ដោយ: លាងហួរ

ប៉េកាំង: ក្រុមប្រឹក្សាពាណិជ្ជកម្មរបស់ប្រទេសចិន បានរាយការណ៍ឱ្យដឹងកាលពីថ្ងៃព្រហស្បតិ៍ម្សិលមិញនេះថា ខ្លួនបានចាត់ចំណាត់ការ ដើម្បីស្ដារឡើងវិញនូវពិព័រណ៍សេដ្ឋកិច្ច និងពាណិជ្ជកម្មនៅក្រៅប្រទេស ដើម្បីជួយដល់អ្នកធុរកិច្ចចិន ក្នុងការស្វែងរកឱកាសវិនិយោគ នៅក្នុងបណ្តាប្រទេសផ្សេងទៀត។

ក្រុមប្រឹក្សាចិន សម្រាប់ការលើកកម្ពស់ពាណិជ្ជកម្មអន្តរជាតិ បានអនុម័ត លើគម្រោងពិព័រណ៍សេដ្ឋកិច្ច  និងពាណិជ្ជកម្មក្រៅប្រទេសចំនួន១៥ដែលគ្រោងនឹងរៀបចំ ធ្វើឡើងក្នុងប្រទេសចំនួន៨ រួមមាន ប្រទេសអាល្លឺម៉ង់ សហរដ្ឋអាមេរិក និងប្រទេសអារ៉ាប់រួម ចាប់ពីចន្លោះខែវិច្ឆិកា ឆ្នាំ២០២២នេះរហូតដល់ខែកុម្ភៈ ឆ្នាំ២០២៣ខាងមុខ។

គម្រោងទាំងនោះផ្តោតលើវិស័យជាច្រើន រួមមាន ដូចជា វិស័យវាយនភ័ណ្ឌ ការផលិតគ្រឿងបន្លាស់រថយន្ត កីឡា អេឡិចត្រូនិក  និងទំនិញប្រើប្រាស់។

គិតរហូតមកដល់ពេលនេះ គម្រោងចំនួន៦នៃគម្រោងទាំងនោះត្រូវបានចាប់ផ្តើម បើកដំណើរការឡើងដោយក្រុមហ៊ុន ដែលចូលរួមផ្តល់មតិយោបល់វិជ្ជមាន។

ក្រុមប្រឹក្សាបានបន្ថែមថា ខ្លួននឹងផ្តល់អាទិភាពដល់ប្រទេសកំពុងអភិវឌ្ឍន៍ ប្រទេសមានទីផ្សារកំពុងរីកចម្រើន និងឧស្សាហកម្ម ដែលកំពុងរីកចម្រើនជាយុទ្ធសាស្ត្រ  ខណៈដែលការធ្វើជាម្ចាស់ផ្ទះ នៃការតាំងពិពណ៌ និងលើកទឹកចិត្តឱ្យក្រុមហ៊ុននានាចូលរួមនៅឆ្នាំក្រោយ៕

ដោយៈ សុផារី

ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានជំរុញ  ឱ្យអ្នកវិនិយោគិនបារាំងសិក្សាស្វែងយល់ និងបណ្តាក់ទុនវិនិយោគនៅកម្ពុជា ដើម្បីទាញយកប្រយោជន៍ជាអតិបរមា ពីកិច្ចសហប្រតិបត្តិការទ្វេភាគី និងពហុភាគីនានា។

ឆ្លើយតបនឹងសំណើរនេះ លោក អេម៉ានុយអែល ម៉ាក្រុង ប្រធានា​ធិបតីបារាំង បានសន្យាថា នឹងជំរុញក្រុមហ៊ុនបារាំងមកពិនិត្យមើល ឱកាសវិនិយោគបន្ថែមទៀតនៅក្នុងប្រទេសកម្ពុជាបន្ថែមទៀត។

