អ្នកវិនិយោគអន្តរជាតិរង់ចាំមើលការបោះឆ្នោត ប៉ុន្តែសេដ្ឋវិទូក្នុងស្រុកសម្តែងសុទិដ្ឋិនិយម

ដោយៈ គង់ សូរិយា

ភ្នំពេញៈ ការបោះឆ្នោតជ្រើសរើសសភាតំណាងរាស្រ្ត នាថ្ងៃទី២៣ កក្កដា ខាងមុខ នៅតែជាពេលវេលាដែលអ្នកវិនិយោគជាតិ អន្តរជាតិទន្ទឹងរង់ចាំមើល។

ការទន្ទឹងរង់ចាំមើល មិនទាន់សម្រេចចិត្តនេះ ដោយសារកន្លងមកកម្ពុជា ធ្លាប់មានបញ្ហាចលាចលមួយចំនួន ពិសេសកាលពីឆ្នាំ២០១៣ និងបណ្តាអាណត្តិមុនៗ ប៉ុន្តែការបោះឆ្នោតឆ្នាំ២០១៨ និងឆ្នាំ២០២៣នេះ ត្រូវបានអ្នកវិភាគនយោបាយជាច្រើន បាននិងកំពុងមើលឃើញថា កម្ពុជាគ្មានហានិភ័យនៃវិបត្តិ ឬភាពវឹកវរខាងនយោបាយនោះទេ។

ការបោះឆ្នោតជ្រើសរើសសមាជិកសភា តំណាងរាស្រ្តនាថ្ងៃទី២៣ កក្កដាខាងមុខនេះ មានគណបក្សចំនួន១៨បានចុះឈ្មោះចូលរួមក្នុងគន្លងប្រជាធិបតេយ្យបែបរៀបរយមួយ។

អ្នកវិនិយោគអន្តរជាតិជាច្រើន ពិសេសអ្នកវិនិយោគជប៉ុនដែលបានឈានជើងចូលទីផ្សារកម្ពុជា ពួកគេសុទ្ឋតែមើលឃើញកត្តាសុខសន្តិភាព ស្ថេរភាពនយោបាយរយៈពេលវែង ដែលបាននិងកំពុងកើតមាននៅកម្ពុជា។

ប៉ុន្តែសុខភាពផ្លូវចិត្តនៅតែជាស្រមោល ដែលធ្លាប់លងបន្លាចនាអតីតកាល បាននិងកំពុងលងបន្លាចអ្នកវិនិយោគថ្មីៗ មួយចំនួននៅឡើយ។

សេដ្ឋវិទូជើងចាស់កម្ពុជា នៅតែមានសុទិដ្ឋិនិយមចំពោះកម្ពុជា ដែលនឹងរក្សាបាននូវសន្តិភាព និងស្ថេរភាពនយោបាយរយៈពេលវែងក្រោមការដឹកនាំរបស់សម្តេចតេជោហ៊ុន សែននាយករដ្ឋមន្រ្តីនៃកម្ពុជា។

លោកបណ្ឌិតម៉ី កល្យាណទីប្រឹក្សាជាន់ខ្ពស់ នៃឧត្តមទីប្រឹក្សាសេដ្ឋកិច្ចជាតិបានមានប្រសាសន៍ឲ្យដឹងថា អ្នកវិនិយោគអន្តរជាតិ ពិសេសអ្នកជប៉ុន បានកសាងមូលដ្ឋាន សម្រាប់ការវិនិយោគរយៈពេលវែងនៅកម្ពុជារួចហើយ ដោយពួកគេបានសាងសង់មូលដ្ឋានសំរាប់សេចក្តីត្រូវការជាមូលដ្ឋានជាច្រើន ដូចជា សាលារៀន មន្ទីរពេទ្យ ខុនដូ អាផាតម៉ិន សណ្ឋាគារ បុរីលំនៅដ្ឋានជាដើម។

លោកបន្តថា “ធម្មតាអ្នកវិនិយោគជប៉ុន ពួកគេមានការស្ទាបស្ទង់ណាស់ ពួកគេកាន់បង្កាន់ដៃស្ពានហើយស្ទាប ហើយស្ទាបទៀតមុនពួកគេសម្រេចចិត្តដើរឆ្លង ទៅកាន់ប្រទេសណាមួយ”។

ទាក់ទងនឹងវិស័យអចលនវត្ថុ អ្នកស្រីអាន សុធីតាអគ្គនាយិកាក្រុមហ៊ុនPropNex Cambodiaបានលើកឡើងថា ការមិនទាន់សម្រេចចិត្តរបស់វិនិយោគិនបរទេសនៅកម្ពុជា មួយផ្នែកដោយសារការបោះឆ្នោតនាពេលខាងមុខផងដែរ។

អ្នកជំនាញសេដ្ឋកិច្ចមួយរូបទៀត ដែលជាអគ្គនាយកធនាគារធំមួយបានមានប្រសាសន៍ក្នុងលក្ខខ័ណ្ឌមិនបញ្ចេញឈ្មោះថា រាជរដ្ឋាភិបាលបានដឹងពីបញ្ហា និងវិបត្តិមួយចំនួន ដែលក្រុមហ៊ុនអភិវឌ្ឈន៍អចលនវត្ថុជួបប្រទះ ប៉ុន្តែរដ្ឋាភិបាលនឹងមិនទុកបញ្ហានេះ ចោលនោះទេ អ្វីនឹងមានភាពល្អប្រសើរក្រោយការបោះឆ្នោតបញ្ចប់។

លោកបន្តថា “ក្រោយការរៀបចំរដ្ឋាភិបាលថ្មី រាជរដ្ឋាភិបាលនឹងដាក់ចេញគោលនយោបាយ លើកទឹកចិត្តជាច្រើនទៀត ដើម្បីជម្រុញសេដ្ឋកិច្ច និងវិស័យអចលវត្ថុឲ្យរីកចម្រើនឡើងវិញ”។ លោកបន្តថា “អ្នកវិនិយោគអន្តរជាតិ បាននិងកំពុងត្រៀមចាប់ផ្តើមបោះទុនវិនិយោគនៅកម្ពុជា ហេតុនេះយើងរង់ចាំដល់ត្រីមាសទី៤ និងដើមឆ្នាំ២០២៤ អ្វីៗនឹងមានសភាពល្អប្រសើរឡើងវិញហើយ”៕

ក្រុមហ៊ុនChevron ជំរុញឱ្យកម្ពុជា និងថៃចរចាជុំវិញតំបន់ត្រួតស៊ីគ្នា ខណៈខ្លួនសម្លឹងពង្រីកប្រតិបត្តិការនៅតំបន់នេះ

