ដោយ: គង់ លាងហួរ

ភ្នំពេញ: ក្រុមប្រឹក្សាអភិវឌ្ឍន៍កម្ពុជា (CDC) បានបញ្ជាក់ឱ្យដឹង នៅក្នុងសេចក្តីប្រកាសព័ត៌មាន កាលពីថ្ងៃព្រហស្បតិ៍ ទី១ ខែកុម្ភៈថា កម្ពុជាបានទាក់ទាញការវិនិយោគ ផ្ទាល់ពីបរទេស(FDI) ក្នុងទំហំទឹកប្រាក់ជាង១៨៧លានដុល្លារអាមេរិកក្នុងខែមករា ឆ្នាំ២០២៤។

យោងតាមប្រភពពីក្រុមប្រឹក្សាអភិវឌ្ឍន៍កម្ពុជា ហៅកាត់ថាCDC បានឱ្យដឹងថា ប្រទេសកម្ពុជាបានអនុម័ត គម្រោងវិនិយោគចំនួន៣២ កាលពីខែមករា ដែលអាចបង្កើតការងារបានជិត២៩.០០០កន្លែង។

CDC បានបន្ថែមថា គម្រោងដែលលេចធ្លោរួមមាន ដូចជា រោងចក្រផលិតគ្រឿងអេឡិចត្រូនិក រោងចក្រផលិតកង់អគ្គិសនី និងម៉ូតូ រោងចក្រដែក និងរោងចក្រកាត់ដេរ និងវាយនភណ្ឌ ព្រមទាំងគម្រោងផ្សេងៗទៀតផងដែរ។CDC បានបញ្ជាក់ថា “ចំនួនជាង៧៨% នៃលំហូរទុនវិនិយោគសរុប ក្នុងខែមករា គឺមានប្រភពមកពីប្រទេសចិន ៩,៦៥% មកពីសិង្ហបុរី ៥,៣៤% មកពីសហរដ្ឋអាមេរិក ៣,៥៥% មកពីប្រទេសកូរ៉េខាងត្បូង និង២,៧៣%ទៀត មកពីប្រភពក្នុងស្រុក”។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា បានមានប្រសាសន៍ឱ្យដឹងថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ កិច្ចព្រមព្រៀងពាណិជ្ជកម្មសេរីកម្ពុជា-ចិន និងច្បាប់ថ្មីរបស់កម្ពុជាស្តីពីការវិនិយោគ គឺជាកត្តាសំខាន់ ដើម្បីទាក់ទាញលំហូរវិនិយោគផ្ទាល់ ពីបរទេសមកកាន់ប្រទេ​សកម្ពុជា។

លោកបានថ្លែងប្រាប់សារពត៌មានចិន Xinhua ថា “ការវិនិយោគថ្មីនឹងនាំមកនូវដើមទុនថ្មី បច្ចេកវិទ្យា និងឱកាសការងារសម្រាប់ប្រជាជនកម្ពុជាផងដែរ”៕

ដោយ: គង់ លាងហួរ

អន្តរជាតិ: បច្ចុប្បន្ននេះ វិស័យអចលនទ្រព្យរបស់ប្រទេសចិនកំពុងជាប់ផុងក្នុងវិបត្តិបំណុល ដែលស្វែងរកដំណោះស្រាយមិនទាន់ឃើញនៅឡើយ ប៉ុន្តែវិស័យអចលនទ្រព្យនៅអាមេរិក ក៏កំពុងប្រឈ​មមុខនឹងហានិភ័យ នៃវិបត្តិបំណុលក្នុងរយៈពេលប៉ុន្មានឆ្នាំ ខាងមុខផងដែរ។

លោក Howard Lutnick នាយកប្រតិបត្តិក្រុមហ៊ុន Cantor Fitzgerald  បានលើកឡើងថា វិស័យអចលនទ្រព្យនៅអាមេរិក​ អាចដាំក្បាលចូលទៅក្នុងវិបត្តិ​បំណុល ក្នុងរយ:ពេលប៉ុន្មានឆ្នាំខាងមុខ។

