ដោយ: គង់ លាងហួរ

អន្តរជាតិ: ប្រធានសេដ្ឋវិទូនៃការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) លោក Khor Hoe Ee បានព្យាករណ៍ថា ម៉ាឡេស៊ី នឹងក្លាយជាប្រទេស ដែលមានប្រាក់ចំណូលកម្រិតខ្ពស់ ឬប្រទេសអ្នកមាននៅឆ្នាំ២០៣០ខាងមុខ ដោយសារតែការកើនឡើងនៃលំហូរវិនិយោគផ្ទាល់ពីបរទេស(FDI)។

លោក Khor បានថ្លែងក្នុង​សន្និសីទ​សារព័ត៌មាន​ស្តីពី ការ​បើកសម្ពោធរបាយការណ៍ ​ទស្សនវិស័យ​សេដ្ឋកិច្ច​តំបន់​អាស៊ាន​+៣ ឆ្នាំ២០២៤ ថា “យើង​មាន​សុទិដ្ឋិនិយម​ថា ដរាបណា​ប្រទេសម៉ាឡេស៊ីអាចរក្សា​បានវិន័យ​សារពើពន្ធ និង​រូបិយវត្ថុ នោះលំហូរ​នៃ​ការ​វិនិយោ​គ​ថ្មី​ពី​បរទេស​ នឹង​អាច​ជួយ​ជំរុញកំណើនសេដ្ឋកិច្ច និង​ធ្វើឱ្យម៉ាឡេស៊ីក្លាយជាប្រទេសដែលមាន​ប្រាក់ចំណូល​កម្រិតខ្ពស់​។

លោកបានបន្ថែមថា “ម៉ាឡេស៊ីបានដាក់ចេញគោលដៅបញ្ចប់ឋានៈរបស់ខ្លួន ជាប្រទេសដែលមានប្រាក់ចំណូលកម្រិតមធ្យម ដើម្បីឆ្ពោះទៅក្លាយជាប្រទេស ដែលមានប្រាក់ចំណូលកម្រិតខ្ពស់ នៅចុងទសវត្សរ៍នេះ ហើយគ្មានហេតុផលណាមួយ ដែលម៉ាឡេស៊ីមិនអាចធ្វើបាននោះទេ”។យោងតាមទិន្នន័យបានបង្ហាញថា “លំហូរFDIចូលមកកាន់ប្រទេ​​សម៉ាឡេស៊ី មានទំហំទឹកប្រាក់ខ្ពស់ រហូតដល់ចំនួន២០៨,៦ពាន់លានរីងហ្គិត ក្នុងឆ្នាំ២០២១ តាមពីក្រោយដោយលំហូរFDI ចំនួន១៦៣,៣ពាន់លានរីងហ្គីត ក្នុងឆ្នាំ២០២២ និងលំហូរFDI ចំនួន១២៥,៧ពាន់លានរីងហ្គីត ក្នុងឆ្នាំ២០២៣”។

នៅក្នុងឆ្នាំ២០២៣ ផលទុនជាតិសរុប(GDP) សម្រាប់ប្រជាជនម៉ាឡេស៊ីម្នាក់ៗ មានទំហំទឹកប្រាក់ចំនួន១១.១៤១ដុល្លារអាមេរិក ប៉ុន្តែដើម្បីក្លាយជាប្រទេស មានប្រាក់ចំណូលកម្រិតខ្ពស់ ប្រជាជនម៉ាឡេស៊ីម្នាក់ៗ ត្រូវមានចំណូល១៣.៨៤៥ដុល្លារអាមេរិកក្នុងមួយឆ្នាំ។ នេះបើយោងតាមការកំណត់របស់ធនាគារពិភពលោក។

ប៉ុន្តែទោះជាយ៉ាងណាក្តី លោក Allen Ng សេដ្ឋវិទូមួយរូបទៀតនៅស្ថាប័ន AMRO បានលើកឡើងថា “ អ្វីដែលសំខាន់ជាងនេះទៀត ដែលយើងចង់គូសបញ្ជាក់ នៅក្នុងរបាយការណ៍របស់យើងថា ប្រទេ​សម៉ាឡេស៊ី ព្រមទាំងបណ្តាប្រទេស ក្នុងតំបន់ជាច្រើនទៀត នៅតែបន្តប្រឈមមុខនឹងបញ្ហារចនាសម្ព័ន្ធ”។

លោក Ng បានបន្ថែមថា “ម៉ាឡេស៊ីមិនអាចគេចផុតពីបញ្ហាប្រឈមរយៈពេលវែងទូទៅ ចំពោះទស្សនវិស័យសេដ្ឋកិច្ច ដោយលោកកត់សម្គាល់ថា ម៉ាឡេស៊ីចាំបាច់ត្រូវគ្រប់គ្រងប្រជាសាស្រ្ត ដែលមានវ័យចំណាស់ កំណើនផលិតភាព និងកម្លាំងពលកម្មជំនាញរបស់ខ្លួន”៕ ប្រភព: The Edge Malaysia៕

