ដោយៈ គង់ សូរិយា

ភ្នំពេញៈ សហស្ថាបនិក និងជាអគ្គនាយកគេហទំព័រPropertyarea.aisa លោកយិន លាងគង់ត្រូវបានថ្នាក់ដឹកនាំក្រុមហ៊ុន DE ELEMENTS តែងតាំងជាទូតសុឆន្ទៈទទួលបន្ទុកផ្នែកសារព័ត៌មាន និងការផ្សព្វផ្សាយ។
បុរី DE ELEMENTS ស្ថិតនៅសង្កាត់កាកាប ខ័ណ្ឌពោធិសែនជ័យ រាជធានីភ្នំពេញ។

មានប្រសាសន៍បន្ទាប់ពីពិធីចុះហត្ថលេខា កាលពីព្រឹកថ្ងៃទី២៧ ឧសភានេះ លោកយិន លាងគង់ បានមានប្រសាសន៍ថា វាជាកិត្តយសមួយសម្រាប់រូបលោក ដែលទទួលបានការផ្តល់ទំនុកចិត្តសម្រា​ប់ការតែងតាំងនេះ។ លោកបន្តថា វាជាឱកាសនៃការបង្កើតប្រាក់ចំណូលផង និងជាបញ្ហាប្រឈមផង ព្រោះក្នុងនាមជាទូតសុឆន្ទៈ ទទួលបន្ទុកការងារនេះ យើងត្រូវតែទទួលខុសត្រូវលើការងាររបស់យើង ដើម្បីជម្រុញការលក់ឲ្យបានជោគជ័យ។

បុរី DE ELEMENTS ជាបុរីបែបក្លាស្ទ័រដំបូងគេនៅរាជធានីភ្នំពេ​ញ ដោយអតិថិជនអាចទិញបានទាំងជនជាតិខ្មែរ និងបរទេសតាមរយៈការប្រើប្រាស់ប័ណ្ណ សម្គាល់អចលនវត្ថុបែបStrata ដោយអតិថិជន ឬអ្នកវិនិយោគតាមទម្រង់៣ខុសៗគ្នា ដូចជា ទី១ ការទិញផ្ទះបែបBare units ទី២ ការទិញផ្ទះដែលមានការបំពាក់ សម្ភារៈបរិក្ខា និងការទិញផ្ទះ ដែលអាចជួលត្រលប់មកវិញ ជាមួយការជួលត្រលប់ក្នុងអត្រា៨ភាគរយប្រចាំឆ្នាំ។

គំរោង DE ELEMENTS ជាការរួមបញ្ចូលគ្នានូវរចនាបទបែបសហសម័យ ដែលមានអាងហែលទឹក កន្លែងហាត់ប្រាណ, Sky Bar បន្ទប់សម្រាប់កុមារលេងកំសាន្ត ចំណតរថយន្តធំទូលាយ និងការរស់នៅបែបសហគមន៍ដ៏រសរវើកមួយ។

លោក សូត្រ ចាន់សុផា នាយកប្រតិបត្តិទូទៅនៃបុរី DE ELEMENTS បានមានប្រសាសន៍ថា ការជ្រើសរើសលោកយិន លាងគង់ អគ្គនាយកគេហទំព័រPropertyarea.asia និងគេហទំព័រ Cambodiafinancialtimes.com ជាទូតសុឆន្ទៈមិនមែនជាការចៃដន្យឡើយ ប៉ុន្តែក្រុមហ៊ុនបានសិក្សាពីប្រវត្តិ និងគុណវុឌ្ឍិរបស់ស្ថាប័ននេះ ដែលបានផ្សព្វផ្សាយព័ត៌មាន ប្រកបដោយវិជ្ជាជីវៈ និងក្រមសីលធ៌មខ្ពស់ ពិសេសផ្តោតលើការផ្សព្វផ្សាយ ព័ត៌មានល្អៗពីកម្ពុជា ទៅកាន់មជ្ឈដ្ឋានជាតិ និងអន្តរជាតិ។

លោកបន្តថា “បុរី DE ELEMENTS មានតែមួយគត់នៅកម្ពុជា ហើយការជ្រើសរើសស្ថាបនិក គេហទំព័រ Propertyarea.asia នឹងជួយជម្រុញ និងលើកតម្កើងតម្លៃនៃការអភិវឌ្ឍរបស់យើង”។ លោកបន្ថែមថា “តាមរយៈការផ្សព្វផ្សាយតាមរយៈគេហទំព័រនេះ យើងជឿថា ការលក់របស់យើងឲ្យកាន់តែទទួលបានជោគជ័យ”។

ជាមួយគ្នានេះ លោកWEE Keigo នាយកប្រតិបត្តិ(CEO)នៃបុរីDE ELEMENTS បានមានប្រសាសន៍ឲ្យដឹងផងដែរថា លោកបានស្គាល់ លោកយិន លាងគង់រយៈពេល៥ឆ្នាំមកហើយ និងបានរកឃើញថា លោកជាមនុស្សនិយាយពិត ធ្វើពិតម្នាក់ ពិសេសជាមនុស្សមានភាពស្មោះត្រង់ និងប្តេជ្ញាចិត្តខ្ពស់ក្នុងការងារ។

លោកបន្តថា គេហទំព័ររបស់លោក ទទួលបានការទទួលស្គាល់យ៉ាងទូលំទូលាយ ក្នុងចំណោមភ្នាក់ងារលក់ ជួល និងអ្នកអភិវឌ្ឍន៍ជាតិ អន្តរជាតិ ហេតុនេះការតែងតាំងលោក ពិតជាស័ក្តិសមនឹងគុណវុឌ្ឍិរបស់បុរី ដែលយើងបានអភិវឌ្ឍន៍ឡើង តាមស្តង់ដាអន្តរជាតិ ជាមួយក្រុមហ៊ុនអភិវឌ្ឍន៍លំដាប់យក្សមួយ ក្នុងចំណោមក្រុមហ៊ុនលំដាប់យក្សធំៗជាច្រើននៅលើពិភពលោក៕

