មុននឹងសម្រេចចិត្តវិនិយោគក្នុងវិស័យមូលបត្រ គួរសិក្សាពីចំណុចអ្វីខ្លះ ដើម្បីជៀសវាងពីការបោកប្រាស់?

អនុលោមតាមព្រះរាជក្រមលេខ នស/រកម/១០០៧/០២៨ ចុះថ្ងៃទី ១៩ ខែតុលា ឆ្នាំ ២០០៧ ដែលប្រកាសឱ្យប្រើច្បាប់ស្តីពីការបោះផ្សាយ និងការជួញដូរមូលបត្រមហាជន និងព្រះរាជក្រមលេខនស/រកម/០១២១/០០៣ ចុះថ្ងៃទី ១៦ ខែមករា ឆ្នាំ ២០២១ ដែលប្រកាសឱ្យប្រើច្បាប់ស្ដីពីការរៀបចំ និងការប្រព្រឹត្តទៅនៃអាជ្ញាធរសេវាហិរញ្ញវត្ថុមិនមែនធនាគារបានបញ្ញតិ្តបង្កើតនិយ័តករមូលបត្រកម្ពុជា (ន.ម.ក.) ដោយផ្តល់មុខងារក្នុងការគ្រប់គ្រងត្រួតពិនិត្យ និងអភិវឌ្ឍវិស័យមូលបត្រនៅព្រះរាជាណាចក្រកម្ពុជា។

ក្នុងពេលថ្មីៗនេះ ន.ម.ក. បានពិនិត្យឃើញមានជនទុច្ចរិតមួយចំនួនបាន និងកំពុងបន្តផ្សព្វផ្សាយព័ត៌មានតាមគេហទំព័រហ្វេសប៊ុក និងបណ្តាញតេឡេក្រាមក្នុងគោលបំណងកៀរគរសាធារណជនឱ្យដាក់ប្រាក់ដើម្បីចូលជាសមាជិក ឬចូលរួមវិនិយោគនៅក្នុងគម្រោងវិនិយោគផ្សេងៗ ដោយសន្យាថា នឹងផ្តល់ប្រាក់ចំណេញខ្ពស់ ជាមួយនឹងហានិភ័យយ៉ាងទាបបំផុតទៅឱ្យអ្នកដាក់ប្រាក់ ឬអ្នកវិនិយោគ ដែលផ្ទុយស្រឡះពីទ្រឹស្តីវិនិយោគ ដែលបានកំណត់ថា «ប្រាក់ចំណេញកាន់តែច្រើន ហានិភ័យកាន់តែខ្ពស់»។

ការប្រមូលប្រាក់ពីសាធារណជន យកទៅវិនិយោគលើគម្រោងវិនិយោគណាមួយជាក់លាក់ និងច្បាស់លាស់ហើយប្រាក់ចំណេញពីគម្រោងវិនិយោគនេះបែងចែកជូនអ្នកដាក់ប្រាក់វិនិយោគវិញ គឺជាគម្រោងវិនិយោគរួមដែលជាប្រភេទមួយនៃមូលបត្រ ដោយត្រូវតែទទួលបានអាជ្ញាប័ណ្ណជាមុនពី ន.ម.ក.។ ដោយឡែកការប្រមូលប្រាក់ពីសាធារណជនដោយអះអាងថា ជាការដាក់ទុនវិនិយោគ ជាមួយនឹងការសន្យាថានឹងផ្តល់ប្រាក់ចំណេញ និង /ឬផលប្រយោជន៍មកវិញក្នុងអត្រាខ្ពស់ខុសពីធម្មតា តែមិនបានបញ្ជាក់ថា នឹងយកប្រាក់ដែលប្រមូលបានទៅវិនិយោគលើគម្រោងណាមួយច្បាស់លាស់ ឬពិតប្រាកដនោះ គឺមិនអាចត្រូវចាត់ទុកថា ជាគម្រោងវិនិយោគពិតប្រាកដនោះទេ ប៉ុន្តែនេះគឺជាសញ្ញាបង្ហាញថា ជាគម្រោងវិនិយោគបោកប្រាស់ទៅវិញ។ជាក់ស្ដែងនាពេលកន្លងមក ដូចករណី Telexfree, EBC និង Enarita សុទ្ធតែជាគម្រោងវិនិយោគឆបោកដោយបានកៀរគរឱ្យសាធារណជនដាក់ប្រាក់ចូលជាសមាជិក និង/ឬវិនិយោគ ដោយផ្តល់នូវប្រាក់ចំណេញខ្ពស់ ព្រមទាំងផ្តល់រង្វាន់សម្រាប់ការណែនាំអតិថិជនថ្មីៗបន្ថែមផងដែរ ដែលការពិតមិនមានគម្រោងវិនិយោគទេ ដោយគ្រាន់តែជាការប្រមូលប្រាក់ពីអ្នកវិនិយោគថ្មី ដើម្បីបែងចែកទៅឱ្យអ្នកវិនិយោគមុនៗ តាមការសន្យា ហើយគម្រោងនេះនឹងដួលរលំ នៅពេលដែលពុំមានអ្នកដាក់ប្រាក់ថ្មីបន្តទៀត ហើយសមាជិកដែលបានដាក់ប្រាក់នឹងក្លាយជាជនរងគ្រោះដោយប្រឈមនឹងការបាត់បង់ប្រាក់របស់ខ្លួនទាំងស្រុងតែម្តង។

