ដោយ: គង់ លាងហួរ

អន្តរជាតិ: ក្រុមហ៊ុនអាហារ និងភេសជ្ជៈ Thai Beverage (ThaiBev) ដែលចុះបញ្ជីនៅសិង្ហបុរី គ្រោងបោះទុនចំនួន៧ពាន់លានបាត(ប្រហែល១៨៨,២លានដុល្លារ) ដើម្បីពង្រីកអាជីវកម្មរបស់ខ្លួនទាំងក្នុងនិងក្រៅប្រទេស ក្នុងឆ្នាំសារពើពន្ធបច្ចុប្បន្ន ដែលបានចាប់ផ្តើមនៅថ្ងៃទី១ ខែតុលា។

លោក Thapana Sirivadhanabhakdi នាយកប្រតិបត្តិក្រុមហ៊ុននេះបានអះអាងថា  ក្នុងនោះទឹកប្រាក់ប្រហែល១០៧,៥៦លានដុល្លារ ត្រូវបានបែងចែកសម្រាប់សាងសង់ រោងចក្រផលិតភេសជ្ជៈថ្មីមួយនៅកម្ពុជា។ ចំណែក ទឹកប្រាក់៣ពាន់លានបាតទៀត ត្រូវបានបម្រុងទុក សម្រាប់សាងសង់កន្លែងដឹកជញ្ជូន រោងចក្រជីវឧស្ម័ន និងគំនិតផ្តួចផ្តើមជាយុទ្ធសាស្ត្រផ្សេងទៀត។លោក Thapana បានបន្តថា “ជាមួយនឹងការងើបឡើងវិញនៃវិស័យទេសចរណ៍ និងឧស្សាហកម្មម្ហូបអាហារ និងភេសជ្ជៈ យើងបាននិងកំពុងចាត់វិធានការ ដើម្បីពង្រឹងម៉ាកយីហោ និងទីតាំងទីផ្សាររបស់យើង នៅគ្រប់ផ្នែកអាជីវកម្មរបស់យើង ដើម្បីបង្កើនការប្រកួតប្រជែង”។លោក Michael Chye Hin Fah ប្រធានក្រុមផលិតផលស្រាបៀររបស់ក្រុមហ៊ុនThaiBev បានមានប្រសាសន៍ថា ក្រុមហ៊ុន ThaiBev កំពុងសាងសង់រោងចក្រផលិតស្រាបៀរ ដំបូងរបស់ខ្លួននៅក្នុងប្រទេសកម្ពុជា ដែលគ្រោងនឹងបញ្ចប់ ក្នុងរយៈពេល២ឆ្នាំខាងមុខ។

លោក Fah បានមានប្រសាសន៍ថា “នេះជាលើកទីមួយហើយដែលក្រុមហ៊ុន ThaiBev នឹងសាងសង់រោងចក្រផលិតស្រាបៀរផ្ទាល់ខ្លួននៅកម្ពុជា ដោយមើលឃើញពីកំណើន ទីផ្សារយ៉ាងឆាប់រហ័សរបស់កម្ពុជា និងសក្តានុពល ដែលមិនទាន់ទាញយកមកប្រើប្រាស់នៅឡើយ”។ទាក់ទង​នឹង​ការ​ដំណើរការ​របស់​ក្រុមហ៊ុន ThaiBev លោក​បាន​លើកឡើងថា​ អាជីវកម្ម​ស្រាបៀរ​របស់​ក្រុមហ៊ុន ​ក្នុង​ប្រទេស​ថៃ​បាន​ស្ទុះ​ងើប​ឡើង​វិញ​ ខណៈ​ដែល​សកម្មភាព​សេដ្ឋកិច្ច ​ស្ទុះ​ងើប​ឡើង​វិញ ហើយ​ភ្ញៀវ​ទេសចរ​ក៏​វិល​មក​វិញ។

លោក Fah បានបញ្ជាក់ថា ទោះបីជាយ៉ាងណាក៏ដោយ អាជីវកម្មរបស់ក្រុមហ៊ុន នៅក្នុងប្រទេសវៀតណាម នៅតែបន្តប្រឈមមុខនឹងបញ្ហា ដែលបណ្តាលមកពីការប្រើប្រាស់តិច ស្របពេលម៉ាក្រូសេដ្ឋកិច្ចកំពុងធ្លាក់ចុះ៕

