ដោយៈ ម៉ាណា

ម៉ាឡេស៊ី រដ្ឋមន្រ្តី​ក្រសួងកសិកម្ម រុក្ខា​ប្រមាញ់ និង​នេសាទ លោកឌិត ទីណា ​បាន​រំលេច​អំ​ពី​ឱកាស​វិនិយោគ​លើ​វិស័យ​កែច្នៃ វេច​ខ្ចប់ និង​នាំចេញ​កសិផល​របស់​កម្ពុជា ដែល​ផ្ដល់​ផល​ចំណេញ​ និង​ផលប្រ​យោជន៍​ទៅវិញ ​ទៅមក​សម្រាប់​ប្រជា​ជន​នៃ​ភាគី​ទាំងពីរ​។

លោកឌិត ទីណា​​ បាន​លើក​ឡើងបែបនេះ​ ក្នុង​ជំនួប​ពិភាក្សា​ការងារ​លើ​វិស័យ​កសិកម្ម ​ជាមួយលោក​ Datuk Dr. Abdul Rahman Junaidi ​អនុរដ្ឋមន្រ្តី​ក្នុងខុទ្ទកាល័យ​នាយករដ្ឋមន្ត្រីនៃរដ្ឋសារ៉ាវ៉ាក់​ ប្រទេស​ម៉ាឡេស៊ី កាលពីព្រឹកថ្ងៃទី៦ ខែតុលា ឆ្នាំ២០២៥​។

លោករដ្ឋមន្ត្រី ឌិត ទីណា បានស្វាគមន៍ចំពោះចំណាប់អារម្មណ៍របស់រដ្ឋសារ៉ាវ៉ាក់ ​ក្នុងការពង្រឹងកិច្ច​សហ​ប្រតិបត្តិ​ការ ​ក្នុងវិស័យកសិ​កម្មកម្ពុជា ជាពិសេសការដោះដូរបច្ចេកទេសដាំដុះ​ និងលទ្ធភាព​បើក​ទីផ្សារនាំចូលស្រូវអង្ករ ផលិតផលសាច់ និងកសិផលមានសក្ដានុពលដទៃទៀតពីកម្ពុជា ដើម្បី​ធានាសន្តិសុខស្បៀងរដ្ឋសារ៉ាវ៉ាក់។

កម្ពុជា-ម៉ាឡេស៊ី បន្តពង្រឹងកិច្ចសហប្រតិបតិ្តការ លើវិស័យកសិ​កម្ម ធានានូវសន្តិសុខស្បៀង ជំរុញទំហំកសិ-ពាណិជ្ជកម្ម ជាពិសេសលើស្រូវអង្ករ និងភាពជាដៃគូដ៏រឹង​មាំយូរអង្វែងក្នុង​ការតភ្ជាប់ខ្សែច្រវាក់តម្លៃ និងផលិតកម្ម ហើយកម្ពុជាត្រៀមខ្លួនរួចជាស្រេច ក្នុងការផ្គត់ផ្គង់​កសិផលដល់រដ្ឋសារ៉ាវ៉ាក់ នៃប្រទេសម៉ាឡេស៊ី និងគាំទ្រវិនិយោគិនម៉ាឡេស៊ី​ក្នុងវិស័យ​កសិកម្មកម្ពុជាផងដែរ៕

ដោយៈ គង់ សូរិយា

    ភ្នំពេញៈ រដ្ឋាភិបាល តាមរយៈក្រសួងរៀបចំដែនដី និងក្រសួងមហាផ្ទៃ បានប្រកាសចាប់ផ្តើមប្រែក្លាយទីប្រជុំជនទាំងអស់ ឱ្យទៅជាបុរីជនបទ ភូមិឋានក្សេមក្សាន្ត ទ្រនំសុភមង្គល។

ផែនការនេះត្រូវបានប្រកាសកាលពីព្រឹកថ្ងៃទី៦ តុលា ក្រោមអធិបតីភាព លោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងលោកឧបនាយករដ្ឋមន្រ្តីស សុខា រដ្ឋមន្រ្តីក្រសូងមហាផ្ទៃ។

