ដោយៈ គង់ សូរិយា

       ព្រះសីហនុៈ ក្នុងន័យធ្វើពិពិធកម្ម ការអភិវឌ្ឍន៍ រដ្ឋាភិបាលបាននិងកំពុងរៀបចំតំបន់រាម ជាទីក្រុងថ្មី និងក្រុងព្រះសីហនុជាទីក្រុងចាស់មួយ។

ព៌តមាននេះ ត្រូវបានបង្ហើបឲ្យដឹងកាលពីពេលថ្មីៗនេះ ដោយលោកឡុង ឌីម៉ង់អភិបាលរងខេត្តព្រះសីហនុ។

លោកបន្តថា “រដ្ឋាភិបាលនឹងរៀបចំតំបន់រាម ជាទីក្រុងថ្មីមួយ ក្នុងផែនការនៃការប្រែក្លាយ ខេត្តព្រះសីហនុ ជាទីក្រុងពហុបំណង ដែលផែនការនេះ បាននិងកំពុងពន្លឿន”។ លោកបន្តថា “ផែនការនេះ មានគោលដៅ ដើម្បីទាក់ទាញលំហូរFDIបន្ថែម ចូលមកកាន់ទីក្រុងនេះ”។

អ្នកស្រីអាន សុធីតាអគ្គនាយិកាក្រុមហ៊ុនPropNex Cambodiaបានមានប្រសាសន៍ថា វិស័យអចលនទ្រព្យនៅខេត្តព្រះសីហនុ បាននិងកំពុងបង្ហាញសញ្ញា ល្អប្រសើរឡើងវិញបណ្តើរៗហើយ ស្របពេលការបើកដំណើរការ ផ្លូវល្បឿនលឿនភ្នំពេញ ព្រះសីហនុ ដែលបានទាក់ទាញភ្ញៀវទេសចរណ៍ជាច្រើន ធ្វើដំណើរទៅទស្សនាខេត្តនេះកាន់តែច្រើន។

អ្នកស្រីបន្តថា “ជាមួយនឹងការមកដល់របស់ភ្ញៀវទេសចរណ៍បរទេស អ្នកវិនិយោគចិនបានវិលត្រលប់ មកមើលអាគារពួកគេផងដែរ”។

ជាមួយគ្នានេះ លោកខន គង្គាអគ្គនាយកក្រុមហ៊ុនERA Cambodiaបានមានប្រសាសន៍ឲ្យដឹងផងដែរថា ការរីកចម្រើននៃវិស័យទេសចរណ៍ គោលនយោបាយរបស់រដ្ឋាភិបាល និងការមកដល់របស់អ្នកវិនិយោគអន្តរជាតិដូចជា ចិន កូរ៉េ ជប៉ុន បាននិងកំពុងជួយទីផ្សារខុនដូ នៅក្រុងព្រះសីហនុ កាន់តែមានសកម្មភាពប្រសើរឡើងទាក់ទងនឹងការទិញ លក់៕

ដោយ: គង់ លាងហួរ
ប៉េកាំង: នាយករដ្ឋមន្ត្រីចិនលោក Li Qiang ត្រូវបានដកស្រង់សម្តីដោយវិទ្យុរដ្ឋកាលពីថ្ងៃពុធថា ប្រទេសចិននឹងពង្រឹងគោលការណ៍ណែនាំរបស់ខ្លួន ដើម្បីគាំទ្រដល់ការផលិតកម្រិតខ្ពស់។

ប្រទេសមហាអំណាចសេដ្ឋកិច្ចទីពីររបស់ពិភពលោកមួយនេះកំពុងស្ថិតក្រោមសម្ពាធកាន់តែខ្លាំងឡើងពីសហរដ្ឋអាមេរិក ដែលបានលើកឡើងពីសន្តិសុខជាតិក្នុងការរឹតបន្តឹងការចូលប្រើឧបករណ៍អេឡិចត្រូនិកចិន និងបច្ចេកវិទ្យាបញ្ញាសិប្បនិម្មិត។

