ដោយៈ សុខុម

វៀងច័ន្ទន៍: នៅក្នុងផែនការទេសចរណ៍រយៈពេល៥ឆ្នាំ របស់ខ្លួន ខេត្តហ្លួងព្រះបាង (Luang Prabang) នៃប្រទេសឡាវ សង្ឃឹមថានឹងទាក់ទាញភ្ញៀវទេសចរ ឱ្យបានចំនួន៤លាននាក់នៅឆ្នាំ២០២៥។

បច្ចុប្បន្នខេត្តហ្លួងព្រះបាង ដែលជាតំបន់បេតិកភណ្ឌរបស់អង្គការយូណេស្កូ (UNESCO) ទទួលបានភ្ញៀវទេសចរត្រឹមប្រមាណ១,១លាននាក់ប៉ុណ្ណោះក្នុងមួយឆ្នាំ ជាមួយនឹងចំណូលទេសចរណ៍ជាង៥០០លានដុល្លារអាមេរិក។ នេះបើយោងតាមសារព័ត៌មាន Laotian Times ចុះផ្សាយកាលពីថ្ងៃព្រហស្បតិ៍ ទី២២ ខែមិថុនា។

ក្នុងរយៈពេល២ឆ្នាំ និង៥ខែចុងក្រោយនេះ ហ្លួងព្រះបាង ទទួលបានត្រឹមតែ២៦,៤%ប៉ុណ្ណោះ នៃគោលដៅចំនួនភ្ញៀវទេសចរ ជាពិសេ​សដោយសារតែវិស័យទេសចរណ៍ ស្ទុះងើបឡើងវិញយឺតយ៉ាវ បន្ទាប់ពីវិបត្តិកូវីដ-១៩។ក្នុងរយៈពេល២ឆ្នាំខាងមុខ ខេត្តនេះបានដាក់គោលដៅទាក់ទាញភ្ញៀវទេសចរឱ្យបាន៣លាននាក់បន្ថែមទៀត។

លោកស្រី Soudaphone Khomthavong ប្រធានមន្ទីរព័ត៌មាន វប្បធម៌ និងទេសចរណ៍ខេត្តហ្លួងព្រះបាង លើកឡើងថា ខេត្តនេះបានផ្តល់អាទិភាពលើវិស័យទេសចរណ៍ ជាសសរស្តម្ភសម្រាប់ការអភិវឌ្ឍសេដ្ឋកិច្ចសង្គមក្នុងតំបន់។ ក្នុងរយៈពេល៥ខែដើមឆ្នាំ២០២៣ ភ្ញៀវទេសចរសរុបចំនួន៤៣៧.៣៧៤នាក់មកលេងខេត្តនេះ ដោយក្នុងនោះ៣៩៦.៧៤២នាក់ជាភ្ញៀវទេសចរអន្តរជាតិ។ ភ្ញៀវទេសចរថៃ ជាប់ចំណាត់ថ្នាក់លេខ១ ដែលមកលេងហ្លួងព្រះបាងច្រើនជាងគេ បន្ទាប់មកគឺសហរដ្ឋអាមេរិក និងប្រទេសចិន។ដើម្បីសម្រេចគោលដៅ ដែលបានកំណត់ដូចខាងលើ ខេត្តនេះក៏កំពុងអភិវឌ្ឍតំបន់ ទាក់ទាញទេសចរណ៍ខ្នាតតូច និងមធ្យមផងដែរជាមួយនឹងហេដ្ឋារចនាសម្ព័ន្ធទំនើប និងសម្ភារៈបរិក្ខារសម្រាប់ភ្ញៀវទេសចរ ដែលខ្លួនគ្រោងរៀបចំសកម្មភាពផ្សព្វផ្សាយ វប្បធម៌ហ្លួង​ព្រះបាង ពិធីបុណ្យផ្សេងៗ និងចំណីអាហារជាដើម៕ Laotian Times៕

ដោយៈ ស៊ី​វ ម៉េង

        ភ្នំពេញៈ ជា​មួយនឹងដំណើរការសាងសង់ ឈានទៅបញ្ចប់តាមផែនការ និងទាន់ពេលវេលា បុរីវិមានសំណាងនឹងចាប់ផ្តើមប្រគល់ផ្ទះអាជីវកម្មដល់អតិថិជន នៅខែកក្កដាខាងមុខនេះ។

