​គឺ​ជា​បញ្ជី​ប្រទេស​​ទាំង១៥ នៅតំបន់អាស៊ី ដែលមានប្រជាជនរួសរាយខ្លាំងបំផុតចំពោះជន​បរទេស។

ចំណាត់ថ្នាក់ទី១: ប្រទេសអារ៉ាប់រួមទទួលបាន២,៥២ពិន្ទុ ។
ចំណាត់ថ្នាក់ទី២: ប្រទេសម៉ាឡេស៊ី  ទទួលបាន២,២០ពិន្ទុ ។
ចំណាត់ថ្នាក់ទី៣: ប្រទេសវៀតណាម ទទួលបាន១,៦៧ពិន្ទុ ។
ចំណាត់ថ្នាក់ទី៤: ប្រទេសហ្វីលីពីន ទទួលបាន១,៦៣ពិន្ទុ ។
ចំណាត់ថ្នាក់ទី៥: ប្រទេសសិង្ហបុរី ទទួលបាន១,៥១ពិន្ទុ។
ចំណាត់ថ្នាក់ទី៦: ប្រទេសអារ៉ាប៊ីសាអូឌីតទទួលបាន១,៤១ពិន្ទុ ។
ចំណាត់ថ្នាក់ទី៧: កោះតៃវ៉ាន់ ទទួលបាន១,៣៦ពិន្ទុ។
ចំណាត់ថ្នាក់ទី៨: ប្រទេសថៃ ទទួលបាន១,៣២ពិន្ទុ ។
ចំណាត់ថ្នាក់ទី៩: ប្រទេសទួរគី ទទួលបាន១,២៤ពិន្ទុ ។
ចំណាត់ថ្នាក់ទី១០: ប្រទេសហ្សកដានីទទួលបាន១,២៣ពិន្ទុ ។
ចំណាត់ថ្នាក់ទី១១: ប្រទេសបារ៉ែន ទទួលបាន១,២០ពិន្ទុ ។
ចំណាត់ថ្នាក់ទី១២: ប្រទេសឥណ្ឌា ទទួលបាន១,១៨ពិន្ទុ ។
ចំណាត់ថ្នាក់ទី១៣: ប្រទេសកម្ពុជា ទទួលបាន១,០០ពិន្ទុ ។
ចំណាត់ថ្នាក់ទី១៤: ប្រទេសម៉ាល់ឌីវ ទទួលបាន១,០០ពិន្ទុ ។
ចំណាត់ថ្នាក់ទី១៥: ប្រទេសស្រីលង្កា ទទួលបាន០,៩៦ពិន្ទុ។

ប្រទេសកម្ពុជា និងប្រទេសម៉ាល់ឌីវ ទទួលបាន១,០០ពិន្ទុដូចគ្នា ប៉ុន្តែ មូលហេតុដែលកម្ពុជាឈរនៅលេខរៀងទី១៣ តែម៉ាល់ឌីវឈរនៅលេខ១៤ ព្រោះកម្ពុជាទទួលបានភ្ញៀវ ទេសចរបរទេសច្រើនជាងប្រទេសដែនកោះមួយនេះកាលពីឆ្នាំមុន៕

        ដោយៈ គង់ សូរិយា

        ភ្នំពេញៈ ជាមួយនឹងការផ្លាស់ប្តូររចនាសម្ព័ន្ឋដឹកនាំថ្មី Kirirom Institute of Technology (KIT) មានគោលដៅក្លាយជាវិទ្យាស្ថានឈានមុខគេនៅប្រទេសកម្ពុជាប៉ុណ្ណោះទេ ប៉ុន្តែថែមទាំងឈានមុខគេនៅតំបន់អាស៊ីអាគ្នេយ៍។