ដោយៈ សុខុម

បាងកក: ក្រុមហ៊ុន Chevron Thailand Exploration and Production ចង់បង្កើនការផ្គត់ផ្គង់ឧស្ម័នក្នុងស្រុក ដើម្បីកាត់បន្ថយការពឹងផ្អែករបស់រដ្ឋាភិបាលថៃ លើការនាំចូលឧស្ម័នធម្មជាតិរាវ (LNG) ដែលមានតម្លៃថ្លៃ ដោយក្រុមហ៊ុននេះ បានបង្កើនការផលិតប្រេងនៅឈូងសមុទ្រថៃ។

ក្រុមហ៊ុនដែលមានមូលដ្ឋាន នៅសហរដ្ឋអាមេរិកនេះ ទទួលបានអាជ្ញាប័ណ្ណរុករក និងផលិតប្រេងនៅប្លុក G2/65 ដែលគ្របដណ្តប់លើផ្ទៃដី១៥.០៣០គីឡូម៉ែត្រក្រឡា ក្នុងឈូងសមុទ្រថៃ ក្រោមកិច្ចសន្យាចែករំលែកផលិតកម្ម ដែលបានចុះហត្ថលេខាជាមួយនាយកដ្ឋានឥន្ធនៈរ៉ែ (Mineral Fuels) កាលពីថ្ងៃទី៣០ ខែឧសភា។ នេះបើយោងតាមកាសែត Bangkok Post ចុះផ្សាយកាលពីថ្ងៃច័ន្ទ ទី១២ ខែមិថុនា។នាយកដ្ឋាននេះ បានផ្តល់អាជ្ញាប័ណ្ណ២ផ្សេងទៀត សម្រាប់ប្លុក G1/65 និងប្លុកG3/65 ដែលលាតសន្ធឹងលើផ្ទៃដី២០.១៣៣គីឡូម៉ែត្រការ៉េដល់ក្រុមហ៊ុនPTT Exploration and Production Plc នៅក្នុងការដេញថ្លៃជុំទី២៤ ដែលបានធ្វើឡើងកាលពីឆ្នាំមុន។

លោក Chatit Huayhongtong ប្រធានក្រុមហ៊ុន Chevron Thailand ថ្លែងថា ក្រុមហ៊ុន Chevron រំពឹងថានឹងផលិតឧស្ម័នធម្មជាតិនៅប្លុកG2/65 ប៉ុន្តែក៏ជឿជាក់ដែរថា ខ្លួននឹងរកឃើញប្រេងឆៅមួយចំនួននៅតំបន់នេះ មានទីតាំងនៅជិតប្លុកឧស្ម័នPailin ដែលក្រុមហ៊ុន Chevron កំពុងដំណើរការ។ក្រុមហ៊ុនកំពុងរៀបចំធ្វើការស្ទង់មតិ ដើម្បីសិក្សាពីរចនាសម្ព័ន្ធភូមិសាស្ត្រដោយលម្អិត ដើម្បីកំណត់សមិទ្ធលទ្ធផល នៃការរកឃើញប្រេងឥន្ធនៈ។

ក្រុមហ៊ុននេះក៏គ្រោងនឹងខួងអណ្តូង រុករកចំនួន២ទៀតក្នុងរយៈពេល៦ឆ្នាំ។ ប្រសិនបើការរុករកបញ្ជាក់ថា អាចមានរ៉ែឥន្ធៈច្រើន នឹងមានការបោះទុនវិនិយោគបន្ថែមទៀត ដើម្បីអភិវឌ្ឍអណ្តូងទាំងនោះទៅជាអណ្តូងផលិតកម្ម។

លោក Chatit Huayhongtong លើកឡើងថា ប្រេងឥន្ធនៈពីប្លុកនេះ នឹងពង្រឹងសន្តិសុខថាមពលរបស់ប្រទេសថៃ នាពេលអនាគត។ ក្រុមហ៊ុន Chevron គ្រោងនឹងធ្វើការវិនិយោគបន្ថែម នៅក្នុងប្លុក Bailin ហើយកំពុងស្ថិតក្នុងដំណើរការស្នើសុំ ឱ្យអាជ្ញាធរបន្ថែមរយៈពេលផលិតប្រេង១០ឆ្នាំបន្ថែមទៀត។

ក្រុមហ៊ុន Chevron ក៏គាំទ្រឱ្យប្រទេសថៃ និងកម្ពុជា ធ្វើកិច្ចចរចាគ្នា ជុំវិញតំបន់អះអាងត្រួតស៊ីគ្នា (OCA) រវាងប្រទេសទាំងពីរផងដែរ ដើម្បីរួមគ្នាអភិវឌ្ឍទីតាំងប្រេងថ្មី នៅប៉ែកខាងលើនៃឈូងសមុទ្រថៃ។

លោក Chatit Huayhongtong ថ្លែងថា រដ្ឋាភិបាលបន្ទាប់របស់ថៃ គួរតែជំរុញកិច្ចចរចាជុំវិញតំបន់អះអាងត្រួតស៊ីគ្នា (OCA) ព្រោះក្រុមហ៊ុន Chevron បានត្រៀមខ្លួនរួចជាស្រេច ក្នុងការចូលរួមការរុករកប្រេង ប្រសិនបើការចរចាទទួលបានជោគជ័យ៕ Bangkok Post៕

សូមទំនាក់ទំនងផ្សព្វផ្សាយពាណិជ្ជកម្មរបស់លោកអ្នកតាមរយៈទូរស័ព្ទលេខ៖ 086485566 សូមអរគុណ!

អំពើឆបោកពេញនិយមបំផុតដែលគេនិយមយកមកប្រើ ក្នុងវិស័យអចលនវត្ថុ

ដោយៈ គង់ សូរិយា

ភ្នំពេញៈ ហានិភ័យពិតជាកើតមាន នៅក្នុងគ្រប់់ផ្នែកនៃមុខជំនួញ ហេតុនេះប្រសិនបើលោកអ្នកកំពុងសម្លឹងមើល ឬចង់វិនិយោគលើវិស័យអចលនទ្រព្យ លោកអ្នកគួរយល់ដឹងពីការឆបោកមួយចំនួន ដែលលោក អ្នកគួរប្រុងប្រយ័ត្នខ្ពស់។