លោកឧកញ៉ាបណ្ឌិតគីម ហ៊ាង អ្នកអភិវឌ្ឍន៍បុរីវិមានសំណាងបានសរសេរលើបណ្តាញទំនាក់ទំនងសង្គមថា បុរី វិមានសំណាង Borey Vimean Samnang នឹងចាប់ផ្តើមប្រគល់ផ្ទះអាជីវកម្ម Shophouse អោយអតិថិជន ចាប់ពីខែកក្កដា ២០២៣ ជាមួយប្លង់រឹងLMAP ដើម្បីទទួលប្រាក់បង្រ្គប់១០០ភាគរយពីអតិថិជន តាមកិច្ចសន្យាទិញលក់។បុរីវិមានសំណាង សាងសង់លើផ្ទៃដី២៥ហិកតា ដែលជាបុរីមួយផ្តោតលើបរិស្ថានបៃតង និងទីធ្លាសាធារណៈយ៉ាងធំ ដោយផ្ទៃដី៤០ភាគរយនៃគំរោងទាំងមូល បានទុកសម្រាប់តំបន់លំហែរ និងការដាំដើមឈើបៃតង រួមទាំងហេដ្ឋារចនាសម្ព័ន្ឋធំទូលាយ។

បុរីវិមានសំណាង ស្ថិតនៅលើមហាវិថីឈ្នះ ឈ្នះ ដែលមានចម្ងាយ២៥០០ម៉ែត្រ ពីក្រសួងរៀបចំដែនដី នគរូបនីយកម្ម និងសំណង់។

លោក ឧកញ៉ាបណ្ឌិតគីម ហ៊ាង ដែលជាប្រធានKW Cambodiaផងដែរនោះបានមានប្រសាសន៍ថា បុរីវិមានសំណាង ជាបុរីទី១នៅរាជធានីភ្នំពេញ ដែលមានព្រែកធម្មជាតិ ហូរកាត់ប្រវែងជាង១០០០ម៉ែត្រ ដែលអនុញ្ញាត្តឲ្យអ្នកស្នាក់នៅក្នុងបុរីនេះ អាចដើរលំហែរ ហាត់ប្រាណ ស្ទូចត្រី អង្គុយញាំកាហ្វេ និងសម្រាកលំហែរបានផងដែរ៕

        ដោយៈ ហ្វីអូណា

ភ្នំពេញៈ សម្តេចតេជោ ហ៊ុនសែន នាយករដ្ឋមន្រ្តីកម្ពុជា បានឯកភាពអនុញ្ញាតឲ្យសាងសង់ ព្រោះមិនត្រឹមផ្តល់នូវ ស្នាក់ស្នាមប្រវត្តិសាស្ត្រប៉ុណ្ណោះទេ តែក៏អាចក្លាយជាកន្លែងហាត់ប្រាណ និងសម្រាកកម្សាន្តរបស់ប្រជាពលរដ្ឋផងដែរ។

ការសម្រេចរបស់សម្តេចតេជោ ជាការឆ្លើយតបនឹងសំណូមពររបស់ម្តេចទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៅលើការសាងសង់ សួនប្រវត្តិកាល នៃវិមានឈ្នះឈ្នះ នៅតាមបណ្តារាជធានី-ខេត្ត។

ថ្លែងក្នុងឱកាសអញ្ជើញ ជាអធិបតី អបអរសាទរប្រារព្ធខួប៤៦ឆ្នាំ នៃទិវានៃការចងចាំដំណើរឆ្ពោះ ទៅរកការផ្តួលរំលំ របបប្រល័យពូជសាសន៍ ប៉ុល ពត សម្ដេចតេជោបានឆ្លើយតបនឹងសំណូមពររបស់សម្តេច ទៀ បាញ់ ដោយ១ក្នុងចំណោម៥សំណូមពរ ទាក់ទិនទៅនឹងការប្រវត្តិសាស្រ្តយោធាកម្ពុជា ថា ចំពោះការសុំអនុសាសន៍អំពីសួនប្រវត្តិកាល នៃវិមានឈ្នះឈ្នះ សម្រាប់ផ្តល់ជូនបណ្តាខេត្ត ត្រូវការសាងសង់ សម្តេចបានបញ្ជាក់ថា “យើងអាចធ្វើបាន” ។នាយឧត្តមសេនីយ៍ផុតលេខផ្កាយមាស៥ សម្តេចតេជោ មានប្រ​សាសន៍ថា “ខេត្តនីមួយៗ គប្បីគួរធ្វើព្រោះជាទីកន្លែងកម្សាន្ត សម្រាកសប្បាយ របស់ប្រជាពលរដ្ឋផងដែរ ហើយក៏មិនថ្លៃហួស ទៅដល់ដែលយើងមិនអាចធ្វើកើតនោះទេ។ ជាតំបន់ហាត់ប្រាណ ក៏ជាតំបន់ប្រជាជន នាំកូនចៅទៅលេងនៅទីនោះ” ។គិតមកទល់ពេលនេះ បន្ទាប់ពីមានការសាងសង់វិមានឈ្នះឈ្នះស្ថិតនៅខណ្ឌជ្រោយចង្វារ រាជធានីភ្នំពេញ ក្នុងតំបន់មហាវិថីឈ្នះ ឈ្នះ ក៏មានការសាងសង់ នៅខេត្តមួយចំនួនដូចជា នៅកោះកុង និងរតនគិរីផងដែរ។

