ដោយៈ សុផារី

ភ្នំពេញៈ ការទិញទំនិញតាមរយៈអនឡាញ បានក្លាយជានិន្នាការថ្មីមួយ ហើយក៏បានកំពុងប្រកួតប្រជែង ដណ្តើមចំណែកទីផ្សារពីផ្សារទំនើប ក្នុងរយៈពេលប៉ុន្មានឆ្នាំចុងក្រោយនេះ។

ដើម្បីអាចបន្តឈានមុខនៅក្នុងទីផ្សារ ទីផ្សារលក់រាយតាមផ្សារទំនើបបានផ្លាស់ប្តូរយុទ្ធសាស្ត្រ ដោយព្យាយាមបន្ថែមនូវអ្វី ដែលការទិញទំនិញអនឡាញមិនមាន។

លោកLawrence Lennon អគ្គនាយកក្រុមហ៊ុន CBRE Cambodia បានមានប្រសាសន៍នៅថ្ងៃទី១៣ ខែធ្នូកន្លងមកថា ទោះបីកន្លងមកមានការផ្លាស់ប្តូរទម្លាប់ នៅក្នុងការទិញទំនិញពីក្នុងហាង មកទិញទំនិញតាមអនឡាញច្រើនជាងមុនក្តី ប៉ុន្តែអចលនទ្រព្យប្រភេទលក់រាយនៅតែបន្តរីកចម្រើនទៅមុខទៀត។

យ៉ាងណាក្តី នៅតាមផ្សារទំនើបនានា នៅក្នុងទីក្រុងភ្នំពេញបានកំពុងក្លាយជាទីតាំងសម្រាប់ “កំសាន្ត” ច្រើនជាង “ទីកន្លែងទិញទំនិញ” ដោយ​សារតែ ត្រូវប្រឈមនឹងការប្រកួតប្រជែង ពីសំណាក់អ្នកលក់នៅតាមអនឡាញ។ នេះបើយោងតាមការបញ្ជាក់របស់លោក Lennon។

លោកគូសបញ្ជាក់ថា “ថ្វីត្បិតតែមានការផ្លាស់ប្តូរទម្លាប់ខ្លះ ដោយសារតែកូវីដ១៩នាពេលកន្លងមកក៏ដោយ ក៏ផ្សារទំនើបត្រូវបានគេមើលឃើញថា នៅតែជាមជ្ឈមណ្ឌលសម្រាប់កំសាន្ត ជាជាងសម្រាប់តែការទិញទំនិញតែមួយមុខ”។

លោកបានបន្តទៀតថា “កន្លែងទាំងនេះ ឥឡូវនេះ កំពុងផ្តោតការយកចិត្តទុកដាក់កាន់តែច្រើន ទៅលើការទាក់ទាញ តាមរយៈការផ្តល់ជូននូវបទពិសោធន៍ ជាជាងការលក់រាយ តែមួយមុខ ដើម្បីជាមធ្យោបាយមួយអាចប្រកួតប្រជែង ជាមួយនឹងអ្នកលក់រាយតាមអ៊ីនធឺណិតបាន”។

ជាក់ស្តែង ផ្សារទំនើប Aeon មានជ័យ ដែលទើបបើកដំណើរការនៅថ្ងៃទី១៥ ខែធ្នូកន្លងមក ក៏បានរចនា និងរៀបចំនូវកន្លែងទស្សនាកំសាន្តប្លែក​ៗជាច្រើន ក្រៅពីហាងអាហារ ហាងលក់សម្លៀកបំពាក់ ផ្សារលក់រាយ កន្លែងហាត់ប្រាណ និងថែរក្សាសម្ផស្ស ជាដើម។

យោងតាមទិន្នន័យស្រាវជ្រាវដោយ ក្រុមហ៊ុនCBRE Cambodia បានឱ្យដឹងថា ទីផ្សារលក់រាយនៅក្នុងក្រុងភ្នំពេញ នឹងមានការផ្គត់ផ្គង់ថ្មីប្រហែល២០៧.០០០ម៉ែត្រការ៉េ នៅដំណាច់ឆ្នាំ២០២២នេះ ដោយប្រហែ​ល៧០ភាគរយ នៃកន្លែងនោះមានទីតាំងនៅក្នុងផ្សារទំនើប៕