        ដោយៈ គង់ សូរិយា

        ព្រះសីហនុៈ គម្រោងវិនិយោគចំនួន៦ទៀត បានហូរចូលខេត្តព្រះសីហនុ ដែលមានទាំងគម្រោងជាប់ពាក់ព័ន្ធ នឹងអគារជាប់គាំង និងមិនពាក់ព័ន្ធ ត្រួវបានទទួលបានការលើកទឹកចិត្តពិសេស ពីរដ្ឋាភិបាល។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហរិញ្ញវត្ថុបានឲ្យដឹងកាលពីសប្តាហ៍មុនថា ​គម្រោងទាំង៦នេះ មានទុនវិនិយោគប្រមាណ៧៣លានដុល្លារ។​

ម្រោងវិនិយោគនៅព្រះសីហនុ ដែលមានការទឹកចិត្តពិសេសពីរដ្ឋាភិបាលនោះ មានគម្រោងបង្កើតរោងចក្រកែច្នៃផ្លែដូង គម្រោងអភិវឌ្ឍន៍លំនៅដ្ឋាន គម្រោងសណ្ឋាគារ និងកាស៊ីណូ គម្រោងសួនកម្សា​ន្តលើទឹកសមុទ្រ គម្រោងអគារស្នាក់នៅរួម និងគម្រោងវិនិយោគពេទ្យធ្មេញ។

សេចក្តីប្រកាសព័ត៌មានរបស់ក្រសួងសេដ្ឋកិច្ច ស្តីពីកិច្ចប្រជុំក្រុមការងារដើម្បីពិភាក្សា លើការស្នើការលើកទឹកចិត្ត ការអនុគ្រោះ និង ការសម្រួលនីតិវិធី របស់គម្រោងវិនិយោគ/ធុរកិច្ច ក្រោមការដឹកនាំរបស់លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងជាប្រធានក្រុមការងារជំរុញការវិនិយោគ ក្នុងខេត្តព្រះសីហនុ នាថ្ងៃទី១០មេសា បានបញ្ជាក់ថា “គម្រោងទាំងនេះ ជាគម្រោងចម្រុះ ដែលមានម្ចាស់ជាជនជាតិខ្មែរ-បរទេស និងមានទំហំតូច មធ្យម និងធំ”។
គិតត្រឹមពេលនេះ មានគម្រោងវិនិយោគ១៣ហើយ ដែលទទួលបានការលើកទឹកពិសេសពីរដ្ឋាភិបាល។ ក្នុងនោះរដ្ឋាភិបាលបានសម្រេ​ចជាគោលការណ៍ ក្នុងការផ្តល់អត្ថប្រយោជន៍ពិសេស ដល់គម្រោ​ងវិនិយោគ/ធុរកិច្ចចំនួន៧ ដែលជាគម្រោងអគារសហកម្មសិទ្ធិ (អគារស្នាក់នៅរួម) សណ្ឋាគារ និងមជ្ឈមណ្ឌលទេសចរណ៍ នៅខែកុម្ភៈ ឆ្នាំ២០២៤។ នេះបើយោងតាមក្រសួងសេដ្ឋកិច្ច។

ជាមួយគ្នានេះ ក្រុមការងារជំរុញការវិនិយោគ ក្នុងខេត្តព្រះសីហនុ ក៏បានទទួល និងពិនិត្យពាក្យស្នើនានា ចំនួន១៦គម្រោង ព្រមទាំងកំពុងអនុវត្តវិធានការផ្សេងទៀត ដែលបានដាក់ចេញក្នុង “កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤”។

ក្រុមការងារជំរុញការវិនិយោគ ក្នុងខេត្តព្រះសីហនុ កំពុងសិក្សាកំណត់តំបន់វិនិយោគ ឬតំបន់អភិវឌ្ឍន៍ និងការរៀបចំសេចក្តីព្រាងអនុក្រឹត្យស្តីពី ទិដ្ឋាការពិសេសរយៈពេលវែង សម្រាប់ការទិញ ឬការជួលអចលនវត្ថុ ដែលមានតម្លៃចាប់ពី១០ម៉ឺនដុល្លារឡើង នៅក្នុងខេត្តព្រះសីហនុ ដើម្បីចូលរួមចំណែកជំរុញសកម្មភាពវិនិយោគ និងការអភិវឌ្ឍ។ បើតាមសេចក្តីប្រកាសព័ត៌មានដដែល។​

កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤” ត្រូវបានប្រមុខរដ្ឋាភិបាលសម្តេចធិបតីហ៊ុន ម៉ាណែត នាយករដ្ឋមន្ត្តីនៃកម្ពុជា ប្រកាសឱ្យអនុវត្តនៅថ្ងៃ ទី៣១មករា​ ឆ្នាំ២០២៤។​

