ភ្នំពេញ: សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ផាម មិញជិញ នាយករដ្ឋមន្ត្រីវៀតណាម បានអញ្ជើញជាអធិបតី ក្នុងពិធីចុះហត្ថលេខាលើឯកសារកិច្ចសហប្រតិបត្តិការចំនួន ៣។

ការអញ្ជើញជាអធិបតីនេះ នៅពេលដែលសម្ដេចធិបតី ហ៊ុន ម៉ាណែត បានដឹកនាំគណៈប្រតិភូជាន់ខ្ពស់ នៃរាជរដ្ឋាភិ បាលកម្ពុជា ទៅបំពេញទស្សនកិច្ចនៅប្រទេសវៀតណាម រយៈពេល ២ថ្ងៃ ចាប់ពីថ្ងៃទី ១១ ដល់ថ្ងៃទី ១២ ខែធ្នូ ឆ្នាំ ២០២៣។

ឯកសារកិច្ចសហប្រតិបត្តិការទាំង ៣នោះ រួមមាន៖ ១.អនុស្សរណៈនៃការ យោគយល់គ្នា ស្តីពី កិច្ចសហប្រតិបត្តិការលើវិស័យវិទ្យាសាស្រ្តបច្ចេកវិទ្យា និងនវានុវត្តន៍ រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងវិទ្យាសាស្រ្ត និងបច្ចេកវិទ្យាវៀតណាម។២. អនុស្សរណៈ នៃការយោគយល់គ្នា ស្តីពី កិច្ចសហប្រតិបត្តិការ រវាងវិទ្យាស្ថានជាតិការទូត និងទំនាក់ទំនងអន្តរជាតិ និងបណ្ឌិត្យសភាការទូតវៀតណាម។ ៣. អនុស្សរណៈ នៃការយោគយល់គ្នារវាងសភាពាណិជ្ជកម្មកម្ពុជា និងសភា ពាណិជ្ជកម្មវៀតណាម៕

ដោយៈ គង់ សូរិយា

ភ្នំពេញៈ មេដឹកនាំជាន់ខ្ពស់របស់ចិន បានប្តេជ្ញាជម្រុញការអភិវឌ្ឍន៍កម្ពុជា ស្របពេលមន្រ្តីជាន់ខ្ពស់ នៃរាជរដ្ឋាភិបាលបានបញ្ជាក់ពីការរួមចំណែកដ៏សំខាន់របស់ចិនលើប្រទេសនេះ។

ប្រសាសន៍ដ៏សំខាន់របស់មេដឹកនាំទាំងពីរ បានលើកឡើងក្នុងជំនួបរវាងលោកឧបនាយករដ្ឋមន្ត្រី សុខ ចិន្តាសោភា រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងលោក WANG YI រដ្ឋមន្ត្រីការបរទេសនៃសាធារណ រដ្ឋប្រជាមានិតចិន ដែលបានប្ដេជ្ញាបន្តគាំទ្រការអភិវឌ្ឍសង្គម-សេដ្ឋកិច្ចនៅកម្ពុជា។ក្នុងជំនួបនោះ លោកឧបនាយករដ្ឋមន្ត្រី បានសង្កត់ធ្ងន់ពីតួនាទីដ៏សំខាន់របស់ចិន នៅក្នុងការអភិវឌ្ឍរបស់កម្ពុជា និងបានវាយតម្លៃខ្ពស់ចំពោះប្រទេសចិន សម្រាប់ការបន្តជំនួយក្នុងគម្រោងហេដ្ឋារចនាសម្ព័ន្ធសំខាន់ៗ ក្រោមគំនិតផ្តួចផ្តើមខ្សែក្រវាត់ និងផ្លូវ រួមមានផ្លូវល្បឿនលឿនភ្នំពេញ- ក្រុងព្រះសីហនុ និងអាកាសយានដ្ឋានអន្តរជាតិសៀមរាប-អង្គរ។