លោក Li បានបន្តថា “នៅពេលដែលស្ថានភាពក្នុងប្រទេស និងក្រៅប្រទេសឆ្លងកាត់ការផ្លាស់ប្តូរដ៏ស្មុគស្មាញ និងយ៉ាងជ្រាលជ្រៅ ការអភិវឌ្ឍន៍នៃឧស្សាហកម្មផលិតកម្មរបស់ប្រទេសចិនកំពុងប្រឈមមុខនឹងចំណុចសំខាន់មួយ ហើយកិច្ចខិតខំប្រឹងប្រែងដើម្បីពង្រឹងឧស្សាហកម្មត្រូវតែកើនឡើង”។

លោក Li បានអះអាងថា “ប្រទេសចិននឹងបង្កើតបរិយាកាសធុរកិច្ចដែលផ្តោតលើទីផ្សារ ស្របច្បាប់ និងអន្តរជាតិ និងពង្រឹងគោលការណ៍ណែនាំ ដើម្បីគាំទ្រដល់ការផលិតកម្រិតខ្ពស់”។

យោងតាមរបាយការណ៍មួយរបស់រដ្ឋាភិបាលក្នុងអំឡុងពេលកិច្ចប្រជុំប្រចាំឆ្នាំរបស់សភាក្នុងខែមីនានេះបានឱ្យដឹងថា គោលនយោបាយវិទ្យាសាស្ត្រ និងបច្ចេកវិទ្យារបស់ប្រទេសចិន គួរតែមានគោលបំណងកសាងភាពរុឹងមាំ និងការពឹងផ្អែកលើខ្លួនឯង។

លោក Li Qiang បានអញ្ជើញទៅទស្សនាខេត្ត Hunan ភាគខាងត្បូងចាប់ពីថ្ងៃទី២១ ដល់ថ្ងៃទី២២ ខែមីនា និងចូលរួមវេទិកាស្តីពីការអភិវឌ្ឍន៍ផលិតកម្មកម្រិតខ្ពស់ ហើយលោក Li ក៏បានទៅទស្សនាក្រុមហ៊ុននានាដូចជាក្រុមហ៊ុន CRRC ក្រុមហ៊ុន BYD និងក្រុមហ៊ុន Lens Technology ផងដែរ៕

ភ្នំពេញ ៖ ក្រោយពីស្ថានភាពនៃវិបត្តិកូវីដ១៩បានធូរស្រាលទាំងកម្ពុជា និងនៅប្រទេសចិន ភាគីទាំងពីរបានជំរុញឱ្យមានការនូវការវិនិយោគ ពាណិជ្ជកម្មនិង ទេសចរណ៍ឡើងវិញ ជាក់ស្ដែងនៅថ្ងៃទី ២៣ មីនា ២០២៣នេះ តំណាងកម្ពុជា និងចិន បានជួបជជែកពិភាក្សាពីកិច្ចសហប្រតិបត្តិការវិនិយោគដោយផ្ដោតលើវិស័យអាទិភាពចំនួនចំនួន ។

យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា អគ្គលេខធិការរងនៃគណៈកម្មការវិនិយោគកម្ពុជា បានទទួលជួបជាមួយគណៈប្រតិភូនៃគណៈកម្មាធិការជាតិអភិវឌ្ឍន៍និងកែទម្រង់នៃសាធារណរដ្ឋប្រជាមានិតចិន ក្នុងគោលបំណងពិភាក្សាអំពីការងារសំខាន់ៗជាច្រើនទាក់ទិននិងការវិនិយោគ ក្នុងនោះរួមមាន ការពិភាក្សាទៅលើកិច្ចសហប្រតិបត្តិការសមត្ថភាពផលិតនិងការវិនិយោគ ដោយផ្តោតលើវិស័យអាទិភាពមួយចំនួន រាប់បញ្ចូលប៉ុន្តែមិនកម្រិតត្រឹមវិស័យកសិកម្ម និងកសិឧស្សាហកម្ម, យានយន្តអគ្គិសនី និងអេឡិចត្រូនិក ។ ក្រៅពីនេះក៏មានពិភាក្សាទៅលើកិច្ចសហប្រតិបត្តិការស្ដីពី “របៀងអភិវឌ្ឍន៍ឧស្សាហកម្មកម្ពុជា” និង “របៀងកសិកម្មកម្ពុជា” និង កិច្ចសហប្រតិបត្តិការផ្លូវដែកកម្ពុជា-ចិន ។