វិមានឈ្នះ ឈ្នះ ជានិមត្តរូបនៃការយល់ដឹងអំពីសន្តិភាព និងការឯកភាពទឹកដី ជាលើកដំបូងក្នុងប្រវត្តិសាស្ត្រ របស់ប្រជាពលរដ្ឋកម្ពុជា ហើយការស្ថាបនាវិមានឈ្នះ ឈ្នះ មានគោលដៅសំខាន់មួយ ចំនួនរួមមាន ទី១ រម្លឹកសារៈសំខាន់នៃសន្តិភាព សមិទ្ធផល និងដំណើរការ ដែលបាននាំឲ្យមានសន្តិភាព តាមគោលនយោបាយឈ្នះ ឈ្នះ និងការបង្រួបបង្រួមជាតិ  ទី២ គោរព និងចារឹកទុកអំពីការលះបង់ការដឹកនាំ និងភាពច្នៃប្រឌិតរបស់មគ្គុទ្ទេសក៍ដឹកនាំ និងប្រតិ​បត្តិករស្នូលកម្ពុជា ដែលបាននាំមកនូវការផ្សះផ្សាជាតិ និងបញ្ចប់សង្គ្រាមស៊ីវិល ដោយគ្មានការបង្ហូរឈាម ដែលនាំមកនូវវិបុលភាព និងសន្តិភាព ដល់ប្រទេសកម្ពុជា ទី៣-បង្កើតមជ្ឈមណ្ឌលមួយ ដែលផ្ដល់នូវការរៀនសូត្រ ដល់ប្រជាជនគ្រប់ជំនាន់ទាំងអស់ ឲ្យបន្តការសិក្សានិងទទួលការយល់ដឹង ពីប្រវត្តិសាស្ត្រពិតរបស់កម្ពុជា និងការបង្ហាញពីគុណតម្លៃវប្បធម៌ អរិយធម៌និងស្ថាបត្យករខ្មែរ តាមរចនាបទសិល្បៈ និមិត្តរូប និមិត្តសញ្ញា ចម្លាក់នានា និងហេដ្ឋារចនា៕

ដោយ: គង់ លាងហួរ

ប្រ៊ុចសែលៈ គណៈកម្មការអឺរ៉ុបបានស្នើឱ្យរដ្ឋាភិបាល EU ផ្តល់ប្រាក់បន្ថែមចំនួន១០ពាន់លានអឺរ៉ូ (ប្រហែល១៧៥,៩ពាន់លានដុល្លារ) សម្រាប់ឆ្នាំ២០២៤-២០២៧ ដើម្បីបង្កើនការវិនិយោគសរុបចំនួន១៦០ពាន់លានអឺរ៉ូ នៅក្នុងបច្ចេកវិទ្យាសំខាន់ៗ ដូចជាថាមពលកកើតឡើងវិញផងដែរ។

ការអំពាវនាវនេះ ធ្វើឡើងស្របពេល ដែលប្រធានសហភាពអឺរ៉ុបកំពុងពិនិត្យមើលថវិកា រយៈពេលវែងឡើងវិញ ដែលគ្របដណ្តប់ប្រហែល១ភាគរយ នៃផលិតផលក្នុងស្រុកសរុប របស់សហភាពអឺរ៉ុប និងចំណាយសម្រាប់គោលនយោបាយរួមអឺរ៉ុបផ្សេងៗ។ប្រធានគណៈកម្មការអឺរ៉ុប លោកស្រី Ursula von der Leyen បានបញ្ជាក់ នៅក្នុងបទបង្ហាញការអំពាវនាវ ស្វែងរកប្រាក់បន្ថែមទៀតថា “អនាគតនៃឧស្សាហកម្មជាយុទ្ធសាស្ត្រ គួរតែត្រូវបានធ្វើឡើងនៅក្នុងទ្វីបអឺរ៉ុប” ។

