ដោយៈ ហ្វីអូណា

        ភ្នំពេញៈ លោកផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការត្រៀម រៀបចំពិធីបើកការដ្ឋាន បានអញ្ជើញដឹកនាំកិច្ចប្រជុំគណៈកម្មការ អនុគណៈកម្មការត្រៀមរៀបចំពិធីបើកការដ្ឋាន លើកកម្រិត និងជួសជុល ថែទាំកំណាត់ផ្លូវខេត្តលេខ៣១២ ស្ថិតក្នុងស្រុកព្រះស្តេច នៃខេត្តព្រៃវែង ដោយមានការចូលរួមពីថ្នាក់ដឹកនាំក្រសួងទទួលបន្ទុក និងក្រុមការងារជំនាញបច្ចេកទេសពាក់ព័ន្ធ។

កិច្ចប្រជុំនេះធ្វើឡើងក្នុងគោលបំណង ដើម្បីបែងចែកតួនាទី និងភារកិច្ចជូនដល់សមាជិក សមាជិកានៃគណៈកម្មការ និងអនុគណៈកម្មការសម្រាប់ត្រៀមរៀបចំពិធីបើកការដ្ឋាន ដើម្បីឱ្យការដឹកនាំ គ្រប់​គ្រង ចាត់ចែង និងសម្របសម្រួលកម្មវិធីខាងលើ ប្រព្រឹត្តទៅបានដោយរលូន ប្រកបដោយសុវត្ថិភាព និងប្រសិទ្ធភាពការងារតាមការបែងចែក ដូចមានចែងនៅក្នុងលិខិតបង្គាប់ការ ។

លោករដ្ឋលេខាធិការប្រធានអង្គប្រជុំ បានណែនាំឱ្យសមាជិក សមាជិកាគណៈកម្មការ សហការឱ្យបានជិតស្និទ្ធជាមួយភាគីពាក់ព័ន្ធ ផ្តល់ព័ត៌មានគ្នាទៅវិញ ទៅមកឱ្យបានគ្រប់ជ្រុងជ្រោយ ដើម្បីដោះស្រាយបញ្ហាប្រឈមឱ្យបានទាន់ពេលវេលា ជាពិសេស ត្រូវអនុវត្តតាមតួនាទី និងភារកិច្ចដែលថ្នាក់ដឹកនាំបានប្រគល់ជូន សំដៅធានាឱ្យពិធីបើកការដ្ឋានបានប្រព្រឹត្តទៅដោយរលូន តាមផែនការដែលបានគ្រោងទុក ។

ជាមួយគ្នានោះដែរ អង្គប្រជុំបានសម្រេចឱ្យក្រុមការងារបច្ចេ​ក​ទេស និងគណៈកម្មាធិការជាតិរៀបចំបុណ្យជាតិ-អន្តរជាតិ និងក្រុមការងារពាក់ព័ន្ធ ចុះទៅពិនិត្យទីតាំងជាក់ស្តែងនៅថ្ងៃទី១៥ ខែឧសភា ២០២៣ ដើម្បីសិក្សាស្វែងយល់ទីតាំងភូមិសាស្ត្រ សម្រាប់ការរៀបចំពិធី ដែលអាចធានាបាននូវសន្តិសុខ សុវត្ថិភាព សណ្តាប់ធ្នាប់ និងបរិស្ថានល្អសម្រាប់អ្នកចូលរួម។

ពិធីបើកការដ្ឋានលើកកម្រិតគុណភាព និងជួសជុល ថែទាំកំណា​ត់ផ្លូវខេត្ដលេខ៣១២ (សំរោង-ករគោ ព្រំប្រទល់កម្ពុជា-វៀតណាម) មានប្រវែងសរុប ២៨,៣៧ គ.ម ស្ថិតក្នុងស្រុកព្រះស្ដេច ខេត្ដព្រៃវែង ក្រោមឥណទានសម្បទាន របស់ធនាគារអភិវឌ្ឍន៍អាស៊ី (ADB) គ្រោងនឹងប្រារព្ធឡើងនៅសប្ដាហ៍ទី៣ នៃខែឧសភា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៕