លោកជា វុទ្ធី អគ្គលេខាធិការរងនៃគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍បានអបអរសាទរ បានគូសបញ្ជាក់ពីខួបលើកទី ៦៥ នៃទំនាក់ទំនងការទូតរវាងកម្ពុជា-ចិន ក្នុងឆ្នាំ ២០២៣ ជាពិសេសទំនាក់ទំនងទ្វេភាគីដែលប្រទេសទាំងពីរបានប្តេជ្ញាជំរុញកិច្ចសហប្រតិបត្តិការថ្មីដែលមានឈ្មោះថា “ត្បូងពេជ្រ” បន្ទាប់ពីជំនួបរវាង សម្តេចតេជោនាយករដ្ឋមន្ត្រី និងលោកប្រធានាធិបតី Xi Jinping កាលពីថ្ងៃទី១០ ខែកុម្ភៈ ឆ្នាំ២០២៣ នៅរដ្ឋធានីប៉េកាំង។

លោកបានបង្ហាញក្តីសង្ឃឹមយ៉ាងមុតមាំថា ការធ្វើឱ្យប្រសើរឡើងនូវកិច្ចសហប្រតិបត្តិការសមត្ថភាពផលិតនិងការវិនិយោគកម្ពុជា-ចិន នឹងមានពន្លឺកាន់តែភ្លឺថ្លាប្រៀបដូចទៅនឹងត្បូងពេជ្រដែលបានកែច្នៃនិងដុសខាត់រាល់ថ្ងៃ ។

លោកចង់ឃើញកិច្ចសហប្រតិបត្តិការសមត្ថភាពផលិតនិងការវិនិយោគកម្ពុជានេះ ក្លាយជាកម្លាំងចលកររុញច្រានការអភិវឌ្ឍរបៀងអភិវឌ្ឍន៍ឧស្សាហកម្ម និងរបៀងកសិកម្មនិងមច្ឆា របស់កម្ពុជា ឱ្យសម្រេចបាននូវសមិទ្ធភាពប្រកបដោយផ្លែផ្កា រួមចំណែកដល់ការតភ្ជាប់ខ្សែច្រវ៉ាក់ផ្គត់ផ្គង ជាពិសេសតភ្ជាប់ឆ្នាំងបាយកម្ពុជា ជាមួយឆ្នាំងបាយចិននិងឆ្នាំងបាយពិភពលោក ។

លោកសន សៀប ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានថ្លែងថា ឆ្នាំ២០២៣នេះ កម្ពុជារំពឹងថានឹងទទួលបានការវិនិយោគពីប្រទេសចិនឡើងវិញ ក្នុងនោះដែរក៏រំពឹងថាគម្រោងដែលជាប់គាំងនៅក្រុងព្រះសីហនុអាចនឹងបន្តដំណើរការឡើងវិញផងដែរ៕

ដោយៈ សុខុម

ហុងកុង: ក្រុមហ៊ុនផលិតរងថយន្ត China Evergrande New Energy Vehicle Group Ltd បានព្រមាននៅថ្ងៃព្រហស្បតិ៍ ទី២៣ ខែមីនា នេះថា ខ្លួនប្រហែលជាត្រូវផ្អាកការផលិត រថយន្តអគ្គិសនី (EV) ប្រសិនបើខ្លួនមិនអាចទទួលបានហិរញ្ញប្បទានថ្មី បន្ទាប់ពីចែកចាយរថយន្តម៉ូដែលប្រណីត Hengchi5 របស់ខ្លួនបានជាង៩០០គ្រឿង។