តាមរយៈកម្មវិធីនេះ​ រដ្ឋាភិបាលនឹងសម្រួលដល់វិនិយោគិន ដូចជា៖​ ការសម្រួលនីតិវិធី និងការបំពេញបែបបទ ពាក់ព័ន្ធនឹងការវិនិយោគ និងការធ្វើធុរកិច្ច ការសម្រួលក្នុងការផ្តល់លិខិតអនុញ្ញាត និងទិដ្ឋាការ ការផ្តល់ការលើកទឹក​ចិត្តពន្ធ​អាករ ការលើកលែងកម្រៃសេវាសាធារណៈ ឬការអនុគ្រោះផ្សេងៗ ពាក់ព័ន្ធនឹងការសាងសង់ ការរៀប​ចំ​តំបន់អភិវឌ្ឍន៍តាមភូមិ-សង្កាត់ និងផ្លូវសំខាន់ៗ ការវិនិយោគលើគម្រោងហេដ្ឋារចនាសម្ព័ន្ធ ការអភិវឌ្ឍ​​តំបន់ឧស្សាហកម្ម និងការអភិវឌ្ឍដីដែលមានសក្តានុពល សម្រាប់តំបន់ប្រមូលផ្តុំ​ឧស្សាហ​កម្ម ឬសហគ្រាស និង/ឬតំបន់ទេសចរណ៍។

គោលដៅដែលរដ្ឋាភិបាលអនុវត្តន៍ នូវកម្មវិធីពិសេស​ជំរុញការវិនិយោគ ក្នុងខេត្តព្រះសីហនុឆ្នាំ២០២៤នេះ  គឺជំរុញសកម្មភាពធុរកិច្ច និងការវិនិយោគ សំដៅប្រែក្លាយខេត្តព្រះសីហនុ ឱ្យទៅជា​ខេត្ត​លើកស្ទួយកំណើនសេដ្ឋកិច្ចកម្ពុជា ក្នុងស្ថានភាពសេដ្ឋកិច្ច​ពិភព​លោក និង​តំបន់ ​កំពុងបន្តប្រឈមនឹងភាពមិនប្រាកដប្រជាខ្ពស់។

គិតត្រឹមត្រីមាសទី១ ឆ្នាំ២០២៤ កម្ពុជាបានអនុម័តគម្រោងវិនិយោគចំនួន១០៦ ដែលមានទុនប្រមាណ២២០០លានដុល្លារ។ គម្រោងទាំងនេះ អាចបង្កើតការងារឱ្យពលរដ្ឋបានជាង១០៧ពាន់កន្លែង៕

        ដោយៈ គង់ សូរិយា

        ភ្នំពេញៈ ក្រុមហ៊ុនVinci Construction Grands Projets (VCGP) បានសន្យាផ្តល់ថវិកា១០៣,៣លានដុល្លារ ដល់រដ្ឋាករទឹកស្វយ័តក្រុងភ្នំពេញ (PPWSA)  ដើម្បីសាងសង់រោងចក្រផលិតទឹកស្អាតបាក់ខែងជំហានទី៣ នាខែឧសភាខាងមុខនេះ។

តាមផែនការរោងចក្រនេះ នឹងត្រូវបើកដ្ឋានសាងសង់​នៅអំឡុងខែឧសភា ស្ថិតក្រោមគម្រោងសហហិរញ្ញប្បទាន ប្រមាណ២៥០លានដុល្លារ រវាងរដ្ឋាភិបាលកម្ពុជា និងរដ្ឋាភិបាលបារាំង។

កិច្ចសន្យារវាងVCGP និងPPWSA នៃគម្រោង “បាក់ខែងដំណា​ក់កាលទី៣” ត្រូវបានធ្វើឡើង នៅថ្ងៃទី១០មេសា ឆ្នាំ២០២៤ ក្នុងគោលដៅពង្រីក សមត្ថភាពផ្គត់ផ្គង់ទឹកស្អាត ឱ្យបានដល់៦០ម៉ឺនគូបក្នុងមួយថ្ងៃ។ បើតាមសេចក្តីប្រកាសព័ត៌មាន របស់ស្ថានទូតបារាំងប្រចាំកម្ពុជា​ កិច្ចព្រមព្រៀងនៃការសន្យាផ្តល់កម្ចី១០៣,៣ ដល់​រដ្ឋាករទឹកស្វយ័តក្រុងភ្នំពេញនេះ គឺជាផ្នែកមួយនៃគម្រោងដែលទទួលបានហិរញ្ញប្បទាន ពីទីភ្នាក់ងារបារាំងសម្រាប់អភិវឌ្ឍន៍ (AFD)។

សេចក្តីប្រកាសបានបញ្ជាក់ថា “ការសាងសង់គ្រោងនឹងបញ្ចប់នៅឆ្នាំ២០២៧ ដោយនឹងចូលរួមលើកកម្ពស់លទ្ធភាព ទទួលបានទឹកប្រកបដោយគុណភាពពិសេស សម្រាប់ប្រជាពលរដ្ឋទាំងអស់ដែលរស់នៅក្នុងរាជធានីភ្នំពេញ”។

ស្ថានទូតបារាំងបានបញ្ជាក់ទៀតថា បន្ទាប់ពីសាងសង់រួច ស្ថានីយ៍ប្រព្រឹត្តកម្មទឹកស្អាត នឹងក្លាយជាស្ថានីយ៍ធំជាងគេបំផុត នៅអាស៊ីអាគ្នេយ៍ ដែលអាចផ្គតផ្គង់ទឹកស្អាត ដល់បពលរដ្ឋចំនួន១៤៧ពាន់គ្រួសារ​បន្ថែមទៀត។​

