ដោយ: គង់ លាងហួរ
អន្តរជាតិ: ប្រទេសសិង្ហបុរីបានព្យាករណ៍ថា កម្រិតទឹកសមុទ្រនឹងកើនឡើង១,១៥ម៉ែត្រនៅចុងសតវត្សនេះ។ ដោយសារខ្យល់ជំនោរ និងព្យុះបក់បោកខ្លាំង កម្រិតទឹកសមុទ្រអាចកើនឡើងដល់កំពស់៥ម៉ែត្រ ដែលអាចជន់លិចផ្ទៃដីគោកប្រហែល៣០ភាគរយ នៃប្រទេសសិង្ហបុរី។

ដើម្បីឆ្លើយតបនឹងបញ្ហានេះ សិង្ហបុរីមានគោលបំណងបង្កើតកោះសិប្បនិម្មិត ក្រោមគម្រោង”Long Island” ដែលមានចម្ងាយជិត១៣គីឡូម៉ែត្រ ដើម្បីដើរតួនាទីជាជញ្ជាំងសមុទ្រ និងការពារតំបន់ឆ្នេរសមុទ្រភាគអាគ្នេយ៍ចម្ងាយជិត៥០គីឡូម៉ែត្ររបស់ប្រទេសនេះ។

គិតត្រឹមពាក់កណ្តាលឆ្នាំ២០២៥នេះ ប្រទេសសិង្ហបុរីកំពុងសិក្សាបច្ចេកទេសវិស្វកម្ម និងបរិស្ថាន ដែលជាដំណាក់កាលដំបូងឆ្ពោះទៅរកការសម្រេចបាននូវគម្រោង”Long Island” ។ ការងារទាំងនេះ​ត្រូវ​បាន​គេ​រំពឹង​ថា​ នឹងសម្រេចបានវឌ្ឍនភាពទៅមុខ​ក្នុង​រយៈ​ពេល​ប្រហែល​៥ឆ្នាំ រាប់ចាប់ពីឆ្នាំ២០២៤។

កាលពីដំណាច់ឆ្នាំ២០២៤ ការពិគ្រោះយោបល់ជាសាធារណៈ និងការផ្តល់ធាតុចូលពីភាគីពាក់ព័ន្ធត្រូវបានអនុវត្តន៍ ដោយមានចំនួនអ្នកចូលរួមប្រមាណ៣.០០០នាក់ និងចំនួនអ្នកផ្ញើមតិកែលម្អតាមអនឡាញជាង៦០០នាក់។

ក្រុមមន្ត្រីសិង្ហបុរីបានលើកឡើងថា គម្រោងនេះត្រូវបានចាត់ទុកជាជញ្ជាំងទប់ទឹកសមុទ្រ។ ប៉ុន្តែ យើងក៏មានគោលបំណងបង្កើតឧទ្យានជាប់មាត់សមុទ្រថ្មីមួយ ដែលមានចម្ងាយជាង១៩គីឡូម៉ែត្រ រួមទាំងតំបន់លំនៅដ្ឋាន ការកំសាន្ត និងតំបន់ពាណិជ្ជកម្មផងដែរ។

លោក Lee Sze Teck អ្នកប្រឹក្សាយោបល់នៅក្រុមហ៊ុនអចលនទ្រព្យ Huttons Asia ដែលមានមូលដ្ឋាននៅប្រទេសសិង្ហបុរីបានបញ្ជាក់ប្រាប់កាសែត CNN តាមរយៈសារអុីមែលថា គម្រោង Long Island មានសក្តានុពលក្នុងការប្រែក្លាយទៅតំបន់លំនៅដ្ឋាន ដែលមានផ្ទះចន្លោះពី៣០.០០០យូនីតទៅ៦០.០០០យូនីត៕ប្រភព: CNN៕

ចុចទីនេះដើម្បី Subscribe Telegram Channel «Property Area Asia» សម្រាប់ទទួលបានព័ត៌មានថ្មីៗ
(ភ្នំពេញ)៖ ក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ដែលបានប្រព្រឹត្តទៅនៅប្រទេសម៉ាឡេស៉ី នារសៀលថ្ងៃទី៧ ខែសីហា ឆ្នាំ២០២៥នេះ ភាគីកម្ពុជា-ថៃ បានបន្ដឯកភាពគ្នាអនុវត្តបទឈប់បាញ់ និងវាយប្រហារលើជនស៉ីវិល ព្រមទាំងហេដ្ឋារចនាសម្ព័ន្ធនៃជនស៉ីវិលទាំងអស់។

