ដោយៈ តែម សុខុម
បាងកក: ក្រុមហ៊ុនផលិតរថយន្តប្រណីត លំដាប់សេដ្ឋីរបស់ប្រទេសអង់គ្លេស Rolls-Royce Motor Cars គ្រោងផលិតរថយន្តអគ្គិសនីសុទ្ធ (All-electric Automobile) ក្នុងផ្នែករថយន្តអគ្គិសនីលំដាប់ខ្ពស់នៅឆ្នាំ២០៣០។

ក្រុមហ៊ុននេះបានបង្ហាញពីគោលដៅ ថ្ងៃអនាគតរបស់ខ្លួននេះ បន្ទាប់ពីចេញលក់រថយន្តអគ្គិសនី (EV) ប្រណីតដំបូងគេក្នុងពិភពលោក។ នេះបើយោងតាមកាសែត The Nation ចុះផ្សាយកាលពីថ្ងៃសុក្រ ទី២០ ខែតុលា។

កាលពីពេលថ្មីៗនេះក្រុមហ៊ុន Rolls-Royce បានបញ្ចេញរថយន្ត EV ដំបូងបង្អស់របស់ខ្លួន ដែលមានឈ្មោះថា “Spectre” នៅប្រទេសថៃ បន្ទាប់ពីខ្លួនបានបញ្ចេញរថយន្តនេះ ​ជាលើកដំបូងនៅប្រទេសកូរ៉េខាងត្បូង ដែលស្ថិតក្នុងតំបន់អាស៊ី-ប៉ាស៊ីហ្វិក និងប្រទេ​សសិង្ហបុរី ដែលស្ថិតក្នុងតំបន់អាស៊ីអាគ្នេយ៍។ រថយន្ត Rolls-Royce អគ្គិសនីមូឌែលដំបូង Spectre នេះមានតម្លៃចាប់ពីប្រមាណ៣២លានបាត ឬជិត៨៨០.០០០ដុល្លារអាមេរិក ឡើងទៅ។

តំបន់អាស៊ី-ប៉ាស៊ីហ្វិក គ្របដណ្ដប់ជាង៦០%នៃទីផ្សាររថយន្ត EV ទូទាំងពិភពលោក ហើយក្រុមហ៊ុន Rolls-Royce សម្លឹងឃើញសក្តានុពល ក្នុងការសម្រេចបានកំណើន ជាពិសេសក្នុងប្រទេសចិន ដែលជាទីផ្សារធំទី២ របស់ក្រុមហ៊ុននេះ។

លោកស្រី Irene Nikkein នាយកប្រចាំតំបន់អាស៊ី-ប៉ាស៊ីហ្វិកនៃក្រុមហ៊ុន Rolls-Royce Motor Cars បានថ្លែងថា “Rolls-Royce ជឿនលឿនណាស់ផ្នែកបច្ចេកវិទ្យា និងវិស្វកម្ម។ ដូច្នេះក្នុងនាមជាក្រុមហ៊ុនដំបូង និងតែមួយគត់ នៅក្នុងទីផ្សាររថយន្តប្រណីតពេលនេះគឺជាការផ្លាស់ប្ដូរដ៏អស្ចារ្យ”៕ The Nation៕

ដោយ: គង់ លាងហួរ

អន្តរជាតិ: ស្ថាប័នអាជីវកម្មលក់រាយOR របស់ក្រុមហ៊ុនប្រេងខ្នាតយក្ស PTT កំពុងពង្រីកអាជីវកម្មអន្តរជាតិរបស់ខ្លួន ដោយផ្តោតជាពិសេសលើកម្ពុជា ដែលក្រុមហ៊ុននេះចាត់ទុកជាផ្ទះទី២ របស់ពួកគេ ដើម្បីទ្រទ្រង់ដល់កំណើនប្រកបដោយចីរភាព។

លោក Disathat Panyarachun នាយកប្រតិបត្តិក្រុមហ៊ុន PTT Oil and Retail Business Pcl (OR) បានបង្ហាញពីយុទ្ធសាស្ត្រ និងទិសដៅរបស់ក្រុមហ៊ុន ក្នុងការធ្វើអាជីវកម្មអន្តរជាតិ ដើម្បីពង្រឹងភាពរឹងមាំនៃប្រតិបត្តិការរបស់ខ្លួន។