គម្រោងថ្មីនេះត្រូវបានគេហៅថា Strategic Technologies for Europe Platform (STEP) និងជួយអភិវឌ្ឍនៅក្នុងផ្នែក EU microelectronics និងផ្នែក quantum computing ក៏ដូចជាថាមពលកកើតឡើងវិញ និងការផ្ទុកអគ្គិសនី ក្នុងចំណោមកម្មវិធីផ្សេងៗទៀត។

លោកស្រី von der Leyen បានបញ្ជាក់ថា “ជាមួយនឹងមូលនិធិដែលមានស្រាប់ និងទឹកប្រាក់បន្ថែមទៀត ចំនួន១០ពាន់លានអឺរ៉ូ ដែលយើងគ្រោងចាក់បញ្ចូល យើងមានបំណងឈានដល់ការបណ្តាក់ទុនរហូតដល់១៦០ពាន់លានអឺរ៉ូ ក្នុងរយៈពេលប៉ុន្មានឆ្នាំខាងមុខនេះ”៕

ដោយៈ គង់ ម៉ាលីនណា

        ព្រះសីហនុៈ អភិបាលខេត្តព្រះសីហនុ លោកគួច ចំរើនបានបញ្ជាក់ថា សម្រាប់ខេត្តព្រះសីហនុមកដល់ពេលនេះ នៅតែជាគោលដៅចាប់អារម្មណ៍យ៉ាងសំខាន់សម្រាប់វិនិយោគ ដោយសាររាជរដ្ឋាភិបាលបានរៀបចំផែនការមេ ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណងក្រោមការគាំទ្របច្ចេកទេសពីវិទ្យាស្ថាន ស៊ិនជិន (ប្រទេសចិន)ឈានស្ទើរទៅបញ្ចប់ការរៀបចំផែនការមេ នៅតែរង់ចាំការសម្រិតសម្រាំង ពិនិត្យសម្រេចចុងក្រោយ និងសុំការគាំទ្រពីរាជរដ្ឋាភិបាល។

លោកថ្លែងបែបនេះ ក្នុងពេលជួបសំណេះសំណាលជាមួយសមាជិកសភាពាណិជ្ជកម្មកម្ពុជាកាលពីដើសប្តាហ៍នេះ។លោកគួច ចំរើនបានបន្តថា នៅពេលផែនការមេនេះបញ្ចប់ និងអនុម័តពីរដ្ឋាភិបាល ដើម្បីដាក់ឱ្យប្រើប្រាស់ គឺជាត្រីវិស័យដ៏សំខាន់ សម្រាប់ចង្អុលទិសអភិវឌ្ឍនៅខេត្តព្រះសីហនុរបស់យើង។ លោកបន្តថា កិច្ចសហប្រតិបត្តិការនេះ ត្រូវបានយកចិត្តទុកដាក់ពីក្រុមប្រឹក្សាអភិបឌ្ឍន៍កម្ពុជា(CDC) បានកំពុងខិតខំជំរុញលើកទឹកចិត្ត ដើម្បីឱ្យអនុវត្តឱ្យបានពេញលេញ និងជាការគាំទ្រដោយផ្ទាល់ ទទួលបានអត្ថប្រយោជន៍ ពីការគិតគូររបស់រាជរដ្ឋាភិបាល ហើយមានអ្នកវិនិយោគ កំពុងចាប់យកឱកាសធ្វើការវិនិយោគប្រមូលផ្តុំចំនួន៣ នៅខេត្តរបស់យើង។

