(តូក្យូ-ជប៉ុន)៖ តាមរយៈសិក្ខាសាលាវិនិយោគកម្ពុជា ឆ្នាំ២០២៣ ដែលរៀបចំឡើងនៅទីក្រុងតូក្យូ ប្រទេសជប៉ុន នាព្រឹកថ្ងៃទី១៩ ខែធ្នូ ឆ្នាំ២០២៣នេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន បានលើកឡើងពីសក្តានុពលដ៏អំណាយផលជាច្រើនរបស់កម្ពុជា ដើម្បីទាកទាញដល់វិនិយោគិនជប៉ុន ឱ្យសម្រេចចិត្តបោះទុនបន្ថែមនៅកម្ពុជា។

សិក្ខាសាលាវិនិយោគកម្ពុជា ឆ្នាំ២០២៣ ត្រូវបានសហការរៀបចំដោយសភាពាណិជ្ជកម្មកម្ពុជា អង្គការពាណិជ្ជកម្មក្រៅប្រទេសជប៉ុន ក្រុមប្រឹក្សាអភិវឌ្ឍន៍កម្ពុជា និងធនាគារមិស៊ូហ៊ុ (Mizuho) ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងដោយមានការចូលរួមពីវិនិយោគិនជប៉ុន និងកម្ពុជាផងដែរ។ថ្លែងក្នុងឱកាសនោះអ្នកឧកញ៉ា គិត ម៉េង បានលើកឡើងថា កម្ពុជា និងជប៉ុន មានចំណងមិត្តភាព និងកិច្ចសហប្រតិបត្តិការជាប្រវត្តិសាស្ត្រ យូរលង់ណាស់មកហើយ។ ចាប់តាំងពីការបង្កើតចំណងកាទូតនៅឆ្នាំ១៩៥៣ រហូតមកដល់បច្ចុប្បន្ន ចំណងទាក់ទងប្រទេសទាំងពីរ កាន់រឹងមាំនិង កាន់តែស៊ីជម្រៅ។ ឆ្នាំ២០២៣ គឺជាខួបលើកទី៧០ឆ្នាំ នៃទំនាក់ទំនងកាទូតរវាងកម្ពុជា និងជប៉ុន។ប្រទេសទាំងពីរ បានលើកកម្ពស់ទំនាក់ទំនងទ្វេភាគីទៅជា ភាពជាដៃគូយុទ្ធសាស្ត្រគ្រប់ជ្រុងជ្រោយ ដែលឆ្លុះបញ្ចាំងពីជម្រៅ និងវិសាលភាពនៃកិច្ចសហប្រតិបត្តិការ និងជំនឿទុកចិត្តគ្នាទៅវិញទៅមក ដែលត្រូវបានកសាងអស់រយៈពេលជាច្រើនឆ្នាំមកហើយ។អ្នកឧកញ៉ាបន្ថែមទៀតថា ជប៉ុន គឺដៃគូពាណិជ្ជកម្ម និងវិនិយោគដ៏ធំជាងគេបង្អស់មួយរបស់កម្ពុជា ហើយក៏ជាប្រទេសផ្តល់ជំនួយដ៏ធំជាងគេមួយផងដែរ ដែលបានចូលរួមចំណែកយ៉ាងសំខាន់ដល់ការអភិវឌ្ឍន៍សេដ្ឋកិច្ចសង្គមកម្ពុជា។ គិតត្រឹមខែវិច្ឆិកាឆ្នាំ២០២៣ ជប៉ុនបានវិនិយោគនៅកម្ពុជាក្នុងទំហំទឹកប្រាក់ ២.៩ ពាន់លានដុល្លារអាមេរិក ទៅលើគម្រោងវិនិយោគចំនួន១៥១។

ក្រុមហ៊ុនល្បីឈ្មោះមួយចំនួនរបស់ជប៉ុន ដែលកំពុងមានប្រិតិបត្តិការនៅកម្ពុជារួមមាន៖ Toyota, MinebeaMitsumi, Sumi Wiring, Honda, Canon, AEON Malls, និង Panasonic។ ជប៉ុន គឺជាទីផ្សារនាំចេញដ៏ធំមួយរបស់កម្ពុជាផងដែរ។ ទំហំពាណិជ្ជកម្មទ្វេភាគី បានកើនដល់១.៥ ពាន់លានដុល្លារអាមេរិក ក្នុងរយៈ១០ខែដំបូងនៃឆ្នាំ២០២៣។ ជាងនេះទៅទៀត ជប៉ុន បាននិងកំពង់ផ្តល់នូវជំនួយអភិវឌ្ឍន៍ផ្លូវការមកកម្ពុជា ដោយផ្តោតទៅលើការអភិវឌ្ឍន៍ហេដ្ឋារចនាសម្ព័ន្ធ និងការកសាងសមត្ថភាពធនធានមនុស្ស។ឆ្នាំ២០២៣ គឺជាខួបអនុស្សាវរីយ៍លើកទី ៥០ ឆ្នាំ នៃទំនាក់ទំនងអាស៊ាន-ជប៉ុន ហើយក៏ជាឆ្នាំនៃមិត្តភាពនិងកិច្ចសហប្រតិបត្តិការអាស៊ាន-ជប៉ុនដែរ។ អាស៊ាន និងជប៉ុន មានទស្សនវិស័យរួមសម្រាប់តំបន់ប្រកបដោយ
សន្តិភាព ស្ថិរភាព វិបុលភាព និងធន់នឹងវិបត្តិ ជាតំបន់ដែលបើកចំហរ និងប្រកបដោយបរិយាប័ន្ន ។

កម្ពុជា គឺជាសមាជិកអាស៊ាន និងជាសមាជិកកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ដែលមានទីតាំងយុទ្ធសាស្ត្រ នៅចំបេះដូងនៃតំបន់អាស៊ីអាគ្នេយ៍។ កម្ពុជា គឺជាប្រទេស ដែលមានកំណើនសេដ្ឋកិច្ចលូតលាស់លឿនបំផុតមួយ នៅក្នុងតំបន់ ដោយមានអត្រាកំណើន ៧.៧% ក្នុងមួយឆ្នាំរយៈពេលជាងពីរទសវត្ស។