មហាសេដ្ឋីរូបនេះ ក៏បានលើកឡើងពីបញ្ហាធំៗ ដែលអាចកើតឡើង នៅក្នុងទីផ្សារអចលនទ្រព្យអាមេរិក ជាពិសេសគឺផ្នែកអចលនទ្រព្យពាណិជ្ជកម្ម។លោក Howard Lutnick បានព្យាករណ៍ថា ការខកខានសងបំណុល នៅក្នុងវិស័យអចលនទ្រព្យអាមេរិក អាចនឹងហក់ឡើងដល់ទំហំទឹកប្រាក់១ទ្រីលានដុល្លារ ក្នុងរយ:ពេលប៉ុន្មានឆ្នាំខាងមុខ។

លោក Lutnick បានបន្ថែមថា ទំហំបំណុលដ៏ធំមហិមានេះ នឹងអាចបង្កជាហានិភ័យ សម្រាប់ឧស្សាហកម្មអចលនទ្រព្យ ខណៈដែលគោលនយោបាយអត្រាការប្រាក់ របស់ធនាគារកណ្តាលអាមេរិក(Fed) ទំនងជាបន្តស្ថិតក្នុងកម្រិតខ្ពស់ក្នុងរយ:ពេលយូរតទៅមុខ។

ការដំឡើងអត្រាការប្រាក់ ដោយធនាគារFed បានធ្វើឱ្យកូនបំណុ​​ល មានផលវិបាក ក្នុងការទូទាត់ការប្រាក់លើបំណុល ដែលមានស្រាប់ ខណៈម្ចាស់បំណុលត្រូវពិចារណាល្អិតល្អន់ លើការផ្ដល់ហិរញ្ញប្បទាន ដល់គម្រោងដែលអាចប្រឈមមុខនឹងហានិភ័យខ្ពស់។

ជាមួយគ្នានេះ ក្រុមអ្នកជំនាញ បានព្រមានអំពីបញ្ហា ដែលកើតមានឡើង ចំពោះវិស័យអចលនទ្រព្យពាណិជ្ជកម្ម នៅអាមេរិក ចាប់តាំងពីដើមឆ្នាំ២០២៣ មកម្ល៉េះ។

អ្នកជំនាញបន្ថែមថា “ភាពចលាចលក្នុងវិស័យធនាគារអាមេរិកកាលពីឆ្នាំមុន បានចាប់ផ្តើមរឹតបន្តឹងលក្ខខណ្ឌឥណទាន សម្រាប់ការផ្តល់ប្រាក់កម្ចីនៅក្នុងតំបន់ ដែលជះផលប៉ះពាល់យ៉ាងខ្លាំងទៅលើវិស័យអចលនទ្រព្យពាណិជ្ជកម្មទាំងមូល នៅសហរដ្ឋអាមេរិក៕ប្រភព៖Business Insider៕

ដោយៈ សហការី

        អន្តរជាតិៈ ធនាគារហត្ថា ដែលជាក្រុមហ៊ុនបុត្រសម័្ពន្ធរបស់ ធនាគារក្រុងស្រ៊ី នៅប្រទេសថៃ បានទទួលពានរង្វាន់ដ៏មានកិត្យា​នុភាពបំផុតក្នុងនាមជា​ “កម្មវិធីធនាគារចល័តថ្មីល្អបំផុត នៅកម្ពុជា ប្រចាំឆ្នាំ២០២៣” ពីទស្សនាវដ្ដី International Finance Magazine ដែលជាគ្រឹះស្ថាន បោះពុម្ពផ្សាយហិរញ្ញវត្ថុលំដាប់ពិភពលោក។

ពានរង្វាន់ដ៏មានកិត្យានុភាពមួយនេះ ត្រូវបានប្រគល់ជូន ធនា​គារហត្ថា ក្នុងពិធីប្រគល់ពានរង្វាន់ ដែលរៀបចំឡើងដោយ ទស្សនាវដ្តីហិរញ្ញវត្ថុអន្តរជាតិ នាថ្ងៃទី២៦ ខែមករា ឆ្នាំ២០២៤។ ការទទួលស្គាល់ជាអន្តរជាតិនេះ ឆ្លុះបញ្ចាំងពីការប្តេជ្ញាចិត្តយ៉ាងមុតមាំ របស់ ធនាគារហត្ថា ចំពោះភាពច្នៃប្រឌិត និងឧត្តមភាពនៃការផ្តល់ជូនដំណោះស្រាយហិរញ្ញវត្ថុ ទំនើបដល់អតិថិជនរបស់ខ្លួន។