បុត្រសម្ព័ន្ធនៃក្រុមហ៊ុនអភិវឌ្ឍន៍អចលនទ្រព្យចិន China Evergrande Group ដែលជាប់បំណុលរហូតដល់៣០០ពាន់លានដុល្លារអាមេរិក ខាងលើនេះនិយាយថា ខ្លួនមានគោលបំណងកាត់បន្ថយការចំណាយ តាមរយៈវិធានការដូចជា ការកាត់បន្ថយចំនួនបុគ្គលិក និងការបង្កើនប្រសិទ្ធភាពនៃការគ្រប់គ្រងជាដើម។

ក្រុមហ៊ុននេះព្រមានថា “ដោយសារគ្មានលទ្ធភាពទទួលបានសាច់ប្រាក់បន្ថែម ក្រុមហ៊ុនប្រឈមហានិភ័យបញ្ឈប់ការផលិត”។

ក្រុមហ៊ុននេះ បានចេញសេចក្តីថ្លែងការណ៍ថា ប្រសិនបើខ្លួនអាចទទួលបានហិរញ្ញប្បទាន ប្រមាណ៤,២ពាន់លានដុល្លារអាមេរិក “នៅពេលអនាគត” ខ្លួនមានគោលបំណងបញ្ចេញ ម៉ូឌែលរថយន្តប្រណីតមួយចំនួនទៀត ហើយសង្ឃឹមថា នឹងចាប់ផ្ដើមការផលិតទ្រង់​ទ្រាយធំ។

ដំណឹងនេះកើតឡើង បន្ទាប់ពីក្រុមហ៊ុនមេរបស់ខ្លួន China Evergrande Group កាលពីថ្ងៃពុធ ទី២២ ខែមីនា បានប្រកាសផែនការរៀបចំឡើងវិញ នូវបំណុលនៅក្រៅប្រទេសរបស់ខ្លួនចំនួន២២,៧ពាន់លានដុល្លារអាមេរិក ដែលអាចបង្កើតគំរូសម្រាប់បណ្ដាគូប្រជែងដែលមានបញ្ហាស្រសៀងគ្នា នៅក្នុងវិស័យអចលនទ្រព្យនៃប្រទេសចិន។

ក្រុមហ៊ុនបុត្រសម្ព័ន្ធនេះបាននិយាយមុននេះថា ខ្លួននឹងចាប់ផ្តើមការផលិតកម្មរថយន្តEV ម៉ូឌែលទី២ របស់ខ្លួនទ្រង់ទ្រាយធំនៅក្នុងឆមាសទី១ ដើមឆ្នាំ២០២៣ និងម៉ូឌែលទី៣ នៅឆមាសទី២ ឆ្នាំនេះ៕ Reuters៕

ភ្នំពេញ ៖ ក្នុងឆ្នាំ២០២៣នេះ ក្រុមហ៊ុនអភិវឌ្ឍន៍លំនៅឋានជាបន្តបន្ទាប់ចាប់ផ្ដើមមានបញ្ហាជាមយនឹងប្រព័ន្ធ ច្បាប់ ដោយក្នុងនោះមានក្រុមហ៊ុនអភិវឌ្ឍន៍ពីរត្រូវបាននិយ័តករអាជីវកម្មអចលនវត្ថុនិងបញ្ចាំ កោះអញ្ជើញឱ្យមកបង់ប្រាក់ពិន័យរាប់រយលានរៀល ដោយសារតែការអភិវឌ្ឍន៍គម្រោងលំនៅឋានមិនមានអាជ្ញាបណ្ណពីនិយ័តករអាជីវកម្មអចលនវត្ថុនិងបញ្ចាំ ។

យោងតាមសេចក្ដីជូនដំណឹងរបស់និយ័តករអាជីវកម្មអចលនវត្ថុនិងបញ្ចាំបានកោះអញ្ជើញក្រុមហ៊ុនអភិវឌ្ឍន៍ លំនៅឋានពីរចូលខ្លួនមកបង់ប្រាក់ពិន័យដែលក្រុមហ៊ុនទាំងពីរនេះ អភិវឌ្ឍន៍លំនៅឋានមិនមានអាជ្ញាបណ្ណ ។