ដូចនេះ ក្នុងទិសដៅការពារទ្រព្យសម្បត្តិ និងផលប្រយោជន៍សាធារណជន ជាពិសេសដើម្បីជៀសពីការបោកប្រាស់របស់ជនខិលខូចក្រោម រូបភាពផ្សេងៗ ដែលធ្វើឱ្យប៉ះពាល់ដល់ទំនុកចិត្តរបស់សាធារណជនលើអាជីវកម្មគម្រោងវិនិយោគរួម ន.ម.ក. បានអនុម័តដាក់ឱ្យប្រើប្រាស់ប្រកាសស្តីពី ការបោះផ្សាយលក់ឯកតាមូលនិធិនៃគម្រោងវិនិយោគរួម។

ដើម្បីការពារខ្លួនពីគម្រោងខុសច្បាប់មុននឹងសម្រេចចិត្តវិនិយោគក្នុងគម្រោងណាមួយ សូមពិនិត្យ និងស្វែងយល់ពីចំណុចសំខាន់ៗ ដូចខាងក្រោម៖
១. សិក្សាស្វែងយល់អំពីប្រវត្តិរបស់ក្រុមហ៊ុន ឬបុគ្គលទាំងនេះឱ្យលម្អិតជាមុន ដូចជាផែនការអាជីវកម្ម ឬផែនការវិនិយោគ។
២. ព្យាយាមសាកសួរព័ត៌មានលម្អិតអំពីក្រុមហ៊ុន (គម្រោងអាជីវកម្ម, គម្រោងការវិនិយោគ)។
៣. ស្វែងរកក្រុមហ៊ុនដែលទទួលបានអាជ្ញាប័ណ្ណ ការអនុញ្ញាត និង/ឬការទទួលស្គាល់ពី ន.ម.ក. តាមរយៈគេហទំព័រ https://www.serc.gov.kh/khmer/index.php។
៤. តាមដានតេឡេក្រាម និងហ្វេសប៊ុក ផ្លូវការរបស់ ន.ម.ក. ដែល ន.ម.ក. បង្កើតបន្ថែមលើយន្តការដែលមានស្រាប់ សម្រាប់ផ្សព្វផ្សាយ និងជូនដំណឹងដល់សាធារណជន អំពីហានិភ័យនៃការវិនិយោគ ឬគម្រោងខុសច្បាប់។
៥. ចូលរួមសិក្ខាសាលា ឬវគ្គបណ្តុះបណ្តាលនានាដែលរៀបចំដោយ ន.ម.ក. ដើម្បីស្វែងយល់ និងបង្កើនចំណេះដឹងបន្ថែមពាក់ព័ន្ធនឹងវិស័យមូលបត្រ។
|ន.ម.ក. សូមប្រកាសថ្កោលទោសបុគ្គលទាំងឡាយណាដែលមានចេតនាទុច្ចរិតប្រមូលប្រាក់ពីសាធារណជនដោយខុសច្បាប់។ ជាមួយគ្នានេះ ន.ម.ក. បាននិងកំពុងសហការជាមួយអាជ្ញាធរពាក់ព័ន្ធ ដើម្បីចាត់វិធានការតាមច្បាប់ជាធរមានចំពោះអង្គការ សមាគម ក្រុមហ៊ុន និងបុគ្គលដែលល្មើសច្បាប់ទាំងនោះ។
ករណីសាធារណជនបានទទួលដំណឹងពីករណីទាំងនេះ សូមផ្តល់កិច្ចសហការ និងផ្តល់ព័ត៌មានមក ន.ម.ក.តាមរយៈសារអេឡិចត្រូនិក [email protected]/ [email protected] ឬនៅទីស្តីការ ន.ម.ក.ដែលមានទីតាំងនៅអគារអាជ្ញាធរសេវាហិរញ្ញវត្ថុមិនមែនធនាគារ៕

រៀបចំដោយ៖ និយ័តករមូលបត្រកម្ពុជា
នាយកដ្ឋានកិច្ចការគតិយុត្ត
Email: [email protected]
Telephone: 023 885 611

ព្រលានយន្តហោះសៀមរាបអង្គរពន្យាពេលបើកសម្ភោធជាផ្លូវការ

ដោយៈ គង់ សូរិយា

ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា រួមជាមួយថ្នាក់ដឹកនាំចិន នឹងបើកសម្ពោធជាផ្លូវការអាកាសយានដ្ឋានអន្តរជាតិសៀមរាប-អង្គរ នៅថ្ងៃទី១ ខែធ្នូខាងមុខ។

ការបើកដំណើរការព្រលានយន្តហោះនេះ ជាការបើកទំព័រប្រវត្តិសាស្ត្រថ្មីមួយទៀត នៃវិស័យអាកាសចរណ៍កម្ពុជា ក្នុងការទទួលស្វាគមន៍ការហោះហើររយៈចម្ងាយឆ្ងាយ មកកាន់ទឹកដីនៃប្រាសាទអង្គរ។

លោកស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ឲ្យដឹងថា មុននឹងដាក់ឱ្យដំណើរការផ្លូវការ គឺនៅថ្ងៃទី៥ ខែតុលា ខាងមុខក្រុមហ៊ុន AIAI នឹងធ្វើតេស្តការហោះបង្ហាញជាចុងក្រោយ (Airport Fight Demonstration) នៅអាកាសយានដ្ឋានអន្តរជាតិសៀមរាបអង្គរ ដើម្បីបញ្ជាក់ពីសមត្ថភាព ក្នុងការគ្រប់គ្រងការប្រតិបត្តិការអាកាសយានដ្ឋានសៀមរាបអង្គរទាំងមូល មុននឹងបើកទទួលជើងហោះហើរលើកទី១ នៅថ្ងៃទី១៦ ខែតុលា និងត្រៀមដាក់ឱ្យដំណើរការជាផ្លូវការនៅថ្ងៃទី១ ខែធ្នូ ឆ្នាំ២០២៣ ខាងមុខ។លោកបន្តថា អាកាសយានដ្ឋានអន្តរជាតិសៀមរាប អង្គរ នឹងដាក់ឱ្យដំណើរការ លើកដំបូងក្រោមអធិបតីភាព លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ជាមួយតំណាងក្រុមហ៊ុនអង្គរ អ៊ិនធើណេសិនណល អ៊ែរផត អិនវេសម៉ិន ខេមបូឌា ឯ.ក (AIAI) និងស្ថាប័នពាក់ព័ន្ធ ក្នុងដំណើរការទទួលជើងហោះហើរពាណិជ្ជកម្មទី១ ជាផ្លូវការ នៅអាកាសយានដ្ឋានអន្តរជាតិសៀមរាបអង្គរ នៅថ្ងៃទី ១៦ ខែតុលា ឆ្នាំ ២០២៣។