        ដោយៈ គង់ សូរិយា

        ភ្នំពេញៈ មន្រ្តីជាន់ខ្ពស់ក្រសួងរៀបចំដែនដី បានជួបប្រជុំនិងពិភាក្សាជាមួយមន្រ្តីជំនាញ ធនាគារអភិវឌ្ឍន៍អាស៊ី(ADB) ដើម្បីរៀប​ចំអភិវឌ្ឍន៍ទីក្រុងចំនួនបី ប្រកបដោយសុខដុមរមនា។

កិច្ចប្រជុំដែលបានធ្វើឡើងកាលពីថ្ងៃទី៤ តុលាកន្លងមកនេះដឹកនាំដោយលោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជានាយកគម្រោងនៃក្រុមការងារអនុវត្តន៍ គម្រោងអភិវឌ្ឍទីក្រុង ប្រកបដោយសុខដុមរមនា នៅក្រុងកំពត ក្រុងបាវិត និងក្រុងប៉ោយប៉ែត។

កិច្ចប្រជុំនេះ មានការចូលរួមពីក្រុមការងារទីប្រឹក្សា នៃធនាគារអភិវឌ្ឍន៍អាស៊ីស្តីពី គម្រោងអភិវឌ្ឍទីក្រុង ប្រកបដោយសុខដុមរមនានៅក្រុងកំពត ក្រុងបាវិត និងក្រុងប៉ោយប៉ែត៕

        ដោយៈ ជេស៊ីកា

        ភ្នំពេញៈ គិតត្រឹមដំណាច់ត្រីមាសទី៣ឆ្នាំនេះ ក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគចំនួន១៤២ ជាមួយទុន ១៧៦៤,១៩លានដុល្លារ និងបានបង្កើតការងារជូនប្រជាពលរដ្ឋបានចំនួន១៩៥,៥១៦កន្លែង។តួលេខនេះ បើធៀបទៅនឹងរយៈពេល៩ខែដូចគ្នា កាលពីឆ្នាំមុន មានការកើនឡើង៩គម្រោង។

យោងតាមរបាយការណ៍ប្រចាំថ្ងៃ របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្នុងចំណោមគម្រោងវិនិយោគ១៤២ ក្នុងនោះ ខែមករាឆ្នាំ២០២៣ CDCបានអនុម័តគម្រោងវិនិយោគចំនួន១០ មានទុនចំនួន៩៩,៤លានដុល្លារ និងបានបង្កើតការការជូន ពលរដ្ឋចំនួន១៧,១២៩កន្លែង។

ខែកម្ភៈ មានគម្រោងវិនិយោគចំនួន១៧ក្រុមហ៊ុន ជាមួយទុនវិនិយោគចំនួន៩៨,៨លានដុល្លារ ដោយផ្តល់ឱកាសការងារជូនដល់ ប្រជាពលរដ្ឋចំនួន២២៧៨៤កន្លែង។
ខែមីនាមានគម្រោងវិនិយោគចំនួន៧ មានទុនចំនួន៣៣,៧លានដុល្លារ ដោយផ្តល់ការងារជូន ប្រជាពលរដ្ឋចំនួន៦,៦៦៩កន្លែង។
ខែមេសា មានគម្រោងវិនិយោគចំនួន២០ក្រុមហ៊ុន ជាមួយទុនចំនួន២៤៧,៧លានដុល្លារ និងបានផ្តល់ការងារជូនដល់ពលរដ្ឋចំនួន១៧៧២៣កន្លែង។
ខែឧសភា មានគម្រោងវិនិយោគចំនួន១០ក្រុមហ៊ុន ជាមួយទុន ចំនួន៦០,១៤លានដុល្លារ ដោយផ្តល់ការងារជូនពលរដ្ឋចំនួន១៣៩៨៧កន្លែង។
ខែមិថុនា មានគម្រោងចំនួន៣០ ជាមួយទុនវិនិយោគចំនួន៤០៧,៦លានដុល្លារ ដោយផ្តល់ការងារជូន ពលរដ្ឋ៣៧,៧៨១នាក់ ។
ខែកក្កដា មានគម្រោងវិនិយោគចំនួន៩ ជាមួយទុនចំនួន៧៧លានដុល្លារ ដោយផ្តល់ការងារ ជូនពលរដ្ឋ១៧០២៩នាក់។
ខែសីហាអនុម័តចំនួន២៣គម្រោង មានទុនចំនួន៤៨៤,៨ លានដុល្លារ បង្កើតការងារបានចំនួន ៣៥,០៥០កន្លែង និងខែកញ្ញាអនុម័ត ចំនួន២៦ក្រុមហ៊ុន មានទុនចំនួន២៥៦,៤៥លានដុល្លារ និងបង្កើតការងារជូន​ប្រជាពលរដ្ឋ បានចំនួន២៧,៣៦៥កន្លែង។