ដោយ: លាងហួរ     

ភ្នំពេញ: មន្ត្រីរដ្ឋាភិបាលកម្ពុជាមួយរូប បានមានប្រសាសន៍កាលពីពេលថ្មីៗនេះថា សេដ្ឋកិច្ចកម្ពុជាបានងើបឡើងវិញ យ៉ាងល្អប្រសើរពីផលប៉ះពាល់នៃជំងឺកូវីដ-១៩ នៅក្នុងឆ្នាំ២០២២នេះ ដោយរំពឹងថានឹងមានលទ្ធផលល្អប្រសើរបន្ថែមទៀតនៅឆ្នាំ២០២៣។

លោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា សេដ្ឋកិច្ចរបស់កម្ពុជាត្រូវបានគេរំពឹងថា នឹងសម្រេចបានកំណើន៥,៤ភាគរយនៅឆ្នាំនេះ និង៦,៦ភាគរយនៅឆ្នាំ២០២៣។

លោកបានថ្លែងនៅក្នុងសភាថា “ប្រាក់ចំណូលរបស់មនុស្សម្នាក់ៗក្នុង​មួយឆ្នាំត្រូវបានគេរំពឹងថា នឹងកើនឡើងដល់១.៧៨៥ដុល្លារក្នុងឆ្នាំ២០២២ ហើយនឹងកើនឡើងបន្ថែមទៀត រហូតដល់១.៩២៤ដុល្លារនៅឆ្នាំ២០២៣”។

សេដ្ឋកិច្ចនៃប្រទេសអាស៊ីអាគ្នេយ៍មួយនេះ ត្រូវបានជំរុញជាចម្បង ដោយការនាំចេញសម្លៀកបំពាក់ វិស័យសំណង់ វិស័យអចលនទ្រព្យ វិស័យទេសចរណ៍ និងវិស័យកសិកម្ម។

យោងតាមលោកអូន ព័ន្ធមុនីរ័ត្នបានឱ្យដឹងថា នៅក្នុងឆ្នាំ២០២៣ខាងមុខ វិស័យឧស្សាហកម្ម ដែលភាគច្រើនជាផ្នែកកាត់ដេរ និងសំណង់ត្រូវបានព្យាករណ៍ថានឹងកើនឡើង៩,២ភាគរយ ខណៈដែលវិស័យសេវាកម្ម ភាគច្រើនជាទេសចរណ៍ ដឹកជញ្ជូន ទូរគមនាគមន៍ ពាណិជ្ជកម្ម និងអចលនទ្រព្យត្រូវបានរំពឹងថា នឹងកើនឡើង៦,៦ភាគរយ រីឯវិស័យកសិកម្មត្រូវបានព្យាករណ៍ថានឹងកើនឡើង១,១ភាគរយ។

លោកបានបន្ថែមថា អតិផរណារបស់ប្រទេសកម្ពុជា ត្រូវបានព្យាករណ៍ថា នឹងធ្លាក់ចុះដល់ត្រឹម២,៥ភាគរយ នៅឆ្នាំ២០២៣ពីកម្រិត៥ភាគរយនៅក្នុងឆ្នាំ២០២២នេះ។

ប្រសាសន៍របស់លោកអូន ព័ន្ធមុនីរ័ត្ន មានភាពស្របគ្នានឹងលោក លី សុដេត សេដ្ឋវិទូជាន់ខ្ពស់ប្រចាំប្រទេសកម្ពុជា របស់ធនាគារពិភពលោក ដែលថាសេដ្ឋកិច្ចកម្ពុជា កំពុងងើបឡើងវិញយ៉ាងល្អប្រសើរ បន្ទាប់ពីជំងឺកូវីដ-១៩។