លោក អេម៉ានុយអែល ម៉ាក្រុង បានលើកឡើងដូច្នេះក្នុងឱកាសជួបពិភាក្សាការងារជាមួយ សម្ដេចតេជោហ៊ុន សែន នាយករដ្ឋមន្ត្រីនៃកម្ពុជា នៅវិមានរដ្ឋាភិបាលបារាំងអេលីហ្សេ កាលពីថ្ងៃទី១៣ ខែធ្នូ ឆ្នាំ២០២២។ សម្តេចតេជោនាយករដ្ឋមន្ត្រី និងលោកប្រធានាធិបតីបារាំង បានអបអរសាទរ និងពេញចិត្ត ចំពោះវឌ្ឍនភាពនៃទំនាក់ទំនងមិត្តភាព និងប្រវត្តិសាស្ត្រដ៏យូរលង់ និងកិច្ចសហប្រតិបត្តិការពហុវិស័យ រវាងប្រទេសយើងទាំងពីរ ជាពិសេស នៅក្នុងវិស័យសេដ្ឋកិច្ច ធុរកិច្ច អប់រំ ទឹកស្អាត ធារាស្ត្រ ហេដ្ឋារចនាសម្ព័ន្ធ បរិស្ថាន ការប្រែប្រួលអាកាសធាតុ ថាមពលកកើតថ្មី (កើតចេញពីពន្លឺ ព្រះអាទិត្យ) កសិកម្ម កសិ-ឧស្សាហកម្ម វប្បធម៌ បេតិកភណ្ឌ ទេសចរណ៍ ។ល។

ដោយឡែក នៅក្នុងកិច្ចប្រជុំរៀបចំឡើង ដោយសហព័ន្ធនិយោជកបារាំងអន្តរជាតិ (MEDEF International) សម្តេចតេជោក៏បានធ្វើបទអន្តរាគម៍បង្ហាញដល់ធុរជន និងវិនិយោគិន ប្រធាននិងជាតំណាងក្រុមហ៊ុនបារាំង អំពីលទ្ធភាព ដែលកម្ពុជាអាចងើបចេញពីវិបត្តិកូវីដ១៩ ទាំងនេះបានយ៉ាងឆាប់រហ័ស ដោយរក្សាបាននូវភាពធន់នៃសេដ្ឋកិច្ច និងដែលបានអនុញ្ញាតឱ្យកម្ពុជា នៅតែអាចឈរជើងជាគោលដៅវិនិយោគ ដ៏មានសក្តានុពលមួយនៅក្នុងតំបន់។

សម្ដេចតេជោក៏បានបញ្ជាក់ផងដែរ អំពីសក្តានុពលវិនិយោគនិងឧត្តមភាពសំខាន់ៗរបស់កម្ពុជា និងបានអំពាវនាវឱ្យក្រុមហ៊ុនបារាំង អញ្ជើញមកធ្វើការសិក្សាស្វែងយល់ និងបណ្តាក់ទុនវិនិយោគនៅកម្ពុជា ដើម្បីទាញយកប្រយោជន៍ជាអតិបរមា ពីកិច្ចសហប្រតិបត្តិការទ្វេភាគី និងពហុភាគីនានា ជាពិសេសក្នុងវិស័យកែច្នៃចំណីអាហារ វិស័យវេជ្ជសាស្ត្រនិងឱសថ វិស័យកម្មន្តសាលធុន ស្រាល និងវិស័យយានយន្តជាដើម។

សម្តេចតេជោ បានធានាជូនវិនិយោគិនគ្រប់រូប នូវបរិស្ថានវិនិយោគប្រកបដោយភាពអំណោយផល ជាពិសេស សន្តិភាព សន្តិសុខ និងស្ថិរភាព នយោបាយ ក៏ដូចជាស្ថិរភាពម៉ាក្រូសេដ្ឋកិច្ច និងក្របខណ្ឌច្បាប់ ដែលប្រកបដោយប្រសិទ្ធភាព តម្លាភាព គណនេយ្យភាព និងភាពអាចប៉ាន់ប្រមាណបាន៕

ដោយៈ សុផារី

ព្រះសីហនុៈ  គម្រោងពង្រីកព្រលានយន្តហោះអន្តរជាតិ ខេត្តព្រះសីហនុ ក្នុងទ្រង់ទ្រាយធំដែលអាចអនុញ្ញាត្ត ឲ្យយន្តហោះអន្តរទ្វីបចុះចតបាន នឹងចាប់ផ្តើមនៅដើមឆ្នាំ២០២៣ ខាងមុខនេះ។