គម្រោងនេះ បានបង្ហាញពីទំនុកចិត្តរបស់កម្ពុជា លើជំនាញរបស់ក្រុមហ៊ុនសំណង់បារាំង សម្រាប់ការវិនិយោគរបស់ខ្លួនប្រកប​ដោយយុទ្ធសាស្រ្ត ដែលមានតម្លៃបន្ថែមខ្ពស់។

ស្ថានទូតបារាំងបានបញ្ជាក់ថា “នេះជាគម្រោងដែលឆ្លុះបញ្ចាំងឱ្យឃើញនូវយុទ្ធសាស្រ្ត “Global Gateway” ហើយក៏បង្ហាញឱ្យឃើញផងដែរ នូវការប្តេជ្ញាចិត្តរបស់ក្រុមអឺរ៉ុបនៅកម្ពុជា”។

បច្ចុប្បន្ន​រោងចក្រប្រព្រឹត្តិកម្មទឹកបាក់ខែង ដំណាក់កាលទី១ និងទី២ គឺមានសមត្ថភាពផលិតទឹកស្អាត បាន៣៩ម៉ឺនម៉ែត្រគូបក្នុងមួយថ្ងៃ ហើយផ្គត់ផ្គង់បាន១៩ម៉ឺន​ម៉ែត្រគូ។ ការចាប់ផ្តើមដំណាក់កាលទី៣ បង្ហាញពីវឌ្ឍនភាពដ៏សំខាន់ នៅក្នុងហេដ្ឋារចនាសម្ព័ន្ធទឹក ប្រកប​ដោយនិរន្តរភាព ក្នុងការដោះស្រាយតម្រូវការទឹកស្អាត ដែលកំពុងកើនឡើងនៅក្នុងរាជធានី និងតំបន់ជុំវិញ៕

ដោយ: គង់ លាងហួរ
អន្តរជាតិ: នាយករដ្ឋមន្ត្រីជប៉ុនលោក Fumio Kishida ទាក់ទាញបានទុនវិនិយោគចំនួន២,៩ពាន់លានដុល្លារពីក្រុមហ៊ុនបច្ចេកវិទ្យាយក្ស Microsoft ក្នុងដំណើរទស្សនកិច្ចរបស់លោកទៅកាន់សហរដ្ឋអាមេរិក។

ក្នុងអំឡុងកិច្ចប្រជុំជាមួយលោក Kishida ប្រធានក្រុមហ៊ុន Microsoft លោក Brad Smith បានបង្ហាញពីផែនការវិនិយោគដ៏ធំបំផុតមិនធ្លាប់មាននៅក្នុងប្រទេសជប៉ុន ដែលរួមមានវិធានការ ដើម្បីធ្វើឱ្យប្រសើរឡើងនូវមជ្ឈមណ្ឌលទិន្នន័យរបស់ខ្លួន។

លោកKishida បានថ្លែងប្រាប់លោក Smith ថា “វាមានសារៈសំខាន់ណាស់សម្រាប់ក្រុមហ៊ុនជប៉ុនក្នុងការធ្វើការជាមួយបណ្តាក្រុមហ៊ុនសកលដូចជា Microsoft ដោយលោកបង្ហាញក្តីសង្ឃឹមថា ក្រុមហ៊ុនអាមេរិកនឹងបន្តជួយជំរុញការអភិវឌ្ឍន៍បច្ចេកវិទ្យានៅក្នុងប្រទេសជប៉ុន”។យោងតាមប្រភពក្រុមហ៊ុនបានបង្ហើបឱ្យដឹងថា ក្រុមហ៊ុន Microsoft គ្រោងនឹងបើកមូលដ្ឋានស្រាវជ្រាវនៅទីក្រុងតូក្យូ ក្នុងគោលបំណងលើកកម្ពស់ការស្រាវជ្រាវលើ វិស័យបច្ចេកវិទ្យា AI និងមនុស្សយន្ត។

នៅថ្ងៃអង្គារ សប្តាហ៍នេះ លោក Kishida បានបញ្ជាក់ប្រាប់ថ្នាក់ដឹកនាំធុរកិច្ចនៅក្នុងព្រឹត្តិការណ៍មួយ ដែលរៀបចំដោយសភាពាណិជ្ជកម្មសហរដ្ឋអាមេរិក ថា ទីក្រុងតូក្យូ និងទីក្រុងវ៉ាស៊ីនតោនអាចដឹកនាំសហគមន៍អន្តរជាតិឆ្ពោះទៅរកស្ថិរភាព និងវិបុលភាព។

លោក Kishida បានបន្ថែមថា ប្រទេសជប៉ុននឹងចាប់ដៃជាមួយសហរដ្ឋអាមេរិក ដើម្បីពន្លឿនកំណើនសេដ្ឋកិច្ចពិភពលោកក្នុងបច្ចេកវិទ្យាសំខាន់ៗ រួមទាំងឧបករណ៍អេឡិចត្រូនិក បច្ចេកវិទ្យា AI កុំព្យូទ័រកង់ទិច និងថាមពលស្អាត ដោយពង្រីកការវិនិយោគទៅវិញទៅមក៕ប្រភព:Kyodo៕

