ដោយៈ គង់ ហ្វីអូណា

       ភ្នំពេញៈ តើអ្នកជាប់ពន្ឋត្រូវធ្វើយ៉ាងដូចម្តេច និងមានរយៈពេលប៉ុន្មានថ្ងៃក្នុងការតវ៉ា?។

អនុលោមតាមច្បាប់ស្តីពីសារពើពន្ធ ផ្នែកទី៤ ដំណោះស្រាយការតវ៉ារបស់អ្នកជាប់ពន្ធ ត្រូវបានកំណត់ដូចជា ទី១. អ្នកជាប់ពន្ធដែលមិនយល់ព្រម នឹងការកំណត់ពន្ធឡើងវិញ ការផាកពិន័យជាប្រាក់ ឬសេចក្តីសម្រេចផ្សេងទៀត ដែលធ្វើឡើងដោយអង្គភាពមានសមត្ថកិច្ចរបស់រដ្ឋបាលសារពើពន្ធ អាចធ្វើការតវ៉ាទៅអគ្គនាយកនៃអគ្គនាយកដ្ឋានពន្ធដារ។

ការតវ៉ាត្រូវមានកម្រិតព្រំដែន តែត្រឹមដើមហេតុឬព័ត៌មានផ្សេងទៀតដែលមាន នៅក្នុងការកំណត់ពន្ធឡើងវិញ សេចក្តីសម្រេចឬនីតិវិធីនៃការកំណត់ពន្ធឡើងវិញតែប៉ុណ្ណោះ។

ទី២ ការតវ៉ាខាងរដ្ឋបាល ត្រូវដាក់ជូនរដ្ឋបាលសារពើពន្ធក្នុងរយៈពេលយ៉ាងយឺតបំផុត៣០ (សាមសិប)ថ្ងៃ ក្រោយថ្ងៃដែលអ្នកជាប់ពន្ធ បានទទួលលិខិតជូនដំណឹងទារបំណុលពន្ធ ការផាកពិន័យជាប្រាក់ ឬសេចក្តីសម្រេចផ្សេងទៀត ដែលធ្វើឡើងដោយអង្គភាពមាន សមត្ថកិច្ចរបស់រដ្ឋបាលសារពើពន្ធ និងត្រូវធ្វើជាលាយលក្ខណ៍អក្សរទៅតាមទម្រង់និងខ្លឹមសារដូចជា៖

លេខអត្តសញ្ញាណកម្មរបស់អ្នកជាប់ពន្ធ ដែលធ្វើពាក្យតវ៉ាសេចក្តី យោងទៅរកការកំណត់សេចក្តីសម្រេច ឬលទ្ធផលដែលជាកម្មវត្ថុនៃពាក្យតវ៉ាដើមហេតុ ឬអំពើដែលជាកម្មវត្ថុ នៃពាក្យតវ៉ាហេតុផលនៃការតវ៉ាកាលបរិច្ឆេទ និងហត្ថលេខារបស់អ្នកជាប់ពន្ធ និងហត្ថលេខារបស់តំណាងស្របច្បាប់របស់អ្នកជាប់ពន្ធ។

ទី៣ ការតវ៉ាខាងរដ្ឋបាល ពុំធ្វើឱ្យអ្នកជាប់ពន្ធរួចផុតពីកាតព្វកិច្ចបង់ប្រាក់ពន្ធ ពន្ធបន្ថែម ការប្រាក់ និងការផាកពិន័យជាប្រាក់ផ្សេងៗដែល បញ្ជាក់នៅក្នុងលិខិតជូនដំណឹងទារបំណុលពន្ធ ការផាកពិន័យជាប្រាក់ ឬសេចក្តីសម្រេចផ្សេងទៀត ដែលធ្វើឡើងដោយអង្គភាព មានសមត្ថកិច្ចរបស់រដ្ឋបាលសារពើពន្ធឡើយ។

បន្ទាប់ពីទទួលបានពាក្យតវ៉ា រដ្ឋបាលសារពើពន្ធនឹងចេញសេចក្តីសម្រេចជាថ្មី ក្នុងរយៈពេលយ៉ាងយឺតបំផុត៦០ថ្ងៃ ក្រោយពី ថ្ងៃដែលទទួលបានពាក្យតវ៉ា ដើម្បីបញ្ជាក់ភាពត្រឹមត្រូវ ឬមិនត្រឹមត្រូវទាំងស្រុង ឬចំណែកណាមួយនៃការកំណត់ពន្ធ សេចក្តីសម្រេចផ្សេងៗ ដែលអ្នកជាប់ពន្ធតវ៉ា។

ក្នុងករណីអ្នកជាប់ពន្ធនៅតែមិនយល់ព្រម លើសេចក្តីសម្រេចថ្មីនេះអ្នកជាប់ពន្ធ អាចដាក់ពាក្យតវ៉ាទៅគណៈកម្មាធិការ ដោះស្រាយវិវាទសារពើពន្ធ ក្នុងរយៈពេលយ៉ាងយឺតបំផុត៣០ (សាមសិប)ថ្ងៃ ក្រោយពីថ្ងៃដែលបានទទួលសេចក្តីសម្រេច។