ដោយ: គង់ លាងហួរ

ម៉ានីល: ធនាគារវិនិយោគហេដ្ឋារចនាសម្ព័ន្ធអាស៊ី (AIIB) បានអនុម័តប្រាក់កម្ចី ចំនួន១,១៤ពាន់លានដុល្លារ ដើម្បីផ្តល់ហិរញ្ញប្បទានដល់ការសាងសង់ស្ពាន តភ្ជាប់ពីខេត្តBataan ទៅកាន់ខេត្ត Cavite ក្នុងប្រទេសហ្វីលីពីន។

លោក Rajat Misra អនុប្រធានស្តីទីនៃធនាគារ AIIB ដែលទទួលបន្ទុកប្រតិបត្តិការវិនិយោគសម្រាប់តំបន់ បានបញ្ជាក់នៅក្នុងសេចក្តីថ្លែងការណ៍មួយថា “ការអនុម័តប្រាក់កម្ចីសម្រាប់គម្រោងនេះ បង្ហាញពីការបោះជំហានដ៏សំខាន់មួយ ឆ្ពោះទៅរកការសម្រេចនូវចក្ខុវិស័យរបស់យើង ក្នុងការជំរុញកំណើនប្រកបដោយនិរន្តរភាព នៅក្នុងតំបន់ Greater Manila”។

លោកបានបន្ថែមថា “តាមរយៈការផ្តល់អាទិភាពដល់ការសាងសង់ហេដ្ឋារចនាសម្ព័ន្ធ ដែលមានភាពធន់ទៅនឹងអាកាសធាតុ និងការប្រើប្រាស់បច្ចេកវិទ្យា យើងមិនត្រឹមតែលើកកម្ពស់ការតភ្ជាប់ប៉ុណ្ណោះទេ ប៉ុន្តែថែមទាំងរួមចំណែក ដល់ការអភិវឌ្ឍន៍សេដ្ឋកិច្ចក្នុងតំបន់ ហើយថែមទាំងកាត់បន្ថយ និងសម្របខ្លួនទៅនឹងផលប៉ះពាល់បរិស្ថានផងដែរ”។

គម្រោងសាងសង់ស្ពានឆ្លងកាត់សមុទ្រមួយនេះ មានប្រវែងប្រ មាណ៣២,១៥គីឡូម៉ែត្រ ដែលតភ្ជាប់តំបន់កណ្តាលកោះ Luzon ទៅកាន់តំបន់ Tagalog ភាគខាងត្បូង ខណៈធនាគារអភិវឌ្ឍន៍អាស៊ី (ADB) ក៏ជាដៃគូផ្តល់សហហិរញ្ញប្បទាន ដល់គម្រោងនេះផងដែរ។ស្ពាននេះត្រូវបានគេរំពឹងថា នឹងកាត់បន្ថយពេលវេលាធ្វើដំណើរពីទីក្រុង Mariveles ក្នុងខេត្ត Bataanនៅលើកោះ Luzon ទៅកាន់ទីក្រុង Naic ក្នុងខេត្ត Cavite ដែលស្ថិតនៅខាងត្បូងរដ្ឋធានីម៉ានីល ពី  រយៈពេល៥ម៉ោង មកនៅត្រឹម១ម៉ោងកន្លះ។ នៅពេលសាងសង់រួចរាល់ ស្ពាននេះក៏ត្រូវបានរំពឹងទុកថា នឹងក្លាយជាស្ពានឆ្លងសមុទ្រដ៏វែងបំផុតមួយផងដែរនៅក្នុងពិភពលោក។

ធនាគារ AIIB ដែលមានមូលដ្ឋាននៅទីក្រុងប៉េកាំង បានអះអាងថា  “នេះជាការគាំទ្រដ៏សំខាន់មួយ ចំពោះកម្មវិធី Build Better More របស់រដ្ឋបាល លោកប្រធានាធិបតីហ្វីលីពីន Ferdinand Marcos Jr. ក្នុងគោលដៅពង្រឹងការតភ្ជាប់ និងលើកកម្ពស់ការអភិវឌ្ឍន៍ហេដ្ឋារចនាសម្ព័ន្ធនៅក្នុងតំបន់Greater Manila”។

តំបន់ Greater Manila គឺជាពាក្យដែលសំដៅ ទៅលើតំបន់ទីក្រុងម៉ានីលទាំងមូល បូកបញ្ចូលទាំងបណ្តាខេត្ត ជិតខាងមួយចំនួន ដូចជាខេត្ត Bulacan ខេត្ត Cavite ខេត្ត Laguna និងខេត្ត Rizal៕ប្រភព: Business World៕

        ដោយៈ គង់ ហ្វីអូណា

        ភ្នំពេញៈ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធ៌ម លោកកើត រិទ្ឋបានថ្លែងថា នៅពេលអនាគត ការលែងលះគ្នាដោយការព្រមព្រៀង ដោយគ្មានវិវាទ គឺមិនចាំបាច់ឡើងដល់តុលាការនោះទេ គឺត្រឹមតែមុខសាការីតែប៉ុណ្ណោះ។

លោកបានថ្លែងបែបនេះ ក្នុងកម្មវិធីប្រឡងប្រជែងជ្រើសរើសសិស្សសារការីជំនាន់ទី៤ ដំណាក់កាលវិញ្ញាសាសរសេរ សម័យប្រឡង នាថ្ងៃសៅរ៍ ទី២៥ ខែឧសភា ឆ្នាំ២០២៤សប្តាហ៍មុននេះ។