ជាក់ស្តែង ក្រុមហ៊ុននេះគ្រោងធ្វើពិពិធកម្ម អាជីវកម្មរបស់ពួកគេ ដូចជាតាមរយៈការលក់ឧស្ម័ន LPG និងកៅស៊ូអ៊ុតថ្នល់ ព្រមទាំងធ្វើការពង្រីកប្រតិបត្តិការអន្តរជាតិ ជាមួយដៃគូរបស់OR ដូចជាក្រុមហ៊ុន K-NEX Corporation ហាងបោកគក់ និងសម្ងួតសម្លៀកបំពាក់បែបទំនើប និងរហ័សទាន់ចិត្ត Otteri Wash & Dry និងក្រុមហ៊ុន Dusit Foods Limited។សម្រាប់ប្រទេសកម្ពុជា ដែលជាទីតាំងធ្វើអាជីវកម្មអន្តរជាតិរបស់ក្រុមហ៊ុនOR វាគឺប្រៀបដូចជាផ្ទះទីពីររបស់ពួកគេ ព្រោះថា នៅកម្ពុជា នៅតែមានឱកាសជាច្រើនសម្រាប់ការរីកចម្រើន។គិតត្រឹមខែសីហា ឆ្នាំ២០២៣នេះ ក្រុមហ៊ុនOR បានបើកដំណើរការសាខាស្ថានីយPTT ចំនួន១៦៩ និងឃ្លាំងផលិតផលចំនួន៧ រួមជាមួយនឹងអាជីវកម្មប្រេងរំអិល PTT Lubricantsនៅកម្ពុជា។

ទន្ទឹមគ្នានេះ ក្រុមហ៊ុនក៏បានវិនិយោគ ក្នុងគម្រោងបណ្តាក់ទុនរួមគ្នា ដើម្បីផ្តល់ឥន្ធនៈអាកាសចរណ៍ នៅឯអាកាសយានដ្ឋានអន្តរជាតិថ្មីក្នុងរាជធានីភ្នំពេញ ដែលគ្រោងនឹងបញ្ចប់នៅត្រីមាសទី៣ ឆ្នាំ២០២៤ខាងមុខនេះ។ចំណែកឯ នៅក្នុងប្រភេទអាជីវកម្មបែប Lifestyle ក្រុមហ៊ុន OR មានសាខា Café Amazon ចំនួន២៣១ និងហាងទំនិញងាយស្រួលចំនួន៦៥នៅកម្ពុជា។

លើសពីនេះ ក្រុមហ៊ុនOR មានគម្រោងវិនិយោគលើហេដ្ឋារចនាសម្ព័ន្ធដើម្បីគាំទ្រដល់ការពង្រីកអាជីវកម្ម ដូចជា ឃ្លាំងប្រេង និងឧស្ម័ន LPG រោងចក្រលាយកៅស៊ូអ៊ុតថ្នល់ និងស្វែងរកឱកាសនៅក្នុងអាជីវកម្ម ដែលទាក់ទងនឹងថាមពលផ្សេងទៀត ដូចជា ការប្តូរថ្មអាគុយ (Battery Swapping) និងស្ថានីយបញ្ចូលថាមពលយានយន្ដអគ្គិស នី (EV station Pluz) ជាដើម៕

ដោយៈ ហ្វីអូណា

        ភ្នំពេញៈ ប្រជាពលរដ្ឋ៧០០គ្រួសារ ដែលរងផលប៉ះពាល់ក្នុងគម្រោងសាងសង់ផ្លូវ និងស្ពានឆ្លងកាត់ទន្លេមេគង្គ ក្នុងខេត្តក្រចេះអាជ្ញាធរកំពុងពន្លឿនក្នុងការដោះស្រាយហើយ។