ដោយ: គង់ លាងហួរ
បាងកក: រដ្ឋាភិបាលថៃ បានបញ្ជាឱ្យផ្លាស់ប្តូរទីតាំងកំពង់ផែបាងកកដែលមានទំហំជាង៥ហិកតា នៅជាប់នឹងទន្លេចៅប្រាយ៉ា ស្ថិតក្នុងសង្កាត់ Klong Toey ក្នុងគោលដៅប្រែក្លាយតំបន់នេះសម្រាប់បម្រើដល់សាធារណៈជនទូទៅ។

នាយករដ្ឋមន្ត្រីថៃលោកសេដ្ឋា ថាវីសុីន បានលើកឡើងថាការផ្លាស់ប្តូរទីតាំងកំពង់ផែនេះ នឹងផ្តល់អត្ថប្រយោជន៍ដល់ប្រជាជន ដែលរស់នៅក្នុងតំបន់ Klong Toey នៃទីក្រុងបាងកកក៏ដូចជាប្រជាជនរស់នៅក្នុងរាជធានីទាំងមូលផងដែរ។

ផែនការនេះត្រូវបានស្នើឡើងដោយលោកសេដ្ឋា ខណៈរដ្ឋាភិបាលថៃកំពុងខិតខំព្យាយាមដោះស្រាយបញ្ហាធូលី ដីការបំពុលខ្យល់ ដែលបង្កឡើងដោយរថយន្តដឹកទំនិញចេញ-ចូលកំពង់ផែបាងកកជារៀងរាល់ថ្ងៃ។ក្រោយពីទទួលបានសំណើខាងលើនេះរួចមក គណៈរដ្ឋមន្ត្រីថៃ បានបញ្ជាដល់ក្រសួងដឹកជញ្ជូន ឱ្យធ្វើការជាមួយអាជ្ញាធរកំពង់ផែបាងកក និងភ្នាក់ងារផ្សេងទៀត ដើម្បីពន្លឿនការសិក្សាផ្លាស់ប្តូរទីតាំង។ ជាមួយគ្នានេះ ឃ្លាំង និងកន្លែងស្តុកប្រេងក៏ត្រូវប្តូរទីតាំងផងដែរ។

តំបន់នេះ នឹងត្រូវបានប្រើប្រាស់ជាចម្បងសម្រាប់បម្រើផលប្រយោជន៍សាធារណៈរបស់ប្រជាជនទីក្រុងបាងកក ហើយលទ្ធផលសិក្សាត្រូវតែរាយការណ៍ជូននាយករដ្ឋមន្រ្តីឱ្យបានលឿនតាមដែលអាចធ្វើទៅបាន។

កាលពីខែកុម្ភៈកន្លងទៅ លោក Chadchart Sittipunt អភិបាលក្រុងបាងកក ក៏ធ្លាប់បានស្នើ និងពិភាក្សាជុំវិញបញ្ហានេះ ជាមួយលោកសេដ្ឋា ផងដែរ ខណៈដែលនៅពេលនោះ លោកទាំង២បានជួបគ្នានៅក្នុងសាលាក្រុង។

នៅក្នុងជំនួបនោះ រដ្ឋបាលទីក្រុងបាងកក បានស្នើផ្លាស់ប្តូរទីតាំងកំពង់ផែបាងកកទៅកាន់កំពង់ផែសមុទ្រទឹកជ្រៅ Laem Chabang ស្ថិតក្នុងខេត្ត Chon Buri ដោយសង្ឃឹមថាការធ្វើបែបនេះនឹងជួយកាត់បន្ថយការបំពុលបរិយាកាស និងអភិវឌ្ឍន៍តំបន់នេះទៅជាទីធ្លាបៃតងសម្រាប់ប្រជាជនទីក្រុង៕ប្រភព:Bangkok Post៕

ដោយ: គង់ លាងហួរ
អន្តរជាតិ: បណ្តាក្រុមហ៊ុនជប៉ុន និងក្រុមហ៊ុនអឺរ៉ុបជាច្រើន កំពុងពិចារណា ឬក្រុមហ៊ុនខ្លះទៀត បានផ្លាស់ប្តូរទីស្នាក់ការកណ្តាល ឬ ប្រតិបត្តិការរបស់ពួកគេចេញពីប្រទេសសិង្ហបុរីរួចទៅហើយ ដោយលើកឡើងពីការព្រួយបារម្ភចំពោះថ្លៃចំណាយខ្ពស់។

នៅក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនសាជីវកម្មពហុជាតិជាច្រើន បានជ្រើសរើសទីតាំងបង្កើតការិយាល័យកណ្តាលរបស់ខ្លួន នៅតាមបណ្តាប្រទេសផ្សេងៗ ក្រៅពីសិង្ហបុរី ដើម្បីកាត់បន្ថយការចំណាយ និងស្វែងរកឱកាសថ្មីៗកាន់តែច្រើន។

