ដោយៈ គង់ សូរិយា

        ភ្នំពេញៈ ខណ្ឌទួលគោក ដេញថ្លៃគម្រោងអភិវឌ្ឍន៍ចំនួន១៥ សម្រាប់សង្កាត់ទាំង១០ ដោយមានតម្លៃប្រមាណ១៩២៨លានរៀល។ គម្រោងទាំងនេះមានដូចជា ការដាក់លូ ស្តារលូ ការជួសជុលផ្លូវ និងរៀបការ៉ូឡាជាដើម។

ពិធីដេញថ្លៃគម្រោងមូលនិធិអភិវឌ្ឍន៍សង្កាត់ ឆ្នាំ២០២៣នេះ បានធ្វើឡើង នាព្រឹកថ្ងៃទី៧ ខែកក្កដា ឆ្នាំ២០២៣ ក្រោមអធិបតីភាព លោកហួត ហៃ អភិបាលរងរាជធានីភ្នំពេញ តំណាងលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោក ជា ពិសី អភិបាល នៃគណៈអភិបាលខណ្ឌទួលគោក នៅសាលាខណ្ឌទួលគោក។លោក ហួត ហៃ មានប្រសាសន៍ថា ការដេញថ្លៃគម្រោងមូលនិធិអភិវឌ្ឍន៍សង្កាត់ ជាការចូលរួមរបស់វិស័យឯកជន តាមរបៀបប្រកួតប្រជែងប្រកបដោយយុត្តិធម៌ តម្លាភាព គណនេយ្យភាព និងអាចជឿទុកចិត្តបាន ពីគ្រប់ភាគីពាក់ព័ន្ធទាំងអស់ ដែលជាមូលដ្ឋានគ្រឹះ នៃអភិបាលកិច្ចល្អ ក្នុងការចូលរួមអភិវឌ្ឍមូលដ្ឋាន ដើម្បីឆ្លើយតម្រូវការប្រជាពលរដ្ឋនៅតាមគោលដៅរបស់គម្រោង។

លោកបន្តថា ដូច្នេះរាល់ការសាងសង់ ត្រូវធ្វើឱ្យមានគុណភាព ស្របតាមបទដ្ឋានបច្ចេកទេស មានសោភ័ណភាព និងមានតម្លៃសមស្រប មិនប៉ះពាល់បរិស្ថានសង្គម ធានាបានសុវត្ថិភាពសាធារណៈ និងប្រើប្រាស់បានយូរអង្វែង។

លោក ហួត ហៃ បានណែនាំឱ្យលោកចៅទាំង១០ និងមន្ត្រីពាក់ព័ន្ធត្រូវតាមដានគុណភាពគម្រោង តាំងពីពេលអនុវត្តគម្រោងរហូតដល់ ការអនុវត្តគម្រោងត្រូវបានបញ្ចប់១០០% ព្រោះថា ថវិការបស់រដ្ឋច្រើនណាស់ បានទម្លាក់មកឱ្យថ្នាក់សង្កាត់ទាំង១០នេះ ដែលមានប្រមាណ៥០ម៉ឺនដុល្លារ៕

ដោយៈ គង់ សូរិយា

        ភ្នំពេញៈ ​កម្ពុជា និងអូស្រ្តាលី បានកំពុងធ្វើការរួមគ្នា ជំរុញ​ការបង្កើតសួនកសិ-ឧស្សាហកម្ម ​នៅកម្ពុជាឱ្យបានឆាប់ ​ដើម្បីជំរុញការផលិត និងកែច្នៃផលិតផលកសិកម្មនៅកម្ពុជា​ សម្រាប់នាំចេញទៅកាន់ទីផ្សារអន្តរជាតិ។

អនុប្រធានសភាពាណិជ្ជកម្មកម្ពុជា បានមានប្រសាសន៍ឲ្យដឹងកាលពីល្ងាចថ្ងៃទី៦ កក្កដាថា បច្ចុប្បន្ននេះ សភាពាណិជ្ជកម្មកម្ពុជា បាននិងកំពុងធ្វើការរួមគ្នា ជាមួយស្ថានទូតអូស្រ្តាលីប្រចាំកម្ពុជា តាមរយៈអង្គការ កម្មវិធីខ្សែច្រវាក់តម្លៃកសិកម្មកម្ពុជា-អូស្រ្តាលី(CA​VAC) ជំរុញការ​បង្កើតសួនកសិ-ឧស្សាហកម្ម​នៅកម្ពុជា ឱ្យបានឆាប់ជាច្រើន គោលដៅដែលអាចធ្វើទៅបាន។លោកបានគូសបញ្ជាក់ថា “គោលដៅដែលអាចនឹងជ្រើសរើសបង្កើត​សួនកសិ-ឧស្សាហកម្មនាពេល​​នេះ គឺនៅប៉ូលសេដ្ឋកិច្ចពិសេសទី ៤របស់កម្ពុជា គឺស្ថិតនៅភូមិភាគពាយព្យនៃប្រទេសកម្ពុជា។