ការដោះស្រាយនេះ ដើម្បីឲ្យក្រុមហ៊ុនសំណង់សៀងហៃគ្រុប បានចុះបើកការដ្ឋានសាង់សង់ “មហាវិថីតេជោ” ចាប់ពីរង្វង់មូលព្រាប ស រហូតដល់រង្វង់មូលខ្លាស្ទុះ ឲ្យបានលឿនទៅតាមគម្រោងផែនការ។នេះការលើកឡើងរបស់ លោក លឹម ស៊ីដេនីន រដ្ឋលេខាធិការក្រសួងសាធារណៈការ និងដឹកជញ្ជូន និងជានាយកគ្រប់គ្រងគម្រោងសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់ នៅក្នុងកិច្ចប្រជុំជាមួយលោក វ៉ា ថន អភិបាលខេត្តនិងក្រុមការងារ គណៈកម្មការអន្តរក្រសួង ក្នុងការចុះអនុវត្តការងារដោះស្រាយ ផលប៉ះពាល់ដោយសារគម្រោងសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់ក្នុងភូមិសាស្ត្រខេត្តក្រចេះ នៅថ្ងៃទី២០ ខែតុលា ឆ្នាំ២០២៣ នៅសាលប្រជុំក្រុមប្រឹក្សាខេត្ត។លោកលឹម ស៊ីដេនីន បានបន្តថា នៅក្នុងដំណាក់កាលទី១.យើងចុះស្រង់ផលប៉ះពាល់នៃគម្រោងធ្វើផ្លូវ និងគម្រោងសាងសង់ស្ពាន។ទី២. យើងត្រូវធ្វើកិច្ចសន្យាឲ្យបានច្បាស់លាស់ សំដៅលើការដោះស្រាយផលប៉ះពាល់ កុំឲ្យមានជម្លោះទៅថ្ងៃក្រោយ ជាមួយប្រជាពលរដ្ឋ។លោកលឹម ស៊ីដេនីន ក៏បានបញ្ជាក់ថា រាជរដ្ឋាភិបាលកម្ពុជាក្រោមការដឹកនាំ ដោយសម្ដេចមហាបវរអធិបតី ហ៊ុន ម៉ាណែត ជានាយករដ្ឋមន្ត្រី ក្នុងអាណត្តិទី៧នេះ ដែលបានដាក់ចេញនៅយុទ្ធសាស្ត្រ បច្ចុកោណ “មនុស្ស,ផ្លូវ,ទឹក,ភ្លើងនិងបច្ចេកវិទ្យាឌីជីថល។លោកបបន្តថា សូមឲ្យមន្រ្តីយើងទាំងអស់គ្នា ខិតខំប្រឹងប្រែងធ្វើល្អ ដើម្បីបម្រើប្រជាពលរដ្ឋ ទៅតាមគោលនយោបាយរាជរដ្ឋាភិបាលដើម្បីសំដៅឲ្យប្រជាពលរដ្ឋយើង បានរស់នៅធម្មតាហ្នឹងមានជីវភាពល្អប្រសើរ។គម្រោងសាងសង់ផ្លូវតភ្ជាប់ និងស្ពានឆ្លងកាត់ទន្លេមេគង្គ ក្នុងខេត្តក្រចេះ គឺជាជំនួយឥណទានសម្បទាន ​ពីរាជរដ្ឋាភិបាលសាធារ​ណរដ្ឋប្រជាម៉ាចិន ដែលបានបើកការដ្ឋានសាងសង់កាលពីថ្ងៃទី ២ ខែមករា ឆ្នាំ ២០២៣ ដោយសម្ដេចអគ្គមហាសេនាបតីតេជោ ហ៊ុនសែន បច្ចុប្បន្ននេះស្ពានឆ្លងក្នុងខេត្តក្រចេះ ដោយសម្រេចការសាងសង់ បាន១៧%ហើយ។ ស្ពាននេះមានគម្រោងសាងសង់មានរយៈពេល៤២ខែទើបបញ្ចប់៕

ដោយៈ គង់ សូរិយា

        ប្រទេសចិនៈ លោកឧបនាយករដ្ឋមន្ត្រីស៊ុន ចាន់ថុលអនុប្រធានទី១ក្រុមប្រឹក្សាអភិវឌ្ឍន៍កម្ពុជា អញ្ជើញចុះទស្សនកិច្ចនៅទីក្រុង Shenzhen សាធារណរដ្ឋប្រជាមានិតចិន ដើម្បីទាក់ទាញវិនិយោគិន និងបង្ហាញជូនឱកាសវិនិយោគថ្មីៗនៅកម្ពុជា ដល់ក្រុមហ៊ុនចំនួន២រួមមាន ក្រុមហ៊ុនផលិតកង់ XDS Bicycle និងក្រុមហ៊ុន Huawei។

ក្នុងឱកាសនោះ លោកបានអញ្ជើញចុះទស្សនកិច្ចថែទាំវិនិយោ​គិន បង្ហាញជូនឱកាសវិនិយោគថ្មីៗ និងពិភាក្សាការងារជាមួយលោកស្រី Chuqiao Li អនុប្រធានក្រុមហ៊ុន SHENZHEN XIDESHENG Bicycle Co., Ltd. (XDS) និងលោក Jianlin Bao អនុប្រធានក្រុមហ៊ុន Huawei Technologies Co., Ltd.។ដំណើរទស្សនកិច្ចថែទាំវិនិយោគដោយផ្ទាល់ ជាលើកដំបូង (Investment Aftercare) ដល់ស្នាក់ការកណ្តាលរបស់ក្រុមហ៊ុនផលិតកង់ XDS Bicycle និងក្រុមហ៊ុនHuawei នេះ គឺជាបេសកកម្មលើកទី១ របស់ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា ក្នុងនីតិកាលទី៧ ដើម្បីបង្ហាញការយកចិត្តទុកដាក់ របស់រាជរដ្ឋាភិបាលកម្ពុជាដល់វិនិយោគិនក្រៅប្រទេស ដែលបានចូលមកវិនិយោគនៅកម្ពុជា តាមរយៈការចុះសួរសុខទុក្ខវិនិយោគិនដោយផ្ទាល់ និងជម្រាបជូនអំពីឱកាសវិនិយោគថ្មីៗនៅកម្ពុជា ដល់ទីស្នាក់ការកណ្តាលរបស់ក្រុមហ៊ុន។