គោលដៅនេះធ្វើឡើង តាមរយៈការផលិតធនធានមនុស្សឌីជីថល ដែលមានភាពចាំបាច់សម្រាប់ ការរីកចម្រើននាពេលអនាគតនៃបណ្តាប្រទេសនៅតំបន់អាស៊ី។លោកបណ្ឌិត Masamu Kamaga នាយកគ្រប់គ្រងថ្មីនៃវិទ្យាស្ថាន បានមានប្រសាសន៍ឲ្យដឹង តាមបណ្តាញតេឡេក្រាមបន្ទាប់ពីសន្និ​សីទសារព័ត៌មានកាលពីថ្ងៃទី១៥ កុម្ភៈថា “ក្នុងឋានៈរបស់ខ្ញុំជាប្រធានថ្មី ខ្ញុំនឹងនាំយកបទពិសោធន៍របស់ខ្ញុំ ក្នុងនាមជាសហគ្រិនម្នាក់ ដែលបានចាប់ផ្តើមជាមួយក្រុមហ៊ុនJP telecommunication និងបង្កើតក្រុមហ៊ុន ដែលទាក់ទងនឹងបច្ចេកវិទ្យាបញ្ជូនសញ្ញា (broadband) ជាច្រើននៅក្នុងប្រទេសជប៉ុន”។ លោកបញ្ជាក់ថា “ដោយធ្លាប់បានធ្វើការបង្រៀនទាំងនៅប្រទេ​សជប៉ុន និងសហរដ្ឋអាមេរិក ខ្ញុំប្តេជ្ញាចិត្តក្នុងការជំរុញបរិយាកាស នៃភាពជាសហគ្រិនបៃតងនៅក្នុងពិភពលោក”។

លោកបន្តថា ថ្មីៗនេះ ក្រោយពីបានចូលរួមកម្មវិធី CES tech show នៅសហរដ្ឋអាមេរិក ដែលជាទីកន្លែង ដែលក្រុមហ៊ុនបច្ចេកវិទ្យាកំពូលៗ បង្ហាញពីការអភិវឌ្ឍន៍ចុងក្រោយរបស់ពួកគេ លោកបានដឹងយ៉ាងច្បាស់ អំពីនិន្នាការបច្ចុប្បន្ន នៅក្នុងឧស្សាហកម្មរបស់យើង។  យើងកំពុងមើលឃើញបដិវត្តន៍ Al ដែលកំពុងជ្រៀតចូលយ៉ាងជ្រៅទៅក្នុងឧស្សាហកម្មបច្ចេកវិទ្យា។លោកបញ្ជាក់ថា “យើងសង្កេតឃើញមានការផ្លាស់ប្តូរគួរឱ្យកត់សម្គាល់ពីឧស្សាហកម្មប្រេង ទៅកាន់ឧស្សាហកម្ម semiconductor ហើយកោះតៃវ៉ាន់ គឺជាអ្នកនាំមុខគេក្នុងវិស័យនេះ”។លោកបន្ថែមថា“តាមរយៈដំណើរទស្សនៈកិច្ចនេះ ខ្ញុំបានរកឃើញថា សាកលវិទ្យាល័យនៅតៃវ៉ាន់បង្រៀនកម្មវិធី semiconductor ល្អប្រសើរជាងសាកលវិទ្យាល័យ Stanford ក្នុងសហរដ្ឋអាមេរិកទៅទៀត”។

លោកជឿជាក់ថា ការតភ្ជាប់ ទំនាក់ទំនងជាសកលទាំងនេះ នឹងផ្តល់អត្ថប្រយោជន៍យ៉ាងច្រើនដល់វិទ្យាស្ថាន KIT។ យើងកំពុងចាប់ផ្តើមយុគសម័យថ្មីនៅវិទ្យាស្ថាន KIT នៅឆ្នាំនេះ។  ថ្វីបើប្រឈមមុខនឹងការលំបាកក្នុងរយៈពេល២ ទៅ៣ឆ្នាំកន្លងមកនេះយ៉ាងណាក្តី ក៏យើងកំពុងស្ថិត នៅលើផ្លូវនៃការស្ទុះងើបឡើងវិញ។