ឆ្លៀតនាឱកាសនោះ លោកកើត រិទ្ធបានរំលេចថា ឆ្នាំនេះជាឆ្នាំមួយ ដែលក្រសួងនឹងសម្រេចឱ្យបាននូវច្បាប់សាការី ដែលជាច្បាប់ច្បាស់លាស់មួយ តាមការព្យាករណ៍ និងមានបន្ថែមនូវសមត្ថកិច្ចជាច្រើនថែមទៀតដល់សាការី ដែលកម្ពុជាទៅថ្ងៃក្រោយ ការលែងលះគ្នាដោយការព្រមព្រៀង ដោយគ្មានវិវាទ គឺមិនចាំបាច់ឡើងដល់តុលាការនោះទេ គឺត្រឹមតែមុខសាការីតែប៉ុណ្ណោះ ដូចនេះជំនាន់នេះ គឺជំនាន់ដែលចេញទៅវិញ ត្រូវស្ពាយទៅជាមួយនូវច្បាប់សាការីបាន ហើយជាការប្តេជ្ញាចិត្ត នៅក្នុងការរៀបចំសេចក្តីព្រៀងច្បាប់នេះ នឹងឱ្យចប់នៅក្នុងឆ្នាំនេះ និងអនុវត្តន៍ច្បាប់នេះឱ្យបាន។

លោកឧបនាយករដ្ឋមន្រ្តីបានបន្តថា ចំពោះមុខវិជ្ជាដែលបេក្ខជនទាំងអស់ ត្រូវប្រឡងមានចំនួន៤មុខវិជ្ជារួមមាន៖ មុខវិជ្ជានីតិអចលនទ្រព្យ  មុខវិជ្ជានីតិពាណិជ្ជកម្មនិងនីតិក្រុមហ៊ុន  មុខវិជ្ជានីតិកាតព្វកិច្ចនិងកិច្ចសន្យា និងមុខវិជ្ជានីតិគ្រួសារ។ ដូចនេះសូមបេក្ខជនទាំងអស់កុំអោយពេលវេលាកន្លងទៅអត់ប្រយោជន៍ និងគិតគូរឱ្យបានគ្រប់ជ្រុងជ្រោយមុន និងចាប់ផ្តើមសរសេរ ព្រោះនេះជាការប្រឡងប្រកួតប្រជែង មិនមែនគ្រាន់តែប្រឡងយកតែមួយជាប់នោះទេ។

លោកបញ្ជាក់ថា “គោលការណ៍ក្នុងវិស័យយុត្តិធម៌ ទាក់ទងនិងការជ្រើសរើសមន្រ្តី ក្នុងនីតិកាលថ្មីនេះ ក្រោមការដឹកនាំរបស់សម្តេច នាយករដ្ឋមន្ត្រី បានដាក់ចេញនូវគោលការណ៍ ដើម្បីផ្លាស់ប្តូររបៀបរបបមួយចំនួនក្នុងការប្រឡង”។ លោកបន្ថែមថា “អ្វីដែលសំខាន់ជាងគេ គឺធានាឱ្យការប្រឡងប្រព្រឹត្តទៅ ប្រកបដោយភាពសុក្រឹតនិងយុត្តិធម៌”។

លោកកើត រិទ្ឋបានបន្តថា ក្នុងការប្រឡងនេះ ក៍មានអង្គភាពប្រឆាំងអំពើពុករលួយផងដែរ ដែលវត្តមានពួកគាត់នាពេលនេះ គឺដើម្បីធានាបានថា កិច្ចដំណើរការប្រព្រឹត្តទៅ ស្របតាមច្បាប់បញ្ញតិ្តជាធរមាន និងដើម្បីអោយដំណើរការប្រឡងនេះ មានតម្លាភាព មានភាពសុក្រឹត្រនិងយុត្តិធម៌ ដូច្នេះចំពោះបេក្ខជនណា ដែលរកឃើញថាមានភាពមិនប្រក្រតី នៅក្នុងកិច្ចការប្រឡងនេះ និងត្រូវធ្លាក់ដោយស្វ័យប្រវត្តិ៕

        ដោយៈ គង់ ហ្វីអូណា

        កោះកុងៈ អភិបាលនៃគណអភិបាលខេត្តកោះកុង លោកជំទាវមិថុនា ភូថងបានជម្រាបជូនពីវឌ្ឍនភាពនៃការសាងសង់ និងស្តារផ្លូវជាតិលេខ៤៨ ដែលជាផ្លូវដ៏សំខាន់ក្នុងការធ្វើសមាហរណកម្មតំបន់។

 លោកជំទាវបានសរសេរលើ បណ្តាញទំនាក់ទំនងសង្គមរបស់រដ្ឋបាលខេត្តកោះកុងកាលពីសប្តាហ៍មុនថា ពាក់ព័ន្ធការស្ថាបនាលើកកម្រិតគុណភាពផ្លូវជាតិលេខ៤៨ ដោយអ៊ុតកៅស៊ូAC ប្រវែង១៤៨គីឡូម៉ែត្រ ទទឹង១១ម៉ែត្រ និងកម្រាស់៧០មីលីម៉ែត្រ មាន២គន្លង និង៤គន្លង ក្រុមហ៊ុនម៉ៅការសាងសង់ បានយកចិត្តទុកដាក់យ៉ាងខ្លាំង និងមមាញឹកក្នុងការស្ថាបនា ឱ្យបានសម្រេចតាមផែនការ ក៏ប៉ុន្តែ ដោយសារស្ថានភាពភូមិសាស្ត្រ ខេត្តកោះកុង មានភ្នំច្រើន ទីទួលច្រើន និងរដូវវស្សាមានភ្លៀងធ្លាក់ច្រើនជោគជាំ ដែលជាកត្តាធ្វើឱ្យការស្ថាបនាស្តារឡើងវិញ នូវផ្លូវជាតិលេខ៤៨នេះ មានការយឺតយ៉ាវបន្តិច ដែលមិនអាចសម្រេចបានតាមផែនការដែលបានគ្រោងទុក។

