ដោយ: គង់ លាងហួរ
អន្តរជាតិ: ក្នុងរយៈពេល៣៨ឆ្នាំជាប់ៗគ្នាកន្លងមកនេះ ទីតាំងដែលមានតម្លៃដីថ្លៃជាងគេបំផុតនៅប្រទេសជប៉ុន គឺនៅពីមុខហាងលក់រាយសម្ភារៈ Kyukyodo នៅតំបន់ផ្សារទំនើប Ginza ក្នុងទីក្រុងតូក្យូ។

នៅឆ្នាំ២០២៣ ដីនៅក្នុងតំបន់មួយនេះមានតម្លៃ៤២,៧២លានយ៉េន (ប្រហែល២៩៦.០០០ដុល្លារ) ក្នុងមួយម៉ែត្រការ៉េ ពោលគឺកើនឡើង១,១%បើធៀបនឹងឆ្នាំមុន។

តំបន់ Ginza ត្រូវបានគេស្គាល់ថា ជាទីតាំងដែលសម្បូរទៅដោយហាង និងភោជនីយដ្ឋានទំនើបៗជាច្រើន ដែលតែងតែជាទីពេញនិយមសម្រាប់ភ្ញៀវទេសចរចូលមកកំសាន្ត។ទោះបីជាដីនៅតំបន់ Ginza មានតម្លៃខ្ពស់ខ្លាំងបែបនេះយ៉ាងណាក្តី ប៉ុន្តែ ទីក្រុងតូក្យូពុំមែនជាតំបន់ ដែលមានការកើនឡើងនៃតម្លៃដីច្រើនជាងគេនោះទេ។ ជាក់ស្តែង ការស្ទង់មតិបានបង្ហាញថា តម្លៃដីនៅទីក្រុងតូក្យូ ក្នុងឆ្នាំ២០២៣នេះ បានកើនឡើងត្រឹមតែ៣,២ភាគរយ ប៉ុណ្ណោះ ពោលគឺជាប់ចំណាត់ថ្នាក់ទី៤ បន្ទាប់ពីកោះហុកកៃដូ ហ្វូគូអូកា និងមីយ៉ាជី។

តម្លៃដីនៅកោះហុកកៃដូ បានកើនឡើង៦,៨ភាគរយ ដោយសារកំណើននៃតម្រូវការដីលំនៅដ្ឋាននៅក្នុងទីក្រុង Sapporo និងជាយក្រុង។ ទន្ទឹមគ្នានេះ តម្លៃដីបែបពាណិជ្ជកម្មក៏កំពុងកើនឡើងគួរឱ្យកត់សម្គាល់ផងដែរ ស្របពេលមានការរំពឹងទុកថា បណ្តាញខ្សែរថភ្លើង Hokkaido Shinkansen នឹងត្រូវបានពង្រីកនៅចុងឆ្នាំ២០៣០ខាងមុខ។

យោងតាមសារព័ត៌មានជប៉ុន Nikkei Asia បានចុះផ្សាយថា តម្លៃដីនៅប្រទេសជប៉ុនមានភាពប្រសើរឡើង ដោយសារឥទ្ធិពលនៃជំងឺរាតត្បាតបានបញ្ចប់ និងការកម្រើកឡើងវិញនៃសកម្មភាពសេដ្ឋកិច្ច ជាពិសេសនៅតាមតំបន់ទេសចរណ៍ និងនៅតំបន់កណ្តាលទីក្រុង។

តួយ៉ាង កាលពីឆ្នាំ២០២១កន្លងទៅ តម្លៃដីនៅតំបន់ស្ថានីយ៍ Gion-Shijo នៃខ្សែរថភ្លើង Keihan ក្នុងទីក្រុង Kyoto បានធ្លាក់ចុះ៨,៧ភាគរយ ប៉ុន្តែបានកើនឡើងមកវិញនៅឆ្នាំ២០២៣នេះក្នុងអត្រា៦ភាគរយ ដោយសារការវិលត្រលប់មកវិញរបស់ភ្ញៀវទេសចរក្នុងស្រុក៕

ភ្នំពេញ៖ កាលពីព្រឹកថ្ងៃព្រហស្បតិ៍ ទី០៧ ខែធ្នូ ឆ្នាំ២០២៣ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មការ បានអញ្ជើញចូលរួមកិច្ចប្រជុំគណៈកម្មការអន្តរក្រសួង នៃតគម្រោងផ្លូវនាវាចរណ៍ “ព្រែកជីកហ្វូណនតេជោ” ក្រោមកិច្ចដឹកនាំរបស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានគណៈកម្មការ។