វិទ្យាស្ថានបច្ចុប្បន្ននេះ KITត្រូវបានគ្រប់គ្រងដោយក្រុមហ៊ុន KIT Management Co., Ltd.។នៅពេលសាកសួរពីមុខជំនាញសម្រាប់និស្សិតសិក្សា នៅKOT លោកបណ្ឌិតMasamu Kamaga បានបញ្ជាក់ថា ជាការពិតណាស់ វិទ្យាស្ថាន បានធ្វើបច្ចុប្បន្នភាពមុខវិជ្ជារបស់ខ្លួន ជារៀងរាល់ឆ្នាំ ដើម្បីសម្របទៅតាមនិន្នាការឧស្សាហកម្ម។ យើង​មិន​មាន​និស្សិត​ មក​ពី​បណ្តាប្រទេស​អាស៊ាន​ផ្សេង​ទៀត​ទេ​ គិតរហូត​មក​ដល់​ពេល​នេះ ប៉ុន្តែទោះយ៉ាងណាក្តី យើងមានសាកលវិទ្យាល័យដៃគូមួយចំនួន នៅក្នុងតំបន់អាស៊ាន ហើយយើងត្រៀមខ្លួនទទួលយកនិស្សិត ដែលផ្លាស់ប្តូរការសិក្សា។លោកបន្តថា ក្នុងឆមាសនីមួយៗ យើងផ្តល់ជូនប្រហែល5 ទៅ10មុខវិជ្ជា ក្នុងមួយកម្មវិធីសិក្សា។  យើង​មាន​មុខ​ជំនាញ​ចំនួន3 ដែល​រួមមាន​ ផ្នែក​វិស្វកម្ម​សូហ្វវែរ ការគ្រប់គ្រង​ទេសចរណ៍ និង​ការរៀបចំផែនការ និង​ការ​រចនាឌីហ្សាញ។

លោកនន្តទៀតថា នាពេលបច្ចុប្បន្ននេះ​ យើងផ្តល់ជូននូវមុខជំនាញផ្នែកវិស្វកម្មសូហ្វវែរ ជាមួយនឹងជម្រើសវគ្គសិក្សានៅក្នុងប្រធា​​នបទដែលទាក់ទងនឹងAI ដូចជា Deep Learning និង Machine Learning។ លោកបញ្ជាក់ថា “យើងក៏កំពុងស្ថិតក្នុងដំណើរការ រៀបចំផែន​ការដ៏សំខាន់មួយដែលផ្តោតទៅលើAIផងដែរ”៕

ដោយ: គង់ លាងហួរ

អន្តរជាតិ: រថភ្លើងល្បឿនលឿនប្រភេទ maglev  ដែលអាចរត់ក្នុងល្បឿន១.០០០គីឡូម៉ែត្រក្នុងមួយម៉ោង អាចនឹងចាប់ផ្តើមបើកដំណើរការ នៅក្នុងប្រទេសចិននាពេលឆាប់ៗនេះ។

ដើមឡើយ គម្រោងនេះត្រូវបានប្រកាសឡើង ដើម្បីប្រជែងនឹងរថភ្លើង Hyperloop ដែលកំពុងត្រូវបានផលិតឡើង ដោយក្រុមហ៊ុន Boring Company របស់លោក Elon Musk ដែលនឹងមានសមត្ថភាពធ្វើដំណើរ ក្នុងល្បឿនលើសពី៧០០គីឡូម៉ែត្រក្នុងមួយម៉ោង។

ការពិសោធន៍គម្រោងថ្មីនេះ នឹងត្រូវសាកល្បងនៅទីក្រុង Harbin នៃខេត្តHeilongjiang ភាគឦសានប្រទេសចិន។  រថភ្លើង​ថ្មី​នេះ​មាន​ល្បឿន​លឿន​ជាង​រថភ្លើង Shanghai maglev ចំនួនពីរដង ដែលមាន​ល្បឿន​អតិបរមា ត្រឹមតែ៤៦០គីឡូម៉ែត្រ​ ក្នុង​មួយ​ម៉ោងប៉ុណ្ណោះ។