១. មានប្លង់កម្មសិទ្ធចំនួនពីរ
សិទ្ធក្នុងការកាន់កាប់អចលនទ្រព្យមានចំនួនពីរ ដែលពេញនិយមក្នុងការប្រើប្រាស់នៅកម្ពុជាយើង គឺប្លង់រឹង និងប្លង់ទន់ ដែលប្លង់រឹង គឺមានព័ត៌មានលម្អិត ត្រូវបានទទួលស្គាល់និងបញ្ជាក់ ក្នុងកម្រិតជាតិពី ការិយាល័យសុរិយោដី និង ក្រសួងរៀបចំដែនដី ហើយប្លង់ទន់ត្រូវបានផ្តល់ជូនដោយការិយាល័យសង្កាត់ ឬស្រុក និងមិនត្រូវបានចុះឈ្មោះនៅថ្នាក់ជាតិនោះទេ ប៉ុន្តែប្លង់ទន់ត្រូវបានគេចាត់ទុកជា ឯកសារម្ចាស់កម្មសិទ្ធិពេញសិទ្ធិ។ចំពោះករណីនេះ ម្ចាស់ដែលមានប្លង់រឹង អាចប្រើប្រាស់ប្លង់ទន់ដែលត្រូវបានច្បាប់និរាករ (លែងឲ្យប្រើតទៅទៀត) យកមកប្រើប្រាស់ ដើម្បីឆបោកដោយប្រគល់ប្លង់ទន់ ទៅអ្នកទិញម្នាក់ និងប្រគល់ប្លង់រឹងឲ្យអ្នកទិញម្នាក់ទៀត។ ដូច្នេះលោកអ្នកគួរស៊ើបអង្កេតជាមួយ ក្រសួងរៀបចំដែនដី នគរូបនីយកម្ម និងសំណង់ និងការិយាល័យសុរិយោដី ក្នុងតំបន់ផ្ទាល់។

ម្យ៉ាងទៀតលោក អ្នកអាចសាកសួរអ្នកជិតខាង ប្រសិនបើពួកគេមានប្លង់រឹង នោះមានន័យថា រដ្ឋាភិបាលបានចេញប្លង់រឹងឲ្យអ្នកនៅតំបន់នោះរួចហើយ។

២. ដីមានទំនាស់
ការបោកប្រាស់នេះ ពាក់ព័ន្ធទៅនឹងអចលនទ្រព្យ ដែលកំពុងមានវិវាទដី។ ដូច្នេះលោកអ្នកគួរសាកសួរអ្នកជិតខាង ឬធ្វើការស្វែងរកប្លង់កាន់កាប់ពី ក្រុមប្រឹក្សាឃុំសង្កាត់ ឬមន្ត្រីក្រសួងដែនដី ដោយគ្រាន់តែចង់ដឹងថា ដីនោះជាដីកំពុងមានទំនាស់ឬអត់។

៣. ជនក្លែងបន្លំជាម្ចាស់អចលនទ្រព្យ
ករណីនេះច្រើនកើតឡើងនៅលើដីទំនេរ ដូច្នេះលោកអ្នកគួរសាកសួរពីអ្នកជិតខាង ឬប្រធានភូមិ និងស៊ើបប្រវត្តិ របស់ម្ចាស់អចលនទ្រព្យ។ គួរពិនិត្យលើប្លង់កម្មសិទ្ធ ប្រសិនបើម្ចាស់មិនមានប្លង់កម្មសិទ្ធនោះ ឬមានអ្វីមួយមិនប្រក្រតី ត្រូវសួរអាជ្ញាធរពាក់ព័ន្ធ ដើម្បីដឹងថា ពួកគេជាម្ចាស់កម្មសិទ្ធពិតប្រាកដ ឬទេ។

៤. អចលនទ្រព្យខូចខាត
វាអាចជាមូលហេតុ ដែលអចលនទ្រព្យមានតម្លៃថោក ដោយសារមានការខូចខាត ដែលមិនអាចមើលឃើញ។ ដូច្នេះអ្នកគួរនាំអ្នកជំនាញ ត្រួតពិនិត្យប្រព័ន្ធទឹក អគ្គិសនី និងភាពរឹងមាំនៃសំណង់។

៥. ការបង់ប្រាក់មុនគម្រោង
មានគម្រោងអភិវឌ្ឍន៍ខ្លះ បានផ្សព្វផ្សាយគម្រោងថ្មីរបស់ខ្លួន និងប្រមូលប្រាក់កក់មុន ដោយសន្យាសាងសង់ ទៅតាមគម្រោង ហើយបន្ទាប់មកក៏គេចខ្លួនបាត់។

ករណីនេះលោកអ្នកគួរស៊ើបពីគម្រោង និងម្ចាស់គម្រោងជាមុន ធម្មតាម្ចាស់គម្រោងដែលល្អ មានកេរ្តិ៍ឈ្មោះល្អស្រេចទៅហើយ។ មួយទៀតលោក អ្នកអាចសាកសួរក្រសួងពាក់ព័ន្ធ ក្រសួងរៀបចំដែនដី តើមានការទទួលស្គាល់ និងលិខិតបញ្ជាក់សម្រាប់អ្នកអភិវឌ្ឍន៍៕សូមទំនាក់ទំនងផ្សព្វផ្សាយពាណិជ្ជកម្មរបស់លោកអ្នកតាមរយៈទូរស័ព្ទលេខ៖ 086485566 សូមអរគុណ!

បរិក្ខារបង្ហូរទឹកសំណល់នុយក្លេអ៊ែរចូលក្នុងសមុទ្រនៅកោះFukushima ជប៉ុនចាប់ផ្តើមដំណើរការសាកល្បង

តាមការផ្សាយដំណឹងនៃប្រព័ន្ធសារព័ត៌មានជប៉ុននៅថ្ងៃទី១២ខែមិថុនាឱ្យដឹងថា នៅថ្ងៃដដែលនោះក្រុមហ៊ុនថាមពលអគ្គិសនីតូក្យូដែលជាភាគីដំណើរការអាជីវកម្មនៃរោងចក្រអគ្គីសនីដើរដោយថាមពលនុយក្លេអ៊ែរ Fukushima បានចាប់ដណើរការសាកល្បងនូវបរិក្ខារ បង្ហូរទឹកសំណល់នុយក្លេអ៊ែរចូលក្នុងសមុទ្រ តាមការប៉ាន់ប្រមាណការដំណើរការសាកល្បងនឹងបន្តរយៈពេលពីរសប្តាហ៍ ដើម្បីត្រួតពិនិត្យថាតើបរិក្ខាមានបញ្ហាដែរឬអត់។