លោកបន្ថែមថា  សួនកសិ-ឧស្សាហកម្មនេះ គឺជាតម្រូវការរបស់ប្រទេសកម្ពុជា ដែលជាគោលដៅ នៃគោលនយោបាយរបស់កម្ពុជា ដែលបានដាក់ចេញ ដើម្បីបង្កើន​ឧស្សាហកម្មកែច្នៃ សម្រាប់ផលិតផ​លកសិកម្មរបស់យើង នៅថ្ងៃអនាគតឱ្យបានកាន់តែច្រើន ជៀសវាងការនាំចេញនូវវត្ថុធាតុដើមទៅទាំងដុល ដោយយើងមិនបានតម្លៃបន្ថែម ក្នុងការកែច្នៃផលិតផលកសិកម្មរបស់យើង ដែលនេះគឺជាយុទ្ធសាស្រ្តសម្រាប់ប្រទេសកម្ពុជាយើង។

លោក​បន្ថែមថា នៅថ្ងៃទី១០ ខែកក្កដាខាងមុខ ប្រេសិតពិសេសរបស់អូស្រ្តាលី ទទួលបន្ទុកផ្នែកអាស៊ីអាគ្នេយ៍ នឹងមកទស្សនកិច្ចនៅកម្ពុជា។ ​ក្នុងឱកាសនោះដែរអ្នកឧកញ៉ា គិត ម៉េង ប្រធានសភាពាណិជ្ជកម្ពុជា នឹងដឹកនាំប្រតិភូសភាពាណិជ្ជកម្ម ជួបពិភាក្សាការងារជាមួយលោក ដើម្បីជំរុញកិច្ចសហប្រតិបត្តិការទ្វេភាគី រវាងកម្ពុជា និងអូស្រ្តាលី លើវិស័យឧស្សាហកម្ម ពាណិជ្ជកម្ម និងសេដ្ឋកិច្ច ដែលក្នុង​កិច្ចពិភាក្សានេះ នឹងលើកយកបញ្ហា​សួនកសិ- ឧស្សាហកម្មនេះ ទៅជជែកពិភាក្សាផងដែរ ដើម្បីជំរុញឱ្យសួនកសិ-ឧស្សាហកម្មនេះ អាចបង្កើតបាននៅតាមតំបន់នានា ដែលអាចបង្កើតបាន។ស្ថានទូតអូស្រ្តាលីប្រចាំកម្ពុជា ​នៅថ្ងៃទី៥ ខែកក្កដា ឆ្នាំ២០២៣ បានលើកឡើងថា ​ប្រទេសអូស្ត្រាលីកំពុងគាំទ្រ រដ្ឋាភិបាលកម្ពុជា ក្នុងការអភិវឌ្ឍសួនកសិ-ឧស្សាហកម្មនៅកម្ពុជា ដែលសួនកសិ-ឧស្សាហកម្មនេះ នឹងជួយបង្កើននូវតម្លៃបន្ថែម លើផលិតផលកសិកម្ម និងការនាំចេញរបស់កម្ពុជា។

សួននេះផងដែរ ត្រូវបានគេរំពឹងថា នឹងចូលរួមចំណែកចំនួន៥​.១ ពាន់លានដុល្លារអាមេរិក ដល់សេដ្ឋកិច្ចកម្ពុជានៅឆ្នាំ២០៤៥ និងបង្កើតការងារថ្មីរហូតដល់១០ម៉ឺនកន្លែង ដែលជាងពាក់កណ្តាលការងារទាំងនេះនឹងជារបស់ស្ត្រី។

