ដោយៈ គង់ សូរិយា

       ភ្នំពេញៈ បើទោះជាស្ថានភាពសេដ្ឋកិច្ចក្នុងតំបន់ និងពិភពលោកមិនទាន់ត្រឡប់ទៅរកប្រក្រតីភាពវិញក្តី អ្នកជំនាញមើលឃើញថា ការវិនិយោគលើវិស័យអចលនទ្រព្យនៅក្នុងប្រទេសកម្ពុជា នៅតែអាចទទួលបានប្រាក់ចំណេញខ្ពស់ បើធៀបនឹងប្រទេសផ្សេងៗ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ឲ្យដឹងកាលពីពេលថ្មីៗនេះថា ការវិនិយោគលើវិស័យអចលនទ្រព្យ នៅក្នុងប្រទេសកម្ពុជា នៅតែអាចផ្តល់ប្រាក់ចំណេញដល់អ្នកវិនិយោគ។ បើប្រៀបធៀបនឹងប្រទេសជាច្រើននៅលើពិភពលោក ការវិនិយោគអចលនទ្រព្យ នៅក្នុងប្រទេសកម្ពុជា អាចផ្តល់ប្រាក់ចំណេញត្រលប់មកវិញខ្ពស់ជាងប្រទេសផ្សេងៗទៀត។

លោកបន្តថា “តាមរយៈបទពិសោធន៍ធ្វើដំណើរ ទៅកាន់ប្រទេសជាច្រើន នៅលើពិភពលោក រួមទាំង សហរដ្ឋអាមេរិក ជប៉ុន និងប្រទេសរីកចម្រើនជាច្រើន លោកសង្គេតឃើញថា ការវិនិយោគអចលនទ្រព្យនៅក្នុងប្រទេសទាំងនោះ ទទួលបានប្រាក់ចំណូលទាប ធៀបនឹងប្រទេសកម្ពុជា ដែលការវិនិយោគមានសុខសុវត្ថិភាព និងមានការជឿជាក់ផងដែរ”។

លោកបន្ថែមថា “កម្ពុជានៅតែមានសក្ដានុពលខ្ពស់ ក្នុងការវិនិយោគ និងអាចទទួលបានប្រាក់ចំណេញ ប៉ុន្តែកម្ពុជាមិនត្រូវបានគេផ្សព្វផ្សាយឱ្យបានដឹងនោះទេ។ ប្រសិនជាគេផ្សព្វផ្សាយពីភាពវិជ្ជមានរបស់កម្ពុជា យើងជឿជាក់ថា វិនិយោគិនបរទេសនឹងចូលមកកម្ពុជា ដើម្បីស្វែងរកការវិនិយោគ និងយកប្រាក់ចំណូលត្រលប់ទៅប្រទេសគេវិញ និងនាំមកនូវការរីកចម្រើ​ន ក្នុងប្រទេសកម្ពុជាផងដែរ”។

ជាមួយគ្នានេះ អ្នកនាង អាន សុធីតា អគ្គនាយិកានៃក្រុមហ៊ុន PropNex Cambodia ក៏បានលើកឡើងផងដែរថា ទោះបីជាស្ថានភាពបច្ចុប្បន្ន វិស័យអចលនទ្រព្យមើលទៅអាចមានការថមថយ ជាងឆ្នាំ២០២០ និង២០២១ និងឆ្នាំមុនៗទៀតក៏ពិតមែន ប៉ុន្តែសម្រាប់វិនិយោគិន ដែលបណ្ដាក់ទុនវិនិយោគ លើវិស័យអចលនទ្រព្យក្នុងប្រទេសកម្ពុជា ពួកគាត់នឹងនៅតែទទួលបាននូវប្រាក់ចំណេញខ្ពស់ដដែល។