ដោយៈ គង់ សូរិយា

        ភ្នំពេញៈ អគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណៈការ និងដឹកជញ្ជូន បានបង្កើតប្រព័ន្ធគ្រប់គ្រងទិន្នន័យប្រព័ន្ធលូ និងប្រព័ន្ធចម្រោះទឹកកខ្វក់រួចរាល់ហើយនៅក្នុងក្រុងចំនួនបី។

ក្រុងសំខាន់ៗចំនួនបី រួមមាន ក្រុងព្រះសីហនុ ក្រុងបាត់ដំបង និងក្រុងសៀមរាប តាមរយៈប្រភពថវិកាជាតិ ដើម្បីឆ្លើយតបនឹងការវិវត្តបច្ចេកវិទ្យាព័ត៌មានយ៉ាងឆាប់រហ័ស និងចូលរួមចំណែកគាំទ្រដល់គោលនយោបាយរបស់រាជរដ្ឋាភិបាល និងជំរុញសេដ្ឋកិច្ចជាតិឱ្យមានការរីកចម្រើនលូតលាស់ ប្រកបដោយចីរភាព។ អគ្គនាយកដ្ឋាននឹងបន្តបង្កើតតប្រព័ន្ធGIS នេះ នៅក្នុងខេត្តផ្សេងៗទៀត។

ព៌តមាននេះត្រូវបានបង្ហើបឲ្យដឹងពីលោកសួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្សព្វផ្សាយ ប្រព័ន្ធគ្រប់គ្រងទិន្នន័យ នៃប្រព័ន្ធលូ និងប្រព័ន្ធទឹកចម្រោះទឹកកខ្វក់(GIS) នៅក្នុងក្រុងព្រះសីហនុ ដោយមានការចូលរួមពីថ្នាក់ដឹកនាំ មន្ទីរសាធារណការខេត្តព្រះសីហនុ សាលាក្រុងព្រះសីហនុ និងមន្ត្រីបច្ចេកទេស ជាច្រើនរូបផងដែរ។

អង្គប្រជុំបានជជែកពិភាក្សាលម្អិតលើទិន្នន័យ ដែលបានរៀបចំនៅក្នុងប្រព័ន្ធGIS ដើម្បីទទួលបានមតិយោបល់ ក៏ដូចជាធាតុចូលទាក់ទងនឹងទិន្នន័យ តាមផ្នែកនីមួយៗឱ្យបានលម្អិត និងគ្រប់ជ្រុងជ្រោយ ធ្វើយ៉ាងណាកែសម្រួល និងបំពេញបន្ថែមនូវតម្រូវការចាំបាច់មួយចំនួនដើម្បីធ្វើឱ្យប្រសើរឡើង និងសមស្របតាមស្ថានភាពបច្ចុប្បន្ន។

ជាមួយគ្នានោះដែរ លោកអគ្គនាយក បានថ្លែងអំណរគុណដល់ក្រុមការងារបច្ចេកទេសនៃ នាយកដ្ឋានស្រាវជ្រាវប្រព័ន្ធចម្រោះទឹកកខ្វក់ ដែលបានរៀបចំ គ្រប់គ្រង និងវិភាគទិន្នន័យប្រព័ន្ធលូ និងប្រព័ន្ធចម្រោះទឹកកខ្វក់ និងបានសហការយ៉ាងជិតស្និទ្ធជាមួយក្រុមការងារបច្ចេកទេសរបស់មន្ទីរ សាធារណការខេត្តព្រះសីហនុ ដែលបានសំដៅសម្រេចបាននូវការរៀបចំទិន្នន័យ សម្រាប់ប្រើប្រាស់ក្នុងការអភិវឌ្ឍ ជួសជុល ថែទាំ និងគ្រប់គ្រងប្រព័ន្ធលូ និងប្រព័ន្ធចម្រោះទឹកកខ្វក់ ឱ្យបានជោគជ័យ និងប្រកបដោយគុណភាព។