ម្យ៉ាងវិញទៀត ការស្ថាបនាផ្លូវជាតិលេខ៤៨ ពិតជាជួបការលំបា​កយ៉ាងច្រើន​ ដែលត្រូវធ្វើឱ្យស្របតាមបទដ្ឋានបច្ចេកទេស និងត្រូវកាត់កូតមួយចំនួន ដូចជាទីខ្ពស់ត្រូវកាត់កូត កន្លែងខ្លះមានដី កន្លែងខ្លះមានថ្ម ហើយកន្លែងដែលទាប ក៏យើងត្រូវលើកកូតឡើងវិញ។

លោកជំទាវបានបន្តថា “បច្ចុប្បន្នក្រុមហ៊ុនកំពុងរកដី និងកម្ទេចថ្ម កៀរ និងចាក់លើកន្លែងផ្លូវរអិល ដើម្បីសម្រួលឱ្យបងប្អូនអាចធ្វើដំណើរបាន”។

លោកជំទាវមិថុនា ភូថងក៏បានសម្តែងការសោកស្តាយ និងសុំ អភ័យទោស អធ្យាស្រ័យ និងមេត្តាយោគយល់ ពីសំណាក់ សម្តេច ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាង កញ្ញា ភ្ញៀវទេសចរជាតិ-អន្តរជាតិ ពាណិជ្ជករ អាជីវករ អ្នករត់តាក់ស៊ី និងពូមីង បងប្អូនប្រជាពលរដ្ឋទាំងអស់។
លោកជំទាវបន្តថា ទោះបីជាមានការយឺតយ៉ាវ ក្នុងការស្ថាបនាស្តារឡើងវិញ ផ្លូវជាតិលេខ៤៨នេះក៏ពិតមែន តែក្រុមហ៊ុនកំំពុងសម្រុ​កធ្វើផ្លូវនេះ និងស្ថាបនាឪ្យរួចរាល់ជាស្ថាពរ នៅក្នុងឆ្នាំ២០២៥ ខាងមុខ៕

ដោយ: គង់ លាងហួរ

អន្តរជាតិ: លោក Hardeep Singh Puri រដ្ឋមន្ត្រីក្រសួងសហភាពឥណ្ឌា បានលើកឡើង និងថ្លែងអួតសរសើរអំពីវឌ្ឍនភាពដ៏ឆាប់រហ័សរបស់ប្រទេសឥណ្ឌា ក្នុងការរៀបចំប្រព័ន្ធដឹកជញ្ជូន តាមរថភ្លើងក្នុងទីក្រុង ក្នុងរយៈពេល១ទសវត្សរ៍កន្លងមកនេះ។

បន្ថែមពីលើនោះ មន្ត្រីជាន់ខ្ពស់ឥណ្ឌារូបនេះ បានបង្ហាញនូវទំនុកចិត្តថា ឥណ្ឌានឹងមានប្រព័ន្ធរថភ្លើងសាធារណៈ លើអាកាសក្នុងទីក្រុង (Metro) ធំជាងគេបំផុតទី២របស់ពិភពលោក នៅក្នុងរយៈពេល២ឆ្នាំកន្លះខាងមុខ។ទន្ទឹមនឹងនេះដែរ លោក Puri ក៏បានសង្កត់ធ្ងន់ផងដែរលើការកើនឡើងគួរឱ្យកត់សម្គាល់ នៃការជិះរថភ្លើងសាធារណៈក្នុងទីក្រុង ដោយលោកមើលឃើញ ពីការទទួលបានអ្នកធ្វើដំណើរចំនួន១០លាននាក់ជារៀងរាល់ថ្ងៃ។

លោក Puri បានគូសបញ្ជាក់យ៉ាងដូច្នេះថា “សព្វថ្ងៃនេះ យើងមានមនុស្សជិះលើរថភ្លើងMetro ចំនួន១០លាននាក់ក្នុងមួយថ្ងៃ ហើ​យនៅក្នុងចំណោមនោះ មានមនុស្សចំនួន៧,៣លាននាក់ គឺជាអ្នកជិះរថភ្លើងនៅតំបន់រដ្ឋធានីដេលី”។លោកបានប្រកាសថា បច្ចុប្បន្ននេះ ប្រទេសឥណ្ឌាកំពុងដំណើរការប្រព័ន្ធរថភ្លើងMetro ក្នុងចម្ងាយ៩៤៥គីឡូម៉ែត្រ ខណៈគម្រោងផ្លូវរថភ្លើងប្រវែង១.០០០គីឡូម៉ែត្រទៀត កំពុងស្ថិតក្រោមសាងសង់ ដែលគ្រោងនឹងបញ្ចប់រួចរាល់ នាពេលអនាគតដ៏ខ្លីខាងមុខនេះ។

លោក​រដ្ឋមន្ត្រីបាន​បន្ថែម​ថា “សព្វថ្ងៃនេះ បើទោះបីជាចំនួនប្រជាជនរស់នៅក្នុងទីក្រុង មានការកើនឡើងយ៉ាងឆាប់រហ័ស យ៉ាងណាក្តី ក៏ប្រជាជននៅតែមានភាពងាយស្រួល ក្នុងការធ្វើដំណើរពីប៉ែកម្ខាងនៃទីក្រុង ទៅកាន់ប៉ែកម្ខាងទៀតក្នុងរយៈពេលដ៏សមរម្យមួយ”។

លោក Puri បានវាយតម្លៃថា វឌ្ឍនភាពទាំងនេះ អាចសម្រេចទៅបាន ក៏ដោយសារតែគំនិតផ្តួចផ្តើម ប្រកបដោយចក្ខុវិស័យរបស់អតីតនាយករដ្ឋមន្ត្រីឥណ្ឌាលោក Atal Bihari Vajpayee សម្រាប់ការសាងសង់ប្រព័ន្ធរថភ្លើង Metro ក្នុងទីក្រុងកាលពីឆ្នាំ២០០២៕ប្រភព: Financial Express៕