បណ្តាក្រុមហ៊ុនជប៉ុនភាគច្រើនមើលឃើញ ថា សិង្ហបុរីនៅតែជាជម្រើសកំពូល ដែលពួកគេមានបំណងចូលទៅបង្កើតទីតាំងការិយាល័យកណ្តាលនៅទីនោះ។ ប៉ុន្តែ ទោះជាយ៉ាងណាក្តី កាលពីខែកុម្ភៈកន្លងទៅ ក្រុមហ៊ុនផលិតទឹកថ្នាំ របស់ជប៉ុន Sakata Inx បានងាកទៅបង្កើតទីស្នាក់ការកណ្តាលរបស់ខ្លួននៅប្រទេសម៉ាឡេស៊ី។

អ្នកនាំពាក្យមួយរូបនៃក្រុមហ៊ុន Sakata Inx បានលើកឡើងថា ការបង្កើតការិយាល័យកណ្តាលរបស់ខ្លួន នៅប្រទេសម៉ាឡេសុី នឹងជួយបង្កើនប្រាក់ចំណេញប្រតិបត្តិការរបស់ក្រុមហ៊ុនខ្លួន ចាប់ពី៦,៦ ទៅដល់១៣,១លានដុល្លារ នៅក្នុងផែនការអាជីវកម្មរយៈពេលមធ្យមរបស់ខ្លួន រហូតដល់ឆ្នាំ២០២៦។ មូលហេតុ ដែលក្រុមហ៊ុនជ្រើសរើសម៉ាឡេស៊ី គឺដោយសារតែក្រុមហ៊ុននេះសម្លឹងឃើញអត្ថប្រយោជន៍ផ្នែកពន្ធ។

តួយ៉ាង រដ្ឋាភិបាលម៉ាឡេសុីបានស្នើកញ្ចប់ថវិកាជាតិ សម្រាប់ឆ្នាំ២០២៤ ដែលរួមបញ្ចូលទាំងការលើកទឹកចិត្តផ្នែកពន្ធ រួមទាំងការលើកទឹកចិត្តពន្ធលើប្រាក់ចំណូលចន្លោះពី៥ ទៅ១០ភាគរយរយៈពេល១០ឆ្នាំ។

ក្រៅពីម៉ាឡេស៊ី ថៃគឺជាប្រទេសនាំមុខគេមួយទៀត ក្នុងការទាក់ទាញក្រុមហ៊ុនបរទេសធំៗផងដែរ។ ជាក់ស្តែង កាលពីឆ្នាំ២០២០ ក្រុមហ៊ុន Nissin Foods Holdings បានផ្លាស់ប្តូរទីស្នាក់ការកណ្តាល ពីសិង្ហបុរីទៅកាន់ប្រទេសថៃ ខណៈរដ្ឋាភិបាលថៃកំពុងលើកទឹកចិត្តផ្នែកពន្ធ ដើម្បីទាក់ទាញក្រុមហ៊ុនពហុជាតិ ឱ្យមកបណ្តាក់ទុនក្នុងប្រទេសរបស់ខ្លួន។

លោក Keisuke Asakura នាយករងផ្នែកគ្រប់គ្រងរបស់អង្គការពាណិជ្ជកម្មខាងក្រៅនៃប្រទេសជប៉ុន បានលើកឡើងថា “ខណៈថ្លៃជួលការិយាល័យ និងថ្លៃចំណាយផ្សេងទៀតនៅសិង្ហបុរីកំពុងកើនឡើង ដូច្នេះ ក្រុមហ៊ុនពហុជាតិកាន់តែច្រើន នឹងផ្លាស់ប្តូរអគារការិយាល័យទៅកាន់ប្រទេសថៃបន្ថែមទៀត ដើម្បីបំពេញប្រតិបត្តិការមួយផ្នែកនៃក្រុមហ៊ុនរបស់ពួកគេ”។

ទោះបីជាយ៉ាងណាក្តី ពុំមែនមានតែក្រុមហ៊ុនជប៉ុនទេ ដែលបង្ហាញការព្រួយបារម្ភ សូម្បីតែក្រុមហ៊ុនអឺរ៉ុបក៏កំពុងពិចារណាផ្លាស់ប្តូរការិយាល័យកណ្តាលចេញពីសិង្ហបុរីផងដែរ។

ជាក់ស្តែង យោងតាមការស្ទង់មតិកាលពីឆ្នាំ២០២៣ ដោយសភាពាណិជ្ជកម្មអឺរ៉ុបប្រចាំនៅសិង្ហបុរី រកឃើញថា “ចំនួន៦៩ភាគរយនៃក្រុមហ៊ុនអឺរ៉ុបទាំងអស់ដែលចូលរួមការស្ទង់មតិ បានឆ្លើយថា ពួកគេមានបំណងផ្លាស់ប្តូរបុគ្គលិកចេញពីសិង្ហបុរី ដោយសារតែការកើនឡើងនៃថ្លៃចំណាយប្រតិបត្តិការ៕ប្រភព:Nikkie Asia៕

ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាអចលនទ្រព្យដ៏ល្បីល្បាញមួយបានលើកឡើងថា វិស័យអចលនទ្រព្យពាណិជ្ជកម្មរបស់ប្រទេសចិនកំពុងបង្ហាញសញ្ញាវិជ្ជមានមួយចំនួនឡើងវិញ ក្នុងរយៈពេលប៉ុន្មានខែដំបូងដើមឆ្នាំ២០២៤នេះ។

ក្រុមហ៊ុនប្រឹក្សាអចលនទ្រព្យ JLL បានសរសេររៀបរាប់នៅក្នុងរបាយការណ៍មួយថា ថ្លៃជួលទីតាំងលក់រាយសំខាន់ៗនៅទីក្រុងប៉េកាំងបានកើនឡើងក្នុងល្បឿនដ៏លឿនបំផុតមិនធ្លាប់មាន គិតចាប់តាំងពីឆ្នាំ២០១៩។

យោងតាមប្រភពពីរបាយការណ៍ខាងលើបានឱ្យដឹងបន្តទៀតថា ថ្លៃជួលនៅទីនោះបានកើនឡើង១,៣ភាគរយ ក្នុងអំឡុងរយៈពេល៣ខែដំបូងដើមឆ្នាំនេះ បើធៀបនឹងត្រីមាសទី៤ ឆ្នាំ២០២៣។

យោងតាមក្រុមហ៊ុន JLL បានឱ្យដឹងថា តម្រូវការបើកហាងពីសំណាក់ម៉ាកយីហោម្ហូបអាហារ និងភេសជ្ជៈថ្មីៗ រួមទាំងម៉ូដសម្លៀកបំពាក់បរទេស និងក្រុមហ៊ុនរថយន្តអគ្គិសនី បានជំរុញឱ្យការជួលទីតាំងលក់រាយនៅតាមផ្សារទំនើបនានាមានការកើនឡើង។

ក្រុមហ៊ុនប្រឹក្សាអចលនទ្រព្យខាងលើរំពឹងថា តម្រូវការទាំងអស់នេះនឹងបន្តកើនឡើងពេញមួយឆ្នាំ២០២៤ ដែលនឹងជួយជំរុញឱ្យការជួល និងថ្លៃជួលស្ទុះងើបឡើងវិញ។

ទីផ្សារអចលនទ្រព្យបែបពាណិជ្ជកម្ម ដែលរួមមានដូចជា អគារការិយាល័យ និងផ្សារទំនើបជាដើម បង្កើតបានជាចំណែកមួយប៉ុណ្ណោះនៃទីផ្សារអចលនទ្រព្យទាំងមូលរបស់ប្រទេសចិន។

យោងតាមក្រុមហ៊ុនផ្តល់ទិន្នន័យហិរញ្ញវត្ថុ Wind Information បានឱ្យដឹងថា បើគិតពីទំហំផ្ទៃក្រឡា ការលក់ការិយាល័យ និងអចលនទ្រព្យផ្សេងទៀត ដែលប្រើប្រាស់ក្នុងគោលបំណងពាណិជ្ជកម្ម បានកើនឡើង១៥% និង១៧% រៀងៗគ្នា នៅក្នុងខែមករា និងខែកុម្ភៈ បើធៀបនឹងឆ្នាំមុន៕ប្រភព:CNBC៕

ដោយ: គង់ លាងហួរ
អន្តរជាតិ: តំបន់អាស៊ីមានគោលដៅទេសចរណ៍ជាច្រើនរាប់មិនអស់ ដែលសាកសមសម្រាប់វិស្សមកាលរដូវក្តៅ ជាមួយនឹងវប្បធម៌ដ៏សម្បូរបែប ទេសភាពដ៏ស្រស់ស្អាត និងកន្លែងប្រវត្តិសាស្ត្រដ៏គួរឱ្យចាប់អារម្មណ៍។

ខាងក្រោមនេះគឺជាគោលដៅទេសចរណ៍ចំនួន៥នៅតំបន់អាសុី ដែលភ្ញៀវទេសចរណ៍អាចចំណាយសមរម្យបំផុតសម្រាប់មកលំហែ នាវិស្សមកាលរដូវក្តៅ ដែលចងក្រងឡើងដោយកាសែតបរទេស The Daily Star ដែលមានមូលដ្ឋាននៅប្រទេសបង់ក្លាដែស។

ទី១. ទីក្រុងCebu ប្រទេសហ្វីលីពីន
នៅក្នុងនាមជាគោលដៅទេសចរណ៍វិស្សមកាលរដូវក្តៅ ដែលចំណាយសមរម្យបំផុត ទីក្រុង Cebu គឺជាគោលដៅទេសចរណ៍ដ៏ពេញនិយមបំផុតរបស់ប្រទេសហ្វីលីពីន។ ឆ្នេរខ្សាច់ពណ៌សដ៏បរិសុទ្ធ ទឹកជ្រោះធ្លាក់ដ៏ស្រស់ស្អាត សមុទ្រដ៏ស្រស់បំព្រង សួនឧទ្យានផ្សងព្រេង និងសកម្មភាពខាងក្រៅជាច្រើនកំពុងរង់ចាំអ្នកធ្វើដំណើរទៅកាន់ទីក្រុងមួយនេះ។