កិច្ចប្រជុំនេះ បានប្រព្រឹត្តទៅនៅទីស្តីការក្រុមប្រឹក្សាអភិវឌ្ឍន៍កម្ពុជា ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ជាថ្នាក់ដឹកនាំ និងមន្ត្រីជំនាញពាក់ព័ន្ធជាច្រើនរូបផ្សេងទៀត។

សូមជម្រាបជូនថា៖ គម្រោងផ្លូវនាវាចរណ៍នេះ បានទទួលការអនុម័តគាំទ្ររាជរដ្ឋាភិបាល នីតិកាលទី៦ ក្នុងសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី១៩ ខែឧសភា ឆ្នាំ២០២៣ ដោយបានប្រសិទ្ធនាមថាគម្រោង “ព្រែកជីកហ្វូណនតេជោ”។ ដោយមើលឃើញពីអត្ថប្រយោជន៍នៃគម្រោង ចំពោះការលើកកម្ពស់សេដ្ឋកិច្ចជាតិ រាជរដ្ឋាភិបាល នីតិកាលទី៧ បានផ្ដល់ការគាំទ្រយ៉ាងពេញទំហឹង ដើម្បីពន្លឿនដំណើរការអនុវត្តគម្រោងនេះ។

ជាក់ស្តែងកាលពីថ្ងៃទី២៥ ខែតុលា ឆ្នាំ២០២៣កន្លងទៅ សម្តេចមហាបវរធិបតី បានមានប្រសាសន៍ចាត់ទុកគម្រោង “ព្រែកជីកហ្វូណនតេជោ” ថាជាគម្រោងដែលទាញសមុទ្រឱ្យជាប់ទន្លេ រំពឹងថានឹងជួយបង្កើនលទ្ធភាពក្នុងការដឹកជញ្ជូន ពីខេត្តដែលជាប់ដងទន្លេសាប ជាប់ដងទន្លេមេគង្គ ចុះទៅសមុទ្របានកាន់តែលឿន បន្ទាប់ពីគម្រោងលេចចេញជារូបរាងឡើងរួចរាល់ ហើយសេដ្ឋកិច្ចរបស់ប្រជាពលរដ្ឋនៅតាមបណ្តោយដងទន្លេនឹងកាន់តែរីកចម្រើនផងដែរ៕

ដោយៈ គង់ សូរិយា

ភ្នំពេញៈ ក្រុមការងារអន្តរក្រសួង ដឹកនាំដោយលោកឧបនាយករដ្ឋមន្រ្តីស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា និងជាប្រធានគណៈកម្មការអន្តរក្រសួង ដើម្បីជំរុញដំណើរការអនុវត្តគម្រោងផ្លូវល្បឿនលឿនតភ្ជាប់ពីរាជធានីភ្នំពេញ ទៅក្រុងបាវិត។

កិច្ចប្រជុំនេះ ក៏បានលើកឡើងពីគំរោងស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ)ផងដែរ។

កិច្ចប្រជុំនេះក៏មានការចូលរួមពី លោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍នៃគណៈកម្មការអន្តរក្រសួងផងដែរ។

គម្រោងសាងសង់ផ្លូវល្បឿនលឿនភ្នំពេញ -ក្រុងបាវិត មានប្រវែ​ង​១៣៥គីឡូម៉ែត្រ និងស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) មានប្រវែងប្រមាណ៣គីឡូម៉ែត្រ ត្រូវបានប្រកាសបើកការដ្ឋានសាងសង់ជាផ្លូវការកាលពីថ្ងៃទី៧ ខែមិថុនា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ក្រោមទម្រង់វិនិយោគសាងសង់-ប្រតិបត្តិការ-ផ្ទេរ “BOT”៕

ដោយ: គង់ លាងហួរ
អន្តរជាតិ: យោងតាមសារពត៌មានអាមេរិក CNN បានចុះផ្សាយថា ក្រុមស្ថាបត្យករបាន បង្ហាញការរចនាគម្រោងសាងសង់អគារសាខា ថ្មី ដ៏ ធំ មួយរបស់ក្រុមហ៊ុន បច្ចេកវិទ្យា យក្សចិន Tencent ដោយចាត់ទុកគម្រោងនេះជា “ទីស្នាក់ការកណ្តាលនៃអនាគត”។

អគារទីស្នាក់ការកណ្តាលថ្មីរបស់ក្រុមហ៊ុន Tencent ខាងលើនេះនឹងត្រូវដាក់ឈ្មោះថា Tencent Helix ដែលនឹងមានទំហំជិតពីរដងនៃទីស្នាក់ការកណ្តាលរបស់ក្រុមហ៊ុនអាមេរិក Apple នៅក្នុងរដ្ឋកាលីហ្វ័រញ៉ា។