កម្ពុជា គឺជាចំនុចមូលដ្ឋាន ទីផ្សារទៅកាន់ប្រទេស RCEP។ កម្ពុជាមានទីតាំងដ៏សមស្របបំផុត ជាប់នឹងប្រទេសជិតខាងដែលមានប្រជាជនច្រើន គឺប្រទេសថៃ ៧១លាននាក់ និងវៀតណាម ៩៨លាននាក់។ កម្ពុជា មានកម្លាំងពលកម្មវ័យក្មេង និងពលកម្មជំនាញច្រើន។ជប៉ុន អាចទទួលបានច្រើនយ៉ាងពីកម្ពុជាទាំងទីផ្សារ និងកិច្ចសហប្រតិបត្តិការសេដ្ឋកិច្ច ក៏ដូចជាដៃគូយុទ្ធសាស្ត្រ និងនយោបាយ ដែលអាចជួយជប៉ុន ក្នុងការលើកកម្ពស់តួនាទី និងជំហររបស់ជប៉ុននៅក្នុងតំបន់។ ២៥ ឆ្នាំខាងមុខ គឺជារបត់ថ្មីសម្រាប់កម្ពុជា។

កម្ពុជាបានដាក់ឲ្យប្រើប្រាស់នូវ ច្បាប់ស្តីពីសារពើពន្ធ កាលពីថ្ងៃទី១៦ ខែឧសភា ឆ្នាំ២០២៣។ ច្បាប់នេះ មានគោលដៅ បង្កើតបរិយាកាសវិនិយោគ ដែលមានតម្លាភាពអាចប៉ាន់ស្មានបាន និងអំណោយផលដល់ការវិនិយោគ ក៏ដូចជាបង្ការការគេចពន្ធ។.

ជាងនេះទៅទៀត នៅឆ្នាំ២០២១ ច្បាប់ស្តីវិនិយោគ ត្រូវបានអនុម័ត ដោយមានគោលដៅចម្បង ក្នុងការបង្កើតក្របខណ្ឌគតិយុត្តអំណោយផល ដល់ការវិនិយោគ និងទាក់ទាញការវិនិយោគដែលមានគុណភាព ប្រសិទ្ធភាព និងប្រសិទ្ធផល ដើម្បីគាំទ្រដល់ការអភិវឌ្ឍន៍សេដ្ឋកិច្ចសង្គម។

រាជរដ្ឋាភិបាលកម្ពុជាអាណត្តិទី៧ ក្រោមការដឹកនាំរបស់ សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា ដាក់ចេញនូវយុទ្ធសាស្ត្របញ្ចកោណ ដែលជាផែនការរយៈពេលវែង សំដៅសម្រេចឲ្យបាន កម្ពុជាក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០។

អ្នកឧកញ៉ាបានថ្លែងថា «ខ្ញុំសូមជំរុញលើកទឹកចិត្ត ក្រុមហ៊ុនជប៉ុន និងកម្ពុជាស្វែងរកដៃគូ និងវិនិយោគបន្ថែមនៅកម្ពុជា។ ដើម្បីជំរុញសកម្មភាពធុរកិច្ច និងទេសចរណ៍ ខ្ញុំសូមជំរុញក្រុមហ៊ុន ANA បើកការហោះហើរត្រង់ឡើងវិញពីជប៉ុនមកកម្ពុជា»។

ជាមួយគ្នានេះ អ្នកឧកញ៉ាប្រធានសភាពាណិជ្ជកកម្ពុជា បានចាត់ទុកការរៀបចំសិក្ខាសាលវិនិយោគកម្ពុជានេះ គឺជាពេលវេលាដ៏សមស្របបំផុត ក្នុងការផ្លាស់ប្តូរទស្សនៈនិងព័ត៌មាន ស្វែងរកកាលា-នុវត្តភាពថ្មីនិងសក្តានុពល និងចាប់ដៃគូថ្មី ហើយសិក្ខាសាលានេះនឹងដើរតួជា គ្រឿងជំរុញ លំហូរពាណិជ្ជកម្មនិងវិនិយោគ កិច្ចសហប្រតិបត្តិការធុរកិច្ចនិងនវានុវត្តន៍ និង ការយោគយល់គ្នាទៅវិញទៅមក និងមិត្តភាពរវាងប្រទេសទាំងពីរ៕

ដោយ: គង់ លាងហួរ

តូក្យូ: នាយករដ្ឋមន្ត្រីថៃ លោក សេដ្ឋា ថាវីស៊ីន បានបង្ហាញផែនការលើកកម្ពស់វិស័យទេសចរណ៍រវាងប្រទេសថៃ កម្ពុជា វៀតណាម និងឡាវ  បន្ទាប់ពីបានជួបថ្នាក់ដឹកនាំ នៃប្រទេសទាំង៣កាលពីថ្ងៃអាទិត្យ ទី១៧ ខែធ្នូ។

កិច្ចប្រជុំរបស់លោក សេដ្ឋា ថាវីស៊ីនជាមួយភាគីកម្ពុជា វៀតណាម និងឡាវបានធ្វើឡើង នៅក្រៅកិច្ចប្រជុំកំពូលនៅទីក្រុងតូក្យូ ដើម្បីរំលឹកខួប៥០ឆ្នាំ នៃកិច្ចសហប្រតិបត្តិការរបស់ប្រទេសជប៉ុន ជាមួយបណ្តាប្រទេសសមាជិកអាស៊ាន។

