ដោយៈ គង់ ម៉ាលីនណា

       ភ្នំពេញៈ ទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូនបានថ្លែងថា មន្ត្រីរាជការទាំងអស់ ក៏បានឯកភាពរួមគ្នាផងដែរដោយកំណត់យកឆ្នាំ២០២៣ ជាឆ្នាំ “បន្តលើកកម្ពស់គុណភាព នៃការកសាងហេដ្ឋារចនាសម្ព័ន្ធ និងប្រព័ន្ធដឹកជញ្ជូនប្រកបដោយប្រសិទ្ធភាព ចីរភាព បរិយាប័ន្ន និងការអភិវឌ្ឍធនធានមនុស្ស”។

លោកបានមានប្រសាសន៍បែបនេះ ក្នុងពិធីបិទសន្និបាតក្រសួងកាលពីរសៀលថ្ងៃទី១៦ កុម្ភៈកន្លងមកនេះ ក្រោមការអញ្ជើញចូលរួមជាអធិបតីពីលោកបណ្ឌិតអូន ព័ន្ឋមុនីរ័ត្នរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។

លោកស៊ុន ចាន់ថុលបានបន្តថា ការកំណត់យកប្រធានបទនេះមកធ្វើជាទិសដៅរួម គឺដើម្បីឆ្លើយតបទៅនឹងបរិបទ នៃការរីកចម្រើនរបស់ប្រទេសជាតិនាពេលបច្ចុប្បន្ន និងយោងតាមគោលនយោបាយ និងផែនការយុទ្ធសាស្ត្ររបស់រាជរដ្ឋាភិបាល។

ចូលរួមក្នុងឱកាសនោះ លោកអូន ព័ន្ឋមុនីរ័ត្នបានផ្តល់អនុសាសន៍ដ៏ខ្ពង់ខ្ពស់ចំនួន១១ចំណុចធំៗ ដល់អង្គសន្និបាត ដែលមានខ្លឹមសារជាសង្ខេ​បដូចជា ទី១ បន្តជំរុញកិច្ចសហការជិតស្និទ្ធ ជាមួយឧត្តមក្រុមប្រឹក្សាសេដ្ឋកិច្ចជាតិ ដើម្បីបញ្ចប់ផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយកម្ពុជា និងជំរុញការដឹកជញ្ជូនឆ្លងកាត់ព្រំដែន។ ទី២.ជំរុញការកសាងគម្រោងហេដ្ឋារចនាសម្ព័ន្ធនានា ដែលកំពុងដំណើរការសាងសង់ និងគម្រោងជាអាទិភាព និងជាទិសដៅសម្រាប់អនុវត្ត នៅក្នុងឆ្នាំ២០២៣ដើ​ម្បី​បញ្ចប់ឱ្យបានទាន់ពេលតាមផែនការគ្រោងទុក។

ទី៣.យកចិត្តទុកដាក់ពន្លឿននីតិវិធី ក្នុងការអនុវត្តគម្រោងហេដ្ឋារចនាសម្ព័ន្ធរូបវន្តសំខាន់ៗ ដែលត្រូវបានចុះហត្ថលេខាជាផ្លូវការរួចហើយ លើកម្ចីសម្បទានជាមួយភាគីមិត្ត។ ទី៤.ជំរុញការសិក្សាឱ្យមានលក្ខណៈគ្រប់ជ្រុងជ្រោយ លើគម្រោងផ្លូវដែកអាទិភាព។ ទី៥.ជំរុញកិច្ចសហការជិតស្និទ្ធជាមួយក្រសួង-ស្ថាប័នពាក់ព័ន្ធ ក្នុងការកសាង និង អភិវឌ្ឍហេដ្ឋារចនាសម្ព័ន្ធប្រព័ន្ធលូទឹកកខ្វក់ និងទឹកភ្លៀង និងបន្តជំរុញពន្លឿនការរៀបចំ និងអនុម័តច្បាប់, ផែនការយុទ្ធសាស្ត្រ និងបទប្បញ្ញត្តិបច្ចេកទេសនានា។