អ្នកជាប់ពន្ធមានសិទ្ធិ ប្តឹងទៅតុលាការមានសមត្ថកិច្ច ជំទាស់នឹងសេចក្តីសម្រេច របស់គណៈកម្មាធិការដោះស្រាយវិវាទសារពើពន្ធក្នុងរយៈពេលយ៉ាងយឺតបំផុត៣០ (សាមសិប)ថ្ងៃ ក្រោយពីបានទទួលដំណឹងស្តីពីសេចក្តីសម្រេចនោះ។

កាលពីឆ្នាំ២០២៣ អគ្គនាយកដ្ឋានពន្ធដារ បានដោះស្រាយពាក្យតវ៉ាចំនួន៤៤២ករណី ដែលចំនួននេះកើនឡើងលើសឆ្នាំ២០២២ ចំនួន២៧៨ករណី៕

        ដោយៈ គង់ សូរិយា

        កោះកុងៈ ការបើកដំណើរការព្រលានយន្តហោះ អន្តរជាតិតារាសាគរ ក្នុងខេត្តកោះកុង ដែលសាធារណៈជនរង់ចាំជាយូរមក បានស្ថិតក្នុងភាពមិនច្បាស់លាស់សាជាថ្មី។

       អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកា​សចរណ៍ស៊ីវិល លោកស៊ីន ចាន់សិរីវុត្ថាបានមានប្រសាសន៍ឲ្យដឹងកាលពីថ្ងៃទី៥ កុម្ភៈម្សិលម៉ិញនេះថា គំរោងបើកដំណើរការព្រលានយន្តហោះនេះ ស្ថិតនៅសឆ្ងាយនៅឡើយ ដោយសារក្រុមហ៊ុនជួបវិបត្តិហិរញ្ញវត្ថុផ្ទាល់ខ្លួន។

       លោកបញ្ជាក់ថា “តំណាងក្រុមហ៊ុនគាត់បានលើកឡើង ពីផលប៉ះពាល់ ខាងវិស័យហិរញ្ញវត្ថុរបស់ក្រុមហ៊ុនជារួម ក៏ដូចជាគម្រោងសាងសង់ជាច្រើនត្រូវបានជាប់គាំង”។

លោកបានរំលឹកថា អំពីវឌ្ឍនភាពអាកាសយានដ្ឋានអន្តរជាតិតារាសាគរ គិតមកត្រឹមថ្ងៃទី៣ ខែកុម្ភះ ឆ្នាំ២០២៣ កន្លងមកខាងអាកាសចរណ៍ស៊ីវិលអាចបញ្ជាក់បាន នូវចំណុចមួយចំនួនដូចជា ទី១ ការដ្ឋានសាងសង់នៅបន្តតែពុំមានការ ប្រែប្រួលគួរអោយកត់សំគាល់ឡើយ ក្នុងដំណើរការសាងសង់រប៉េះរបោះមានកម្មករចំនួនតិចតួច។

ទី២ យើងបានណែនាំជូនតំណាងក្រុមហ៊ុន ធ្វើលិខិតអំពីវឌ្ឍនភាព និងផែនការសាងសង់ជំហ៊ានថ្មី ដាក់ជូនមករដ្ឋលេខាធិការអាកា​សចរណ៍ស៊ីវិល ជូនជ្រាបជាពត៌មាន។

លោកស៊ីន ចាន់សិរីវុត្ថាបានបន្តថា “បច្ចុប្បន្ននេះ ថ្នាក់ដឹកនាំក្រុមហ៊ុន និងក្រុមការងារបានត្រឡប់ទៅចិនវិញ ដោយសារត្រូវវិស្សមកាល ក្នុងឱកាសចូលឆ្នាំចិន”។

ខេត្តកោះកុង ជាតារារះនាទិសនារតី ដែលមានសក្តានុពលលើទេសចរណ៍ធម្មជាតិដ៏សមហ្បូរបែប រួមមានព្រៃភ្នំ ទឹកជ្រោះ ដងព្រែក តំបន់ឆ្នេរ ដ៏ស្រស់ស្អាត និងរំណីយដ្ឋានធម្មជាតិជាច្រើនទៀត។

លោកស្រីឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ឲ្យដឹង កាលពីពេលកន្លងមកថា ខេត្តកោះ​កុងមានសក្តានុពលទេសចរណ៍ ធម្មជាតិដ៏សម្បើម ដែលយើងមិនទាន់បានទាញយកមកប្រើប្រាស់ នូវសក្តានុពលទាំងនោះអស់នៅឡើយ។

លោកស្រីបន្តថា “ ខេត្តនេះមានតំបន់ទេសចរណ៍ ដ៏អាថ៌កំបាំង និងទាក់ទាញខ្លាំងណាស់ ហេតុនេះបើព្រលានយន្តហោះបើកដំណើរ​ការ នឹងធ្វើឲ្យក្រុមហ៊ុនអាកាសចរណ៍ និងភ្ញៀវទេសចរណ៍មានជម្រើ​សកាន់តែច្រើន ក្នុងការមកសម្រាកកំសាន្ត”៕