ភ្ញៀវទេសចរណ៍អាចទៅទស្សនាទីក្រុង Cebu ចាប់ពី៣ទៅ៧ថ្ងៃ ដោយចំណាយប្រាក់អស់តិចបំផុត។ សម្រាប់វិស្សមកាលរយៈពេលមួយសប្តាហ៍ ភ្ញៀវទេសចរណ៍អាចចំណាយប្រាក់ជាមធ្យម៤៤៦ដុល្លារ។

ទី២. ទីក្រុង Goa ប្រទេសឥណ្ឌា
ភ្ញៀវទេសចរណ៍ ដែលមានបំណងសម្រាកលំហែនៅពេលវិស្សមកាល គួរតែទៅទស្សនាទីក្រុង Goa ដែលជារដ្ឋតូចបំផុតនៅក្នុងប្រទេសឥណ្ឌា ប៉ុន្តែទីក្រុងនេះគឺជាគោលដៅទេសចរណ៍ដ៏ពេញនិយម។ នៅទីនោះ ភ្ញៀវទេសចរណ៍អាចសម្រាកលំហែកាយនៅតាមខ្ទមមាត់សមុទ្រ ហើយថែមទាំងអាចរីករាយជាមួយនឹងការសម្រាកលំហែជីវិតផងដែរ។ សម្រាប់វិស្សមកាលរយៈពេលមួយសប្តាហ៍ ភ្ញៀវទេសចរណ៍អាចចំណាយប្រាក់ជាមធ្យម២២៩ដុល្លារ។

ទី៣. ខេត្តសៀមរាប ប្រទេសកម្ពុជា
ខេត្តសៀមរាបគឺជាត្បូងមួយគ្រាប់ ដែលមានប្រាសាទបុរាណដ៏អច្ឆរិយៈ ហាងកាហ្វេ និងដងស្ទឹងដ៏ស្ងប់ស្ងាត់។ ក្រៅពីប្រាសាទអង្គរវត្ត ភ្ញៀវទេសចរណ៍ក៏អាចទៅទស្សនាភូមិបណ្តែតទឹកទន្លេសាប និងផ្សាររាត្រីនៅខេត្តសៀមរាប ដើម្បីទទួលបាននូវបទពិសោធន៍ ដែលរួមបញ្ចូលគ្នានូវភាពទំនើបទាន់សម័យជាមួយនឹងភាពបុរាណ។

ភ្ញៀវទេសចរណ៍នៅខេត្តសៀមរាបអាចចំណាយប្រាក់ត្រឹមតែ៧៣ដុល្លារប៉ុណ្ណោះ ក្នុងមួយសប្តាហ៍សម្រាប់ការដឹកជញ្ជូន និងថ្លៃម្ហូបអាហារ។ លើសពីនេះ ភ្ញៀវទេសចរណ៍អាចចំណាយត្រឹមតែ៩១ដុល្លារប៉ុណ្ណោះសម្រាប់ការទស្សនា និងការកម្សាន្ត។

ទី៤. ទីក្រុង Nha Trang ប្រទេសវៀតណាម
ទីក្រុង Nha Trang គឺគោលដៅដ៏ល្អឥតខ្ចោះសម្រាប់ភ្ញៀវទេសចរណ៍ ដែលមានបំណងមកលេងកំសាន្តតាមឆ្នេរសមុទ្រ។ ទីក្រុង Nha Trang មានឆ្នេរសមុទ្រដ៏ស្រស់ស្អាត ថ្មប៉ប្រះទឹក ផ្កាថ្មដែលមិនចេះរីងស្ងួត និងបណ្តុំកោះជាច្រើន គឺជាគោលដៅល្អសម្រាប់ការធ្វើដំណើរកម្សាន្តនារដូវក្តៅ ដែលរកអ្វីមកប្រៀបផ្ទឹមពុំបាន។ ភ្ញៀវទេសចរណ៍អាចសម្រាកវិស្សមកាលរយៈពេលមួយសប្តាហ៍នៅទីក្រុង Nha Trang ដោយចំណាយប្រាក់អស់ប្រហែល២៧៤ដុល្លារ។

ទី៥. ទីក្រុង Dushanbe ប្រទេសតាជីគីស្ថាន
លោកអ្នក អាច ពិចារណា ទៅ ទស្សនា រដ្ឋធានី Dushanbe របស់ ប្រទេសតាជីគីស្ថាន សម្រាប់ វិស្សមកាល នារដូវក្តៅ។ ទីក្រុងនេះបានបង្កប់នូវស្នាដៃសិល្បៈសម័យសូវៀតដ៏ចម្លែក និងអគារដ៏ប្រណីតនៅតាមដងផ្លូវ ដែលមានដាំដើមដើមឈើជាជួរៗ។ ភ្ញៀវទេសចរណ៍អាចសម្រាកវិស្សមកាលរយៈពេលពេញ១សប្តាហ៍នៅទីក្រុង Dushanbe ដោយចំណាយប្រាក់ប្រហែល៣៤៦ដុល្លារ៕ប្រភព:The Nation៕