លោកថ្លែងថា ការធ្វើតេស្តហោះបង្ហាញចុងក្រោយបំផុត ដើម្បីបញ្ជាក់ពីដំណើររលូននៃប្រតិបត្តិការ និងការគ្រប់គ្រងទាំងមូលនៅក្នុងអាកាសយានដ្ឋានសៀមរាបអង្គរ ដោយថ្ងៃនោះនឹងមានអ្នកដំណើរមក (Check-In) ដើម្បីឡើងយន្តហោះ និងធ្វើដំណើរត្រឡប់មកវិញដោយឆ្លងនីតិវិធីផ្សេងៗ។ ព្រមទាំងតេស្តឧបករណ៍ ដើម្បីឱ្យប្រាកដថា រាល់ការធ្វើដំណើរមានសុវត្ថិភាព។លោកស៊ិន ចាន់សិរីវុត្ថាបានបន្តថា ដូច្នេះនៅថ្ងៃទី ១ ខែធ្នូ ឆ្នាំ ២០២៣ អាកាសយានដ្ឋានអន្តរជាតិសៀមរាប-អង្គរ នឹងដាក់សម្ពោធជាផ្លូវការក្រោមអធិបតីភាព សម្តេចនាយករដ្ឋមន្ដ្រី ហ៊ុន ម៉ាណែត ជាមួយថ្នាក់ដឹកនាំប្រទេសចិន។

ប្រធានសមាគមភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន ដែលបានទៅទស្សនាអាកាសយានដ្ឋាននេះ កាលពីខែកក្កដាបានសម្តែងក្តីសង្ឃឹមខ្ពស់ ចំពោះភាពវិជ្ជមានរបស់អាកាសយានដ្ឋាននេះមកលើវិស័យទេសចរណ៍កម្ពុជា។ លោកស្រីបញ្ជាក់ថា “យើងមានហេដ្ឋារចនាសម្ព័ន្ធរឹងមាំ។ ភារកិច្ចនៅក្នុងដៃ គឺការលើកកម្ពស់គុណភាពសេវាកម្ម និងពង្រីកតំបន់ទេសចរណ៍”។ អាកាសយានដ្ឋានអន្តរជាតិសៀមរាបអង្គរ បានចាប់ផ្តើមសាងសង់កាលពីខែមីនា ឆ្នាំ ២០២០ ដោយក្រុមហ៊ុន AIAI ក្រោមទុនវិនិយោគ១១០០លានដុល្លារ។ អាកាសយានដ្ឋាននេះ អាចទទួលអ្នកដំណើរតាមផ្លូវអាកាសបាន៧ លាននាក់ ក្នុង ១ ឆ្នាំ (ឆ្នាំ២០២៣) និងឈានដល់១២លាននាក់ ក្នុង១ឆ្នាំ ចាប់ពីឆ្នាំ ២០៤០។

ព្រលានយន្តហោះនេះ ដំបូងឡើយគ្រោងបើកសម្ភោធឲ្យដំណើរការនៅថ្ងៃទី១៦ តុលាខាងមុខនេះ ប៉ុន្តែការពន្យាពេលនេះទំនងជាការរង់ចាំដំណើរទស្សនកិច្ចណាមួយ របស់មេដឹកនាំចិននាពេលខាងមុខ៕

ប្រទេសចិនបើកដំណើរការខ្សែរថភ្លើងឆ្លងសមុទ្រល្បឿនលឿនបំផុតដំបូងគេ នៅជិតច្រកសមុទ្រតៃវ៉ាន់

ដោយ: គង់ លាងហួរ

ប៉េកាំង: កាលពីថ្ងៃព្រហស្បតិ៍ ប្រទេសចិនបានបើកដំណើរការផ្លូវរថភ្លើងឆ្លងកាត់សមុទ្រល្បឿនលឿនបំផុត ដោយធ្វើដំណើរតាមបណ្តោយឆ្នេរសមុទ្រនៃខេត្ត Fujian ភាគអាគ្នេយ៍ ក្បែរច្រកសមុទ្រតៃវ៉ាន់។

រថភ្លើងល្បឿនលឿន Fuxing បានចាកចេញពីទីក្រុង Fuzhou នៃខេត្ត Fujian នៅម៉ោង៩:១៥ព្រឹក ដែលជាការប្រារព្ធពិធីបើកផ្លូវរថភ្លើងល្បឿនលឿនFuzhou-Xiamen-Zhangzhou ប្រវែង២៧៧គីឡូម៉ែត្រ ដែលមានល្បឿនអតិបរមា៣៥០គីឡូម៉ែត្រក្នុងមួយម៉ោង។

