សុខុម

បាងកក: អភិបាលក្រុងបាងកក លោក Chadchart Sittipunt បានស្នើឱ្យរដ្ឋាភិបាលថ្មីរបស់ថៃ អនុវត្តឡើងវិញនូវរបបពន្ធចាស់លើដីធ្លី និងសំណង់ដើម្បីបង្កើនប្រាក់ចំណូលរបស់រដ្ឋបាលមូលដ្ឋាន។ នេះបើយោងតាមសារព័ត៌មាន The Nation ចុះផ្សាយកាលពីថ្ងៃព្រហស្បតិ៍ ទី០១ ខែមិថុនា។

លោក Chadchart Sittipunt បានលើកឡើងពីសង្កាត់ Phaya Thai ដែលសម្បូរដោយផ្សារទំនើបដែលលោកនិយាយថា ប្រាក់ចំណូលពន្ធបានធ្លាក់ចុះពីប្រមាណ៣១០.០០០ដុល្លារអាមេរិក ក្នុងមួយឆ្នាំមកនៅត្រឹម៣១.០០០ដុល្លារអាមេរិកក្រោមច្បាប់ថ្មី។
អភិបាលក្រុងបាងកក រូបនេះលើកឡើងថា ពន្ធលើដីធ្លី និងអគារចាស់ៗប្រមូលបាន១២,៥%នៃការលក់ និងការជួល ប៉ុន្តែប្រាក់ចំណូលបានធ្លាក់ចុះខ្លាំងក្រោមពន្ធថ្មីដែលផ្អែកតែលើតម្លៃដី។

ទោះជា យ៉ាងណា ក្រសួងហិរញ្ញវត្ថុរបស់ថៃ បានច្រានចោលសំណើនេះ ដោយបានលើកឡើងថា ប្រាក់ចំណូលទាបដែលប្រមូលបានពីសង្កាត់ Phaya Thai បានធ្លាក់ចុះក្នុងឆ្នាំ២០២១ និងឆ្នាំ២០២២ គឺដោយសារការបញ្ចុះពន្ធ៩០%ដល់អាជីវកម្មនានាដើម្បីសម្រាលផលប៉ះពាល់ដែលបង្កឡើងដោយវិបត្តិកូវីដ-១៩។

ប្រភពពីក្រសួងហិរញ្ញវត្ថុបានប្រាប់លោក Chadchart Sittipunt ថា ក្រសួងជឿជាក់ថា ការស្ដារឡើងវិញនូវពន្ធដីធ្លីថ្មីឱ្យបានពេញលេញនឹងធ្វើឱ្យប្រាក់ចំណូលពន្ធលើដីធ្លីក្នុងក្រុងបាងកក កើនឡើងរហូតដល់៤៣៤លានដុល្លារអាមេរិក ដូចដែលខ្លួនធ្លាប់ទទួលបានក្នុងឆ្នាំ២០១៩ ក្រោមរបបពន្ធចាស់។

ប្រភពដដែលបានបន្តថា ក្រសួងហិរញ្ញវត្ថុបានចំណាយពេលជាង១០ឆ្នាំដើម្បីអនុវត្តរបបពន្ធថ្មីនេះដែលមានគោលបំណងជួយរដ្ឋបាលមូលដ្ឋានឱ្យទទួលបានប្រាក់ចំណូលគ្រប់គ្រាន់ ដើម្បីកាត់បន្ថយការពឹងផ្អែកលើថវិកាពីរដ្ឋាភិបាលថ្នាក់កណ្ដាល៕ The Nations៕

ដោយ: គង់ លាងហួរ
ហាណូយ: ក្រុមហ៊ុនជាង៨៨.០០០នៅក្នុងប្រទេសវៀតណាមបានបិទអាជីវកម្មរបស់ពួកគេក្នុងរយៈពេល៥ខែដំបូង ដែលក្រុមហ៊ុនទាំងនោះភាគច្រើនបានចូលរួមក្នុងការអភិវឌ្ឍ និងលក់អចលនទ្រព្យ។ នេះបើយោងតាមទិន្នន័យចុងក្រោយដែលចេញផ្សាយដោយការិយាល័យស្ថិតិទូទៅ (GSO) ។