លោកឧបនាយករដ្ឋមន្ត្រីសុខ ចិន្តាសោភា បានសំណូមពរលោក WANG YI ជួយជំរុញឱ្យមានជើងហោះហើរផ្ទាល់ពី ខេត្តនានារបស់ចិន ទៅកាន់ព្រលានយន្តហោះថ្មីក្នុងខេត្តសៀមរាប និងលើកទឹកចិត្តឱ្យមានកំណើនអ្នកទេសចរ ចិនបន្ថែម ដែលជាកិច្ចខិតខំប្រឹងប្រែងរួមគ្នា ដើម្បីអនុវត្តការផ្លាស់ប្តូររវាងប្រជាជន និងប្រជាជនឆ្នាំ២០២៤ ដូចដែលបានប្រកាសដោយថ្នាក់ដឹកនាំ កំពូលនៃប្រទេសទាំងពីរ។

ជាការឆ្លើយតប លោកWANG YI បានសន្យាថា នឹងជួយជំរុញការអនុវត្តប្រកបដោយផ្លែផ្កាឆ្នាំ នៃការផ្លាស់ប្តូររវាងប្រជាជន និងប្រជាជនរួមទាំងការផ្សព្វផ្សាយ ទេសចរណ៍ និងការបង្កើនជើងហោះហើរផ្ទាល់ពីប្រទេសចិនមកខេត្តសៀមរាបផងដែរ៕

ភ្នំពេញ : លោក Chen Lip Keong មហាសេដ្ឋីលំដាប់ទី៧ នៅម៉ាឡេស៊ី និងជាស្ថាបនិកក្រុមហ៊ុន NagaCorp ដែលមានសាខានៅកម្ពុជាផងដែរ បានទទួលមរណភាពនៅវ័យ ៧៥ឆ្នាំ ដោយសារជំងឺ។ បុរសរូបនេះ មានទ្រព្យសម្បត្តិប្រមាណ ២,៨ ពាន់លានដុល្លារ។

តាមសេចក្តីប្រកាសរបស់ក្រុមហ៊ុន NagaCorp ដែលចុះបញ្ជីនៅក្នុងក្រុងហុងកុង នៅថ្ងៃទី១០ ខែធ្នូ លោក Chen Lip Keong មហាសេដ្ឋីលំដាប់ទី៧ នៅម៉ាឡេស៊ី និងជាស្ថាបនិកក្រុមហ៊ុន NagaCorp បានទទួលមរណភាព ដោយសារជំងឺ នៅវ័យ ៧៥ឆ្នាំ។
«ក្រុមប្រឹក្សាភិបាលនៃក្រុមហ៊ុន NagaCorp និងសាខារបស់ខ្លួន ចូលរួមរំលែកទុក្ខចំពោះមរណភាពរបស់លោក Chen Lip Keong»។ ក្រុមហ៊ុន NagaCorp បានបញ្ជាក់បែបនេះ នៅក្នុងសេចក្តីថ្លែងការណ៍មួយ ដោយបន្តសរសើរពីស្នាដៃ និងការដឹកនាំរបស់ជាមហាសេដ្ឋីទី៧ ម៉ាឡេស៊ី ក្នុងអំឡុងពេលដឹកនាំក្រុមហ៊ុន។

ទន្ទឹមនេះ ក្រុមហ៊ុន NagaCorp បានប្រកាសតែងតាំង លោក Chen Yiy Fon ដែលជាកូនប្រុសមួយរូបរបស់លោក Chen Lip Keong និងជានាយកប្រតិបត្តិនៃក្រុមហ៊ុនកន្លងមក ឱ្យក្លាយជាប្រធានប្រតិបត្តិ (CEO) ថ្មី ចាប់ពីថ្ងៃទី១០ ខែធ្នូ ដោយកូនប្រុសរូបនេះ ត្រូវកាន់តំណែង និងមានការខុសត្រូវ ដូចឪពុករបស់ខ្លួនធ្លាប់កាន់ពីមុនមក។

តាមការចុះផ្សាយរបស់ទស្សនាវដ្តីអាម៉េរិក Forb គិតត្រឹមខែឧសភា ឆ្នាំ២០២៣ លោក Chen Lip Keong ជាមហាសេដ្ឋីមានជាងគេលំដាប់ទី ៧ នៅម៉ាឡេស៊ី ដោយមានទ្រព្យសម្បត្តិប្រមាណ ២,៣ពាន់លានដុល្លារ។ នៅក្នុងវេបសាយរបស់ខ្លួន ក្រុមហ៊ុន NagaCorp ទទួលបានអាជ្ញាប័ណ្ណបើកកាស៊ីណូរហូតដល់ឆ្នាំ២០៦៥ នៅកម្ពុជា និងមានសិទ្ធិផ្តាច់មុខ ក្នុងការដំណើរការកាស៊ីណូ ក្នុងចម្ងាយ ២០០គីឡូម៉ែត្រ នៅក្នុងក្រុងភ្នំពេញ រហូតដល់ ២០៤៥៕