ប្រព័ន្ធGISនេះ ត្រូវបានបង្កើតឡើង ដោយក្រុមការងារបច្ចេកទេ​សនាយកដ្ឋានស្រាវជ្រាវប្រព័ន្ធចម្រោះទឹកកខ្វក់ នៃអគ្គនាយកដ្ឋានចម្រោះទឹកកខ្វក់ ក្នុងគោលបំណង ដើម្បីរក្សាទុកទិន្នន័យ ប្រព័ន្ធលូ និងប្រព័ន្ធចម្រោះទឹកកខ្វក់ក្នុង Geographic Information System (GIS)  ដើម្បីគ្រប់គ្រង វិភាគ និងអភិវឌ្ឍប្រព័ន្ធគ្រប់គ្រងបណ្តាញលូរំដោះទឹកភ្លៀង លូប្រមូលទឹកកខ្វក់ ប្រព័ន្ធចម្រោះទឹកកខ្វក់ និងរក្សាទុកប្រើប្រាស់ ដើម្បីរៀបចំផែនការ សាងសង់ ប្រតិបត្តិការ និងថែទាំ ក៏ដូចជាបម្រើគោលដៅ ផ្សេងៗទៀតឱ្យកាន់តែប្រសើរឡើង និងប្រសិទ្ធភាព៕

ដោយ: គង់ លាងហួរ
ភ្នំពេញ: មន្ត្រីជាន់ខ្ពស់នៃមូលនិធិរូបិយវត្ថុអន្តរជាតិ (IMF) បានមានប្រសាសន៍ថា សេដ្ឋកិច្ចរបស់កម្ពុជានឹងមានសុខភាពល្អជាងមុននៅឆ្នាំនេះ បើធៀបនឹងបណ្តាប្រទេសផ្សេងទៀតនៅក្នុងតំបន់ ដោយសារការងើបឡើងវិញយ៉ាងឆាប់រហ័សនៃសេដ្ឋកិច្ចសង្គម ខណៈដៃគូពាណិជ្ជកម្មធំៗរបស់កម្ពុជាត្រូវបានរំពឹងថា នឹងសម្រេចបាននូវកំណើនខ្ពស់រៀងៗខ្លួននៅក្នុងឆមាសទី២។

ការវាយតម្លៃអំពីសុខភាពសេដ្ឋកិច្ចរបស់កម្ពុជាត្រូវបានបង្ហាញកាលពីថ្ងៃអង្គារសប្តាហ៍មុនក្នុងជំនួបរវាងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងគណៈប្រតិភូ IMF ដឹកនាំដោយប្រធានក្រុមបេសកកម្មថ្មី លោក Davide Furceri និងលោក Yasuhisa Ojima តំណាងរបស់ IMF ប្រចាំនៅកម្ពុជា។

លោក Furceri បានអះអាងថា កម្ពុជារំពឹងថា នឹងរក្សាបាននូវកំណើនសេដ្ឋកិច្ចខ្ពស់នៅឆ្នាំ២០២៣នេះ ខណៈដែលរាជរដ្ឋាភិបាលកម្ពុជា (RGC) បានដាក់ចេញវិធានការអន្តរាគមន៍នានាដើម្បីកាត់បន្ថយផលប៉ះពាល់នៃភាពមិនប្រាកដប្រជានៃសេដ្ឋកិច្ចសកល និងក្នុងតំបន់ និងលក្ខខណ្ឌមិនអំណោយផលនានាផងដែរ។

លោក Furceri បានបន្តថា “កត្តានេះនឹងអាចជំរុញកំណើនសេដ្ឋកិច្ចរបស់ប្រទេសកម្ពុជាក្នុងកម្រិតមួយតាមរយៈការងើបឡើងវិញនៃការនាំចេញ និងកំណើននៃវិស័យសេវាកម្ម ទេសចរណ៍ និងឧស្សាហកម្មមិនមែនកាត់ដេរ”។

លោក អូន ព័ន្ធមុនីរ័ត្ន បានមានប្រសាសន៍ថា បេសកកម្មរបស់ក្រុមមន្ត្រី ឬបុគ្គលិករបស់មូលនិធិ IMF មកបំពេញទស្សនកិច្ចនៅកម្ពុជា នឹងផ្តល់ផលប្រយោជន៍ជាច្រើនសម្រាប់ប្រទេសកម្ពុជា ដោយសាររដ្ឋាភិបាលបាននិងកំពុងរៀបចំក្របខណ្ឌគោលនយោបាយម៉ាក្រូសេដ្ឋកិច្ច និងហិរញ្ញវត្ថុសាធារណៈសម្រាប់ឆ្នាំ២០២៤ ខណៈដែលសេដ្ឋកិច្ចក្នុងតំបន់ និងពិភពលោកត្រូវបានហ៊ុព័ទ្ធដោយភាពមិនប្រាកដប្រជាសេដ្ឋកិច្ចខ្ពស់។