យោងតាមព៌ត៌មានដែលបានប្រកាសលើផេក របស់ក្រសួងដែនដី បានបង្ហាញថា ផែនការនេះ ក្រសួងទាំងពីរមានការឯកភាពគ្នា ធ្វើការរៀបចំប្លង់គោលនៃការប្រើប្រាស់ដី កំណត់តំបន់ពាណិជ្ជកម្ម តំបន់កសិកម្ម តំបន់ឧស្សាហកម្ម តំបន់សេដ្ឋកិច្ចពិសេស ការរៀបចំព្រំប្រទល់រដ្ឋបាលទូទាំងប្រទេស អាសយដ្ឋាន បង្គោលប្រតិភាគដែលជាខឿនសន្តិសុខជាតិ ការរៀបចំរបៀងនិងប៉ូលសេដ្ឋកិច្ច ទៅតាមសក្តានុពលតំបន់នីមួយៗ ដោយប្រើប្រាស់អ្វីដែលយើងមាន ការរៀបចំលំហសាធារណៈ ការដោះស្រាយសំណង់មិនរៀបរយ និងអគារចាស់ទ្រុឌទ្រោម ដែលទាំងនេះគឺជាស្នូល នៃយុទ្ធសាស្រ្តបញ្ចកោណដំណាក់កាលទី១របស់រាជរដ្ឋាភិបាលកម្ពុជា ព្រមទាំងឆ្លើយតបទៅនឹងដំណើរដ៏ជាក់លាក់របស់សង្គម និងសេដ្ឋកិច្ចកម្ពុជា ធ្វើឱ្យប្រជាជនមានជីវិតកាន់តែប្រសើរឡើង និងដើម្បីកម្ពុជាអាចរស់ដោយខ្លួនឯង ប្រកបដោ​យភាពឯករាជ្យម្ចាស់ការ។

កិច្ចប្រជុំនាពេលនេះ មានការអញ្ជើញចូលរួមពីថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ក្រសួងមហាផ្ទៃ ក្រសួងព្រះបរមរាជវាំង ក្រសួងសាធារណៈការ និងដឹកជញ្ជូន ថ្នាក់ដឹកនាំមកពីក្រសួង ស្ថាប័ន ដែលជាសមាជិកគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ រដ្ឋបាលខេត្ត មន្ទីរ និងអាជ្ញាធរមូលដ្ឋានពាក់ព័ន្ធ នាទីស្តីការក្រសួង។

ផ្អែកលើរបៀបរបបការងារ និងដំណើររបស់ក្រសួងរៀបចំដែនដី នគរូបនីយកម្ម និងសំណង់ និងក្រសួងមហាផ្ទៃ បានឈានមកដល់របត់នៃឱកាសសម្រាប់ធ្វើការងារថ្មី និងក្រោយពីការបង្កើតនូវបរិយា​កាសគ្មានវិវាទនៅកម្ពុជា ក្រសួងទាំងពីរបានងាកមកគិតគូរ លើការងាររៀបចំដែនដី និងនគរូបនីយកម្ម ដែលជាការបើកទំព័រថ្មី សម្រាប់សង្គមជាតិទាំងមូល៕

ដោយៈ គង់ សូរិយា

    ភ្នំពេញៈ ​​រយៈ​ពេល៩ខែ​ដើម​ឆ្នាំ​២០២៥ មាន​គម្រោង​វិនិយោគ​ជិត៥៥០​គម្រោង ​​ត្រូវ​បាន​អនុម័ត​ឱ្យ​វិនិយោគ​នៅ​កម្ពុជា ដោយ​កើន​ឡើង​ជាង៧០%​ ជាមួយទុនវិនិយោគប្រមាណ៧៨០០លានដុល្លារ បើ​ធៀប​នឹង​រយៈ​ពេល​ដូចគ្នា​កាល​ពី​ឆ្នាំ​២០២៤។​

យោងតាមសេចក្តី​ប្រកាស​ព័ត៌មាន ​របស់​ក្រុមប្រឹក្សាអភិវឌ្ឍន៍​កម្ពុជា(CDC) ចេញ​ផ្សាយ​កាល​ពី​ល្ងាច​ថ្ងៃ​ទី​២ ខែ​តុលា ឱ្យ​ដឹង​ថា ចាប់​ពី​ខែ​មករា-​ខែ​កញ្ញា ឆ្នាំ​២០២៥ គណៈកម្មាធិការវិនិយោគកម្ពុជា​នៃក្រុមប្រឹក្សាអភិវឌ្ឍន៍កម្ពុជា​(CDC) បានអនុម័តលើ​គម្រោងវិនិយោគ​សរុប៥៤៦ គម្រោង (២១៤ គម្រោង​ស្ថិត​ក្នុង​តំបន់​សេដ្ឋកិច្ច​ពិសេស) កើនឡើង ២៣១គម្រោង ឬ​ស្មើ​នឹង៧៣% បើ​ធៀប​នឹង​រយៈ​ពេល​ដូចគ្នា​ក្នុង​ឆ្នាំ​២០២៤។