សេចក្ដីជូនដំណឹងមួយរបស់និយ័តករអាជីវកម្មអចលនវត្ថុ និងបញ្ចាំ ចេញផ្សាយកាលសប្ដាហ៍មុនបានអញ្ជើញក្រុមហ៊ុន សុវណ្ណារី អេសវី វីឡា ឱ្យចូលខ្លួនបង់ប្រាក់ពិន័យចំនួន៤០០លានរៀលពីការអភិវឌ្ឍដែលមិនមានអាជ្ញាបណ្ណពីនិយ័តករអាជីវកម្មអចលនវត្ថុនិងបញ្ចាំរហូតដល់៤គម្រោង ។

គម្រោងទាំង៤របស់ក្រុមហ៊ុននេះ រួមមានសុវណ្ណារី វីឡាទី១ នៅភូមិអំពិលរូង ឃុំទំនប់ធំ ស្រុកពញាឮ ខេត្តកណ្ដាល គម្រោងសុវណ្ណារី វីឡាទី២ នៅភូមិជ្រែពពែ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ គម្រោងសុវណ្ណារី វីឡាទី៣ នៅភូមិទួលលៀប សង្កាត់ស្នោ ខណ្ឌកំបូល រាជធានីភ្នំពេញ និងគម្រោងសុវណ្ណារីវីឡាទី៤ នៅភូមផ្លាង សង្កាត់ស្នោ ខណ្ឌកំបូល រាជធានីភ្នំពេញ ។

ដោយឡែកនៅថ្ងៃជាមួយគ្នានោះដែរ និយ័តករអាជីវកម្មអចលនវត្ថុនិងបញ្ចាំ ក៏បានកោះអញ្ជើញក្រុមហ៊ុនមួយទៀតគឺ ក្រុមហ៊ុនបុរី វីឡាលាភសំណាង ដែលមានទីតាំងនៅសង្កាត់ស្នោ ខណ្ឌកំបូល រាជធានីភ្នំពេញ ឱ្យចូលខ្លួនបង់ប្រាក់ពិន័យចំនួន១០០លានរៀល ដែលក្រុមហ៊ុនបានធ្វើអាជីវកម្មអភិវឌ្ឍន៍លំនៅឋានដោយពុំមានអាជ្ញាបណ្ណពីនិយ័តករអាជីវកម្មអចលនវត្ថុនិងបញ្ចាំ ។

តាមរយៈលិខិតរបស់និយ័តករអាជីវកម្មអចលនវត្ថុនិងបញ្ចាំនេះដែរក៏ជាសារដាស់តឿនដល់ពលរដ្ឋទិញលំនៅឋានពីក្រុមហ៊ុនអភិវឌ្ឍន៍នានាឱ្យមានការប្រុងប្រយ័ត្ននិងសួរនាំដល់អ្នកលក់ពីអាជ្ញាបណ្ណប្រកដោយអាជីវកម្ម លើគម្រោងនីមួយៗ ពីព្រោះថានៅពេលគម្រោងនោះមានបញ្ហាគឺអាជ្ញាធរនឹងពិបាកក្នុងការដោះស្រាយជូនអតិថិជនដែលជាអ្នកទិញលំនៅឋាននោះណាស់ ៕

ដោយ: គង់ លាងហួរ
ភ្នំពេញ: ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន បានទទួលជួបលោក Pham Minh Chính ដែលកំពុងបំពេញទស្សនកិច្ចផ្លូវការនៅប្រទេសវៀតណាម។

លោក Pham Minh Chính បានអបអរសាទរកម្ពុជាចំពោះសមិទ្ធិផលដ៏ធំសម្បើមរបស់ខ្លួននៅក្នុងរយៈពេលប៉ុន្មានឆ្នាំចុងក្រោយនេះ ជាពិសេសក្នុងការប្រយុទ្ធប្រឆាំងនឹងជំងឺកូវីដ-១៩ ការគ្រប់គ្រងអតិផរណា កំណើនសេដ្ឋកិច្ច ការធ្វើជាប្រធានអាស៊ានក្នុងឆ្នាំ២០២២ និងការបោះឆ្នោតក្រុមប្រឹក្សាឃុំ/សង្កាត់ អាណត្តិទី៥ កាលពីខែមិថុនាកន្លងទៅ។