ជាមួយគ្នានេះ ធនាគារពិភពលោក (World Bank) ក៏បានព្យាករណ៍កំណើនសេដ្ឋកិច្ចប្រទេសកម្ពុជាឱ្យឈរលើលំដាប់ទី៣ បើធៀបនឹងបណ្តាប្រទេសផ្សេងៗទៀតក្នុងតំបន់អាស៊ាន ក្នុងអត្រា៥,២% សម្រាប់ឆ្នាំ២០២៣ ហើយធនាគារ ADB ក៏បានវាយតម្លៃកម្ពុជាឱ្យជាប់ចំណាត់ថ្នាក់ទី១៤ ជាប្រទេសមានសេដ្ឋកិច្ចលូតលាស់លឿនបំផុតក្នុងរង្វង់៥,៨%ផងដែរ៕

ដោយៈ គង់ សូរិយា

        ភ្នំពេញៈ មានសំណួរជាច្រើនត្រូវ​បានអ្នកពាក់ព័ន្ឋ ក្នុងវិស័យអចលនវត្ថុ បានសាកសួរមកកាន់សហស្ថាបនិក និងជាអគ្គនាយកគេហទំព័រPropertyarea. Asia។

សំណួរទាំងនោះមានដូចជា

ទី១ តើស្ថានភាពទីផ្សារកំពុងវិវត្តន៍បែបណា?

ទី២ តើពេលណាទីផ្សារដីធ្លី និងអចលនវត្ថុ សំណង់អាចងើបឡើងវិញ? នៅឆ្នាំ២០២៤ ឬ២០២៥?។

ទី៣ តើគួរបន្តវិនិយោគបន្តទៀតឬទេ? នៅពេលស្ថានភាពទីផ្សារបែបនេះ?

ទី៤ តើទីផ្សារខុនដូនឹងល្អ សម្រាប់ប្រជាជនខ្មែរនាពេលអនាគត? តើហេតុអ្វី?។

ទី៥ ទាំងអស់គ្នាកំពុងឈឺចាប់ ដោយសារបញ្ហាសេដ្ឋកិច្ច និងវិបត្តិនានា តើយើងគួរធ្វើបែបណា?។

ដោយៈគង់ សូរិយា

        ភ្នំពេញៈ ស្ថាបនិកនិងជាអគ្គនាយកក្រុមហ៊ុនUrban Hubលោកបណ្ឌិតBen Li ដែលបាននិងកំពុងអភិវឌ្ឍន៍គំរោងខុនដូធំមួយនៅភាគខាងត្បូងរាជធានីភ្នំពេញ បានលើកឡើងពីការរួមចំណែករបស់គេហទំព័រPropertyarea.asia ក្នុងការលើកកំពស់វិស័យអចលនវត្ថុនៅកម្ពុជា។

លោកបណ្ឌិត​បានមានប្រសាសន៍បែបនេះ ក្នុងពិធីចុះអនុស្សរណៈយោគយល់រវាងក្រុមហ៊ុនUrban Village និងគេហទំព័រPropertyarea.asiaតំណាងដោយលោកយិន លាងគង់សហស្ថាបនិក និងជាអគ្គនាយកគេហទំព័រPropertyarea.asia។

លោកបណ្ឌិតBen Liបានមានប្រសាសន៍ថា អ្នកនៅក្នុងវិស័យនេះ ភាគច្រើនបានស្គាល់ពីគេហទំព័រនេះ ដែលបានរួមចំណែកផ្សព្វផ្សាយព៌តមានមានលក្ខណៈវិជ្ជមាន ផ្សព្វផ្សាយចំណេះដឹងទូទៅជាច្រើនទាក់ទងវិស័យអចនវត្ថុ និងវិស័យសំណង់នៅកម្ពុជា ដើម្បីឲ្យសាធារណៈជន និងអ្នកវិនិយោគជាតិ អន្តរជាតិបានស្គាល់និងយល់ដឹងពីស្ថានភាពទូទៅនៃសេដ្ឋកិច្ច និងដំណើរវិវត្តន៍របស់វិស័យសំណង់នៅកម្ពុជា។