ទី៦ជំរុញការរៀបចំ និងអនុម័តគោលនយោបាយ និងផែនការយុទ្ធសាស្ត្រអភិវឌ្ឍន៍វិស័យ សាធារណការ និងដឹកជញ្ជូន ដោយប្រើប្រាស់យានយន្តអគ្គិសនី (EV)។ ទី៧.ជំរុញការអភិវឌ្ឍលើប្រតិបត្តិការដឹកជញ្ជូនតាមផ្លូវទឹក ផ្លូវសមុទ្រ និងការធ្វើអាជីវកម្មកំពង់ផែ ឱ្យកាន់តែល្អប្រសើរឡើង។

ទី៨ ជំរុញការផ្សព្វផ្សាយសុវត្ថិភាពចរាចរណ៍ផ្លូវគោក និងពង្រឹងការអនុវត្តច្បាប់ចរាចរណ៍ផ្លូវគោក។ ទី៩ ជំរុញកិច្ចសហប្រតិបត្តិការជាមួយក្រសួង-ស្ថាប័នពាក់ព័ន្ធ និងដៃគូអភិវឌ្ឍន៍នានា ដើម្បីពន្លឿនការរៀបចំច្បា​ប់​​ស្តីពី ការដឹកជញ្ជូនផ្លូវគោក ច្បាប់ស្តីពីការដឹកជញ្ជូនតាមផ្លូវទឹក និង កំពង់ផែ; ច្បាប់ស្តីពីផ្លូវដែក; គោលនយោបាយ យុទ្ធសាស្រ្ត និងលិខិតបទដ្ឋានគតិយុត្តពាក់ព័ន្ធ។ ទី១០.បន្តជំរុញការបណ្តុះបណ្តាល និងអភិវឌ្ឍន៍ធន​ធានមនុស្សថ្នាក់ឧត្តមសិក្សា និងវគ្គជំនាញបច្ចេកទេសសាធារណការ និង ដឹកជញ្ជូន តាមរយៈការបណ្តុះបណ្តាល នៅវិទ្យាស្ថានតេជោសែនសាធារ​ណការ និង ដឹកជញ្ជូន រួមទាំងការពង្រឹងសមត្ថភាពផ្នែកពិសោធន៍ សំណង់ហេដ្ឋារចនាសម្ព័ន្ធ នៅតាមមន្ទីរពិសោធន៍សំណង់ និង សាធារណការ ជាដើម។

ទី១១.បន្តលើកកម្ពស់គុណភាព នៃការផ្តល់សេវាសាធារណៈ ឱ្យបានកាន់តែល្អប្រសើរជូនប្រជាជន និង បង្ខិតសេវាសាធារណៈ ឱ្យកាន់តែទៅជិតប្រជាជន ព្រមទាំងបន្តដាក់ចេញ និងអនុវត្តន៍ប្រព័ន្ធស្វ័យប្រវត្តិកម្ម សម្រាប់ផ្តល់សេវាសាធារណៈថ្មីៗ ដែលស្ថិតនៅក្រោមការ- គ្រប់គ្រងរបស់ក្រសួងសាធារណការ និង ដឹកជញ្ជូនបន្ថែមទៀត៕

ដោយ: គង់ លាងហួរ

ហ្សាការតា: ប្រធានាធិបតីឥណ្ឌូនេស៊ី លោក Joko Widodo បានទទួលស្វាគមន៍ទីម័រខាងកើត ក្នុងនាមជាសមាជិកអាស៊ាន ដើម្បីបង្កើនកិច្ចសហប្រតិបត្តិការឱ្យកាន់តែខ្លាំងក្លា រវាងប្រទេសជិតខាងនៅក្នុងសប្តាហ៍នេះ។