ក្នុងចំណោមគម្រោងចំនួន១៤២ គម្រោងធំជាងគេគឺគម្រោងបង្កើតរោងចក្រផលិតស៊ីម៉ង់តិ៍ នៅខេត្តកំពង់ស្ពឺ ដែលមានទុនវិនិយោគ២៥៨លានដុល្លារ។ បន្ទាប់គម្រោងបង្កើតរោងចក្រផលិតសំបកកង់យានយន្ត នៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួលខេត្តក្រចេះ ដែលមានទុនប្រមាណ១៣៨លានដុល្លារ។

គម្រោងបង្កើតរោងចក្រផលិតស៊ីម៉ង់ត៍ នៅស្រុករតនមណ្ឌល ខេត្តបាត់ដំបង ជាមួយទុនវិនិយោគប្រមាណ៩៥លានដុល្លារ។គម្រោងអភិវឌ្ឍន៍អនុស្ថានីយ៍ និងខ្សែបញ្ជូនថាមពលអគ្គិសនី តង់ស្យុងខ្ពស់២៣០គីឡូវ៉ុល ពីខេត្តកំពង់ចាម ទៅខេត្ត​ក្រចេះ ក្នុងទុនវិនិយោគប្រមាណ៩២,២លានដុល្លារ និងអាចបង្កើតការងារជូនប្រជាពលរដ្ឋបានចំនួន៤៦៤កន្លែងជាដើម៕

ដោយ: គង់ លាងហួរ

អន្តរជាតិ: ក្រុមហ៊ុនចិនGeneral Tires Technology (Cambodia) Co., Ltd  គ្រោងទិញកៅស៊ូដែលដាំនៅកម្ពុជាស្រាប់ ដើម្បីផលិតសំបកកង់ក្នុងរោងចក្រ តម្លៃ៣០០លានដុល្លាររបស់ខ្លួន នៅតំបន់សេដ្ឋកិច្ចពិសេសក្រុងព្រះសីហនុ ដើម្បីបង្កើនសមត្ថភាពផលិតនៅឆ្នាំក្រោយ។

លោក Tao Guozhong អគ្គនាយកក្រុមហ៊ុនGeneral Tires Technology បានមានប្រសាសន៍ថា ក្រុមហ៊ុនបានទិញកៅស៊ូពីខេត្តរតនគិរីប្រមាណ២០តោន ដើម្បីធ្វើតេស្តគុណភាព មុនពេលបង្កើនបរិមាណបន្ថែម។
លោកបានបន្តថា “យើងទើបតែទទួលបានវិញ្ញាបនបត្រពន្ធដារពីរដ្ឋាភិបាល ដែលអាចឱ្យយើងមិនបង់ពន្ធ លើតម្លៃបន្ថែមលើវត្ថុធាតុដើមដែលយើងទិញក្នុងស្រុក”។ លោកបន្តថា “ឥឡូវនេះ យើងកំពុងធ្វើតេស្តគុណភាព ក្នុងបរិមាណតិចតួចជាមុនសិន។  ទោះ​ជា​យ៉ាង​ណា ការ​ទិញ​កៅស៊ូ​ក្នុង​ស្រុក ​នឹង​ធ្វើ​ឲ្យ​យើង​ចំណាយ​តិច​បើ​ធៀប​នឹង​ការ​នាំ​ចូល”។លោកបន្ថែមថា បច្ចុប្បន្នក្រុមហ៊ុនបាននាំចូលកៅស៊ូ ពីប្រទេសថៃ និងម៉ាឡេស៊ី ដើម្បីផលិតសំបកកង់ ដើម្បីនាំចេញទៅកាន់ទីផ្សារសហរដ្ឋអាមេរិក និងប្រេស៊ីល។ លោក Guozhong បានចង្អុលបង្ហាញថា ក្រុមហ៊ុន General Tires Technology ដែលមានរោងចក្រផលិតសំបកកង់ នៅក្នុងប្រទេសចិន និងប្រទេសថៃផងដែរនោះ ត្រូវការកៅស៊ូប្រមាណ៣០.០០០តោនក្នុងមួយឆ្នាំ ដើម្បីផលិតសំបកកង់ចន្លោះពី៦ពាន់ទៅ៧សំបកក្នុងមួយថ្ងៃ និងនាំចេញសំបកកង់ចំនួន២០កុងតឺន័រ ទៅកាន់ទីផ្សារទាំងនោះ។