កម្មវិធី​ Hattha Mobile ផ្តល់ជូននូវមុខងារ និងសេវាកម្មយ៉ាងទូលំទូលាយ ដែលផ្តល់លទ្ធភាពដល់អតិថិជន ក្នុងការគ្រប់គ្រងហិរញ្ញវត្ថុរបស់ពួកគេ បានយ៉ាងងាយស្រួលពីគ្រប់ទីកន្លែង។ ការរចនា​ផ្ទាំង អំណោយផលសម្រាប់អតិថិជន រួមផ្សំជាមួយនឹងវិធានការគ្រប់គ្រងសុវត្ថិភាពកម្រិតខ្ពស់ ផ្តល់នូវបទពិសោធនៃប្រតិបត្តិការធនាគារដ៏រលូន និងសុវត្ថិភាពសម្រាប់អតិថិជនរបស់ធនាគារ ហត្ថា។

ការទទួលបាននូវពានរង្វាន់នេះ ជាសក្ខីភាពបង្ហាញពីកិច្ចខិតខំប្រឹងប្រែងឥតឈប់ឈររបស់ធនាគារ ហត្ថា ក្នុងការប្រើប្រាស់អស់ពីលទ្ធភាពនូវបច្ចេកវិទ្យាទំនើប ដើម្បីធ្វើឱ្យប្រសើរឡើងនូវបទពិសោធ​ន៍របស់អតិថិជន និងជំរុញបរិយាប័ន្នហិរញ្ញវត្ថុនៅប្រទេសកម្ពុជា។

ការវិនិយោគលើកម្មវិធីធនាគារចល័ត ដ៏ខ្លាំងក្លាមួយនេះបានអនុញ្ញាតឱ្យអតិថិជន ធ្វើប្រតិបត្តិការសេវាធនាគារ យ៉ាងទូលំទូលាយ គ្រប់ពេលវេលា គ្រប់ទីកន្លែង ប្រកបដោយភាពងាយស្រួល។

លោកឧកញ៉ា ហួត អៀងតុង ប្រធានអគ្គនាយកធនាគារ ហត្ថា មានប្រសាសន៍ថា យើងមានក្ដីរំភើបជាខ្លាំង ដែលទទួលបានជ័យលាភីជា កម្មវិធីធនាគារចល័តថ្មីល្អបំផុតនៅកម្ពុជា ពីសំណាក់ទស្សនាវដ្តីហិរញ្ញវត្ថុអន្តរជាតិមួយនេះ។ លោកបន្តថា ពានរង្វាន់មួយនេះ ជំរុញការប្តេជ្ញាចិត្តរបស់យើងកាន់តែខ្លាំង ក្នុងការផ្តល់ជូនដំណោះស្រាយហិរញ្ញវត្ថុប្រកបដោយភាពច្នៃប្រឌិត ដែលផ្តោតសំខាន់លើអតិថិជន និងជាមធ្យោបាយសម្រាប់ពួកគេ ក្នុងការគ្រប់គ្រងហិរញ្ញវត្ថុប្រកប​ដោយប្រសិទ្ធភាព។

អំពីធនាគារហត្ថា
ធនាគារហត្ថា ជាធនាគារពាណិជ្ជ ដែលមានវត្តមាននៅកម្ពុជាអស់រយៈកាល៣០ឆ្នាំមកហើយ ដែលផ្តល់ជូនសេវាហិរញ្ញវត្ថុយ៉ាងទូលំទូលាយដល់អតិថិជនរបស់ខ្លួន។

គិតត្រឹមត្រីមាសទី៤ ឆ្នាំ២០២៣ ធនាគារហត្ថា កំពុងកាន់កាប់តំណែងជាធនាគារពាណិជ្ជ ធំជាងគេលំដាប់ទី៤ ផ្អែកលើការិយា​ល័យប្រតិបត្តិការរបស់ខ្លួន។ ធនាគារហត្ថា ជាក្រុមហ៊ុនបុត្រសម្ព័ន្ធរបស់ ធនាគារ​​ ក្រុងស្រ៊ី ដែលជាសម្ព័ន្ធហិរញ្ញវត្ថុធំបំផុតលំដាប់ទី៥ នៅក្នុងព្រះរាជាណាចក្រថៃឡង់ដ៍ ដែលមានអាយុកាលអាជីវកម្មរយៈពេល ៧៨ឆ្នាំ។