ដោយៈ ជេស៊ីកា

        ព្រះសីហនុៈ សេវាបដិសណ្ឋារកិច្ច នៅក្រុងព្រះសីហនុកាន់តែធ្វើពិពិធកម្ម ដោយសណ្ឋាគារថ្មីមួយ បានបើកដំណើរការនៅក្រុងព្រះសីហនុ។

ម៉ាកយីហោសណ្ឋាគារ Novotel ដែលជាក្រុមហ៊ុនបដិសណ្ឋារកិច្ចដ៏ល្បីល្បាញមួយ ក្នុងចំណោមបណ្តាញAccor ជាប្រតិបត្តិករសណ្ឋា​គារឈានមុខគេ បានដាក់ដំណើរការនូវរមណីយដ្ឋាន សម្រាកកម្សាន្ដ Novotel Sihanoukville Holiday Resort។

ការ​បើក​សម្ពោធ​សណ្ឋាគារ ដែល​មាន​ការ​រំពឹង​ទុក​ជា​យូរមកហើយនេះ បានគូសបញ្ជាក់ពីទីតាំងដំបូងរបស់ក្រុមហ៊ុន​ Novotel នៅក្នុង​ប្រទេស​កម្ពុជា។ រមណីយដ្ឋានមួយនេះ មានទីតាំងនៅលើឆ្នេរឯករាជ្យរួមមានបន្ទប់ចំនួន២១៥ ប្រកបដោយទេសភាពដ៏អស្ចារ្យ នៅលើឈូងសមុទ្រថៃ មានជម្រើសអាហារដ្ឋានចំនួន៤កន្លែង  ក៏ដូចជាបរិក្ខារសក្តិសមសម្រាប់ក្រុមគ្រួសារផងដែរ។

 លោក Garth Simmons ប្រធានផ្នែកប្រតិបត្តិការនៃផ្នែកសេដ្ឋកិច្ចជាន់ខ្ពស់ និងមធ្យមនៃក្រុមហ៊ុន Accorបានមានប្រសាសន៍ថា ការសម្ពោធសណ្ឋាគារ Novotel Sihanoukville Holiday Resort ដែលជាអចលនទ្រព្យរបស់ក្រុមហ៊ុន Novotel ដំបូងគេក្នុងប្រទេសកម្ពុជា គឺជាការចាប់ផ្តើម នៃដំណើរដ៏គួរឱ្យរំភើប សម្រាប់យើងក្នុងឆ្នាំ ២០២៤។

លោកបញ្ជាក់ថា “សមិទ្ធផលមួយនេះ គឺជាព្រឹត្តិការណ៍ដ៏សំខាន់មួយ នៅក្នុងការ ប្តេជ្ញាចិត្ត យ៉ាងជាប់លាប់របស់ក្រុមហ៊ុន Accor ក្នុងការផ្តល់នូវបទពិសោធន៍បដិសណ្ឋារកិច្ចចម្រុះ និងសម្បូរបែបនៅក្នុងតំបន់អាស៊ី”។

លោកក៏បានបន្ថែមទៀតថា សណ្ឋាគារ Novotel ក៏បានផ្តល់នូវការផ្សំបញ្ចូលគ្នាដ៏ល្អឥតខ្ចោះជាមួយ នឹងការរចនាបែបសហសម័យ ទីធ្លាធំទូលាយ និងបរិក្ខារប្រកបដោយផាសុកភាព។ ការផ្សំបញ្ចូលគ្នានេះធ្វើឱ្យNovotel Sihanoukville Holiday Resort ក្លាយជាជម្រើសដ៏គួរឱ្យទាក់ទាញសម្រាប់អ្នកធ្វើដំណើរ ដែលកំពុងស្វះស្វែងរកឱកា​ស ដើម្បីភ្ជាប់ទំនាក់ទំនង ជាមួយមនុស្សជាទីស្រលាញ់របស់ពួកគេ និងខ្លួនឯង ឬសម្រាកលំហែកាយ នៅក្នុងទីក្រុងមាត់សមុទ្រ ដ៏ល្បីល្បាញបំផុតរបស់ប្រទេសកម្ពុជា គឺខេត្តព្រះសីហនុ។

នាយកកគ្រប់គ្រងទូទៅនៃសណ្ឋាគារ Novotel Sihanoukville Holiday Resort លោក Ayub Yulianto បានមានប្រសាសន៍ឲ្យដឹងថា “ខ្ញុំពិតជារំភើបណាស់ ដែលបានស្វាគមន៍ភ្ញៀវទេសចរណ៍ឱ្យមកទទួលយកបទពិសោធន៍នៅតំបន់ថ្មីមួយ នៃក្រុងព្រះសីហនុ”។