លោក សេដ្ឋា បានមានប្រសាសន៍ឱ្យដឹងថា ក្នុងកិច្ចពិភាក្សាជាមួយលោក Võ Văn Thưởng ប្រធានរដ្ឋវៀតណាម ភាគីទាំងពីរបានឯកភាពគ្នា ក្នុងការស្តារឡើងវិញ នូវកិច្ចប្រជុំគណៈរដ្ឋមន្ត្រីរវាងប្រទេសទាំងពីរ ហើយភាគីវៀតណាម​ បាន​ស្នើ​សុំធ្វើ​ជា​ម្ចាស់​ផ្ទះ​នៃ​កិច្ច​ប្រជុំ​នេះនៅ​ខែ​ឧសភា​ ឆ្នាំ​២០២៤។ក្នុងកិច្ចពិភាក្សានោះ លោក Võ Văn Thưởng បានស្នើឱ្យប្រ​ទេសថៃ វៀតណាម ឡាវ និងកម្ពុជា ចាត់វិធានការដើម្បីលើកកម្ពស់វិស័យទេសចរណ៍ ប្រកបដោយភាពរលូន ដើម្បីអនុញ្ញាតឱ្យភ្ញៀវទេស​ចរ អាចធ្វើដំណើរទៅមករវាងប្រទេសទាំង៤ ដោយពុំចាំបាច់កាន់ទិដ្ឋាការដាច់ដោយឡែក។

ជាការឆ្លើយតប លោក សេដ្ឋា ថាវីស៊ីន បានលើកសរសើរគំនិតនេះថា ជាគំនិតច្នៃប្រឌិត ដោយលោកបន្ថែមថា លោកនឹងបញ្ជាដល់រដ្ឋមន្ត្រីក្រសួងទេសចរណ៍ថៃ  ឱ្យពិភាក្សាអំពីបញ្ហានេះ និងធ្វើការដើម្បីជំរុញវិស័យទេសចរណ៍រវាងប្រទេសទាំង៤។ក្នុងកិច្ចពិភាក្សាជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោក សេដ្ឋា បានលើកឡើងពីបញ្ហាមួយចំនួន រួមទាំងការបង្កើតស្ថានកុងស៊ុលថៃ ប្រចាំខេត្តសៀមរាប ដើម្បីសម្រួលលំហូរនៃភ្ញៀវទេសចរ ដែលចូលមកទស្សនាប្រាសាទអង្គរវត្ត។

ជាមួយគ្នានេះ សម្តេចធិបតី ហ៊ុន ម៉ាណែត ក៏បានថ្លែងអំណរគុណដល់លោក សេដ្ឋា ថាវីស៊ីន ចំពោះការផ្ដល់ការថែទាំដល់ពលករខ្មែរ ដែលកំពុងធ្វើការនៅក្នុងប្រទេសថៃផងដែរ៕The Nation៕

ដោយៈ ជេស៊ីកា

ភ្នំពេញៈ ស្របពេលស្ថានភាពទីផ្សារ នៅតែមិនទាន់មានភាពច្បាស់លាស់ វិបត្តិសេដ្ឋកិច្ចសកល និងបញ្ហាប្រឈមធំៗរបស់ពិភពលោក នៅតែមិនអាចទស្សន៍ទាយបាន ទីផ្សារអចលនទ្រព្យកម្ពុជាអាចពិបាកនឹងងើបឡើងឬយ៉ាងណា?។

ការវិភាគលើបញ្ហាផ្ទៃក្នុងកម្ពុជា និងកត្តាខាងក្រៅ បាននិងកំពុងអាចវាយតម្លៃបានថា ទីផ្សារអចលនទ្រព្យនៅប្រទេសនេះ កំពុងតែស្ថិតនៅក្នុងសភាពមិនច្បាស់លាស់ សម្រាប់ឆ្នាំ២០២៤ខាងមុខ។
លោកប៉ូ អ៊ាវគង់ អគ្គនាយកក្រុមហ៊ុនAdvance Real Estate Co, Ltdបានផ្តល់ការវិភាគលើមូលដ្ឋានមួយចំនួន ដែលអ្នកវិនិយោគ និងប្រជាពលរដ្ឋគួរពិចារណា។
លោកបានមានប្រសាសន៍ឲ្យដឹង តាមបណ្តាញតេឡេក្រាមកាលពីព្រឹកថ្ងៃខច័ន្ទ ដើមសប្តាហ៍នេះថា យោងទៅលើសូចនាករមួយចំនួន ដែលមើលឃើញនៅក្នុងស្ថានភាពកម្ពុជា និងឥទ្ឋិពលពីខាងក្រៅ ជាមួយតម្លៃប្រេងឥន្ឋនៈ គឺនៅតែឡើងខ្ពស់សម្រាប់កម្ពុជា និងពិភពលោក ដែលកត្តានេះធ្វើឲ្យតម្លៃដើម នៃការផលិតនៅតែមានតម្លៃថ្លៃ និងអតិផរណានៅតែមានកម្រិតខ្ពស់។ តាមការព្យាករណ៍កំណើនសេដ្ឋកិច្ចពិភពលោក ពីស្ថាប័នអន្តរជាតិធំៗសម្រាប់ឆ្នាំ២០២៤ គឺមានកំណើនក្នុងរង្វង់តែ២,៥ភាគរយ ខណៈឆ្នាំ២០២៣នេះ ការព្យាករណ៍សេដ្ឋកិច្ចសកលបានថមថយពី៣,៣ភាគរយ មកត្រឹម២,៩ ទៅកំណើន៣ភាគរយប៉ុណ្ណោះ។