រថភ្លើងនេះ គឺជាប្រព័ន្ធរថភ្លើង ដែលប្រើកំលាំងអេឡិចត្រូម៉ាញ៉េទិច ដើម្បីឱ្យខ្សែរថភ្លើង អាចអណ្ដែតផុតពីផ្លូវរថភ្លើងបន្ដិច ឬនិយាយឱ្យងាយយល់ រថភ្លើងនេះហាក់ដូចជាហោះតាមគន្លងផ្លូវរថភ្លើង មិនមែនរត់នៅលើផ្លូវនោះទេ។

ដូច្នេះ នេះ​មាន​ន័យ​ថា រថភ្លើង​ប្រភេទ​maglev របស់ប្រទេសចិន មិន​ត្រឹម​តែ​មាន​ល្បឿន​លឿន ​ជាង​រថភ្លើង​ធម្មតា​ប៉ុណ្ណោះ​ទេ ប៉ុន្តែ​ក៏​ស្ងាត់ជាង​ផងដែរ ឬនិយាយឱ្យងាយយល់ គឺរថភ្លើងនេះមិនកកិតខ្លាំងជាមួយផ្លូវដែក ដែលអាចបង្កទៅជាសំឡេងរំខាននោះទេ។

ក្រុមហ៊ុន World Artery ដែលចូលរួមក្នុងការសម្រេចបេសក កម្មប្រកបដោយមហិច្ឆិតានេះ បានបញ្ជាក់ប្រាប់សារព័ត៌មាន Global Times ថា គម្រោងនេះមិនត្រឹមតែធ្វើឱ្យប្រសើរឡើង នូវហេដ្ឋារចនាសម្ព័ន្ធនៅក្នុងខេត្តប៉ុណ្ណោះទេ ប៉ុន្តែថែមទាំងផ្តល់នូវការជំរុញដល់វិស័យទេសចរណ៍ផងដែរ។

លោក Zheng Bin ប្រធានក្រុមហ៊ុន World Artery បានលើកឡើងថា “ការតេស្តសាកល្បងនេះ នឹងក្លាយជារបកគំហើញមួយនៅក្នុងវិស័យដឹកជញ្ជូនតាមផ្លូវដែក ហើយវា​ក៏​ជា​ការ​លោត​ផ្លោះ​ដ៏​អស្ចារ្យ​មួយ​ក្នុង​បច្ចេកវិទ្យា​ ដោយប្រែ​ក្លាយគំនិត​របស់មនុស្ស ឱ្យទៅ​ជា​ការ​ពិត”។

ត្រូវបានអភិវឌ្ឍឡើង ដោយបណ្ឌិតសភាវិទ្យាសាស្ត្រចិន (CASIC) រថភ្លើងMaglev ដែលមានគោលដៅរត់ឱ្យបានចម្ងាយ១០០០គីឡូម៉ែត្រក្នុងមួយម៉ោង  សម្រេចបាននូវរបកគំហើញដ៏អស្ចារ្យមួយនាពេលថ្មីៗនេះ ជាមួយនឹងការរត់សាកល្បងដំបូងដោយជោគជ័យ ក្នុងល្បឿន៦២៣គីឡូម៉ែត្រក្នុងមួយម៉ោង។

ជាពិសេស ប្រទេសចិនបានដាក់ចេញគោលដៅ ក្នុង​រយៈពេល​វែង​ ក្នុងការ​សាងសង់​ប្រព័ន្ធ​រថភ្លើង​ថ្មីនេះ ឱ្យអាច​រត់បានក្នុងល្បឿនដល់១.០០០គីឡូម៉ែត្រ​ក្នុង​មួយ​ម៉ោង។ ដូច្នេះ រថភ្លើងនឹងចំណាយពេលធ្វើដំណើរត្រឹមតែ១ម៉ោងប៉ុណ្ណោះ ពីទីក្រុងប៉េកាំង ទៅកាន់ទីក្រុងសៀងហៃ៕

