ដោយ: លាងហួរ

ហ្សាការតា: ក្រសួងសាធារណការរបស់ប្រទេសឥណ្ឌូណេស៊ី កាលពីថ្ងៃច័ន្ទ ទី២៨ ខែវិច្ឆិកា បានស្នើសុំថវិកាបន្ថែមចំនួន១២,៧ពាន់ពាន់លានរូពៀ (ស្មើនឹង៨០៧,៦៨លានដុល្លារអាមេរិក) សម្រាប់រយៈពេល២ឆ្នាំខាងមុខ ដើម្បីពន្លឿនការសាងសង់ទីក្រុងរដ្ឋធានីថ្មីនៅលើកោះបរណេអូ។

ប្រសិនបើសំណើរខាងលើនេះត្រូវបានអនុម័តដោយក្រសួងហិរញ្ញវត្ថុ នោះថវិកាដែលបានគ្រោងទុកសម្រាប់សាងសង់រដ្ឋធានីថ្មី Nusantara នឹងកើនឡើង៣០ភាគរយ ដល់៥៥,៧ពាន់ពាន់លានរូពៀ(ប្រហែល៣,៥៣ពាន់លានដុល្លារអាមេរិក)។

កាលពីដើមឡើយ រដ្ឋាភិបាលគ្រោងចំណាយថវិកាត្រឹមតែ៤៣ពាន់ពាន់លានរូពៀ (ប្រហែល២,៧៣ពាន់លានដុល្លារ) ក្នុងរយៈពេលពីឆ្នាំ២០២២ ដល់ឆ្នាំ២០២៤ ដែលជាផ្នែកមួយនៃគម្រោងតម្លៃ៣២ពាន់លានដុល្លារអាមេរិកនេះ។

រដ្ឋាភិបាល​បាន​ប្រកាសថា ខ្លួន​នឹង​ផ្តល់​ហិរញ្ញប្បទាន​ប្រហែល​តែ​មួយ​ភាគ​ប្រាំ ​នៃ​ការ​ចំណាយ​សរុប​ប៉ុណ្ណោះ ហើយ​ក្រុមវិនិយោគិននឹង​បណ្តាក់ទុន៤ភាគទៀត ដែលនៅ​សេសសល់។

លោក Basuki Hadimuljono រដ្ឋមន្ត្រីក្រសួងសាធារណការ និងលំនៅដ្ឋានសាធារណៈ បានថ្លែងក្នុងសវនាការសភាថា ការផ្តល់មូលនិធិថវិកាបន្ថែម មានភាពចាំបាច់ណាស់ ក្នុងការពន្លឿនការអភិវឌ្ឍហេដ្ឋារចនាសម្ព័ន្ធ នៅក្នុងតំបន់រដ្ឋាភិបាលស្នូល រួមមាន ផ្លូវដែលត្រូវចំណាយប្រាក់ និងផ្ទះសម្រាប់មន្ត្រីរាជការ។

លោក Basuki បានមានប្រសាសន៍បន្តថា គម្រោងសាងសង់លើហេដ្ឋារចនាសម្ព័ន្ធនៅក្នុងតំបន់រដ្ឋាភិបាលស្នូលគ្រោងចាប់ផ្តើម នៅក្នុងខែមករាខាងមុខ ខណៈប្រធានាធិបតីឥណ្ឌូណេស៊ី លោកJoko widodo គ្រោងអញ្ជើញក្រុមវិនិយោគិនមកទស្សនារដ្ឋធានីថ្មី នៅក្នុងត្រីមាសទី២ នៃឆ្នាំ២០២៣។

តាមរយៈសេចក្តីថ្លែងការណ៍កាលពីថ្ងៃចន្ទ ទី២៨ ខែវិច្ឆិកា បានឱ្យដឹងថា លោក Joko Widodo បានបញ្ជាឱ្យអាជ្ញាធរពាក់ព័ន្ធបើកចំហតំបន់វិនិយោគផ្សេងៗដទៃទៀត នៅក្នុងតំបន់រដ្ឋាភិបាលស្នូល  ដើម្បីបំពេញតម្រូវការខ្ពស់ពីក្រុមវិនិយោគិន៕