លោក Nguyen Chi Dung រដ្ឋមន្ត្រីក្រសួងផែនការ និងវិនិយោគបានមានប្រសាសន៍ថា “ វិស័យអចលនទ្រព្យនៅតែបន្តរងផលប៉ះពាល់ខ្លាំងបំផុត ដោយសារចំនួនក្រុមហ៊ុនអចលនទ្រព្យបិទទ្វារបានកើនឡើងយ៉ាងខ្លាំងក្នុងអត្រា៤២,៤ភាគរយក្នុងឆ្នាំ២០២២ ធៀបនឹងឆ្នាំ២០២១ និងកើនឡើង៤៧,១ភាគរយក្នុងរយៈពេល៥ខែដំបូងនៃឆ្នាំនេះ”។នៅក្នុងត្រីមាសទីមួយ ប្រទេសវៀតណាមបានកត់ត្រាការធ្លាក់ចុះ៦៣ភាគរយនៃចំនួនក្រុមហ៊ុនថ្មីនៅក្នុងវិស័យអចលនទ្រព្យធៀបនឹងឆ្នាំមុន ខណៈដែលការបិទអាជីវកម្មជាអចិន្ត្រៃយ៍ក្នុងវិស័យនេះបានកើនឡើង៣០ភាគរយ ហើយចំនួនក្រុមហ៊ុនដែលបិទជាបណ្តោះអាសន្នបានកើនឡើង៦១ភាគរយ។

ក្រុមហ៊ុនអចលនទ្រព្យត្រូវបានបង្ខំឱ្យកាត់បន្ថយប្រតិបត្តិការ និងកាត់បន្ថយបុគ្គលិក។ ក្រសួងសំណង់វៀតណាមបានអះអាងថា យើងធ្វើការប៉ាន់ប្រមាណថា រវាង៣០ភាគរយទៅ៥០ភាគរយនៃក្រុមហ៊ុនឈ្មួញកណ្តាលអចលនៈទ្រព្យបានបិទទ្វាររបស់ពួកគេ ឬឈប់ដំណើរការនៅក្នុងត្រីមាសទី១ បើធៀបនឹងត្រីមាសទី៤ កាលពីឆ្នាំមុន។

វិស័យអចលនទ្រព្យរបស់ប្រទេសវៀតណាមបានជួបការលំបាកក្នុងការរៃអង្គាសថវិកា ទាំងប្រាក់កម្ចីពីធនាគារ និងមូលបត្របំណុលសាជីវកម្ម ដែលនាំឱ្យគម្រោងជាច្រើនជាប់គាំងចាប់តាំងពីឆ្នាំមុន។

លើសពីនេះទៀត អ្នកអភិវឌ្ឍន៍អចលនទ្រព្យវៀតណាមជាច្រើនកំពុងលក់ទ្រព្យសកម្ម ក្នុងការបញ្ចុះតម្លៃ ខណៈដែលពួកគេស្ថិតនៅក្រោមភាពតានតឹងផ្នែកសាច់ប្រាក់យ៉ាងធ្ងន់ធ្ងរ ស្របពេលមានស្ថានភាពទីផ្សារដ៏លំបាក៕

ភាពជឿនលឿននៃបច្ចេកវិទ្យា ដូចជា AI, blockchain និង chatbots កំពុងតែធ្វើឱ្យវិស័យធនាគារ បន្តផ្លាស់ប្ដូរឱ្យកាន់តែរីកចម្រើនជាលំដាប់ ដោយអនុញ្ញាតឱ្យធនាគារនានាផ្តល់សេវាកម្មរបស់ខ្លួនស្របតាមតម្រូវការអតិថិជនគ្រប់រូប ខណៈដែលប្រតិបត្តិការឌីជីថលកាន់តែមានសុវត្ថិភាព និងអាចទុកចិត្តបាន។ ទោះជាយ៉ាងណាក៏ដោយ ក្រៅពីគុណសម្បត្តិនានាដែលនាំមកនូវអត្ថប្រយោជន៍ បច្ចេកវិទ្យា ទាំងនេះក៏មកជាមួយហានិភ័យ និងការគំរាមកំហែងខ្ពស់ ដែលធនាគារនានាត្រូវតែដោះស្រាយដោយស្មារតីប្រុងប្រយ័ត្នខ្ពស់ផងដែរ។