អ្នកនាងបន្តថា  “យើងនៅតែជឿជាក់លើការរីកចម្រើន នៃវិស័យអច​ល​នទ្រព្យ ក្នុងប្រទេសកម្ពុជា ពីព្រោះយើងនៅមានភាពទូលំទូលាយសម្រា​ប់អភិវឌ្ឍន៍ បើធៀបនឹងប្រទេសក្នុងតំបន់និងពិភពលោក”។ អ្នកនាងបន្តថា “សេដ្ឋកិច្ចរបស់យើងនៅតែមានការរីកចម្រើន ពាណិជ្ជកម្មរបស់យើងនៅតែប្រសើរ ផលចំណេញពីការវិនិយោគនៅតែខ្ពស់ ធៀបនឹងប្រទេសក្នុងតំប​ន់”៕

 ដោយៈ វឌ្ឈនៈ

ភ្នំពេញៈ ថ្វីត្បិតតែក្នុងឆ្នាំ២០២២នេះ គេមើលឃើញថាវិស័យសំណង់នៅក្នុងប្រទេសកម្ពុជា មានការថមថយបន្តិចក្ដី ធៀបនឹងឆ្នាំមុនៗ  ប៉ុន្តែយ៉ា​ងណាក្ដីការសាងសង់អគារខ្ពស់ ដែលមានកំពស់ចាប់ពី៥ជាន់ឡើងទៅនៅតែមានសម្រាប់ឆ្នាំ២០២២នេះ។

ជាក់ស្ដេងរយៈពេល៩ខែនេះ ក្រសួងរៀបដែនដីនគរូបនីយកម្ម និងសំណង់ បានផ្ដល់លិខិតអនុញ្ញាតឱ្យសាងសង់ អគារខ្ពស់ចំនួន៩៨គម្រោងក្នុងនោះដែរតំបន់៣នៅកម្ពុជា ទទួលបានគម្រោងសាងសង់អគារខ្ពស់ច្រើនជាងគេក្នុងរយៈ៩ខែនេះ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ឱ្យដឹងថា រយៈពេល៩ខែ ក្រសួងបានចេញលិខិតអនុញ្ញាតឱ្យសាងសង់អគារខ្ពស់ចំនួន១០០អគារ ស្មើនឹង៩៨គម្រោងក្នុងនោះដែរ រាជធានីភ្នំពេញ និងខេត្តចំនួន២ទៀតទទួលបានគម្រោង សង់អគារខ្ពស់ច្រើនជាងគេ។

ខេត្តចំនូនពីរទៀតនោះ រួមមាន ខេត្តព្រះសីហនុ និងទីក្រុងប៉ោយប៉ែត ខេត្តបន្ទាយមានជ័យ ដោយរាជធានីភ្នំពេញមាន៦៣គម្រោង ខេត្តព្រះសីហនុ១១គម្រោងនិងបន្ទាយមានជ័យ១២គម្រោង។

លោកលាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់ឱ្យដឹងថា តាមរយៈកំណើននៃការសាងសង់ នៅក្នុងប្រទេសកម្ពុជារយៈកន្លងមក នាំឱ្យមានតម្រូវការលើសម្ភារៈសំណង់ បរិក្ខារសំណង់ និងបច្ចេកវិទ្យាសំណង់ ដែលក្នុងនោះចាំបាច់ ត្រូវមានស្ដង់ដារត្រឹមត្រូវអនុ​លោមតាមបទប្បញ្ញតិ្ត បច្ចេកទេសសំណង់ ដើម្បីធានាគុណភាពសំណង់និងសុវត្ថិភាពរបស់អ្នកប្រើប្រាស់សំណង់ ។