ដោយ​លើក​ឡើង​ពី​តួ​លេខ​របស់​រដ្ឋាភិបាល លោក Guozhong បាន​អះអាងថា ដំណាំ​កៅស៊ូ​របស់​កម្ពុជា​ ដែលដាំដុះនៅ​លើ​ផ្ទៃដី​ប្រមាណ៤០ម៉ឺន​ហិកតា កំពុងត្រូវ​បាន​នាំ​ចេញ​ទៅ​កាន់ប្រទេស​ថៃ ម៉ាឡេស៊ី និង​ប្រទេស​ផ្សេង​ទៀត។ លោក Guozhong បានបញ្ជាក់ថា “យើងសង្ឃឹមថា យើងនឹងអាចប្រើប្រាស់វត្ថុធាតុដើម ឬកៅស៊ូដែលដាំដុះនៅកម្ពុជា សម្រាប់បម្រើដល់ផលិតកម្មរបស់យើង”៕

ដោយៈ គង់ ហ្វីអួណា

        ភ្នំពេញៈ អភិបាលរាជធានីភ្នំពេញ លោក ឃួង ស្រេងបានឱ្យដឹងថា រដ្ឋបាលរាជធានីភ្នំពេញ មានគម្រោងសាងសង់ស្ពានឆ្លងទន្លេ ២កន្លែងទៀត គឺឆ្លងពីព្រែកប្រា ឆ្លងទៅផ្លូវជាតិលេខ២ និងទៅផ្លូវ៦០ម៉ែត្រ តំបន់អភិវឌ្ឍន៍ជើងឯក។លោកអភិបាលរាជធានីភ្នំពេញមានជំនឿថា ក្រោយស្ពាន២នេះ ស្ថាបនារួចរាល់ ទើបតំបន់ខាងលើនេះ អាចដោះស្រាយបានល្អប្រសើរ លែងមានការកកស្ទះចរាចរណ៍ទៀត។ការឱ្យដឹងបែបនេះ របស់លោក ឃួង ស្រេង បានធ្វើឡើងក្នុងឱកាសលោកនាំកិច្ចប្រជុំស្តីពី ការងារការពារសន្តិសុខ សុវត្ថិភាព ជូនប្រមុខថ្នាក់ដឹកនាំជាន់ខ្ពស់រាជរដ្ឋាភិបាល នារសៀលថ្ងៃទី៣ ខែតុលា ឆ្នាំ២០២៣នេះ ដែលមានការចូលរួមពីស្នងការដ្ឋានរាជធានី, ទីបញ្ជាការដ្ឋានកងរាជអាវុធហត្ថរាជធានី, កងកម្លាំងនៃអធិការដ្ឋានទាំង១៤ខណ្ឌ និងអភិបាលខណ្ឌទាំង១៤ ចំណុះឱ្យរដ្ឋបាលរាជធានីភ្នំពេញ។