លោកបន្តថា ស្របពេលដែលទីក្រុងឆ្នេរសមុទ្រនេះ កំពុងមានភាពល្បីល្បាញ ដោយសារឆ្នេរខ្សាច់ស អាកាសធាតុ ត្រូពិច និងកិច្ចបដិសណ្ឋារកិច្ចដ៏កក់ក្តៅរបស់កម្ពុជា ភោជនីយដ្ឋានចម្រុះ និងបារជាច្រើនដ៏រស់រវើក គ្រឿងបរិក្ខារ សមស្របសម្រាប់គ្រួសារដ៏ល្អ និងការរចនាបែបទំនើបរបស់ Novotel Sihanoukville Holiday Resort ពិតជាបន្ថែមនូវភាពពិសេស ប្លែកពីគេនៅក្នុងទីក្រុងមួយនេះ​៕

ដោយៈ គង់ ហ្វីអូណា

        ភ្នំពេញៈ មន្ត្រី​ក្រសួងទេសចរណ៍ និង​តំណាង​ក្រុមហ៊ុន Royal Caribbean Group របស់​សហរដ្ឋអាមេរិក បាន​ពិភាក្សា​លើ​កិច្ចសហប្រតិបត្តិការ​ជំរុញ​អភិវឌ្ឍ​វិស័យ​ទេសចរណ៍។

កិច្ចសហប្រតិ​បត្តិការនេះ ធ្វើឡើងតាមរយៈ​កប៉ាល់​ទេសចរណ៍(Cruise Tourism) ជាពិសេស​ការនាំយក​ក​ប៉ាល់​ទេសចរណ៍​របស់​ក្រុមហ៊ុន​នេះ​មក​ទស្សនា និង​ចូល​ចត​នៅ​ខេត្ត​ព្រះសីហនុ​។

កិច្ចពិភាក្សា​នេះ ធ្វើឡើង​នៅ​ជំនួប​រវាង លោក ជួប រតនា ប្រធាន​នាយកដ្ឋាន​ផែនការ​អភិវឌ្ឍ​ទេសចរណ៍ និង​លោកJoni Gevriye តំណាង​ក្រុមហ៊ុន Royal Caribbean Group កាលពី​ថ្ងៃទី ​២ ខែកុម្ភៈ ឆ្នាំ ២០២៤​។

លោក ជួប រតនា បាន​បង្ហោះ​ខ្លឹមសារ​នៃ​ជំនួប​នេះ​នៅលើ​បណ្តាញ​សង្គម​ហ្វេ​ស​ប៊ុ​កថា កិច្ច​ប្រជុំបាន​ឯកភាព​លើ​នីតិវិធី​បន្ទាប់ ​ដើម្បី​ចុះ​ត្រួតពិនិត្យ​ទីតាំង​ចូល​ចត​ជាក់ស្តែង និង​រៀបចំ​កិច្ចប្រជុំ​ជាមួយ​ភាគី​ពាក់ព័ន្ធ​ ដើម្បី​ប្រមូល​ធាតុ​ចូល​សំខាន់ៗ សម្រាប់​ធ្វើជា​របាយការណ៍​សង្ខេប​ពី​លក្ខណៈ​បច្ចេកទេស និង​សេវាកម្ម ដើម្បីឱ្យ​ការិយាល័យ​កណ្តាល​របស់​ក្រុមហ៊ុន Royal Caribbean Group ត្រួតពិនិត្យ មុននឹង​សម្រេច​ដាក់​ខេត្ត​ព្រះសីហនុ ចូលទៅក្នុង​កញ្ចប់​ធ្វើដំណើរ​ទេស​ចរណ៍​រប​ស់​ក្រុមហ៊ុន​នៅពេល​ខាងមុខ​។ តំណាង​ក្រុមហ៊ុន Royal Caribbean Group បានលើកឡើង​ពី​ចំណុច​គន្លឹះ​សំខាន់ៗ​ ដែល​ត្រូវ​សិក្សា​ដើម្បី​បង្កលក្ខណៈ​ដល់​ការចូល​ចត​នៅ​ខេត្ត​ព្រះសីហនុ និង​ការទាក់ទាញ​កញ្ចប់​ទេស​ចរណ៍​រួមមាន ទី១ ពិនិត្យ​លក្ខណៈ​បច្ចេកទេស​ផែ​ចូល​ចត កប៉ាល់​ទេសចរណ៍ ទី២​បែបបទ​អន្តោប្រវេសន៍​ សម្រាប់​ទេស​ចរ​ចូល​ទស្សនា ​ខេត្ត​ព្រះសីហនុ និង​ការតភ្ជាប់​កញ្ចប់​ទស្សនា​ទៅ​គោលដៅ​នានា។

ទី៣​ បែបបទ​គយ​សម្រាប់​ត្រួតពិនិត្យ​ អំឡុងពេល​ចូល​ចត និង​ទី៤​​ទំនាក់ទំនង​ជាមួយ​ទីភ្នាក់ងារ​ សម្របសម្រួល​កំពង់ផែ (Port Agents) និង​ទីភ្នាក់ងារ​ទេសចរ​ណ៍ ស​ម្រា​ប់លក់​កញ្ចប់​ទស្សនា​ខេត្ត​ព្រះសីហនុ ឬ​គោលដៅ​ត​ភ្ជាប់​នានា​។