អគារទីស្នាក់ការកណ្តាលថ្មីនេះមានទំហំជិត៥០០.០០០ម៉ែត្រការ៉េ ហើយគ្រោងនឹងបើកដាក់ឱ្យដំណើរការនៅក្នុងរយៈពេលប្រាំឆ្នាំខាងមុខ ដោយអាចទទួលបុគ្គលិកបម្រើការងារជាង២៣.០០០នាក់។

ក្រុមហ៊ុនស្ថាបត្យកម្មខ្នាតអន្តរជាតិ Büro Ole Scheeren ដែលមានមូលដ្ឋាននៅទីក្រុងប៊ែកឡាំង ប្រទេសអាល្លឺម៉ង់ បានយកឈ្នះលើការប្រកួតប្រជែងសម្រាប់ការរចនាទីស្នាក់ការកណ្តាលសកលមួយនេះ ដែលមានទីតាំងនៅទីក្រុង Shenzhen។

គម្រោងដ៏ធំនេះត្រូវបានបង្ហាញជាលើកដំបូងដោយក្រុមហ៊ុន Tencent ក្នុងឆ្នាំ២០២០។ បច្ចុប្បន្ន អគារទីស្នាក់ការកណ្តាលថ្មីនេះកំពុងត្រូវបានសាងសង់នៅលើកំណាត់ដី ដែលលយចេញទៅក្នុងមាត់ទន្លេគុជ Pearl River។

អគារទីស្នាក់ការកណ្តាលថ្មី Tencent Helix នឹងតភ្ជាប់ទៅតំបន់ផ្សេងៗទៀតនៃទីក្រុង Shenzhen តាមរយៈសាឡាង និងប្រព័ន្ធរថភ្លើងក្រោមដីរបស់ទីក្រុង។

អគារ Tencent Helix ត្រូវបានគេរំពឹងថា នឹងបើកដាក់ឱ្យដំណើរការបានទាន់ពេលសម្រាប់អបអរខួបលើកទី៣០ នៃការបង្កើតក្រុមហ៊ុនបច្ចេកវិទ្យា Tencent នៅឆ្នាំ២០២៨ ហើយវានឹងជំនួសការិយាល័យធំបច្ចប្បន្ននៅទីក្រុង Shenzhen របស់ក្រុមហ៊ុន Tencent ក្នុងនាមជាទីស្នាក់ការកណ្តាលសកលរបស់ខ្លួន។

គម្រោង Tencent Helix នឹងសង្កត់ធ្ងន់ទៅលើការធ្វើដំណើរដោយថ្មើជើង និងប្រព័ន្ធដឹកជញ្ជូនសាធារណៈ ដោយគម្រោងក៏នឹងដាក់បន្ថែមរចនាបថពណ៌បៃតង ព្រមទាំង ប្រើប្រាស់បច្ចេកវិទ្យាប្រកបដោយនិរន្តភាព (sustainable technology)ផងដែរ។

អគារទីស្នាក់ការកណ្តាលថ្មីរបស់ក្រុមហ៊ុនមួយនេះ ក៏ស្ថិតនៅជិតនឹងតំបន់លំនៅដ្ឋាន ដែលមានទាំង សាលារៀន ផ្ទះ កន្លែងលក់រាយ (retail spaces) អគារការិយាល័យផ្សេងទៀត និងកន្លែងផ្គត់ផ្គង់ផ្សេងៗដ៏សំបូរបែប។

តំបន់ដែលពោរពេញទៅ ដោយពណ៌បៃតងដ៏ធំ គឺស្ថិតនៅចំផ្នែកកណ្ដាលរបស់គម្រោង ដែលនឹងត្រូវបានប្រើសម្រាប់អ្នកថ្មើរជើង និងអ្នកជិះកង់ ដោយ រាល់ចរាចរណ៍យានយន្តទាំងអស់ត្រូវបានបង្វែរទៅកន្លែងផ្សេង។

បន្ថែមពីលើរចនាបថពណ៌បៃតង គម្រោង Tencent Helix នឹងប្រើប្រាស់បច្ចេកវិទ្យាប្រកបដោយនិរន្តរភាព (sustainable technology) អាចប្រើប្រាស់ធនធានកកើតឡើងវិញ ដែលមានបំពាក់ឧបករណ៍ជំនួយមួយចំនួន ដូចជា បន្ទះសូឡានៅលើដំបូល សម្រាប់ស្រូបថាមពលព្រះអាទិត្យ និង ឧបករណ៍ចាប់សញ្ញាដែលត្រូវបានប្រើ ដើម្បីតាមដានដំណើរការ បរិស្ថាន និងបង្ហាញពីហានិភ័យទឹកជំនន់។ សម្រាប់ទឹកភ្លៀង ក៏នឹងត្រូវបានប្រមូលស្តុកទុក និងប្រើប្រាស់ផងដែរ៕