លោក លី សុដេត បានមានប្រសាសន៍ថា ការកើនឡើងនៃការនាំចេញសម្លៀកបំពាក់ ស្បែកជើង ផលិតផលធ្វើដំណើរ និងការផលិតកង់ ការងើបឡើងវិញនៃឧស្សាហកម្មធ្វើដំណើរ និងទេសចរណ៍ និងការត្រឡប់មកវិញនៃលំហូរវិនិយោគផ្ទាល់ ពីបរទេសបានជួយជំរុញ និងទ្រទ្រង់ដល់កំណើ​នសេដ្ឋកិច្ចកម្ពុជានៅក្នុងឆ្នាំ២០២២នេះ។

លោក​បាន​បន្ថែម​ថា​ “នៅក្នុង​រយៈ​ពេល​មធ្យម សេដ្ឋកិច្ច​កម្ពុជាត្រូវ​បាន​រំពឹង​ថា​ នឹង​មាន​និន្នាការ​ត្រឡប់​ទៅ​រក​សក្ដានុពល​វិញ ដោយ​មាន​កំណើន​ប្រហែល៦ភាគរយ”។

លោក លី សុដេត បានមានប្រសាសន៍ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) បានជួយជំរុញដល់វិស័យកសិកម្ម និងកសិឧស្សាហកម្មរបស់កម្ពុជា។

លោក​បាន​អះអាងថា​ “កិច្ចព្រមព្រៀងពាណិជ្ជកម្មសេរីកម្ពុជា -ចិន(CCFTA) នឹង​ទាក់​ទាញ​ក្រុមវិនិយោគិនបរទេស​បន្ថែម​ទៀត ជា​ពិសេស​វិនិយោគិនចិន​ចូលមក​ក្នុងប្រទេស​កម្ពុជា”៕

ដោយៈ វឌ្ឍនៈ

ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យមួយ បានប្រកាសលក់ដីឡូត៏របស់ខ្លួនក្នុងតម្លៃ ក្រោមទីផ្សារធៀបនឹងដីធ្លីនៅតំបនជុំវិញនោះ ខណៈម្ចាស់គម្រោងធានាអះអាងថា តំបន់ស្ថិតនៅជុំវិញគម្រោងរបស់ខ្លួននឹងមានសក្ដានុពលកាន់តែខ្លាំង នៅពេលអនាគតដ៏ខ្លីខាងមុខនេះ។

អគ្គនាយកក្រុមហ៊ុនអភិវឌ្ឍន៍អចលនទ្រព្យHK Residence លោកចាប ពៅបានមានប្រសាសន៍ឲ្យដឹងកាលពីពេលថ្មីៗនេះថា ដីឡូត៏ដែលអភិវឌ្ឍន៍ដោយក្រុមហ៊ុនរបស់លោក តម្លៃត្រឹមតែ២៨០០០ដុល្លារអាមេរិកប៉ុណ្ណោះ ។ លោកបន្តថា បើស្ដាប់ទៅគេថាប្រហែលជាថ្លៃបន្តិចហើយ តែដីឡូត៏ដែលលោកលក់នេះ មានទំហំ១២គុណ នឹង៥០ម៉ែត្រឯណោះ ហើយដីក៏បានចាក់ដីបំពេញរួចរាល់ ព្រមទាំងមានរបងព័ទ្ធជុំវិញរួចហើយដែរ ។

លោកបានលើកជាសំណួរថា “សួរថាតើមានដីណាលក់ ក្នុងតម្លៃបែបនេះនៅជុំវិញរបស់លោក”?។

លោកចាប ពៅបានបន្តថា តំបន់អភិវឌ្ឍន៍គម្រោងលំនៅឋាន និងដីឡូត៏របស់ខ្លួន ស្ថិតនៅជិតនឹងតំបន់រមណីយដ្ឋានភ្នំតាម៉ៅ ជិតគម្រោងព្រលានយន្តហោះអន្តរជាតិតេជោ ដែលជាព្រលានធំជាងគេនៅកម្ពុជា ហើយផ្លូវជាតិលេខ២ក៏បាន និងកំពុងស្ថាបនាជិតរួចរាល់ហើយដែរ។ ដូច្នេះនៅពេលខាងមុខដីនៅតំបន់នេះ នឹងមានការឡើងថ្លៃខ្ពស់ សក្ដានុពលអភិវឌ្ឍន៍ក៏នឹងកាន់តែខ្ពស់ដូចគ្នាផងដែរ ។