លោក ឃួង ស្រេង បានលើកឡើងថា កិច្ចប្រជុំនេះធ្វើឡើងដើម្បីរកមធ្យោបាយ ដើម្បីដោះស្រាយការកកស្ទះចរាចរណ៍ ពិសេសគឺការសម្រួលក្បួនថ្នាក់ដឹកនាំឱ្យបានរលូន និងកាត់បន្ថយបាននូវការថ្នាំង​ថ្នាក់ពីប្រជាពលរដ្ឋដែលធ្វើដំណើរតាមដងផ្លូវ។លោក ឃួង ស្រេង បានឱ្យដឹងថា “ជុំវិញបញ្ហានេះ រដ្ឋបាលរាជធានីភ្នំពេញ បានប្រឹងប្រែងខ្លាំងណាស់ ដោយបានសាងសង់ស្ពានបេតុងខ្សែកាបកោះនរា ឆ្លងពីទីក្រុងកោះពេជ្រ ទៅទីក្រុងកោះនរា ស្ថិតក្នុងខណ្ឌច្បារអំពៅ និងខណ្ឌចំការមន ជាមួយនឹងមានគម្រោងសាងសង់ស្ពានឆ្លងទន្លេ២កន្លែងទៀត ឆ្លងពីព្រែកប្រា ឆ្លងទៅផ្លូវជាតិលេខ២ ទៅផ្លូវ៦០ម៉ែត្រ តំបន់អភិវឌ្ឍន៍ជើងឯក។ ក្រោយស្ពាន២នេះ ស្ថាបនារួចរាល់ ទើបតំបន់ខាងលើនេះ អាចដោះស្រាយបានល្អប្រសើរ លែងមានការកកស្ទះចរាចរណ៍ទៀត។លោកបានបន្ថែមថា កំណាត់ផ្លូវជាតិលេខ១ កាលពីមិនទាន់មានបើកការដ្ឋានសាងសង់ ស្ពានអាកាសព្រះមុនីវង្ស គឺមានការកកស្ទះចរាចរណ៍រួចទៅហើយ តែនៅពេលការដ្ឋាននេះ ចាប់ផ្តើមដំណើរការកំណាត់ផ្លូវមួយនេះ កាន់តែស្ទះខ្លាំងឡើងថែមទៀត។ ដូច្នេះហើយ ទើបជាបន្តបន្ទាប់មកនេះ អាជ្ញាធររាជធានីភ្នំពេញ តែងតែប្រជុំពិភាក្សា រកដំណោះស្រាយ ដើម្បីកាត់បន្ថយការកកស្ទះ ពិសេសនៅរង្វង់មូលក្បាលថ្នាល់ និងនៅមុខក្រសួងមហាផ្ទៃ។ ប៉ុន្តែទោះបីជាយ៉ាងណាក្តី ការកកស្ទះចរាចរណ៍ នៅតែបន្តកើតមានហើយយើងក៏នៅតែបន្តការដោះស្រាយ។

លោក ឃួង ស្រេង បានបញ្ជាក់ផងដែរថា បើទោះបីការដ្ឋានសាងសង់ស្ពានអាកាសព្រះមុនីវង្សនេះ បានបញ្ចប់ក៏ទីតាំងនេះ នៅតែប្រឈមនៃការបញ្ហាកកស្ទះដដែរទេ ព្រោះតែលំហូរចរាចរណ៍ខ្លាំងពីផ្លូវជាតិលេខ១។លោកបន្តទៀតថា ជាជំហាននៃការដោះស្រាយបញ្ហាចរាចរណ៍នៅចំណុចខាងលើនេះ។ លោកបានណែនាំឱ្យកម្លាំង មានសមត្ថកិច្ចប៉ូលីស ត្រូវហាមដាច់ខាត ចំពោះរថយន្តដឹកទំនិញធំៗ គឺមិនអនុញ្ញា​តឱ្យធ្វើចរាចរណ៍ចូលរាជធានីភ្នំពេញ តាមផ្លូវជាតិលេខ១ ពិសេសចាប់ពីនិរោធ៣ រហូតដល់ស្ពានច្បារអំពៅ ព្រោះយើងមានផ្លូវវាងអោយពួកគាត់ហើយ។ សម្រាប់រដ្ឋបាលរាជធានីភ្នំពេញ ត្រូវធ្វើសេចក្តីជូនដំណឹងភ្លាម ដើម្បីឱ្យពួកគាត់ជ្រាបព័ត៌មាន និងបានវាងចេញពីតំបន់កកស្ទះនេះ។