លោក Taur Matan Ruak នាយករដ្ឋមន្ត្រីទីម័រខាងកើត បានធ្វើដំណើរទៅកាន់ទីក្រុងហ្សាកាតា ដើម្បីបំពេញទស្សនកិច្ចផ្លូវរដ្ឋ បន្ទាប់ពីមានដំណើរទស្សនកិច្ចរបស់លោក Ramos Horta ប្រធានាធិបតីទីម័រខាងកើតកាលពីខែកក្កដា ឆ្នាំ២០២២កន្លងទៅ។

លោកនាយករដ្ឋមន្ត្រី Taur Matan Ruak ត្រូវបានទទួលស្វាគមន៍នៅឯវិមាន Bogor ក្នុងខេត្ត West Java បន្ទាប់ពីប្រទេសនេះ បានចូលរួមក្នុងសមាគមន៍អាស៊ាន ជាគោលការណ៍ក្នុងកិច្ចប្រជុំកំពូលអាស៊ាន កាលពីឆ្នាំមុន។

គិតត្រឹមខែវិច្ឆិកា ឆ្នាំ២០២២ សមាគមន៍អាស៊ានបានយល់ព្រមអនុ​ ញ្ញាតឱ្យប្រទេសទីម័រខាងកើត ក្លាយជាសមាជិកជាគោលការណ៍ ហើយថែមទាំងអនុញ្ញាត ឱ្យតំណាងរបស់ប្រទេសនេះ ចូលរួមសង្កេតការណ៍ក្នុងកិច្ចប្រជុំអាស៊ានកម្រិតខ្ពស់ផងដែរ។

លោកប្រធានាធិបតី Ramos-Horta បាន​ធ្វើ​យុទ្ធនាការ​ជា​យូរ​មក​ហើយ​ សម្រាប់​ការ​ចូល​ជា​សមាជិក ​របស់​ប្រទេស​របស់​លោក ​ជាមួយ​អាស៊ាន ដោយ​បាន​ដាក់​ពាក្យ​សុំ​ចូលជាសមាជិកនៅ​ឆ្នាំ២០១១។

បន្ទាប់ពីកិច្ចប្រជុំនេះ ប្រទេសឥណ្ឌូនេស៊ី និងទីម័រខាងកើតក៏បានព្រមព្រៀងគ្នាផងដែរ ក្នុងការពន្លឿនការដោះស្រាយព្រំដែនដីគោក និងពង្រឹងទំនាក់ទំនងសេដ្ឋកិច្ចរបស់ពួកគេ ដោយប្រទេសឥណ្ឌូនេស៊ីបានបោះទុនវិនិយោគចំនួន៨១៨លានដុល្លារ នៅក្នុងប្រទេសនេះរួចទៅហើយ៕

ដោយៈ វឌ្ឍនៈ

ភ្នំពេញៈ ចាត់ទុកជា​ដំណឹងល្អមួយសម្រាប់កម្ពុជា ដែលមានប្រទេស​៤បានសន្យា​ថា នឹង​ជំរុញវិនិយោគិន​របស់ខ្លួន​ មកបណ្ដាក់ទុន​នៅកម្ពុជា​បន្ថែមទៀត ក្រោយពីស្ថានភាពកូវីដ១៩មានភាពធូរស្រាលឡើង​វិញ។

ប្រទេស​ទាំង៤នោះ រួមមានប្រទេសស៊ុយអ៊ែត ប្រទេសន័រវ៉េ ប្រទេសដាណឺម៉ាក និងប្រទេសហ្វាំងឡង់ ។ នេះបើតាមការ​បញ្ជាក់របស់អគ្គរាជទូត​និងរដ្ឋទូត​នៃប្រទេស​ទាំង​៤​ ក្នុងជំនួប​ជាមួយ​លោក​បណ្ឌិត អ៉ិត សំហេង រដ្ឋមន្ត្រីក្រសួងការងារ​ និង​បណ្ដុះបណ្ដាល​វិជ្ជាជីវៈ កាលពីព្រឹកថ្ងៃទី​១៦ កុម្ភៈ ២០២៣។

