កិច្ចប្រជុំ APEC គ្រោងនឹងពិភាក្សាអំពីផែនការវិនិយោគ និងពាណិជ្ជកម្មក្នុងតំបន់អាស៊ីប៉ាស៊ីហ្វិក

ដោយ: លាងហួរ

អាស៊ីៈ ផែនការការងារពហុឆ្នាំសម្រាប់ពាណិជ្ជកម្មសេរី និងបើកចំហ ការវិនិយោគ នឹងត្រូវពិភាក្សានៅឯកិច្ចប្រជុំ មន្ត្រីជាន់ខ្ពស់ APEC លើកទីបីនៅទីក្រុងឈៀងម៉ៃ។

ការផ្តោតជាពិសេស គឺលើការជំរុញការស្តារសេដ្ឋកិច្ច ប្រកបដោយនិរន្តរភាព ពីជំងឺរាតត្បាត Covid-19 ដែលជាអាទិភាពសំខាន់មួយសម្រាប់កិច្ចប្រជុំAPEC 2022 ក្រោមប្រធានបទ” Open.Connect.Balance.”ជាមួយនឹងគំរូសេដ្ឋកិច្ច Bio-Circular-Green (BCG)។

របៀបវារៈដ៏សំខាន់បំផុតមួយ សម្រាប់កិច្ចប្រជុំផ្នែកពាណិជ្ជកម្ម និងការវិនិយោគ គឺបន្តការសន្ទនាថ្មីលើតំបន់ពាណិជ្ជកម្មសេរី នៃអាស៊ីប៉ាស៊ីហ្វិក (FTAAP)នៅក្នុងបរិបទក្រោយជំងឺកូវីដ១៩។

ផ្អែកលើលទ្ធផលជោគជ័យ នៃកិច្ចប្រជុំរដ្ឋមន្ត្រីទទួលបន្ទុកពាណិជ្ជកម្មរបស់ APEC (MRT) នៅខែឧសភា ឆ្នាំ ២០២២ គណៈកម្មាធិការពាណិជ្ជកម្ម និងវិនិយោគ (CTI) នឹងកោះប្រជុំនៅថ្ងៃទី ២៦-២៧ ខែសីហា ដើម្បីពិភាក្សា អំពីការបង្កើតផែនការការងារពហុឆ្នាំ FTAAP ដោយមានគោលបំណងបញ្ជូនវា ទៅអនុម័តនៅកិច្ចប្រជុំថ្នាក់រដ្ឋមន្ត្រី APEC ក្នុងខែវិច្ឆិកា។ ផែនការការងារពហុឆ្នាំរបស់ FTAAP នឹងក្លាយជាសមិទ្ធិផលដ៏សំខាន់។

វានឹងបង្កើតក្របខ័ណ្ឌរយៈពេលវែងសម្រាប់ APEC ដើម្បីបន្តជំរុញរបៀបវារៈ FTAAP ដោយមានគោលបំណង លើកកម្ពស់សេដ្ឋកិច្ចអាស៊ីប៉ាស៊ីហ្វិកសេរី និងបើកចំហ ដែលផ្តល់ឱកាសពាណិជ្ជកម្ម និងការវិនិយោគ។

CTI ក៏នឹងពិភាក្សាអំពីកម្មវិធីកសាងសមត្ថភាព FTAAP សំដៅកាត់បន្ថយគម្លាតរវាងសេដ្ឋកិច្ចសមាជិក APEC ក្នុងដំណាក់កាលអភិវឌ្ឍន៍ផ្សេងៗគ្នា។

អ្នកជំនាញCTI នឹងរៀបចំផែនការកម្មវិធីការងារជាបន្តបន្ទាប់ ដើម្បីផ្លាស់ប្តូរចំណេះដឹង ការអនុវត្តល្អបំផុត និងបទពិសោធន៍ក្នុងចំណោមសមាជិក APEC លើប្រធានបទសំខាន់ៗ ទាក់ទងនឹងការជំរុញសមាហរណកម្មសេដ្ឋកិច្ចក្នុងតំបន់៕

តើអ្នកមានលុយច្រើនគួរសាងសង់សណ្ឋាគារ ឬអាផាតម៉ិនសម្រាប់ចំណូលសកម្ម

ដោយៈ គង់ សូរិយា

ភ្នំពេញៈ នៅពេលនិយាយពីអ្នកមានប្រាក់ ពួកគេតែងតែគិតពីការវិនិយោគ ដើម្បីទទួលបានផលចំណេញ និងភាពជោគជ័យសម្រាប់រយៈពេលវែងរបស់ពួកគេ ហេតុនេះការវិនិយោគលើវិស័យអាផាតម៉ិន និងសណ្ឋាគារមួយណាមានផលចំណេញជាង? ជាអ្វីដែលជាសំណួរចាក់ដោតមួយ។