ក្នុងរយៈពេលប៉ុន្មានខែចុងក្រោយនេះ យើងសង្កេតឃើញថាមានការលួចចូលប្រើប្រាស់ទិន្នន័យជាច្រើនបានកើតឡើងនៅក្នុងប្រទេសកម្ពុជា។ នេះវាមិនមែនជារឿងគួរឱ្យភ្ញាក់ផ្អើលនោះទេ បើយោងតាមរបាយ​​ការណ៍វាយតម្លៃពីកម្មវិធី Cyber Treat របស់ Interpol ក្នុងឆ្នាំ 2021 ដោយចំនួននៃករណីសរុបមានដល់ទៅ 7,345 ករណី ដែលត្រូវបានកត់ត្រាក្នុងប្រទេសកម្ពុជាអំឡុងឆ្នាំ 2020។ ចំនួនករណីនេះមិនរាប់បញ្ចូលទាំងការវាយប្រហារផ្សេងៗទៀតដែលមិនត្រូវបានគេរាយការណ៍ ហើយវិស័យធនាគារជាគោលដៅក្នុងការប៉ុនប៉ងលួចចូលច្រើនបំផុតដែលមានអត្រាដល់ទៅ 21.3% នៃការវាយប្រហារបែប phishing។

តាមការសម្រង់មតិរបស់ លោកជំទាវបណ្ឌិត ជា សិរី ទេសាភិបាលរង ធនាគារជាតិនៃកម្ពុជា (NBC) បានជំរុញឱ្យធនាគារ និងស្ថាប័នគ្រឹះស្ថានហិរញ្ញវត្ថុទាំងអស់ នៅក្នុងព្រះរាជាណាចក្រកម្ពុជា វិនិយោគបន្ថែមលើសន្តិសុខសាយប័រ (Cybersecurity) បន្ថែមទៀត ដោយសារតែមានការកើនឡើងនៃឌីជីថលូបនីយកម្ម (digitalization) ។ លោកជំទាវបណ្ឌិត បានមានប្រសាសន៍ថា ”កំណើនយ៉ាងឆាប់រហ័សនៃ ឌីជីថលូបនីយកម្ម ក៏ផ្ដល់ឱកាសច្រើនដល់ឧក្រិដ្ឋជនតាមប្រព័ន្ធអ៊ីនធឺណិតផងដែរ។ ព័ត៌មានហិរញ្ញវត្ថុ ដ៏សំខាន់ៗរបស់អ្នកប្រើប្រាស់រាប់ពាន់នាក់ ក៏កំពុងស្ថិតក្នុងហានិភ័យ។ ដូច្នេះ នាងខ្ញុំសូមស្នើឱ្យស្ថាប័ន គ្រឹះស្ថានហិរញ្ញវត្ថុទាំងអស់ឱ្យធ្វើការអភិវឌ្ឍឱ្យបានត្រឹមត្រូវលើប្រព័ន្ធសន្តិសុខសាយប័រ និងផ្តល់ការ បណ្តុះបណ្តាលដល់បុគ្គលិកដើម្បីកាត់បន្ថយហានិភ័យនៃការបំពានលើប្រព័ន្ធសុវត្ថិភាព។ បន្តការអប់រំ និងផ្សព្វផ្សាយចំណេះដឹង គឺជាគន្លឹះក្នុងការធានាសុវត្ថិភាពលើសន្តិសុខសាយប័រផងដែរ”។