ប្រព័ន្ធផ្សព្វផ្សាយរដ្ឋចិន បានរាយការណ៍ដោយដកស្រង់សម្តីក្រុមហ៊ុន China State Railway Group ដែលជាប្រតិបត្តិករផ្លូវដែករបស់ប្រទេសចិនថា “វាគឺជាផ្លូវឆ្លងកាត់សមុទ្រដំបូងគេ របស់ប្រទេសចិន តាមរយៈរថភ្លើងល្បឿនលឿន ដែលនឹងធ្វើដំណើរលើស្ពានឆ្លងកាត់ឆកសមុទ្រចំនួន៣ខ្សែ និងមានល្បឿនអតិបរមា៣៥០គីឡូម៉ែត្រក្នុងមួយម៉ោង”។លោក Li Pingzhuo អ្នកគ្រប់គ្រងគម្រោងផ្លូវដែក នៃក្រុមហ៊ុន China Railway Siyuan Survey and Design Group Co., Ltd. បានលើកឡើងថា ការសាងសង់ស្ពានឆ្លងកាត់ឆកសមុទ្រទាំង៣នេះ បានយកឈ្នះ លើបញ្ហាប្រឈមនានា ដែលបង្កឡើងដោយខ្យល់បក់ខ្លាំង រលកខ្ពស់ ទឹកជ្រៅ និងធម្មជាតិនៃបរិស្ថានសមុទ្រ។

លោក Li បានបន្ថែមថា ផ្លូវរថភ្លើងត្រូវបានពង្រឹងទប់ទល់ នឹងការរញ្ជួយដី នៅពេលដែលវាឆ្លងកាត់តំបន់ ដែលមានហានិភ័យនៃការរញ្ជួយដីខ្ពស់។ជាមួយគ្នានេះ ពេលវេលាធ្វើដំណើររវាងទីក្រុង Fuzhou និងទីក្រុង Xiamen ដែលជាមជ្ឈមណ្ឌលសេដ្ឋកិច្ច និងជាតំបន់ទេសចរណ៍ដ៏ពេញនិយម នឹងត្រូវកាត់បន្ថយមកនៅតិចជាងមួយម៉ោង។

យោងតាមសារាចរ ដែលចេញផ្សាយដោយគណៈកម្មាធិការមជ្ឈិមបក្សកុម្មុយនិស្តចិន និងក្រុមប្រឹក្សារដ្ឋនៅដើមខែនេះ បានកំណ ត់តំបន់ Fujian ជាតំបន់សម្រាប់ការអភិវឌ្ឍ សមាហរណកម្មឆ្លងច្រកសមុទ្រ ក្នុងគោលបំណងជួយសម្រួលដល់ការតភ្ជាប់ និងសមាហរណកម្មឱ្យកាន់តែប្រសើរឡើងរវាងខេត្ត Fujian និងកោះតៃវ៉ាន់៕

កម្ពុជា និងថៃប្តេជ្ញាបង្កើនទំហំពាណិជ្ជកម្មទ្វេរភាគីឱ្យកើនដល់១៥ពាន់លានដុល្លារអាមេរិកនៅឆ្នាំ២០២៥

ដោយ: គង់ លាងហួរ

ភ្នំពេញ: កម្ពុជា និងប្រទេសថៃ គ្រោងនឹងជំរុញទំហំពាណិជ្ជកម្មទ្វេរភាគីឱ្យកើន ដល់ទឹកប្រាក់១៥ពាន់លានដុល្លារអាមេរិក (៥៥០ពាន់លានបាត) ក្នុងមួយឆ្នាំនៅឆ្នាំ២០២៥ខាងមុខ។

ការប្តេជ្ញាចិត្តនេះបានធ្វើឡើង ក្នុងអំឡុងដំណើរបំពេញទស្សនកិច្ចផ្លូវការរយៈពេលមួយថ្ងៃ របស់នាយករដ្ឋមន្ត្រីថៃលោក សេដ្ឋា ថាវីស៊ីន មកកាន់កម្ពុជាកាលពីថ្ងៃព្រហស្បតិ៍ ទី២៨ ខែកញ្ញា។ក្នុងជំនួបនោះ ភាគីទាំងពីរបានព្រមព្រៀងគ្នា ក្នុងការបង្កើនទំហំពាណិជ្ជកម្មទ្វេរភាគី ឲ្យដល់១៥ពាន់លានដុល្លារ ក្នុងរយៈពេល២ឆ្នាំខាងមុខ ព្រមទាំងធ្វើឱ្យប្រសើរឡើង នូវប៉ុស្តិ៍ត្រួតពិនិត្យនៅតាមច្រកព្រំដែន និងការតភ្ជាប់ផ្លូវដែកសម្រាប់រថភ្លើងដឹកទំនិញ។ទំហំពាណិជ្ជកម្មទ្វេរភាគីរវាងកម្ពុជា និងថៃសម្រេចបានទឹកប្រាក់៤,៦៧ពាន់លានដុល្លារក្នុងឆ្នាំ២០២២ ដែលបានកើនឡើងជារៀងរាល់ឆ្នាំគិតចាប់តាំងពីឆ្នាំ២០១៥មក។

យោងតាមសេចក្តីថ្លែងការណ៍ របស់ក្រសួងការបរទេស និងសហប្រតិបត្តិការអន្តរជាតិកម្ពុជាបានឱ្យដឹងថា ថ្នាក់ដឹកនាំទាំង២បានជួបប្រជុំទ្វេរភាគី ក្នុងគោលបំណងពង្រឹងទិសដៅ សកម្មភាពឱ្យកាន់តែស៊ីជម្រៅបន្ថែមទៀត និងពង្រីកកិច្ចសហប្រតិបត្តិការលើគ្រប់ វិស័យ ដែលមានផលប្រយោជន៍ទៅវិញទៅមក ក្នុងក្របខ័ណ្ឌទ្វេរភាគី និងពហុភាគី។