អគ្គនាយកក្រុមហ៊ុន Khmer Foundation Appraisal លោកឧកញ៉ា នួន រិទ្ឋី ដែលបាននិងកំពុងវិនិយោគលើអាផាតម៉ិន KFA នៅតំបន់បឹងត្របែកបានថ្លែងឲ្យដឹងកាលពីពេលថ្មីៗនេះថា ការវិនិយោគលើអាផាតម៉ិន និងសណ្ឋាគារជាការវិនិយោគ សម្រាប់រយៈពេលវែងដូចគ្នា និងមានភាពវិជ្ជមានខុសៗគ្នា អាស្រ័យលើអ្នកវិនិយោគនិមួយៗជ្រើសរើស ប៉ុន្តែសម្រាប់ទស្សនៈ និងការយល់ឃើញរបស់លោកផ្ទាល់ គឺការវិនិយោគលើអាផាតម៉ិនមានភាពងាយស្រួលជាង។

លោកបន្តថា “ការវិនិយោគលើអាផាតម៉ិន ជាការវិនិយោគគិតពីរយៈពេលវែង និងសម្រាប់អ្នកចង់មានសេរីភាពហិរញ្ញវត្ថុ ឬចូលនិវត្តន៍ពីការងារវ័យក្មេង ព្រោះអាផាតម៉ិនទទួលបានចំណូលទៀតទាត់ និងស្ងាត់ស្ងៀមជាងវិនិយោគលើសណ្ឋាគារ”។ លោកបន្តថា ការវិនិយោគលើអាផាតម៉ិន មិនសូវត្រូវការសេវាកម្មច្រើនពេកនោះទេ គឺប្រើប្រាស់បុគ្គលិកតិច និងងាយស្រួលគ្រប់គ្រង”។

ចំណែកការវិនិយោគលើសណ្ឋាគារ ជាការវិនិយោគរយៈពេលវែងដូចគ្នា ទទួលបានចំណូលច្រើនផងដែរ ប៉ុន្តែសណ្ឋាគារត្រូវមានសេវាកម្មច្រើនជាងអាផាតម៉ិន ដូចជា ត្រូវមានបន្ទប់ប្រជុំ មានភោជនីយដ្ឋាន កន្លែងហាត់ប្រាណ និងមានការប្រើប្រាស់បុគ្គលិកច្រើនជាងអាផាតម៉ិន ពិសេសត្រូវផ្តោតលើការរក្សានូវផាសុខភាព ភាពកក់ក្តៅ និងសុវត្ថិភាពដល់ភ្ញៀវជាចម្បង។ ផ្ទុយទៅវិញអាផាតម៉ិន មិនចាំបាច់មានភោជនីយដ្ឋាន សាលប្រជុំ ឬប្រើប្រាស់បុគ្គលិកច្រើននោះទេ។

លោកឧកញ៉ាបានបន្តថា “ទោះជាយ៉ាងណាការវិនិយោគលើសណ្ឋាគារទទួលបានប្រាក់ចំណូលច្រើនប្រចាំថ្ងៃ ប្រសិនជាសណ្ឋាគារនោះដំណើរការដោយជោគជ័យ”។ លោកបន្តថា “ហេតុនេះការវិនិយោគលើអាផាតម៉ិន និងសណ្ឋាគារល្អម្យ៉ាងម្នាក់ ប៉ុន្តែការវិនិយោគលើសណ្ឋាគារ ទាមទារឲ្យម្ចាស់មានភាពមមាញឹកច្រើន”។

លោក Michael S. Nhim ប្រធានក្រុមអ្នកវិនិយោគនៃក្រុមហ៊ុន SIDO Groupដែលជាក្រុមហ៊ុនវិនិយោគ លើគំរោងជាច្រើននៅក្នុងតំបន់ និងបណ្តាប្រទេសនានាបានថ្លែងថា សម្រាប់ទស្សននិងការយល់ឃើញ ព្រមទាំងបទពិសោធន៍របស់លោក លោកគិតថាការវិនិយោគលើវិស័យអាផាតម៉ិន ជាការវិនិយោគមានភាពឆ្លាតវៃ និងរកលុយបានច្រើនយ៉ាងស្ងៀមស្ងាត់ និងមិនសូមវចំណាយពេលច្រើន និងបុគ្គលិកច្រើនដូចសណ្ឋាគារនោះទេ។

លោកបន្តថា “ការវិនិយោគលើសណ្ឋាគារ ត្រូវចំណាយពេលច្រើនលើប្រតិបត្តិការ លើបុគ្គលិក និងសេវាកម្មជាច្រើន ប៉ុន្តែវិនិយោគលើអាផាតម៉ិន ជាការវិនិយោគដែលមានភាពឆ្លាតវៃ និងនៅតែមានឳកាសជោគជ័យច្រើន”៕