ក្នុងជំនួបជាមួយ XDS Bicycle ក្រុមហ៊ុនបានថ្លែងអំណរគុណដល់រាជរដ្ឋាភិបាលកម្ពុជា ដែលបានផ្តល់ការយកចិត្តទុកដាក់ជាខ្លាំង និងបានផ្តល់ឱកាស ឱ្យក្រុមហ៊ុនមានលទ្ធភាព ក្នុងការពង្រីកសង្វាក់ផលិតកម្មរបស់ខ្លួនបានយ៉ាងឆាប់រហ័ស ក្នុងព្រះរាជាណាចក្រកម្ពុជា។ជាពិសេសជាងនេះទៅទៀត ក្រុមហ៊ុនបានបង្ហាញអំពីចក្ខុវិស័យ ក្នុងការពង្រីករោងចក្ររបស់ខ្លួន ដែលមានទីតាំងក្នុងក្រុងបាវិត ឱ្យមានទំហំធំដូចរោងចក្រ ក្នុងទីស្នាក់ការកណ្តាលទីក្រុង Shenzhen នេះផងដែរ។

ជាមួយគ្នានេះដែរ លោកឧបនាយករដ្ឋមន្ត្រី បានថ្លែងអំណរគុណដល់ក្រុមហ៊ុនXDS Bicycle ដែលសម្រេចចិត្តចូលមកវិនិយោគបង្កើតរោងចក្រនៅកម្ពុជា រហូតបច្ចុប្បន្ននេះ បានផ្តល់ឱកាសការងារជូនដល់ប្រជាពលរដ្ឋប្រមាណ១៤០០នាក់រួចមកហើយ។

លោកឧបនាយករដ្ឋមន្ត្រីស៊ុន ចាន់ថុល ក៏បានអនុញ្ញាតឱ្យក្រុមហ៊ុនលើកជាសំណូមពរ និងបង្ហាញនូវបញ្ហាប្រឈម ដែលក្រុមហ៊ុនកំពុងជួប ដើម្បីឱ្យរដ្ឋាភិបាលកម្ពុជាចូលរួមដោះស្រាយ ក្នុងទិសដៅ  ជម្រុញឱ្យក្រុមហ៊ុនវិនិយោគ ពង្រីករោងចក្របន្ថែមទៀតនៅកម្ពុជា ព្រមទាំងអាចប្រែក្លាយ ជាមជ្ឈមណ្ឌលនៃឧត្តមភាព (Center of Excellence) នៅក្នុងតំបន់ និងនៅលើពិភពលោក ដើម្បីបង្កើតការងារបន្ថែមដល់ប្រជាពលរដ្ឋកម្ពុជា។

លោកឧបនាយករដ្ឋមន្ត្រី បានឆ្លៀតយកឱកាសនេះ ផ្តួចផ្តើមគំនិតឱ្យមានរៀបចំការជិះកង់ របស់ក្រុមហ៊ុនផ្ទាល់(XDS Bike Tour) នៅក្នុងខេត្តសៀមរាប ដើម្បីគោលដៅសំខាន់ៗចំនួន ៤ រួមមាន ទី១).ផ្សព្វផ្សាយអំពីការវិនិយោគ របស់ក្រុមហ៊ុនXDSនៅកម្ពុជា ទី២ផ្សព្វផ្សាយអំពីវិស័យ ទេសចរណ៍នៅប្រទេសកម្ពុជា ទី៣ ផ្សព្វផ្សាយផលិតផលរបស់ក្រុមហ៊ុន និងទី៤ រៃអង្គាសថវិកាជូនដល់មន្ទីរពេទ្យកុមារអង្គរ។

ក្នុងដំណើរទស្សនកិច្ចនៅក្រុមហ៊ុន Huawei បទបង្ហាញអំពីនវានុវត្តឌីជីថលថ្មីៗ រួមមាន ប្រព័ន្ធរដ្ឋបាលឌីជីថល ប្រព័ន្ធហេដ្ឋារចនាសម្ព័ន្ធឌីជីថល ប្រព័ន្ធកំពង់ផែឌីជីថល ប្រព័ន្ធអាកាសយានដ្ឋានឆ្លាតវៃ ទីក្រុងឌីជីថល ប្រព័ន្ធគ្រប់គ្រងថាមពលឌីជីថល ប្រព័ន្ធហិរញ្ញវត្ថុឌីជីថល និងប្រព័ន្ធទំនើបផ្សេងៗទៀត ត្រូវបានជម្រាបជូនដល់គណៈប្រតិភូកម្ពុជា។ក្រុមហ៊ុនក៏បានលើកឡើង អំពីកិច្ចសហប្រតិបត្តិការរវាងក្រុមហ៊ុន Huawei និងរាជរដ្ឋាភិបាលកម្ពុជាកន្លងមក ក្នុងការចូលរួមក្នុងធ្វើឌីជីថលូបនីយកម្ម របស់រាជរដ្ឋាភិបាលកម្ពុជាផងដែរ។