ក្រសួងការបរទេសរបស់កម្ពុជាអះអាងថា “ដំណើរទស្សនកិច្ចរបស់លោក សេដ្ឋា ថាវីស៊ីន មកកាន់កម្ពុជានឹងពង្រឹងបន្ថែមទៀតនូវចំណងមិត្តភាពជាប្រពៃណី និងលើកកម្ពស់កិច្ចសហប្រតិបត្តិការពហុភាគីរវាងប្រជាជាតិទាំងពីរ”។

ក្រសួងបានបន្ថែមថា ដំណើរទស្សនកិច្ចនេះ ត្រូវបានគេរំពឹងថា នឹងផ្តល់ផលប្រយោជន៍ទៅវិញទៅមក ដល់ប្រជាជននៃប្រទេសទាំងពីរ និងរួមចំណែកដល់ការលើកកម្ពស់សន្តិភាព ស្ថិរភាព និងវិបុលភាពក្នុងសហគមន៍អាស៊ាន និងអន្តរជាតិ”។

បន្ថែមពីនេះ ថ្នាក់ដឹកនាំទាំងពីរបានធ្វើការប្រគល់ និងទទួលនូវ “មជ្ឈមណ្ឌលសំចត និងស្តារនីតិសម្បទា សម្រាប់ជនរងគ្រោះដោយអំពើជួញដូរមនុស្ស និងក្រុមជនងាយរងគ្រោះដទៃទៀត” ដែលមានទីតាំងស្ថិតនៅក្រុងប៉ោយប៉ែត និងជាគំនិតផ្តួចផ្តើមនៃកិច្ចសហប្រតិបត្តិការទ្វេរភាគី៕

ផ្លូវរូងក្រោមដីដ៏អាថ៍កំបាំងអំឡុងសង្គ្រាមលោកលើកទី២ គ្រោងប្រែក្លាយជាតំបន់ទេសចរណ៍

ដោយៈ តែម សុខុម

ក្រុងឡុងដ៍: ផ្លូវរូងក្រោមដីដ៏អាថ៍កំបាំង សម្រាប់ជ្រកការពារខ្លួនពីការទម្លាក់គ្រាប់បែក អំឡុងសង្គ្រាមលោកលើកទី២ នឹងត្រូវប្រែក្លាយទៅជាតំបន់ទេសចរណ៍ក្រោមដី ដ៏អស្ចារ្យបំផុតប្រចាំទីក្រុងឡុងដ៍ ប្រទេសអង់គ្លេស។

យោងតាមសារព័ត៌មាន CNN ចុះផ្សាយកាលពីថ្ងៃអង្គារ ទី២៦ ខែកញ្ញា ឱ្យដឹងថា ផ្លូវរូងក្រោមដី Kingsway Exchange Tunnels ដែលមានផ្ទៃលាតសន្ធឹង៨.០០០ម៉ែត្រការ៉េ នឹងត្រូវប្រែក្លាយទៅជាតំបន់ទេសចរណ៍ក្រោមដី ដ៏អស្ចារ្យជាមួយនឹងទុនវិនិយោគចំនួន២៦៨លានដុល្លារ ដើម្បីផ្ដល់បទពិសោធន៍ពិសេសគ្មានពីរ ដល់ភ្ញៀវទេសចរ។
កាលពីមុនផ្លូវរូងក្រោមដីដ៏កំបាំង ដែលក្រុមចារកម្មធ្លាប់ប្រើប្រាស់នេះ ត្រូវបានការពារយ៉ាងពិសេស ដោយច្បាប់រក្សាការសម្ងាត់ (Official Secrets Act) នៃប្រទេសអង់គ្លេស។

ប៉ុន្តែពេលនេះ វានឹងត្រូវបានឌីហ្សាញ និងដេគ័រឡើងវិញដោយក្រុមការងារមួយ រួមមាន ទាំងក្រុមស្ថាបត្យករ ដែលស្ថិតនៅពីក្រោយគម្រោងឧទ្យានធម្មជាតិលើផ្ទៃដី១០១ហិកតា Gardens by the Bay ក្នុងប្រទេសសិង្ហបុរី និងគម្រោងស្ថានីយថាមពល Battersea Power Station នៅទីក្រុងឡុងដ៍ ប្រទេសអង់គ្លេសផងដែរ ប្រសិនប្លង់មេរបស់ក្រុមនេះ ត្រូវបានអនុម័តនៅរដូវស្លឹកឈើជ្រុះនេះ។ផ្លូវរូងក្រោមដីអាថ៍កំបាំង ដែលស្ថិតក្នុងជម្រៅប្រមាណ៤០ម៉ែត្រពីក្រោមស្ថានីយក្រោមដី Chancery Lane Tube Station ក្នុងតំបន់ High Holborn នេះត្រូវបានសាងសង់ឡើង ក្នុងទសវត្សរ៍ឆ្នាំ១៩៤០ ដើម្បីការពារប្រជាជនក្នុងទីក្រុងឡុងដ៍ ពីយុទ្ធនាការទម្លាក់គ្រាប់បែក Blitz អំឡុងសង្គ្រាមលោកលើកទី២៕ CNN៕

ក្រុមហ៊ុនOCICចំណាយទុន៨៥លានដុល្លារសាងសង់មជ្ឈមណ្ឌលពាណិជ្ជកម្មលើកដំបូងនៅទីក្រុងកោះនរា

ដោយៈ គង់ សូរិយា

ភ្នំពេញៈ ក្រុមហ៊ុនOCIC ដែលបាននិងកំពុងអភិវឌ្ឍន៍ទីក្រុងកោះនរាបាន និងកំពុងត្រៀមបង្ហាញមជ្ឈមណ្ឌពាណិជ្ជកម្ម ជាលើកដំបូងរបស់ខ្លួន។