លោកបណ្ឌិត អ៉ិត សំហេង បានសំដែងការអរគុណចំពោះកិច្ចសហប្រតិបត្តិការដ៏ល្អ ជាមួយប្រទេសស៊ុយអែត លើគម្រោងជាច្រើនជាពិសេសទៅលើគម្រោងកសាងសមត្ថភាព ក្នុងការផ្តល់សេវាទីផ្សារការងារ និងការធ្វើឱ្យប្រសើរឡើងនូវបរិយាកាសការងារ តាមរយ:ការលើកកម្ពស់សិទ្ធិការ​ងារ សេរីភាពអង្គការវិជ្ជាជីវ:  និងលក្ខខណ្ឌការងារ ដែលបានជួយគាំទ្រលើការអភិវឌ្ឍវិស័យសេដ្ឋកិច្ច-សង្គមរបស់កម្ពុជា និង វិស័យការងារ និងបណ្តុះបណ្តាលវិជ្ជាជីវៈ ដែលធ្វើឱ្យទទួលស្គាល់ជាប្រទេស ដែលអនុវត្តបានកាន់តែប្រសើរ អនុលោមទៅតាមបទដ្ឋានការងារអន្តរជាតិ ដែលជាកត្តាដ៏សំខាន់ ក្នុងការផ្តល់នូវជំនឿទុកចិត្ត ដល់បណ្តាអ្នកបញ្ជាទិញ និងអ្នកប្រើប្រាស់ទំនិញ។

លោកមានប្រសាសន៍ថា “កម្ពុជាបាននិងកំពុង បន្តពង្រឹងការអនុវត្តឱ្យកាន់តែមានប្រសិទ្ធភាព និងធ្វើវិសោធនកម្មច្បាប់ ស្តីពីការងារ ដើម្បីឆ្លើយតបទៅនឹងតម្រូវការ នៃការធានាបាននូវលក្ខខណ្ឌការងារល្អប្រសើរ និងភាពសុខដុមក្នុងទំនាក់ទំនងវិជ្ជាជីវៈ”។ លោកបន្តថា “កម្ពុជាពង្រឹងការអនុវត្តច្បាប់ស្តីពីសហជីព ដើម្បីធានានូវសិទ្ធិសេរីភាពអង្គការវិជ្ជាជីវៈ ដែលតំណាងឱ្យសម្លេង និងឆន្ទៈពិតប្រាកដរបស់កម្មករនិយោជិត និយោជក ក្នុងការការពារសិទ្ធិ និងផលប្រយោជន៍ស្របច្បាប់របស់គាត់ និងជាដៃគូសន្ទនាដ៏មានប្រសិទ្ធភាពក្នុងកិច្ចសន្ទនាសង្គម កិច្ចព្រមព្រៀងជាសកល (Global Deal Initiative)”។

ជាមួយគ្នានេះ កម្ពុជាក៏ចូលរួមបន្តអនុវត្តន៍ បានយ៉ាងល្អនូវយន្តការត្រីភាគីក្នុងចរចា និងដោះស្រាយបញ្ហានានាប្រកបដោយជោគជ័យ គម្រោងរោងចក្រកាន់តែប្រសើរនៅកម្ពុជា និងការបន្តពង្រឹងយន្តការក្រុមប្រឹក្សាអាជ្ញាកណ្តាលសុទ្ធ ជាធាតុផ្សំនៃការកសាងជំនឿទុកចិត្ត របស់អ្នកវិនិយោគទុនប្រទេសទាំងនេះនៅកម្ពុជា។

ឯកអគ្គរាជទូត និងរដ្ឋទូតទាំង៤ បានសំដែងនូវកោតសរសើរ និងវាយតម្លៃខ្ពស់ ចំពោះវឌ្ឍនភាពរីកចម្រើនរបស់កម្ពុជាលើគ្រប់វិស័យ ជាពិសេសក្នុងដំណាក់កាលនៃការរាតត្បាតជំងឺកូវីដ-១៩ រដ្ឋាភិបាលកម្ពុជា បានគ្រប់​គ្រងបានយ៉ាងល្អ ដែលអាចជួយសង្គ្រោះអាយុជីវិតប្រជាជន ហើយឈានទៅបើកដំណើរការសកម្មភាពសេដ្ឋកិច្ច សង្គមឡើងវិញពេញលេញលើគ្រប់វិស័យ។