ក្នុងដំណើរទស្សនកិច្ចនេះ លោកឧបនាយករដ្ឋមន្ត្រី ក៏បានលើកឡើងអំពីគោលនយោបាយ និងចក្ខុវិស័យសេដ្ឋកិច្ច និងសង្គមឌីជីថលរបស់រាជរដ្ឋាភិបាលកម្ពុជា ជូនដល់ក្រុមហ៊ុនឱ្យជ្រាបកាន់តែច្បាស់។ ពិសេសជាងនេះ លោកស៊ុន ចាន់ថុលក៏បានបញ្ចាក់បន្ថែមផងដែរថា វិស័យបច្ចេកវិទ្យាឌីជីថល បានទទួលការយកចិត្តទុកដាក់ខ្ពស់ពីរាជរដ្ឋាភិបាល តាមរយៈផ្តល់ការលើកទឹកចិត្ត ជាពិសេសដល់វិនិយោគិន ដែលធ្វើការវិនិយោគលើវិស័យនេះ នៅកម្ពុជា។ អាស្រ័យលើកត្តាអំណោយផលនេះ លោកឧបនាយករដ្ឋមន្ត្រី បានជម្រុញលើកទឹកចិត្តខ្ពស់ ឱ្យក្រុមហ៊ុនបង្កើតសង្វាក់ផលិតកម្មរបស់ខ្លួន នៅក្នុងប្រទេសកម្ពុជាដោយផ្ទាល់ផងដែរ៕

ដោយៈ គង់ សូរិយា

        រីយ៉ាតៈ នាយករដ្ឋមន្ត្រីកម្ពុជា និងអារ៉ាប៊ីសាអូឌីត ប្តេជ្ញាចិត្តរួមគ្នាក្នុងការពង្រឹង និងពង្រីកទំនាក់ទំនងទ្វេរភាគីបន្ថែមទៀត។

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានជួបពិភាក្សាការងារជាមួយព្រះអង្គម្ចាស់ Mohammed Bin Salman Bin Abdulaziz Al Saud រជ្ជទាយាទ និងជានាយករដ្ឋមន្ត្រី នៃព្រះរាជាណាចក្រអារ៉ាប៊ីសាអូឌីត ក្នុងឱកាសនៃការចូលរួមក្នុង “កិច្ចប្រជុំកំពូលអាស៊ាន -ក្រុមប្រឹក្សាសហប្រតិបត្តិការឈូងសមុទ្រ” នៅទីក្រុងរីយ៉ាដ ព្រះរាជាណាចក្រអារ៉ាប៊ីសាអូឌីត ។

ក្នុងកិច្ចជំនួបនេះ ព្រះអង្គម្ចាស់នាយករដ្ឋមន្ត្រី បានអបអរសាទរចំពោះ សម្តេចធិបតី ក្នុងឱកាសនៃការចូលកាន់មុខតំណែងជានាយករដ្ឋមន្រ្តីកម្ពុជា ក្នុងនីតិកាលទី៧ នៃរដ្ឋសភា ព្រមទាំងបានជម្រាបជូន សម្តេចធិបតី អំពីទិសដៅប្រកបដោយសក្តានុពល ក្នុងការលើកកម្ពស់ទំនាក់ទំនងរវាងកម្ពុជា-អារ៉ាប៊ីសាអូឌីត សំដៅឈានទៅបង្កើនកិច្ចសហប្រតិបត្តិការលើវិស័យសំខាន់មួយចំនួន ជាអាទិ៍ វិស័យពាណិជ្ជកម្ម វិនិយោគ, ថាមពល និងវិស័យសក្តានុពលដទៃទៀត ដើម្បីសម្រេចបាន នូវផលប្រយោជន៍រួមសម្រាប់ប្រទេស និងប្រជាជនទាំងពីរ ។ជាការឆ្លើយតប សម្តេចធិបតី បានចូលរួមអបអរសាទរចំពោះជោគជ័យរបស់អារ៉ាប៊ីសាអូឌីត ក្នុងការធ្វើជាម្ចាស់ផ្ទះរៀបចំ “កិច្ចប្រជុំកំពូលអាស៊ាន-ក្រុមប្រឹក្សា សហប្រតិបត្តិការឈូងសមុទ្រ” ជាលើកដំបូងនេះ និងបានសម្តែងនូវការពេញចិត្ត ចំពោះវឌ្ឍនភាពរីកចម្រើននៃទំនាក់ទំនងទ្វេភាគីរវាងកម្ពុជា-អារ៉ាប៊ីសាអូឌីត ដូចដែលឆ្លុះបញ្ចាំងតាមរយៈការសម្រេចបង្កើត ស្ថានឯកអគ្គរាជទូតអារ៉ាប៊ីសាអូឌីតប្រចាំនៅកម្ពុជា ជាដើម ។