គម្រោងដែលបាននិងកំពុងសាងសង់នេះ ត្រូវបានដាក់ឈ្មោះNorea Square ជាគំរោងស្ថិតនៅលើផ្លូវធំរបស់ទីក្រុងនេះ ជាមួយទំហំផ្ទៃដីសរុបជាង២ហិកតា និងមានផ្ទះសរុបចំនួនប្រមាណ១០០ផ្ទះ ក្នុងនោះផ្ទះអាជីវកម្មបែរលើផ្លូវមេ ក្នុងកោះនរាមានចំនួន១០ល្វែង និងផ្ទះអាជីវកម្មបែរលើផ្លូវទំហំ១០ម៉ែត្រ ចំនួនប្រមាណ៨០ល្វែង។យោងតាមព័ត៌មាន ដែលបញ្ចេញឲ្យដឹងពីផ្នែកទីផ្សាររបស់ក្រុមហ៊ុនOCIC បានឲ្យដឹងថា គំរោងNorea Square គ្រោងចំណាយ ទឹកប្រាក់សរុបប្រហែល៨៥លានដុល្លារអាមេរិក។អ្នកអភិវឌ្ឍន៍ទីក្រុងកោះនរា ទំហំ១២៥ហិកតា បាននិងកំពុងសម្លឹងទៅអនាគត ជាមួយទស្សនវិស័យសុទិដ្ឋិនិយមពីការដឹកននាំរបស់រដ្ឋាភិបាល និងការរីកចម្រើនសេដ្ឋកិច្ចរបស់ប្រទេសនេះ។

លោកThierry Tea អគ្គនាយករងក្រុមហ៊ុនOCICបានមានប្រសាសន៍ឲ្យដឹងកាលពីពេលថ្មីៗនេះថា “កោះនរា ស្ថិតនៅស្របទន្លេមេគង្គ ខណៈដែលគម្រោងហេដ្ឋារចនាសម្ព័ន្ធ បានសម្រេចបានជាង៥០% ហើយវាកំពុងអភិវឌ្ឍបន្តទៅមុខយ៉ាងល្អប្រសើរ”។ លោកបន្តថា “លើសពីនេះ នៅឆ្នាំ២០២៤ខាងមុខឆាប់ៗនេះ នឹងមានប្រជាជនមួយចំនួនធ្វើដំណើរទៅកោះនរា”។លោកបន្តថា បច្ចុប្បន្ននេះ យើងមានអ្នកវិនិយោគមួយចំនួន រួមទាំងវិនិយោគិនអន្តរជាតិផងដែរ ដែលមានគម្រោងមួយចំនួននៅលើកោះនរា។ ពួកយើងមានក្រុមហ៊ុនអភិវឌ្ឍសិង្ហបុរី ដែលកំពុងសាង់សង់គម្រោងលំនៅដ្ឋាន ដូចជា បុរីប្រណីតៗ(High-end)ជាដើម ហើយនៅពេលអនាគតខាងមុខ កោះនរានឹងមានអគារខ្ពស់ៗមួយចំនួន។ លោកបានឱ្យដឹងទៀតថា អ្នកឧកញ៉ា ពុង ឃាវសែ ប្រធានក្រុមហ៊ុនOCIC មានចក្ខុវិស័យនៃការអភិវឌ្ឍន៍OCIC ដើម្បីអាចគាំទ្រដល់កំណើនសេដ្ឋកិច្ចកម្ពុជា។ សហគ្រិនអាចជំរុញឱ្យមានការអភិវឌ្ឍនៃសេដ្ឋកិច្ច ខណៈរដ្ឋាភិបាលកម្ពុជា បានធ្វើការយ៉ាងល្អ ក្នុងការរក្សាបាននូវសន្តិភាព សុវត្ថិភាពនិងសន្តិសុខ៕

IMFថា សេដ្ឋកិច្ចរបស់ប្រទេសចិនចាប់ផ្តើមមានស្ថិរភាព ឡើងវិញហើយ

ដោយៈ តែម សុខុម

វ៉ាស៊ីនតោន: មូលនិធិរូបិយវត្ថុអន្តរជាតិ (IMF) បានលើកឡើងកាលពីថ្ងៃព្រហស្បតិ៍ ទី២៨ ខែកញ្ញា ថា ពេលនេះខ្លួនកំពុងឃើញសញ្ញាមួយចំនួនបង្ហាញថា សេដ្ឋកិច្ចរបស់ប្រទេសចិន មានស្ថិរភាពឡើងវិញហើយ បើយោងតាមទិន្នន័យកាលពីពេលថ្មីៗនេះ។

មូលនិធិ IMF ជឿជាក់ថា សេដ្ឋកិច្ចរបស់ប្រទេសចិន អាចរីកចម្រើនក្នុងល្បឿនលឿនជាងនេះ ក្នុងរយៈពេលមធ្យម ប្រសិនបើប្រទេសនេះ ចាត់វិធានការធ្វើកំណែទម្រង់សេដ្ឋកិច្ចរបស់ខ្លួន ដើម្បីរក្សាតុល្យភាពកំណើនឡើងវិញ ពីការវិនិយោគឆ្ពោះទៅរកការចំណាយរបស់អ្នកប្រើប្រាស់។

លោកស្រី Julie Kozack អ្នកនាំពាក្យមូលនិធិ IMF បានថ្លែងទៅកាន់សន្និសីទសារព័ត៌មានថា មូលនិធិ IMF នៅតែបន្តជឿជាក់ថា ប្រទេសចិន អាចសម្រេចបាននូវកំណើន ប្រមាណ៥%ក្នុងឆ្នាំនេះ។