លោក ជួប រតនា ក្រុមហ៊ុន Royal Caribbean Group ជា​ក្រុមហ៊ុន​យក្ស​លំដាប់​ទី​ពី​រ លើ​ពិភពលោក​ខាង​វិស័យ​កប៉ាល់ ​ទេសចរណ៍ និង​បាន​ដំណើរការ​ទេសចរ​តាម​កប៉ាល់ នៅ​ទូទាំង​ពិភពលោក​តាមរយៈ​កប៉ាល់​ទេសចរ​សរុប​ចំនួន២៨កប៉ាល់​។

លោក​រំពឹងទុក​ថា​ ​ការភ្ជាប់​ទំនាក់ទំនង​ ជាមួយ​ក្រុមហ៊ុន​ខាងលើ នឹង​នាំ​ភ្ញៀវទេសចរ​ជុំវិញ​ពិភពលោក មក​ទស្សនា​ខេត្ត​ព្រះសីហនុ និង​ទទួលយក​បទពិសោធន៍​ថ្មី ​ពី​គោលដៅ​តារា​រះ​នា​ទិសនិរតី ខណៈ​រដ្ឋាភិបាល​ កំពុង​ខិតខំ​អភិវឌ្ឍ​ខេត្ត​ព្រះសីហនុ​ ឱ្យ​ប្រែ​ក្លាយទៅជា​តំបន់​សេដ្ឋកិច្ច​ពិសេស​គំរូ​ពហុ​បំណង​នៅពេល​ខាងមុខ​​៕

ដោយ: គង់ លាងហួរ

បាងកក: គម្រោងហេដ្ឋារចនាសម្ព័ន្ធខ្នាតយក្ស Land Bridge របស់ប្រទេសថៃ ដែលគ្រោងចំណាយទុន២៨ពាន់លានដុល្លារ ដែលតភ្ជាប់ឈូងសមុទ្រថៃ ទៅកាន់ឆ្នេរសមុទ្រ Andaman កំពុងបើកការដ្ឋានសាងសង់ផ្នែកខ្លះជាបណ្តើរៗហើយ។

ជាក់ស្តែង កាលពីពេលថ្មីៗនេះ នាយករដ្ឋមន្ត្រីថៃ លោក សេដ្ឋា ថាវីស៊ីន បានចុះពិនិត្យវឌ្ឍនភាពគម្រោងនេះ នៅឯការដ្ឋានសាងសង់ដំណាក់កាលដំបូង ដែលតភ្ជាប់ពីខេត្តRanong ទៅកាន់ខេត្ត Chumpon។

គម្រោងតម្លៃរាប់ពាន់លានដុល្លារមួយនេះ មិនត្រឹមតែអាចជួយជំរុញ ការអភិវឌ្ឍន៍សេដ្ឋកិច្ច របស់ប្រទេសថៃប៉ុណ្ណោះទេ ប៉ុន្តែវាក៏ជា ដំណោះស្រាយក្នុងតំបន់ និងអន្តរទ្វីបដ៏សំខាន់ ដើម្បីចូលរួមកាត់បន្ថយការកកស្ទះចរាចរណ៍ ដឹកទំនិញផ្លូវទឹកនៅច្រកសមុទ្រ ម៉ាឡាកាផងដែរ។លោក សេដ្ឋា ថាវីស៊ីន បានលើកឡើងអំពីសារៈសំខាន់ជាយុទ្ធសាស្ត្រនៃគម្រោងនេះ ដោយលោកបានសង្កត់ធ្ងន់ថា “គម្រោង Land bridge ដែលតភ្ជាប់ឈូងសមុទ្រថៃ និងសមុទ្រ Andaman ទៅកាន់ពិភពលោក គឺមានសារៈសំខាន់ណាស់ ក្នុងការកាត់បន្ថយការកកស្ទះចរាចរណ៍ដឹកទំនិញតាមរយៈផ្លូវទឹក”។

លោកបន្ថែមថា “ការស្ថាបនាគម្រោងនេះ ក៏នឹងនាំមកនូវការអភិវឌ្ឍន៍ដល់ប្រទេសថៃផងដែរ ខណៈគម្រោងខ្នាតយក្សមួយនេះអាចជួយស្រូបទាញ អ្នកវិនិយោគបរទេសកាន់តែច្រើន ចូលមកបណ្តាក់ទុននៅក្នុងប្រទេសរបស់យើង”។បន្ទាប់ពីបញ្ចប់ការសាងសង់រួចរាល់ជាស្ថាពរ ហេដ្ឋារចនាសម្ព័ន្ធខ្នាតយក្សនេះ នឹងជួយសម្រួលដល់ការដឹកជញ្ជូន រហូតដល់ទៅ៦០ភាគរយ នៃការផ្គត់ផ្គង់ប្រេងរបស់ពិភពលោក៕ ប្រភព៖Bangkok Post៕

        ដោយៈ គង់ ហ្វីអូណា

        ព្រះសីហនុៈ  តំបន់សេដ្ឋកិច្ចពហុគោលបំណង នៅខេត្តព្រះសី​ហ​នុ​ មានគោលដៅច្បាស់លាស់ ក្នុងការប្រែក្លាយក្រុងនៃខេត្តនេះ ​ទៅ​ជា “ទីក្រុង Shenzhen ទីពីរ។