ដោយៈ ជេស៊ីកា

ភ្នំពេញៈ ជាដំណឹងរីករាយមួយ ដែលធនាគារជាច្រើននឹងបញ្ចេ​ញឥណទាន ដើម្បីជម្រុញវិស័យអចលនទ្រព្យឡើងវិញ ខណៈឆ្នាំ២០២៣ ធនាគារមួយចំនួនបានបិទឥណទានសម្រាប់វិស័យនេះ។

ក្រុមអ្នកជំនាញអចលនទ្រព្យកម្ពុជា បានសម្តែងសុទិដ្ឋិនិយមលើដំណឹងល្អមួយនេះ។
អគ្គនាយិកាក្រុមហ៊ុនAmatak Property Service Co, Ltdលោកស្រីតាំង ហួរ បានមានប្រសាសន៍ឲ្យដឹង តាមបណ្តាញតេឡេក្រាម កាលពីថ្ងៃទី១០ ធ្នូកន្លង​មកថា វិស័យអចលនទ្រព្យនឹងមានសកម្មភាពឡើងវិញ ដោយយោងលើមតិរបស់ប្រជាពលរដ្ឋ និងអ្នកជំនាញទូទៅ ដែលគិតថាវិស័យអចលនទ្រព្យឆ្នាំ២០២៤ នឹងល្អប្រសើរជាងឆ្នាំនេះ។លោកស្រីបន្តថា “ប្រជាពលរដ្ឋរស់នៅបានសាំនឹងជម្ងឺកូវីដ និងសង្រ្គាមលើពិភពលោកហើយ ដោយពួកគេមិនមានអារម្មណ៍ភិតភ័យអ្វីច្រើនទៀតនោះទេ”។

លោកស្រីតាំង ហួរបានបន្តថា ធនាគារនានានៅកម្ពុជា នឹងបញ្ចេញឥណទានឡើងវិញ នៅឆ្នាំ២០២៤ខាងមុខនេះ ប៉ុន្តែអត្រាការ​ប្រាក់កើនឡើងឬថយចុះ យើងមិនទាន់ដឹងនៅឡើយទេ ព្រោះកាលពីឆ្នាំ២០២៣ ធនាគារជាច្រើនបានបិទឥណទានសម្រាប់វិស័យនេះ ដែ​លធ្វើឲ្យទីផ្សារអចលនទ្រព្យមានបញ្ហា និងចរន្តសេដ្ឋកិច្ចមិនសូវមាន​ដំណើរការល្អប្រសើរ។លោកស្រីបន្តថា “ការមិនបញ្ចេញឥណទានរបស់ធនាគារ ធ្វើឲ្យទីផ្សារអចលនទ្រព្យមានបញ្ហា ហេតុនេះបើធនាគារបញ្ចេញឥណទាន​សម្រាប់ឆ្នាំ២០២៤ នឹងធ្វើឲ្យចរន្តសេដ្ឋកិច្ចប្រសើរឡើង និងធ្វើឲ្យការទិញលក់អចលនទ្រព្យ មានសកម្មភាពឡើងវិញផងដែរ”។លោកស្រីតាំង ហួរបានបន្តទៀតថា បើទោះជាស្ថានភាពនេះ មិនធ្វើឲ្យអចលនទ្រព្យឡើងថ្លៃខ្ពស់វិញក្តី តែវានឹងមានដំណើរការសន្សឹមៗ ដែលមានភាពល្អប្រសើរជាង២០២៤។