លោកបញ្ជាក់ថា “អ្នកវិនិយោគជាតិ អន្តរជាតិ សូមចូលរួមចំណែកគាំទ្រដល់គេហទំព័រនេះ ដើម្បីឲ្យស្ថាប័ននេះអាចផ្សព្វផ្សាយព៌តមានមានលក្ខណៈវិជ្ជមាន និងប្រកបដោយក្រមសីលធ៌មវិជ្ជាជីវៈ”។លោកបន្តថា “លោកយិន លាងគង់បានធ្វើយ៉ាងល្អ ក្នុងនាមជាប្រព័ន្ឋផ្សព្វផ្សាយដ៏ល្អ និងឈានមុខមួយ”៕

ដោយៈ ជេស៊ីកា

        ភ្នំពេញៈ អ្នកជំនាញ និងអ្នកអភិវឌ្ឈន៍អន្តរជាតិបានលើកឡើងពីមូលហេតុ ដែលអ្នកវិនិយោគ ក៏ដូចជាភ្ញៀវទេសចរណ៍ចិនមិនទាន់ត្រលប់មកកម្ពុជាច្រើនដូចមុនវិបត្តិកកូវីដ១៩។

ស្ថា​បនិកនិងជាអគ្គនាយកក្រុមហ៊ុនUrban Hub លោកបណ្ឌិតBen Li បានលើកឡើងក្នុងកិច្ចសម្ភាសន៍ ពិសេសកាលពីចុងសប្តាហ៍មុនថា ចំនួនជនជាតិចិន មកអាចត្រលប់មកកម្ពុជាវិញ ដោយសារប៉ាស្ព័ររបស់ពួកគេផុតសុពលភាព ហើយពេលនេះពួកគេកំពុងបន្តសុពលភាពប៉ាស័្ពរ ឬលិខិតឆ្លងដែនរបស់ពួកគេឡើងវិញ។

លោកបន្តថា “បន្ទាប់ពីការរាំងខ្ទប់ដោយសារជំងឺកូវីដ១៩ ប៉ាស្ព័រជនជាតិចិនភាគច្រើនបានហួសសុពលភាព”។ លោកបន្ថែមថា​”ពួកគេកំពុងបន្តសុពលភាពប៉ាស្ព័រ របស់ពួកគេឡើងវិញ ហេតុនេះនៅអំឡុងខែមិថុនា និងកក្កដាខាងមុខ ពួកគេនឹងត្រលប់មកកម្ពុជាច្រើនឡើងវិញហើយ”។

លោកបណ្ឌិតBen Liបានបន្តថា ប្រជាជនចិន អ្នកធុរកិច្ចចិនភាគច្រើនស្គាល់កម្ពុជា។ ពួកគេមានសុទិដ្ឋិនិយមពីទីផ្សារ នៅកម្ពុជា ហេតុនេះ ពួកគេនឹងវិលត្រលប់មកកម្ពុជា ច្រើនឡើងវិញនាពេលខាងមុខនេះ។

ជាមួយគ្នានេះ អ្នកនាងSandyនាយិកកាក្រុមហ៊ុនលក់ខុនដូ និងជាអ្នកជំនាញខុនដូមួយរូប បានលើកឡើងឲ្យដឹងនៅថ្ងៃដដែលថា      រដ្ឋាភិបាលចិន កំពុងព្យាយាមខ្ទប់មិនឲ្យប្រជាជន និងអ្នកធុរកិច្ចចិន ចេញមកក្រៅប្រទេស តាមរយៈការមិនបន្តសុពលភាពប៉ាស្ព័រឲ្យប្រជាជនរបស់ខ្លួន។

អ្នកនាបន្តថា “ការមិនបន្តសុពលភាព មានន័យស្មើនឹងការបិទខ្ទប់ប្រជាជនចិនចេញក្រៅប្រទេស ដោយរដ្ឋាភិ​បាលចិនព្យាយាមយ៉ាងណាមិនឲ្យមានលំហូរសាច់ប្រាក់ ចេញពីប្រទេសរបស់ខ្លួនច្រើននោះទេ”។ អ្នកនាងបន្តថា “រដ្ឋាភិបាលចិនព្យាយាមឲ្យអ្នកវិនិយោគ ឬអ្នកមានធនធាន ចំណាយទុនវិនិយោគ ក្នុងប្រទេសរបស់ខ្លួនជាជាងចេញមកក្រៅប្រទេស”៕