ឥឡូវនេះ ដល់ពេលហើយដែលម្ចាស់ធនាគារទាំងអស់គិតគូរ និងចាត់ទុកសន្តិសុខសាយប័រ (Cybersecurity) ជាចលករជំរុញកំណើត។ ប្រព័ន្ធសុវត្ថិភាពនឹងជួយជំរុញកម្លាំងការងារឱ្យកាន់តែមាន ផលិតភាព និងភាពច្នៃប្រឌិតដែលនឹងដើម្បីបង្កើនគុណសម្បត្តិប្រកួតប្រជែង។ ការអនុវត្តបែបនេះក៏សមស្របទៅនឹងរបាយការណ៍ដែលបានចេញផ្សាយដោយ Cisco ផងដែរ ដែលបង្ហាញពីការព្រួយបារម្ភថាសន្តិសុខសាយប័រ (Cybersecurity) បានរារាំងការច្នៃប្រឌិតរបស់ក្រុមហ៊ុនដល់ទៅ 71% ដោយភ័យខ្លាចក្នុងការបើកប្រព័ន្ធប្រតិបត្តិការបន្ថែមដែលអាចទទួលរងការគំរាមកំហែងតាមរយៈ ប្រព័ន្ធអ៊ីនធឺណិត។ លើសពីនេះ សន្តិសុខសាយប័រក៏អាចជួយរក្សាទិន្នន័យ និងធ្វើឱ្យអតិថិជនបន្តគាំ ទ្រធនាគារ ស្របពេលដែលធនាគារបង្ហាញពីការប្ដេជ្ញាចិត្តរបស់ខ្លួនក្នុងកិច្ចការពារទិន្នន័យឯកជនភាព និងសម្លឹងឆ្ពោះទៅរកកិច្ចការពារពីការគំរាមកំហែងតាមប្រព័ន្ធអ៊ីនធឺណិតនាពេលខាងមុខបន្ថែមទៀត។

ទោះជាយ៉ាងនេះក្ដី បច្ចេកវិទ្យាដែលកំពុងតែរីកចម្រើន ដូចជាវេទិកាសុវត្ថិភាពដែលប្រើបច្ចេកវិទ្យា Cloud ដំណើរការដោយវិធីញែកកម្មវិធី អាចជួយកាត់បន្ថយហានិភ័យទាំងនេះបានយ៉ាងមានប្រសិទ្ធភាព ដោយផ្ដល់វិសាលភាពការពារពេញលេញទូទាំងសហគ្រាសតូចធំគ្រប់ប្រភេទទាំងអស់ ដោយមិនតម្រូវ Endpoint Software ឬ end user-experience ឡើយ។

ការបំបែកសិន ក្នុងជំហរ Zero trust គឺជាវិធីសាស្រ្តមួយដើម្បីការពារសន្តិសុខសាយប័រ ដែលសន្មតថា រាល់អ្នកប្រើប្រាស់ (user)  ឧបករណ៍ (Devices) និង ណិតវើក (Network) ទាំងអស់សុទ្ធតែមិនមាន សុវត្ថិភាពគួរទុកចិត្តបាន ហើយគួរតែត្រូវបានផ្ទៀងផ្ទាត់បញ្ជាក់ពីសុវត្ថិភាពជាមុនសិនមុននឹងផ្ដល់សិទ្ធិចូលប្រើប្រាស់។ នីតិវិធីនេះកំពុងក្លាយជាវិធីសាស្ត្រដ៏ពេញនិយមកាន់តែខ្លាំងឡើងក្នុងវិស័យធនាគារ និង ស្ថាប័នគ្រឹះស្ថានហិរញ្ញវត្ថុ ដែលជាមធ្យោបាយមួយដើម្បីកែលម្អលើសន្តិសុខសាយប័រ (Cybersecurity) និង ការពារពីការគំរាមកំហែងតាមប្រព័ន្ធអ៊ីនធឺណិត។ ម្យ៉ាងវិញទៀតការបំបែកកម្មវិធី Web Browser ដាច់ដោយឡែក ក៏ជួយរក្សាសកម្មភាពរុករក (browsing) ឱ្យស្ថិតក្នុងស្ថានភាព ឬបរិយាកាសសុវត្ថិភាពផងដែរ ដោយបំបែកចេញពីឧបករណ៍ (Device) និង ណិតវើក (Network) របស់អ្នកប្រើប្រាស់។ វិធីសាស្រ្តនេះមានប្រសិទ្ធភាពខ្ពស់ក្នុងការទប់ស្កាត់ការគំរាមកំហែងតាមវិប (web) ដូចជាការវាយប្រហារបែប phishing, ការទាញយកមេរោគ (Malware Downloads) និងការទាញយកដ្រាយវ៍ណាមួយ (Drive-By Download)។