ដោយៈ គង់ ហ្វីអូណា

        ភ្នំពេញៈ ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងអំពីគម្រោង “ព្រែកជីកហ្វូណនតេជោ” នៅលើបណ្តាញសារព័ត៌មានអន្តរជាតិ Nikkei Asia នាថ្ងៃទី២៥ ខែឧសភា ឆ្នាំ២០២៤កន្លងមកនេះ។

លោកបានសរសេរថា “គម្រោងផ្លូវនាវាចរណ៍របស់កម្ពុជា នឹងនាំមកនូវភាពរីកចម្រើនរុងរឿង”។
ផ្លូវទឹកនេះនឹងក្លាយជានាវាសម្រាប់ពាណិជ្ជកម្ម និងកិច្ចសហប្រតិបត្តិការ មិនមែនសម្រាប់ជម្លោះ ឬការគំរាមកំហែងណាមួយនោះទេ។

លាតសន្ធឹងចម្ងាយ១៨០គីឡូម៉ែត្រ ពីបេះដូងនៃទីក្រុងភ្នំពេញ ទៅកាន់ឆ្នេរសមុទ្រដ៏ស្ងប់ស្ងាត់ នៃខេត្តកែបនៅឈូងសមុទ្រថៃ គម្រោងគ្រប់គ្រង ធនធានទឹកចម្រុះហ្វូណនតេជោ ត្រូវបានអនុម័តនៅខែឧសភា ឆ្នាំ២០២៣។ គម្រោងនេះ នឹងធ្វើទំនើបកម្មផ្លូវទឹកបុរាណរបស់ប្រទេសកម្ពុជា ហើយនាំមកនូវយុគសម័យថ្មីនៃភាពរុងរឿងផ្នែកសេដ្ឋកិច្ច និងការអភិវឌ្ឍន៍ប្រកបដោយចីរភាព។

ការស្តារឡើងវិញនូវផ្លូវទឹក ដែលប្រើប្រាស់ដោយអាណាចក្រហ្វូណនបុរាណ កាលពីជាង២០០០ឆ្នាំមុន ដោយពង្រីកឱ្យមានមុខកាត់ ១០០ម៉ែត្រ និងមានជម្រៅ៥,៤ម៉ែត្រ អាចឱ្យនាវារហូតដល់ ៣០០០តោន អាចឆ្លងកាត់បាន។ ការស្តារនេះ នឹងមានការសាងសង់ទ្វារទឹកចំនួន៣ និងស្ពានចំនួន១១ផងដែរ។

អ្នកតស៊ូមតិផ្នែកបរិស្ថាន អ្នករៀបចំផែនការសង្គម និងអ្នកវិភាគភូមិសាស្ត្រនយោបាយ បានពិនិត្យយ៉ាងល្អិតល្អន់ ត្រឹមត្រូវ លើគម្រោងប្រព័ន្ធគ្រប់គ្រងទឹក ដែលបានស្នើឡើងនេះ។ សុខុមាលភាពនៃប្រព័ន្ធអេកូឡូស៊ីទន្លេមេគង្គ ជីវភាពរស់នៅរបស់សហគមន៍មូលដ្ឋាន និងតុល្យភាពនៃថាមវន្តក្នុងតំបន់ គឺជាបញ្ហាដែលរដ្ឋាភិបាលកម្ពុជាបានគិតគូរ ជាមួយនឹងការទទួលខុសត្រូវខ្ពស់បំផុត។

លោកស៊ុន ចាន់ថុលបានប្រាប់សារព័ត៌មានជប៉ុនបន្តថា គម្រោ​ងផ្លូវទឹកប្រកបដោយមហិច្ឆិតា និងការប្រុងប្រយ័ត្ននេះ ឈរលើមូលដ្ឋាន ការប្តេជ្ញាចិត្តចំពោះប្រសិទ្ធភាពសេដ្ឋកិច្ច និរន្តរភាពបរិស្ថាន និងស្ថិរភាពក្នុងតំបន់។

តាមរយៈការបង្កើតគន្លងនាវាចរណ៍ផ្ទាល់ សម្រាប់ការធ្វើពា​ណិជ្ជកម្ម គម្រោងផ្លូវទឹកនេះ នឹងកាត់បន្ថយការពឹងផ្អែករបស់កម្ពុជាលើការដឹកជញ្ជូនទំនិញតាមផ្លូវគោក និងកំពង់ផែបរទេស ដែលជាលទ្ធផលកាត់បន្ថយថ្លៃដើមដឹកជញ្ជូន និងជំរុញតួនាទីរបស់កម្ពុជានៅលើទីផ្សារពិភពលោក និងតំបន់។

លើសពីផលចំណេញផ្នែកពាណិជ្ជកម្ម ប្រព័ន្ធផ្លូវទឹកដែលពង្រីកថ្មីនេះត្រូវបានរំពឹងថា នឹងដើរតួនាទីសំខាន់ ក្នុងការជំរុញកំណើនសេដ្ឋកិច្ចរបស់កម្ពុជា រួមមានការបង្កើតឱកាសការងារជាច្រើន និងការអភិវឌ្ឍឧស្សាហកម្ម នៅក្នុងប្រទេសកម្ពុជា។ តំបន់ពាណិជ្ជកម្មថ្មីនៅតាមបណ្តោយផ្លូវទឹក នឹងទាក់ទាញការវិនិយោគក្នុងស្រុក និងអន្តរជាតិ ជំរុញការធ្វើពិពិធកម្មសេដ្ឋកិច្ចកម្ពុជា។ ហេដ្ឋារចនាសម្ព័ន្ធថ្មីនេះ ក៏នឹងជំរុញវិស័យទេសចរណ៍នៅកម្ពុជា ថែមទាំងបង្កើនផលិតភាពកសិកម្ម តាមរយៈការផ្តល់នូវប្រព័ន្ធធារាសាស្រ្តសម្បូរបែប ដែលនឹងហុចផល ដល់សង្គមកសិកម្មរបស់កម្ពុជាផងដែរ។