នេះបើយោងតាមសេចក្តីប្រកាសព័ត៌មានស្តីពី ជំនួបរវាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក Nicolas Notebeart អគ្គនាយកក្រុមហ៊ុន Vinci Airports របស់បារាំង ដែលជាក្រុមហ៊ុនអភិវឌ្ឍ និងប្រតិបត្តិការអាកាសយានដ្ឋានខេត្តព្រះសីហនុ កាលពីថ្ងៃទី១៣ ខែធ្នូ ឆ្នាំ២០២២។

យោងតាមសេចក្តីប្រកាសរបស់ក្រសួងការបរទេស ដែលចេញផ្សាយនៅថ្ងៃទី១៥ ខែធ្នូបានបញ្ជាក់ឱ្យដឹងថា នៅក្នុងជំនួបនេះ ភាគីទាំងពីរ បានពិភាក្សាគ្នាអំពីវឌ្ឍនភាព នៃភាពជាដៃគូវិនិយោគរបស់ក្រុមហ៊ុន Vinci និងរាជរដ្ឋាភិបាល ក្នុងការអភិវឌ្ឍ និងប្រតិបត្តិការអាកាសយានដ្ឋានអន្តរជាតិទាំងបីនៅកម្ពុជា។

សម្តេចតេជោហ៊ុន សែន បានអបអរសាទរដល់ក្រុមហ៊ុន Vinci Airports ដែលនាពេលបច្ចុប្បន្ននេះ ទទួលបានកិច្ចសន្យាសម្បទានគ្រប់​គ្រងព្រលានយន្តហោះជាង៥០នៅក្នុងទ្វីបអាស៊ី អឺរ៉ុប និងអាមេរិក ដោយ​សារបានប្រើប្រាស់ គម្រូកិច្ចសន្យាសម្បទាននៅកម្ពុជា ដែលកិច្ចសន្យាដំបូងគេបង្អស់ និងគម្រោងពង្រីកទ្រង់ទ្រាយធំ ព្រលានយន្តហោះអន្តរជាតិខេត្តព្រះសីហនុ ដែលនឹងចាប់ផ្តើមនៅដើមឆ្នាំ២០២៣ខាងមុខ។

លោក Nicolas Notebeart ក៏បានថ្លែងអំណរគុណយ៉ាងជ្រាលជ្រៅសម្តេចតេជោ ដែលតែងតែផ្តល់សេចក្តីទុកចិត្តដល់ ក្រុមហ៊ុន Vinci ចំពោះភាពជាដៃគូឈ្នះ ឈ្នះ ជាមួយនឹងរាជរដ្ឋាភិបាលកម្ពុជា ចាប់តាំងពីទសវ​ត្សរ៍ឆ្នាំ១៩៩០រហូតមកទល់នឹងពេលបច្ចុប្បន្នផងដែរ៕

ដោយៈ សុផារី

ភ្នំពេញៈ ក្នុងរយៈពេល១០ខែឆ្នាំ២០២២ ការប្រមូលចំណូលថ្នាក់ជាតិសម្រេចបាន២១.០២៨ពាន់លានរៀល ស្មើនឹងប្រមាណជាង៥ពាន់លានដុល្លារ ខណៈការអនុវត្តចំណាយសរុបថ្នាក់ជាតិមាន១៩ .៥៨៧ពាន់លានរៀល ស្នើនឹងប្រមាណ៤,៨ពាន់លានដុល្លារ។

នេះបើយោងតាមរបាយការណ៍ហិរញ្ញវត្ថុ របស់រាជរដ្ឋាភិបាល ប្រចាំខែតុលា ឆ្នាំ២០២២ របស់ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយចុងក្រោយបង្អស់បានបង្ហាញថា ការអនុវត្តថវិកាថ្នាក់ជាតិនេះ ធ្វើឱ្យមានអតិរេក ពោលគឺចំណូលច្រើនជាង ចំណាយសរុប១.៤៤១ពាន់លានរៀល ស្មើនឹងប្រមាណជាង៣៥០លានដុល្លារ។