អ្នកប្រកបមុខរបរនេសាទជប៉ុនបាននាំគ្នាសម្តែងការប្រឆាំងតវ៉ាចំពោះផែនការបង្ហូរទឹកសំណល់នុយគ្លេអ៊ែរចូលសមុទ្រជាបន្តបន្ទាប់។
តាមការផ្សាយដំណឹងនៃប្រព័ន្ធសារព័ត៌មានដូចជាទីភ្នាក់ងារព័ត៌មាន kyodo និងសមាគម វិទ្យុនិងទូរទស្សន៍ជប៉ុនឱ្យដឹងថា ការដំណើរការសាកល្បងប្រើប្រាស់ទឹកសាបមិនមែនទឹកសំណល់នុយក្លេអ៊ែរឡើយ ដោយលាយទឹកសាបជាមួយទឹកសមុទ្រ រួចបង្ហូរតាមបំពង់បង្ហូរនៅរូងបាតសមុទ្រទៅលំហំសមុទ្រដែលមានចម្ងាយប្រហែល១គីឡូម៉ែត្រពីឆ្នេរ ក្នុងគោលបំណងត្រួតពិនិត្យដំណើរការនៃម៉ាស៊ីនបូម និងបញ្ជាក់ថាតើបរិក្ខារទប់ស្កាត់លំហូរទឹកអាចដំណើរការជាប្រក្រតីដែរឬទេក្រោមស្ថានការណ៍បន្ទាន់៕

ផ្លូវដែកចិន-ឡាវ ដឹកជញ្ជូនទំនិញឆ្លងកាត់ព្រំដែនបានជាង៤លានតោន និងមានទំនិញពីកម្ពុជាផងដែរ

ដោយ: គង់ លាងហួរ
វៀងចន្ទន៍ៈប្រព័ន្ធផ្សព្វផ្សាយក្នុងស្រុករបស់ប្រទេសឡាវបានឱ្យដឹងថា ផ្លូវដែកចិន-ឡាវ បានដឹកជញ្ជូនទំនិញជាង៤លានតោន ចាប់តាំងពីវាត្រូវបានបើកដាក់ឱ្យដំណើរការកាលពីឆ្នាំ២០២១។

ទីភ្នាក់ងារសារព័ត៌មានឡាវ (KPL) បានរាយការណ៍កាលពីពេលថ្មីៗនេះថា ចាប់តាំងពីផ្លូវរថភ្លើងបានបើកដំណើរការក្នុងខែធ្នូ ឆ្នាំ២០២១ រថភ្លើងដឹកទំនិញបានផ្ទុកទំនិញនាំចូល និងនាំចេញចំនួន៤.០៩៧.៣០០តោន។

នៅក្នុងនោះមាន ទំនិញប្រមាណ ៣.៤៥០.០០០ តោនត្រូវបាននាំចេញពីប្រទេសឡាវ ទៅកាន់ចិន និង ៦៥០.៩០០ តោន ត្រូវបាននាំចេញពីចិនទៅកាន់ប្រទេសឡាវ។ ទន្ទឹមនឹងនេះ ប្រតិបត្តិករធុរកិច្ចនានានៅក្នុងប្រទេសឡាវ ថៃ វៀតណាម កម្ពុជា និងមីយ៉ាន់ម៉ា ក៏កំពុងប្រើប្រាស់ផ្លូវដែកចិន-ឡាវនេះដើម្បីដឹកជញ្ជូនទំនិញទៅ និងមកពីប្រទេសចិន និងលើសពីនេះផងដែរ។

ប្រទេសថៃកំពុងដឹកជញ្ជូនទំនិញបន្ថែមទៅកាន់ប្រទេសចិន តាមរយៈផ្លូវដែកដែលទំនិញជាចម្បង គឺផលិតផលកសិកម្ម។ ពេលវេលាដែលត្រូវដឹកជញ្ជូនទំនិញតាមរយៈរថភ្លើងគឺមានរយៈពេល៣ថ្ងៃលឿនជាងផ្លូវដឹកជញ្ជូនមុនៗតាមផ្លូវថ្នល់។

ផ្លូវដែកចិន-ឡាវ ដែលជាគម្រោងដ៏សំខាន់ដែលបង្ហាញពីកិច្ចសហប្រតិបត្តិការខ្សែក្រវាត់ និងផ្លូវដ៏មានគុណភាពខ្ពស់ បានចាប់ផ្តើមដំណើរការក្នុងខែធ្នូ ឆ្នាំ២០២១។ ផ្លូវដែកឆ្លងកាត់ព្រំដែននេះមានប្រវែង១.០៣៥គីឡូម៉ែត្រតភ្ជាប់ទីក្រុងគុនមីងភាគនិរតីនៃប្រទេសចិនជាមួយរដ្ឋធានីវៀងចន្ទន៍របស់ប្រទេសឡាវ៕

Cambodia’s economy projected to grow by 5.6 pct this year: PM

Cambodian Prime Minister Samdech Techo Hun Sen said here Sunday that the country’s economy is expected to achieve a 5.6 percent growth rate in 2023, up from 5.2 percent in 2022.
Peace, together with the successful control of the COVID-19 pandemic, has laid a strong foundation for the Southeast Asian country to recover its economy from the pandemic, he said.“It’s essential for all of us to protect the peace, which is the most important prerequisite for national development.” Hun Sen said in a speech during a get-together with nearly 20,000 garment factory workers.

The World Bank said in its
May economic update that Cambodia’s economy remained robust, driven by pent-up consumer demand, agriculture, and the return of foreign tourists after China’s reopening earlier this year.

The lender said the Regional Comprehensive Economic Partnership (RCEP) agreement, the Cambodia-China Free Trade Agreement and the Cambodia-Republic of Korea Free Trade Agreement have also given a boost to the growth.

The country’s economy mainly relies on garment export, tourism, agriculture and real estate and construction.

The International Monetary Fund said in its recent World Economic Outlook that Cambodia is among the three most robust RCEP economies in 2023 alongside the Philippines and Vietnam.