ដោយ: គង់ លាងហួរ
អន្តរជាតិ: យោងតាមភ្នាក់ងារអចលនទ្រព្យបានឱ្យដឹងថា អតិថិជន ដែលមានមូលដ្ឋាននៅទីក្រុងហុងកុង និងចិនដីគោកកំពុងសម្រុកប្រមូលទិញលំនៅដ្ឋានថ្លៃៗក្នុងប្រទេសអូស្ត្រាលី បើទោះបីជាអត្រាការប្រាក់ និងតម្លៃផ្ទះនៅទីនោះមានការហក់ឡើងខ្ពស់យ៉ាងណាក្តី។

ជាក់ស្តែង តម្លៃផ្ទះជាមធ្យមនៅក្នុងទីក្រុងធំៗមួយចំនួនរបស់ប្រទេសអូស្ត្រាលីបានកើនឡើងប្រហែល១ភាគរយ នៅក្នុងខែតុលា ធៀបនឹងខែកញ្ញា។ នេះបើយោងតាមក្រុមហ៊ុនផ្តល់សេវាទិន្នន័យអចលនទ្រព្យនៅក្នុងប្រទេសអូស្ត្រាលី និង នូវែលសេឡង់ ដែលមានឈ្មោះថា CoreLogic។

លោក Daniel Ho សហស្ថាបនិក និងជានាយកគ្រប់គ្រងក្រុមនៃគេហទំព័រចុះបញ្ជីអចលនទ្រព្យ Juwai IQI បានអះអាងថា នៅតាមទីក្រុងមួយចំនួន ដូចជាទីក្រុង Perth ទីក្រុង Brisbane និងទីក្រុង Adelaide តម្លៃផ្ទះគឺស្ថិតនៅកម្រិតខ្ពស់បំផុត ដោយបានកើនឡើងរហូតដល់ទៅ១១ភាគរយក្នុងរយៈពេល១២ខែកន្លងមកនេះ។

ការកើនឡើងនៃតម្លៃផ្ទះនៅប្រទេសអូស្ត្រាលីបានកើតឡើង ខណៈដែល កាលពីខែវិច្ឆិកា ធនាគារកណ្តាលអូស្ត្រាលីបានដំឡើងអត្រាការប្រាក់ចំនួន២៥ពិន្ទុមូលដ្ឋានបន្ថែម ដើម្បីគ្រប់គ្រងបញ្ហាអត្រាអតិផរណា ដែលមិនទាន់ធ្លាក់ចុះដល់គោលដៅប្រចាំឆ្នាំចន្លោះពី២%ដល់៣%។

ទោះជាយ៉ាងនេះក្តី អតិថិជនបរទេស រួមទាំងអតិថិជនមកពីទីក្រុងហុងកុង និងចិនដីគោក បានសម្រុកទិញលំនៅដ្ឋាននៅប្រទេសអូស្ត្រាលី ដោយមិនខ្វាយខ្វល់អំពីការកើនឡើងនៃអត្រាការប្រាក់ និងតម្លៃផ្ទះនោះឡើយ។

លោក Peter Li អ្នកគ្រប់គ្រងទូទៅនៃភ្នាក់ងារអចលនទ្រព្យ Plus Agency បានអះអាងថា ថ្មីៗនេះ អ្នកទិញម្នាក់មកពីទីក្រុងហុងកុងបានបង់ប្រាក់ចំនួន៣,៨លានដុល្លារអូស្ត្រាលី (ប្រហែល២,៥លានដុល្លារអាមេរិក) សម្រាប់ទិញផ្ទះល្វែងដែលមានបន្ទប់គេងចំនួន៤ នៅទីក្រុងស៊ីដនី។

លោក Ken Jacobs ភ្នាក់ងារអចលនទ្រព្យប្រណីត ដែលមានមូលដ្ឋាននៅទីក្រុងស៊ីដនីបានគូសបញ្ជាក់ឱ្យដឹងថា “លោកបានចរចាលើការទិញអចលនទ្រព្យសំខាន់ៗជាច្រើនសម្រាប់អតិថិជនមកពីប្រទេសចិន និងហុងកុង ដែលទើបតែទទួលបានសិទ្ធិស្នាក់នៅអចិន្ត្រៃយ៍ក្នុងប្រទេសអូស្ត្រាលី”៕South China Morning Post៕