របាយការណ៍បញ្ជាក់ថា បន្ទាប់ពីខកខាននូវការសម្រេចបានអតិរេក ក្នុងរយៈពេលពីរឆ្នាំជាប់គ្នា គឺ១០ខែដើម ឆ្នាំ២០២០ និងឆ្នាំ២០២១ ដោ​យសារវិបត្តិជំងឺកូវីដ-១៩ ការអនុវត្តថវិកាជាតិឆ្នាំ២០២២ ចាប់ផ្តើមសម្រេចបានអតិរេកមកវិញ តែស្ថិតក្នុងកម្រិតទាបជាងឆ្នាំ២០១៩។

ការប្រមូលចំណូលចំណូលសម្រាប់ឆ្នាំ២០២២នេះ រំពឹងអាចសម្រេចបាន លើសផែនការដែលបានកំណត់ ក្នុងច្បាប់ហិរញ្ញវត្ថុឆ្នាំ២០២២។ បើធៀបនឹងរយៈពេលអនុវត្តដូចគ្នាឆ្នាំ២០២១ ការប្រមូលចំណូលសរុបថ្នាក់ជាតិ កើនឡើង២១,៨៩% ក្នុងនោះចំណូលពន្ធកើនឡើង២៧,៥៨% ចំណូលមិនមែនពន្ធកើនឡើង២៦,៦១% តែផ្ទុយទៅវិញចំណូលពីអំណោ​យធ្លាក់ចុះ៤៦,៨៧%។

ការកើនឡើងខ្ពស់នៃការប្រមូលចំណូលពន្ធ គឺគាំទ្រដោយចំណូលពន្ធលើប្រាក់ចំណូល និងប្រាក់ចំណេញ និងចំណូលពន្ធលើទំនិញ និងសេវាប្រើប្រាស់ ដែលបានកើនឡើង២៧,០៤% និង២៨,៧៦% រៀងគ្នា ខណៈដែលកំណើននៃការប្រមូលចំណូលមិនមែនពន្ធ គាំទ្រដោយចំណូលពីប្រៃ​សណីយ៍ និងទូរគមនាគមន៍ និងចំណូលពីការផ្តល់ទិដ្ឋាការ ដែលបានកើនឡើង១៥០,០៧% និង៦៤,៤៣%។

ជាមួយគ្នានេះ ការអនុវត្តចំណាយសរុបថ្នាក់ជាតិ បានថយចុះ៨,៩១%។ ក្នុងនោះចំណាយមូលធនថយចុះ១៥,២០% ចំណាយដោយហិរញ្ញប្បទានក្នុងស្រុកថយចុះ១២,៥១% និងចំណាយដោយហិរញ្ញប្បទានក្រៅស្រុកថយចុះ១៧,៩៥% និងចំណាយចរន្ដថយចុះ៥,៤៥%៕

ដោយ: គង់ លាងហួរ

អន្តរជាតិ: យោងតាមធនាគារកណ្តាលអឺរ៉ុប(ECB) បានឱ្យដឹងកាលពីថ្ងៃព្រហស្បតិ៍ ទី១៥ ខែធ្នូថា  សេដ្ឋកិច្ចរបស់តំបន់ចាយប្រាក់អឺរ៉ូ អាចនឹងធ្លាក់ចុះ នៅក្នុងត្រីមាសចុងក្រោយនៃឆ្នាំ២០២២នេះ និងត្រីមាសទី១នៃឆ្នាំក្រោយ ដោយសារតែតម្លៃថាមពលហក់ឡើងខ្ពស់។

ធនាគារECB បានព្យាករណ៍ថាផលិតផលក្នុងស្រុកសរុប នឹងកើនឡើង០,៥ភាគរយក្នុងឆ្នាំ២០២៣ ពោលគឺធ្លាក់ចុះពីការព្យាករណ៍កំណើន០,៩ភាគរយកាលពីលើកមុន។

ECB ក៏បានដំឡើងអត្រាការប្រាក់គោលរបស់ខ្លួន ចំនួន៤លើក ដោយសង្ឃឹមថា ការចំណាយលើការខ្ចីប្រាក់ខ្ពស់ នឹងអាចទប់ស្កាត់អត្រាអតិផរណាដែលកំពុងហក់ឡើងបាន។ ចំណែកធនាគារកណ្តាលរបស់តំបន់ចាយប្រាក់អឺរ៉ូ  ដែលមានប្រទេសចំនួន១៩ បានដំឡើងអត្រាប្រាក់បញ្ញើរបស់ខ្លួនរហូតដល់២ភាគរយដូចដែលបានរំពឹងទុក ។