Source: xinhua

ក្រសួងការបរទេសថៃ បញ្ជាក់ថា ថៃនៅតែបន្តជួលពលករបរទេស ដោយស្ថិតក្រោមអនុស្សរណៈកម្ពុជា-ឡាវ មានសិទ្ធទទួលសេវាកម្មសុខភាព និងសិទ្ធការពារការជួញដូរមនុស្ស

(ថៃ)៖ អ្នកស្រី កាញ្ចនា ផ័ត្រឆូក អគ្គនាយក នៃអគ្គនាយកដ្ឋានសារព័ត៌មាន និងអ្នកនាំពាក្យ នៃក្រសួងការបរទេសរបស់ថៃ បានលើកយកករណីមានការទទួលបានព័ត៌មានភាន់ច្រឡំពីការពិត នៅលើបណ្តាញសង្គមអនឡាញ កាលពីថ្ងៃទី០១ ខែមិថុនា ឆ្នាំ២០២៣ ដែលមានការលេចឮថា នឹងមិនមានការជួលពលករពីកម្ពុជា និងឡាវបន្តទៀតឡើយ។ នេះបើតាមការចុះផ្សាយរបស់សារព័ត៌មានថៃ khaosod។

លោកស្រីបានបញ្ជាក់ថា នេះមិនមែនជារឿងពិតទេ ដោយអគ្គនាយកដ្ឋានស្វែងរកការងារ នៃក្រសួងការងាររបស់ថៃ បានចេញមកបកស្រាយហើយថា យើងគ្រាន់តែកែប្រែដំណាក់កាលជួលពលករខ្មែរ និងឡាវបែបស្របច្បាប់ ដែលចូលមកធ្វើការតាមរយៈអនុស្សរណៈប៉ុណ្ណោះ ដើម្បីឲ្យម្ចាស់សហគ្រាស ឬថៅកែ អាចដាក់សំណើតម្រូវការពលករបរទេសទៅកាន់មន្ទីរស្វែងរកការងារខេត្ត ឬមន្ទីស្វែងរកការងារទីក្រុងបាងកក តំបន់1-10 ដោយមិនចាំបាច់មកកាន់ទីស្នាក់ការកណ្តាល (អគ្គនាយកដ្ឋានស្វែងរកការងារ) ដើម្បីភាពងាយស្រួល និងឆាប់រហ័ស។ ប៉ុន្តែសម្រាប់ពលករពីប្រទេសមីយ៉ាន់ម៉ា តម្រូវឲ្យទាក់ទងតាមរយៈទីស្នាក់ការកណ្តាល (អគ្គនាយកដ្ឋានស្វែងរកការងារ) ដដែល។
អគ្គនាយក នៃអគ្គនាយកដ្ឋានសារព័ត៌មាន និងអ្នកនាំពាក្យ បានបន្ថែមអំពីរឿងផលប្រយោជន៍បន្ថែមផ្សេងៗ របស់ពលករបរទេសនៅក្នុងប្រទេសថៃថា ថៃថែមទាំងបានព្យាយាមអនុវត្តន៍វិធានការថែទាំពលករបរទេស ដោយមិនមានការរើសអើងផងដែរ នាពេលកន្លងមក។ ពលករបរទេសអាចប្រើប្រាស់សេវាកម្មសុខភាព នៅក្នុងប្រទេសថៃបាន ជាពិសេសពលករបរទេសស្របច្បាប់ នឹងមានសិទ្ធប្រើប្រាស់សេវាកម្មបេឡាសន្តិសុខសង្គម និងបេឡាសុខភាពថែមទៀតផង។

លើសពីនេះទៅទៀត ថៃថែមទាំងបានជួយសង្គ្រោះពលករបរទេស និងការពារពួកគេកុំឲ្យក្លាយជាជនរងគ្រោះ ដោយសារអំពើជួញដូរមនុស្ស ឬការបង្ខិតបង្ខំធ្វើពលកម្ម ឬការប្រើប្រាស់ពលកម្មកុមារទៀតផងដែរ តាមរយៈការបង្កើតមជ្ឈមណ្ឌលផ្តល់សេវាកម្មជួយសង្គ្រោះពលករបរទេស នៅតាមបណ្តាខេត្តផ្សេងៗ ព្រមទាំងមានការចុះធ្វើអធិការកិច្ចជាប្រចាំ។ លើសពីនេះទៅទៀត ក៏មានការធ្វើវសោធនកម្មច្បាប់ការពារពលករ ខាងវិស័យនេសាទ តាមសមុទ្រ ឆ្នាំ២០២២ ឲ្យស្របតាមស្តង់ដារអន្តរជាតិមួយកម្រិតទៀតផងដែរ។
សូម្បីតែក្នុងដំណាក់កាល នៃការរាតត្បាល នៃជំងឺកូវីដ១៩ កន្លងមក ថៃក៏បានជួយលើកទឹកចិត្តពលករបរទេស ឲ្យទទួលយកថ្នាំបង្ការ និងការត្រួតពិនិត្យប្រកបដោយសមភាពជាមួយជនជាតិថៃផងដែរ។

តាមរបាយការណ៍របស់ក្រសួងការងាររបស់ថៃ បានបញ្ជាក់ថា គិតត្រឹមត្រីមាសទី១ ឆ្នាំ២០២៣ មានពលករបរទេសនៅក្នុងប្រទេសថៃ ចំនួន២,៧៤៣,៦៧៣នាក់ ស្មើនឹង៦.៩២% នៃចំនួនពលករសរុបនៅក្នុងប្រទេសថៃ។ ពួកគេដើរតួនាទីយ៉ាងសំខាន់ ក្នុងការរួមចំណែកអភិវឌ្ឍន៍សេដ្ឋកិច្ច និងសង្គមថៃ ជាពិសេសខាងវិស័យសំណង់ កសិកម្ម និងបសុសត្វ រួមទាំងអាជីវកម្មផ្តល់សេវាកម្មផ្សេងទៀតផងដែរ។
លោកស្រីអគ្គនាយកបានបញ្ជាក់ថា ថៃផ្តល់ការយកចិត្តទុកដាក់ទៅលើពលករបរទេស នៅក្នុងប្រទេសថៃ ជាពិសេសពលករដែលមកពីប្រទេសភូមិផងរបងជាមួយ ព្រោះពួកគេជាកម្លាំងចលករសំខាន់ ក្នុងការរួមចំណែកជំរុញ សេដ្ឋកិច្ចថៃ ជារៀងរហូតមក ដោយកន្លងមក ថៃតែងតែបានផ្តោតទៅលើការអភិវឌ្ឍស្តង់ដារ និងបទបញ្ញត្តិស្វែងរកការងារដើម្បីជួយសម្រួលភាពងាយស្រួលដល់ម្ចាស់សហគ្រាស ឬថៅកែរួមទាំងពលករជាបន្តបន្ទាប់ផងដែរ៕

រដ្ឋាភិបាលឥណ្ឌូនេស៊ីអនុម័តទុន១០០០លានដុល្លារបន្ថែមដើម្បី ពន្លឿនការសាងសង់រដ្ឋធានីថ្មី Nusantara

ដោយ: គង់ លាងហួរ

ហ្សាការតា: សមាជិកសភាជាន់ខ្ពស់មួយរូប បានឱ្យដឹងកាលពីពេលថ្មីៗនេះថា គណៈកម្មាធិការថវិកាសភា របស់ប្រទេសឥណ្ឌូនេស៊ីបានអនុម័ត ទឹកប្រាក់បន្ថែម១៥ពាន់ពាន់លានរូពៀ (១,០១ពាន់លានដុល្លារ) ដើម្បីពន្លឿនការសាងសង់រដ្ឋធានីថ្មី ដ៏ល្បីឈ្មោះ Nusantara ។

