ដោយៈ ម៉ាលីនណា

       ភ្នំពេញៈ ការវិនិយោគអចលនទ្រព្យ ជាមុខរបរពេញនិយមនៅទូទាំងពិភពលោក ជាពិសេសនៅក្នុងបណ្ដាប្រទេសកំពុងអភិវឌ្ឍន៍ ដូចជា ប្រទេ​សកម្ពុជាយើងនាពេលបច្ចុប្បន្ន។

ដូចនេះតើត្រូវធ្វើយ៉ាងណា ទើបក្លាយជាអ្នកវិនិយោគអចលនទ្រព្យជោគជ័យ?។

១.រៀនសិនមុនចាប់ផ្ដើមកម្មវិធីនិយោគ

កុំធ្វើអ្វីមួយដែលគ្មានចំណេះដឹង វាប្រឈមមុខនឹងការខាតបង់ ហើយពិបាកនឹងស្តារឡើងវិញណាស់ ដូចនេះបងប្អូនទៅរៀនសូត្រសិនមុនចាប់ផ្ដើមវា។ ការរៀន និងបន្តអភិវឌ្ឍន៍ ចំណេះដឹងគ្មានទីបញ្ចប់រៀនផង អនុវត្តន៍ផង ដើម្បីក្លាយជាអ្នកជំនាញទើបរីកចម្រើន និងមានឱកាសទទួលបានប្រាក់ចំណេញជាអតិបរមា។

២ គោលបំណងជាក់លាក់ដើម្បីទទួលបានផលចំណេញជាអតិបរមា

ត្រូវមានគោលបំណងជាក់លាក់ ដើម្បីអោយការវិនិយោគនេះ ទទួលបានប្រាក់ចំណេញច្រើន តាមតែអាចធ្វើទៅបាន។ មិនមែនវិនិយោគ ព្រោះតែចង់មានដី ឬផ្ទះលំហែ សម្រាប់ថ្ងៃចុងសប្តាហ៍ ឬថ្ងៃឈប់សម្រាកឲ្យតែមានអចលនទ្រព្យនឹងគេដែរនោះទេ។ នៅពេលដែលយើងមានគោលបំណងត្រឹមតែលំហែ ឬជាចំការ ប្រាកដណាស់អចលនទ្រព្យ ដែលយើងទិញ មិនមានការទទួលបានប្រាក់ចំណេញខ្ពស់នោះទេ។ ការដឹងពីព័ត៌មានច្បាស់លាស់ វិភាគចំនេញ ខាត ដោយប្រើខួរក្បាល រឺប្រើតួរលេខ មិនប្រើអារម្មណ៍ ឬប្រើបេះដូងដើម្បីទិញនោះ ប្រាកដណាស់យើងនឹងមានឱកាសចំណេញបានច្រើន។

៣. ជ្រើសរើសតំបន់ ឬគម្រោងដែលមានសក្កានុពលខ្ពស់

ជាអ្នកវិនិយោគ ក៏មិនខុសពីភ្នាក់ងារអចលនវត្ថុដែរ នៅពេលចាប់ផ្ដើម ត្រូវផ្តោតតំបន់ណាមួយ អោយច្បាស់ហើយ ចងបណ្ដាញនៅតំបន់នោះ ប្រើយុទ្ធសាស្ត្រផ្ការីក។ ចង់បានអចលនទ្រព្យល្អ តម្លៃក្រោមទីផ្សារ មិនមានយើងមានលុយ ហើយចុះទៅទិញដូចទិញត្រី ឬបន្លែពីផ្សារមកទេ គឺត្រូវអត់ធ្មត់រង់ចាំទើបឍឱកាសល្អនឹងមកដល់។ ម្យ៉ាងទៀតដោយសារកត្តាធនធាននិងពេលវេលាមានកំណត់ ដូចនេះហើយអ្នកវិនិយោគត្រូវតែផ្តោត តាមតំបន់សក្តានុពលដែល យើងបានកំណត់។

៤.ចងបណ្តាញ

ចងក្រងបណ្ដាញក្នុងតំបន់គោលដៅ របស់យើងដើម្បីទទួលបានព័ត៌មានគ្រប់ជ្រុងជ្រោយ ដូចជាជាមួយនឹងអាជ្ញាធរមូលដ្ឋាន អ្នករកស៊ីក្នុងវិស័យអចលនទ្រព្យ ភ្នាក់ងារអចលនវត្ថុជំនាញ រឺអ្នកគួកជេរដែលអាចជឿទុកចិត្តបាន ដើម្បីដឹងពីគម្រោងអភិវឌ្ឍន៍នានា និងអចលនទ្រព្យ ដែលដាក់លក់បន្ទាន់ រឺអចលនទ្រព្យនៅទីតាំងល្អៗ។