ស្ថានទូតអូស្រ្តាលីប្រចាំកម្ពុជា បានលើកឡើងបន្តថា សួនកសិ-ឧស្សាហកម្ម នឹងក្លាយជាមជ្ឈមណ្ឌលសម្រាប់ការកែច្នៃ ការស្រាវជ្រា​វ និងការអភិវឌ្ឍកសិផល ការកសាងសមត្ថភាព ហើយកំពុងត្រូវបានបង្កើតឡើង ដើម្បីផ្តល់នូវកន្លែងធ្វើការ និងបរិស្ថានប្រកបដោយបរិយាបន្ន សុវត្ថិភាព ជាពិសេសសម្រាប់ស្ត្រី និងបុគ្គលិកដែលមានភាពខ្វះខាត។

កាលពីខែមេសាកន្លងមកនេះ កម្មវិធីភាពជាដៃគូ អូស្ត្រាលី កម្ពុជា ដើម្បីការអភិវឌ្ឍសេដ្ឋកិច្ចប្រកបដោយភាពធន់ (CAPRED) បានរៀបចំដំណើរទស្សនកិច្ច សម្រាប់សមាជិកគណៈកម្មាការសួនកសិ-ឧស្សាហកម្ម (AIP) របស់កម្ពុជាទៅកាន់ទីក្រុងម៊ែលប៊ន និងទីក្រុងភើត ដើម្បីពិនិត្យមើលសួនកសិ-ឧស្សាហកម្មនានារបស់អូស្ត្រាលី និងស្វែងយល់អំពីប្រព័ន្ធអេកូឡូស៊ី សួនកសិ-ឧស្សាហកម្ម រួមទាំងការកែច្នៃចំណីអាហារ ការបង្កើនបរិយាកាសធុរកិច្ច និងគោលនយោបាយរបស់រដ្ឋាភិបាលក្នុងប្រទេសអូស្ត្រាលី។

យោងតាមរបាយការណ៍ របស់​ស្ថានទូតអូស្រ្តាលីប្រចាំកម្ពុជា ​ដែលបានបង្ហាញកាលពីពេលថ្មីៗនេះ បានឱ្យដឹងថា កសិផលកម្ពុជាមិនទាន់កែច្នៃប្រមាណ៩០% ត្រូវបានលក់ទៅតាមបណ្តាប្រទេសជិតខាងក្នុងតំបន់អាស៊ាន ហើយប្រទេសទាំងនោះ បានយកទៅកែច្នៃជាផលិតផល មានតម្លៃជាងកសិផលដើម ដូចជា ច្នៃធ្វើទៅជា តំណាប់ ទឹកផ្លែឈើ នំស្រួយ អាហារទារក ម្សៅ និងជីវឥន្ធនៈ ជាដើម។នៅត្រីមាសទី១ ឆ្នាំ២០២៣ កម្ពុជាបាននាំចេញកសិផលទៅទីផ្សារអន្តរជាតិ ក្នុងបរិមាណសរុបជាង២.៥លានតោន ដែលមានតម្លៃជាង១.៣ពាន់លានដុល្លារ។ នេះបើយោងតាមរបាយការណ៍របស់ក្រសួងកសិកម្ម៕

គួរបញ្ជាក់ដែរថា ប្រមុខរដ្ឋាភិបាលកម្ពុជា សម្តេចតេជោហ៊ុន សែនបានសម្រេ​ចបង្កើតប៉ូលសេដ្ឋកិច្ចទី៤របស់កម្ពុជា គ្របដណ្ដប់លើខេត្តពោធិ៍សាត់ ខេត្ត​បាត់ដំបង ខេត្តបន្ទាយមានជ័យ និងប៉ៃលិន៕

ដោយ: គង់ លាងហួរ

អន្តរជាតិ: ក្រុមប្រឹក្សាវិនិយោគថៃ (BoI) រំពឹងថា ក្រុមហ៊ុនផលិតរថយន្តអគ្គិសនីចិន (EV) ចំនួនពីរនឹងជំរុញកំណើន នៃឧស្សាហកម្មរថយន្ត EV របស់ប្រទេសថៃ តាមរយៈការវិនិយោគដែលបានគ្រោងទុកនៅទីនេះ។

ក្រុមហ៊ុន Changan Automobile មុននេះ បានប្រកាសពីការបោះទុនវិនិយោគ៩,៨ពាន់លានបាត ដើម្បីអភិវឌ្ឍរថយន្ត EVs ទៅជា៣ប្រភេទគឺ អាគុយ EVs រថយន្ត plug-in hybrid EVs និងរថយន្ត range-extended EVs។ ចំណែកឯ ក្រុមហ៊ុន Chery Automobile ក៏គ្រោងនឹងធ្វើការវិនិ យោគលើរថយន្តអគ្គិសនី (EV) នៅក្នុងប្រទេសថៃនៅឆ្នាំក្រោយផងដែរ។