អ្នកនាងជិន ច័ន្ទដាលុច្សប្រធានផ្នែកវាយតម្លៃ នៃក្រុមហ៊ុន CBRE Cambodia បានឱ្យដឹងផងដែរថា សកម្មភាពនៃការសាងសង់នៅក្នុងប្រទេ​ស​កម្ពុជានៅក្នុងវិបត្តិកូវីដ១៩ រហូតមកដល់បច្ចុប្បន្ននេះ មិនមែនអត់មានសកម្មភាពទាំងស្រុងនោះទេ តែសកម្មភាពបានថមថយ បើធៀបនឹងរយៈពេលមុនវិបត្តិកូវីដ១៩។ យ៉ាងណាក្ដីការអភិវឌ្ឍ ដែលធ្វើឡើងដោយវិនិយោ​គិនក្នុងស្រុក បានជួយឱ្យសកម្មភាពនៃវិនិយោគអចលនទ្រព្យ នៅតែមានដំណើរការទៅមុខ ។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានលើកឡើងផងដែរថា ការវិនិយោគរបស់វិនិយោគិនក្នុងស្រុក បានជួយធ្វើឱ្យសកម្មភាព នៃការវិនិយោគក្នុងប្រទេសកម្ពុជាមិនធ្លាក់ចុះខ្លាំងពេក ឬក៏អាចជួយធ្វើឱ្យកំណើននៃការវិនិយោគនៅតែបន្តទៅមុខទៀត ក្នុងខណៈកម្ពុជានិងបណ្ដាប្រទេសជាច្រើន បានរងនូវបញ្ហាប្រឈមនឹងសេដ្ឋកិច្ច។

យ៉ាងណាក្ដី អ្នកជំនាញនៃវិស័យអចលនទ្រព្យ បានបង្ហាញពីសុដ្ឋិនិយមខ្ពស់ ចំពោះការវិនិយោគអចលនទ្រព្យ នៅឆ្នាំ២០២៣ និងឆ្នាំ២០២៤ខាងមុខ ខណៈកម្ពុជាបានរៀបចំ ព្រឹត្តិការណ៍អន្តរជាតិសំខាន់ៗជាច្រើន ដែលជាកត្តាទាក់ទាញវិនិយោគិននិងទេសចរបរទេស៕

ភ្នំពេញៈ រយៈពេលថ្មីៗនេះ គេសង្កេតឃើញថាបុរី ប៉េង ហួត ដែលជាក្រុមហ៊ុនអភិវឌ្ឍអចលនទ្រព្យដ៏ធំ និងឈានមុខគេមួយក្នុងប្រទេសកម្ពុជាបានចាប់ផ្ដើម សកម្មភាពសាងសង់ហេដ្ឋារចនាសម្ព័ន្ធ ក្នុងគម្រោងផ្ទាល់​កាន់តែច្រើនឡើង ដូចជា ការសាងសង់ផ្លូវក្រាលកៅស៊ូ ចាក់បេទីម និងការដាំដើមឈើអមដងមហាវិថី និងសួនធំៗជាដើម។

ទន្ទឹមនឹងនេះដែរ ការរៀបចំប្រព័ន្ធបង្ហូរកាកសំណល់ ក៏ជារឿងដ៏សំខា​ន់ សម្រាប់ការរស់នៅប្រចាំថ្ងៃរបស់ប្រជាពលរដ្ឋផងដែរ។ ដូច្នេះក្រៅពីការអភិវឌ្ឍម៉ូដផ្ទះទាន់សម័យ និងសម្បូរបែបសម្រាប់អតិថិជន បុរី ប៉េង ហួត ក៏បានគិតគូ កាន់តែលម្អិតចំពោះការរៀបចំ និងគ្រប់គ្រងប្រព័ន្ធលូនៅគ្រប់គម្រោង។

លោក បឿន ចាន់រឹក អនុប្រធានផ្នែករចនាប្លង់ទឹកនៃក្រុមហ៊ុន បុរី ប៉េង ហួត បានមានប្រសាសន៍ថា “បុរី ប៉េង ហួត តែងតែប្រកាន់ខ្ជាប់នូវយុទ្ធសាស្ត្រលើកកម្ពស់ផាសុកភាព និងភាពសុខដុមរមនាដល់អតិថិជន តាំងពីសំណង់ផ្ទះ ការរៀបចំសួនច្បារ កន្លែងកម្សាន្ត ជាពិសេសការរៀបចំប្រព័ន្ធទឹកនិងលូ ដោយយើងបានគោរពតាមស្តង់ដារបច្ចេកទេស ស្របទៅតាមការណែនាំរបស់រាជរដ្ឋាភិបាល ដើម្បីផ្ដល់ភាពងាយស្រួល ហើយធានាបាននូវនិរន្តរភាពក្នុងការរស់នៅរបស់អតិថិជន”។