ដោយ: លាងហួរ

ភ្នំពេញ: ប្រទេសកម្ពុជាបានទាក់ទាញការវិនិយោគទ្រព្យសកម្មថេរ ក្នុងទំហំទឹកប្រាក់ចំនួន៤៦០,៨លានដុល្លារអាមេរិក នៅក្នុងត្រីមាសទី៣ នៃឆ្នាំ២០២២នេះ កើនឡើង១៨,៤ ភាគរយ ពី៣៨៩លានដុល្លារក្នុងត្រីមាសដូចគ្នា កាលពីឆ្នាំ២០២១។

នេះបើងតាមព្រឹត្តិបត្រប្រចាំត្រីមាសរបស់ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយកាលពីថ្ងៃចន្ទ ទី២៨ ខែវិច្ឆិកា។

ប្រទេសកម្ពុជាបានអនុម័តគម្រោងវិនិយោគចំនួន៥២ ក្នុងអំឡុងពេលខែកក្កដា ដល់ខែកញ្ញា ឆ្នាំ២០២២នេះ ដែលកើនឡើងពី៤៧គម្រោង ក្នុងរយៈពេលដូចគ្នាកាលពីឆ្នាំមុន ដោយគម្រោងទាំងនោះ ត្រូវបានគេរំពឹងថា នឹងអាចបង្កើតការងារបានចំនួន៤០.២៧៤កន្លែង។

គម្រោង​វិនិយោគ​ថ្មី​ទាំង​នោះ​បាន​ផ្តោត​លើ ​វិស័យថាមពល​ពន្លឺ​ព្រះអាទិត្យ សុខភាព ការ​ដំឡើង​រថយន្ត ការ​អភិវឌ្ឍ​កោះ និង​​ផលិតកម្ម​នៅ​ក្នុង​តំបន់​សេដ្ឋកិច្ច​ពិសេស។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា ការកើនឡើងទាំងគម្រោងវិនិយោគ និងតម្លៃបានឆ្លុះបញ្ចាំងយ៉ាងច្បាស់ពីទំនុកចិត្តយ៉ាងខ្លាំងរបស់វិនិយោគិនចំពោះសន្តិភាព ស្ថិរភាពនយោបាយ និងកំណើនសេដ្ឋកិច្ចប្រកបដោយសុខភាពល្អរបស់កម្ពុជា។

លោកឧកញ៉ា បានថ្លែងប្រាប់សារពត៌មានអន្តរជាតិមួយថា គម្រោងវិនិយោគថ្មីទាំងនេះនឹងនាំមកនូវដើមទុនវិនិយោគ បច្ចេកវិទ្យាថ្មី និងបង្កើតឱកាសការងារបន្ថែមទៀត សម្រាប់ប្រជាជនកម្ពុជា។

លោក គី សេរីវឌ្ឍន៍ សេដ្ឋវិទូជាន់ខ្ពស់ នៃរាជបណ្ឌិត្យសភាកម្ពុជា បានមានប្រសាសន៍ថា កិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ និងកិច្ចព្រមព្រៀងពាណិជ្ជកម្មសេរីកម្ពុជា-ចិន គឺជាកត្តាស្រូបទាញក្រុមវិនិយោគិនបរទេសមកកម្ពុជា។

លោក​បាន​បន្ត​ថា​ កិច្ច​ព្រមព្រៀង​ពាណិជ្ជកម្ម​សេរី​ទាំង​ពីរ​នេះនឹង​ជួយ​ដល់កម្ពុជា ​ក្នុងការពន្លឿន​ការ​ស្ទុះ​ងើប​ឡើងវិញនៃសេដ្ឋកិច្ច ​ក្រោយជំងឺរាតត្បាតកូវីដ១៩៕