មូលនិធិ IMF នឹងធ្វើការព្យាករលម្អិត នៅពេលខ្លួនចេញផ្សាយទស្សនវិស័យសេដ្ឋកិច្ចពិភពលោក (World Economic Outlook) របស់ខ្លួនអំឡុងកិច្ចប្រជុំប្រចាំឆ្នាំ រវាងមូលនិធិ IMF និងធនាគារពិភពលោក (World Bank) នៅទីក្រុង Marrakech ប្រទេសម៉ារ៉ុក នៅថ្ងៃទី១០ ខែតុលា។

លោកស្រីបន្ថែមថា មូលនិធិ IMF មើលឃើញថា កំណើនផលទុនជាតិសរុប (GDP) របស់ប្រទេសចិន បានធ្លាក់ចុះមកនៅត្រឹមប្រមាណ៣,៥%ក្នុងរយៈពេលមធ្យម ប៉ុន្តែតួលេខកំណើននេះអាចនឹងកើនឡើងបន្ថែមទៀត បើមានការធ្វើកំណែទម្រង់សេដ្ឋកិច្ច ដែលមានប្រសិទ្ធភាព៕ Reuters៕

Japan starts building new tallest skyscraper in Tokyo

The construction of the Torch Tower, Japan’s new tallest skyscraper in central Tokyo, kicked off on Wednesday, according to the property developer.

Located across the street from Tokyo Station, the structure, which will soar to approximately 390 meters upon expected completion in the fiscal year 2027, is set to be Japan’s tallest by surpassing its urban neighbor, the 330-meter Azabudai Hills Mori JP Tower.

The Torch Tower, 62 storeys above ground in front of the Nihonbashi exit of Tokyo Station, will feature commercial facilities, offices, rental residences, and a luxury hotel, according to the developer Mitsubishi Estate, which held a groundbreaking ceremony on Wednesday. Source:Xinhua

ទីក្រុងហុងកុងកំពុងផ្តល់អាទិភាពដល់ទំនាក់ទំនងកាន់តែស៊ីជម្រៅជាមួយតំបន់ចំនួន២ និងពង្រឹងឋានៈរបស់ខ្លួនជាច្រកទ្វារចូលទៅកាន់ប្រទេសចិន

ដោយ: គង់ លាងហួរ
អន្តរជាតិ: អ្នកវិភាគលើកឡើងថា កិច្ចប្រជុំកំពូលមួយ ត្រូវបានរៀបចំឡើងដោយផ្ទាល់ជាលើកដំបូងនៅហុងកុង ចាប់តាំងពីផ្ទុះជំងឺកូវីដ-១៩ ហើយព្រឹត្តិការណ៍នេះជាឱកាសពង្រីកខ្លួនជាសកល ស្របពេលដែលគំនិតផ្តួចផ្តើមខ្សែក្រវ៉ាត់ និងផ្លូវ (BRI) ឈានដល់គម្រប់ខួប១០ឆ្នាំ។

កិច្ចប្រជុំកំពូលនេះបានទាក់ទាញអ្នកចូលរួមអន្តរជាតិប្រហែល៦.០០០នាក់ និងកំណត់ដំណាក់កាលសម្រាប់កិច្ចព្រមព្រៀងចំនួន២០ ដែលត្រូវបានចុះហត្ថលេខា។ កិច្ចប្រជុំ និងកិច្ចព្រមព្រៀងទាំងនេះ គឺជាអ្វីដែលលោក John Lee នាយកប្រតិបត្តិរបស់ទីក្រុងហុងកុងបានហៅថាជា“តួលេខបំបែកឯតទគ្គកម្ម និងជាសញ្ញាបង្ហាញឱ្យឃើញថាទីក្រុងហុងកុងបានត្រឡប់ទៅលើឆាកពិភពលោកវិញហើយ”។

លោក Ding Xuexiang ឧបនាយករដ្ឋមន្ត្រីចិន បានមានប្រសាសន៍កាលពីពេលថ្មីៗកន្លងទៅថា “យើងគាំទ្រទីក្រុងហុងកុងក្នុងការរក្សាឱ្យបាននូវគុណសម្បត្តិពិសេសរបស់ខ្លួនក្នុងរយៈពេលវែង”។លោក Ding បន្តថា“ទីក្រុងហុងកុងអាចរក្សាបាននូវបរិយាកាសសេរី បើកចំហ និងមានរបៀបរៀបរយ រក្សាប្រព័ន្ធច្បាប់រួម ពង្រីកការតភ្ជាប់ប្រកបដោយភាពរលូន និងងាយស្រួល ព្រមទាំងដើរតួនាទីកាន់តែសំខាន់ក្នុងគំនិតផ្តួចផ្តើមខ្សែក្រវ៉ាត់ និងផ្លូវរបស់ចិន”។ជាមួយគ្នានេះ ទីក្រុងហុងកុងកំពុងពង្រឹងតួនាទីរបស់ខ្លួន តាមរយៈការចូលជាដៃគូក្នុងកិច្ចព្រមព្រៀង RCEP ក្នុងតំបន់ ដែលមានប្រទេសសមាជិកអាស៊ានចំនួន១០ បូករួមនឹងប្រទេសអូស្ត្រាលី ចិន ជប៉ុន កូរ៉េខាងត្បូង និងនូវែលសេឡង់។