លោក Said Abdullah ប្រធានគណៈកម្មាធិការសភាបានលើកឡើងថា ទឹកប្រាក់បន្ថែមចំនួន១៥ពាន់ពាន់លានរូពៀ នឹងបានទៅដល់ការសាងសង់នៅឆ្នាំនេះ បន្ថែមពីលើថវិកា២២ពាន់ពាន់លានរូពៀ ដែលត្រូវបានបែងចែកកាលពីមុន សម្រាប់ការអភិវឌ្ឍរដ្ឋធានីថ្មី Nusantara នៅលើកោះ Borneo។

ប្រទេសឥណ្ឌូណេស៊ី កំពុងជំរុញឱ្យបញ្ចប់ការសាងសង់នៅពាក់កណ្តាលឆ្នាំ២០២៤ នូវការិយាល័យរដ្ឋបាលសំខាន់ៗ របស់រដ្ឋធានី រួមទាំងវិមានប្រធានាធិបតី និងអគាររដ្ឋមន្ត្រីសំខាន់ៗ ដែលមានមន្ត្រីរាជការ យោធា និងប៉ូលីសយ៉ាងហោចណាស់ ចំនួន១៦.០០០នាក់នឹងត្រូវផ្លាស់ទៅទីនោះនៅឆ្នាំក្រោយ។

ប្រធានាធិបតីឥណ្ឌូនេស៊ី លោក Joko Widodo ធ្លាប់បានសន្យាថា រដ្ឋាភិបាលនឹងចំណាយថវិកាត្រឹមតែ២០%ប៉ុណ្ណោះ ទៅលើគម្រោងរដ្ឋធានី តម្លៃ៣២ពាន់លានដុល្លារ ខណៈផ្នែកដែលនៅសេសសល់នឹងទទួលបានវិស័យឯកជន។

ទោះជាយ៉ាងនេះក្តី រហូតមកទល់ពេលនវ មិនទាន់មានកិច្ចព្រមព្រៀងវិនិយោគណាមួយ ត្រូវបានចុះហត្ថលេខានោះទេ ដោយសារអ្នកវិនិយោគព្រួយបារម្ភអំពីលទ្ធភាព និងដំណើរការបន្តរបស់គម្រោង ទោះបីជារដ្ឋាភិបាលឥណ្ឌូនេស៊ី ប្រកាសផ្តល់ការលើកទឹកចិត្តយ៉ាងណាក្តី ខណៈប្រទេសឥណ្ឌូនេស៊ី នឹងរៀបចំការបោះឆ្នោតនៅខែកុម្ភៈ ឆ្នាំ២០២៤ខាងមុខ ដើម្បីជ្រើសរើសប្រធានាធិបតីថ្មី៕

ផ្លូវលំជនបទចំនួន៣បានបញ្ចប់និងប្រគល់ជូនអាជ្ញាអធរមូលដ្ឋាន

ដោយៈ និស្ស័យ

ភ្នំពេញៈ លោកហួត សារឹម អនុរដ្ឋលេខាធិការក្រសួងអភិវឌ្ឍន៍ជនបទ និងដោយមានការចូលរួមជាមួយ និងមន្រ្តីពាក់ព័ន្ឋបាន អញ្ជើញទៅត្រួតពិនិត្យ និងវាយតម្លៃ ប្រគល់-ទទួល១០០% និងបញ្ចប់សុពលភាពលើការងារស្ថាបនាផ្លូវ ក្រាលដីល្បាយក្រួស ល្បាយថ្មភ្នំ និងសាងសង់លូ គ្រប់ប្រភេទចំនួន៣គម្រោង។

គំរោងផ្លូវលំសំខាន់ៗទាំងនេះ ស្ថិតនៅខេត្តមណ្ឌលគិរី ខេត្តស្ទឹងត្រែង និងខេត្តបាត់ដំបង។-គម្រោងទី១ ការងារស្ថាបនាផ្លូវក្រាលល្បាយដីក្រួស ចំនួន ០១ខ្សែ ប្រវែង៧៥០០ម៉ែត្រ ទទឹង៨ម៉ែត្រ កម្រាស់ ០,២ម៉ែត្រ សាងសង់លូមូលមុខមួយចំនួន១១កន្លែង និងផ្លាកឈ្មោះផ្លូវចំនួន ០២កន្លែង តភ្ជាប់ពីផ្លូវជាតិលេខ ៧៦ ចូលទៅផ្លូវក្រវ៉ាត់ព្រំដែន កម្ពុជា-វៀតណាម ត្រង់បង្គោលលេខ ៦០/១៥ (១) ស្ថិតក្នុងភូមិ ពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី។

-គម្រោងទី២ ការងារស្ថាបនាផ្លូវក្រាលល្បាយថ្មភ្នំ ចំនួន១ខ្សែ ប្រវែង៧ ០០០ម៉ែត្រ ទទឹង៨ម៉ែត្រ កម្រាស់០,២ម៉ែត្រ សាងសង់លូមូលមុខបី ចំនួន១០កន្លែង លូមូលមុខពីរចំនួន៦កន្លែង និងលូមូលមុខមួយចំនួន៥កន្លែង ស្ថិតនៅតាមបណ្តោយខ្សែក្រវ៉ាត់ព្រំដែន ( កម្ពុជា-ឡាវ ) ច្រកដុងក្រឡ ខេត្តស្ទឹងត្រែង។

-គម្រោងទី៣ ការងារស្ថាបនាផ្លូវក្រាលដីល្បាយថ្មភ្នំ ចំនួន១ខ្សែ មានពីរកំណាត់ ប្រវែងសរុប១៣ ០០០ម៉ែត្រ ទទឹង៨ម៉ែត្រ កម្រាស់ ០,២ម៉ែត្រ ( កំណាត់ទី១ ) ស្លាបស្តាំ ប្រវែង៥៥០០ម៉ែត្រ ចាប់ពីបំបែកច្រក៤០០ នៃភូមិឆករកា ឃុំសំឡូតឆ្ពោះទៅ ច្រកសែនចៅ ស្រុកសំឡូត ខេត្តបាត់ដំបង និងច្រកផល្លីផល្លា ខេត្តប៉ៃលិន និង(កំណាត់ទី២ ) ស្លាបឆ្វេង ប្រវែង៧៥០០ម៉ែត្រ ចាប់ពីបំបែកច្រក ៤០០ ឆ្ពោះទៅភូមិ៨៣ ឃុំតាតោក ឆ្ពោះទៅច្រកចរិយា និងច្រកទីងមោង ស្រុកសំឡូត ខេត្តបាត់ដំបង និងផ្លាកឈ្មោះផ្លូវ ចំនួន៣កន្លែង ។

គម្រោងទាំងបីខាងលើនេះអនុវត្តដោយ បញ្ជាការដ្ឋានវិស្វកម្មអគ្គបញ្ជាការ នៃកងយោធពលខេមរភូមិន្ទ។

គណៈកម្មការ បានសម្រេចឯកភាព ទទួលយកគម្រោងទី១ ដោយបញ្ចប់ រយៈពេលធានាសុពលភាពជាស្ថាពរ និងគម្រោងទី២ និងទី៣ ទទួលយក ១០០% តាមសំណូមពររបស់ ភាគីទទួលការ៕

តើកម្ពុជាមានតំបន់ការពារធនធានធម្មជាតិប៉ុន្មាន?