លោក Narit Therdsteerasukdi អគ្គលេខាធិការក្រុមប្រឹក្សា BoI បានលើកឡើងថា “ក្រុមហ៊ុនទាំងពីរ គឺជាក្រុមហ៊ុនផលិតរថយន្តធំ។ Changan Automobile គឺជាក្រុមហ៊ុនផលិតរថយន្ត EV ធំជាងគេទី៥នៅក្នុងប្រទេសចិន ខណៈដែលក្រុមហ៊ុនChery Automobile ជាប់ចំណាត់ថ្នាក់ទី៦”។

លោកបានជួបនាយកប្រតិបត្តិ នៃក្រុមហ៊ុនទាំងពីរ ខណៈដែល BoI បានរៀបចំកម្មវិធីបង្ហាញផ្លូវចុងក្រោយរបស់ខ្លួន នៅក្នុងទីក្រុង Chongqing និងទីក្រុង Chengdu របស់ប្រទេសចិន ចន្លោះថ្ងៃទី២៨ ដល់ថ្ងៃទី៣០ ខែមិថុនា។

កាល​ពី​ដើម​ខែ​មេសាកន្លងទៅ ក្រុម​ប្រឹក្សា​វិនិយោគថៃ(BoI)ក៏បាន​រៀបចំ ធ្វើ​កម្មវិធីបង្ហាញ​ផ្លូវ​នៅក្នុង​ទីក្រុង Guangzhou ក្រុង Shanghai និងក្រុង Shenzhen ផងដែរ។

លោក Narit បានអះអាងទៀតថា “យើងបានជួបជាមួយលោក Zhu Huarong ប្រធានក្រុមហ៊ុន Changan Automobile ដោយក្រុមហ៊ុន​នេះកំពុង​រង់ចាំ​ ការ​យល់ព្រម​ចុងក្រោយ​ពី​រដ្ឋាភិបាល​ចិន ​ក្នុង​ការ​វិនិយោគ​នៅ​ប្រទេស​ថៃ”។

រដ្ឋាភិបាលថៃកំពុងព្យាយាមបញ្ចុះបញ្ចូល អ្នកវិនិយោគបរទេសឱ្យវិនិយោគលើរថយន្តអគ្គិសនី ដែលស្ថិតក្នុងចំណោមឧស្សាហកម្មគោលដៅ នៅក្នុងច្រករបៀងសេដ្ឋកិច្ចភាគខាងកើត។

គណៈកម្មាធិការគោលនយោបាយ EV ជាតិបានប្រកាសកាលពីឆ្នាំ២០២១ ថា ខ្លួនមានបំណងជំរុញឱ្យរថយន្ត EVs បង្កើតបាន៥០% នៃយានយន្តដែលផលិតក្នុងស្រុក នៅឆ្នាំ២០៣០ និងជាផ្នែកមួយនៃផែនការមហិច្ឆតា ដើម្បីធ្វើឱ្យប្រទេសថៃ ក្លាយជាមជ្ឈមណ្ឌល EV ក្នុងតំបន់៕

(ភ្នំពេញ)៖ ឆ្នាំ២០២៤ ខាងមុខនេះ សេដ្ឋកិច្ចកម្ពុជា ត្រូវបានព្យាករថា នឹងសម្រេចបាននូវអត្រាកំណើនក្នុងរង្វង់៦.៦%។ នេះបើតាមសារាចរ ស្ដីពី ការៀបចំផែនការយុទ្ធសាស្ដ្រថវិកាឆ្នាំ២០២៤-២០២៦ និងការរៀបចំសេចក្ដីព្រាងច្បាប់ ស្ដីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៤ របស់រាជរដ្ឋាភិបាលកម្ពុជា

រាជរដ្ឋាភិបាលកម្ពុជាបានបញ្ជាក់ថា «សម្រាប់ឆ្នាំ២០២៤ខាងមុខនេះ, សេដ្ឋកិច្ចកម្ពុជា ត្រូវបានព្យាករថា នឹងសម្រេចបាននូវអត្រាកំណើន ក្នុងរង្វង់ ៦.៦% ដោយសារការរំពឹងទុក នៃការត្រឡប់មករកភាពល្អប្រសើរឡើងវិញ នៃតម្រូវការខាងក្រៅ និងទំនុកចិត្តវិនិយោគ ស្របពេលសកម្មភាពសេដ្ឋកិច្ចក្នុងស្រុក នៅបន្តរក្សាបានតុល្យភាព»។