លោកចាប ពៅ បានមានប្រសាសន៍បន្តទៀតថា កត្តាដែលលោកលក់ដីឡូត៏ជូនអតិថិជន មានតម្លៃទាបជាងទីផ្សារបែបនេះ ពីព្រោះកាលលោកទិញដីនេះមកអភិវឌ្ឍន៍ក៏ក្នុងតម្លៃទាបដូចគ្នា ដូច្នេះហើយដើម្បីជំរុញឱ្យពល​រដ្ឋមករស់នៅក្នុងគម្រោងកាន់តែច្រើន និងចង់ឱ្យពលរដ្ឋបានដីដែលមានតម្លៃទាបសម្រាប់អភិវឌ្ឍន៍ លំនៅឋានលំហែកាយនៅពេលអនាគត ឬលំ​នៅឋានអចិន្ត្រៃយ៍ទើ បសម្រេចលក់ក្នុងតម្លៃទាបជាងទីផ្សារបច្ចុប្បន្ន ។

លោកបន្ថែមថា នៅក្នុងគម្រោងនេះ យើងមានអភិវឌ្ឍជាលំនៅឋានបែបផ្ទះវីឡា ហើយប្រជាពលរដ្ឋអាចទិញផ្ទះ ជាការវិនិយោគ និងអាចទិញសម្រាប់ទុកសម្រាកលំហែកាយ នៅពេលចុងសប្ដាហ៍ ក្រោយពីបំពេញការងារអស់រយៈពេលពេញមួយសប្ដាហ៍ ។

អ្នកអភិវឌ្ឍន៍រូបនេះបញ្ជាក់ថា ទីតាំងអភិវឌ្ឍន៍របស់យើង បើគិតទៅមិនមានចំងាយឆ្ងាយពីភ្នំពេញប៉ុន្មាននោះទេ យើងគិតពីវត្តភ្នំដែលជាចំណុ​ចកណ្ដាលរាជធានី គឺមានចំងាយប្រមាណ៣៩គីឡូម៉ែត្រ តែបើគិតពីរង្វង់មូលកួរស្រូវវិញ គឺមានចំងាយត្រឹម១៦គីឡូម៉ែត្រប៉ុណ្ណោះ ។ ចំងាយនេះស្រ​ប​នឹងផ្លូវយើងស្រួលធ្វើដំណើរទៀត គឺជិះមិនយូរនោះទេ ជាពិសេសនៅពេលប្រទេសយើង កាន់តែអភិវឌ្ឍន៍ចំងាយប៉ុណ្ណេះ មិនជាឆ្ងាយនោះឡើយ ។

ការរីកចម្រើននៃជីវភាពរបស់ពលរដ្ឋ តម្រូវការលំនៅឋានទី២ឬ លំនៅដ្ឋានលំហេកាយ ក្លាយជាការវិនិយោគដ៏ពេញនិយម ព្រោះថានៅពេលមានប្រាក់ចំណូលខ្ពស់ហើយ ជីវភាពប្រសើរហើយ អ្វីដែលពលរដ្ឋត្រូវការគឺកន្លែងសម្រាកលំហែចុងសប្ដាហ៍ ឬនៅពេលឈប់សម្រាកបុណ្យជាតិធំៗម្ដងម្កាល៕

ដោយៈសុផារី

កោះកុង: រាជរដ្ឋាភិបាល បានយល់ព្រមជាគោលការណ៍ផ្លាស់ប្ដូរទីតាំងដីទំហំ៦.២៣៤ហិកតា ស្ថិតនៅក្នុងឧទ្យានជាតិបុទុមសាគរ ខេត្តកោះកុង ផ្តល់អោយក្រុមហ៊ុន កោះកុង រ៉ាប់ប៊ើរ ផ្លេនថេសិន ដើម្បីធ្វើការវិនិយោគ ស្របតាមនីតិវិធីច្បាប់ជាធរមាន។