ទន្ទឹមនឹងនេះ ក៏បានសំដែងនូវការកោតសសើរ ចំពោះការវិវត្តន៍រីកចម្រើននៃវិស័យការងារ ដែលបានយកចិត្តទុកដាក់ខ្ពស់ ក្នុងការធ្វើឱ្យប្រសើឡើងនូវកិច្ចសន្ទាសង្គម សិទ្ធិសេរីភាព អង្គការវិជ្ជាជីវៈ សិទ្ធិការងារ កាត់បន្ថយបាននូវិវាទការងារ មានយន្តការត្រីភាគីច្បាស់លាស់ ដោះស្រាយការងារដោយឯករាជ្យ និងតម្លាភាព។

ឆ្នាំ២០២៣នេះ ជាឆ្នាំដែលកម្ពុជាកំពុងទន្ទឹងរង់ចាំ ការវិលត្រលប់នៃវិនិយោគិនបរទេសចូលមកកម្ពុជាវិញ ជាមួយនឹងរំហូរវិនិយោគទុនពីបរទេ​សចូលមកកម្ពុជាផងដែរ ដោយកម្ពុជាបានត្រៀមខ្លួន និងលក្ខណៈសម្បត្តិមួយចំនួនរង់ចាំស្វាគមន៍ ការមកដល់នៃវិនិយោគិនទាំងអស់៕

ដោយៈ គង់ សូរិយា

       ភ្នំពេញៈ គំរោងអភិវឌ្ឍន៍ហេដ្ឋារចនាសម្ព័ន្ឋ ការរៀបចំជាប៉ូលសេដ្ឋកិច្ច និងការរៀបចំខ្លួនជាទីក្រុងឆ្លាតវៃ នឹងធ្វើឲ្យទឹកដីខេត្តបាត់ដំបង រីកចម្រើនកាន់តែខ្លាំងនាពេលអនាគត។

អភិបាលនៃគណៈអភិបាលខេត្តបាត់ដំបង លោកសុខ លូ បានរំលេចឱ្យដឹងថា រហូតមកដល់ពេលនេះ ខេត្តបាត់ដំបង កំពុងរៀបចំក្រុងបាត់ដំបង ជាក្រុងSmart City និងការរៀបចំប្រព័ន្ធលូ ផ្លូវ ហើយត្រូវបានរាជរដ្ឋាភិបាល ដាក់បញ្ចូលខេត្តបាត់ដំបង ជាប៉ូលសេដ្ឋកិច្ចទី៤ របស់ព្រះរាជាណាចក្រកម្ពុជា ក្នុងនោះខេត្តបាត់ដំបង គ្រោងនឹងបង្កើតផ្លូវរថភ្លើង ល្បឿនលឿនមួយខ្សែបាត់ដំបង ភ្នំពេញ និងព្រលានយន្តហោះប្រភេទ4C រួមនិងកិច្ចអភិវឌ្ឍន៍ជាច្រើនទៀត ដើម្បីធ្វើឱ្យខេត្តបាត់ដំបង កាន់តែមានការរីកចម្រើនលើគ្រប់វិស័យ។

លោកបន្តថា “គំរោងទាំងអស់នេះ សុទ្ឋតែជាតម្រូវការចាំបាច់របស់ប្រ​ជាពលរដ្ឋ និងវិនិយោគិនទាំងថ្នាក់ជាតិ តំបន់ និងអន្តរជាតិធ្វើការដាក់ទុនវិនិយោគ លើគ្រប់វិស័យនៅក្នុងខេត្តបាត់ដំបងក៏ដូចជាប្រទេសកម្ពុជា”។