អំពី Menlo Security

Menlo Security នឹងជួយការពារស្ថាប័នពីការវាយប្រហារតាមរយៈអ៊ីនធឺណិត ដោយលុបបំបាត់ការគំរាមកំហែងនៃមេរោគ malware លើគេហទំព័រ (Web), ឯកសារ (Documents), និងអ៊ីមែល (Email)។ វេទិកាសុវត្ថិភាពប្រើបច្ចេកវិទ្យា Cloud ដំណើរការដោយវិធីញែករបស់ Menlo Security ផ្ដល់វិសាល ភាពការពារពេញលេញទូទាំងសហគ្រាសតូចធំគ្រប់ប្រភេទទាំងអស់ ដោយមិនតម្រូវ Endpoint Software ឬ end user-experience ឡើយ។ Menlo Security ត្រូវបានជឿទុកចិត្តដោយអាជីវកម្ម ធំៗទូទាំងសកលលោក រួមទាំងក្រុមហ៊ុន Fortune 500 និង 8 ស្ថាប័ននៃសេវាកម្មហិរញ្ញវត្ថុពិភពលោកធំជាងគេទាំង 10 ដែលត្រូវបានគាំទ្រដោយ Vista Equity Partners, Neuberger Berman, General Catalyst, American Express Ventures, Ericsson Ventures, HSBC និង JP Morgan Chase។ Menlo Security មានទីស្នាក់ការកណ្តាលនៅ Mountain View រដ្ឋ California ។ សម្រាប់ព័ត៌មានបន្ថែមសូមចូលទៅកាន់គេហទំព័រ www.menlosecurity.com.

ដោយ: គង់ លាងហួរ
អន្តរជាតិ: ក្រុមអ្នកជំនាញឧស្សាហកម្មបានលើកឡើងថា ការប្រែប្រួលនៃទីផ្សារភាគហ៊ុនថៃជុំវិញភាពមិនច្បាស់លាស់ខាងនយោបាយ បន្ទាប់ពីការបោះឆ្នោតសកល រួមជាមួយការធ្លាក់ចុះនៃសេដ្ឋកិច្ចពិភពលោកដោយសារការកើនឡើងនៃអតិផរណា បានធ្វើឱ្យអចលនទ្រព្យសម្រាប់ការវិនិយោគជាជម្រើសដ៏គួរឱ្យទាក់ទាញក្នុងចំណោមអ្នកវិនិយោគសម័យទំនើប។

លោក Chanin Wanichwong នាយកប្រតិបត្តិនៃក្រុមហ៊ុន Habitat Group បានអះអាងថា “ការកើនឡើងនៃចំនួនអ្នកវិនិយោគជំនាន់ថ្មីដែលមានអាយុចន្លោះពី៣០ទៅ៤០ឆ្នាំ កំពុងទិញខុនដូ និងដាក់ជួលខុនដូដែលពួកគេបានទិញសម្រាប់រកប្រាក់ចំណេញរយៈពេលខ្លី និងរយៈពេលវែង។លោកបន្តថា “ខុនដូដែលមានតម្លៃចន្លោះពី៥ ទៅ៨លានបាតបានក្លាយជាការពេញនិយមយ៉ាងខ្លាំងជាជម្រើសនៃការវិនិយោគដើម្បីបង្កើតប្រាក់ចំណូលអកម្ម”។

លោកបានបន្ថែមថា កត្តាដែលរួមចំណែកដល់និន្នាការនេះ គឺការងើបឡើងវិញនៃឧស្សាហកម្មទេសចរណ៍ ដែលជំរុញឱ្យមានលំហូរនៃភ្ញៀវបរទេសស្វែងរកកន្លែងស្នាក់នៅ ជាពិសេសនៅក្នុងទីក្រុងទេសចរណ៍ ដូចជាទីក្រុងប៉ាតាយ៉ាជាដើម។