ធនាគារក្រុងស៊្រី ជាសមាជិកយុទ្ធសាស្ត្រ នៃសម្ព័ន្ធហិរញ្ញវត្ថុអន្តរជាតិ MUFG Financial Group ដែលជាសម្ព័ន្ធហិរញ្ញវត្ថុធំជាងគេនៅក្នុងប្រទេសជប៉ុន និងធំបំផុតមួយនៅក្នុងពិភពលោក៕

(ភ្នំពេញ)៖ លោកយិន លាងគង់ ស្ថាបនិក និងអគ្គនាយកនៃគេហទំព័រProperty Area និង Cambodia Financial Time រួមទាំងបុគ្គលិកទាំងអស់ សូមសម្តែងនូវក្តីបារម្ភយ៉ាងខ្លាំង បន្ទាប់ពីទទួលបានដំណឹងថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឧត្តមភរិយាដ៏ឧត្តុង្គឧត្តមរបស់ សម្តេចអគ្គមហាសេនាបតីតេជោ ហ៊ុន សែន បានដួលក្នុងបន្ទប់សម្រាក ហើយត្រូវបានបញ្ជូនមកពិនិត្យ និងព្យាបាលនៅមន្ទីរពេទ្យកាលម៉ែត។

យើងខ្ញុំទាំងអស់គ្នា សូមបួងសួងដល់គុណបុណ្យព្រះរតនត្រ័យ ទេវតាថែរក្សាទឹកដីនៃព្រះរាជាណាចក្រកម្ពុជា ព្រមទាំងវត្ថុស័ក្តិសិទ្ធិទាំងអស់ក្នុងលោក សូមព្រះអង្គតាមជួយបីបាច់ថែរក្សាការពារប្រោះព្រំនូវសព្ទ សាធុការពរជ័យគ្រប់ប្រការជូន សម្តេចកិត្តិព្រឹទ្ធបណ្ឌិត សូមទទួលបានសុខភាពល្អបរិបូរណ៍ កម្លាំងពលំមាំមួន ឆាប់បានជាសះស្បើយពីជំងឺ។

សម្តេចកិត្តិព្រឹទ្ធបណ្ឌិត ជានិច្ចកាលតែងតែប្រឹងប្រែង យកអស់កម្លាំងកាយចិត្ត និងប្រាជ្ញាស្មារតី ក្នុងនាមជាមាតាមនុស្សធម៌ ជួយដោះស្រាយទុក្ខលំបាក ជូនប្រជាពលរដ្ឋជួបគ្រោះមហន្តរាយ អ្នកទីទ័លក្រ អ្នកផ្ទុកមេរោគអេដស៍ ក្រុមជនងាយរងគ្រោះ ស្ត្រី កុមារ ជនពិការ ជនចាស់ជរាគ្មានទីពឹង ដែលស្ថិតក្នុងស្ថានភាពងាយរងគ្រោះបានទាន់ពេលវេលា ដោយមិនរើសអើង និងមិនទុកនរណាម្នាក់ចោល ព្រមទាំងរួម ចំណែកលើកស្ទួយសមភាពយេនឌ័រ និងការផ្តល់ភាពអង់អាចដល់ស្ត្រី និងក្មេងស្រីក្នុងសង្គម លើកកម្ពស់សីលធម៌ សង្គម និងតម្លៃស្ត្រី ដែលធ្វើឱ្យស្ត្រីកម្ពុជាមានឱកាស ចូលរួមគ្រប់សកម្មភាពសង្គម និងរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិឱ្យរីកចម្រើន ជារៀងដរាបមក។
សូម សម្តេចកិត្តិព្រឹទ្ធបណ្ឌិត និងសម្តេចអគ្គមហាសេនាបតីតេជោ ដែលជាឧត្តមស្វាមី ព្រមទាំងក្រុមគ្រួសារជាទីស្រឡាញ់ សូមបានប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ក្នុងឱកាសពិសេសសម្រាប់​អបអរសាទរ​ពិធីបុណ្យចូលឆ្នាំថ្មីប្រពៃណីចិន អតិថិជនដែលកំពុងស្វែងរកលំនៅឋានដ៏កក់ក្តៅសម្រាប់គ្រួសារ ឬសម្រាប់ប្រកប​អាជីវកម្មផ្សេងៗក្នុងខែកុម្ភៈនេះ នឹងទទួលបានការបញ្ចុះតម្លៃមិនធ្លាប់មាន ជាមួយអាំងប៉ាវ​ហេងៗពីបុរី ប៉េង ហួត។