លោកប៉ូ អ៊ាវគង់បានបន្តថា រឿងដែលនាំឲ្យមានបញ្ហាប្រឈមមួយទៀត គឺលំហូរវិនិយោគផ្ទាល់ពីបរទេស(FDI) មកកម្ពុជា មិនទាន់មានសញ្ញាមានកំណើនផងដែរ ហើយបើមើលការគាំទ្រផ្នែកហិរញ្ញវត្ថុពីរដ្ឋាភិបាល និងក្រសួងពាក់ព័ន្ឋនានា មិនទាន់មានកញ្ចប់ជម្រុញ​ណា​មួយនោះដែរ។ លោកបន្តថា យើងទទួលបានការលើកទឹកចិត្តមួយចំនួន ជាការបន្ឋូរទីផ្សារ ការបន្តលើកលែងពន្ឋលើប្រាក់ចំណេញមូលធន មិនយកពន្ឋលើលំនៅដ្ឋាន ដែលមានតម្លៃ៧០,០០០ដុល្លារចុះជាដើម។ លោកបន្តថា ជាមួយគ្នានេះ បញ្ហានៅប្រទេសវៀតណាម ចិន ជាដើម ជាកត្តាសំខាន់ដែលមិនអាចទាក់ទាញ និងរុញកំណើននៃការវិនិយោគមកកម្ពុជានៅឡើយ ដែលនេះសុទ្ឋតែជាបញ្ហាប្រឈម ដែលអំណាចនៃការទិញក្នុងទីផ្សារ នៅតែពឹងលើតម្រូវការរបស់អ្នកក្នុងស្រុកនៅឡើយ។ លោកបញ្ជាក់ទៀតថា “ចំណុចនៃផលប៉ះពាល់ទាំងនេះ នឹងធ្វើឲ្យអំណាចនៃការទិញមានភាពទន់ខ្សោយ ដោយមិនមានសញ្ញាកើនឡើងយ៉ាងគំហុកណាមួយទេ”។ លោកបន្តថា “ទីផ្សារមិនទាន់មានភាពរ៉ឹងមាំ និងមានភាពប្រទាញប្រទង់ ដែលនៅតែមានបញ្ហាប្រឈ​ម”។

លោកប៉ូ អ៊ាវគង់បានបន្តទៀតថា ទីផ្សារដែលពឹងតែតម្រូវការក្នុងស្រុក នឹងមានកំណើនមានដែនកំណត់ ហើយបើសិនជាមានសំពាធពីអន្តរជាតិបន្ថែមទៀត នឹងអាចធ្វើឲ្យតម្លៃទីផ្សារធ្លាក់ចុះបន្ថែមទៀត។ លោកបន្តថា ភាពធន់នៃសេដ្ឋកិច្ចរបស់យើង និងការជម្រុញពីរដ្ឋាភិបាលលើកំណើនសេដ្ឋកិច្ច នឹងមិនបានផលភ្លាមៗនោះទេ វាត្រូវការពេលរយៈពេល២ទៅ៣ឆ្នាំ ប៉ុន្តែបើស្ថានភាពល្អ អ្វីៗអាចនឹងប្រសើរនៅចុងឆ្នាំ២០២៤ និងដើមឆ្នាំ២០២៥។

ទោះជាយ៉ាងណា លោកអ៊ាវគង់បានចង្អុលបង្ហាញថា ក្នុងស្ថានភាពនេះ បើសិនជាអ្នកវិនិយោគមានលុយក្នុងដៃ មានលំហូរសាច់ប្រាក់ល្អ គួរតែវិនិយោគ ព្រោះឆ្នាំ២០២៤​ អាចនឹងមានអចលនទ្រព្យមានតម្លៃល្អកាន់តែច្រើន ធៀបនឹងឆ្នាំ២០២៣ ដោយស្ថានភាពអាចមានហានិភ័យខ្ពស់ ប៉ុន្តែក៏អាចមានផលចំណេញច្រើន។

 ក្រសួងសេដ្ឋកិច្ច និងហិរញ្ញវត្ថុបានព្យាករណ៍កំនើនសេដ្ឋកិច្ចកម្ពុជាអាចនឹងសម្រេចបាន៦,១ភាគរយនៅឆ្នាំ២០២៤ ដោយសារការកើនឡើងនូវវិស័យដែលជាកំលាំងចលករ ក្នុងការជម្រុញកំនើនសេដ្ឋកិច្ចសំខាន់ៗ ប៉ុន្តែសម្រាប់ទីផ្សារអចលនទ្រព្យ នៅតែរក្សាកំណើនយឺតយ៉ាវដដែល។

 ទោះជាយ៉ាងណា លោកឧកញ៉ាចេង ខេងប្រធានអគ្គនាយកក្រុមហ៊ុនCPLបានមានប្រសាសន៍ឲ្យដឹង កាលពីសប្តាហ៍មុនថា ទីផ្សា​រអចលនទ្រព្យ នឹងមានភាពប្រសើរឡើងនៅឆ្នាំ២០២៤ ដោយសារធនាគារនានានឹងបញ្ចេញ ឥណទានសម្រាប់វិស័យនេះ ដោយលោកហៅស្ថានភាពនេះ ប្រៀបដូចជាមនុស្សស្រេកទឹកខ្លាំង និងត្រូវបានគេផ្តល់ទឹកឲ្យផឹក។ លោកបន្តថា “ទីផ្សារដីធ្លីនឹងងើបឡើងវិញ នៅតំបន់មួយចំនួន ពិសេសតំបន់ជាយរាជធានីភ្នំពេញ”៕

ដោយៈ គង់ សូរិយា

ភ្នំពេញៈ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លោកសាយ សំអាល់បានជម្រុញឲ្យវិស្វករ ស្ថាបត្យករសិក្សាពីការសាងសង់លំនៅដ្ឋានឲ្យបានតម្លៃទាប និងធានាបាននូវនិរន្តរភាពបរិស្ថាន។