លោកសុខ លូបានលើកឡើងបែបនេះ ក្នុងជំនួបសម្ដែងការគួរសម និងពិភាក្សាការងាររវាងរដ្ឋបាលខេត្តបាត់ដំបង នៃព្រះរាជាណាចក្រកម្ពុជា និង គណៈប្រតិភូខេត្តចន្ទបុរី នៃព្រះរាជាណាចក្រថៃ ដែលដឹកនាំដោយលោក មន្ដសិទ្ធិ៍ ផៃសានធនវ័ត្ន អភិបាលខេត្តចន្ទបុរី នៃព្រះរាជាណាចក្រថៃ ក្នុងគោលបំណង ដើម្បីពង្រឹងកិច្ចសហប្រតិបត្ដិការ រវាងខេត្ដទាំងពីរ (បាត់ដំបង-ចន្ទបុរី) ឱ្យកាន់តែតែជិតស្និទ្ធិបន្ថែមទៀត។

លោកសុខ លូ បានធ្វើការវាយតម្លៃខ្ពស់ ចំពោះកិច្ចខិតខំប្រឹងប្រែងការងាររួមគ្នា ដើម្បីបង្កើនការយោគយល់គ្នា និងមិត្តភាពរវាងខេត្តបាត់ដំបង និងខេត្តចន្ទបុរី ដែលបានជួយដល់កំណើនសេដ្ឋកិច្ចរបស់ ប្រជាពលរដ្ឋ នៅតាមតំបន់ព្រំដែនឱ្យមានការរីកចម្រើនជាបន្តបន្ទាប់ ហើយចំណងមិត្តភាព និងសាមគ្គីភាពរវាងប្រជាជនកម្ពុជា និងប្រជាជនថៃ គឺជាចំណងមិត្តភាពប្រពៃណីដ៏ល្អ។

លោកបន្តថា តាមរយៈនេះ ខេត្តបាត់ដំបង និងបណ្តាខេត្ត ដែលជាប់ពំ្រដែនជាមួយគ្នា បានជំរុញកិច្ចសហប្រតិបត្តិការគ្នា លើគ្រប់វិស័យ ដែលស្របទៅនឹងគោលនយោបាយរបស់ រាជរដ្ឋាភិបាល និងអនុស្សរណៈយោគយល់គ្នារបស់ភាគីទាំងពីរ និងស្របទៅតាមគោលបំណងរួម ដែលភាគីទាំងពីរបានឯកភាពគ្នាកន្លងមក។

ជាមួយគ្នានេះ លោកមន្តសិទ្ធ ផៃសានធនវ័ត្ត អភិបាលខេត្តចន្ទបូរី បានធ្វើការ ស្វាគមន៍ចំពោះកិច្ចការងារសំខាន់ៗ ទាំងអស់របស់កម្ពុជា ដែលកំពុងមានការវិវឌ្ឍន៍ រីកចម្រើនពីមួយឆ្នាំទៅមួយឆ្នាំ ហើយរាល់កិច្ចសហប្រតិបត្តិការដែលធ្លាប់មានកន្លងមក ក្នុងនាមអាជ្ញាធរខេត្តចន្ទបូរី នៅតែបន្តរក្សារគោលជំហរបែបនេះតទៅមុខទៀត ។

លោកបានបញ្ជាក់ថា អាជ្ញាធរខេត្តចន្ទបូរី នឹងបន្តការជួយអន្តរាគមន៍ដល់ពលករកម្ពុជា ដែលបាននឹងកំពុងធ្វើការងារនៅថៃ ពេលជួបនឹងបញ្ហាអ្វីផ្សេងៗ ហើយអាជ្ញាធរខេត្តចន្ទបូរី សន្យានឹងធ្វើកិច្ចប្រតិបត្តិការក្នុងការបង្រ្កា​បបទល្មើសផ្សេងៗ នៅតាមព្រំដែន ក៏ដូចជា បង្រ្កាបបញ្ហាគ្រឿងញៀនឆ្លងដែនផងដែរ ៕