បន្ទរបន្ថែមទៀតលើបញ្ហានេះ លោកច្រឹក សុខនីមអគ្គនាយកក្រុមហ៊ុនCentury 21 Mekongបានមានប្រសាសន៍ឲ្យដឹងផងដែរថា បើរាជរដ្ឋាភិបាល បានទម្លាក់កញ្ចប់ថវិកាសម្រាប់ឆ្នាំ២០២៤ ដើម្បីជួយដល់វិស័យនេះ ជាពិសេសជួយរៀបចំរចនាសម្ព័ន្ឋ និងកែទម្រង់លើការផ្តល់ឥណទាន​មួយចំនួន នឹងធ្វើឲ្យវិស័យនេះមានសកម្មភាពបន្តិចម្តងៗមិនខាន។លោកបន្តថា “បច្ចុប្បន្នវិស័យនេះមានសភាពស្ងប់ស្ងាត់ អញ្ចឹងបើមានយន្តការក្នុងការបន្ឋូរបន្ថយ ក្នុងការផ្តល់ឥណទានកាន់តែច្រើន នឹងជួយស្រោចស្រង់ និងធ្វើឲ្យវិស័យនេះកាន់តែរីកចម្រើន”។លោកបន្តថា “ការជួយពីរាជរដ្ឋាភិបាលជារឿងចាំបាច់ និងសំខាន់បំផុតក្នុងកាលៈទេសៈដ៏លំបាកនេះ”។

លោកបណ្ឌិតអ៊ិន ចាន់នីប្រធាននាយកប្រតិបត្តិធនាគារអេស៊ីលីដាបានមានប្រសាសន៍ឲ្យដឹងនៅថ្ងៃដដែលថា ធនាគារអេស៊ីលីដានឹងបន្តគាំទ្រវិស័យនេះ ដោយសារវិស័យនេះ ជាកំលាំងចលករជម្រុញកំនើនសេដ្ឋកិច្ចមួយធំ ដែលបច្ចុប្ប​ន្នធនាគារនៅតែផ្តល់ឥណទាន និងបន្តផ្តល់ឥណទានសម្រាប់ឆ្នាំ២០២៤ ប៉ុន្តែការផ្តល់កម្រិតណា អាស្រ័​យលើការវាយតម្លៃជាក់ស្តែងរបស់អាជីវកម្មនោះ។លោកបន្តថា “អ្វីសំខាន់ គឺយើងធ្វើការវាយតម្លៃតាមស្ថានភាពជាក់ស្តែងរបស់អ្នកអភិវឌ្ឍន៍ និងម្ចាស់អាជីវកម្មក្នុងវិស័យអចលនទ្រព្យជាក់ស្តែង”។

ជាមួយគ្នានេះ អ្នកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និងជាម្ចាស់ធនាគារធំមួយនៅកម្ពុជាផងដែរនោះបានមានប្រសាសន៍ថា ធនាគាររបស់លោក នៅតែបន្តផ្តល់ឥណទានដល់វិស័យនេះ ដោយមិនមានការបិទឥណទាននោះទេ។ អ្នកឧកញ៉ាបានបន្តថា ជាគោលការណ៍ពីធនាគារជាតិនៃកម្ពុជា គឺមិនតម្រូវឲ្យធនា​គារបិទ ឬុមិនផ្តល់ឥណទាន សម្រាប់វិស័យអចលនទ្រព្យនោះទេ។អ្នកឧកញ៉ាបានបន្តថា “បើសួរថាតើនឹងមានការបញ្ចេញឥណទា​នក្នុងកម្រិតណានៅឆ្នាំ២០២៤ យើងមិនអាចកំណត់បានទេ វាអាស្រ័​យតាមគោលនយោបាយផ្ទៃក្នុងរបស់ធនាគារនិមួយៗ”។

ធនាគារ និងស្ថាប័នមីក្រូហិរញ្ញវត្ថុជាច្រើន បានបិទនិងខ្លះទៀតបានរឹតបន្តឹងលើឥណទាន សម្រាប់វិស័យអចលនទ្រព្យ ចាប់តាំងពីឆ្នាំ២០២០មក ជាមូលហេតុមួយ ក្នុងចំណោមមូលហេតុចម្បងនានា ដែលធ្វើឲ្យវិស័យសំណង់ និងអចលនទ្រព្យមានសភាពមិនច្បាស់​លាស់ និងកំណើនយឺតយ៉ាវ៕

ដោយ: គង់ លាងហួរ

ភ្នំពេញ: ស្របពេលដែលតម្រូវការសេវាធនាគារ មានការកើនឡើង ធនាគារ Chief Bank បានបើកសាខានៅអ៊ីអនមានជ័យក្នុងខែមីនា ឆ្នាំ២០២៣នេះ ដោយផ្តល់សេវាកម្មរយៈពេល៧ថ្ងៃ ក្នុងមួយសប្តាហ៍។