លោកសាយ សំអាល់បានមានប្រសាសន៍ ក្នុងសន្ទរកថាមួយ ដែលត្រូវបានផលិតជាវីដេអូ និងបានបង្ហោះលើបណ្តាញទំនាក់ទំនងសង្គមកាលពីចុងសប្តាហ៍មុនថា បងប្អូនស្ថានបត្យករ វិស្វករ អាចសិក្សាលំនៅដ្ឋានថា ធ្វើពីឈើ ថ្ម ឬយ៉ាងណានៅតំបន់ជនបទ ដែលមានតម្លៃត្រឹម១០,០០០ដុល្លារ តែមានអាយុកាលប្រើប្រាស់បាន៥០ឆ្នាំ ដែលជាផ្ទះមានដំបូល ហើយម្ចាស់ផ្ទះមានការងារធ្វើ មានប្រាក់ខែសមរម្យ និងកូនទៅរៀនបានឬទេ?។លោកបន្តថា “ស្ថាបត្យករ វិស្វករ ត្រូវគិតពីសេដ្ឋកិច្ចដែរ កុំគិតតែពីការគូ កុំគិតតែពីការសង់”។ លោកបន្តថា “ខ្ញុំឧទាហរណ៍ថា ផ្ទះហ្នឹងតម្លៃ១៥,០០០ដុល្លារវិញ តើមន្រ្តីរាជការ អ្នកភូមិរបស់គាត់ ក្នុងមួយជីវិតរបស់គាត់អាចបង់រំលស់ និងអាចមានកម្មសិទ្ឋស្របច្បាប់បានឬអត់? តែធ្វើយ៉ាងណាត្រូវបញ្ចូលគោលការណ៍បរិស្ថាននៅក្នុងនោះ”។

លោកសាយ សំអាល់បានបន្តថា តើគួរធ្វើបែបណា ដើម្បីកុំឲ្យអស់ថ្លៃភ្លើងច្រើន ព្រោះពេលថ្ងៃលិចកំដៅចេញមក ចឹងគឺមានដំបូល និងសាងសង់ខ្ពស់ផុតពីដីគឺត្រជាក់ហើយ។ លោកបន្តថា តើជញ្ជាំងផ្ទះធ្វើកំពស់២០សង់ទីម៉ែត្រ ឬ១០សង់ទីម៉ែត្របាន? ធ្វើយ៉ាងណាឲ្យមានភាពរ៉ឹងមាំ និងសន្សំសំចៃ?៕

ដោយៈ គង់ សូរិយា

ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងក្រុមហ៊ុនកូរ៉េបានបើកកិច្ចប្រជុំពិនិត្យវឌ្ឍនភាព គម្រោងលើកកម្រិតផ្លូវជាតិលេខ៤៨ និងជំរុញផែនការអនុវត្ត សំដៅពន្លឿនការងារសាងសង់នៅក្នុងរដូវប្រាំងនេះ។

កិច្ចប្រជុំកាលពីសប្តាហ៍មុន បានដឹកនាំដោយលោកសូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងលើកកម្រិតផ្លូវជាតិលេខ៤៨ បានដឹកនាំកិច្ចប្រជុំពិនិត្យវឌ្ឍនភាពគម្រោង និងជំរុញផែនការអនុវត្តគម្រោងនៅរដូវប្រាំងនេះ។កិច្ចប្រជុំនេះ មានការចូលរួមពីថ្នាក់ដឹកនាំ អង្គភាពពាក់ព័ន្ធ ព្រមទាំងក្រុមការងារបច្ចេកទេស របស់ក្រុមហ៊ុនសាងសង់កូរ៉េ ILSUNG & HANIL Joint Venture និងក្រុមហ៊ុនទីប្រឹក្សាបច្ចេកទេស KCI & KECC Joint Venture ផងដែរ។កិច្ចប្រជុំនេះ មានគោលបំណងពិនិត្យមើលវឌ្ឍនភាព ស្ថានភាពជាក់ស្តែងនៃការអនុវត្តគម្រោង ដោយជំរុញផែនការអនុវត្ត និងទិសដៅការងារបន្ត សំដៅពន្លឿនការងារសាងសង់ នៅក្នុងរដូវប្រាំងនេះ ឱ្យសម្រេចបានតាមផែនការគម្រោងដែលបានកំណត់។ លោករដ្ឋលេខាធិការ បានក្រើនរំលឹកដល់ក្រុមហ៊ុនសាងសង់ឱ្យយកចិត្តទុកដាក់ខ្ពស់ ទៅលើតាមបទដ្ឋានបច្ចេកទេស មិនមានភាពចន្លោះប្រហោង សំដៅធ្វើឱ្យខ្សែផ្លូវនេះមានគុណភាព អាចប្រើប្រាស់បានយូរអង្វែង និងក៏ត្រូវយកចិត្តទុកដាក់ផងដែរ លើបញ្ហាសុវត្ថិភាពចរាចរណ៍តាមការដ្ឋានសាងសង់ ដោយធ្វើការបំពាក់គ្រឿងបរិក្ខារសុវត្ថិភាពឱ្យបានគ្រប់គ្រាន់ ជាពិសេសនៅពេលយប់ និងត្រូវឧស្សាហ៍ស្រោចទឹកការពារហុយធូលី ជាពិសេសនៅតំបន់ទីប្រជុំជន ។

លោកសូរ វ៉ិកទ័រក៏បានណែនាំឱ្យក្រុមហ៊ុន ទីប្រឹក្សាបច្ចេកទេស និងក្រុមហ៊ុនសាងសង់ ធ្វើការសហការគ្នា ដើម្បីអាចបញ្ចប់ការងារសាងសង់បាននៅចុងខែមេសា ឆ្នាំ២០២៥ ខាងមុខ៕

ដោយ: គង់ លាងហួរ
បាងកក: ប្រទេសថៃកំពុងឆ្ពោះទៅសម្រេចបានគោលដៅរបស់ខ្លួន ក្នុងការស្រូបទាញភ្ញៀវទេសចរបរទេសឱ្យបាន២៨លាននាក់នៅឆ្នាំនេះ ដោយសារការកើនឡើងនៃភ្ញៀវទេសចរមកពីម៉ាឡេស៊ី ដែលជួយទប់ទល់នឹងការងើបឡើងវិញដ៏យឺតនៅក្នុងទីផ្សារប្រទេសចិន ដែលជាប្រភពដ៏ធំបំផុតនៃអ្នកធ្វើដំណើរចូលប្រទេសថៃ មុនជំងឺកូវីដ-១៩។