ECB បានដំឡើងអត្រាការប្រាក់ចំនួន២,៥ភាគរយ ចាប់តាំងពីខែក ក្កដា ដែលនេះជាល្បឿនដ៏លឿនបំផុត នៃការរឹតបន្តឹងរូបិយវត្ថុក្នុងកំណត់ត្រា ដើម្បីទប់ទល់នឹងអត្រាអតិផរណា ដែលបានហក់ឡើងខ្លាំង ដោយបណ្តាលមកពីការកើនឡើងតម្លៃអាហារ ថាមពល និងតម្លៃសេវាកម្ម។

តាមរយៈសេចក្តីថ្លែងការណ៍ របស់ធនាគារកណ្តាលអឺរុប(ECB)បានឱ្យដឹងថា ដោយផ្អែកលើការប្រែប្រួលយ៉ាងខ្លាំង ចំពោះទស្សនវិស័យអតិផរណា ធនាគារនេះនឹងដំឡើងអត្រាការប្រាក់បន្ថែមទៀត។

ជំហានបន្ទាប់របស់ធនាគារ ក្នុងការរឹតបន្តឹងគោលនយោបាយ នឹងកាត់បន្ថយនូវមូលបត្របំណុល ចំនួន៥ពាន់ពាន់លានអឺរ៉ូរបស់ខ្លួន  ដែលបានទិញនៅពេលធនាគារនេះ បាននឹងកំពុងព្យាយាម ដើម្បីជំរុញសកម្ម ភាពសេដ្ឋកិច្ច៕

ដោយៈ គង់ សូរិយា

       ភ្នំពេញៈ របាយការណ៍របស់មន្ទីរផែនការខេត្តកែបបានឲ្យដឹងថា អត្រាភាពក្រីក្ររបស់ប្រជាពលរដ្ឋក្នុងខេត្ត មានការថយចុះជាលំដាប់ដោយបានថយពី១២,៨៤% នៅឆ្នាំ២០១៧ មកត្រឹម២,៦១% នៅឆ្នាំ២០២២។

របាយការណ៍ដដែលបានឲ្យដឹងបន្តថា ទំហំសេដ្ឋកិច្ចខេត្ត ប្រមាណ២១៨,៥៣២លានរៀល គិតជាដុល្លាប្រហែល៥៤លានដុល្លាអាមេរិក ស្មើ០.២% នៃសេដ្ឋកិច្ចជាតិ។ សេដ្ឋកិច្ចខេត្តមានកំណើន០.៣% នៅឆ្នាំ២០២១ ធៀបនឹងឆ្នាំ ២០២០។ ចំណូលសម្រាប់ម្នាក់ មានចំនួន១,២០៦ដុល្លាអាមេរិក នៅឆ្នាំ២០២១។

របាយការណ៍នេះ ត្រូវបានលើកឡើងក្នុងវេទិកាពិគ្រោះយោបល់ស្តីពីការកសាងកម្មវិធីវិនិយោគបីឆ្នាំរំកិល(២០២៣-២០២៥)របស់រដ្ឋបាលខេត្ត

ខេត្តកែប, រសៀលថ្ងៃទី១៣ ខែធ្នូ ឆ្នាំ២០២២ ក្រុមការងារកសាងផែនការអភិវឌ្ឍ និងកម្មវិធីវិនិយោគបីឆ្នាំរំកិលខេត្ត បានរៀបចំវេទិកាពិគ្រោយោបល់ស្តីពី ការកសាងកម្មវិធីវិនិយោគបីឆ្នាំរំកិល(២០២៣-២០២៥)របស់រដ្ឋបាលខេត្ត ដឹកនាំដោយលោកបណ្ឌិត សោម ពិសិដ្ឋ អភិបាលនៃគណៈអភិបាលខេត្ត និងមន្រ្តីពាក់ព័ន្ឋ។