យោងតាមការសេចក្តីប្រកាសព័ត៌មាន របស់រដ្ឋបាលខេត្តកោះកុង នៅថ្ងៃទី៦ ធ្នូកន្លងមកនេះបានឲ្យដឹងថា  លោកអន សុធារិទ្ធ អភិបាលរង នៃគណៈអភិបាលខេត្តកោះកុង បានដឹកនាំក្រុមការងារខេត្ត ចូលរួមជាមួយប្រតិភូក្រសួងបរិស្ថាន ដឹកនាំដោយលោក រ័ត្ន វីរៈ រដ្ឋលេខាធិការក្រសួងបរិ​ស្ថានបានចុះពិនិត្យ និងសម្របសម្រួលដោះស្រាយផលប៉ះពាល់លើទីតាំងវិនិយោគរបស់ក្រុមហ៊ុន កោះកុង រ៉ាប់ប៊ើ ផ្លេនថេសិន ស្ថិតនៅក្នុងឧទ្យានជាតិបុទុមសាគរ កាលពីថ្ងៃទី១៦ ខែធ្នូនេះ។

ក្រុមហ៊ុន កោះកុងរ៉ាប់ប៊ើ ផ្លេនថេសិន បានទទួលការយល់ព្រមជាគោលការណ៍ពីរដ្ឋាភិបាល ក្នុងការផ្លាស់ប្ដូរទីតាំងដីទំហំ៦.២៣៤ហិកតា ស្ថិតនៅក្នុងឧទ្យានជាតិ បុទុមសាគរ ខេត្តកោះកុង ផ្តល់អោយក្រុមហ៊ុន ដើម្បីធ្វើការវិនិយោគ ស្របតាមនីតិវិធីច្បាប់ជាធរមាន ដោយមានទីតាំងស្ថិតនៅក្នុងតំបន់ឧទ្យានជាតិបុទុមសាគរ ភូមិសាស្ត្រ ខេត្តកោះកុង។

រដ្ឋបាលខេត្តបានឲ្យដឹងថា តាមរយៈការចុះពិនិត្យទីតាំងជាក់ស្តែង និងបានប្រជុំពិភាក្សា តំណាងសហគមន៍បានយល់ស្រប លើការផ្លាស់ប្តូរទីតាំងនេះ ក្នុងនោះពួកគាត់ក៏បានសំណូមពរ ដល់ក្រុមហ៊ុនវិនិយោគ ក្រសួង និងអាជ្ញាធរមូលដ្ឋាន ក្នុងការជួយអភិវឌ្ឍន៍សហគមន៍របស់ពួកគាត់ ដូចជាការកសាងហេដ្ឋារចនាសម្ព័ន្ធ និងកសាងសមត្ថភាពសហគមន៍ផងដែរ៕

  ដោយៈ គង់ សូរិយា

       ភ្នំពេញៈ បុរី ជាអចលនទ្រព្យដែលពេញនិយមមួយ សម្រាប់ប្រជាជនខ្មែរ មូលហេតុដោយសារតែផ្ទះនៅជាប់ដី មានទំហំធំទូលាយ និងពិសេសមានតម្លៃទាប បើប្រៀបធៀបទៅនឹងខុនដូក្នុងក្រុង។

ទោះបីជាបច្ចុប្បន្នបុរីភាគច្រើន ត្រូវបានអភិវឌ្ឍនៅឆ្ងាយពីទីក្រុងប្រមាណ១០ ទៅ១៥គីឡូម៉ែត្រក្ដី។

ក្នុងនាមយើងជាអ្នកទិញ តើមានចំណុចសំខាន់អ្វីខ្លះដែលត្រូវតែដឹងមុននឹងសម្រេចចិត្តទិញលំនៅឋានក្នុងបុរី? មនុស្សភាគច្រើន គឺផ្ដោតលើទីតាំង តម្លៃ និងម៉ូតផ្ទះ ប៉ុន្តែពេលខ្លះពួកគេមិនបានស្វែងយល់ អំពីឯកសារច្បាប់សំខាន់ៗមួយចំនួន ពីសំណាក់អ្នកអភិវឌ្ឍន៍គម្រោងនោះទេ។