​ចង់ដឹងទេថាតើការផ្ដល់ជូនសម្រាប់ប្រូម៉ូសិនចូលឆ្នាំចិនពី បុរី ប៉េង ហួត​ មានអ្វីខ្លះ?​
ចាប់ពីថ្ងៃនេះរហូតដល់ដំណាច់​ខែកុម្ភៈ ឆ្នាំ2024 អតិថិជនទាំងអស់ដែល​កក់ផ្ទះនៅគ្រប់គម្រោងនឹងទទួលបានប្រូម៉ូសិនដូចជា៖
✨​ការបញ្ចុះតម្លៃបន្ថែមរហូតដល់ 6ម៉ឺនដុល្លារ
✨ប័ណ្ឌទឹកប្រាក់សម្រាប់រៀបចំ​កម្មវិធីនៅ PH Grand Hall រហូតដល់ $5,000
🧧 ​អាំងប៉ាវជាទឹកប្រាក់ដ៏ច្រើនសន្ធឹកសន្ធាប់ភ្លាមៗ
💰 ព្រមទាំងគោលការណ៍បង់ប្រាក់ដ៏ងាយស្រួល។សូមជម្រាបផងដែរថា ការផ្ដល់ជូននេះមានសុពលភាពចាប់ពីថ្ងៃនេះ រហូតដល់ថ្ងៃទី29 ខែកុម្ភៈ ឆ្នាំ2024តែ​ប៉ុណ្ណោះ។
ដូច្នេះសូមរួសរាន់ឡើង ដើម្បីកុំឱ្យឱកាសចំណេញដ៏ច្រើនសន្ធឹកសន្ធាប់នេះរំលងផុតឱ្យសោះ!ដើម្បីជ្រាបព័ត៌មានកាន់តែច្បាស់ សូមទាក់ទងទៅបុគ្គលិកផ្នែកលក់របស់បុរី ប៉េង ហួត តាមរយៈលេខទូរសព្ទ៖ 016 / 017 596 789 ឬចូលរួមជាមួយ Telegram Channel https://t.me/boreypenghuoth ៕

ដោយ: គង់ លាងហួរ

អន្តរជាតិ: សារពត៌មាន Laotian Times ចុះផ្សាយថា ក្រុមហ៊ុនអាកាសចរណ៍ Lao Airlines គ្រោងបើកដំណើរការជើងហោះហើរអន្តរជាតិថ្មី រវាងទីក្រុងធំរបស់ខ្លួន ជាមួយប្រទេសជិតខាងចំនួន៣ ដែលក្នុងនោះរួមមានកម្ពុជាផងដែរ។

ចាប់ពីថ្ងៃទី១៥ ខែមីនាខាងមុខ ក្រុមហ៊ុនអាកាសចរណ៍ Lao Airlines នឹងបើកជើងហោះហើរពីទីក្រុង Savannakhet ទៅកាន់រាជធានីបាងកក ជារៀងរាល់ថ្ងៃច័ន្ទ ថ្ងៃពុធ និងថ្ងៃសុក្រ។

បន្ទាប់ពីនោះមក ចាប់ថ្ងៃទី១៩ ខែមីនាដដែល ក្រុមហ៊ុនអាកាសចរណ៍នេះនឹងបើកជើងហោះហើរ ពីរដ្ឋធានីវៀងចន្ទន៍ មកកាន់រាជធានីភ្នំពេញ ជារៀងរាល់ថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍។លើសពីនេះ ក្រុមហ៊ុនអាកាសចរណ៍ Lao Airlines គ្រោងបើកហោះហើរពីរដ្ឋធានីវៀងចន្ទន៍ ទៅកាន់ទីក្រុងដាណាង ប្រទេសវៀតណាម ចាប់ពីថ្ងៃទី៤ ខែមេសាខាងមុខ ដែលនឹងប្រតិបត្តិការជើងហោះហើរ២ដងក្នុងមួយសប្តាហ៍។