គិតមកទល់ពេលនេះ ការចូលមកដល់សរុបនៃភ្ញៀវទេសចរបរទេស បានកើនឡើងដល់លើស២៥លាននាក់  ដោយក្នុងនោះ ចំនួនអ្នកធ្វើដំណើរមកពីម៉ាឡេស៊ីបានកើនឡើងជាងទ្វេរដងដល់៤លាននាក់បើធៀបនឹងឆ្នាំមុន។នេះបើយោងតាមក្រសួងទេសចរណ៍ និងកីឡារបស់ប្រទេសថៃ។ទិន្នន័យបានបង្ហាញថា ភ្ញៀវទេសចរចិនប្រហែលា៣,១លាននាក់បានទៅលេងប្រទេសថៃ គិតមកទល់ពេលនេះក្នុងឆ្នាំ២០២៣ ដោយទទួលបានចំណាត់ថ្នាក់ទី២ និងកើនឡើងពី២៧៣.៥៦៧នាក់ ក្នុងឆ្នាំ២០២២។ ចំនួនភ្ញៀវទេសចរចិនសរុប ដែលចូលមកលេងប្រទេសថៃនៅឆ្នាំនេះត្រូវបានគេរំពឹងថា នឹងមិនអាចឈានដល់គោលដៅដែលរដ្ឋាភិបាលថៃបានដាក់ចេញចន្លោះពី៤ ទៅ៤,៤លាននាក់នោះឡើយ។

សម្រាប់ឆ្នាំ២០២៤វិញ អាជ្ញាធរទេសចរណ៍ថៃ(TAT) រំពឹងថា ភ្ញៀវទេសចរបរទេសចំនួន៣៥លាននាក់ នឹងចូលមកទស្សនាប្រទេសថៃ ដែលក្នុងនោះភ្ញៀវទេសចរចំនួន៨,២លាននាក់មកពីប្រទេសចិន។

ផ្ទុយទៅវិញ  លោក Sirilak Konwai អ្នកវិភាគនៅក្រុមហ៊ុន Krungsri Securities Pcl បានបញ្ជាក់នៅក្នុងរបាយការណ៍មួយថា  ការមកដល់របស់ភ្ញៀវទេសចរបរទេសសរុបអាចឈានដល់ត្រឹមតែ៣៣លាននាក់ប៉ុណ្ណោះ ក្នុងឆ្នាំ២០២៤ ដោយសារតែការកើនឡើងយឺតនៃចំនួនភ្ញៀវទេសចរចិន ស្របពេលមានបញ្ហាសេដ្ឋកិច្ចនៅក្នុងស្រុក។

នាយករដ្ឋមន្ត្រីថៃ លោក សេដ្ឋា ថាវីសុីន កំពុងពឹងផ្អែកលើវិស័យទេសចរណ៍ ដើម្បីពន្លឿនកំណើនសេដ្ឋកិច្ចរបស់ប្រទេសថៃ ដោយវិស័យនេះគ្របដណ្តប់ប្រហែល ១២% នៃផលិតផលក្នុងស្រុកសរុប និងស្មើជិតមួយភាគប្រាំនៃការងារសរុបក្នុងប្រទេស។

រដ្ឋាភិបាលថៃបានលើកលែងទិដ្ឋាការជាបណ្ដោះអាសន្នសម្រាប់អ្នកធ្វើដំណើរមកពីប្រទេសចិន រុស្ស៊ី កាហ្សាក់ស្ថាន ឥណ្ឌា និងតៃវ៉ាន់ ហើយបានបញ្ជាឱ្យក្រុមហ៊ុនអាកាសចរណ៍បើកផ្លូវហោះហើរបន្ថែមទៀត និងសម្រួលប្រតិបត្តិការនៅអាកាសយានដ្ឋានដើម្បីកាត់បន្ថយពេលវេលារង់ចាំសម្រាប់ភ្ញៀវទេសចរ៕

ដោយ: គង់ លាងហួរ

ប៉េកាំង: វិបត្តិអចលនទ្រព្យរបស់ប្រទេសចិន បាននិងកំពុងបន្តប្រឈមមុខនឹងបញ្ហាជាច្រើន ស្របពេលទីផ្សារនេះរំពឹងងើបឡើងវិញ​នៅមានសភាពមិនច្បាស់លាស់ ប៉ុន្តែសំនួរសួរថា តើប្រទេសមហាអំណាចសេដ្ឋកិច្ចទី២របស់ពិភពលោកនេះ ត្រូវចំណាយពេលយូរប៉ុណ្ណាដើម្បីដោះស្រាយ?។

លោកស្រី Louise Loo សេដ្ឋវិទូជាន់ខ្ពស់នៅក្រុមហ៊ុន Oxford Economics បានលើកឡើងថា ប្រទេសចិនមានបញ្ហាធំមួយនៅក្នុងវិស័យអចលនទ្រព្យ ដែលនឹងចំណាយពេលច្រើនឆ្នាំ ដើម្បីដោះស្រាយ។

ដោយក្រឡេកមើលទិន្នន័យ នៅទូទាំងប្រទេសចិន ដោយផ្អែកលើការប៉ាន់ប្រមាណជាផ្លូវការនៃផ្ទះ ដែលមិនទាន់លក់ចេញ ឬសមាមាត្រ សំណង់ធៀបទៅនឹងការលក់ លោកស្រី Loo បានរកឃើញថា  អ្នកអភិវឌ្ឍន៍អចលនទ្រព្យ ក្នុងប្រទេសចិននឹងត្រូវចំណាយពេលយ៉ាងហោចណាស់ពី៤ទៅ៦ឆ្នាំ ដើម្បីបញ្ចប់ការសាងសង់គម្រោងលំនៅដ្ឋាន ដែលជាប់គាំងរបស់ពួកគេ។