​ប្រភព​ទុន​វិនិយោគ​ដែល​មាន​ចំនួន​ច្រើន​ជាង​គេ គឺ​មក​ពី​ប្រទេស​ចិន៥២,៩៦%, កម្ពុជា៣០,១៥%, សិង្ហបុរី៦,៩៣%, និង​វៀតណាម៥,២៤%។ ក្រៅ​ពី​នោះ​មាន​មក​ពី កោះBritish Virgin, អង់គ្លេស, កោះCayman, កោះ Samoa, Bermuda និង​សហរដ្ឋអាមេរិក។

ក្រុមប្រឹក្សាអភិវឌ្ឍន៍កម្ពុជាបានបន្តថា ក្នុង​ចំណោម​ទុន​វិនិយោគ​ទាំង​អស់​ខាង​លើ គឺ​​វិស័យ​ឧស្សាហកម្ម មាន​ទឹក​ប្រាក់៥,៣ពាន់​លាន​ដុល្លារ, កសិកម្មនិង​កសិ-ឧស្សាហកម្ម៤០៥លាន​ដុល្លារ, ទេសចរណ៍ ១៧៥លាន​ដុល្លារ និង​ហេដ្ឋារចនាសម្ព័ន្ធ-វិស័យ​ផ្សេងៗ១,៩ ពាន់​លាន​ដុល្លារ​។​

CDC បាន​បញ្ជាក់​ថា “ត្រឹមតែរយៈពេល៩ខែ ស្ថាប័ននេះបានចុះបញ្ជីគម្រោងវិនិយោគ​ លើសការចុះបញ្ជីគម្រោងវិនិយោគពេញ​មួយឆ្នាំ២០២៤ រហូតដល់ទៅ១៣២គម្រោង”។

ដោយឡែក​ក្នុងខែកញ្ញា ឆ្នាំ២០២៥CDC បានសម្រេចចុះបញ្ជី​គម្រោងវិនិយោគសរុប៥៥គម្រោង ក្នុងទំហំទុនវិនិយោគសរុប​៤៦៧ លានដុល្លារ និងអាចបង្កើតការងារបាន៣៧ពាន់កន្លែង។ គម្រោងវិនិយោគទាំង​នេះ គឺ​ចំនួន៣៨ ស្ថិតនៅក្រៅតំបន់សេដ្ឋកិច្ចពិសេស និង ១៧ នៅក្នុងតំបន់សេដ្ឋកិច្ចពិសេស។

អនុប្រធាន​សភាពាណិជ្ជកម្មកម្ពុជា អ្នកឧកញ៉ាលឹម ហេង បាន​និយាយ​ថា ការអនុម័ត​គម្រោង និង​ទុនវិនិយោគ​ក្នុង​ចំនួន​ច្រើន​បែបនេះ គឺ​បញ្ជាក់​ពី​ទំនុកចិត្ត និង​ភាពរឹងមាំ​នៃ​ទីផ្សារ​ដែល​វិនិយោគិន​សម្លឹ​ង​ឃើញ​ពី​ការបណ្តាក់ទុន​នៅ​កម្ពុជា ខណៈ​កម្ពុជា​ជា​ប្រទេស​មាន​ស្ថិរភាព​នយោបាយ និង​កំណើន​សេដ្ឋកិច្ច​រឹងមាំ ព្រមទាំង​មាន​កិច្ចព្រមព្រៀង​ពាណិជ្ជកម្ម​សេរី ​ជាមួយ​ប្រទេស​ជាច្រើន ពិសេស​ប្រទេស​ចិន ដែល​ជា​ទីផ្សារ​ មាន​ប្រជាជន​ច្រើនជាងគេ​លើ​ពិភពលោក​។

លោកបញ្ជាក់ថា “ការ​កែលម្អប្រព័ន្ធច្បាប់វិនិយោគ និង​ហេដ្ឋារចនាសម្ព័ន្ធដឹកជញ្ជូន ក៏​កំពុង​ក្លាយ​ជា​កម្លាំង​ស្រូប​មួយ​បន្ថែម​ទៀត​ ក្នុង​ការ​ទាក់​ទាញ​អ្នក​វិនិយោគ​ឱ្យ​មក​បណ្តាក់​ទុន​កាន់​តែ​ច្រើន”។​