ក្រុមហ៊ុនLao Airlines ក៏បានចុះកិច្ចព្រមព្រៀង ជាមួយក្រុមហ៊ុនអាកាសចរណ៍ Thai Airways និងក្រុមហ៊ុន Vietnam Airlines ដើម្បីពង្រីកសេវាកម្មឆ្លងកាត់ផ្លូវសំខាន់ៗ រួមមាន វៀងចន្ទន៍-បាងកក វៀងច័ន្ទន៍-ហាណូយ វៀងច័ន្ទ-ភ្នំពេញ ហ្លួងព្រះបាង-ហាណូយ និងហ្លួងប្រាបាង-សៀមរាប។

លើសពីភាពជាដៃគូក្នុងតំបន់ ប្រទេសឡាវក៏បានកំណត់គោលដៅរបស់ខ្លួន ក្នុងការពង្រីកផ្លូវហោះហើរ ឱ្យបានកាន់តែច្រើន ដោយសម្លឹងមើលទៅកាន់ទីផ្សារថ្មី ដូចជាប្រទេសរុស្ស៊ីជាដើម។

តួយ៉ាង កាលពីថ្ងៃទី២៩ ខែតុលា ឆ្នាំ២០២៣ ក្រុមហ៊ុន Ural Airlines ដែលមានទីស្នាក់ការកណ្តាល នៅប្រទេសរុស្ស៊ី បានប្រកា សចាប់ផ្តើមជើងហោះហើរឡើងវិញ ពីទីក្រុង Vladivostok ទៅកាន់ទីក្រុងវៀងច័ន្ទន៍ ដោយការធ្វើដំណើរមានរយៈពេល ប្រហែល៦ម៉ោង និង២០នាទី៕

ដោយ: គង់ លាងហួរ

អន្តរជាតិ: លោក Jens Eskelund ប្រធានសភាពាណិជ្ជកម្មសហភាពអឺរ៉ុបប្រចាំនៅប្រទេសចិន បានថ្លែងប្រាប់កាសែត Xinhua ក្នុងបទសម្ភាសន៍ផ្តាច់មុខមួយថា “ក្រុមហ៊ុនអឺរ៉ុបមិនចាកចេញពីទីផ្សារចិននោះទេ”។

លោកបន្តថា ផ្ទុយទៅវិញ ក្រុមហ៊ុនរបស់ប្រទេសជាសមាជិកសហភាពអឺរ៉ុបភាគច្រើនរបស់យើង នៅតែមានការប្តេជ្ញាចិត្តចំពោះទីផ្សារនៅក្នុងប្រទេសចិន។

លោកអះអាងថា ”ការផ្លាស់ប្តូរទីតាំងសកម្មភាពចេញពីប្រទេសចិនមានតិចតួចប៉ុណ្ណោះ ទោះបីជាកំណើនសេដ្ឋកិច្ចពិភពលោកមានភាពយឺតយ៉ាវ តម្រូវការធ្លាក់ចុះ និងភាពតានតឹងភូមិសាស្ត្រនយោ បាយ បាននាំឱ្យក្រុមហ៊ុនមួយចំនួនពិចារណា លើការធ្វើពិពិធកម្មខ្សែសង្វាក់ផ្គត់ផ្គង់របស់ពួកគេយ៉ាងណាក្តី”។លោក​បាន​បន្ថែម​ថា ទីផ្សារ​របស់​ប្រទេស​ចិន​មាន​ស្ថិរភាព អាច​ព្យាករណ៍​បាន និង​អាច​ទុក​ចិត្ត​បាន។ លោក Eskelund បានបញ្ជាក់ថា “ប្រទេសនេះ គឺជាផ្នែកមួយដែលមិនអាចខ្វះបាន នៃខ្សែសង្វាក់តម្លៃសកល។ ដូច្នេះជាមូលដ្ឋាន អ្នកមិនអាចមានវត្តមានជាសកលបានទេ ប្រសិនបើអ្នកមិនមានវត្ត​មាននៅក្នុងប្រទេសចិន”។