ដោយ: គង់ លាងហួរ

អន្តរជាតិ: ស្របពេលដែលវិស័យអចលនទ្រព្យ នៅក្នុងប្រទេសថៃកំពុងមានស្ថានភាពល្អប្រសើរឡើងវិញ ប៉ុន្តែអ្នកជំនាញបានបញ្ជា ក់ថា ផ្នែកអចលនទ្រព្យខ្លះ នឹងនៅតែបន្តធ្លាក់ចុះ ដែលបណ្តាលមកពីកត្តាធំៗមួយចំនួន។

យោងតាមការព្យាករណ៍ របស់ក្រុមហ៊ុនប្រឹក្សាអចលនទ្រព្យ Knight Frank Thailand បានឱ្យដឹងថា វិស័យអចលនទ្រព្យឧស្សាហកម្ម និងសណ្ឋាគារនៅប្រទេសថៃ នឹងបន្តកើនឡើង ខណៈទីផ្សារខុនដូនឹងបន្តធ្លាក់ចុះ ដោយសារច្បាប់តឹងរ៉ឹង សម្រាប់ការខ្ចីប្រាក់ពីធនាគារ។

លោក Marcus Burtenshaw នាយកប្រតិបត្តិក្រុមហ៊ុន Knight Frank Thailand បានលើកឡើងថា កំណើននៃវិស័យឧស្សាហកម្មត្រូវបានជំរុញជាចម្បង ដោយការកើនឡើង នៃឧស្សាហកម្មរថយន្តអគ្គិសនី (EV) ។ លោកបន្តថា “មជ្ឈមណ្ឌលទិន្នន័យ អាហារ គ្រឿងអេឡិចត្រូនិក និងឧស្សាហកម្មគ្រឿងអគ្គិសនី បានទាក់ទាញការវិនិយោគពីបរទេសយ៉ាងច្រើនសន្ធឹកសន្ធាប់”។
គិតត្រឹមដំណាច់ឆ្នាំ២០២៣ ការលក់ដីឧស្សាហកម្មនៅប្រទេសថៃ មានចំនួន សរុប៨.៨៦៧រ៉ៃ(ប្រហែល១.៤១៩ហិកតា) ដោយកើនឡើងជិតទ្វេរដង បើធៀបនឹងចំនួនដីដែលបានលក់ក្នុងឆ្នាំ២០២២។

លោក Burtenshaw បានបញ្ជាក់ថា “ប្រទេសថៃលែងជាមូលដ្ឋានផលិតកម្ម ដែលមានតម្លៃទាបទៀតហើយ ដូច្នេះយើងត្រូវបង្កើនសមត្ថភាពប្រកួតប្រជែងរបស់យើង ដើម្បីប្រកួតប្រជែងជាមួយដៃគូប្រកួតប្រជែងសំខាន់ៗ ដូចជា ប្រទេសវៀតណាម និងម៉ាឡេស៊ីជាដើម”។ ជាមួយគ្នានេះ លោកបានស្នើឱ្យរដ្ឋាភិបាលថៃ បង្កើតគោលនយោបាយទាក់ទាញវិនិយោគិន និងផ្តោតលើគុណភាព សេវាកម្ម និងខ្សែសង្វាក់ផ្គត់ផ្គង់ដែលមានតម្លៃបន្ថែម។

លោក Carlos Martinez នាយកផ្នែកស្រាវជ្រាវ និងប្រឹក្សាយោបល់ក្រុមហ៊ុនKnight Frank Thailand បានអះអាងថា “វិស័យសណ្ឋាគារ បានវិលត្រលប់ទៅកាន់កម្រិតមុន ជំងឺរាតត្បាតវិញហើយ”។