សារៈសំខាន់ជាយុទ្ធសាស្ត្រនៃផ្លូវទឹកនេះ នឹងទាក់ទាញការវិនិយោគបរទេសកាន់តែច្រើន ចូលមកក្នុងប្រទេសកម្ពុជា ជាពិសេសនៅក្នុងវិស័យទាក់ទងនឹងការដឹកជញ្ជូន ភស្តុភារកម្ម និងរោងចក្រសហគ្រាស ដែលអាចទាញយកអត្ថប្រយោជន៍ ពីការដឹកជញ្ជូនដែលមានភាពអំណោយផលជាងមុន។លោកស៊ុន ​ចាន់ថុលបញ្ជាក់។

លោកបន្តថា គម្រោងនេះនឹងផ្តល់អត្ថប្រយោជន៍ សង្គមជាច្រើនរួមមាន បង្កើនលទ្ធភាព ក្នុងការទទួលបានការអប់រំ និងការថែទាំសុខភាព លើកកម្ពស់សន្តិសុខស្បៀងនិងទឹក ការផ្តល់សេវាដឹកជញ្ជូន និងភស្តុភារកម្ម ដែលមានភាពប្រសើរឡើង សម្រាប់ផលិតផលកសិកម្ម កាត់បន្ថយហានិភ័យនៃទឹកជំនន់ និងគ្រោះរាំងស្ងួត និងការផ្តល់សេវាសំខាន់ៗជាច្រើនផ្សេងទៀត សម្រាប់ប្រជាជននៅក្នុងតំបន់។

នៅគ្រប់ជំហាននៃគម្រោងនេះ មតិយោបល់របស់សហគមន៍ត្រូវបានទទួលការយកចិត្តទុកដាក់ខ្ពស់ ហើយសុខុមាលភាពរបស់ប្រជាជនត្រូវបានកំណត់ជាអាទិភាព ដោយមានការរៀបចំផែនការរួមគ្នា និងសំណងសមធម៌ ជាការងារចំពោះមុខ នៃកិច្ចខិតខំប្រឹងប្រែងរបស់យើង។ ហេដ្ឋារចនាសម្ព័ន្ធថ្មីនេះ គឺសម្រាប់ប្រជាជនកម្ពុជាគ្រប់រូប ដែលជាកិច្ចខិតខំប្រឹងប្រែងរួមគ្នា ដែលនឹងធានាបាននូវវិបុលភាពរួមគ្នា។

ការវាយតម្លៃផលប៉ះពាល់បរិស្ថានយ៉ាងម៉ត់ចត់ ដែលធ្វើឡើងជាមួយអ្នកឯកទេសអន្តរជាតិចំនួន៤៨នាក់ នឹងធានាថាផ្លូវទឹកថ្មីនេះ គោរពដល់បេតិកភណ្ឌធម្មជាតិ នៃទន្លេមេគង្គ និងអនុលោមតាមកិច្ចព្រមព្រៀងមេគង្គឆ្នាំ១៩៩៥ ដែលចុះហត្ថលេខា ដោយប្រទេសកម្ពុជា ឡាវ ថៃ និងវៀតណាម។

ក្នុងស្មារតីនៃតម្លាភាពពេញលេញ កម្ពុជាបានជូនដំណឹងដល់គណៈកម្មការទន្លេមេគង្គ នៅខែសីហា ឆ្នាំ២០២៣ អំពីព័ត៌មានលម្អិតនៃគម្រោង និងលទ្ធផលនៃការសិក្សារបស់យើង ដែលបញ្ជាក់ពីការប្តេជ្ញាចិត្តរបស់យើង ចំពោះកិច្ចសហប្រតិបត្តិការ និងការទទួលខុសត្រូវ។

គម្រោងនេះនឹងផ្តល់នូវការការពារ ពីការផ្លាស់ប្តូរយ៉ាងគំហុកនៃកម្រិតទឹក និងរក្សាលំហូរទឹកធម្មជាតិនៅក្នុងតំបន់។ គំរូជលសាស្ត្រដែលមានភាពលម្អិត បានបង្ហាញលទ្ធផលព្យាករណ៍ថា មានផលប៉ះពាល់ត្រឹមតែ ០.០៦% តែប៉ុណ្ណោះ លើរំហូរទឹកប្រចាំថ្ងៃរបស់ទន្លេមេគង្គក្នុងរដូវប្រាំង ហើយមិនមានផលប៉ះពាល់អ្វីទាំងអស់ ក្នុងរដូវទឹកជំនន់។ ផ្លូវទឹកនេះនឹងបង្កើតជម្រកធម្មជាតិ និងប្រព័ន្ធអេកូឡូស៊ីថ្មី ហើយការពារប្រឆាំង នឹងការជ្រៀតចូលនៃទឹកប្រៃ មកកាន់ទឹកសាប ក្នុងន័យនេះ គម្រោងនេះនឹងរក្សាបាននូវជីវចម្រុះ នៃដីសណ្ដទន្លេរមេគង្គ។

លោកស៊ុន ចាន់ថុលបានបន្តថា លើសពីនេះទៅទៀត គំនិតផ្តួចផ្តើមនេះ នឹងធ្វើឱ្យប្រសើរឡើង នូវការគ្រប់គ្រងទឹកនៅខេត្តចំនួនប្រាំនៅក្នុងប្រទេសកម្ពុជា ដោយកាត់បន្ថយការកើតឡើង នៃគ្រោះរាំងស្ងួត និងកាត់បន្ថយគ្រោះទឹកជំនន់ភ្លាមៗ ក្នុងប្រទេស និងកាត់បន្ថយហានិភ័យដែលទឹកជំនន់ ក្នុងតំបន់អាចធ្វើឱ្យប៉ះពាល់ដល់ប្រទេសវៀតណាមផងដែរ។