៥. មានផែនការរយៈពេលវែងនិងផែនការហិរញ្ញវត្ថុ

សម្រាប់អ្នកវិនិយោគផ្ទះ ត្រូវការពេលវេលាពី២ទៅ ៣ឆ្នាំ។ រីឯដីធ្លី ត្រូវការរយៈពេលវែងចាប់ពី៥ឆ្នាំឡើង រហូតដល់១០ទៅ១៥ឆ្នាំ ឬលើសនេះទៀតក៏មាន។ ដូចនេះត្រូវមានផែនការហិរញ្ញវត្ថុ ឲ្យសមស្របនឹងពេលវេលា ដែលយើងបានកំណត់នោះដែរ។

ប្រសិនបើគ្មានផែនការជាក់លាក់ គ្មានផែនការហិរញ្ញវត្ថុសម្រាប់រយៈពេលវែង ប្រាកដជាត្រូវបង្ខំចិត្តលក់វិញ ជាមួយនឹងតម្លៃដើម ឬចំណេញតិចតួច នៅពេលខ្លះលក់ខាតផងក៏មានដែរ។

៦. ដឹងពីពេលវេលាត្រូវទិញ និងពេលវេលាចាកចេញ

ទិញនៅពេលទីផ្សារស្ងាត់ ហើយលក់វិញនៅពេលទីផ្សារឈូឆរ រឺដល់ចំណុចខ្ពស់។ ជាធម្មតាសម្រាប់អ្នកជួញដូរអចលនទ្រព្យ គឺពួកគាត់ទៅទិញនៅពេលដែលគេផ្អើលហើយប៉ុណ្ណោះ ព្រោះតែគាត់គ្មានបណ្ដាញ រឺប្រភពព័ត៌មាន។

បន្ថែមលើផែនការរយៈពេលវែងខាងលើ យើងត្រូវដឹងពីទីផ្សារតំបន់និងដល់ចំណុចកំពូលហើយពេលណា ត្រូវចាកចេញពេលណា អ្នកខ្លះមិនព្រមលក់ទេ ទោះជាទីផ្សារជិតដល់កំពូល រឺដល់កំពូលហើយ ដែលវាដល់ពេលនឹងឡើងយឺត ឬចិត្តដល់ពេលធ្លាក់ចុះមកវិញហើយ។

សូមប្រុងប្រយ័ត្នទីផ្សារនៅស្រុកយើង ពិបាកនឹងទុកចិត្តណាស់ នៅពេលដែលអាចជាយុទ្ធសាស្ត្រ ដែលអ្នកមានដីធំៗប្រើសំរាប់លក់ដីគេចេញវិញក៏មានដែរហើយ យើងទិញគឺមានតម្លៃថ្លៃបាត់ទៅហើយ បន្ទាប់ពីផ្អើលហើយ ទីផ្សារអាចនឹងចាប់ផ្ដើមស្ងាត់វិញក៏មាន៕

ដោយៈ គង់ សូរិយា

       ភ្នំពេញៈ ក្រុមមន្រ្តីជំនាញបានរៀបចំកិច្ចប្រជុំពិនិត្យ និងកែសម្រួលខ្លឹមសារនៃសេចក្ដីព្រាងគោលនយោបាយជាតិស្ដីពី អភិវឌ្ឍន៍វិស័យដឹកជញ្ជូនផ្លូវគោក ផ្លូវទឹក និងផ្លូវដែក ដែលនេះជាគោលនយោបាយថ្មី ដើម្បីជម្រុញការដឹកជញ្ជូន និងលើកកំពស់សេដ្ឋកិច្ចជាតិ។

​កិច្ចប្រជុំនេះធ្វើឡើង ដើម្បីឱ្យកាន់តែមានខ្លឹមសារស៊ីជម្រៅ គ្រប់ជ្រុងជ្រោយ​ និងជំរុញការច្របាច់បញ្ចូល ជាគោលនយោបាយជាតិរួមគ្នាតែមួយ តាមប្រសាសន៍ណែ​នាំរបស់ឯកឧត្ដមទេសរដ្ឋមន្រ្តី ស៊ុន​ ចាន់ថុល។

លោកឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក និងឯកឧត្ដម ម៉ក់ ស៊ីដេត អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានអញ្ជើញដឹកនាំក្រុមការងារបច្ចេកទេស ប្រជុំពិនិត្យ និងកែសម្រួលខ្លឹមសារ នៃសេចក្ដីព្រាងគោលនយោបាយជាតិស្ដីពី អភិវឌ្ឍន៍វិស័យដឹកជញ្ជូនផ្លូវគោក ផ្លូវទឹក និងផ្លូវដែក ដើម្បីឱ្យគោលនយោបាយជាតិមួយនេះ កាន់តែមានខ្លឹមសារស៊ីជម្រៅ និងបានគ្រប់ជ្រុងជ្រោយ។

ចក្ខុវិស័យនៃគោលនយោបាយជាតិនេះ គឺបង្កើតប្រព័ន្ធដឹកជញ្ជូនតាមផ្លូវថ្នល់ និងផ្លូវទឹក ស្របតាមទំនើបកម្មប្រព័ន្ធបច្ចេកវិទ្យា ប្រកបដោយប្រសិទ្ធភាពខ្ពស់ (គ្របដណ្តប់ ការតភ្ជាប់ ជឿជាក់ ងាយស្រួល សុវត្ថិភាព និងតម្លៃសមរម្យ) បរិស្ថានល្អ ផ្តល់ប្រយោជន៍ដល់ប្រជាពលរដ្ឋទូទៅ ទាក់ទាញវិនិយោគ សមភាព លើកកម្ពស់សមត្ថភាពប្រកួតប្រជែង និងជំរុញពិពិធកម្មមូលដ្ឋានគាំទ្រ កំណើនសេដ្ឋកិច្ចប្រកបដោយបរិយាប័ន្ន និងចីរភាព ធ្វើឱ្យសម្រេចបានចក្ខុវិស័យកម្ពុជាឆ្នាំ២០៥០៕

ដោយ៖ វឌ្ឍនៈ

ភ្នំពេញ ៖ សកម្មភាពអភិវឌ្ឍសំណង់បុរីនៅក្នុងឆ្នាំ២០២២នេះ នៅតែបន្តដំណើរការជាលំដាប់ ដោយមានក្រុមហ៊ុនអភិវឌ្ឍន៍លំនៅឋានមួយចំនួនបានធ្វើសកម្មភាពសាងសង់ សម្រាប់បំពេញតម្រូវការអតិថិជនរបស់ខ្លួន។

តាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងរយៈពេល៩ខែ ដើមឆ្នាំ២០២២នេះ ក្រសួងបានផ្ដល់លិខិតអនុញ្ញាតឱ្យសាងសង់គម្រោងបណ្ដុំលំនៅឋាន មានលក្ខណៈជាបុរីចំនួន២០គម្រោង។

លោក លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់មានប្រសាសន៍ផងដែរថា ក្នុងរយៈពេលមួយទសវត្សរ៍ចុងក្រោយនេះ ទុនវិនិយោគក្នុងវិស័យសំណង់កម្ពុជាមានកំណើនទៀងទាត់ និងនៅតែបន្តរីកចម្រើនជាលំដាប់។ ជាពិសេសការសាងសង់សំណង់ធំៗខ្ពស់ៗ ដូចជា អគារស្នាក់នៅរួម អគារលក់ទំនិញ ផ្សារទំនើបមជ្ឈមណ្ឌលពាណិជ្ជកម្ម អគារការិយាល័យ សណ្ឋាគារ អគារពហុមុខងារ បុរីលំនៅឋាន ភូមិគ្រឹះ គ្រឹះស្ថានសិក្សា មន្ទីរពេទ្យ ធនាគារ រោងចក្រ ឃ្លាំង ជាដើម។

លោកបន្តថា ក្នុងរយៈពេល៩ខែនេះ ក្រសួងបានផ្ដល់លិខិតអនុញ្ញាតសាងសង់ទូទាំងប្រទេសចំនួនជាង៣ពាន់គម្រោង ក្នុងទំហំទឹកប្រាក់ជិត២ពាន់លានដុល្លារអាមេរិក។ ក្នុងនោះ អគារខ្ពស់ៗចាប់ពី៥ជាន់ឡើងទៅមាន៩៨គម្រោង ស្មើនឹង១០០អគារ ហើយទីក្រុងភ្នំពេញទទួលបានគម្រោងសាងសង់អគារខ្ពស់ច្រើនជាងគេ។