លោកបានបន្ថែមថា អត្រា​តម្លៃបន្ទប់​សណ្ឋាគារ ក្នុង​មួយ​យប់​បាន​កើន​ឡើង​គួរ​ឱ្យ​កត់​សម្គាល់ បើ​ទោះ​បី​ជា​ចំនួន​ភ្ញៀវ​ទេសចរ​បរទេ ស​ មិន​ទាន់​បាន​កើន​ឡើង​ដល់​កម្រិត​ដូច​គ្នា​ ដែល​បាន​កត់ត្រា​ទុក​ក្នុងឆ្នាំ២០១៩យ៉ាងណាក្តី។

លោក Frank Khan ប្រធានផ្នែកលំនៅដ្ឋាននៅក្រុមហ៊ុនខាងលើ បានមានប្រសាសន៍ឱ្យដឹងថា ទីផ្សារលំនៅដ្ឋានក្នុងប្រទេសថៃ នៅឆ្នាំ២០២៤ នឹងនៅតែជួបប្រទះបញ្ហាប្រឈម ស្របពេលដែលអត្រាការប្រាក់លើកម្ចីទិញផ្ទះ និងថ្លៃចំណាយលើការអភិវឌ្ឍន៍កើនឡើងខ្ពស់។ លោក​បញ្ជាក់បន្ថែមថា​ “ក្នុង​ចំណោម​ខុនដូចំនួន១០យូនីត​ ដែល​យើង​បាន​លក់ ក្នុងនោះមានខុនដូចំនួន៥ ទៅ៦យូនីត​ មិនបាន​ទទួលកម្ចី​ទិញ​ផ្ទះ ពីធនាគារ​នោះទេ”។

ទោះជាយ៉ាងនេះក្តី លោក Nattha Kahapana នាយកគ្រប់គ្រងក្រុមហ៊ុន Knight Frank Thailand បានលើកឡើងថា “នៅក្នុងវិស័យខុនដូមានផ្នែកចំនួន២ ដែលនឹងបន្តកើនឡើងនៅឆ្នាំនេះ ដូចជាផ្នែកខុនដូលំដាប់ប្រណីត ដែលមានអតិថិជនគោលដៅ ដ៏ច្រើនសម្បូរបែប”។ លោក​បាន​បន្ថែមថា​ “ផ្នែក​មួយ​ទៀត​នោះគឺ​ខុនដូ​ ដែលមានទីតាំង នៅ​ជិត​សាកលវិទ្យាល័យ​ ដែល​មានតម្រូវការ​ខ្ពស់ពី​សំណាក់មាតាបិតា​ ឬ​សិស្ស​ដែល​ស្វែងរក​បន្ទប់​ជួល ដើម្បីស្នាក់នៅក្នុងពេលសិក្សា”៕ប្រភព៖Bangkok Post៕

ដោយ: គង់ លាងហួរ

អន្តរជាតិ: ក្រុមហ៊ុនសាជីវកម្មមូលបត្រ VNDirect បានអះអាងថា ឧបសគ្គដ៏ធំបំផុតចំនួន៣ ដែលរាំងស្ទះដល់ការងើបឡើងវិញនៃទីផ្សារអចលនទ្រព្យវៀតណាម កំពុងរលាយបាត់ទៅវិញបន្តិចម្តងៗ។

ឧបសគ្គទាំង៣នោះ រួមមានដូចជា វិបត្តិសាច់ប្រាក់ បញ្ហាផ្លូវច្បាប់ និងការផ្គត់ផ្គង់។ នេះបើយោងតាមការចុះផ្សាយ ដោយសារពត៌មាន VNexpress។