សេដ្ឋកិច្ចកម្ពុជាក្នុងឆ្នាំ ២០២៤ ត្រូវបានគាំទ្រដោយ៖
១៖ វិស័យកសិកម្ម ត្រូវបានព្យាករថា នឹងសម្រេចបានកំណើនក្នុងរង្វង់ ១.១% ដែលគាំទ្រដោយកំណើននៃអនុវិស័យដំណាំ និងអនុវិស័យចិញ្ចឹមសត្វ ស្របពេលដែលអនុវិស័យនេសាទរំពឹងថា នឹងបន្តងើបឡើងវិញសន្សឹមៗ
២៖ វិស័យឧស្សាហកម្ម ត្រូវបានព្យាករថា នឹងសម្រេចបានកំណើនក្នុងអត្រា ៨.៥% ដែលទ្រទ្រង់ដោយកំណើនល្អប្រសើរនៃអនុវិស័យកាត់ដេរ និងកម្មន្ត-សាលមិនមែនកាត់ដេរ ខណៈអនុវិស័យសំណង់បន្តសម្រេចបានកំណើនទាបជាងនិន្នាការមុនវិបត្តិកូវីដ-១៩
៣៖ វិស័យសេវាកម្ម ត្រូវបានព្យាករថា នឹងបន្តនិន្នាការកើនឡើងក្នុងអត្រា ៦.៩% ដោយការបន្តកើនឡើងនូវសកម្មភាព ក្នុងអនុវិស័យសណ្ឋាគារ និងភោជនីយដ្ឋាន និងសេវាកម្មគាំទ្រផ្សេងទៀត រួមមាន អនុវិស័យលក់ដុំ-រាយ និងអនុវិស័យដឹកជញ្ជូន និងគមនាគមន៍ ក្នុងខណៈដែលអនុវិស័យអចលនទ្រព្យ ត្រូវបានរំពឹងថា នៅបន្តសម្រេចបានកំណើនទាបជាងនិន្នាការធម្មតា។

តាមការប៉ាន់ស្មាន និងការព្យាករកំណើនសេដ្ឋកិច្ចកម្ពុជា ក្នុងអត្រា៥.៦% សម្រាប់ឆ្នាំ២០២៣ និង៦.៦% សម្រាប់ឆ្នាំ២០២៤ គឺត្រូវបានគិតគូរក្នុងកម្រិតបន្ទាត់មូលដ្ឋាន (Baseline projection) ស្របពេលដែលទស្សនវិស័យសេដ្ឋកិច្ចសកល និងតំបន់ កាន់តែមានភាពមិនប្រាកដប្រជាខ្ពស់។

ការអនុវត្ត «ក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣» ក្នុងពេលកន្លងមក ទាំងលើការស្តារវិស័យជាចន្ទល់កំណើនដែលមានស្រាប់ ក៏ដូចជាការលើកកម្ពស់វិស័យសក្តានុពលថ្មីៗមួយចំនួនទៀត រួមមាន៖ ការអភិវឌ្ឍសហគ្រាសធុនតូច និងមធ្យម និងការអភិវឌ្ឍហេដ្ឋារចនាសម្ព័ន្ធឌីជីថល និងបៃតង នឹងរួមចំណែកយ៉ាងសំខាន់ក្នុងការជំរុញ និងបង្កើនតម្លៃបន្ថែមដល់សេដ្ឋកិច្ច៕Fresh News

ដោយៈ គង់ សូរិយា

        ភ្នំពេញៈ អាជ្ញាធរខេត្តបាត់ដំបង ដឹកនាំដោយលោកសុខ លូអភិបាលនៃគណៈអភិបាលខេត្ត បានដឹកនាំមន្រ្តីជំនាញពាក់ព័ន្ឋ ចុះពិនិត្យមើលប្រាសាទឯកភ្នំ មុនឈានទៅកែលំអរ ដើម្បីទាក់ទាញភ្ញៀវទេសចរណ៍ជាតិ អន្តរជាតិ។