លោក Siripong Srisawangeong ប្រធានផ្នែកទីផ្សារ និងលក់នៅក្រុមហ៊ុន Origin Property Plc បានអះអាងថា កម្មវិធីអចលនទ្រព្យវិនិយោគ (IP) របស់ក្រុមហ៊ុនបានលក់អចលនទ្រព្យចេញជាង២.០០០យូនីតក្នុងរយៈពេលពីរឆ្នាំចុងក្រោយនេះ ដោយរំពឹងថា នឹងមានកំណើនជាបន្តបន្ទាប់ទៀត។

លោកបន្តថា“កម្មវិធី IP គឺជាគំនិតថ្មីមួយក្នុងការវិនិយោគអចលនទ្រព្យ។ អ្នកទិញគឺទិញ សម្រាប់តែការ វិនិយោគប៉ុណ្ណោះ ប៉ុន្តែអ្នកទិញនឹងមានសិទ្ធិពេញលេញ លើអចលនទ្រព្យរបស់ពួកគេ។ ពួកគេអាចលក់ ឬផ្ទេរបានគ្រប់ពេល ហើយថែមទាំងអាចផ្ទេរវាទុកជាមរតក ឬប្រើវាជាវត្ថុបញ្ចាំកម្ចីផងដែរ”។

លោក Siripongបានបន្ថែមទៀតថា “ការចំណេញត្រឡប់មកវិញពីការវិនិយោគ គឺអាស្រ័យលើទីតាំងអចលនទ្រព្យ និងការទាមទាររបស់អ្នកជួល”៕

ដោយៈ សហការី

ភ្នំពេញៈ ការិយាល័យលក់នៃគម្រោង ព្រីនស៍ វ័ន ត្រូពិកា ត្រូវបានប្រារព្ធពិធីសម្ពោធ យ៉ាងអធិ​ក​អធ​មកាលពីថ្ងៃទី ៣១ ខែឧសភា ឆ្នាំ២០២៣កន្លងទៅនេះ ដោយមានការ​ចូលរួមពី​អ្នកសារព័ត៌មាន​ក្នុងស្រុកជាច្រើន​ផងដែរ ។

ដើម្បីឆ្លើយតបនឹងការរំពឹងទុក ចំពោះលំនៅឋានដ៏ល្អប្រសើររបស់អតិថិជន គម្រោង ព្រីនស៍ វ័ន ត្រូពិកាបានបើកសម្ពោធការិយា​ល័យលក់របស់ខ្លួននៅថ្ងៃទី ៣១ ខែឧសភា ឆ្នាំ២០២៣ ព្រមទាំងបានអញ្ជើញអតិថិជន និងមិត្តអ្នកសារព័ត៌មានជាច្រើន ចូលរួមទស្សនាគម្រោង ក៏ដូចជា ទេសភាពដ៏ស្រស់ស្អាតនៃសួនច្បារ និងជជែកគ្នាលេងកម្សាន្ត។

ទេសភាពដ៏ស្រស់ស្អាត និងសំណង់ប្រកបដោយគុណភាពខ្ពស់ បានធ្វើឲ្យយើងគ្រប់គ្នា ភ្ញាក់ផ្អើលជាមួយនឹងភាពស្រស់ស្អាតរបស់គម្រោងនេះ។

ការឌីហ្សាញរបស់គម្រោងមានភាពស្រស់ស្អាត និងមានមុខងារពេញលេញ។ សួនច្បារដ៏ស្រស់ឆើតឆាយ បានផ្តល់ជាម្លប់ត្រជាក់ ក៏ដូចជាផ្កា និងរុក្ខជាតិបៃតងដ៏ស្រស់ស្អាត ដែលគួរឲ្យចាប់អារម្មណ៍។

ការបើកសម្ពោធនៅថ្ងៃនោះ គម្រោង ព្រីនស៍ វ័ន ត្រូពិកា បានបង្ហាញនូវគំរូលំនៅឋានដ៏ល្អប្រសើរ សម្រាប់ថ្ងៃអនាគតដល់ម្ចាស់ផ្ទះ អតិថិជន និងអ្នកសារព័ត៌មានជាង១០ស្ថាប័ន។ លើសពីនេះ ពួកគេក៏បានដើរទស្សនាការិយាល័យលក់ និងផ្ទះគំរូនៃគម្រោងព្រីនស៍ វ័ន ត្រូពិកាផងដែរ។