លោកបានកត់សម្គាល់ឃើញថា ប្រទេសចិនមានគុណសម្បត្តិពិសេសមួយចំនួន ក្នុងការទាក់ទាញធុរកិច្ចបរទេស ខណៈប្រទេសនេះ គឺជាមហាអំណាចសេដ្ឋកិច្ចទីពីររបស់ពិភពលោក ដែលមានទីផ្សារដ៏ធំ និងមានបច្ចេកវិទ្យាទំនើបៗ។

នៅក្នុងក្រសែភ្នែករបស់លោក Eskelund យល់ឃើញថា ទីផ្សារចិនមានការប្រកួតប្រជែង និងមានសក្តានុពលខ្ពស់ ហើយប្រទេសចិនគឺជាមជ្ឈមណ្ឌល សម្រាប់ក្រុមហ៊ុនអឺរ៉ុប ព្រោះពួកគេត្រូវខិតខំប្រឹងប្រែងឱ្យខ្លាំង ដើម្បីប្រកួតប្រជែង ជាមួយក្រុមហ៊ុនចិនក្នុងស្រុក និងត្រូវផ្តល់នូវបច្ចេកវិទ្យាល្អបំផុត និងចុងក្រោយបំផុតទៅកាន់អតិថិជន។

លោក Eskelund បានមានប្រសាសន៍ឱ្យដឹងបន្ថែមថា ក្រុមហ៊ុនចិនមានសមត្ថភាពខ្ពស់ សម្រាប់ការច្នៃប្រឌិតបង្កើតថ្មី ដោយពួកគេខិតខំអភិវឌ្ឍឧស្សាហកម្មថ្មីៗ និងក្លាយជាអ្នកនាំមុខក្នុងឧស្សាហកម្ម​៕Xinhua៕

ដោយៈ គង់ សូរិយា

ភ្នំពេញៈ ការមានទឹកសមុទ្រខៀវស្រងាត់ សម្លេងអ៊ូរអរនៃភ្ញៀវទេសចរណ៍ក្នុងស្រុក អន្តរជាតិ ការផ្លាស់ប្តូរមុខមាត់ដ៏លឿនរបស់ខេត្តព្រះសីហនុបានកើតមានឡើងស្ទើរមិនគួរឲ្យជឿ។ ប៉ុន្តែទីក្រុង ដែលមានអាគារខ្ពស់រាប់រយឈរព្រោងព្រាត បានប្រែជាស្ងប់ស្ងាត់ ដោយព្រឹត្តិការណ៍មួយចំនួន ដែលបានធ្វើឲ្យប៉ះពាល់មុខមាត់ ក៏ដូចជា សេដ្ឋកិច្ចទីក្រុងនេះ។

ជាមួយនឹងសក្តានុពលដ៏សំខាន់របស់ខេត្តនេះ រដ្ឋាភិបាលអា​ណត្តិទី៧ ក្រោមការដឹកនាំរបស់សម្តេចធិបតីហ៊ុន ម៉ាណែតមិនបានព្រងើយកន្តើយនឹងបញ្ហានៅទីនោះឡើយ ប៉ុន្តែសម្តេចបានប្រកាសដាក់ចេញកម្មវិធីជម្រុញការវិនិយោគ និងបានដាក់ចេញនិតិវិធី និងគោលនយោបាយលើកទឹកចិត្តជាច្រើន សម្រាប់ទាក់ទាញការវិនិយោគពីអ្នកធុរកិច្ចជាតិ និងអន្តរជាតិកាលពីថ្ងៃទី៣១ មករា កន្លងមកនេះ។