លោកបានបញ្ជាក់ថា “ការរៀបចំ និងគ្រប់គ្រងប្រព័ន្ធបង្ហូរទឹក និងកាកសំណល់របស់យើងគឺមានការយកចិត្តទុកដាក់ និងមានបច្ចេកទេសខ្ពស់។ បានន័យថា យើងមិនមែនផ្ដោតតែលើទំហំនៃលូ ដែលបានដាក់ប៉ុណ្ណោះទេ ប៉ុន្តែសូម្បីតែការតភ្ជាប់លូមួយកង់ៗគឺ​ធ្វើតាមបច្ចេកទេសស្តង់ដារត្រឹមត្រូវ ដើម្បីធានាបានថាមិនមានការលិចធ្លាយ ឬខូចគុណភាព”។

តាមការរៀបរាប់បន្ថែម លោក បឿន ចាន់រឹក បានលើកឡើងអំពីគុណសម្បត្តិនៃការរៀបចំប្រព័ន្ធលូ ដែលមានទំហំធំបែបនេះ​​មានបីចំណុចដូចជា ទី1 គឺមានប្រព័ន្ធសុវត្ថិភាពមួយ ដើម្បីរំដោះទឹកដែលហូរចេញពីគេហដ្ឋានរបស់អតិថិជន ឬទឹកភ្លៀង ធានាបានថាក្នុងគម្រោងបុរី ប៉េង ហួត ទាំងមូល នឹងមិនជួបប្រទះបញ្ហាលិចទឹក។ ទី2 ងាយស្រួលក្នុងការថែទាំ និងជួសជុលនាពេលអនាគត និងទី3 គឺដើម្បីងាយស្រួល ក្នុងការតភ្ជាប់ប្រព័ន្ធបង្ហូរទឹកនិងកាកសំណល់ ក្នុងករណីមានការពង្រីកគម្រោងថ្មីៗបន្ថែមទៀត។

បុរី ប៉េង ហួត បានចូលរួមចំណែកជាមួយរាជរដ្ឋាភិបាល ក្នុងសកម្មភា​ពថែរក្សាបរិស្ថានជាច្រើនរួចមកហើយ និងបានទទួលប័ណ្ណសរសើរមេត្រីភាពបរិស្ថាន ពីក្រសួងបរិស្ថានកាលពីពេលថ្មីៗនេះ។

ក្រៅពីនេះ ក្រុមហ៊ុនបានចូលរួម ក្នុងសកម្មភាពជាច្រើនទៀត ដូចជា ទិវាសម្អាតពិភពលោកនៅកម្ពុជា ទិវាបរិស្ថានជាតិ និងទិវាបរិស្ថានពិភពលោក សហការជាមួយក្រសួងបរិស្ថាន ចុះផ្សព្វផ្សាយអំពីការបែងចែក និងរៀបចំទុកដាក់សំរាមឱ្យបានត្រឹមត្រូវ  ឧបត្ថម្ភរថយន្តបោសសំរាមដល់អាជ្ញាធរមូលដ្ឋានក្នុងការសម្អាតទីក្រុងភ្នំពេញ ចូលរួមកម្មវិធីប្រមូលសំណល់ប្លាស្ទិកនៅតាមបឹងទន្លេសាប នារដូវទឹកសម្រក ក៏ដូចជាបានចូលរួមរៀបចំកម្មវិធីដាំដើមឈើ។ល៕