លោក​បាន​ថ្លែង​ថា “អ្វីដែល​ពិសេស​នាពេលនេះ គឺ​ការចូល​មក​បណ្តាក់ទុន​កាន់តែច្រើន​ លើ​ឧស្សាហកម្ម​ធុន​មធ្យម និង​ធ្ងន់ ហើយ​ចំនួន​នេះ ​នឹង​បន្ត​កើនឡើង​ទៀត​ចាប់ពីពេលនេះ​តទៅ​”។

លោក​បាន​បន្ថែម​ថា គោលនយោបាយ​របស់​រដ្ឋាភិបាល ​ក្នុង​ការជំរុញ​ការ​ធ្វើ​សមាហរណកម្ម​សេដ្ឋកិច្ច​កម្ពុជា ​ទៅ​កាន់​គ្រប់​ប្រទេស​លើ​សកលលោក គឺ​​ជា​កម្លាំង​ចលករ​បន្ថែម​ទៀត ​ដែល​នឹង​ធ្វើឱ្យ​វិនិយោគិន​កាន់តែ​ច្រើន​បញ្ចេញ​ទុន​មក​វិនិយោគ​នៅ​កម្ពុជា​​។

កាល​ពី​​ឆ្នាំ២០២៤ កន្លងមកនេះ កម្ពុជាបានទទួល​​គម្រោងវិនិយោគចំនួន​៤១៤គម្រោង ដែល​ទទួល​បាន​ការ​អនុម័ត​ពី​ក្រុមប្រឹក្សា​អភិវឌ្ឍន៍​កម្ពុជា៕

ដោយៈ ម៉ាណា

    ភ្នំពេញៈ ក្រុមប្រឹក្សាអភិវឌ្ឍន៍កម្ពុជា និងអគ្គនាយកដ្ឋានអន្តោប្រវេសន៍បានបើកកិច្ចប្រជុំពិភាក្សា ដើម្បីការផ្ដល់កិច្ចសម្រួលដល់វិនិយោគិនបន្ថែម។

កិច្ចប្រជុំកាលពីសប្តាហ៍មុននេះ ធ្វើឡើងក្រោមអធិបតីភាពលោកបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) បានដឹកនាំកិច្ចប្រជុំកិច្ចពិភាក្សាអំពីការរៀបចំយន្តការ និងដំណើរការការងារនានាដើម្បី ផ្ដល់ទិដ្ឋាការរយៈពេលវែងជូនវិនិយោ​គិន និងនយោជិតបរទេស និងរៀបចំច្រកឆ្លងកាត់ពិសេស សម្រាប់វិនិយោគិន នៅតាមអាកាសយាន្តដ្ឋានអន្តរជាតិ ក្នុងប្រទេសកម្ពុជា ដែលជាការផ្ដល់ការលើកទឹកចិត្ត មិនមែនពន្ធជូនវិនិយោគិន ដើម្បីទាក់ទាញការវិនិយោគមកកម្ពុជាបន្ថែមទៀត។

កិច្ចប្រជុំនេះមានការអញ្ជើញចូលរួមពីសំណាក់ លោកឧត្តមសេនីយ៍ឯក សុខ លីហួត អគ្គនាយករង នៃអគ្គនាយកដ្ឋានអន្តោប្រវេសន៍ ជាប្រធានក្រុមប្រចាំការនៅ ក.អ.ក., ប្រធាន-ប្រធានស្ដីទីនាយកដ្ឋានចំណុះ គ.វ.ក. និងមន្ត្រីបច្ចេកទេសមួយចំនួន។

សមាជិកកិច្ចប្រជុំបានពិភាក្សា ផ្លាស់ប្ដូរយោបល់យ៉ាងផុសផុល ប្រកបដោយស្មារតីសហការ និងសាមគ្គីភាព រវាងគណៈកម្មាធិការវិនិយោគកម្ពុជា និងអគ្គនាយកដ្ឋានអន្តោប្រវេសន៍ ក្នុងស្មារតីរួមគឺផ្ដល់កិច្ចសម្រួលដល់វិនិយោគិន ដើម្បីលើកកម្ពស់ភាពទាក់ទាញរបស់កម្ពុជា៕