អភិបាល​រង​ខេត្ត​ព្រះ​សី​ហ​នុ ​លោក​ ​ឡុង​ ​ឌី​ម៉ង់ ​កាលពី​ពេលថ្មីៗនេះ​​​បានឲ្យ​ដឹង​ថា​ ​ផែនការ​មេ​អភិវឌ្ឍន៍​ខេត្ត​ព្រះ​សី​ហ​នុ ​ទៅជា​តំបន់​សេដ្ឋកិច្ច​ពិសេស​ (S​E​Z​) ​គំរូ​ពហុ​គោលបំណង​ ​បាន​ឈាន​ដល់​ដំណា​ក់កាល​ចុង​ក្រោយ​ ​ហើយនឹង​ត្រៀម​ដាក់​ជូន​រដ្ឋាភិបាល​ ​ដើម្បី​អនុវត្ត​នៅ​ត្រីមាស​ទី​២​ឆ្នាំនេះ​។

ផែនកា​រ​មេ​ ​ដែល​ជា​អាទិភាព​សំខាន់​មួយ ​នៃ​គោល​នយោបាយ​អភិវឌ្ឍន៍​ឧស្សាហកម្ម​របស់​កម្ពុជា​ (​I​D​P​) ​សម្រាប់​ចន្លោះ​ឆ្នាំ​ ​២០១៥​-​២០២៥​ ​ត្រូវ​បាន​គេ​រំពឹង​ថា​ ​ជា​ឯកសារ​ផែនការ​រយៈពេល​វែង​ប្រកប​ដោយ​ថាមពល​ ដែល​ផ្តល់​នូវ​ប្លង់​គោលគំនិត ​ដើម្បី​ដឹកនាំ​ការ​អភិវឌ្ឍន៍​ខេត្ត​នា​ពេល​អនាគត ​ដែល​ជា​ប៉ូល​សេដ្ឋកិច្ច​ដ៏​សំខាន់​មួយ​ ​មិន​ត្រឹមតែ​នៅ​ក្នុង​ប្រទេស​ប៉ុណ្ណោះ​ទេ​ ​ប៉ុន្តែ​នៅ​ក្នុង​តំបន់​ផង​ដែរ​។​

តំបន់​សេដ្ឋកិច្ច​ពិសេស​ពហុ​គោលបំណង ​មាន​គោលដៅ​ច្បាស់​លាស់ ​ក្នុង​ការ​ប្រែក្លាយ​ក្រុង​ព្រះ​សី​ហ​នុ​ទៅជា​  “ទីក្រុង​ ​She​n​z​hen​ ​ទីពីរ​”​។​ ​ទីក្រុង​ ​She​n​z​hen​ ​គឺ​ជាឧទាហរណ៍​ដ៏​ជោគជ័យ​បំផុត​ នៃ​តំបន់​សេដ្ឋកិច្ច​ពិសេស​របស់​ចិន​ ​ដោយសារ​វា​បាន​ជួយ​បំប្លែង ​ភូមិ​នេសាទ​តូច​មួយ ​ឱ្យ​ក្លាយ​ជា​កន្លែង​ផលិត​ថាមពល​ ​និង​ជា​ទីក្រុង​ច្នៃប្រឌិត​បច្ចេកវិទ្យា​​ខ្ពស់​។​លោក​ ​ឡុង​ ​ឌី​ម៉ង់ ​បាន​ឱ្យ​ដឹង​ នៅ​ក្នុង​សេចក្តី​បង្ហោះ​លើ​បណ្តាញ​សង្គម​ហ្វេ​ស​បុក​ថា​ ​បន្ទាប់ពី​បាន​សិក្សា​ ​វិភាគ​ ​និង​រៀបចំផែនការ​អភិវឌ្ឍ​ខេត្ត​ព្រះ​សី​ហ​នុ ​ទៅជា​​តំបន់​​សេដ្ឋកិច្ច​ពិសេស ​គំរូ​ពហុ​គោលបំណង​ ​អស់​រយៈពេល​​ជាង​ពីរ​ឆ្នាំ​ ​ឥឡូវនេះ​វា​បាន​ឈាន​ដល់​ដំណាក់កាល​ចុង​ក្រោយ​ ​ហើយនឹង​ដាក់​ជូន​រដ្ឋាភិបាល ​ក្នុង​ត្រីមាស​ទី​២​ ​ឆ្នាំ  ​២​០​២​៤​នេះ​។​