ផ្អែកតាមលទ្ធផលដែលបានប្រកាសជាផ្លូវការ ក្រោយបញ្ចប់កិច្ចប្រជុំ GBC ភាគីកម្ពុជា-ថៃ ក៏បានឯកភាពគ្នា បញ្ចៀសរាល់ការផ្ទុះអាវុធទាំងអស់ និងមិនឲ្យភាគីណាបំពានដាច់ខាតលើកិច្ចព្រមព្រៀងនេះ ទោះក្នុងកាលៈទេសៈណាក៏ដោយ។

កិច្ចប្រជុំវិសាមញ្ញគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) ភាគីកម្ពុជាដឹកនាំដោយ នាយឧត្តមសេនីយ៍ ទៀ សីហា ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងភាគីថៃដឹកនាំដោយ រដ្ឋមន្ត្រីស្តីទីក្រសួងការពារជាតិថៃ ក្រោមការសម្របសម្រួលពីនាយករដ្ឋមន្ដ្រីម៉ាឡេស៉ី ដែលជាប្រធានអាស៊ានប្ដូរវេន និងមានការចូលរួមពីតំណាងសហរដ្ឋអាេមរិក និងសាធារណៈរដ្ឋប្រជាមានិតចិនផងដែរ។

ក្នុងកិច្ចព្រមព្រៀងចំណុចទី១ បានបញ្ជាក់ខ្លឹមសារយ៉ាងដូច្នេះថា «ភាគីទាំងពីរ​ឯកភាពលើការឈប់បាញ់ ពាក់ព័ន្ធគ្រប់ប្រភេទអាវុធទាំងអស់ រួមបញ្ចូលទាំងការវាយប្រហារលើជនស៉ីវិល ហេដ្ឋារចនាសម្ព័ន្ធស៉ីវិល និងគោលដៅយោធានៃភាគីទាំងសងខាង ក្នុងគ្រប់ករណី និងតំបន់ទាំងអស់។ ភាគីទាំងពីរចាំបាច់ត្រូវចៀសវាងការបាញ់ប្រហារទាំងគ្មានការបង្កហេតុ សំដៅទៅលើទីតាំង ឬកងទ័ពរបស់ភាគីម្ខាងទៀត។ ការព្រមព្រៀងនេះ មិនត្រូវបំពានដាច់ខាត ទោះស្ថិតក្រោមកាលៈទេសៈបែបណាក៏ដោយ»។

បន្ថែមពីនេះ ភាគីទាំងពីរកម្ពុជា-ថៃ ក៏បានយល់ព្រមរក្សាស្ថានភាពបច្ចុប្បន្ន នៃការដាក់ពង្រាយកងទ័ព ដោយមិនមានការចល័តបន្ថែមទៀត គិតត្រឹមបទឈប់បាញ់ ចាប់ពីម៉ោង២៤៖០០នាទី ថ្ងៃទី២៨ ខែកក្កដា ឆ្នាំ២០២៥ ហើយមិនត្រូវឲ្យមានការចល័តកងទ័ព រាប់បញ្ចូលទាំងការល្បាត សំដៅទៅកាន់​ទីតាំងភាគីម្ខាងទៀត។ ភាគីទាំងពីរយល់ស្រប មិនបង្កើនចំនួនកងកម្លាំង នៅតាមបណ្តោយព្រំប្រទល់ទាំងស្រុងរវាងកម្ពុជា-ថៃ។

សូមជម្រាបថា កិច្ចប្រជុំនេះជាការអនុវត្តនូវចំណុចដែលបានឯកភាពគ្នា រវាងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងលោក Phumtham Wechayachai នាយករដ្ឋមន្ត្រីស្តីទីនៃព្រះរាជាណាចក្រថៃ នៅក្នុងកិច្ចប្រជុំពិសេស នៅទីក្រុង Putrajaya, ប្រទេសម៉ាឡេស៊ី កាលពីថ្ងៃទី២៨ ខែកក្កដា ឆ្នាំ២០២៥ ដែលសហរៀបចំដោយម៉ាឡេស៊ី និងសហរដ្ឋអាមេរិក ដោយមានការចូលរួមដ៏សកម្មពីសាធារណរដ្ឋប្រជាមានិតចិន៕

ដោយៈ និស្ស័យ

    ភ្នំពេញៈ ក្រុមហ៊ុន Marubeni Asian Power Singapore Pte. Ltd. បានបង្ហាញបំណងពង្រីកការវិនិយោគលើការផ្គត់ផ្គង់ និងផលិតទឹកកស្អាត និងទឹកពិសារនៅកម្ពុជា។