លោក ឃួង ស្រេង បានបន្ថែមទៀតថា ការសម្រួលក្បួន និងកិច្ចការពារសន្តិសុខ សុវត្ថិភាព ជូនប្រមុខថ្នាក់ដឹកនាំជាន់ខ្ពស់រាជរដ្ឋាភិបាល ដែលឆ្លងកាត់តំបន់ខាងលើ ត្រូវតែធ្វើឡើងដោយភាពហ្មត់ចត់ ពោលគឺសម្រួលក្បួន ជូនប្រមុខថ្នាក់ដឹកនាំបានល្អហើយ កាត់បន្ថយ ការថ្នាំងថ្នាក់ ពីប្រជាពលរដ្ឋជាអ្នកដំណើរថែមទៀត ពិសេសក្បួនទៅផុតកងកម្លាំងមិនត្រូវដកកម្លាំងភ្លាមទេ គឺត្រូវសម្រួលចរាចរណ៍ជូនប្រជាពលរដ្ឋឱ្យទៅជាធម្មតាវិញ ទើបដកកម្លាំងចេញបាន៕

ដោយៈ តែម សុខុម

ហាណូយៈ នាយកដ្ឋានផ្លូវថ្នល់វៀតណាម បានស្នើឱ្យក្រសួងដឹកជញ្ជូនជួសជុលកែលម្អផ្លូវជាតិ៣ខ្សែ ដែលតភ្ជាប់ប្រទេសវៀតណាម ជាមួយប្រទសឡាវ ភាគខាងជើង និងប្រទេសចិន ភាគខាងត្បូង។ ការកែលំអរនេះ ធ្វើឡើងក្នុងគោលបំណងពង្រឹងការតភ្ជាប់តាមច្រករបៀងសេដ្ឋកិច្ចបូព៌ា-បស្ចិម (East West Economic Corridor) និងលើកកម្ពស់ទំនាក់ទំនងពាណិជ្ជកម្មឆ្លងដែន។

សារព័ត៌មាន Vietnam News បានចុះផ្សាយកាលពីថ្ងៃអង្គារ ទី៣ ខែតុលា ថា ប្រសិនបើត្រូវបានអនុម័ត គម្រោងជួសជុលនេះនឹងប្រើប្រាស់ ប្រាក់កម្ចីពីធនាគារពិភពលោក ហើយនឹងត្រូវអនុវត្តក្នុងរយៈពេល៥ឆ្នាំពីឆ្នាំ២០២៥ ដល់ឆ្នាំ២០២៩។គម្រោងនេះ នឹងមានទុនវិនិយោគសរុប ប្រមាណ៣៤០លានដុល្លារអាមេរិក ដែលក្នុងនោះ៣១៥លានដុល្លារអាមេរិក ជាកម្ចីបានពីធនាគារពិភពលោក។ ផ្លូវជាតិដែលនឹងត្រូវជួសជុល កែលម្អរួមមានផ្លូវជាតិលេខ២៧៩ (National Highway 279) ផ្លូវជាតិលេខ៤H (National Highway 4H) និងផ្លូវជាតិលេខ២១៧ (National Highway 217) ដែលមានប្រវែងសរុបជាង១៨០គីឡូម៉ែត្រ។

ការជួសជុលកែលម្អផ្លូវទាំងនេះ និងនវានុវត្តន៍ថ្មីត្រូវបានរំពឹងថានឹងជួយសម្រួលចរាចរណ៍ បំពេញបានតម្រូវការដឹកជញ្ជូន ដែលកើនឡើង និងកាត់បន្ថយចម្ងាយរវាងច្រកព្រំដែន និងកំពង់ផែសមុទ្ររវាងប្រទេសវៀតណាម ប្រទេសឡាវ ភាគខាងជើង និងប្រទេសចិន ភាគខាងត្បូង។