លោកឧបនាយករដ្ឋមន្ត្រី ប្រាក់ សុខុន បានអះអាងថា កម្ពុជាតែងតែយកចិត្តទុកដាក់ចំពោះការពង្រឹង និងការអភិវឌ្ឍនៃ “អ្នកជិតខាងល្អ មិត្តភាពប្រពៃណី កិច្ចសហប្រតិបត្តិការលើគ្រប់វិស័យ និងនិរន្តរភាពយូរអង្វែង” ជាមួយវៀតណាម។ លោក​បាន​សម្តែង​ការ​រីករាយ​ចំពោះ​ទំនាក់ទំនង​ទ្វេរភាគី​ដែល​មាន​ការ​រីក​ចម្រើន​លើ​គ្រប់​វិស័យ។

ថ្នាក់ដឹកនាំ​ប្រទេស​ទាំងពីរ​បាន​រក្សា​ការ​ជួប​គ្នា​ញឹកញាប់​និង​ដំណើរ​ទស្សនកិច្ច​ទៅវិញទៅមក​។ ទំហំពាណិជ្ជកម្មទ្វេរភាគីបានកើនឡើងដល់១០ពាន់លានដុល្លារក្នុងឆ្នាំ២០២២ ដោយកើនឡើងជិត១១ភាគរយធៀបនឹងឆ្នាំ២០២១។

គិតត្រឹមដំណាច់ឆ្នាំ២០២២កន្លងទៅ វៀតណាមមានគម្រោងវិនិយោគចំនួន២០៥ ដែលមានតម្លៃ២៩,៤ពាន់លានដុល្លារក្នុងប្រទេសកម្ពុជា លើសពីនេះ ភាគីទាំងពីរក៏បានសម្របសម្រួលរៀបចំសកម្មភាពដ៏មានអត្ថន័យជាច្រើនក្នុងឆ្នាំមិត្តភាពវៀតណាម-កម្ពុជាឆ្នាំ២០២២ផងដែរ។

ដើម្បីអភិវឌ្ឍទំនាក់ទំនងទ្វេរភាគីឱ្យកាន់តែមានផ្លែផ្កា នាយករដ្ឋមន្ត្រីវៀតណាមបានស្នើឱ្យភាគីទាំងពីរអនុវត្តប្រកបដោយប្រសិទ្ធភាពនូវកិច្ចព្រមព្រៀងកម្រិតខ្ពស់ និងសេចក្តីថ្លែងការណ៍រួម ជំរុញការដឹកជញ្ជូន ការតភ្ជាប់សេដ្ឋកិច្ច រួមគ្នាកសាងសេដ្ឋកិច្ចឯករាជ្យ និងពឹងផ្អែកលើខ្លួនឯង ស្របជាមួយនឹងសមាហរណកម្មអន្តរជាតិ សម្របសម្រួលពាណិជ្ជកម្មឆ្លងព្រំដែន ការអភិវឌ្ឍសេដ្ឋកិច្ចនៅតាមតំបន់ព្រំដែន សហប្រតិបត្តិការក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន គ្រឿងញៀន និងធ្វើការរួមគ្នាក្នុងការផ្លាស់ប្តូរបៃតង និងការឆ្លើយតបទៅនឹងការប្រែប្រួលអាកាសធាតុ។

លោក Pham Minh Chính ក៏បានជំរុញឱ្យភាគីទាំងពីរ រួមគ្នាស្វែងរកដំណោះស្រាយសមស្រប សម្រាប់ការពន្លឿនការបោះបង្គោលព្រំដែន និងបោះបង្គោលព្រំដែនដីគោកដែលនៅសល់១៦ភាគរយ ដើម្បីកសាងព្រំដែនសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍន៍ផងដែរ៕