លោកអភិបាលខេត្តបានគូសបញ្ជាក់ថា វេទិកាពិគ្រោះយោបល់នេះពិតជាមានសារសំខាន់ណាស់ ដើម្បីបង្ហាញអំពីតម្រូវការអភិវឌ្ឍន៍មូលដ្ឋានទូទាំងខេត្ត និងសម្របសម្រួលបន្ស៊ីនូ វតម្រូវការអភិវឌ្ឍទាំងនេះ ជាមួយគម្រោង និងធនធានរបស់ដៃគូអភិវឌ្ឍន៍ អង្គការមិនមែនរដ្ឋាភិបាល វិស័យឯកជន និងអ្នកពាក់ព័ន្ធនានា ដើម្បីឈានដល់ការគាំទ្រ ឆ្លើយតបតម្រូវការជាក់ស្តែងរបស់ប្រជាពលរដ្ឋ នៅមូលដ្ឋានប្រកបដោយប្រសិទ្ធភាព។ លោកបានបន្ថែមទៀតថា វេទិការនេះអាចឱ្យយើង ធ្វើការពិភាក្សាលើការអនុវត្តប្រព័ន្ធផែនការថ្នាក់ក្រោមជាតិ ដើម្បីលើកស្ទួយឱ្យកាន់តែប្រសើរឡើងនូវកិច្ចខិតខំប្រឹងប្រែង សកម្មភាពអភិវឌ្ឍន៍របស់យើងទាំងអស់គ្នា​។

ជាមួយគ្នានេះ លោក ភោគ សុខេន អនុប្រធានមន្ទីរផែនការ តំណាងក្រុមការងារកសាងផែនការអភិវឌ្ឍន៍ខេត្ត បានធ្វើបទបង្ហាញ អំពីគម្រោងដែលមានថវិកាគាំទ្រអនុវត្តសម្រាប់ឆ្នាំ២០២៣ និងតម្រូវការអាទិភាពទូទាំងខេត្ត ដើម្បីដាក់ជូនសមាជិកសមាជិកាទាំងមូលពិនិត្យ ពិចារណា និងគាំទ្រអនុវត្តបន្តទៀត។

ព្រមជាមួយគ្នានេះផងដែរ លោក គង់ សាវ៉ាត ប្រធានមន្ទីរផែនការខេត្ត បានបញ្ជាក់អំពីសេចក្តីណែនាំសិក្ខាសាលាសមាហរណកម្ម នៃកម្មវិធីវិនិយោគបីឆ្នាំរំកិលក្រុង ស្រុក និងឃុំសង្កាត់ ដែលនឹងគ្រោងរៀបចំឡើង នៅថ្ងៃទី១៤-១៥ ខែធ្នូ ឆ្នាំ២០២២ នៅតាមក្រុងស្រុកផងដែរ៕

  ដោយៈគង់ សូរិយា

       ភ្នំពេញៈ សមាគមអ្នកវាយតម្លៃ និងភ្នាក់ងារអចលវត្ថុកម្ពុជា(CVEA)នឹងរៀបចំការបោះឆ្នោតជ្រើសរើសប្រធាន និងក្រុមប្រឹក្សាភិបាលថ្មីនៅថ្ងៃទី២២ ធ្នូខាងមុខនេះ។

លោកច្រឹក សុខនីមប្រធានសមាគមនេះបានមានប្រសាសន៍ឲ្យដឹងកាលពីថ្ងៃទី១៥ ធ្នូថា លោកសន សៀបនឹងឈរឈ្មោះសម្រាប់បេក្ខភាពប្រធានសមាគមអ្នកវាយតម្លៃ និងភ្នាក់ងារអចលនវត្ថុនៅអាណត្តិថ្មីតែម្នាក់ឯង ហេតុនេះលោកនឹងជាប់ឆ្នោតដឹកនាំសមាគមនេះ ប៉ុន្តែការបោះឆ្នោតនឹងធ្វើតាមនិតិវិធីដដែល ព្រោះសមាគមត្រុវជ្រើសរើសសមាជិកក្រុមប្រឹក្សាភិបាល និងប្រធានថ្មីតាមនិតិវិធីដដែល។