លោក ថាន់ ចាន់ណា អគ្គនាយកក្រុមហ៊ុនអភិវឌ្ឍន៍បុរី ចាន់ណា លែន បានឱ្យដឹងថា ទីផ្សារលំនៅឋាននៅតែមានតម្រូវការ និងមានការអភិវឌ្ឍ ជាពិសេសលំនៅឋានតម្លៃសមរម្យ ដែលមិនសូវទទួលផលប៉ះពាល់ពីវិបត្តិប៉ុន្មាននោះទេ។

លោក ផូន សុអុនដែន ប្រធានផ្នែកទីផ្សារ នៃក្រុមហ៊ុន KH Land ក៏បានឱ្យផងដែរថា ក្នុងឆ្នាំ២០២២នេះ ក្រុមហ៊ុនបានបន្តអភិវឌ្ឍន៍គម្រោងសម្រាប់ផ្គត់ផ្គង់ជូនអតិថិជន ទាំងគម្រោងដីឡូតិ៍ និងលំនៅឋាននៅក្នុងតំបន់ជុំវិញគម្រោង ពោលគឺ នៅប៉ែកខាងលិចរាជធានីភ្នំពេញ ដែលមានគម្រោងលំនៅឋានជាបុរីមួយចំនួនចាប់ផ្ដើមធ្វើសកម្មភាពសាងសង់បំពេញតម្រូវការផងដែរ៕

ដោយ៖ សុផារី

ភ្នំពេញ៖ ក្រុមហ៊ុន CBRE បានបង្ហាញរបាយការណ៍មួយ ដោយលើកឡើងថា ម្ចាស់អាជីវកម្មឧស្សាហកម្មប្រហែល២ភាគ៣រំពឹងថា​​ អាជីវកម្មរបស់ខ្លួននឹងមានការរីកចម្រើន ហើយពួគគាត់គ្រោងនឹងពង្រីកទីតាំងជួលបន្ថែមទៀត។

នេះបើយោងតាមរបាយការណ៍ CBRE ស្តីពី “បដិវត្តឧស្សាហកម្មឆ្នាំ២០២២” ដែលចេញផ្សាយនៅថ្ងៃទី១៦ ខែវិច្ឆិកា ឆ្នាំ២០២២។

របាយការណ៍នេះបានបង្ហាញឱ្យដឹងថា នៅពេលឆ្លើយតបនឹងសំណួរថា តើអ្នកវិនិយោគរំពឹងថា អាជីវកម្មរបស់ខ្លួននឹងមានការប្រែប្រួលយ៉ាងណាខ្លះក្នុងរយៈពេល៣ឆ្នាំខាងមុខ អ្នកវិនិយោគចំនួន៥២ភាគរយ រំពឹងថា អាជីវកម្មរបស់ខ្លួននឹងរីកលូតលាស់ជាង១០ភាគរយ ២៦ភាគរយទៀតរំពឹងថា កើនឡើងតិចជាង១០ភាគរយ ខណៈអ្នកឆ្លើយតបចំនួន២០ភាគរយរំពឹងថា អាជីវកម្មនៅទ្រឹង ហើយ១ភាគរយផ្សេងទៀត ហាក់បារម្ភថា នឹងថមថយចុះតិច ជាង១០ភាគរយ។

របាយការដដែលឱ្យដឹងថា ក្នុងនោះ មានអ្នកវិនិយោគជាង៧៨ភាគរយ បានបង្ហាញពីចំណាប់អារម្មណ៍របស់ខ្លួន ក្នុងការពង្រីកទីតាំងជួលឃ្លាំងឧស្សាហកម្មបន្ថែមទៀត។

អ្នកឆ្លើយតបនឹងការស្ទង់មតិ CBRE Cambodia ចំនួន៨៤ភាគរយ បង្ហាញក្តីសង្ឃឹមថា បរិស្ថាននៃដំណើរការអាជីវកម្មរបស់ខ្លួននៅក្នុងតំបន់ នឹងមានការរីកចម្រើនលូតលាស់ខ្លាំង និងគួរឱ្យកត់សម្គាល់៕

  ដោយៈ គង់ សូរិយា

       កណ្តាល/កំពង់ស្ពឺៈ  ផ្លូវជាតិលេខ៥១ បាននិងកំពុងក្លាយជាបណ្តាញគមនាគមន៍ដ៏សំខាន់ សម្រាប់ការដឹកជញ្ជូន និងជាតំបន់បណ្តុំដោយរោងចក្រឧស្សាហកម្ម ខណៈដែលផ្នែកខ្លះ នៃតំបន់ឆ្លងកាត់កំណាត់ផ្លូវមួយខ្សែនេះ នឹងត្រូវកាត់ចូលជាទឹកដីរាជធានីភ្នំពេញនាពេលអនាគត