ទន្ទឹមគ្នានេះ លោកបណ្ឌិត សឿង ម៉ូរ៉ារិទ្ធ ប្រធាននាយកប្រត្តិបត្តិនៃធនាគារ Chief Bank លើកឡើងក្នុងពិធីប្រារពខួប១០ឆ្នាំរបស់ធនាគារនេះកាលពីចុងសប្តាហ៍មុនថា ទីស្នាក់ការកណ្តាល (HQ) របស់ធនាគារChief Bank នឹងត្រូវផ្លាស់ប្តូរនៅឆ្នាំក្រោយ ទៅកាន់ អគារChief Tower ដែលមានទីតាំងជាយុទ្ធសាស្រ្ត ស្ថិតនៅតាមបណ្តោយមហាវិថីព្រះមុនីវង្ស កែងផ្លូវលេខ៩៣ សង្កាត់បឹងកេងកងទី១ រាជធានីភ្នំពេញ។លោកបណ្ឌិតបានបន្តថា យើងគ្រោងពិចារណាលើការបើកសាខាថ្មី នៅក្នុងរាជធានីភ្នំពេញបន្ថែមទៀត និងបណ្តាខេត្តផ្សេងទៀត ដើម្បីធ្វើយ៉ាងណាឱ្យសេវាកម្មធនាគារ លំដាប់ពិភពលោករបស់យើង កាន់តែខិតទៅជិតអតិថិជន នៅទូទាំងប្រទេសកម្ពុជា​។  ក្រៅ​ពី​នោះ យើង​ក៏​កំពុង​ធ្វើ​ការ​សិក្សា​លទ្ធភាព​ នៃ​ការពង្រីក ​សា​ខា​នៅ​តាម​ខេត្ត​ធំៗ​ផ្សេង​ទៀត​ដូច​ជា ខេត្តសៀមរាប បាត់ដំបង កំពង់ចាម និង​ខេត្ត​ព្រះសីហនុផងដែរ។

ពិធីប្រារពខួប១០ឆ្នាំ នៃការបង្កើតធនាគារ Chief Bank កាលពីថ្ងៃសៅរ៍ ទី៩ ខែវិច្ឆិកា ឆ្នាំ២០២៣ ដោយមានការចូលរួមពីលោក ហេង​ បូមករា អគ្គនាយករងត្រួតពិនិត្យទី១ នៃធនាគារជាតិនៃកម្ពុជា និងលោកYe Haiya(Michael) តំណាងដ៏ខ្ពង់ខ្ពស់របស់ប្រធានក្រុមប្រឹក្សាភិបាលនៃធនាគារឈីហ្វ។

ប្រទេសកម្ពុជាបានធ្វើសេរីភាវូបនីយកម្ម សេដ្ឋកិច្ចរបស់ខ្លួនបន្តិចម្តងៗ និងបានបើកទ្វារយ៉ាងទូលំទូលាយ ទៅកាន់ពិភពលោកទាំងមូល ចាប់តាំងពីក្រោយការបោះឆ្នោតលើកដំបូង ដែលឧបត្ថម្ភដោយអង្គការសហប្រជាជាតិក្នុងឆ្នាំ១៩៩៣។សកម្មភាពវិនិយោគផ្ទាល់ពីបរទេសលើគ្រប់វិស័យ រួមទាំងវិស័យហិរញ្ញវត្ថុបានកើនឡើងយ៉ាងខ្លាំង ដែលនៅតែបន្តពង្រីកឥតឈប់ឈរ។  ជាលទ្ធផល កម្ពុជាទទួលបានអត្រាកំណើនសេដ្ឋកិច្ចខ្ពស់ក្នុងរយៈពេលដ៏វែងបំផុតក្នុងប្រវត្តិសាស្ត្រ ដោយសារស្ថិរភាពនយោបាយ និងម៉ាក្រូសេដ្ឋកិច្ច រួមជាមួយនឹងសន្តិភាពពេញលេញ ដែលប្រទេសកម្ពុជាទទួលបានចាប់តាំងពីចុងឆ្នាំ ១៩៩៨។