លោកស្រី Loo បានបញ្ជាក់ឱ្យដឹងនៅក្នុងរបាយការណ៍មួយថា “ទោះជាយ៉ាងណាក្តី  ការផ្គត់ផ្គង់ដ៏ច្រើនលើសលប់ ដែលមានស្រាប់នៅក្នុងទីផ្សារអចលនទ្រព្យចិន ទំនងជាត្រូវចំណាយពេលយ៉ាងហោចណាស់៤ឆ្នាំទៀតដើម្បីថមថយចុះ”។

លោកស្រី Loo បានបញ្ជាក់នៅក្នុងសារអ៊ីមែលថា ការសាងសង់លំនៅដ្ឋាននៅក្នុងខេត្ត Guizhou ដែលជាខេត្តក្រីក្រមួយនៅប្រទេសចិន អាចចំណាយពេលលើសពី២០ឆ្នាំដើម្បីបញ្ចប់ ខណៈសំណង់លំនៅដ្ឋាន នៅក្នុងខេត្តផ្សេងទៀត ដូចជា ខេត្តJiangxi និងខេត្ត Hebeiនឹងចំណាយពេលយ៉ាងហោចណាស់១០ឆ្នាំ ។កាលពីខែមុន ក្រុមហ៊ុនហិរញ្ញវត្ថុ Nomura បានប៉ាន់ប្រមាណថា ទំហំផ្ទះដែលមិនទាន់សាងសង់រួចរាល់ និងត្រូវបានដាក់លក់ជាមុននៅក្នុងប្រទេសចិន ស្មើនឹងប្រហែល២០ដង នៃទំហំរបស់ក្រុមហ៊ុនអភិវឌ្ឍន៍អចលនទ្រព្យ Country Garden គិតត្រឹមចុងឆ្នាំ២០២២។

ទោះបីជាមានបញ្ហាធ្ងន់ធ្ងរ នៃទីផ្សារអចលនទ្រព្យនៅក្នុងប្រទេ​សចិនបែបនេះយ៉ាងណាក្តី លោកស្រី Louise Loo មិនរំពឹងថា វានឹងជះឥទ្ធិពលរាលដាលខ្លាំង គួរឱ្យកត់សម្គាល់ដល់ប្រទេសផ្សេងទៀតនោះឡើយ។

លោកស្រីបន្ថែមថា ការធ្លាក់ចុះនៃវិស័យលំនៅដ្ឋាន របស់ប្រទេ​សចិននឹងដើរលើផ្លូវខុសពីសហរដ្ឋអាមេរិក អេស្បាញ ឬអៀរឡង់កាលពី១០ទៅ១៥ ឆ្នាំមុន ហើយវាទំនងជាមិនអាចបង្កឱ្យមានវិបត្តិហិរញ្ញវត្ថុទូលំទូលាយនោះទេ។

ចំណែក ក្រុមហ៊ុន S&P Global Ratings  បានគូសបញ្ជាក់ថា យើងមើលឃើញភាពស្រដៀងគ្នា មួយចំនួនរវាងស្ថានភាពរបស់ប្រទេសចិននាពេលនេះ និងការជាប់គាំងសេដ្ឋកិច្ច នៅក្នុងប្រទេសជប៉ុន បន្ទាប់ពីពពុះអចលនទ្រព្យនៅជប៉ុន បានផ្ទុះឡើងក្នុងឆ្នាំ១៩៩១។

ទោះជាយ៉ាងណាក្តី ក្រុមហ៊ុន S&P Global Ratings ជឿជាក់ថា ប្រទេសចិនអាចបញ្ចៀសលទ្ធផលបែបនេះ ដោយសារសកម្មភាពបទប្បញ្ញត្តិ និងភាពរឹងមាំនៃវិស័យធនាគារ និងសាជីវកម្មរបស់ខ្លួន៕

ដោយ: គង់ លាងហួរ

តូក្យូៈ ប្រទេសជប៉ុន និងសមាគមប្រជាជាតិអាស៊ីអាគ្នេយ៍បានព្រមព្រៀងគ្នាកាលពីថ្ងៃអាទិត្យ ដើម្បីពង្រឹងទំនាក់ទំនងក្នុងវិស័យសន្តិសុខ និងសេដ្ឋកិច្ចឱ្យកាន់តែស៊ីជម្រៅ ខណៈបរិយាកាសភូមិសាស្ត្រនយោបាយកំពុងប្រែប្រួល ដោយសារការកើនឡើងនៃឥទ្ធិពលចិន។

តាមរយៈ“សេចក្តីថ្លែងការណ៍រួមនៃចក្ខុវិស័យ” ដែលបានចេញផ្សាយបន្ទាប់ពីកិច្ចប្រជុំ រំលឹកខួប​ទំនាក់ទំនងការទូត​៥០ឆ្នាំ រវាង​​ជប៉ុន​-អាស៊ាននៅទីក្រុងតូក្យូ ក្រុមថ្នាក់ដឹកនាំជប៉ុន និងអាស៊ាន បានប្តេជ្ញាបង្កើនកិច្ចសហប្រតិបត្តិការ លើសន្តិសុខដែនសមុទ្រ ពង្រឹងខ្សែសង្វាក់ផ្គត់ផ្គង់ លើកកម្ពស់ការអនុវត្តថាមពល ប្រកបដោយនិរន្តរភាព និងពង្រីកការផ្លាស់ប្តូររវាងប្រជាជន និងប្រជាជនក្នុងវិស័យផ្សេងៗទៀត។សេចក្តីថ្លែងការណ៍បានបង្ហាញថា ក្រុមថ្នាក់ដឹកនាំ បានសន្យាគាំទ្រ ដល់ក្រុមហ៊ុនទើបចាប់ផ្តើមបើកអាជីវកម្មថ្មី ដែលផ្អែកលើឌីជីថល ក៏ដូចជាការពន្លឿនការវិនិយោគសាធារណៈ និងឯកជន ដើម្បីសម្រេចបាន ការកាត់បន្ថយឧស្ម័នកាបូនឌីអុកស៊ីត នៅក្នុងបរិយាកាស។