ដោយ: លាងហួរ

ប្រទេសចិន: យោងតាមក្រុមហ៊ុន PipeChina West Pipeline Company បានឱ្យដឹងថា បំពង់បង្ហូរឧស្ម័នចិន-អាស៊ីកណ្តាលបានបញ្ជូនឧស្ម័នធម្មជាតិជាង៤០ពាន់លានម៉ែត្រគូប ចូលទៅក្នុងប្រទេសចិនក្នុងឆ្នាំ២០២២នេះ។

ក្រុមហ៊ុនបានបន្តឱ្យដឹងថា បំពង់បង្ហូរឧស្ម័ននេះ បានដឹកជញ្ជូនឧស្ម័នធម្មជាតិប្រហែល១២០លានម៉ែត្រគូប ក្នុងមួយថ្ងៃក្នុងអំឡុងពេលនោះ។

បំពង់បង្ហូរនេះ មានប្រវែងសរុបរហូតដល់១.៨៣៣គីឡូម៉ែត្រ និងមានសមត្ថភាពបញ្ជូនឧស្ម័នប្រចាំឆ្នាំ បាន៦០ពាន់លានម៉ែត្រគូប និងត្រូវបានដាក់ឱ្យដំណើរការចាប់តាំងពីខែធ្នូ ឆ្នាំ២០០៩។

បំពង់បង្ហូរឧស្ម័ននេះ ហូរចេញពីព្រំដែននៃប្រទេសតួកមេនីស្ថាន និងអ៊ូសបេគីស្ថាន ឆ្លងកាត់ប្រទេសអ៊ូសបេគីស្ថាន និងប្រទេសកាហ្សាក់ស្ថាន ហើយតភ្ជាប់ជាមួយបំពង់បង្ហូរឧស្ម័ន ពីភាគខាងលិចទៅភាគខាងកើត(West-to-East ) របស់ប្រទេសចិននៅក្នុងតំបន់ស្វយ័ត Xinjiang Uygur ភាគពាយព្យនៃប្រទេសចិន ហើយនេះជាបំពង់បង្ហូរឧស្ម័នឆ្លងដែនដំបូងគេរបស់ប្រទេសចិន។

បំពង់បង្ហូរឧស្ម័ននេះ បានដំណើរការប្រកបដោយស្ថិរភាព និងសុវត្ថិភាពអស់រយៈពេល៤.៧៣០ថ្ងៃ ចាប់តាំងពីវាត្រូវបានដាក់ឱ្យដំណើរការ។បំពង់នេះផ្តល់អត្ថប្រយោជន៍ជាច្រើន ដែលជួយផ្គត់ផ្គង់ឧស្ម័នដល់ប្រជាជនជាង៥០០លាននាក់ នៅក្នុងខេត្តចំនួន២៧ ក្រុង តំបន់ស្វយ័ត និងតំបន់រដ្ឋបាលពិសេសហុងកុង៕

ដោយ៖ សុផារី

ភ្នំពេញ៖ ដរាបណាមានការអភិវឌ្ឍអចលនទ្រព្យ នោះតម្រូវការប្រើប្រាស់ដីធ្លីនឹងនៅតែមានកំណើនខ្ពស់ជាពិសេសនៅក្នុងតំបន់ ដែលមានការអភិវឌ្ឍពីសំណាក់គម្រោងរដ្ឋាភិបាល និងឯកជនធំៗ។ អ្នកជំនាញអចលនទ្រព្យមួយរូបលើកឡើងថា ដីធំប្រៀបដូចជាវត្ថុធាតុដើមសម្រាប់ទៅកែច្នៃតាមតម្រូវការជាក់ស្តែង បរិបទថ្មី និងការវិវត្តនៃសង្គម។