ការជំរុញឱ្យមានការវិនិយោគ លើរោងចក្រឧស្សាហកម្ម នៅតាមប ណ្តោ​យផ្លូវជាតិលេខ៥១ នឹងធ្វើឱ្យទីតាំងដីតំបន់នេះ កាន់តែទាក់ទាញសម្រាប់អ្នកវិនិយោគអចលនទ្រព្យ ក្នុងខេត្តកំពង់ស្ពឺ។

លោកទេសរដ្ឋមន្រ្តី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងកាលពីពេលថ្មីៗនេះថា ផ្លូវជាតិ៥១សម្បូរទៅដោយរោងចក្រឧស្សាហកម្ម សិប្បកម្ម និងសហគ្រាសខ្នាតធំ ព្រមទាំងជាតំបន់ទីប្រជុំជន ដែលមានអំណោយផលសម្រាប់គម្រោងអភិវឌ្ឍន៍ អចលនទ្រព្យ ដូចជាលំនៅឋាន ឬគម្រោងបុរី។

លោកបញ្ជាក់ថា “សកម្មភាពវិនិយោគទាំងនេះ នឹងចូលរួមបង្កើតមុខរបរនិងបង្កើនប្រាក់ចំណូល សម្រាប់ប្រជាពលរដ្ឋ ដែលរស់តាមបណ្តោយខ្សែផ្លូវនេះ”។

តើអ្នកជំនាញអចលនទ្រព្យមូលដ្ឋាន និងអ្នកវិភាគយល់ឃើញដូច    ម្តេចពីសក្តានុពលផ្លូវមួយនេះ?។

លោកប៊ូ សេងហ៊ួ ប្រធានតំបន់ក្រុមហ៊ុន Century 21 Zillion Holding ប្រចាំខេត្តកំពង់ស្ពឺ ដែលចុះស្រាវជ្រាវពីផ្សារដីធ្លីក្នុងខេត្តនេះ បានឱ្យដឹងថា ផ្លូវជាតិលេខ៥១ជាតំបន់ ដែលមានការវិនិយោគច្រើន លើរោងចក្រ ឧស្សាហកម្មដ៏លេចធ្លោមួយ បើធៀបនឹងតំបន់ផ្លូវជាតិលេខ៤១។

ចំំណែកលោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ឱ្យដឹងថា ខេត្តកំពង់ស្ពឺនឹងអាចទាញប្រយោជន៍ជាច្រើន ពីការផ្លាស់ប្តូរទិសដៅវិនិយោគ រោងចក្រ ឧស្សា​ហកម្មពីរាជធានីភ្នំពេញ និងរោងចក្រឧស្សាហកម្មថ្មីៗ ដោយសារមានទីតាំងនៅចន្លោះ រាជធានីភ្នំពេញ និងខេត្តព្រះសីហនុ ។

លោកថ្លែងថា “នៅពេលដែលរាជធានីភ្នំពេញ កាន់តែរីកចម្រើន គម្រោងឧស្សាហកម្ម និងរោងចក្រកាត់ដេរមួយចំនួន ចាប់ផ្តើមបង្វែរទិសដៅមកតាមបណ្តាខេត្តផ្សេងៗ ជាពិសេសចូលមកក្នុងខេត្តកំពង់ស្ពឺ ព្រោះខេត្តនេះមានទីតាំងជិតខេត្តព្រះសីហនុ ដែលងាយស្រួលក្នុងការដឹកជញ្ជូន ហើយក៏នៅជិតនឹងរាជធានីភ្នំពេញផងដែរ”។

លោកបន្ថែមថា រោងចក្រឧស្សាហកម្មជាច្រើន កំពុងវិនិយោគរួចទៅហើយនៅតាមទីតាំងមួយចំនួន ក្នុងខេត្តកំពង់ស្ពឺមាន ដូចជា ក្រុងច្បារមន ស្រុកឧដុង្គ និងស្រុកផ្សេងៗទៀត។

ផ្លូវជាតិលេខ៥១ មានប្រវែង៣៨គីឡូម៉ែត្រ ដែលគិតចាប់ពីឧដុង្គ ចំណុចប្រសព្វផ្លូវជាតិលេខ៥ រហូតដល់ថ្នល់ទទឹង ចំណុចប្រសព្វផ្លូវជាតិលេខ៤។ កំណាត់ផ្លូវមួយខ្សែនេះត្រូវបានស្ថាបនាឡើងវិញដោយ ចំណាយទឹកប្រាក់សាងសង់សរុប ប្រមាណ៤០លានដុល្លារអាមេរិក។