កម្ពុជាជាប្រទេសស្រឡាញ់សន្តិភាព ហើយមានការប្តេជ្ញាចិត្តខ្ពស់ ក្នុងការរក្សាស្ថិរភាពក្នុងតំបន់ និងវិបុលភាពរួម។

លោកបានបញ្ជាក់ថា “ខ្ញុំអាចបញ្ជាក់បានថា គម្រោងគ្រប់គ្រងធនធានទឹកចម្រុះហ្វូណនតេជោនេះ នឹងដំណើរការក្រោមគោលការ​ណ៍ដ៏ពិសិដ្ឋនៃរដ្ឋធម្មនុញ្ញរបស់កម្ពុជា ដែលបង្កើតឡើងដោយឈរលើគោលការណ៍បូរណភាពទឹកដី និងអធិបតេយ្យភាព និងហាមឃាត់ដាច់ខាតវត្តមានរបស់កងទ័ព ឬមូលដ្ឋានយោធាបរទេសនៅលើទឹកដីរបស់ខ្លួន”។

សរុបមក ផ្លូវទឹកនេះនឹងក្លាយជាយានថ្មី សម្រាប់ពាណិជ្ជកម្ម និងកិច្ចសហប្រតិបត្តិការ មិនមែនសម្រាប់ជម្លោះ ឬការគំរាមកំហែងណាមួយនោះទេ។ យើងប្តេជ្ញាអនុវត្តគម្រោង ដែលកែប្រែមុខមាត់កម្ពុជានេះឱ្យបានជាដាច់ខាត ជាមួយការគាំទ្រយ៉ាងខ្លៀវខ្លារ ពីប្រជាជនកម្ពុជាក្នុង និងក្រៅប្រទេស។

លោកបញ្ជាក់ទៀតថា “នេះជាសក្ខីភាពមួយ ចំពោះការយកចិត្តទុកដាក់ឥតងាករេរបស់កម្ពុជា ចំពោះវឌ្ឍនភាពសេដ្ឋកិច្ចសង្គម ការការពារបរិស្ថាន និងការអភិវឌ្ឍន៍ប្រកបដោយចីរភាព សម្រាប់ប្រទេ​សជាតិយើង ប្រជាជនយើង និងតំបន់របស់យើង”៕

តំណរភ្ជាប់ទៅកាន់អត្ថបទផ្សព្វផ្សាយទាំងស្រុង: https://asia.nikkei.com/Opinion/Cambodia-s-waterway-project-will-deliver-prosperity

        ដោយៈ គង់ សូរិយា

        ព្រះសីហនុៈ អភិបាលរងខេត្តព្រះសីហនុ លោក ឡុង ឌីម៉ង់ និងគណៈប្រតិភូខេត្តចំនួន៣រូប ចូលរួមមហាសន្និបាតលើកទី៤៤ របស់សមាគមអន្តរជាតិ នៃអភិបាលក្រុងនិយាយភាសាបារាំង(Association Internationale des Maires Francophones, AIMF) នៅទីក្រុងឡូហ្សាន ប្រទេសស្វីស។​​

នៅក្នុងមហាសន្និបាតប្រចាំឆ្នាំនេះ ខេត្តព្រះសីហនុទទួលបានការឯកភាពជាឯកច្ឆន្ទ ក្នុងការចូលរួមជាសមាជិកពេញសិទ្ធ បន្ទាប់ពីកិច្ចសម្របសម្រួលអស់រយៈពេលជាង២ឆ្នាំកន្លងមក។

លោកអភិបាលរងបានគូសបញ្ជាក់ថា ការចូលជាសមាជិកបណ្តាញសកល និងថ្នាក់តំបន់នៃសមាគមអន្តរជាតិនេះ នឹងនាំយកផលចំណេញជាច្រើន ដល់ខេត្តព្រះសីហនុ តាមរយៈការធ្វើពិពិធកម្មកិច្ចសហប្រតិបត្តិការ ការទូតថ្នាក់មូលដ្ឋាន សេដ្ឋកិច្ច សង្គម ការចែករំលែកបទពិសោធន៍ សម្រាប់បញ្ហាប្រឈមនានាថ្នាក់មូលដ្ឋាន វិនិយោគ ទេសចរណ៍-ល-។

បន្ថែមពីនេះ ការចូលជាសមាជិកAIMF នេះ ផ្តល់អត្ថប្រយោជន៍យ៉ាងច្រើនដល់ប្រទេសកម្ពុជា ​និងខេត្តព្រះសីហនុ និយាយជារួមនិងដាច់ដោយឡែក ដូចជា៖ ការទទួលបានការបណ្តុះបណ្តាលពាក់ព័ន្ធនឹង ការរៀបចំទីក្រុង ការគ្រប់គ្រងបរិស្ថាន ការឆ្លើយតបនឹងបម្រែបម្រួលអាកាសធាតុ និងការត្រៀមបង្ការ និងឆ្លើយតបនឹងគ្រោះមហន្តរាយ ព្រមទាំងការទទួលបានជំនួយនានាជាដើម។

ប្រទេសកម្ពុជាមានរាជធានី -ខេត្តចំនួន៤ បានចូលជាសមាជិកនៃAIMFរួចមកហើយគឺ៖ រាជធានីភ្នំពេញ ខេត្តសៀមរាប ខេត្តបាត់ដំបង និងខេត្តកំពត ដែលខេត្តទាំងនេះបានបង្កើត និងរក្សាទំនាក់ទំនងយ៉ាងល្អ ជាមួយសមាជិកបណ្តាញខេត្ត-ក្រុងក្នុងតំបន់ និងសកលលោក ព្រមទាំងទទួលបានចំណេះដឹង បទពិសោធន៍ និងអនុវត្តគម្រោងកិច្ចសហប្រតិបត្តិការនានា ដែលជាផ្នែកមួយធានាដល់ការអភិវឌ្ឍទីក្រុងប្រកបដោយចីរភាព៕