លោក គាម សៀកឡុង អគ្គនាយកក្រុមហ៊ុន Century 21 Dream Property Solution Co., Ltd បានចែករំលែកតាមបណ្តាញសង្គមកាលពីថ្ងៃទី២៧ ខែវិច្ឆិកាម្សិលមិញថា ដីធំប្រៀបដូចជាវត្ថុធាតុដើម ដែលគេអាចយកទៅកែឆ្នៃតាមតម្រូវការជាក់ស្តែង បរិបទថ្មី និងការវិវត្តន៍នៃសង្គម។

លោកបានមានប្រសាសន៍ថា នាពេលអនាគត ប្រភេទដីឡូត៍នឹងមិនសូវមានតម្រូវការប្រើប្រាស់ច្រើននោះទេ ហើយមិនសូវមានការនិយមមានដី១ ឬ២ឡូត៍ សង់ផ្ទះល្វែងសម្រាប់រស់នៅ ឬសង់បន្ទប់ជួលតូចៗទៀតនោះទេ។

ផ្ទុយទៅវិញ អ្នកវិនិយោគត្រូវការដីធំធ្លី ដែលមានទំហំធំៗ រាប់ហិចតា ដើម្បីសង់ជាបុរី ស្ថានីយ៍ប្រេងឥន្ធនៈ ដែលមានហាងទំនិញក្នុងនោះ ឬរបៀបជាផ្លាហ្សា Community Mall ជាដើម ឬគេសង់បន្ទប់ជួលជាច្រើនជាន់ ឬច្រើនបន្ទប់ ជាជាងការទិញដីឡូត៍សម្រាប់រស់នៅ ឬសង់បន្ទប់ជួលតូចៗ។

អ្នកជំនាញរូបនេះបានសរសេរថា “ប្រសិនបើបងប្អូនទិញ ដើម្បីវិនិយោគរកប្រាក់ចំណេញបានច្រើន ក្នុងឆ្នាំ២០២៣ខាងមុខនេះ ខ្ញុំសូមលើកទឹកចិត្តបងប្អូនទិញដីធំទំហំចាប់ពី២.០០០ម៉ែត្រការ៉េឡើងទៅ នៅជាយរាជធានីភ្នំពេញ ចម្ងាយប្រហែល៣០គីឡូម៉ែត្រពីវត្តភ្នំ ដែលជាប្រភេទដីនៅលើផ្លូវធំ ឬគម្រោងផ្លូវធំ មានទំហំផ្លូវចាប់ពី២០ម៉ែត្រឡើងទៅ”។

យ៉ាងណាក្តី លោកលើកឡើងថា ប្រសិនបើមានធនធានហិរញ្ញវត្ថុ និងមានតម្រូវការប្រើប្រាស់អចលនវត្ថុ រួមទាំង ដីទំហំធំ ដីឡូត៍ ផ្ទះល្វែង ផ្ទះវីឡា ខុនដូ ជាដើម ពេលនេះជាឱកាសល្អបំផុតដែលអាចចាប់យកឱកាស ដើម្បីទិញបានតម្លៃទាបជាងទីផ្សារ ជាពិសេសទទួលបាននូវលក្ខខណ្ឌបង់ប្រាក់ ដែលអតិថិជនអាចចចារបាន៕

ដោយៈ គង់ សូរិយា

       ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបានដឹកនាំកិច្ចប្រជុំពិភាក្សា ដើម្បីត្រៀមបើកការដ្ឋានសាងសង់ស្ពានឆ្លងទន្លេមេគង្គ និងផ្លូវតភ្ជាប់ពីផ្លូវជាតិលេខ៧ ទៅផ្លូវជាតិលេខ៦០B រវាងក្រុងក្រចេះ និងស្រុកព្រែកប្រសព្វ ខេត្តក្រចេះ។