ការចុះពិនិត្យរបស់លោកអភិបាលខេត្ត ធ្វើឡើងកាលពីព្រឹកថ្ងៃ ទី៦ ខែកក្កដា ឆ្នាំ២០២៣។ខេត្តបាត់ដំបង ជាខេត្តមានសក្តានុពលទេសចរណ៍ ដ៏ធំមួយនៅភូមិភាគពាយ័ព្យប្រទេស ដោយសារខេត្តនេះ មានតំបន់រមណីយដ្ឋានទេសចរណ៍ធម្មជាតិ វប្បធ៌ម ប្រវត្តិសាស្រ្ត និងសំណង់បន្សល់ទុកពីសម័យអាណានិគមនិយមបារាំងជាច្រើន។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា ខេត្តបាត់ដំ​បង មានភាពអំណោយផលខ្ពស់ និងមានចំណុចទាក់ទាញ ភ្ញៀវទេសចរណ៍យ៉ាងច្រើន ពិសេសភ្ញៀវទេសចរណ៍មកពីអឺរ៉ុប ដោយសារពួកគេមកសិក្សាពីសំណង់ប្រវត្តិសា​ស្រ្ត និងភាពទាក់ទាញរបស់ខេត្តនេះ បានធ្វើឲ្យពួកគេចូលចិត្តនិងបានចាប់ចិត្តមកទស្សនា។

លោកបន្តថា “ខេត្តបាត់ដំបងជាប៉ូលទេសចរណ៍ដ៏ធំមួយ សម្រា​ប់តំបន់ភូមិភាគពាយ័ព្យប្រទេស បន្ទាប់ពីខេត្តសៀមរាប បាត់ដំបង ជាខេត្តមួយគួរឲ្យចាប់អារម្មណ៍ និងមានសក្តានុពលដែលអាចទាក់ទាញភ្ញៀវទេសចរណ៍កាន់តែច្រើនទៀតនាពេលអនាគត”។

តារាហូលីវូដដ៏ល្បីល្បាញ អ្នកនាងអេនជេ លីណាជូលី ដែលទទួលបានសញ្ជាតិកម្ពុជាផងដែរនោះ បានថតខ្សែភាពយន្តទាក់ទងនឹងរបបខ្មែរក្រហម “មុនដំបូងគេសម្លាប់ប៉ាខ្ញុំ” ដោយជ្រើសរើសខេត្តនេះ ជាទីតាំងស្នូលសម្រាប់ថតផងដែរ៕

(ព្រះសីហនុ)៖ នារសៀលថ្ងៃទី០៦ ខែកក្កដា ឆ្នាំ២០២៣នេះ ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍ បានអញ្ជើញសម្ពោធបើកឱ្យប្រើប្រាស់ជាផ្លូវការកំពង់ផែទេសចរណ៍ខេត្តព្រះសីហនុ ដែលជាកំពង់ផែដ៏ធំមួយដែលអាចចេញចូលអូប័រទេសចរណ៍តូចធំ ២០គ្រឿងក្នុងពេលតែមួយ និងជាទីចំណតដ៏សុវត្ថិភាពតែមួយគត់ សក្កិសមជាកំពង់ផែទេសចរណ៍ដ៍មានសក្តានុពលប្រចាំខេត្តព្រះសីហនុ និងដើម្បីសម្រួលដល់ការធ្វើដំណើររបស់ភ្ញៀវទេចរទាំងជាតិ និងអន្តរជាតិ។