ដោយៈ ជេស៊ីកា

ភ្នំពេញៈ តើបច្ចុប្បន្ននេះកម្ពុជា មានតំបន់ការពារធនធានធម្មជាតិប៉ុន្មាន ហើយមានផ្ទៃដីស្មើនឹងប៉ុន្មានភាគរយ នៃផ្ទៃដីរបស់ប្រទេសកម្ពុជាទាំងមូល?។

តំបន់ការពារធនធានធម្មជាតិ គឺជាដែនដីសម្បត្តិសាធារណៈរបស់រដ្ឋ រួមមាន ដែនដីគោក ឬដែនទឹក រួមទាំងឆ្នេរសមុទ្រ និងសមុទ្រ ស្ថិតនៅក្នុងតំបន់ដែលទទួលស្គាល់ ដោយបញ្ញត្តិនៃច្បាប់ ឬតំបន់ដែលបង្កើតថ្មី ក្នុងដែនសមត្ថកិច្ចរបស់ក្រសួងបរិស្ថាន ដែលធានាបាននូវការការពារប្រភេទសត្វព្រៃ និងរុក្ខជាតិសំខាន់ៗ ក៏ដូចជាសហគមន៍ធម្មជាតិ។

សំណួរសួរថា តើបច្ចុប្បន្ននេះ កម្ពុជាមានតំបន់ការពារធនធានធម្មជាតិប៉ុន្មានកន្លែង ហើយមានវិសាលភាពសរុប ស្មើនឹងប៉ុន្មានភាគរយនៃផ្ទៃដីប្រទេសទាំងមូល?។

លោកនេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានឱ្យដឹងកាលពីពេលថ្មីៗនេះថា រហូតមកដល់ឆ្នាំ២០២១នេះ កម្ពុជាមានតំបន់ការពារធនធានធម្មជាតិចំនួន៧៣ ដែលមានផ្ទៃដីសរុប ៧,២៩៧,៣១៤ ហិកតា ស្មើនឹង៤១% នៃផ្ទៃដីប្រទេសកម្ពុជាទាំងមូល។

តំបន់ការពារធនធានធម្មជាតិចំនួន៧៣នេះ គឺស្ថិតនៅក្នុងប្រភេទតំបន់ការពារធំៗចំនួន៨ រួមមាន

ទី១ តំបន់ឧទ្យានជាតិ
តំបន់ឧទ្យានជាតិនេះមានចំនួន១១ តំបន់ផ្សេងៗគ្នា និងមានផ្ទៃដីសរុប១,៧១៧,៦១៤ ហិកតា រួមមាន ឧទ្យានជាតិកែប ឧទ្យានជាតិព្រះមុនីវង្ស”បូកគោ” ឧទ្យានជាតិព្រះសុរាម្រិត-កុសមៈ”គិរីរម្យ” ឧទ្យានជាតិសីហនុ-រាម ឧទ្យានជាតិបុទុមសាគរ ឧទ្យានជាតិព្រះជ័យវរ្ម័ន-នរោត្តម “ភ្នំគូលែន” ឧទ្យានជាតិវីរជ័យ ឧទ្យានជាតិវើនសៃ-សៀមប៉ាង ឧទ្យានជាតិអូរយ៉ាដាវ ឧទ្យានជាតិជួរភ្នំក្រវាញកណ្តាល និងឧទ្យានជាតិជួរភ្នំក្រវាញខាងត្បូង។តំបន់ឧទ្យានជាតិទាំងនេះ សម្បូរទៅដោយសត្វព្រៃកម្រជាច្រើនប្រភេទ និងសម្បត្តិទៅដោយព្រៃស្រោង ព្រៃរបោះ និងជាតំបន់ទាក់ទាញភ្ញៀវទេសចរឱ្យចូលទស្សនាបានយ៉ាងច្រើនផងដែរ។

ទី២ តំបន់ដែនជម្រកសត្វព្រៃ
តំបន់ដែនជម្រកសត្វព្រៃ ត្រូវបែងចែកជា១៩ តំបន់ផ្សេងៗគ្នា និងមានផ្ទៃដីសរុប៣,៤៣៣,៣៣៦ ហិកតា រួមមាន ដែនជម្រកសត្វព្រៃឱរ៉ាល់ ដែនជម្រកសត្វព្រៃពាមក្រសោប ដែនជម្រកសត្វព្រៃភ្នំសំកុស ដែនជម្រកសត្វព្រៃគូលែន-ព្រហ្មទេព ដែនជម្រកសត្វព្រៃបឹងពែរ ដែនជម្រកសត្វព្រៃលំផាត់ ដែនជម្រកសត្វព្រៃភ្នំព្រេច ដែនជម្រកសត្វព្រៃភ្នំណាមលៀរ ដែនជម្រកសត្វព្រៃព្រៃឡង់ ដែនជម្រកសត្វព្រៃព្រះរកា ដែនជម្រកសត្វព្រៃឆែប ដែនជម្រកសត្វព្រៃតាតៃ ដែនជម្រកសត្វព្រៃកែវសីមា ដែនជម្រកសត្វព្រៃស្រែពក ដែនជម្រកសត្វព្រៃភ្នំត្នោត-ភ្នំពក ដែនជម្រកសត្វព្រៃសង្ឃរុក្ខវ័ន្ត ដែនជម្រកសត្វព្រៃព្រែកប្រសព្វ ដែនជម្រកសត្វព្រៃសំបូរ និងដែនជម្រកសត្វព្រៃសៀមប៉ាង។