កិច្ចប្រជុំនេះដឹកនាំដោយលោកលឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាលើកទី១ នៃគម្រោងសាងសង់ស្ពានឆ្លងទន្លេ មេគង្គត្រង់ខេត្តក្រចេះ និងផ្លូវតភ្ជាប់ពីផ្លូវជាតិលេខ៧ (រង្វង់មូលខ្លាស្ទុះ) ទៅផ្លូវជាតិលេខ៦០B ដោយមានការចូលរួមពីថ្នាក់ដឹកនាំអង្គភាពគ្រប់គ្រង និងអនុវត្តគម្រោង តំណាងក្រុមហ៊ុនសំណ​ង់សៀងហៃ (SCG) តំណាងក្រុមហ៊ុនទីប្រឹក្សា បច្ចេកទេសក្វាងចូវវ៉ានអាន និងមន្ត្រីជំនាញពាក់ព័ន្ធជាច្រើនរូបផងដែរ។

កិច្ចប្រជុំនេះរៀបចំឡើងក្នុងគោលបំណងមួយចំនួនដូចជា ទី១ណែនាំសមាសភាពក្រុមការងារក្រសួងសាធារណការ និងដឹកជញ្ជូន ទៅកាន់ក្រុមការងារបច្ចេកទេសក្រុមហ៊ុនសំណង់សៀងហៃ (SCG) និងក្រុមហ៊ុនទីប្រឹក្សាបច្ចេកទេស ដើម្បីអនុញ្ញាតឱ្យក្រុមការងារទាំងអស់បង្កើតទំនាក់ទំនង និងសហការបានរលូនប្រកបដោយប្រសិទ្ធភាព ទី២ ធ្វើបទបង្ហាញពីលទ្ធផលនៃការសិក្សា គម្រោងសាងសង់ស្ពានទន្លេឆ្លងមេគង្គ ត្រង់ខេត្តក្រចេះ និងផ្លូវតភ្ជាប់ដោយតំណាងក្រុមហ៊ុនសាងសង់ ទី៣ បំណែងចែកក្រុមការងារបណ្តោះអាសន្ន សម្រាប់ដោះស្រាយការងារបន្ទាន់ ការរៀបចំឯកសារផ្សេងៗ និងការស្វែងរកទីតាំងសមស្រប សម្រាប់ពិធីបើកការដ្ឋានសាងសង់ស្ពានឆ្លងទន្លេមេគង្គនាពេលឆាប់ៗខាងមុខនេះ។

គម្រោងសាងសង់ស្ពានឆ្លងទន្លេមេគង្គ និងផ្លូវតភ្ជាប់នេះ មានប្រវែងសរុប៣៣,៤៥ គីឡូម៉ែត្រ តភ្ជាប់ពីផ្លូវជាតិលេខ៧ (រង្វង់មូលខ្លាស្ទុះ) ទៅផ្លូវជាតិលេខ៦០B ដោយក្នុងនោះត្រូវសាងសង់ ស្ពានឆ្លងកាត់ទន្លេមេគង្គ​ប្រវែង១៧៦១ម៉ែត្រ មានមុខកាត់ទទឹង១៣,៥ម៉ែត្រ ដែលត្រើយខាងកើតស្ថិតត្រង់ ភូមិបុស្សលាវលើ ឃុំបុសលាវ ស្រុកចិត្របុរី និងត្រើយខាងលិចត្រង់ភូមិព្រែកព្រលូង ឃុំសោប ស្រុកព្រែកប្រសព្វ ខេត្តក្រចេះ។

ចំណែកឯផ្លូវតភ្ជាប់មានប្រវែង១៥,៤៩គីឡូម៉ែត្រ និងផ្លូវខ្នែងក្នុងក្រុងក្រចេះប្រវែង១៦,២០គីឡូម៉ែត្រ គ្រោងនឹងបើកការដ្ឋាននាពេលឆាប់ៗខាងមុខ ដែលគម្រោងនេះនឹងចំណាយថវិកា សរុបប្រមាណ១១១,៩៨លានដុល្លាសហរដ្ឋអាមេរិក ជាហិរញ្ញប្បទានពីសាធារណរដ្ឋប្រជាមានិតចិន ដោ​យប្រើពេលសាងសង់ប្រមាណ៤២ខែ អនុវត្តដោយក្រុមហ៊ុនសំណង់សៀងហៃ (SCG) និងត្រួតពិនិត្យគុណភាព ដោយក្រុមហ៊ុនទីប្រឹក្សាបច្ចេក​ទេសក្វាងចូវវ៉ានអាន៕