ដោយ: គង់ លាងហួរ
អន្តរជាតិ: អតិថិជនជនជាតិចិនជាច្រើនបានវិលត្រឡប់មកកាន់ទីផ្សារអចលនទ្រព្យឈុន បុរី វិញហើយ បន្ទាប់ពីការនាំមុខរបស់ជនជាតិរុស្ស៊ី និងការបើកឡើងវិញនៃព្រំដែនរបស់ប្រទេសចិនកាលពីដើមឆ្នាំ២០២៣នេះ។

លោក Chanin Vanijwongse នាយកប្រតិបត្តិនៃក្រុមហ៊ុនអភិវឌ្ឍន៍អចលនទ្រព្យ Habitat Group បានមានប្រសាសន៍ថា តម្រូវការខុនដូ និងវីឡាននៅខេត្តឈុនបុរីពីសំណាក់អ្នកទិញជនជាតិចិន និងរុស្ស៊ីមានការកើនឡើងយ៉ាងខ្លាំងចាប់តាំងពីដើមឆ្នាំមក។

លោក​បាន​បន្ត​ថា​ “ក្រោយ​ឆ្នាំ​ថ្មី ភ្នាក់ងារ​អចលន​ទ្រព្យ​នានា ដែល​ផ្តោត​គោលដៅលើ​អ្នក​ទិញ​ជនជាតិ​ចិន និង​រុស្ស៊ី​បាន​ត្រឡប់​មក​វិញ ខណៈ​អតិថិជនរបស់​ពួកគេ​នឹង​ត្រលប់​មក​វិញ ហើយយូនីតដែលពេញនិយមជាងគេគឺវីឡាអាងហែលទឹក៣បន្ទប់គេងមានតម្លៃលើសពី១០លានបាត”។

យោងតាមមជ្ឈមណ្ឌលព័ត៌មានអចលនទ្រព្យ (REIC) បានឱ្យដឹងថា អត្រានៃការស្រូបទិញផ្ទះទោលដែលមានតម្លៃចាប់ពី១០ទៅ១៥លានបាតគឺខ្ពស់បំផុតនៅក្នុងត្រីមាសទី៤ ឆ្នាំ២០២២ក្នុងអត្រា៨,៩ភាគរយ។

ខេត្តឈុនបុរីជាប់ចំណាត់ថ្នាក់ទី២ ក្នុងចំណោមខេត្ត ដែលចំនួនខុនដូច្រើនបំផុតត្រូវបានផ្ទេរទៅឱ្យអ្នកទិញបរទេសដែលមានចំនួន៣.៥៦៧យូនីតនិងមានតម្លៃ១០,២ពាន់លានបាតនៅក្នុងឆ្នាំ២០២២ បន្ទាប់ពីទីក្រុងបាងកក។

តួលេខនេះតំណាងឱ្យការកើនឡើង៤៩ភាគរយនៃចំនួនយូនីត និងការកើនឡើង៧៤ភាគរយនៅក្នុងតម្លៃធៀបនឹងឆ្នាំ២០២១ នៅពេលដែលខុនដូ២.៣៩៨យូនីតមានតម្លៃ៥,៩ពាន់លានបាតត្រូវបានផ្ទេរទៅឱ្យអតិថិជន។

ជនជាតិចិនគ្របដណ្តប់ច្រើនបំផុតនៃការផ្ទេរខុនដូជារៀងរាល់ឆ្នាំក្នុងរយៈពេល៥ឆ្នាំចុងក្រោយនេះ ដោយខុនដូ១.២០៧យូនីតដែលមានតម្លៃ៣,៥ពាន់លានបាតក្នុងឆ្នាំ២០២២ កើនឡើងពី៩៩៨យូនីត ដែលមានតម្លៃ២,១ពាន់លានបាតក្នុងឆ្នាំ២០២១។

ក្រៅពីជនជាតិចិន អតិថិជនជនជាតិកំពូលទាំង១០ផ្សេងទៀត រួមមានដូចជា រុស្ស៊ី អាមេរិក អង់គ្លេស អាល្លឺម៉ង់ បារាំង អូស្ត្រាលី ជប៉ុន ស្វីស និងកាណាដា៕