កម្ពុជា​បាន​កត់ត្រា​អត្រា​កំណើន​សេដ្ឋកិច្ច ជា​មធ្យម៧,៧ភាគរយ​ក្នុង​មួយ​ឆ្នាំ ​សម្រាប់​រយៈពេល​ពីរ​ទសវត្សរ៍​កន្លង​មក​ ដែលការណ៍នេះបានរួមចំណែកយ៉ាងសំខាន់ ដល់ការខិតខំប្រឹងប្រែងរបស់រាជរដ្ឋាភិបាលក្នុងការប្រយុទ្ធប្រឆាំង នឹងការកាត់បន្ថយភាពក្រីក្រដោយជោគជ័យ ដែលបន្តធ្លាក់ចុះពី១០០% ក្នុងឆ្នាំ១៩៧៩ មកនៅត្រឹម១៣,៥% នៅក្នុងឆ្នាំ២០១៤ និងកាន់តែទាបជាងមុន នាពេលសព្វថ្ងៃនេះ។ អ្វីដែលគួរឱ្យចាប់អារម្មណ៍គឺ វិសមភាពបានរួមតូចសម្រាប់ប្រ​ទេសកម្ពុជា ខណៈពេលដែលវិសមភាពសកល ជាពិសេសនៅក្នុងប្រទេសអ្នកមានមួយចំនួនកំពុងរីកធំ។

ទាក់ទងនឹងវិស័យធនាគារ ដោយមើលឃើញពីតម្រូវការវិនិយោគក្នុងស្រុកដ៏ខ្ពស់ វិស័យនេះ និងស្ថាប័នហិរញ្ញវត្ថុផ្សេងទៀត ដូចជាមីក្រូហិរញ្ញវត្ថុ បានទទួលផលចំណេញ ទាក់ទាញការចូលថ្មី និងនាំទៅដល់ការលូតលាស់យ៉ាងឆាប់រហ័សនៃវិស័យនេះ ដែលត្រូវបានឆ្លុះបញ្ចាំងតាមរយៈការកើនឡើង យ៉ាងខ្លាំងនៃទ្រព្យសកម្ម ឥណទាន ប្រាក់បញ្ញើ តម្រូវការកម្ចីធនាគារ និងសេវាកម្មធនាគារផ្សេងទៀត។

លោកបណ្ឌិតសឿង ម៉ូរ៉ារិទ្ឋបានបន្តថា ភាពជោគជ័យនៅក្នុងវិស័យធនាគារបណ្តាល មកពីការកែលម្អយ៉ាងសំខាន់ នៅក្នុងប្រព័ន្ធហិរញ្ញវត្ថុ និងធនាគាររបស់ប្រទេសកម្ពុជា ដែលបានបន្តអភិវឌ្ឍ និងកែលម្អជាលំដាប់ ដែលកត្តានេះបានជួយបង្កើនទំនុកចិត្ត របស់អ្នកវិនិយោគ និងទំនុកចិត្តសាធារណៈកាន់តែខ្លាំងឡើង នៅក្នុងវិស័យធ​នាគារ និងផ្នែកពាក់ព័ន្ធ ដែលជំរុញឱ្យមានតម្រូវការខ្ពស់សម្រាប់សេវាហិរញ្ញវត្ថុ និងធនាគារ និងសេវាកម្មពាក់ព័ន្ធផ្សេងទៀត៕

ដោយៈ ស៊ីវ ម៉េង

ភ្នំពេញៈ ក្រុមអ្នកជំនាញអចលនទ្រព្យ បានសម្តែងសុទិដ្ឋិនិយមពីការងើបឡើងវិញ សម្រាប់វិស័យអចលនទ្រព្យ នៅឆ្នាំ២០២៤ខាងមុខ ខណៈសញ្ញាវិជ្ជមានមួ​យចំនួន បានចាប់ផ្តើមបង្ហាញភាពល្អប្រ​សើ​រមួយចំនួន។

ជាមួយនឹងការបន្តមិនយកពន្ឋលើលំនៅដ្ឋាន ដែលមានតម្លៃចាប់ពី៧០,០០០ដុល្លារ​ចុះ ពីរដ្ឋាភិបាលនៅឆ្នាំ២០២៤ ការអនុវត្តច្បាប់បរធនបាលកិច្ច ដែលអនុញ្ញាត្តឲ្យជនបរទេសទិញលំនៅដ្ឋានបានជាមួយកិច្ចសន្យា ក្នុងពេលវេលាជាក់លាក់ណាមួយ និងការកើនឡើងវិញនៃវិស័យទេសចរណ៍ នឹងធ្វើឲ្យវិស័យនេះមានភាពរីកចម្រើ​នក្នុងកម្រិតមួយសមល្មម។