បើតាមអ្នកឧកញ៉ា ទៀ វិចិត្រ បានឱ្យដឹងថា ដោយមានការជំរុញនិងលើកទឹកចិត្តពីរដ្ឋបាលខេត្ត លើវិស័យទេសចរណ៍ផ្លូវទឹក និងទទួលបានការអនុញ្ញាតពីប្រតិភូរាជរដ្ឋាភិបាលទទួលបន្ទុក អគ្គនាយកកំពង់ផែអន្តរជាតិខេត្តព្រះសីហនុ ក្រុមហ៊ុន G.T.V.C IMPORT EXPORT CO.LTD បានទទួលសិទ្ធវិនិយោគពីកំពង់ផែអន្តរជាតិក្រុងព្រះសីហនុ ដែលស្ថិតនៅច្រកទី១ លើផ្ទៃដី ប្រមាណ ២២,០០០ម៉ែត្រការេ និងមានកំពង់ផែដែលអាចចេញចូល អូប័រទេសចរណ៍តូចធំ ២០គ្រឿងក្នុងពេលតែមួយ។ កំពង់ផែមួយនេះគឺជាទីចំណតដ៏សុវត្ថិភាពតែមួយគត់ ដែលមានលក្ខណៈសម្បត្តិពេញលេញ សក្កិសមជាកំពង់ផែទេសចរណ៍ដ៍មានសក្តានុពលប្រចាំខេត្តព្រះសីហនុ។លើកឡើងនាឱកាសនោះដែរឯកឧត្ដម គួច ចំរើន ក៏បានស្នើសុំការគាំទ្រពីឯកឧត្ដមរដ្ឋមន្ត្រីក្រសួងទេសចរណ៍ លើកការរៀបចំកំពង់ផែទេសចរណ៍ខេត្តព្រះសីហនុ ទៅជាកំពង់ផែទេសចរណ៍អន្តរជាតិ ដើម្បីធ្វើការផ្លាស់ប្តូរភ្ញៀវទេសចរមកពី ថៃ និងវៀមណាម និងលំហូរពីបណ្តាប្រទេសដ៏ទៃទៀតឱ្យមានការផ្លាស់ប្តូរទេសចរទៅមកផងដែរ។ ដោយលោកអះអាងថា នាពេលកន្លងមកខេត្តព្រះសីហនុ មិនទាន់មានកំពង់ផែទេសចរណ៍ខ្នាតអន្តរជាតិនៅឡើយទេ ដោយលោកគ្រោងស្នើសុំរាជរដ្ឋាភិបាល ដើម្បីរៀបចំកំពង់ផែនេះឱ្យក្លាយជាកំពង់ផែខ្នាតអន្តរជាតិនាទឹកដីក្រុងព្រះសីហនុនាពេលខាងមុខផងដែរ។លើកឡើងនាឱកាសនោះឯកឧត្ដម ថោង ខុន បានឱ្យដឹងថា ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា, កម្ពុជាទទួលបានសុខសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គមយ៉ាងពេញលេញ និងមានការអភិវឌ្ឍលើគ្រប់វិស័យ ជាពិសេស វិស័យទេសចរណ៍កម្ពុជាបានរីកលូតលាស់គួរជាទីមោទនៈ ដោយត្រូវបានចាត់ទុកថាជា «មាសបៃតង» ដែលបានដើរតួនាទីជាចន្ទល់គន្លឹះមួយក្នុងការជំរុញកំណើនសេដ្ឋកិច្ចជាតិ តាមរយៈការបង្កើនចំណូលជូនជាតិ ព្រមទាំងការបង្កើតការងារ និងការលើកកម្ពស់ជីវភាពរបស់ប្រជាពលរដ្ឋ។ឯកឧត្ដម ថោង ខុន ក៏បានបង្ហាញជំនឿយ៉ាងមុតមាំថា កំពង់ផែទេសចរណ៍ និងសម្បទាទ្រទ្រង់នៅទីនេះនឹងមិនត្រឹមតែជាសម្បទាទេសចរណ៍ដ៏សំខាន់មួយ ដែលនឹងផ្តល់នូវភាពងាយស្រួល សុវត្ថិភាព សន្តិសុខសណ្តាប់ធ្នាប់ល្អជូនដល់ភ្ញៀវទេសចរមកពីគ្រប់ទិសទី រួមចំណែកលើកស្ទួយដល់វិស័យទេសចរណ៍តភ្ជាប់ទៅតាមបណ្តាកោះនានាក្នុងខេត្តព្រះសីហនុប៉ុណ្ណោះទេ ប៉ុន្តែក៏នឹងរួមចំណែកជាមួយរដ្ឋាភិបាលក្នុងការបម្រើនិងផ្តល់សេវាកម្មទេសចរណ៍ប្រកបដោយគុណភាព និងសុវត្ថិភាព, បង្កើតឱកាសការងារជូនប្រជាពលរដ្ឋ, និងដើរតួនាទីយ៉ាងសំខាន់ក្នុងការទាក់ទាញភ្ញៀវទេសចរជាតិ និងអន្តរជាតិមកកាន់កម្ពុជានិយាយជារួម និងមកកាន់ខេត្តព្រះសីហនុ និយាយដោយឡែកឱ្យមកលេងកំសាន្តកាន់តែច្រើន និងពន្យាការស្នាក់នៅកាន់តែយូរថ្ងៃថែមទៀតផងដែរ៕