ឆ្លងតាមកិច្ចពិភាក្សានេះ នាយករដ្ឋមន្ត្រី នៃប្រទេសទាំងពីរ បានបង្ហាញនូវការប្តេជ្ញាចិត្តរួមក្នុងការពង្រឹង និងពង្រីកទំនាក់ទំនងបន្ថែមទៀត ដោយបានឯកភាពលើទិសដៅ នៃការបង្កើតយន្តការទ្វេភាគី ដើម្បីពិភាក្សា អំពីកិច្ចសហប្រតិបត្តិការ លើវិស័យសក្តានុពលមួយចំនួន ដូចជា វិស័យពាណិជ្ជកម្ម វិនិយោគ និងវិស័យផ្សេងៗទៀត ដែលជាផលប្រយោជន៍រួម ៕

ដោយ: គង់ លាងហួរ
សេអ៊ូល: យោងតាមទិន្នន័យបានបង្ហាញកាលពីពេលថ្មីៗកន្លងទៅថា ផ្ទះជិត៨.០០០យូនីតនៅក្នុងប្រទេសកូរ៉េខាងត្បូង ត្រូវបានទិញអស់ដោយមនុស្សតែ៣០នាក់ប៉ុណ្ណោះក្នុងរយៈពេល៥ឆ្នាំកន្លះកន្លងមកនេះ។

យោងតាមទិន្នន័យដែលចងក្រងឡើងដោយក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន បានបង្ហាញថា តម្លៃសរុបនៃផ្ទះដែលបានរៀបរាប់ខាងលើមានចំនួន១,១៩ពាន់ពាន់លានវ៉ុន (ប្រហែល៨៩៧,៣៧លានដុល្លារអាមេរិក)។

លោក Min Hong-chul សមាជិកនៃគណបក្សប្រជាធិបតេយ្យកូរ៉េ (DPK) និងជាសមាជិកគណៈកម្មាធិការដីធ្លី ហេដ្ឋារចនាសម្ព័ន្ធ និងដឹកជញ្ជូននៃរដ្ឋសភា បានលើកឡើងថាការទិញអចលនទ្រព្យទាំងនេះ បង្ហាញថាច្បាប់លំនៅដ្ឋានរបស់រដ្ឋាភិបាល ដើម្បីប្រឆាំងនឹងការទិញដីធ្លីទុកចំណេញ មិនមានប្រសិទ្ធភាពក្នុងការទប់ស្កាត់តម្លៃ ផ្ទះនោះទេ។

យោងតាមទិន្នន័យបានឱ្យដឹងថា មនុស្សទាំង៣០នាក់ដែលបានចុះបញ្ជី គឺជាអ្នកទិញញឹកញាប់បំផុតនៅក្នុងទីផ្សារលំនៅដ្ឋាន ដោយពួកគេបានទិញផ្ទះសរុបចំនួន៧.៩៩៦យូនីត គិតចាប់ពីឆ្នាំ២០១៨ រហូតដល់ខែមិថុនាឆ្នាំនេះ។

ក្នុងចំណោមអ្នកទិញទាំង៣០នាក់ ក្នុងនោះមានអ្នកទិញ២៤នាក់ផ្តោតលើការទិញផ្ទះនៅក្នុងទីក្រុងសេអ៊ូល អុីនឈុន និងខេត្ត Gyeonggi ដែលជាទីតាំងមានតម្រូវការលំនៅដ្ឋានខ្ពស់បំផុតនៅក្នុងប្រទេសកូរ៉េខាងត្បូង។

អ្នកទិញទាំង២៤នាក់នេះ បានទិញផ្ទះសរុបចំនួន៦.៦២២យូនីត ដែលមានតម្លៃសរុបចំនួន១,៤៥ពាន់ពាន់លានវ៉ុន(ប្រហែល១,០៨ពាន់លានដុល្លារអាមេរិក)៕

តែម សុខុម
ប៉េកាំងៈ ទិន្នន័យផ្លូវការបានបង្ហាញកាលពីថ្ងៃសុក្រ សប្ដាហ៍មុនថា ការនាំចូល និងការនាំចេញទំនិញសរុបរបស់ប្រទេសចិន បានបន្តប្រសើរឡើងក្នុងខែកញ្ញា ដោយទំហំពាណិជ្ជកម្មបានកើនឡើងដល់កម្រិតខ្ពស់ប្រចាំខែក្នុងឆ្នាំនេះ។

យោងតាមអគ្គនាយកដ្ឋានគយ (GAC) បង្ហាញថា ទំហំពាណិជ្ជកម្មក្រៅប្រទេសរបស់មហាយក្សចិន បានឈានដល់ប្រមាណ៥២១ពាន់លានដុល្លារអាមេរិក កាលពីខែមុន ដែលជាកំណើន២ខែជាប់ៗគ្នា។