លោកបានបញ្ជាក់ថា មានក្រុមហ៊ុនមួយកំពុងបានរៀបចំកែលម្អតារាងវាយកូនហ្គោល នៅតំបន់រាម ដែលការវិនិយោគជាផ្នែកមួយ នៃការទាក់ទាញផលិតផលទេស ចរណ៍មួយថ្មីសម្រាប់ខេត្តរបស់យើងផងដែរ នៅខាងមុខទីលានតេជោ កំពុងរៀបចំបើកការដ្ឋានសាងសង់រួមមានដូចជា សណ្ឋាគារ ខុនដូ ផ្សារ សួនចញ្ចឹមត្រី វាបានផ្តល់ផលិត ផលទេសចរណ៍មួយយ៉ាងធំធេង ហើយគម្រោងនេះគ្រោងបើកការ​ដ្ឋាននៅចុងឆ្នាំ២០២៣ខាងមុខនេះ។ជាមួយគ្នានេះ មានផ្សារនៅពីខាងក្រោយយើង កំពុងធ្វើការវិនិយោគ ហើយវាជាមជ្ឈមណ្ឌលពាណិជ្ជកម្ម ទេសចរណ៍ថ្មីមួយនៅខេត្តព្រះសីហនុ ដែលពួកគាត់ចាប់យកឱកាសវិនិយោគ នៅខេត្តព្រះសីហនុ ដែលមានសក្តានុពល ហើយក៏ជាការលើកមុខមាត់ខេត្តព្រះសីហនុ។ ដូច្នេះសភាពាណិជ្ជកម្ម មានភារកិច្ចក្នុងការធ្វើទំនាក់ទំនងជាមួយវិនិយោគ និងត្រូវដឹងអំពីចំនួន និងគោលបំណងគោលដៅវិនិយោគថ្មីប៉ុន្មាន ចាស់ប៉ុន្មានដែលកំពុងបន្តរកស៊ីនៅខេត្ត។

លោកបានបន្តថា បើសភាពាណិជ្ជកម្មរបស់យើង គ្រប់គ្រងបញ្ហាទាំងនេះបាន ធ្វើឱ្យស្ថានភាពអ្នកវិនិយោគ មកកាន់ខេត្តព្រះសីហនុកាន់តែច្រើនថែមទៀត យើងមានលទ្ធភាពចែករំលែកព័ត៌មានល្អៗដល់អ្នកវិនិយោគ ហើយរដ្ឋបាលខេត្តលើកទឹកចិត្ត និងគាំទ្រដល់អ្នកវិនិយោគ ដែលមានបំណងមកធ្វើការវិនិយោគ នៅខេត្តព្រះសីហនុ៕

        ដោយៈ គង់ ហ្វីអូណា

        ភ្នំពេញៈ រដ្ឋមន្ដ្រីប្រតិភូអមនាយករដ្ឋមន្រ្តី លោកបណ្ឌិតម៉ៅ ហាវណ្ណាល់ បានជំរុញឲ្យក្រុមហ៊ុនប្រតិបត្ដិករ អាកាសយានដ្ឋានអន្ដរជាតិសៀមរាបថ្មី បំពេញលក្ខខណ្ឌ និងបែបបទបច្ចេកទេសឲ្យ​បានសមស្រប។

លោកបណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេ​ខាធិការដ្ឋានអាកាសចរស៊ីវិល បានជួបសម្ដែងការគួរសម ជាមួយអនុប្រធានក្រុមហ៊ុន Yunnan Airport Group Co.,Ltd ដែលជាក្រុមហ៊ុនប្រតិបត្ដិករ អាកាសយានដ្ឋានអន្ដរជាតិសៀមរាបថ្មី លោក Jia Suo ដែលទទួលបន្ទុកក្រុមហ៊ុនចំនួន២ កាលពីថ្ងៃទី២១ ខែមិថុនា ឆ្នាំ២០២៣។គោលបំណង នៃការជួបសម្ដែងការគួរសមនេះ គឺតំណាងក្រុមហ៊ុន Yunnan Airport Group Co.,Ltd មករាយការណ៍អំពីវឌ្ឍនភាព និងអំពីបញ្ហាប្រឈមមួយចំនួន ក្នុងការអនុវត្ដការងារ ដើម្បីឲ្យរដ្ឋលេខាធិការដ្ឋានអាកាសចរស៊ីវិល ជួយពិនិត្យផ្ដល់យោបល់ និងផ្ដល់ការណែនាំ ក្នុងជំរុញការងារការបញ្ចប់ការដ្ឋាន។

លោក ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានឲ្យដឹងថា ពាក់ព័ន្ធនឹងការផ្ទេរបុគ្គលិក អាកាសយានដ្ឋានអន្ដរជាតិសៀមរាបចាស់ មកអាកាសយានដ្ឋានថ្មី ទៅតាមការស្ម័គ្រចិត្ដរបស់បុគ្គលិក ហើយប្រតិបត្ដិករថ្មីនេះ ទទួលយកទាំងអស់ នូវបុគ្គលិកទាំងឡាយណា ដែលមកចង់បម្រើការងារ នៅអាកាសយានដ្ឋានថ្មីនេះ។