ដោយៈ វឌ្ឍនៈ

ភ្នំពេញៈ របាយការណ៍មួយដែលចេញផ្សាយដោយធនាគារពិភពលោកនៅថ្ងៃទី២៨ វិច្ឆិកា២០២២នេះបង្ហាញថា អត្រាភាពក្រីក្រនៅកម្ពុជា បានធ្លាក់ចុះសឹងតែពាក់កណ្តាល ក្នុងចន្លោះឆ្នាំ២០០៩ និងឆ្នាំ២០១៩ ប៉ុន្តែដោយការរាតត្បាតជំងឺកូវីដ-១៩ បានធ្វើឱ្យអត្រាភាពក្រីក្រនេះបានកើន​ឡើងវិញក្នុងពេលថ្មីៗនេះ។

របាយការណ៍វាយតម្លៃភាពក្រីក្រក្រោមចំណងជើង “ស្តារសេដ្ឋកិច្ចកម្ពុជា ឱ្យកាន់តែមានភាពបរិយាបន្ននិងភាពធន់ជាងមុន” របស់ធនាគារពិភពលោកបានឱ្យដឹងថា នៅក្នុងរយៈពេល១០ឆ្នាំ គិតមកដល់ឆ្នាំ២០១៩/២០២០ អត្រាភាពក្រីក្ររបស់កម្ពុជាបានធ្លាក់ចុះ ពីកម្រិត៣៣,៨ភាគរយ មកនៅត្រឹម១៧,៨ភាគរយ ដោយជួយឱ្យប្រជាជនកម្ពុជាជិត២លាននាក់បានរួចផុតពីភាពក្រីក្រ។

ប៉ុន្តែចាប់តាំងពីឆ្នាំ២០២០មក អត្រានេះបានកើនឡើង ២,៨ភាគរយ  ដែលមានន័យថា ប្រជាជនប្រហែល៤៦០,០០០នាក់ បានធ្លាក់ទៅស្ថិតនៅក្រោមកម្រិតប្រាក់ចំណូលនៃភាពក្រីក្រវិញ។

ចន្លោះឆ្នាំ២០០៩ ដល់ឆ្នាំ២០១៩ ជាទសវត្សរ៍ដែលប្រទេសកម្ពុជាទទួលបានកំណើនសេដ្ឋកិច្ចឥតឈប់ឈរ និងការកើនឡើងនៃប្រាក់ចំណូ លយ៉ាងទូលំទូលាយ។ ការពង្រីកសេដ្ឋកិច្ចយ៉ាងឆាប់រហ័ស រួមផ្សំជាមួយនឹងការផ្លាស់ប្តូររចនាសម្ព័ន្ធ បាននាំឱ្យមានការកើនឡើងប្រាក់ឈ្នួល និងកម្រិតជីវភាពរស់នៅកាន់តែប្រសើរ។