នៅក្នុង៣ត្រីមាសដំបូង ការនាំចូល និងការនាំចេញទំនិញរបស់ប្រទេសចិន គិតជាប្រាក់យ័ន បានធ្លាក់ចុះ០,២%មកនៅត្រឹម៤,២១ទ្រីលានដុល្លារអាមេរិក។

ការនាំចេញរបស់ប្រទេសនេះបានកើនឡើង០,៦% ខណៈការនាំចូលធ្លាក់ចុះ១,២%ក្នុងរយៈពេល៩ខែដើមឆ្នាំនេះ។អំឡុងពេលនោះ ពាណិជ្ជកម្មរបស់ប្រទេសចិន ជាមួយបណ្ដាប្រទេសដែលចូលរួមក្នុងគំនិតផ្តួចផ្តើមខ្សែក្រវាត់ និងផ្លូវ (BRI) មានទំហំ១,៩៦ទ្រីលានដុល្លារអាមេរិក ដោយកើនឡើង៣,១% និងគ្របដណ្ដប់៤៦,៥%នៃតម្លៃពាណិជ្ជកម្មក្រៅប្រទេសសរុបរបស់ប្រទេសចិន។

ពាណិជ្ជកម្មរបស់ប្រទេសចិន ជាមួយបណ្ដាទីផ្សារដែលកំពុងរីកចម្រើនឆាប់រហ័សដូចជាអាស៊ីកណ្តាល បានកើនឡើង៣៣,៧% ជាមួយអាហ្រ្វិក បានកើនឡើង៦,៧% និងជាមួយអាមេរិកឡាទីន បានកើនឡើង៥,១% ខណៈពាណិជ្ជកម្មកាលពីពេលថ្មីៗនេះជាមួយសហភាពអឺរ៉ុប និងសហរដ្ឋអាមេរិក ក៏មានភាពប្រសើរឡើងគួរឱ្យកត់សម្គាល់ផងដែរ។

ក្នុងរយៈពេលពីខែមករា ដល់ខែកញ្ញា សហគ្រាសឯកជនទទួលបានកំណើនយ៉ាងឆាប់រហ័ស ខណៈការនាំចូល និងការនាំចេញបានកើនឡើង៦,១%ឈានដល់ជាង២,២៣ទ្រីលានដុល្លារអាមេរិក ដែលស្មើនឹងជាងពាក់កណ្តាលនៃចំនួនសរុបរបស់ប្រទេសនេះ៕ Xinhua៕

អភិបាលកិច្ចៈ គឺជាការអនុវត្តនូវសិទ្ធិ ឬអំណាចនយោបាយ សេដ្ឋកិច្ច រដ្ឋបាល ឬអ្វីផ្សេងទៀតដើម្បីគ្រប់គ្រង់កិច្ចការ និងធនធានរបស់ប្រទេសមួយ ឬក្នុងអាជីវកម្មមួយ។

អាជីវកម្មស្តង់ដារ: គឺសំដៅទៅលើស្ថាប័នមួយ ឬសហគ្រាសមួយ ដែលមានសកម្មភាពពាណិជ្ជកម្ម ក្នុងការដោះដូរ លក់ចេញ ទិញចូល ទំនិញឬសេវាកម្ម ដើម្បីស្វែករកប្រាប់ចំណេញ ឬមិនស្វែងរកប្រាក់ចំណេញ ដែលស្របទៅតាមទស្សនៈវិស័យរបស់ស្ថាប័ននោះ  ដែលបានបំពេញតម្រូវការណាមួយក្នុងទីផ្សារ ហើយស្ថិតក្នុងលំនាំលំហូរតែមួយក្នុងស្ថាប័ននោះ។ការវិនិយោគ៖ ការវិនិយោគ សំដៅទៅលើការបណ្តាក់ទុន ជាប្រាក់កាក់ ពេលវេលា ឬថាមពល ក្នុងការធ្វើអ្វីមួយឬច្រើន ក្នុងគោលបំណងបានផលត្រឡប់មកវិញក្នុងកំឡុងពេលកំណត់ណាមួយនៅថ្ងៃអនាគត ហើយការវិនិយោគគឺមានច្រើនប្រភេទ។ ជាតឹកតាងក្នុងស្ថានភាព វិបត្តិសេដ្ឋកិច្ចពិភពលោកនេះ បានប៉ះពាល់ជាខ្លាំងដល់សហគ្រាស អាជីវកម្ម និងសេដ្ឋកិច្ចពិភពលោកជាខ្លាំង។ អាជីវកម្មមួយចំនួនកំពុងប្រឈមមុខជាមួយហានិភ័យ ក្នុងអាជីវកម្ម ការលក់ធ្លាក់ចុះ ចំណាយច្រើនជាងចំណូល បញ្ហាបុគ្គលិក បញ្ហាប្រតិបត្តិការអាជីវកម្ម បញ្ហាក្នុងការវិនិយោគជាដើម។  អាស្រ័យហេតុនេះ ម្ចាស់អាជីវកម្មត្រូវ យកចិត្តទុកដាក់ និងរៀបចំអភិបាលកិច្ចអាជីវកម្មស្តង់ដារ និងការវិនិយោគ ដើម្បីពង្រឹង ពង្រីក ពន្លឿន ក្នុងអាជីវកម្ម និងទប់ទល់ក្នុងស្ថានភាពវិបត្តិសេដ្ឋកិច្ចសកលលោកនេះ។យ៉ាងណាមិញ CEO Master Club បានរៀបចំកម្មវិធីបង្វឹក អភិបាលកិច្ចអាជីវកម្មស្តង់ដារ និងការវិនិយោគ ដោយមានការបង្វឹកផ្ទាល់ពី លោកគ្រូធំបណ្ឌិត អោម សេងបូរ៉ា ដែលមានបទពិសោធន៍បង្វឹកម្ចាស់អាជីវកម្ម ជាង១៣ឆ្នាំកន្លងមកហើយ ដើម្បីបង្វឹកដល់ម្ចាស់អាជីវកម្ម។