ដោយៈ សុផារី

ភ្នំពេញៈ របាយការណ៍ថ្មីមួយបានបង្ហាញថា តម្លៃនៃអត្រាបង់រំលោះដីធ្លី និងអត្រាតម្លៃជួលដីធ្លី សម្រាប់ការសាងសង់ គម្រោងឧស្សាហកម្មនៅក្នុងប្រទេសកម្ពុជា មានកំណើនឡើងក្នុងរយៈពេលប៉ុន្មានឆ្នាំចុងក្រោយនេះ។

កំនើនជាវិជ្ជមាននេះ ត្រូវបានជំរុញដោយកំណើននៃរោងចក្រ និងការវិនិយោគ ខណៈទីផ្សារកម្ពុជាស្រូបយកចំណែកទីផ្សារ បានជាង១២ភាគរយ ក្នុងចំណោមប្រទេសនៅតំបន់អាស៊ីប៉ាស៊ីហ្វិក។

របាយការណ៍របស់ក្រុមហ៊ុន CBRE បានបង្ហាញកាលពីថ្ងៃទី១៦ ខែវិច្ឆិកាម្សិលមិញនេះថា អត្រាតម្លៃបង់រំលោះដី សម្រាប់ការវិនិយោគគម្រោងឧស្សាហកម្មនៅក្នុងប្រទេសកម្ពុជា សម្រាប់រយៈពេល៥០ឆ្នាំ មានការកើនឡើង ដោយតម្លៃស្ថិតនៅក្នុងចន្លោះពី២០ ទៅ៩០ដុល្លារអាមរិក ក្នុងមួយម៉ែត្រការ៉េ ស្ថិតក្នុងរយៈពេលខាងលើ។

របាយការណ៍ដដែលឱ្យដឹងទៀតថា ចំណែ អត្រាតម្លៃជួលរោងចក្រ ដែលសាងសង់រួចរាល់ហើយ ក៏មានកំណើនឡើងផងដែរ ដោយកើនឡើងពី២ទៅ៤ដុល្លារអាមរិក ក្នុងមួយម៉ែត្រការ៉េក្នុងមួយខែ។

នៅក្នុងចំណោមប្រទេសក្នុងតំបន់អាស៊ីប៉ាស៊ីហ្វិក ប្រទេសកម្ពុជាស្ថិតនៅក្នុងប្រទេសមួយ ដែលអ្នកវិនិយោគមានបំណង ក្នុងការបោះទុនចូលមករកស៊ីនៅក្នុងប្រទេស ក្នុងអត្រាប្រមាណ៧ភាគរយ ខណៈគម្រោងវិនិយោគដែលមានស្រាប់ ក្នុងប្រទេសមានចំនួនប្រហែល១២ភាគរយ។

ក្នុងចំណោមនោះ ប្រទេសថៃទទួលបានការគាំទ្រ និងភាពពេញនិយមជាងគេចំនួន១២ភាគរយ សម្រាប់ចំណាប់អារម្មណ៍ក្នុងការបោះទុនមកវិនិយោគគម្រោងឧស្សាហកម្ម ខណៈប្រទេសមួយនេះទទួលបានគម្រោ​ងវិនិយោគរួចជាស្រេច នៅក្នុងអត្រាប្រហែល២៥ភាគរយ។

របាយការណ៍ខាងលើបានឱ្យដឹងទៀតថា នាពេលបច្ចុប្បន្ននេះ នៅក្នុងតំបន់អាស៊ីប៉ាស៊ីហ្វិក ប្រទេសចិនជាប្រទេសទទួលបាន ការវិនិយោគលើគម្រោងឧស្សាហកម្មច្រើនបំផុត ក្នុងអត្រាប្រហែល៤០ភាគរយ នៃគម្រោងទាំងអស់ ហើយតាមពីក្រោយដោយប្រទេសជប៉ុន វៀតណាម កូរ៉េខាងត្បូង ហុងកុង និងឥណ្ឌា៕