យោងតាមក្រុមប្រឹក្សាភិបាល នៃគម្រោងនេះឱ្យដឹងថា ផ្លូវទាំងនេះ ក៏នឹងជួយកាត់បន្ថយថ្លៃដើមដឹកជញ្ជូន ការបំពុលបរិស្ថាន និងគ្រោះថ្នាក់ចរាចរណ៍ផងដែរ៕   Xinhua៕

ដោយ: គង់ លាងហួរ

ភ្នំពេញ: យោងតាមសេចក្តីប្រកាសពត៌មាន របស់ធនាគារហត្ថាបានឱ្យដឹងថា នាពេលថ្មីៗកន្លងមកនេះ ធនាគារ ហត្ថា បានសង្កេតឃើញមានបណ្តាញ ទំនាក់ទំនងសង្គមមួយចំនួន បានផ្សាយព័ត៌មានប្រាសចាកពី ការពិត ក្នុងន័យញុះញង់ ចោទប្រកាន់ និងបង្ហូចកេរ្តិ៍ឈ្មោះ របស់ធនាគារហត្ថា។

សារពត៌មានទាំងនោះបានចុះផ្សាយថា មន្ត្រីធនាគារហត្ថា បានបង្ខំឱ្យអតិថិជនម្នាក់ ដែលបច្ចុប្បន្នកំពុងរស់នៅ ក្នុងភូមិពោធិ៍អណ្តែត សង្កាត់ព្រែកស្តី ក្រុងសំពៅពូន ខេត្តកណ្តាល លក់ទ្រព្យសម្បត្តិ ដើម្បីយកលុយទៅសងធនាគារ។ ទាក់ទិននឹងករណីនេះ ធនាគារហត្ថាបានច្រានចោលករណីនេះ ដោយលើកឡើងថា ពុំមានករណីដូចការចោទប្រកាន់ និងបង្កាច់បង្ខូចខាងលើនោះឡើយ។

យោងតាមសេចក្តីប្រកាសពត៌មានបានឱ្យដឹងទៀតថា ជាក់ស្តែង មន្រ្តីធនាគារហត្ថា តែងតែប្រកាន់យ៉ាងខ្ជាប់ខ្ជួន នូវដំណោះស្រាយប្រកបដោយភាពទន់ភ្លន់ មានក្រមសីលធម៌វិជ្ជាជីវៈខ្ពស់ និងមានការយោគយល់អធ្យាស្រ័យ យ៉ាងច្រើនជាមួយអតិថិជនរបស់ខ្លួន។

លើសពីនេះ ធនាគារហត្ថាបញ្ជាក់ថា ខ្លួនប្រកាន់ខ្ជាប់ជានិច្ចនូវវិជ្ជាជីវៈក្នុងការធ្វើអាជីវកម្ម និងជាគ្រឹះស្ថានដែលបម្រើសេវាហិរញ្ញវត្ថុប្រកបដោយភាពកក់ក្ដៅ តម្លាភាព និងសុក្រឹតភាព ដើម្បីការរីកចម្រើ​នរបស់សាធារណជនទូទៅ។

សេចក្តីប្រកាសពត៌មានរបស់ធនាគារហត្ថាអះអាងថា ខ្លួនបាននឹងកំពុងអនុវត្តន៍ យ៉ាងពេញពេញនូវយន្តការច្បាប់ តាមផ្លូវតុលាការ ស្របតាមច្បាប់ និងបទប្បញ្ញត្តិជាធរមាន ក្នុងករណីមានការលក់ទ្រព្យសម្បត្តិសងបំណុល ចំពោះអតិថិជនណា ដែលមានលទ្ធភាពសង តែពុំមានឆន្ទៈសង។តាមរយៈការរៀបរាប់ខាងលើនេះ ធនាគារហត្ថាក៏បានអំពាវនាវឱ្យសាធារណៈជនទាំងអស់ បានជ្រាបជាពត៌មាន ដើម្បីកុំឱ្យមានការភាន់ច្រឡំតទៅទៀតផងដែរ។ទន្ទឹមគ្នានេះ ធនាគារហត្ថាបានសម្តែងការអរគុណ ចំពោះអតិថិជន ដែលតែងតែគាំទ្រ និងបន្តការគាំទ្រសេវាកម្ម របស់ធនាគារហត្ថាកន្លងមក និងតទៅអនាគត៕