លោកបន្តថា ដោយឡែក តួនាទី និងភារកិច្ច របស់បុគ្គលិកចាស់ គឺផ្ដល់ឲ្យដូចតួនាទី ដែលធ្លាប់ធ្វើកន្លងមក ប៉ុន្ដែចំពោះអ្នកដែលចង់ប្ដូរ ក៏មានការអនុញ្ញាតផងដែរ។លោកស៊ិន ចាន់សិរីវុត្ថាបានបញ្ជាក់ថា “កិច្ចការទាំងអស់នេះ កំពុងតែមានដំណើរការយ៉ាងរលូន ប៉ុន្ដែក៏មានការបារម្ភ ដែលអាចត្រូវការពេលវេលាបន្ថែម ដើម្បីទទួលបាននូវបុគ្គលិកជំនាញទាំងអស់នេះ”។ លោកបន្តថា “ក្រុមហ៊ុនក៏មានសិទ្ធិ ជ្រើសរើសបុគ្គលិកខាងក្រៅ ដើម្បីបណ្ដុះបណ្ដាលជំនាញបន្ថែម ក្នុងករណីបុគ្គលិកមានការខ្វះខាត”។

ក្នុងជំនួបនេះតំណាងក្រុមហ៊ុន ក៏បានសំណូមពរឲ្យរដ្ឋលេខា​ធិការដ្ឋានអាកាសចរស៊ីវិល ជួយសម្របសម្រួល និងជួយជំរុញការបិទអាកាសយានដ្ឋានចាស់ ដើម្បីឈានទៅបើកអាកាសយានដ្ឋានថ្មី។ ខាងជំនាញ បានពិនិត្យតារាងកម្មវិធី និងពេលវេលា ដើម្បីកំណត់ពេលបិទអាកាសយានដ្ឋានចាស់ទាំងស្រុង។

ការទទួលបាននូវវិញ្ញាបនបត្រ ពីរដ្ឋលេខាធិការដ្ឋានអាកាសចរស៊ីវិល ដែលតម្រូវឲ្យក្រុមហ៊ុន បំពេញនូវលក្ខខណ្ឌបច្ចេកទេស និងសុវត្ថិភាពមួយចំនួនធំ ហើយក្រុមហ៊ុនកំពុងតែរៀបចំ ដើម្បីបំពេញលក្ខខណ្ឌ និងសូមឲ្យរដ្ឋលេខាធិការដ្ឋានអាកាសចរស៊ីវិល ជួយផ្ដល់ការគាំទ្រ និងសម្របសម្រួលបន្ថែមទៀត ដើម្បីទទួលបាននូវវិញ្ញា​បនបត្រនេះ មុននឹងបើកសម្ពោធជាផ្លូវការ។លោកបណ្ឌិតម៉ៅ ហាវណ្ណាល់ បានជម្រាបជូនអំពីទស្សនទាន និងការគាំទ្រ របស់រដ្ឋលេខាធិការដ្ឋានអាកាសចរស៊ីវិល ចំពោះការអនុវត្ដការងារនេះ គឺនឹងខិតខំជំរុញយ៉ាងម៉េច ដើម្បីលទ្ធផលទទួលបានផ្លែផ្កា និងស្របទៅតាមកម្មវិធី ក្នុងការដាក់ដំណើរការអាកាសយានដ្ឋានថ្មីជាផ្លូវការ។

ទន្ទឹមគ្នានេះ លោកបណ្ឌិត ម៉ៅ ហាវណ្ណាល់ ក៏សូមឲ្យក្រុមហ៊ុនបន្ដសហការ ដើម្បីសហការជាមួយក្រុមការងារ ក្នុងការបំពេញលក្ខ​ខណ្ឌ និងបែបបទបច្ចេកទេសទាំងអស់ឲ្យ​បានសមស្រប។លោកបណ្ឌិត ម៉ៅ ហាវណ្ណាល់ បានទទួលយកសំណូមពរ និងបន្ដគាំទ្រ ដើម្បីជំរុញការងារឲ្យបានលឿន ទៅតាមលទ្ធិភាពដែលធ្វីបាន និងសូមឲ្យការងារបច្ចេកទេសសហការ ជាមួយក្រុមការងារបច្ចេកទេសអាកាសចរស៊ីវិល ដើម្បីជំរុញល្បឿនឲ្យកាន់តែលឿន ក្នុងការដំណើរការទាន់ពេលវេលា៕