ដោយៈ គង់ សូរិយា

    ភ្នំពេញៈ ក្រុមហ៊ុនផលិតរថយន្តដ៏ធំGM បានសម្រេចបង្កើតរោងចក្រផ្គុំ និងដំំឡើងរថយន្តម៉ាកChevroletនៅកម្ពុជា ជាទីតាំងមួយដែលក្រុមហ៊ុនបានសម្រិតសំរាំងបំផុត ក្នុងចំណោមប្រទេសជាសមាជិ​កអាស៊ាន។

ព័ត៌មាននេះត្រូវបានលើកឡើង ដោយលោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានចូលរួមថ្លែងសុន្ទរកថា ក្នុងពិធីសម្ពោធរថយន្តប្រភេទ ភីកអាប់ ហ្សេវរ៉ូឡេ ខូឡូរ៉ាដូ (Chevrolet Colorado) នៅសាល ដី ព្រេមៀ សេនធ័រ សែនសុខ។

លោកអគ្គលេខាធិការបានសម្តែង នូវការអបអរសាទរចំពោះក្រុមហ៊ុន យូណាយធីត អូតូត្រេឌីង ក្នុងការសម្រេចបាននូវសមិទ្ធិផលដ៏អស្ចារ្យមួយនេះ ហើយក៏បានថ្លែងអំណរគុណចំពោះក្រុមហ៊ុនGM ដែ​លបានជ្រើសរើសយកប្រទេសកម្ពុជា ដែលជាប្រទេសតែមួយគត់ក្នុងតំបន់អាស៊ានដែលត្រូវបានជ្រើសរើស និងទទួលបានសិទ្ធិពិសេសពីក្រុមហ៊ុនGM ក្នុងការផ្គុំដំឡើងរថយន្តChevrolet។

លោកអគ្គលេខាធិការបានលើកឡើង នូវយុទ្ធសាស្ត្រចម្បងចំនួនពីរសម្រាប់ឱ្យក្រុមហ៊ុនធ្វើការពិចារណា ដែលយុទ្ធសាស្ត្រទីមួយគឺការពង្រឹងខ្សែច្រវាក់តម្លៃក្នុងស្រុក និងទីពីរគឺសូមឱ្យក្រុមហ៊ុន យូណាយធីត អូតូ ត្រេឌីង ចូលរួមជំរុញធ្វើឱ្យប្រទេសកម្ពុជា ក្លាយជាមជ្ឈមណ្ឌលប្រមូលផ្តុំ ការនាំចេញទាំងផលិតផលរថយន្ត និងទាំងគ្រឿងបង្គុំរថយន្ត។

លោកក៏បានលើកឡើងអំពីការបន្តប្តេជ្ញាចិត្ត របស់រាជរដ្ឋាភិបាលក្នុងការរក្សាបាននូវបរិយាកាសវិនិយោគមួយ ដែលមានភាពអំណោយផល និងអាចប៉ាន់ប្រមាណទុកជាមុនបាន។ ជាក់ស្តែងដូចជាកាលពីពេលថ្មីៗនេះ កម្ពុជាបានឆ្លើយតបយ៉ាងឆាប់រហ័ស ទៅលើបញ្ហាពន្ធគយបដិការរបស់សហរដ្ឋអាមេរិក ដែលកម្ពុជាសម្រេចបានការកាត់បន្ថយអត្រាពន្ធគយបដិការពី៤៩% មកត្រឹម៣៦% ហើយចុងក្រោយមកត្រឹម១៩%។

លោកជា វុទ្ឋីបានបញ្ជាក់ថា “នេះជាដំណឹងដ៏ល្អសម្រាប់ប្រជាពលរដ្ឋកម្ពុជា វិនិយោគិន និងធុរជនទាំងអស់ ដែលកំពុងមានសកម្ម​ភាពអាជីវកម្មនៅកម្ពុជា”។

ឆ្លៀតក្នុងឱកាសនេះ លោកអគ្គលេខាធិការបានថ្លែងអំណរគុណដល់ឯកឧត្តមប្រធានាធិបតី Donald Trump ដែលឯកឧត្តមបានយកចិត្តទុកដាក់ដោយផ្ទាល់ នៅក្នុងការផ្ដួចផ្ដើមនិងជំរុញឱ្យមានការឈប់បាញ់គ្នារវាងកងទ័ពកម្ពុជា និងកងទ័ពថៃ និងបន្តតាមដានការអនុវត្តបទឈប់បាញ់ដោយផ្ទាល់។