ក្រៅពីទីតាំង តម្លៃ និងម៉ូតគេហឋាន អ្នកទិញក៏គួរសួរនាំអ្នកអភិវឌ្ឍន៍បុរីអំពីឯកសារផ្លូវច្បាប់សំខាន់៥ ដើម្បីប្រាកដថា គម្រោងនេះអាចទុកចិត្តបាន។ ឯកសារទាំងនោះរួមមាន៖

ប័ណ្ណចុះបញ្ជីក្រុមហ៊ុន

មុនពេលចាប់ផ្តើមសាងសង់បុរី ក្រុមហ៊ុនអភិវឌ្ឍន៍មានកាតព្វកិច្ចត្រូវតែចុះបញ្ជីឱ្យរួចរាល់ ជាមួយក្រសួងពាក់ព័ន្ធជាមុនសិន ទើបអាចមានសិទ្ធិចាប់ផ្តើមសាងសង់គម្រោងបាន។ ការស្នើសុំពិនិត្យមើលប័ណ្ណចុះបញ្ជីក្រុមហ៊ុនស្របច្បាប់ គឺដើម្បីធានាបានថាគម្រោងនោះ អាចដំណើរការដោយស្របច្បាប់។

លិខិតអនុញ្ញាតសាងសង់

មុននឹងផ្តល់លិខិតអនុញ្ញាតសាងសង់ដល់ ក្រសួងរៀបចំដែនដី នគរូបនីយកម្ម និងសំណង់ បានត្រួតពិនិត្យលើគម្រោងនោះយ៉ាងហ្មត់ចត់ ទាំងការរចនា និងគុណភាព រួមទាំងហេដ្ឋារចនាសម្ព័ន្ធផ្សេងៗទៀតដូចជា ប្រព័​ន្ធទឹក ភ្លើង និងលូជាដើម។

ដូច្នេះ ការដែលក្រុមហ៊ុនមានលិខិតអនុញ្ញាតសាងសង់ គឺជាចំណុចកក់ក្ដៅមួយទៀតសម្រាប់អ្នកទិញ។

អាជ្ញាប័ណ្ណបុរី

ក្រោយពីក្រុមហ៊ុនអភិវឌ្ឍន៍បុរី បានបំពេញគ្រប់នូវតម្រូវការទាំងអស់ទាក់ទងនឹងគុណភាពសំណង់ ការរចនាប្លង់ ផែនការលក់ និងឯកសារចាំបាច់ផ្សេងៗ ក្រសួងសេដ្ឋកិច្ច និងហិរញ្ញវត្ថុ នឹងផ្តល់អាជ្ញាប័ណ្ណបុរីដល់ពួកគេ។ ដូច្នេះអ្នកក៏ត្រូវសុំមើលឯកសារនេះផងដែរ។

ប្លង់មេ

ប្លង់មេមានសារៈសំខាន់បំផុត ចំពោះគម្រោងបុរីនីមួយៗ ដូច្នេះអ្នកត្រូវសុំឱ្យក្រុមហ៊ុនអភិវឌ្ឍន៍ បង្ហាញប្លង់មេនេះ។ ប្លង់នេះទៀតសោត គឺត្រូវបានអនុម័តដោយក្រសួងរៀបចំដែនដី នគរូបនីយកម្ម ជាមុនសិន មុននឹងបុរីណាមួយអាចសាងសង់បាន។

ប្លង់រ៉ឹង

មុននឹងទិញលំនៅឋានក្នុងគម្រោងបុរីណាមួយ អ្នកគួរតែសួរអំពីប្លង់មេ និងប្លង់រឹងនីមួយៗ ពីអ្នកអភិវឌ្ឍន៍គម្រោងមួយនោះ។ ប្លង់មេគ្របដណ្តប់លើដីទាំងអស់ សម្រាប់ការអភិវឌ្ឍន៍បុរីទាំងមូល ខណៈដែលប្លង់កម្មសិទ្ធិនីមួយៗត្រូវបានបែងចែកជាយូនីតផ្សេងៗគ្នា។