ទីក្រុងហុងកុងកំពុងផ្តល់អាទិភាពដល់ទំនាក់ទំនងកាន់តែស៊ីជម្រៅជាមួយតំបន់អាស៊ាន ក៏ដូចជាតំបន់មជ្ឈិមបូព៌ា ខណៈលោក Jonh Lee នាយកប្រតិបត្តិរបស់ទីក្រុងហុងកុង ធ្លាប់បានអញ្ជើញទៅធ្វើទស្សនកិច្ចនៅតំបន់ចំនួន២នេះ កាលពីដើមឆ្នាំ២០២៣កនកន្លងទៅ។លើសពីការកសាងភាពជាដៃគូ និងមិត្តភាព គណៈប្រតិភូហុងកុងក៏បានចុះហត្ថលេខាលើអនុស្សរណៈនៃការយោគយល់គ្នាចំនួន៥០ និងលិខិតសម្តែងបំណងក្នុងអំឡុងពេលនៃដំណើរទស្សនកិច្ចទាំងអស់នេះផងដែរ។

លោក Lee បានលើកឡើងកាលពីពេលកន្លងទៅថា “នោះគូសបញ្ជាក់អំពីសក្តានុពលដែលគ្មានដែនកំណត់នៃតំបន់ និងប្រទេសរបស់ពួកគេ និងបំណងប្រាថ្នាដ៏រឹងមាំទៅវិញទៅមករបស់យើងសម្រាប់កំណើន និងវិបុលភាព” ។

ការខិតខំយកចិត្តទុកដាក់របស់ទីក្រុងហុងកុងចំពោះអាស៊ាន និងមជ្ឈិមបូព៌ាបង្ហាញឱ្យឃើញពីយុទ្ធសាស្ត្រ ដើម្បីកាត់បន្ថយការពឹងផ្អែករបស់ហុងកុងទៅលើបណ្តាប្រទេសលោកខាងលិច ស្របពេលមានភាពតានតឹងរវាងសហរដ្ឋអាមេរិក និងចិន៕

អគារកប់ពពកខ្ពស់ជាងគេបំផុតTorch Tower នៅក្នុងទីក្រុងតូក្យូបានចាប់ផ្តើមសាងសង់ហើយ

ដោយ: គង់ លាងហួរ

តូក្យូ: យោងតាមក្រុមហ៊ុនអភិវឌ្ឍន៍គម្រោងបានឱ្យដឹងថា ការសាងសង់អគារTorch Tower ដែលជាអគារខ្ពស់កប់ពពកថ្មីបំផុតរបស់ប្រទេសជប៉ុន នៅកណ្តាលទីក្រុងតូក្យូ បានចាប់ផ្តើមហើយកាលពីថ្ងៃពុធម្សិលមិញនេះ។

ក្រុមហ៊ុនអចលនទ្រព្យខ្នាតយក្ស របស់ប្រទេសជប៉ុន Mitsubishi Estate គឺជាអ្នកអភិវឌ្ឍគម្រោងសាងសង់អគារ Torch Tower ដែលមានកម្ពស់៣៩០ម៉ែត្រនេះ ដែលមានទីតាំងស្ថិតនៅក្បែរនឹងស្ថានីយរថភ្លើង Tokyo Station ដោយអគារនេះគ្រោងនឹងបើកសម្ពោធដំណើរការនៅឆ្នាំ២០២៧ខាងមុខ ហើយវានឹងក្លាយទៅជាអគារខ្ពស់ជាងគេបំផុតនៅទីក្រុងតូក្យូផងដែរ។គម្រោងសាងសង់អគារTorch Tower ដែលមានកម្ពស់៦៣ជាន់នេះ ត្រូវបានផ្ដោតសំខាន់ទៅលើការិយាល័យ ប៉ុន្តែក៏រួមមានដូចជាហាងទំនិញ ភោជនីយដ្ឋាន និងមានសាលធំ២.០០០កៅអីផងដែរ នៅជាន់ខាងក្រោម។

ចំណែក ជាន់ខាងលើនឹងត្រូវរៀបចំជា កន្លែងកម្សាន្តចម្រុះ ដែ លរួមបញ្ចូលនូវផ្លាហ្សា និងកន្លែងមើលទិដ្ឋភាពនៃទីក្រុង និងតំបន់ផ្សេងៗទៀតនៅក្បែរភ្នំ Mount Fuji។ ដោយឡែកនៅជាន់កំពូល នឹងរៀបចំទៅជាសណ្ឋាគារ ដែលមានជាង១០០បន្ទប់ រៀបចំចេញរចនាបថអគារបែបអណ្តាតភ្លើង ដែលគេហៅថា Sky Hill នៅពីលើលំហ។

អគារ Torch Tower នឹងមានកម្ពស់ខ្ពស់ជាងអគារ Abeno Harukas នៅទីក្រុងអូសាកា ដែលមានកម្ពស់៣០០ ម៉ែត្រ និងខ្ពស់ជាងអគារ Azabudai Hills Mori JP Tower នៅទីក្រុងតូក្យូ ដែលមានកម្ពស់៣៣០ម៉ែត្រ ដែលមានន័យថា អគារ Torch Tower នឹងក្លាយជាអគារខ្ពស់ជាងគេបំផុត នៅទីក្រុងតូក្យូ បន្ទាប់ពីសាងសង់រួចរាល់នៅឆ្នាំ២០២៧។

យោងតាមក្រុមហ៊ុន Developer Mitsubishi Estate បានឱ្យដឹងថា អគារ Torch Tower នឹងត្រូវបានសាងសង់ឡើងឱ្យមានភាពធននឹងការរញ្ជួយដីយ៉ាងល្អ តាមរយៈបច្ចេកវិទ្យាការពារកម្រិតខ្ពស់ ហើយវាក៏នឹងផ្តល់ជាទីជម្រក ដល់សាធារណជន នៅពេលមានគ្រោះអាសន្នផងដែរ៕