បន្ទាប់ពីនោះ Fresh News, Propertyarea.asia Hang Meas HDTV, TVK និងអ្នកសារព័ត៌មានជាច្រើន រូបផ្សេងទៀតបានធ្វើបទសម្ភាសន៍ជាមួយនាយកទីផ្សាររបស់គម្រោង ព្រីនស៍ វ័ន ត្រូពិកា លោក Vic Guo ។

លោក Vic Guo បានសង្កត់ធ្ងន់លើគោលការណ៍លក់ “ដកប្រាក់វិញដោយមិនចាំបាច់មានហេតុផល” និង “តម្លៃសមរម្យ” ។

លោក Vic Guo បញ្ជាក់ថា គោលការណ៍លក់ “ដកប្រាក់វិញដោយមិនចាំបាច់មានហេតុផល” គឺមានន័យថា ក្នុងរយៈពេល ៤៥ថ្ងៃ ក្រោយពេលប្រគល់ផ្ទះ ក្រុមហ៊ុននឹងប្រគល់ប្រាក់១០០ភាគរយ ​ទៅអតិថិជនវិញ ទោះដោយសារហេតុផល មិនពេញចិត្តណាមួយក៏ដោយ។ ក្នុងនាមជាក្រុមហ៊ុនអភិវឌ្ឍន៍ គម្រោងអចលនទ្រព្យដែលបានចាក់ឫសយ៉ាងជ្រៅ ក្នុងទីក្រុងភ្នំពេញអស់រយៈពេល៨ឆ្នាំ យើងតែងតែបំពេញនូវទំនួលខុសត្រូវសង្គម ដោយយើងមិនត្រឹមតែនាំមកនូវលំនៅឋាន ដែលមានគុណភាពខ្ពស់ជូនប្រជាពលរដ្ឋ ក្នុងរាជធានីភ្នំពេញប៉ុណ្ណោះទេ ថែមទាំងគិតគូរផងដែរនូវផលប្រយោជន៍របស់អ្នកទិញផ្ទះគ្រប់រូប។

ការទិញផ្ទះ គឺជាការចំណាយដ៏ធំមួយ សម្រាប់គ្រួសារមួយ ដូចនេះយើងផ្តល់នូវគោលការណ៍ពិសេសដែលអាច “ដកប្រាក់វិញដោយមិនចាំបាច់មានហេតុផល” ក្នុងគោលបំណងកាត់បន្ថយហានិភ័យរបស់អ្នកទិញ ហើយយើងក៏សូមអំពាវនាវ ឲ្យក្រុមហ៊ុនអភិវឌ្ឍន៍ផ្សេងៗអនុវត្តគោលការណ៍នេះដូចយើងដែរ ក្នុងគោលបំណងគិតគូរដល់អត្ថប្រយោជន៍អតិថិជនជាចម្បង ក៏ដូចជាជួយជំរុញការអភិវឌ្ឍប្រកបដោយភាពវិជ្ជមានក្នុងវិស័យនេះ។

ក្នុងនាមជាគម្រោងបុរីវីឡាដំបូងបង្អស់ របស់ក្រុមហ៊ុន ព្រីនស៍ រៀល អ៊ីស្ទេត គ្រុប ព្រីនស៍ វ័ន ត្រូពិកាបានប្រកាន់ខ្ជាប់នូវគោលគំនិត “កសាងជីវិតឲ្យកាន់តែប្រសើរ” និងត្រូវបានសាងសង់ឡើងដោយ​អ្នកជំនាញល្បីៗលំដាប់អន្តរជាតិ ដែលធ្វើឲ្យគម្រោងយើងមានគុណភាពល្អ និងប្រកប​ដោយ​ភាពបៃតង សុវត្ថិភាព និងផាសុកភាព។