ដូច្នេះ អ្នកត្រូវប្រាកដថាអ្នកអភិវឌ្ឍន៍គម្រោងនោះ មានឯកសារច្បាប់ផ្លូវការ ដើម្បីបញ្ជាក់ពីប្លង់រឹងទាំងពីរប្រភេទនេះ៕

ដោយៈ ជេស៊ីកា
កំពតៈ ប្រមុខរាជរដ្ឋាភិបាលកម្ពុជា សម្តេចតេជោហ៊ុន សែននាយករដ្ឋមន្រ្តីនៃកម្ពុជា បានអនុញ្ញាត្តឲ្យអ្នកឧកញ៉ាសុខ គង់ ប្រធានក្រុមហ៊ុនសុខាអូតែលសាងសង់ រូបសំណាកព្រះពុទ្ឋបដិមាទ្រង់ព្រះភ្នែនដ៏ធំ នៅលើខ្នងភ្នំបូកគោ ក្នុងតំបន់វាលស្រែ៥០០ ដែលមានកំពស់រហូតដល់១០៨ម៉ែត្រ ដែលនឹងក្លាយជាព្រះពុទ្ឋបដិមា ទ្រង់ព្រះភ្នែនខ្ពស់ជាងគេនៅលើពិភពលោក។
អ្នកឧកញ៉ាសុខ គង់បានមានប្រសាសន៍ឲ្យដឹងនារសៀលថ្ងៃទី១៦ ធ្នូកន្លងមកថា គោលបំណងនៃការសាងសង់ រូបសំណាកព្រះពុទ្ឋបដិមាដ៏ធំនេះ ដើម្បីជាទីសក្ការៈដ៏ថ្លៃថ្លាឧត្តុងឧត្តម សម្រាប់បងប្អូនប្រជាពលរដ្ឋខ្មែរយើង និងដើម្បីឧទ្ទិសសុំសេចក្តីសុខ សេចក្តីចម្រើនរុងរឿង និងសុខសន្តិភាពជានិច្ចនិរន្តរ៍ ដល់ប្រជាពលរដ្ឋយើងទាំងអស់នៅក្នុងតំបន់នេះ ក៏ដូចជានៅទូទាំងព្រះរាជាណាចក្រកម្ពុជាទាំងមូល។

អ្នកឧកញ៉ាបានបន្ថែមថា ម្យ៉ាងវិញទៀត ព្រះពុទ្ឋបដិមាដ៏ធំស្កឹមស្កៃនេះ ក៏ជាការជួយរួមចំណែកទ្រទ្រង់ ដល់វិស័យព្រះពុទ្ឋសាសនា និងការអភិវឌ្ឍទេសចរណ៍វប្បធម៌ ហើយជាពិសេសទៀតនោះ គឺជាការទាក់ទាញយ៉ាងធំធេងដល់ភ្ញៀវទេសចរជាតិ និងអន្តរជាតិរាប់លាននាក់ក្នុងមួយឆ្នាំៗ ឱ្យមកកាន់តំបន់នេះយ៉ាងច្រើនកុះករ ហើយក៏ជាប្រភពចំណូលយ៉ាងធំ ដែ លនឹងទទួលបានពីភ្ញៀវទេសចរទាំងនោះ។