អគ្គនាយិកាក្រុមហ៊ុនAmatak Property Service Co, Ltd លោកស្រីតាំង ហួរបានមានប្រសាសន៍ឲ្យដឹង កាលពីថ្ងៃទី១០ ធ្នូថា មានព័ត៌មានជាវិជ្ជមានមួយចំនួន ដែលបាននិងកំពុងធ្វើឲ្យអ្នកនៅក្នុងវិស័យនេះរីករាយ ដោយធនាគារជាច្រើននឹងបើកឥណទាន សម្រាប់ វិស័យសំណង់ និងអចលនទ្រព្យឡើងវិញ។លោកស្រីបន្តថា “ការរីកចម្រើនវិស័យទេសចរណ៍ អាចនឹងមានភាពល្អប្រសើរនៅឆ្នាំខាងមុខ បន្ទាប់ពីការបើកដំណើរការព្រលានយន្តហោះអន្តរជាតិសៀមរាប អង្គរ ដែលបានទាក់ទាញក្រុមហ៊ុនអា​កាសចរណ៍ថ្មីៗអាចចុះចតបាន”។

លោកស្រីបន្តថា ការមកដល់របស់ភ្ញៀវទេសចរណ៍ នឹងធ្វើឲ្យមានលំហូរសាច់ប្រាក់ក្នុងសេដ្ឋកិច្ច ហើយសេដ្ឋកិច្ចនឹងងើបឡើង ដែលនឹងធ្វើឲ្យមានលំហូរសាច់ ប្រាក់មកក្នុងវិស័យអចលនទ្រព្យផងដែរ។

ជាមួយគ្នានេះ លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាង បានលើកឡើងផងដែរថា វិបត្តិសេដ្ឋកិច្ចសកលរយៈពេល៤ឆ្នាំ បានបង្រៀនមនុស្ស ពិសេសម្ចាស់អាជីវកម្ម និងក្រុមហ៊ុននានា ចេះអត់ធ្មត់ និងចេះគ្រប់​គ្រងហិរញ្ញវត្ថុបានត្រឹមត្រូវ ដើម្បីឆ្លងផុតដំណាក់កាលដ៏លំបាក តាំងពីវិបត្តិកូវីដ-១៩ រហូតដល់មានវិបត្តិសង្គ្រាមរ៉ាំរ៉ៃ នាពេលបច្ចុប្បន្ន។លោកឧកញ៉ាបណ្ឌិតបានបញ្ជាក់ថា មេរៀនដែលយើងបានឆ្លងកាត់ ហើយយើងកំពុងតែឆ្លងកាត់ ទាក់ទងនឹងវិបត្តិសេដ្ឋកិច្ចសកល សង្គ្រាមសកល តាំងពីឆ្នាំ២០២០ ដល់ចុងឆ្នាំ២០២៣ បានបង្រៀនមនុស្សយើងលើចំណុចជាច្រើន ដូចជា ទី១-ត្រូវមានភាពអត់ធ្មត់ ព្រោះមានតែការអត់ធ្មត់ទេ ទើបអាចឲ្យយើងឆ្លងកាត់រឿងលំបាកជាច្រើន និងទី២ ធ្វើឲ្យយើងចេះគ្រប់គ្រងហិរញ្ញវត្ថុ ឬការប្រើប្រាស់លុយ។

លោកពន្យល់បន្ថែមថា យើងបានឆ្លងកាត់ដំណាក់កាលទី១ គឺពិបាករកលុយ ទី២-ពិបាកក្នុងការប្រើប្រាស់លុយ ឬគ្រប់គ្រងលុយ ។

លោកឧកញ៉ាបណ្ឌិតបានបន្តថា “ខ្ញុំមើលឃើញ អ្នករកស៊ីភាគច្រើនដែលបរាជ័យ ព្រោះគាត់ប្រើប្រាស់លុយមិនចំគោលដៅ”។លោកបន្ថែមថា “គ្រប់បណ្ដាក្រុមហ៊ុន ឬអាជីវកម្មធំៗ មិនថាក្រុមហ៊ុនអចលនាទ្រព្យ ឬក្រុមអភិវឌ្ឍន៍លំនៅដ្ឋានទេ អ្នកដែលនៅឈររឹងមាំបាន គឺជាអ្នកដែលពូកែរកលុយផង ហើយពូកែគ្រប់គ្រង និងប្រើប្រាស់លុយឲ្យចំគោលដៅផង”។