ដោយៈ គង់ ហ្វីអូណា

        កោះកុងៈ អភិបាលរង នៃគណៈអភិបាលខេត្តកោះកុង លោកបណ្ឌិតអ៊ុក ភ័ត្រា បានស្វាគមន៍លោកស្រីAggarwal Aradhna ប្រធានក្រុមសិក្សាស្រាវជ្រាវ កម្មវិធីមហាអនុតំបន់ទន្លេមេគង្គ នៃធនា​គារអភិវឌ្ឍន៍អាស៊ីADB និងមន្រ្តីក្រុមប្រឹក្សាអភិវឌ្ឍន៍កម្ពុជា ដើម្បីជួបប្រជុំពិភាក្សាលើ “ការសិក្សាដើម្បីពង្រឹងប្រសិទ្ធភាព នៃតំបន់សេដ្ឋកិច្ចពិសេស (SEZs) ដោយផ្តោតលើតំបន់សេដ្ឋកិច្ច តាមច្រកព្រំដែន (BEZs) ក្នុងប្រទេសនៃអនុតំបន់ទន្លេមេគង្គ (GMS)”។

គោលបំណងនៃការសិក្សានេះគឺ ដើម្បីវាយតម្លៃឡើងវិញនូវតំប​ន់សេដ្ឋកិច្ចតាមច្រកព្រំដែន (BEZs) និងតំបន់សេដ្ឋកិច្ចតាមច្រកព្រំដែន (BEZs) និងអភិវឌ្ឍគោលនយោបាយ អនុសាសន៍ ដើម្បីតម្រង់ទិសយុទ្ធសាស្រ្តពាក់ព័ន្ធនៅក្នុងតំបន់ ដោយផ្តោតជាពិសេសលើព្រំដែនកម្ពុជា-ថៃ។

លទ្ធផលនៃការសិក្សា នឹងត្រូវរៀបចំដាក់បង្ហាញជូនដល់រដ្ឋភាគី នៃកម្មវិធីមហាអនុតំបន់ទន្លេមេគង្គ ឆ្នាំ២០៣០ នៅក្នុងកិច្ចប្រជុំមន្ត្រីជាន់ខ្ពស់ នៅប្រទេសចិន ក្នុងខែឧសភា ឬមិថុនា ឆ្នាំ២០២៤ ខាងមុខនេះ៕

នាថ្ងៃសៅរ៍ ទី១១ ខែឧសភា ឆ្នាំ២០២៤ នេះ ឧកញ៉ាបណ្ឌិត គីម ហ៊ាង ដឹកនាំបុគ្គលិក បុរី វិមានសំណាង រួមទាំងសប្បុរសជននានា បរិច្ចាគថវិកា ធនធាន និងសម្ភារៈ ក្នុងកិច្ចការសប្បុរសធម៌ជូនដល់ក្មួយៗ លោកគ្រូ និងអ្នកគ្រូ នៅសមាគមជនឥតទីពឹង (មណ្ឌលមែកឈើ) ស្ថិតនៅផ្លូវបេតុង ភូមិលិចវត្ត សង្កាត់កំបូល ខណ្ឌកំបូល រាជធានីភ្នំពេញ ។

ឧកញ៉ាបណ្ឌិត គីម ហ៊ាង បាននាំយកកម្រៃដែលទទួលបានមកពីការបង្រៀនថ្នាក់បណ្ឌិតមុខវិជ្ជា៖ Brand Marketing & SME Stratefy ដោយជោគជ័យ នៅសាកលវិទ្យាល័យ អាសុី អឺរ៉ុប អស់រយះពេល ៤ខែ និងបានដឹកនាំបុគ្គលិក ក្រុមហ៊ុន បុរី វិមានសំណាង និងក្រុមហ៊ុន Keller Williams Cambodia ចូលរួមដើម្បីយកទៅប្រេីប្រាស់លើការកសាងហេដ្ឋារចនាសម្ព័ន្ធនានានៅក្នុងសាលា ឯកសណ្ឋានសិស្ស សម្ភារៈសិក្សា ផងដែរ។

ឆ្លៀតក្នុងឱកាសនោះដែរ ឧកញ៉ាបណ្ឌិត គីម ហ៊ាង ក៏បានផ្តាំផ្ញេី និងលើកទឹកចិត្តដល់ក្មួយៗទាំងអស់ត្រូវខឹកខំប្រឹងប្រែងរៀនសូត្រ ឱ្យខ្លាំងពូកែ ដេីម្បីជាទំពាំងស្នងឬស្សី សម្រាប់បន្តវេនក្នុងការថែរក្សា ការពារជាតិ មាតុភូមិ ក្នុងការចូលរួមអភិវឌ្ឍសេដ្ឋកិច្ច និងប្រទេសជាតិរបស់យេីងទាំងអស់គ្នា ជាពិសេស ជៀសឱ្យឆ្ងាយពីគ្រឿងញៀន និងល្បែងអបាយមុខទាំងឡាយ ដេីម្បីខ្លួនឯង គ្រួសារ និងសង្គមជាតិទាំងមូល៕

គួរបញ្ជាក់ផងដែរថា មូលនិធិសប្បុរសធម៌ របស់លោកឧកញ៉ាបណ្ឌិត គីម ហ៊ាង បានធ្វើឡើងជារៀងរាល់ឆ្នាំ ក្នុងស្មារតីចូលរួមចំណែកផ្តល់ជំនួយគាំទ្រសម្រាប់សម្រាលដល់ការលំបាកចំពោះ អង្គការ សមាគម មណ្ឌលកុមារកំព្រា និងជនងាយរងគ្រោះនានា។