ផ្លូវជាតិលេខ៥១ជាផ្លូវយុទ្ធសាស្រ្តតភ្ជាប់ ជាមួយផ្លូវអាស៊ានហាយវ៉េលេខ១ (AH-1) នៃរបៀងសេដ្ឋកិច្ចខាងត្បូង ឆ្ពោះទៅច្រកព្រំដែនកម្ពុជា-ថៃ (ប៉ោយប៉ែត) និងផ្លូវអាស៊ានហាយវ៉េលេខ១១ (AH-11) ឆ្ពោះទៅកំពង់ផែសមុទ្រទឹកជ្រៅខេត្តព្រះសីហនុ ហើយអាចតភ្ជាប់ តាមរយៈផ្លូវជាតិលេខ៤១ ផ្លូវជាតិលេខ៣ និងផ្លូវជាតិលេខ៣៣ ទៅកាន់ខេត្តកំពត និងខេត្តកែប ដែលជាខេត្តគោលដៅទេសចរណ៍ធម្មជាតិ និងតំបន់ឆ្នេរដ៏ស្រស់ត្រកាលរបស់កម្ពុជា៕

ដោយ: លាងហួរ

ហ្សាការតា: ប្រទេសជប៉ុន កូរ៉េខាងត្បូង និងចក្រភពអង់គ្លេសបានបង្ហាញពីចំណាប់អារម្មណ៍ ក្នុងការចូលរួមក្នុងការអភិវឌ្ឍន៍គម្រោងផ្លូវរថភ្លើង MRT របស់ទីក្រុងហ្សាការតា។

កាលពីថ្ងៃចន្ទសប្តាហ៍នេះ ប្រទេសទាំងបីបានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយរដ្ឋាភិបាលឥណ្ឌូណេស៊ីនៅលើកោះបាលី។

ការចុះហត្ថលេខានេះ បានបង្កើតនូវកិច្ចព្រមព្រៀងចំនួន៣ និងMoU រវាងរដ្ឋាភិបាលឥណ្ឌូណេស៊ី និងកូរ៉េខាងត្បូង ដើម្បីដំណើរការដំណាក់កាលទី៤នៃគម្រោងខ្សែរថភ្លើង Fatmawati-Kampung Rambutan និងអនុស្សរណៈនៃកិច្ចសហប្រតិបត្តិការ (MoC) រវាងរដ្ឋាភិបាលឥណ្ឌូណេស៊ី និងជប៉ុនស្តីពី ការបន្តគម្រោងខ្សែរថភ្លើងភាគខាងកើត និងខាងលិចJakarta MRTក្នុងដំណាក់កាលទី១និងកិច្ចព្រមព្រៀង(LoI) ជាមួយរដ្ឋាភិបាលចក្រភពអង់គ្លេសស្តីពី កិច្ចសហប្រតិបត្តិការ សម្រាប់ការអភិវឌ្ឍន៍គម្រោងផ្លូវដែក។

ការចុះហត្ថលេខានេះ មានការចូលរួមពីរដ្ឋមន្ត្រីដឹកជញ្ជូនឥណ្ឌូណេស៊ីលោក Budi Karya Sumadi រដ្ឋមន្ត្រីដែនដីកូរ៉េខាងត្បូង ហេដ្ឋារចនាស ម្ព័ន្ធ និងដឹកជញ្ជូនលោក Won Hee-Ryong អនុរដ្ឋមន្ត្រីសហប្រតិបត្តិការការបរទេសជប៉ុនលោក Satoru Mizusima និងឯកអគ្គរដ្ឋទូតអង់គ្លេសប្រចាំប្រទេសឥណ្ឌូណេស៊ី។

ការចុះហត្ថលេខានេះ បង្ហាញពីចំណាប់អារម្មណ៍របស់សហគមន៍អន្តរជាតិ ក្នុងការវិនិយោគក្នុងការអភិវឌ្ឍន៍ហេដ្ឋារចនាសម្ព័ន្ធ របស់ប្រទេសឥណ្ឌូនេស៊ី ជាពិសេសផ្នែកដឹកជញ្ជូន។

លោក Budi បានមានប្រសាសន៍ថា ប្រទេសកូរ៉េខាងត្បូង ជប៉ុន និងចក្រភពអង់គ្លេស គឺជាដៃគូយុទ្ធសាស្ត្ររបស់ឥណ្ឌូណេស៊ី ក្នុងកិច្ចសហការដែលផ្តល់ផលប្រយោជន៍ដល់គ្នាទៅវិញទៅមក ជាពិសេសក្នុងវិស័យដឹកជញ្ជូន៕