នាយករដ្ឋមន្ត្រីជប៉ុន លោក Fumio Kishida ត្រូវបានដកស្រង់សម្តីដោយរដ្ឋាភិបាលរបស់លោក ដោយអះអាងថា ប្រទេសជប៉ុននឹងចាត់វិធានការណ៍ ដើម្បីកៀងគរមូលនិធិសាធារណៈ និងឯកជនជាង៣៥ពាន់លានដុល្លារ ក្នុងរយៈពេល៥ឆ្នាំខាងមុខ ដើម្បីសម្រួលដល់ការវិនិយោគក្នុងតំបន់អាស៊ាន ព្រមទាំងជំរុញការផ្លាស់ប្តូរមេដឹកនាំអាជីវកម្មវ័យក្មេងជាមួយតំបន់អាស៊ានផងដែរ។​ក្រុមថ្នាក់ដឹកនាំជប៉ុន និងអាស៊ាន ក៏បានប្រកាសពីការចាប់ផ្តើមគំនិតផ្តួចផ្តើមថ្មីមួយ សម្រាប់ឧស្សាហកម្មរថយន្តជំនាន់ថ្មី ដោយសំដៅរៀបចំផែនការយុទ្ធសាស្រ្ត ដើម្បីអាចឱ្យអាស៊ានបន្តដើរតួជាមជ្ឈ​មណ្ឌលផលិតកម្ម និងនាំចេញរថយន្តដ៏ធំនៅលើពិភពលោក។

លោក Kishida បានថ្លែងនៅក្នុងសន្និសីទសារព័ត៌មាន បន្ទាប់ពីកិច្ចប្រជុំបានបញ្ចប់ថា “ដោយផ្អែកលើការជឿទុកចិត្តគ្នាទៅវិញ ទៅមកដ៏រឹងមាំ ប្រទេសជប៉ុន និងអាស៊ាននឹងដោះស្រាយបញ្ហាប្រឈមថ្មីៗ  ដោយបន្ថែមថា លោករីករាយ ដែលភាគីទាំង២ នឹងបោះជំហានថ្មីឆ្ពោះទៅកាន់រយៈពេល៥០ឆ្នាំខាងមុខទៀត”។

ប្រទេសជប៉ុនបានចាត់ទុក ទំនាក់ទំនងរបស់ខ្លួនជាមួយតំបន់អាស៊ានថា ជាយុទ្ធសាស្ត្រដ៏សំខាន់ ដោយសារប្លុកនេះប្រឈមមុខនឹងបញ្ហាជាមួយចិននៅសមុទ្រចិនខាងត្បូង ដែលជាទីតាំងនៃផ្លូវសមុទ្រដ៏មមាញឹកបំផុតមួយនៅលើពិភពលោក៕Kyodo News៕

ដោយ: គង់ លាងហួរ

អន្តរជាតិ: យោងតាមសារពត៌មាន The edge malaysia បានចុះផ្សាយថា ការ​លក់​ផ្ទះ​ឯកជន​របស់​ប្រទេសសិង្ហបុរី ​បាន​ស្ទុះ​ងើប​ឡើង​វិញ ​ដល់​កម្រិត​ខ្ពស់​បំផុត​ក្នុងរយៈពេល៤ខែ នៅខែវិច្ឆិកា ស្របពេលដែលការសម្រុកផ្គត់ផ្គង់ថ្មីកំពុងកើនឡើង។

យោងតាមតួលេខ ដែលបានចេញផ្សាយកាលពីថ្ងៃសុក្រ ទី១៥ ខែធ្នូ ដោយអាជ្ញាធរអភិវឌ្ឍន៍ទីក្រុង(URA) បានឱ្យដឹងថា ការទិញអាផាតម៉ិនថ្មី បានកើនឡើងជិត៤ដង ដល់ចំនួន៧៨៤យូនីតក្នុងខែវិច្ឆិកា បើធៀបនឹង២០៣យូនីត ក្នុងតុលា។

ការស្ទុះងើបឡើងវិញ នៃការ​លក់​ផ្ទះ​ឯកជន​ របស់​ប្រទេសសិង្ហបុរី ត្រូវបានគេរំពឹងទុកយ៉ាងខ្ពស់ បន្ទាប់ពីគម្រោងលំនៅដ្ឋានថ្មីៗជាច្រើន ដែលបានបើកដំណើរការកំពុងមានតម្រូវការជាខ្លាំង។

តម្រូវការក្នុងស្រុកដ៏រ៉ឹងមាំ បានបន្តជំរុញទីផ្សារលំនៅដ្ឋានរបស់សិង្ហបុរី ដែលជាប្រទេសមានភាពធន់ និងមានតម្លៃថ្លៃបំផុតមួយក្នុងពិភពលោក បើទោះបីជាមានការដំឡើងអត្រាការប្រាក់ និងវិធានការទប់ស្កាត់ជាបន្តបន្ទាប់យ៉ាងណាក្តី។

ទោះជាយ៉ាងនេះក្តី គេនៅតែសង្កេតឃើញមានសញ្ញាដែលបង្ហាញថា ទីផ្សារកំពុងធ្លាក់ចុះ ជាពិសេស  តម្រូវការពីជនបរទេសបានរងផលប៉ះពាល់ ដោយសារកាលពីខែមេសាកន្លងទៅ រដ្ឋាភិបាលសិង្ហបុរីបានដំឡើងពន្ធទ្វេរដង ដល់៦០%សម្រាប់ជនបរទេស ដែលមកទិញអចលនទ្រព្យ ជាលក្ខណៈឯកជននៅក្នុងប្រទេសរបស់ខ្លួន។

អតិថិជនបរទេស បានគ្របដណ្តប់ប្រហែល៤% នៃសកម្មភាពប្រតិបត្តិការសរុប នៅក្នុងទីផ្សារឯកជនក្នុងឆ្នាំនេះ ដោយធ្លាក់ចុះពីជាង៦% នៅក្នុងត្រីមាសទីមួយ។ នេះបើយោងតាមធនាគារកណ្តាលរបស់ប្រទេសសិង្ហបុរី៕