តំបន់ដែនជម្រកសត្វព្រៃទាំងនេះ សម្បូរទៅដោយប្រភេទសត្វព្រៃជិតផុតពូជ សត្វព្រៃកម្រ សត្វព្រៃរងការគំរាមកំហែង ពពួកមច្ឆាជាតិជិតផុតពូជ និងកម្រ ព្រមទាំងជាជម្រកសត្វព្រៃ និងជីវចម្រុះជាច្រើនប្រភេទ ពិសេសសម្បូរទៅដោយធនធានធម្មជាតិ ព្រៃស្រោង និងព្រៃរបោះជាដើម។

ទី៣ តំបន់ទេសភាព
តំបន់ទេសភាព ត្រូវបែងចែកជា១៣តំបន់ផ្សេងៗគ្នា និងមានផ្ទៃដីសរុប១៥៣,៦០៤ ហិកតា រួមមាន តំបន់រមណីយដ្ឋានអង្គរ តំបន់បន្ទាយឆ្មារ តំបន់ព្រះវិហារ តំបន់អង្លង់ព្រីង តំបន់ទំនាបខាងជើងទន្លេសាប តំបន់បឹងព្រែកល្ពៅ តំបន់អាងត្រពាំងថ្ម តំបន់ប្រាសាទបាកាន “ព្រះខ័នកំពង់ស្វាយ” តំបន់រនាមដូនសំ តំបន់សំបូរព្រៃគុក តំបន់បឹងលំកុដ តំបន់ភ្នំក្រាំងដីមាស និងតំបន់បឹងយ៉ាកអោម-យ៉ាកការ៉ា។ សម្រាប់តំបន់ទេសភាពនេះ គឺសម្បូរទៅដោយប្រាង្គប្រាសាទបុរាណ សម្បត្តិបេតិកភណ្ឌវប្បធម៌ ព្រៃឈើ និងធនធានធម្មជាតិជាច្រើនទៀត។

ទី៤ តំបន់ប្រើប្រាស់ច្រើនយ៉ាង
តំបន់ប្រើប្រាស់ច្រើនយ៉ាង ត្រូវបែងចែកជា៨ តំបន់ផ្សេងៗគ្នា និងមានផ្ទៃដីសរុប៤១៥,៧៩៦ ហិកតា រួមមាន តំបន់ដងព្រែក តំបន់សំឡូត តំបន់ទន្លេសាប តំបន់ពញាក្រែក តំបន់ព្រែកទឹកសាបក្បាលឆាយ តំបន់ភ្នំនាងកង្រី-ភ្នំទូកមាស តំបន់សសរស្តម្ភសត្វតោ និងតំបន់បឹងយក្ខឡោម។

ទី៥ តំបន់រ៉ាមសារ
តំបន់រ៉ាមសារ ត្រូវបែងចែកជា៥តំបន់ និងមានផ្ទៃដីទំហំសរុប ៦០,៩៩៥ហិកតា រួមមាន តំបន់ស្ទឹងត្រែង តំបន់កោះកាពិ បឹងទន្លេឆ្មារ តំបន់ព្រែកទាល់ និងតំបន់ស្ទឹងសែន។

ទី៦ តំបន់ស្នូលនៃបឋនីយជីវមណ្ឌល

តំបន់ស្នូលនៃបឋនីយជីវមណ្ឌលនេះ ត្រូវបែងចែកជា ៣ តំបន់ផ្សេងៗគ្នា និងមានផ្ទៃសរុប៤២,២៥៧ ហិកតា រួមមាន តំបន់ព្រែកទាល់ តំបន់ស្ទឹងសែន និងតំបន់បឹងទន្លេឆ្មារ។

ទី៧ តំបន់បេតិកភណ្ឌធម្មជាតិ

តំបន់បេតិកភណ្ឌធម្មជាតិនេះត្រូវបែងចែកជា ១១ តំបន់ផ្សេងៗគ្នា និងមានផ្ទៃដីសរុប ៣៣,៩៥១ ហិកតា រួមមាន តំបន់ភ្នំត្បែង តំបន់ភ្នំយ៉ាត តំបន់ភ្នំប្រាំពីរ តំបន់ជញ្ជាំង តំបន់គិរីយង់ តំបន់ភ្នំទាក់ទ្រាំង តំបន់ភ្នំព្រះនេត្រព្រះ តំបន់ភ្នំព្រះ-ភ្នំវែង តំបន់ភ្នំយាយសំ តំបន់ភ្នំបាក់ និងតំបន់ភ្នំស្វាយ។

ទី៨ តំបន់ឧទ្យានសមុទ្រ

តំបន់ឧទ្យានសមុទ្រនេះ មានផ្ទៃដីសរុប៥២,៤៤៨ ហិកតា គឺតំបន់សមុទ្រកោះរ៉ុង។ ក្រៅពីនេះ ក៏នៅមានតំបន់អភិរក្សទឹកសាបបឹងព្រែកទប់ ដែលមានផ្ទៃដីសរុប ១,៦៣០ ហិកតា និងរបៀងអភិរក្សជីវចម្រុះដែលមានផ្ទៃដីសរុប ១៤២,៧៩៤០ ហិកតា។

ការបង្កើតឱ្យមានតំបន់ការពារទាំងអស់នេះ របស់រាជរដ្ឋាភិបាល គឺក្នុងគោលបំណងកែប្រែតំបន់នានា ឱ្យក្លាយទៅជាតំបន់បេតិកភណ្ឌធម្មជាតិភ្នំ លើកស្ទួយតម្លៃទៅលើប្រវត្តិសាស្ត្រ វប្បធម៌ ការអភិរក្ស ជីវចម្រុះ លើកស្ទួយជីវភាពប្រជាពលរដ្ឋ និងវិស័យទេសចរណ៍នៅតំបន់ទាំងនោះ។

លោកនេត្រ ភក្ត្រា បានបញ្ជាក់ទៀតថា ជាមួយកិច្ចខិតខំប្រឹងប្រែងការពារ និងអភិរក្សបានល្អ ក្រុមហ៊ុនបរទេសធំបានទិញឥណទានកាបូនពីកម្ពុជា។ ចាប់តាំងពីឆ្នាំ២០១៦មក កម្ពុជាបានលក់ឥណទានកាបូន ក្នុងទីផ្សារស្ម័គ្រចិត្តបានថវិកា១១.៦ លានដុល្លារអាមេរិក ដើម្បីយកមកពង្រឹងការងារការពារ និងអភិរក្សព្រៃឈើ និងអភិវឌ្ឍសហគមន៍មូលដ្ឋាន បង្កើតមុខរបរ និងប្រាក់ចំណូលជូនប្រជាសហគមន៍ កសាងជារបងការពាររឹងមាំ ការពារតំបន់ការពារធម្មជាតិផងដែរ៕

1...901902903...3,256 Page 902 of 3,256