ដោយ: លាងហួរ

បាងកក: រដ្ឋបាលក្រុងបាងកក (BMA) កំពុងធ្វើការប្រែក្លាយរាជធានីរបស់ខ្លួន ទៅជាទីក្រុងឆ្លាតវៃ ដើម្បីបង្កើនប្រសិទ្ធភាពការងារ កែលម្អគុណភាពជីវិត បង្កើតឱកាស និងទទួលបានទំនុកចិត្តពីប្រជាជន។

អភិបាលក្រុងបាងកក លោក Chadchart Sittipunt បានមានប្រសាសន៍កាលពីថ្ងៃអង្គារម្សិលមិញនៅក្នុងសិក្ខាសាលា “Thailand Smart City: Bangkok Model” ដែលរៀបចំដោយ Nation TV និង Post Today ថា ទីក្រុងបាងកកនឹងក្លាយទៅជាទីក្រុងឆ្លាតវៃមួយ ប្រសិនបើបច្ចេកវិទ្យាត្រូវបានអនុវត្ត ដើម្បីបំពេញតម្រូវការរបស់ប្រជាជន។

លោក​បាន​បញ្ជាក់ថា​ “វា​នឹង​មានការពិបាក​ក្នុង​ការ​អភិវឌ្ឍ​ទីក្រុង​ឆ្លាត​មួយ ​ប្រសិន​បើ​ប្រជាជន​មិន​ជឿជាក់​លើ​យើង​។ ដូច្នេះ ទីក្រុងឆ្លាតវៃត្រូវតែបំពេញនូវទិដ្ឋភាពទាំងអស់នេះ ជាមួយនឹងការប្រើប្រាស់បច្ចេកវិទ្យា”។

លោកលើកឡើងថា បញ្ហាមួយទៀតដែលទីក្រុងបាងកកកំពុងប្រឈម គឺកង្វះតម្លាភាព ដែលជាបញ្ហាប្រឈមដ៏សំខាន់ ចាប់តាំងពីលោកបានចូលកាន់តំណែងជាអភិបាលក្រុងបាងកក កាលពីដើមឆ្នាំនេះ។

ដើម្បីទទួលបានការជឿទុកចិត្តពីប្រជាជន រដ្ឋបាលក្រុងបាងកក(BMA)បានចាប់ផ្តើមកម្មវិធី Traffy Fondue ដើម្បីអនុញ្ញាតឱ្យប្រជាជនបាងកកអាចដាក់ពាក្យបណ្តឹងបាន។

លោកបានមានប្រសាសន៍ថា វាចាំបាច់ក្នុងការដោះស្រាយបញ្ហាប្រចាំថ្ងៃ របស់ប្រជាពលរដ្ឋ ដូចជា  ចរាចរណ៍ ការគ្រប់គ្រងកាកសំណល់ និងការថែទាំសុខភាពសហគមន៍ ដើម្បីធានាឱ្យមានការផ្លាស់ប្តូរដោយរលូន ទៅកាន់ទីក្រុងឆ្លាតវៃ។

ទន្ទឹមនឹងនេះ លោក Wasit Wattanasap ប្រធានផ្នែកប្រតិបត្តិការទូទាំងប្រទេស និងគាំទ្រសម្រាប់សេវា Advanced Info Service (AIS) បានមានប្រសាសន៍ថា បច្ចេកវិទ្យាមានសារៈសំខាន់ណាស់ សម្រាប់ការអភិវឌ្ឍទីក្រុងឆ្លាតវៃ ព្រោះវានឹងជួយដល់មនុស្សក្នុងការសម្រេចចិត្ត។

លោកបានបន្ថែមថា កិច្ចសហប្រតិបត្តិការរវាងវិស័យឯកជន និងសាធារណៈមានភាពចាំបាច់ ដើម្បីធានាថាការផ្លាស់ប្តូរ ទៅជាទីក្រុងឆ្លាតវៃដំណើរការដោយរលូន៕

ដោយ៖ សុផារី

ភ្នំពេញ៖ ខណៈផ្នែកផ្សេងៗនៃវិស័យអចលនទ្រព្យប្រឈមភាពមិនប្រកដប្រជា អ្នកជំនាញសង្គេតឃើញថា ទីផ្សារជួលហាក់បន្តមានភាពល្អប្រសើរ ដែលគាំទ្រដោយការងើបឡើងវិញ នៃសកម្មភាពអាជីវកម្ម និងការបន្តពង្រីកសាខាថ្មីៗនៃក្រុមហ៊ុនទាំងនោះ។