អ្នកឧកញ៉ាសុខ គង់ បានឱ្យដឹងទៀតថា គិតរហូតមកដល់ពេលនេះ ក្រុមហ៊ុនបានទទួលការអនុម័ត លើរចនាបទពុទ្ឋបដិមា ពីក្រុមការងារអន្តរក្រសួងរួចហើយ ដែលការរចនាថ្មីគឺធ្វើយ៉ាងណាឲ្យពុទ្ឋបដិមានេះ សមស្របនឹងវប្បធ៌មខ្មែរយើង។
អ្នកឧកញ៉ាសុខ គង់ ក៏បានបង្ហើបឱ្យដឹងថា គម្រោងនេះគ្រោងនឹងចំណាយថវិកាប្រមាណពី៣០ ទៅ៤០លានដុល្លារអាមេរិក ដោយការសាងសង់នឹងចាប់ផ្តើម ក្នុងពេលឆាប់ៗតាមតែអាចធ្វើទៅបាន។
កិច្ចប្រជុំដ៏សំខាន់ ដែលបានធ្វើកាលពីថ្ងៃទី២៧ ឧសភាកន្លងមកនេះ មានការចូលរួមពីមន្រ្តីជាន់ខ្ពស់ក្រសួងវប្បធ៌ម និងវិចិត្រសិល្បៈ ក្រសួងធម្មការនិងសាសនា ក្រសួងរៀបចំដែនដី នគរូបនីយកម្ម និងសំណង់ ក្រសួងទេសចរណ៍ ក្រសួងបរិស្ថាន អាជ្ញាធរខេត្តកំពត និងក្រុមការងារបច្ចេកពាក់ព័ន្ឋ និងតំណាងក្រុមហ៊ុនសុខាអូតែល។

តាមរយៈកិច្ចពិភាក្សាក្នុងអង្គប្រជុំនេះ គណៈកម្មការអន្តរក្រសួងបានគាំទ្រ ចំពោះសំណើរសុំសាងសង់ពុទ្ឋបដិមាខ្ពស់ ជាងគេលើពិភពលោករបស់របស់ក្រុមហ៊ុនសុខាអូតែល។
អ្នកឧកញ៉ាសុខ គង់់បានបញ្ជាក់ថា ពុទ្ឋបរិស័ទដែលមានសទ្ឋាជ្រះថ្លា អាចចូលរួមជាវិភាគទាន ឬចាប់មគ្គផល ដើម្បីចូលរួមសាងសង់ពុទ្ឋបដិមានេះ ដើម្បីនាំមកនូវកិត្តិយស និងមោទនភាពជាតិខ្មែរយើងទាំងអស់គ្នា៕

 ដោយៈគង់ សូរិយា

       ភ្នំពេញៈ រដ្ឋាភិបាលបានសម្រេចកាត់ដីទំហំជិត៦០០ហិកតា ដើម្បីធ្វើប្រទានកម្មជាកម្មសិទ្ធិសមូហភាព ជូនសហគមន៍ជនជាតិដើមភាគតិចចារាយ ស្ថិតក្នុងភូមិប៉ាតាង ឃុំសសាន ស្រុកអូរយ៉ាដាវ ខេត្តរតនគិរី ព្រមទាំងផ្តល់សិទ្ធិជាកម្មសិទ្ធិលើក្បាលដីផងដែរ។

យោងតាមអនុក្រឹត្យលេខ ២២២ អនក្រ.បក ចុះថ្ងៃទី២៤ ខែតុលា ឆ្នាំ២០២២បានឲ្យដឹងថា ទំហំដីដែលកាត់នេះ ត្រូវបានកាត់ចេញពី២ទីតាំង ដោយកាត់ផ្ទៃដីទំហំ១៨៩ហិកតា៧៤អា និង៥៥សង់ទីអា ចេញពីដែនគម្របពឈើឆ្នាំ២០០២។

ដោយឡែក មួយទីតាំងទៀត គឺកាត់ផ្ទៃដីទំហំ៤០១ហិកតា ៧២អា និង១៦សង់ទីអា ចេញពីសម្បទានដីសេដ្ឋកិច្ចក្រុមហ៊ុន៧មករា ផារី។

អនុក្រិតដដែលបានឲ្យដឹងថា ផ្ទៃដីដែលបានកាត់នេះ នឹងត្រូវធ្វើអនុបយោគជាដីឯកជនរបស់រដ្ឋ សម្រាប់ផ្តល់សិទ្ធិជាកម្មសិទ្ធិសមូហភាពជូនសហគមន៍ជនជាតិដើមភាគតិចចារាយ១សហគមន៍ មានចំនួន៦៥គ្រួសារ លើក្បាលដីសរុប២៧ក្បាលដី ដែលរួមមានដីលំនៅឋានចំនួន២ក្បាលដី និងដីកសិកម្ម២៥ក្បាលដី៕