ព័ត៌មាននេះ ត្រូវបានលើកឡើងកាលពីថ្ងៃទី៦ សីហា នៅពេលជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភាក្សាការងារជាមួយលោក IKEYA Yusuke អនុប្រធានក្រុមហ៊ុន Marubeni Asian Power Singapore Pte. Ltd.។

ក្នុងឱកាសនោះ លោកអគ្គលេខាធិការបានមានមតិស្វាគមន៍យ៉ាងកក់ក្តៅជូនចំពោះគណៈប្រតិភូ និងបានសម្តែងនូវសេចក្តីសោម​នស្សរីករាយដែលលោក IKEYA Yusuke និងសហការីមកទស្សនកិច្ចនៅព្រះរាជាណាចក្រកម្ពុជានាពេលនេះ។

លោកអគ្គលេខាធិការ បានជម្រាបជូនក្រុមហ៊ុនពីបរិស្ថានវិនិយោគនៅកម្ពុជា ដែលពោរពេញដោយភាពអំណោយផល ពិសេសរបបលើកទឹកចិត្ត និងវិធានការគាំទ្រនានារបស់រាជរដ្ឋាភិបាល ដែលបន្តដាក់ចេញសំដៅធ្វើឱ្យបរិយាកាសវិនិយោគ និងធុរកិច្ចនៅកម្ពុជាកាន់តែប្រសើរទ្បើង។

បន្ថែមពីនេះ លោកអគ្គលេខាធិការក៏បានលើកទ្បើងពីគំរូ និងភាពជោគជ័យ របស់បណ្តាក្រុមហ៊ុនវិនិយោគជប៉ុនធំៗ នៅកម្ពុជាមួយចំនួនផងដែរ។

លោក IKEYA Yusuke បានធ្វើបទបង្ហាញខ្លីជូន លោកអគ្គលេខាធិការអំពីសាវតាររបស់ក្រុមហ៊ុន ជាពិសេសក្រុមហ៊ុនផ្គត់ផ្គង់ទឹកស្អាតរបស់លោក (Khmer Water Supply Holdings-KWSH) ដែលបាន និងកំពុងមានប្រតិបត្តិការផ្គត់ផ្គង់ទឹកស្អាត និងទឹកពិសាបរិសុទ្ធ នៅក្នុងខេត្តមួយចំនួននៃប្រទេសកម្ពុជា រួមមានខេត្តតាកែវ ព្រៃវែង សៀមរាប និងក្រចេះ។

ក្រុមហ៊ុន Khmer Water Supply Holdings ត្រូវបានបង្កើតទ្បើងតាំងពីឆ្នាំ២០១៣ ហើយបច្ចុប្បន្នក្រុមហ៊ុនមានបំណង ពង្រីកអាជីវកម្មរបស់ខ្លួន ឱ្យស្របនឹងនិន្នាការនាពេលបច្ចុប្បន្ន និងតម្រូវការចាំបាច់ចំពោះមុខរបស់ក្រុមហ៊ុន។

ជាការឆ្លើយតប លោកអគ្គលេខាធិការបានសម្តែងនូវការគាំទ្រ ក៏ដូចជាផ្តល់នូវអនុសាសន៍ណែនាំ ដល់ក្រុមហ៊ុនឱ្យធ្វើការសិក្សាចំពោះការផ្គត់ផ្គង់ទឹកស្អាត និងរៀបចំប្រព័ន្ធសម្អាតទឹកកង្វក់ នៅខេត្តស្វាយរៀង និងបាវិត ដោយនៅទីនោះមានបណ្តុំឧស្សាហកម្ម និងរោងចក្រជាច្រើន ប៉ុន្តែមិនទាន់មានប្រព័ន្ធអាងចម្រោះទឹករួម និងប្រព័ន្ធផ្គត់ផ្គង់ទឹករួមនៅទ្បើយទេ។

បន្ថែមពីនេះ លោកអគ្គលេខាធិការបានលើកទឹកចិត្ត ឱ្យក្រុមហ៊ុនឆាប់ធ្វើការសម្រេចចិត្តបណ្តាក់ទុននៅកម្ពុជា ដើម្បីឆាប់ទទួលបាននូវការលើកទឹកចិត្ត និងអត្ថប្រយោជន៍នានា ដូចមានចែងក្នុងច្បាប់ស្តីពីវិនិយោគនៃព្រះរាជាណាចក្រកម្ពុជា៕