យោងតាមរបាយការណ៍ស្តីពី ទស្សនវិស័យវិនិយោគក្នុងខែកុម្ភៈ របស់ក្រុមហ៊ុនខាងលើ បានបញ្ជាក់ថា ទីផ្សារអចលនទ្រព្យវៀតណាម អាចនឹងចាប់ផ្តើមស្ទុះងើបឡើងវិញ នៅក្នុងឆមាសទីពីរនៃឆ្នាំនេះ។ទន្ទឹមនឹងនេះ អត្រាការប្រាក់លើប្រាក់កម្ចី ជាមធ្យមបច្ចុប្បន្ន ស្ថិតក្នុងរង្វង់ប្រហែល១១%ប៉ុណ្ណោះ ដែលធ្លាក់ចុះពីកម្រិតខ្ពស់បំផុតពីមុន ក្នុងរង្វង់ពី១៣% ទៅ១៤% ។

របាយការណ៍បន្តថា ប្រាក់ចំណេញរបស់អ្នកអភិវឌ្ឍន៍អចលនទ្រព្យ អាចនឹងងើបឡើងវិញនៅត្រីមាសខាងមុខ។ អ្នកអភិវឌ្ឍន៍បានរៀបចំរចនាសម្ព័ន្ធហិរញ្ញវត្ថុ របស់ពួកគេឡើងវិញយ៉ាងសកម្ម ក្នុងឆ្នាំ២០២៣ ដោយទិញមូលបត្របំណុលត្រឡប់មកវិញ មុនកាលកំណត់(maturity)។

បន្ទាប់ពីជួបប្រទះភាពចលាចល អស់មួយរយៈពេលរួចមក ក្រុមហ៊ុន ក៏បានកែប្រែយុទ្ធសាស្ត្រអាជីវកម្ម របស់ពួកគេឱ្យកាន់តែមានការប្រុងប្រយ័ត្ន ដោយសហការជាមួយដៃគូល្បីៗ ដើម្បីកាត់បន្ថយហានិភ័យ នៅពេលអភិវឌ្ឍគម្រោង។

ចំណែក កង្វះនៃការ​ផ្គត់ផ្គង់​ នៅតែជា​បញ្ហា​ប្រឈម​ដ៏​លំបាកសម្រាប់​ទីផ្សារ​លំនៅដ្ឋាន ក្នុងប្រទេសវៀតណាម ជាពិសេសកង្វះនៃការ​ផ្គត់ផ្គង់លំនៅដ្ឋានដែលមានតម្លៃ​មធ្យម​។

ទោះជាយ៉ាងណាក្តី ក្រុមហ៊ុនជឿជាក់ថា “ទីផ្សារអចលនទ្រព្យលំនៅដ្ឋាននៅប្រទេសវៀតណាម បានឆ្លងកាត់ផុតដំណាក់កាលដ៏លំបាកបំផុត ហើយនឹងបង្ហាញពីសញ្ញា នៃការងើបឡើងវិញកាន់តែច្បាស់ ចាប់ពីឆមាសទីពីរនៃឆ្នាំនេះ”។

ក្រុមហ៊ុន VNDirectបានបន្ថែមថា “រដ្ឋាភិបាល​បាន​ខិតខំ​ដោះស្រាយ​បញ្ហា​រាំងស្ទះ​ធំៗ​ចំនួន​៣ គឺ​បញ្ហា​ដើមទុន ឬវិបត្តិសាច់ប្រាក់ បញ្ហា​ច្បាប់ និង​ការផ្គត់ផ្គង់​មិន​ប្រក្រតី​ នៅក្នុង​ឆ្នាំ២០២៣ ហើយ​លទ្ធផល​វិជ្ជមាន​មួយចំនួន​បាន​លេចចេញ​មក។

លោកបន្តថា “ប៉ុន្តែរដ្ឋាភិបាល ត្រូវចាត់វិធានការបន្ថែមទៀត ដើម្បីជំរុញតម្រូវការ និងទំនុកចិត្តទីផ្សារ”៕ប្រភព៖Vnexpress៕