ជាមួយនឹង​ការ​អនុវត្ត​ផែនការ​មេ​ ​ដែល​ត្រូវ​បាន​បង្កើត​ឡើង​ដោ​យ​ការ​គាំទ្រ ​ពី​វិទ្យាស្ថាន​រៀបចំផែនការ​ទីក្រុង​ ​និង​រចនា​ទីក្រុង​ ​Shenzhen​ ​របស់​ប្រទេស​ចិន​ (​UP​DIS​) ​ចំនួន​ប្រជាជន​ទីក្រុង​ត្រូវ​បាន​គេ​រំពឹង​ថា ​នឹង​កើន​ឡើង​ពី៣០ម៉ឺននាក់ ដល់​១លាន​នាក់​នាពេលអនាគត ​ខណៈ​ដែល​តំបន់​សេដ្ឋកិច្ច​ពិសេស​ ពហុ​គោល​បំណង​មាន​បំណង​ក្លាយ​ជា​ ​ជា​តំបន់​សេដ្ឋកិច្ច​ដ៏​សំខាន់​មួយ ​នៅ​អាស៊ី​អាគ្នេយ៍​ ​ដែល​ត្រូវ​បាន​ផ្តល់​សិទ្ធិ​អំណាច ​ដោយ​បច្ចេកវិទ្យា​ឆ្លាតវៃ​ ​ក៏ដូចជា​តំបន់​ឧស្សាហកម្ម​ទំនើប ​ដែល​បម្រើ​ដល់​ខ្សែ​សង្វាក់​ផលិតកម្ម​ ក្នុង​តំបន់​ ​និង​ពិភពលោក​។​យោង​តាម​អ្នកជំនាញ​ ​ការ​អភិវឌ្ឍតំបន់​សេដ្ឋកិច្ច​ពិសេស​នេះ​ ​នឹង​ដើរតួ​យ៉ាងសំខាន់​ ក្នុង​ការ​ស្តារ​ឡើងវិញ​របស់​កម្ពុជា ​ពី​ផល​ប៉ះពាល់​សេដ្ឋកិច្ច​នៃ​ជំងឺរាតត្បាត​ កូ​វី​ដ​-​១​៩​ ​ផង​ដែរ​។​ ​បច្ចុប្បន្ន​ខេត្ត​បាន​បញ្ចប់​ការ​សាងសង់​ផ្លូវ​ថ្មី​ចំនួន​​៣​៤​ខ្សែ​ ​ហើយ​បច្ចុប្បន្ន​កំពុង​ពង្រីក​កំពង់ផែ​ ​និង​អាកាសយានដ្ឋាន​។​

ជា​មួយគ្នា​នេះ​ ​រដ្ឋបាល​ខេត្ត​ព្រះ​សី​ហ​នុ ​ក៏​កំពុង​អនុវត្ត​ផែនការ​សកម្មភាព​មួយ​ ​ដែល​បង្កើត​ដោយ​គណៈកម្មាធិការ​អន្តរ​ក្រសួង​របស់  ​រដ្ឋាភិបាល​ ​ដើម្បី​បញ្ចប់​ការ​សាងសង់​ អគារ​មិន​ទាន់​រួចរាល់​ជិត​ ​៤​០​០​ ​នៅ​ខេត្ត​ព្រះ​សី​ហ​នុ ​ដែល​ភាគច្រើន​ត្រូវ​បាន​បោះបង់​ចោល ​ដោយ​អ្នក​វិនិយោគ​ចិន​ ​បន្ទាប់ពី​ការ​ហាម​ឃាត់​ល្បែង​អន​ឡា​ញ​នៅ​ឆ្នាំ​ ​២​០​២​០​ ​និង​ ​ការ​ផ្ទុះ​ឡើង​នៃ​ជំងឺ​កូ​វី​ដ​-​១​៩​។​

​ការផ្លាស់ប្តូរ​ដើម្បី​ដោះស្រាយ​វិបត្តិ ​ដែល​បង្កើត​ឡើង​ដោយ​អគារ​មិនទាន់​សាងសង់​ បាន​ប្រមូលផ្តុំ​សន្ទុះ​កាលពីដើម​ឆ្នាំមុន​ ​បន្ទាប់ពី​មាន​ការរិះគន់​ថា​ ​អគារ​ទាំងនោះ​កំពុង​តែ​ប៉ះ​ពាល់​សោភ័ណ​ភាព​ទីក្រុង​ឆ្នេរសមុទ្រ​ដែល​ល្បីល្បាញ​មួយ​នេះ​។​

ដោយសារ​អគារ​ភាគច្រើន​ជាប់​ពាក់ព័ន្ធ ​ក្នុង​បញ្ហា​ផ្លូវច្បាប់​រវាង​ម្ចាស់​គម្រោង​ ​និង​អ្នក​​អភិ​វឌ្ឍន៍​ ​ភាគី​ពាក់ព័ន្ធ​ត្រូវ​បាន​លើកទឹក​ចិត្ត​ឱ្យ​ទៅ​ដោះស្រាយ​ក្រៅ​តុលាការ​ ​និង​ទាញ​យក​អត្ថប្រយោជន៍​ពី​ការ​លើក​ទឹក​ចិត្ត​ដែល​មាន​ នៅ​ក្នុង​កញ្ចប់​របស់​រដ្ឋាភិបាល​ ​ដូចជា​សម្បទាន​​ពន្ធ​ជា​ដើម​។​