បន្ថែមលើនេះ លោកប្រធានាធិបតី ក៏បានមានការយោគយល់សម្រាប់កម្ពុជា ដោយបានផ្ដល់នូវការអនុគ្រោះពន្ធ ចុងក្រោយត្រឹម ១៩% ដើម្បីកម្ពុជាអាចបន្តពង្រឹង ការអភិវឌ្ឍសេដ្ឋកិច្ចរបស់ខ្លួន ពិសេ​សការពង្រឹងទំនាក់ទំនងពាណិជ្ជកម្មរវាងកម្ពុជា និងសហរដ្ឋអាម៉េរិកបន្ថែមទៅទៀត៕

ដោយ: គង់ លាងហួរ
អន្តរជាតិ: ការ​លក់​ផ្ទះ​នៅប្រទេស​ចិន​បាន​បន្ត​ដាំក្បាលចុះ​នៅខែ​កក្កដា ខណៈ​វិធានការបញ្ចុះតម្លៃ​លំនៅដ្ឋានរបស់បណ្តាអ្នកអភិវឌ្ឍន៍អចលនទ្រព្យនានានៅតែមិនអាច​ទាក់​ទាញ​អ្នក​ទិញ។ ប្រការនេះទាមទារឱ្យរដ្ឋាភិបាលចិនដាក់ចេញវិធានការ​ថ្មីៗ​ដើម្បី​ជំរុញទីផ្សារលំនៅដ្ឋានក្នុងប្រទេសចិន។

យោងតាមទិន្នន័យបឋមពីក្រុមហ៊ុនស្រាវជ្រាវអចលនទ្រព្យចិន China Real Estate Information Corp បានឱ្យដឹងថា ទំហំទឹកប្រាក់ពីការលក់ផ្ទះថ្មីរបស់បណ្តាក្រុមហ៊ុនអចលនទ្រព្យចិនធំៗចំនួន១០០ បានដាំក្បាលចុះ២៤ភាគរយធៀបនឹងឆ្នាំមុនមកនៅត្រឹមចំនួន២១១,២ពាន់លានយ័ននៅក្នុងខែកក្កដា ឆ្នាំនេះ។

ការ​ដាំក្បាលចុះ​នៃទីផ្សារលំនៅដ្ឋានរបស់​ប្រទេស​ចិន​បាន​អូស​បន្លាយ​អស់​រយៈពេល​ជាង​៤ឆ្នាំ​មក​ហើយ ខណៈតម្លៃ​ផ្ទះ​ថ្មី​កាលពីខែមិថុនាបាន​ធ្លាក់​ចុះ​ក្នុងល្បឿនលឿនបំផុត​ក្នុង​រយៈ​ពេល​៨​ខែ​។

លោក Lu Ting ប្រធាន​សេដ្ឋវិទូ​ចិន​ប្រចាំ​ធនាគារ Nomura Holdings បាន​សរសេរ​នៅ​ក្នុង​កំណត់​ត្រា​ថ្មី​មួយ​ថា “វិស័យ​អចលនទ្រព្យ​ក្នុងប្រទេសចិននៅ​តែបន្តជួបប្រទះបញ្ហា​ប្រឈមជាច្រើន”។

ជាមួយគ្នានេះ ការអំពាវនាវឱ្យរដ្ឋាភិបាលចិនដាក់ចេញវិធានការគោលនយោបាយថ្មីៗបន្ថែមទៀតដើម្បីស្រោចស្រង់ទីផ្សារលំនៅដ្ឋានក្នុងស្រុកបានផុសផុលឡើងកាន់តែខ្លាំង ស្របពេលដែលវិបត្តិនេះកំពុងបន្តអូសបន្លាយ និងជះផលប៉ះពាល់អវិជ្ជមានមកលើសេដ្ឋកិច្ចចិន។