ជាមួយគ្នានេះ លោក Edward Ivory ប្រធានសាខា KW ខេត្តកំពតបានមានប្រសាសន៍ថា ប៉ុន្មានឆ្នាំចុងក្រោយនេះ គ្រប់បណ្ដាប្រទេស សុទ្ធតែទទួលរងផលប៉ះពាល់ តែលោកមានសុទិដ្ឋិនិយម ចំពោះប្រទេសកម្ពុជា ក្រោមការដឹកនាំរបស់រាជរដ្ឋាភិបាល នឹងធ្វើឲ្យសេដ្ឋកិច្ចកម្ពុជាកាន់តែប្រសើរ ពិសេសនៅពាក់កណ្ដាលឆ្នាំ២០២៤ ខាងមុខ។ទោះជាយ៉ាងណាក្រសួងសេដ្ឋកិច្ច និងហិរញ្ញវត្ថុបានព្យាករណ៍កាលពីពេលថ្មីៗនេះថា សេដ្ឋកិច្ចកម្ពុជានឹងសម្រេចបានកំណើនប្រ​មាណ៦,១ភាគរយក្នុងឆ្នាំ២០២៤ ជាមួយការងើបឡើងវិញនៃវិស័យទេសចរណ៍ កសិក​ម្ម ឧស្សាហកម្ម កម្មន្តសាល ខណៈវិស័យអចល​ទ្រព្យនឹងនៅតែបន្តរក្សាបានកំណើនយឺតដដែល៕

(ភ្នំពេញ)៖ លោកយិន លាងគង់ ស្ថាបនិក និងអគ្គនាយកនៃគេហទំព័រProperty Area និង Cambodia Financial Timeរួមទាំងបុគ្គលិកទាំងអស់ សូមចូលរួមអបអរសាទរបានផ្ញើសារអបអរសាទរ និងជូនពរ និងអបអរសាទរចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសដែលសម្តេចធិបតី ត្រូវបានអង្គសន្និបាតគណៈកម្មាធិការកណ្តាល លើកទី៤៤ អាណត្តិទី៥ នាថ្ងៃទី១០ ខែធ្នូ ឆ្នាំ២០២៣ បោះឆ្នោតសម្រេចជ្រើសតាំងជា អនុប្រធានគណបក្សប្រជាជនកម្ពុជា។

សម្តេចមហាបវរធិបតី ជាឥស្សរជនជាតិដ៏ឆ្នើមរបស់ជាតិ ប្រកបដោយវីរភាពដ៏ត្រចះត្រចង់ ដែលជានិច្ចកាលតែងយកអស់កម្លាំងកាយចិត្ត បញ្ញាស្មារតី ក្នុងការចូលរួមបម្រើផលប្រយោជន៍ជាតិ និងប្រជាជន ព្រមទាំងបាន និងកំពុងបំពេញបេសកកម្មយ៉ាងសកម្ម ក្នុងការកសាងសមិទ្ធផលសង្គមយ៉ាងច្រើន រួមចំណែកធ្វើឲ្យប្រទេសជាតិ មានសុខសន្តិភាព វឌ្ឍនភាព ប្រជាធិបតេយ្យពេញលេញ និងរីកចម្រើនលើគ្រប់វិស័យ ក្នុងដំណើរឆ្ពោះទៅកាន់នីតិរដ្ឋរឹងមាំ ដើម្បីឧត្តមប្រយោជន៍ ជាតិ សាសនា ព្រះមហាក្សត្រ។

នាឱកាសដ៏មង្គលសួស្ដីថ្លៃថ្លារីករាយនេះ យើងខ្ញុំសូមបួងសួងដល់តេជបារមីនៃវត្ថុស័ក្តិសិទ្ធិទាំងអស់ក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា សូមអភិបាលប្រោះព្រំ ប្រសិទ្ធពរជ័យជូន សម្តេចមហាបវរធិបតី ព្រមទាំងក្រុមគ្រួសារ បុត្រាបុត្រីជាទីស្រឡាញ់ សូមបន្តជោគជ័យគ្រប់ភារកិច្ច និងសូមបានប្រកបដោយព្រះពុទ្ធពរទាំង៤ ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