តើការជម្រុញ និងលើកកំពស់សក្តានុពល ខេត្តជាប់តំបន់ឆ្នេរដ៏សំខាន់មួយនេះ គួរធ្វើឡើងក្នុងជំហ៊ានបែបណា?
លោកឡោ វិចិត្រ អនុប្រធានសមាគមពាណិជ្ជកម្មកម្ពុជា ចិនបានលើកយកនូវទស្សនទានមួយចំនួន ដើម្បីពិចារណាផងដែរ។លោកបានមានប្រសាសន៍ថា យើងត្រូវឆ្លងកាត់បីដំណាក់កាល ដើម្បីឲ្យទីក្រុងព្រះសីហនុ វិលទៅរកភាពប្រក្រតីដូចមុនវិបត្តិកូវីដ១៩ ទី១ យុទ្ឋនាការក្នុងការគៀងគរទុន១១០០លានដុល្លារអាមេរិក ដើម្បី​សាងសង់អាគារជាប់គាំង នៅក្នុងខេត្តឲ្យរសរវើកឡើងវិញ ដែលត្រូវមានការចូលរួមពីអាជ្ញាធរខេត្ត សភាពាណិជ្ជកម្មខេត្ត ម្ចាស់អាគារត្រូវ ធ្វើការរួមគ្នា ដើម្បីប្រមូលទុនចាក់ចូលក្នុងខេត្តនេះ។

លោកបន្តថា យើងត្រូវមានផែនការ និងពេលវេលាជាក់លាក់មួយ ឧទាហរណ៍ ដំណាក់កាលទី១ យើងត្រូវការទុក៥០០លានដុល្លារក្នុងមួយឆ្នាំ ហេតុនេះបើរកទុន១១០០លានដុល្លារ គឺយើងត្រូវការពេល២ឆ្នាំ ដើម្បីឲ្យមានលុយគ្រប់គ្រាន់ សាងសង់អាគារទាំងនោះឡើងវិញ។

ទី២ ជាដំណាក់កាល ដែលអាគារទាំងនោះសាងសង់បញ្ចប់ ហើ​យមានអាជីវករ ពាណិជ្ជករ ចូលទៅប្រើប្រាស់អាគារទាំងនោះ ជំហ៊ា​នបន្ទាប់គឺ ខេត្តព្រះសីហនុ ត្រូវពង្រឹងតាមផែនការមេរបស់ខ្លួន ក្នុងការប្រែក្លាយជាតំបន់សេដ្ឋកិច្ចពហុបំណង។

លោកឡោ វិចិត្របានបន្តថា ដោយសារការអភិវឌ្ឈកំពង់ផែទឹកជ្រៅបានដំណើរការបណ្តើរៗ និងកំពុងពង្រីក ដូច្នេះហើយការអភិវឌ្ឈវិស័យនាំចេញរបស់កម្ពុជា នៅក្នុងតំបន់សេដ្ឋកិច្ចពិសេស គឺជាការជម្រុញការធ្វើពិពិធកម្មសេដ្ឋកិច្ច របស់ខេត្តឲ្យមានភាពចម្រុះពណ៌ និងស៊ីជម្រៅ។

ទី៣ នៅពេលយើងបានធ្វើពិពិធកម្ម សេដ្ឋកិច្ចជោគជ័យ ក្នុងការនាំចេញ និងអភិវឌ្ឈន័វិស័យអចលនទ្រព្យហើយ គឺយើងនឹងសម្រេចមហិច្ឆតារបស់រដ្ឋាភិបាល ក្នុងការប្រែក្លាយខេត្តព្រះសីហនុ ជាខេត្តមួយ ដែលនឹងមជ្ឈមណ្ឌលពាណិជ្ជកម្មជឿនលឿន។លោកឡោ វិចិត្របានបន្តថា ក្នុងផែនការជម្រុញសេដ្ឋកិច្ច ខេត្តព្រះសីហនុ និងសៀមរាប ឲ្យឈានមុខគេរបស់ប្រមុខរាជរដ្ឋាភិបាល នឹងធ្វើឲ្យខេត្តព្រះសីហនុ នឹងក្លាយជាតំបន់សេដ្ឋកិច្ចពហុបំណង និងជាមជ្ឈមណ្ឌលពាណិជ្ជកម្មទំនើប និងជាIT Reginal Commercial Hub ផងដែរនាពេលអនាគត។

លោកបន្តថា នៅពេលយើងគៀងគរទុនបាន១១០០លានដុល្លារជាង ដើម្បីអភិវឌ្ឍន៍អាគារជាប់គាំងបញ្ចប់ នោះខេត្តនឹងមានអាគារខ្ពស់ ច្រើនជាងរាជធានីភ្នំពេញនាពេលអនាគត ហើយខេត្តនេះ​នឹងក្លាយជាមជ្ឈមណ្ឌលពាណិជ្ជកម្មកម្រិតអន្តរជាតិ៕