ចាប់តាំងពីការបង្កើតក្រុមហ៊ុនមក ព្រីនស៍ រៀល អ៊ីស្ទេត គ្រុប បានផ្តោតសំខាន់លើការសិក្សាស្រាវជ្រាវ ក្នុងការសាងសង់គម្រោងសម្រាប់កម្រិតមធ្យមនិងកម្រិតខ្ពស់។ បន្ទាប់ពីធ្វើការអភិវឌ្ឍខ្លួនអស់រយៈពេល ៨ឆ្នាំមក ព្រីនស៍ រៀល អ៊ីស្ទេត គ្រុប បានក្លាយទៅជាក្រុមហ៊ុនឈានមុខគេ ក្នុងវិស័យអចលនទ្រព្យ ដែលមានគុណភាពខ្ពស់នៅក្នុងរាជធានីភ្នំពេញ។

ក្នុងនាមជាគម្រោងបុរីវីឡាលំដាប់ខ្ពស់ និងដំបូងបង្អស់របស់ក្រុមហ៊ុន ព្រីនស៍ រៀល អ៊ីស្ទេត គ្រុប ព្រីនស៍ វ័ន ត្រូពិកា នឹងក្លាយជាស្នាដៃគោលរបស់ក្រុមហ៊ុនព្រីនស៍ រៀល អ៊ីស្ទេត គ្រុប ដើម្បីបន្តអភិវឌ្ឍគម្រោងលំនៅឋាន ឲ្យមានគុណភាពខ្ពស់បន្ថែមទៀត សម្រា ប់ទីផ្សារភ្នំពេញ និងកម្ពុជាទាំងមូល។ បើធៀបនឹងគម្រោងផ្សេងទៀតក្នុងរាជធានីភ្នំពេញ ព្រីនស៍ វ័ន ត្រូពិកា បានបង្ហាញខ្លួនឡើងតាមរយៈការបើកសម្ពោធការិយាល័យលក់របស់ខ្លួន ដោយសន្យាថានឹងសម្រេចនូវភាពល្អប្រសើរ ក្នុងការរស់នៅសម្រាប់អតិថិជនទាំងអស់។ សួនច្បារ ក្លឹប ប្រផឹធី ទិដ្ឋភាពរស់នៅ និងអ្វីៗផ្សេងទៀតដែលលោកអ្នកមើលឃើញនៅទីនេះ នឹងបង្ហាញខ្លួននាពេលខាងមុខឆាប់ៗនេះ។

គម្រោង​នេះលំអទៅដោយ​សួនច្បារស្រស់ស្អាត ហ៊ុំព័ទ្ធដោយរុក្ខជាតិបៃតង ផ្តល់នូវការរស់នៅបែបធម្មជាតិ ក្លឹបកម្សាន្តបែបឯកជនផ្តល់ការរស់នៅបែបរីករាយ ដែលមិនធ្លាប់មានពីមុនមក និងបំពេញនូវរាល់តម្រូវការដែលលោកអ្នកប្រាថ្នាចង់បាន ។ មាន​សេវាកម្ម ២៤ម៉ោង ​ផ្តល់សេវាប្រផឹធី សេវាគ្រប់គ្រងផ្ទះ និងសេវាថែទាំកុមារ ធ្វើឱ្យ​ការរស់នៅមានភាពងាយស្រួល និងអស់នូវទុក្ខកង្វល់ គម្រោងដែលត្រូវបានសាងសង់ឡើង ប្រកបដោយភាពផ្ចិតផ្ចង់ និងមានទំហំធំទូលាយ។

ផ្ទះទំហំ 143-625㎡ ផ្តល់បទពិសោធន៍រស់នៅថ្មីស្រឡាង ក្នុងទីក្រុងភ្នំពេញ។ ការឌីហ្សាញផ្ទះបែបបួនជ្រុង និងមានមុខងារពេញលេញ ខ្យល់អាកាសនិងពន្លឺថ្ងៃចេញចូលល្អ វេរ៉ង់ដារធំទូលាយ ការឌីហ្សាញផ្ទះកម្ពស់3ជាន់កន្លះ ប្រព័ន្ធSmart-Home និងប្រព័ន្ធសន្សំសំចៃថាមពល ត្រូវការរៀបចំឡើងដើម្បីធ្វើឲ្យការរស់នៅ មានភាពងាយស្រួល និងប្រកបដោយភាពបៃតង សុវត្ថិភាព និងផាសុកភាព​ ៕