ទោះជាយ៉ាងណា ការិយាល័យនយោបាយ ដែលជាស្ថាប័នធ្វើការសម្រេចចិត្តកំពូលរបស់ប្រទេសចិនបានបដិសេធចំពោះការដាក់ចេញវិធានការជំរុញទីផ្សារអចលនទ្រព្យនៅឯកិច្ចប្រជុំមួយក្នុងសប្តាហ៍នេះ បន្ទាប់ពីសេដ្ឋកិច្ចចិនបានកើនឡើងយ៉ាងគួរឱ្យភ្ញាក់ផ្អើលក្នុងរង្វង់៥,២ភាគរយនៅត្រីមាសទី២ ឆ្នាំ២០២៥៕ប្រភព: Bloomberg៕

ដោយៈ ម៉ាណា

    ភ្នំពេញៈ ក្រុមហ៊ុនដ៏ធំរបស់ជប៉ុនបានពង្រីកទុនវិនិយោគ ដោយបោះទុនបង្កើតមជ្ឈមណ្ឌល បណ្តុះបណ្តាលជំនាញបច្ចេកទេ​សក្នុងឧស្សាហកម្មយានយន្តនៅកម្ពុជា។

ព័ត៌មាននេះ ត្រូវបានលើកឡើងក្នុងពេលលោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភាក្សាការងារជាមួយលោក Kensuke Tsuchiya  ប្រធានក្រុមហ៊ុន Toyota Tsusho Manufacturing (Cambodia) Co., Ltdកាលពីថ្ងៃទី១ សីហា។

បន្ទាប់ពីមតិស្វាគមន៍របស់លោកអគ្គលេខាធិការ លោក Kensuke Tsuchiya  បានជម្រាបជូនថា គោលបំណងនៃការចូលជួបនាពេលរសៀលនេះ គឺដើម្បីជម្រាបជូនពីវឌ្ឍនភាព នៃប្រតិបត្តិការអាជីវកម្មរបស់ក្រុមហ៊ុននៅកម្ពុជា និងជម្រាបជូនអំពីគម្រោងវិនិយោគបង្កើតមជ្ឈមណ្ឌលបណ្តុះបណ្តាល ជំនាញបច្ចេកទេសក្នុងឧស្សាហកម្មយានយន្តរបស់ក្រុមហ៊ុននៅកម្ពុជា ដែលមិនកំណត់សម្រាប់តែកម្មករនិយោជិតរបស់ក្រុមហ៊ុន Toyota Tsusho Manufacturing (Cambodia) Co., Ltd. ប៉ុណ្ណោះទេ តែសម្រាប់ប្រជាពលរដ្ឋកម្ពុជាទូទៅ។

ជាការឆ្លើយតប លោកអគ្គលេខាធិការបានវាយតម្លៃខ្ពស់ចំពោះសកម្មភាពអាជីវកម្មរបស់ក្រុមហ៊ុន Toyota Tsusho’s Manufacturing (Cambodia) CO., Ltd. និងបានសម្តែងនូវការស្វាគមន៍ដោយក្តីរីករាយបំផុត ចំពោះគម្រោងវិនិយោគបង្កើតមជ្ឈម​ណ្ឌលបណ្តុះបណ្តាលជំនាញ បច្ចេកទេសក្នុងឧស្សាហកម្មយានយន្តរបស់ក្រុមហ៊ុននៅកម្ពុជា ដែលការណ៍នេះគឺស្របទៅនឹងគោលនយោ​បាយអភិវឌ្ឍធនធានមនុស្ស ពិសេសកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស១,៥លាននាក់ របស់រាជរដ្ឋាភិបាល នីតិកាលទី៧។

លោកបានបង្ហាញសុទិដ្ឋិនិយមខ្ពស់ថា គម្រោងដ៏វិសេសវិសាលនេះ នឹងលេចចេញជារូបរាងនៅពេលខាងមុខឆាប់ៗ ហើយគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នឹងរង់ចាំដោយក្តីរីករាយក្រៃលែងបំផុត ក្នុងការផ្តល់កិច្ចសម្រួលដល់ក្រុមហ៊ុន ក្នុងដំណើរការចុះបញ្ជីគម្រោងវិនិយោគ។

ក្រុមហ៊ុន Toyota Tsusho Manufacturing (Cambodia) Co., Ltd. បានទទួលគោលការណ៍អនុញ្ញាត ពីគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា កាលពីឆ្នាំ២០២២ឱ្យវិនិយោគបង្កើតរោងចក្រដំឡើងរថយន្ត (Toyota Fortuner, និង Toyota Hilux) ដែលមានទីតាំស្ថិតនៅ ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ៕