លោក ឌិត ចណ្ណា អគ្គនាយកក្រុមហ៊ុនអចលនទ្រព្យ Lucky Realty បានមានប្រសាសន៍ថា ទីផ្សារជួលទីតាំងអាជីវកម្មក្នុងក្រុងភ្នំពេញទទួលការពេញនិយមច្រើនពីសំណាក់ក្រុមអតិថិជនចំនួនពីរប្រភេទ គឺ ម៉ាកយីហោល្បីៗ និងធនាគារ។

លោកបានឱ្យដឹងថា ទីផ្សារជួលទទួលបានការគាំទ្រពីសំណាក់ការពង្រីកនៃហាងម៉ាកយីហោល្បីៗ ទាំងក្នុងស្រុក និងបរទេស។ ក្រុមអតិថិជនប្រភេទម៉ាកយីហោនេះភាគច្រើននិយមស្វែងរកទីតាំងណា ដែលជាប់នៅផ្លូវធំៗ ជាពិសេសទីតាំងកែងនឹងផ្លូវតែម្តង។

លោកបញ្ជាក់ថា “ការជួលនៅតែមានតម្រូវការ អតិថិជនដែលជួលនៅក្នុងស្ថានភាពបច្ចុប្បន្ននេះ គឺហាងលក់ទំនិញប្រេនល្បីៗ ។ យើងឃើញថា ហាងប្រេនៗនៅតែពង្រីកសាខារបស់ខ្លួន។ ឱ្យតែទីតាំងល្អ នៅតំបន់ផ្លូវកែង កាត់ផ្លូវធំៗ ជាទីតាំងគោលដៅរបស់ពួកគាត់។ ម៉ាកយីហោចំណីអាហារ សម្លៀកបំពាក់ ហាងកាហ្វេ ហាងលក់ទំនិញធំៗ ឃើញមានសាខាច្រើន ហើយពង្រីកគ្រប់កន្លែង។ ឧទាហរណ៍ដូចជា ហាង Zando ហាង Papa John’s ហាង Pizza Hut ជាដើម”។

លោកបានបញ្ជាក់បន្តថា ក្រុមអតិថិជនទី២ គឺ ក្រុមធនាគារ ដែលពង្រីកច្រើនសាខាច្រើនគួរឱ្យកត់សម្គាល់។ លោកថា អ្នកវិនិយោគលើទីផ្សារនេះគួរពិនិត្យមើលទីតាំងជាក់លាក់ណាមួយ ដែលមានសក្តានុពលពិតប្រាកដមុននឹងបោះទុនវិនិយោគ សម្រាប់ដាក់ជួលឱ្យធនាគារ។

អ្នកនាង ជិន ដាលុច្ស ប្រធានផ្នែកវាយតម្លៃនៃក្រុមហ៊ុន CBRE Cambodia បានឱ្យដឹងថា គម្រោងដែលត្រូវបានពង្រីកក្នុងត្រីមាសកន្លងមក ដែលក្រុមហ៊ុនបានសិក្សាភាគច្រើនជា ស្លាកយីហោអាហារ និងភេសជ្ជៈ សម្លៀកបំពាក់ គ្រឿងអេឡិចត្រូនិច និងសម្ភារៈប្រើប្រាស់ក្នុងផ្ទះ ផ្សារទំនើបតូចៗ និងទាក់ទងនឹងគ្រឿងសំអាង ជាដើម។

យោងតាមរបាយការណ៍​របស់​ក្រុមហ៊ុន​អចលន​ទ្រព្យ CBRE Cambodia ដែល​ចេញ​ផ្សាយ​កាល​ពីពេលថ្មីៗនេះ ​បានឱ្យដឹង​ថា នៅក្នុង​ត្រីមាសទី៣ នៃឆ្នាំ​២០២២នេះ

របាយការណ៍ដដែលឱ្យដឹងថា គិត​ត្រឹម​ដំណាច់​ត្រីមាសទី៣ ឆ្នាំ​២០២២ ​ក្នុង​រាជធានី​ភ្នំពេញ មានស្លាកយីហោជាង៦២បានពង្រីកសាខារបស់ខ្លួនបន្ថែមទៀត ខណៈស្លាកយីហោចំនួន១០ថ្មីៗបានឈានជើងចូលមកកាន់ទីផ្សារកម្ពុជា ដូចជា Addidas Krispy Kreme H&M Starbuck The Pizza Company ជាដើម៕