លោកសុខនីម នឹងផុសអាណត្តិការងាររបស់លោក បន្ទាប់ពីលោកបានដឹកនាំសមាគមនេះបានពីរអាណត្តិ និងលោកអាចឈរឈ្មោះតែពីរអាណត្តិប៉ុណ្ណោះ តាមលក្ខខ័ណ្ឌរបស់សមាគម។

លោកសន សៀបជាស្ថាបនិកក្រុមហ៊ុនKey Real Estate និងជាសមាជិកម្នាក់ នៃគណៈកម្មការវាយតម្លៃពានរង្វាន់អចលនទ្រព្យអាស៊ី ដែលរៀបចំឡើងដោយក្រុមហ៊ុនPropertyGuruផងដែរ៕

ដោយៈ សុខុម

សេអ៊ូល: ប្រធានាធិបតីកូរ៉េខាងត្បូង លោក Yoon Suk-yeol បានប្រកាសកាលពីថ្ងៃព្រហស្បតិ៍ ទី១៥ ខែធ្នូ ថា រដ្ឋាភិបាលនឹងបន្ធូរបន្ថយបទប្បញ្ញត្តិទីផ្សារអចលនទ្រព្យ ឱ្យកាន់តែឆាប់រហ័ស ដើម្បីរក្សាស្ថិរភាពទីផ្សារ ស្របពេលអត្រាការប្រាក់ហក់ឡើងខ្ពស់។

អំឡុងកិច្ចប្រជុំមួយដែលចាក់ផ្សាយ តាមកញ្ចក់ទូរទស្សន៍ ដើម្បីពិនិ  ត្យផ្ទៀងផ្ទាត់វត្ថុបំណង នៃគោលនយោបាយរបស់រដ្ឋាភិបាល លោក Yoon Suk-yeol លើកឡើងថា “ខណៈតម្លៃលំនៅដ្ឋាន កំពុងស្ថិតក្នុងនិន្នាការធ្លាក់ចុះ ដោយសារអត្រាការប្រាក់ហក់ឡើងខ្ពស់ រដ្ឋាភិបាលនឹងដកចេញនូវបទប្បញ្ញត្តិ លើផ្នែកតម្រូវការឱ្យបានកាន់តែឆាប់រហ័ស ដើម្បីរក្សាស្ថិរភាពទីផ្សារ”។

ប្រធាននិយ័តករហិរញ្ញវត្ថុលោក Kim Joo-hyun បានថ្លែងថា រដ្ឋាភិបាលកំពុងរៀបចំផែនការ ដើម្បីអនុញ្ញាតឱ្យផ្ដល់ឥណទានគេហដ្ឋាន ឬកម្ចីទិញផ្ទះបន្ថែមទៀត សម្រាប់អ្នកដែលបើកអាជីវកម្មជួល និងអ្នកដែលមានផ្ទះច្រើន។

លោក Kim Joo-hyun បានបន្ថែមថា “វាពិតជាមានសារៈសំខាន់ណាស់ សម្រាប់ទីផ្សារអចលនទ្រព្យ គេចផុតពីផលប៉ះពាល់ធ្ងន់ធ្ងរ។ រដ្ឋាភិបាល គ្រោងនឹងលុបចោលបទប្បញ្ញត្តិឥណទានម្តងមួយៗ”។

ទីផ្សារអចលនទ្រព្យរបស់ប្រទេសកូរ៉េខាងត្បូង នៅឆ្នាំ២០២២ នេះកំពុងទទួលរងនូវការធ្លាក់ថ្លៃខ្លាំងបំផុត មិនធ្លាប់មានក្នុងរយៈពេលយ៉ាងតិច២ទសវត្សរ៍មកនេះឆ្នាំនេះ ស្របពេលធនាគារកណ្តាល ដំឡើងអត្រាការប្រាក់យ៉ាងគំហុកបំផុត។

ធនាគារកណ្តាលកូរ៉េ បានដំឡើងអត្រាការប្រាក់គោលនយោបាយរបស់ខ្លួនសរុប២៧៥ពិន្ទុ ឈានដល់៣,២៥%ចាប់តាំងពីខែសីហា ឆ្នាំនេះ ដើម្បីដោះស្រាយបញ្ហាអតិផរណាដែលកំពុងកើនឡើង៕ Reuters៕