ការ​សម្រេច​ចិត្ត​ធ្វើ​ឱ្យ​ប្រសើរ​ឡើង​ ក្រុង​ព្រះ​សី​ហ​នុ​ទៅជា​តំបន់​សេដ្ឋកិច្ច​ពិសេស​ពហុ​គោល​បំណង ​កើតឡើង​ទន្ទឹម​នឹង​ការ​ខិតខំ​ប្រឹង​ប្រែង​ក្នុង​ការ​អភិវឌ្ឍ​ កំពង់ផែ​ស្វយ័ត​ក្រុង​ព្រះ​សី​ហ​នុ (PAS)។​ ​សាង​សង់​ដោយ​ហិរញ្ញប្បទាន សម្បទានជាង​២​០​០​​លាន​ដុល្លារ​ពី​ទីភ្នាក់ងា​រ​សហប្រតិបត្តិការ​អន្តរជាតិ​ជប៉ុន​ (J​I​CA​) ​ដំណាក់កាល​ដំបូង​នៃ​ការងា​រ​អភិវឌ្ឍន៍​ កំពង់ផែ​ទឹក​ជ្រៅ​តែមួយ​គត់​របស់​កម្ពុជា ​ត្រូវ​បាន​រំពឹង​ថា​នឹង​បញ្ចប់​នៅ​ឆ្នាំ​២​០​២​៥​។

សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានប្រកាសដាក់ចេញកម្មវិធី និងគោលនយោបាយលើកទឹកចិត្តជាច្រើន ដើម្បីទាក់ទាញការវិនិយោគពីអ្នកវិនិយោគជាតិ អន្តរជាតិមកកាន់ខេត្តព្រះសីហនុកាលពីថ្ងៃទី៣១ មករាកន្លងមកនេះ៕

ដោយ: គង់ លាងហួរ

ប៉េកាំង: តម្លៃផ្ទះថ្មីរបស់ប្រទេសចិន បានកើនឡើងកាលពីខែមករា ក្នុងល្បឿនប្រចាំខែលឿនបំផុតមិនធ្លាប់មាន ក្នុងរយៈពេលជិត២ឆ្នាំកន្លះមកនេះ ក្រោយពីរដ្ឋាភិបាលចិន បានដាក់ចេញវិធានការជំរុញការទិញផ្ទះ។

តម្លៃផ្ទះជាមធ្យមនៅទូទាំងទីក្រុងចំនួន១០០ បានកើនឡើងក្នុងរយៈពេល៥ខែជាប់ៗគ្នា ខណៈតម្លៃផ្ទះនៅខែមករា បានកើនក្នុងអត្រាប្រចាំខែ០,១៥ភាគរយ បើធៀបនឹងកំណើន០,១ភាគរយកាលពីខែធ្នូ។

តួលេខកំណើន០,១៥ភាគរយ នៅខែមករា គឺជាការកើនឡើងលឿនបំផុតមិនធ្លាប់មាន គិតចាប់តាំងពីការកើនឡើង០,២ភាគរយនៅក្នុងខែសីហា ឆ្នាំ២០២១។នេះ​បើ​តាម​ក្រុមហ៊ុន​ស្រាវជ្រាវ​អចលន​ទ្រព្យ​ចិន China Index Academy។

ជាមួយគ្នានេះ ចំនួនទីក្រុង ដែលបានកត់ត្រាកំណើនតម្លៃផ្ទះថ្មីប្រចាំខែ មានចំនួន៤៩ទីក្រុង នៅក្នុងខែមករា ពោលគឺកើនឡើងពី៤៧ទីក្រុង ក្នុងខែធ្នូ ឆ្នាំ២០២៣។

ក្នុងរយៈពេលមួយឆ្នាំកន្លងមក ប្រទេសដែលមានសេដ្ឋកិច្ចធំជាងគេទីពីររបស់ពិភពលោកមួយនេះ បាននិងកំពុងដាក់ចេញនូវគោលនយោបាយជាច្រើនបន្តបន្ទាប់គ្នា ដើម្បីជួយស្តារឧស្សាហកម្មអចលនទ្រព្យឡើងវិញ។

នៅក្នុងសប្តាហ៍នេះ ទីក្រុងធំៗចំនួនពីរ គឺទីក្រុងសៀងហៃ និងទីក្រុងស៊ូចូវ បានយកគម្រូតាមទីក្រុងក្វាងចូវ ក្នុងការបន្ធូរបន្ថយការទប់ស្កាត់ការទិញផ្ទះ។

ក្រុមហ៊ុន China Index Academy បានអះអាងថា “បច្ចុប្បន្ន ដោយសារតែគោលនយោបាយ បន្ធូរបន្ថយការទប់ស្កាត់ការទិញផ្ទះ ទើបតែត្រូវបានប្រកាស ដូច្នេះ យើងមិនទាន់អាចមើលឃើញឥទ្ធិពលរបស់វានោះទេ”។

យោងតាមក្រុមហ៊ុនស្រាវជ្រាវខាងលើ បានឱ្យដឹងទៀតថា សកម្មភាពទីផ្សារអាចនឹងកើនឡើង បន្ទាប់ពីថ្ងៃឈប់សម្រាកបុណ្យចូលឆ្នាំចិន ចាប់ពីថ្ងៃទី១០ ដល់ថ្ងៃទី១៧ ខែកុម្ភៈ៕ប្រភព៖Reuters៕