ម្ចាស់អាជីវកម្ម ចូលរួមក្នុងកម្មវិធីបង្វឹកជំនាញ អភិបាលកិច្ចអាជីវកម្មស្តង់ដារ និងការវិនិយោគ នឹងទទួលបាន៖

1. ហេតុអ្វីអភិបាលកិច្ចអាជីវកម្មសំខាន់ សម្រាប់ម្ចាស់អាជីវកម្ម?
2. ការរៀបចំរចនាសម័្ពន្ធក្បាលម៉ាស៊ីនដឹកនាំគ្រប់គ្រងចាត់ចែងអាជីវកម្មស្តង់ដារ
3. ការរៀបចំ សិទ្ធ តួនាទី និងទំនួលខុសត្រូវ របស់អ្នកវិនិយោគ ម្ចាស់ភាគហ៊ុន ក្រុមប្រឹក្សាភិបាល និងគណ:គ្រប់គ្រងឱ្យមានប្រសិទ្ធភាព
4. ការរៀបចំគោលការណ៍ និងនិតិវិធីការងាររបស់ក្រុមប្រឹក្សាភិបាល
5. ការរៀបចំប្រជុំរបស់ក្រុមប្រឹក្សាភិបាល និងគណ:គ្រប់គ្រងឱ្យមានប្រសិទ្ធភាព
6. ការរៀបចំកំណត់ហេតុប្រជុំក្រុមប្រឹក្សាភិបាល
7. ការឆែកត្រួតពិនិត្យតាមដានការងារអាទិភាព របស់ក្រុមប្រឹក្សាភិបាលឱ្យមានប្រសិទ្ធភាព
8. ការរៀបចំកិច្ចព្រមព្រៀងម្ចាស់ភាគហ៊ុន
9. ការរៀបចំកិច្ចសន្យាការងាររបស់អគ្គនាយកក្រុមហ៊ុន
10. ការរៀបចំប្រព័ន្ធគ្រប់គ្រងផ្ទៃក្នុងសម្រាប់ម្ចាស់អាជីវកម្ម។

សរុបមកវិញ ជំនាញអភិបាលកិច្ចអាជីវកម្មស្តង់ដារ និងការវិនិយោគ ពិតជាសំខាន់ខ្លាំងណាស់ សម្រាប់សហគ្រិនគ្រប់រូប ក្នុងការរៀបចំ និងយល់ស៊ីជម្រៅអំពីអភិបាលកិច្ចអាជីវកម្មស្តង់ដារ និងការវិនិយោគ។ ដូចនេះ សហគ្រិនត្រូវយកចិត្តទុកដាក់ និងរៀបចំអភិបាលកិច្ចអាជីវកម្មស្តង់ដារ និងការវិនិយោគ ដើម្បីពង្រឹង ពង្រីក ពន្លឿន ក្នុងអាជីវកម្ម និងទប់ទល់ក្នុងស្ថានភាពវិបត្តិសេដ្ឋកិច្ចសកលលោកនេះបានដោយទទួលបានប្រសិទ្ធភាពខ្ពស់៕
សម្រាប់បងប្អូន ដែលចាប់អារម្មណ៍ សូមទាក់ទងតាមលេខទូរស័ព្ទ
𝟬𝟴𝟱 𝟯𝟭𝟭 𝟭𝟴𝟯/010333041 (Cellcard) លោកស្រី រិន បុប្ផា
ចូលទៅកាន់link ខាងក្រោម ដើម្បីទទួលបានព័ត៌មានថ្មីៗ
Facebook Page CEO I: https://www.facebook.com/ceoinstitute2014

YouTube CEO Master Club:  https://www.youtube.com/@CEOTV

Facebook Page CEO Master Club: https://www.facebook.com/ceomasterclub\

អត្ថបទដោយ: អ៊ឹម ភ័ស