របាយការណ៍បានរកឃើញថា ការកើនឡើងប្រាក់ចំណូលមិនមែនកសិកម្ម ជាឧទាហរណ៍ នៅក្នុងវិស័យទេសចរណ៍ កាត់ដេរ និងសំណង់ មានចំណែកធំ ក្នុងការកាត់បន្ថយភាពក្រីក្រ។ កំណើនដែលនាំមុខដោយពាណិជ្ជកម្ម និងការវិនិយោគ បានជួយទ្រទ្រង់ដល់ការផ្លាស់ប្តូរជារចនាស ម្ព័ន្ធ ឆ្ពោះទៅរកវិស័យមានផលិតភាពកាន់តែខ្ពស់ ជួយបង្កើតបានការងារដែលមានប្រាក់ខែកាន់តែប្រសើរ នៅក្នុងផ្នែកផលិតកម្ម និងផ្នែកសេវាកម្ម។ កម្មករមានលទ្ធភាពផ្លាស់ចេញ ពីវិស័យកសិកម្មដែលមានប្រាក់កម្រៃទាប ទៅធ្វើការនៅតាមវិស័យ ដែលមានប្រាក់កម្រៃខ្ពស់ជាង និងបង្កើនប្រាក់ចំណូលរបស់ពួកគេ។

របាយការណ៍ដដែលបានឲ្យដឹងទៀតថា ទន្ទឹមគ្នានេះដែរ លក្ខខណ្ឌជីវភាពនិងលទ្ធភាពទទួលបានសេវាមូលដ្ឋាន មានដូចជា អគ្គិសនី ការផ្គត់ផ្គង់ទឹកស្អាត អនាម័យ សុខភាព និងការអប់រំជាដើម មានភាពប្រសើរឡើងសម្រាប់មួយភាគធំ នៅក្នុងចំណោមប្រជាជនទូទៅ។ ការកែលម្អនៃស្ថានភាពនេះបានធ្វើឱ្យគម្លាត រវាងស្តង់ដាជីវភាពរបស់គ្រួសារនៅទីជនបទ និងនៅទីប្រជុំជនរួមតូចជាងមុន។

លោកស្រី ម៉ារីយ៉ាម សាលីម ប្រធានគ្រប់គ្រងការិយាល័យធនាគារពិភពលោកប្រចាំនៅកម្ពុជា មានប្រសាសន៍ថា “កិច្ចខិតខំជំរុញឱ្យមានការផ្លាស់ប្តូជារចនាសម្ព័ន្ធ បានជួយកាត់បន្ថយភាពក្រីក្រ ក្នុងរយៈពេលកន្លងមក។ ប៉ុន្តែទន្ទឹមនឹងជោគជ័យគួរឱ្យកត់សម្គាល់នេះ គ្រួសារជាច្រើនស្ថិតនៅក្នុងស្ថានភាពងាយរងគ្រោះនៅឡើយ ដោយសារពួកគេមិនសូវមានប្រាក់សន្សំ ឬគ្មានសំណាញ់ការពារផ្នែកសង្គម”។ លោកស្រីបន្តថា “ត្រង់នេះមានន័យថា ជំងឺកូវីដ-១៩ បានរុញថយក្រោយវិញនូវវឌ្ឍនភាពរបស់កម្ពុជាក្នុងការប្រយុទ្ធនឹងភាពក្រីក្រ ដោយធ្វើឱ្យប្រជាជនជាច្រើន បានបាត់បង់ការងារនិងប្រាក់កម្រៃ”។

របាយការណ៍នេះលើកអនុសាសន៍ថា កម្ពុជាគួរពិចារណាលើអន្តរា​គមន៍ផ្នែកគោលនយោបាយមួយចំនួន ដើម្បីគាំទ្រដល់ការស្តារសេដ្ឋកិច្ចឡើងវិញ ប្រកបដោយបរិយាបន្ន និងធន់ជាងមុន ពីការប៉ះទង្គិចរបស់ជំងឺរាតត្បាត និងវិបត្តិសេដ្ឋកិច្ចដែលមានមកជាមួយវា។ អន្តរាគមន៍ទាំងនោះអាចរួមមាន ការផ្ទេរសាច់ប្រាក់តាមគោលដៅកំណត់ វិធានការពង្រឹងកិច្ចគាំ​ពារសង្គម និងការវិនិយោគលើវិស័យសុខាភិបាល និងការអប់រំ ជាដើម៕