ម្ចាស់ដីផ្ទុះប្រតិកម្មពេញប្រទេសថៃ ក្រោយរដ្ឋាភិបាលប្រកាសថានឹងរឹបអូសដីធ្លីទុកចោលទុកជាសម្បត្តិរដ្ឋ

ដោយៈ សុខុម

បាងកក: ម្ចាស់ដីធ្លីនៅពាសពេញប្រទេសថៃ ជាពិសេសក្នុងវិស័យសណ្ឋាគារ បានផ្ទុះប្រតិកម្មដោយបង្ហាញក្ដីព្រួយបារម្ភ កាន់តែខ្លាំងចំពោះគោលនយោបាយរបស់រដ្ឋាភិបាលថៃ ដែលប្រកាសថានឹងចាត់វិធានការរឹបអូសដីទំនេរទុកចោលរយៈពេល១០ឆ្នាំ ដើម្បីទុកជាសម្បត្តិរដ្ឋ។

លោកស្រី Marisa Sukosol Nunbhakdi ប្រធានសមាគមសណ្ឋាគារថៃ (Thai Hotels Association (THA)) បានថ្លែងថា ទោះបីជារយៈពេលជាង៤០ឆ្នាំមកនេះ គ្មានការរឹបអូសដីធ្លី ក្នុងករណីបែបនេះយ៉ាងណាក្ដី ក៏វិស័យសណ្ឋាគារមិនយល់ស្រប នឹងគោលនយោបាយបែបនេះនោះដែរ ប្រសិនបើគ្មានដំណោះស្រាយសមស្រប សម្រាប់ជួយទាំងម្ចាស់ដី និងសហគមន៍សាធារណៈ ឱ្យទទួលបានអត្ថប្រយោជន៍ទៅវិញទៅមកពីការអភិវឌ្ឍដីធ្លីទេនោះ។

កាលពីថ្ងៃអាទិត្យ ចុងសប្ដាហ៍កន្លងទៅ អ្នកនាំពាក្យរដ្ឋាភិបាលថៃ បានព្រមានថា រដ្ឋាភិបាលអាចនឹងអនុវត្តន៍ជំពូកទី៦ នៃច្បាប់នេះដែលអនុញ្ញាតឱ្យរឹបអូសដីកម្មសិទ្ធិឯកជន ដែលទុកចោលមិនធ្វើអ្វីសោះ ក្នុងរយៈពេល១០ឆ្នាំជាប់គ្នា។

លោកស្រី Marisa Sukosol Nunbhakdi លើកឡើងថា ម្ចាស់សណ្ឋាគារ ដែលមានដីទំនេរចោលភាគច្រើន បានផ្អាកការវិនិយោគលើសណ្ឋាគារថ្មីៗ អំឡុងរយៈពេល២ឆ្នាំចុងក្រោយនេះ ដោយសារទីផ្សារទេសចរណ៍ដាំក្បាលចុះហៅមិនឮ ព្រោះតែវិបត្តិកូវីដ-១៩។

ទោះជាយ៉ាងណា ខណៈម្ចាស់ដីខ្លះយល់ស្របថា ដីរបស់ពួកគេអាចប្រើប្រាស់បាន សម្រាប់គោលបំណងសាធារណៈ រដ្ឋាភិបាលគ្មានគំនិតផ្ដួចផ្ដើម ដើម្បីផ្ដល់កម្មវិធីជួលសម្រាប់ជួយ សម្រាលការលំបាករបស់ម្ចាស់ដីឡើយ៕ Bangkok Post៕

តើទស្សនស្ថាបត្យកម្មមានការប្រែប្រួលដូចម្តេចក្នុងរយៈពេលមួយទសវត្សរ៍ចុងក្រោយនេះ

ដោយៈគង់ សូរិយា

ភ្នំពេញៈ វិស័យអចលនទ្រព្យនៅកម្ពុជា បាននាំឲ្យមានការផ្លាស់ប្តូរយ៉ាងខ្លាំងនៅរាជធានីភ្នំពេញ សៀមរាប និងខេត្តព្រះសីហនុ ក្នុងរយៈពេលប្រមាណមួយទសវត្សចុងក្រោយនេះ។

អគារចាស់ៗមួយចំនួន ត្រូវបានកែលម្អនិងជួលសារជាថ្មីឡើងវិញ ខណៈដែលអគារខ្លះទៀត ត្រូវបានបំផ្លាញទាំងស្រុង ដើម្បីទុកកន្លែងទំនេរថ្មីៗ។

ខណៈដែលឥទ្ធិពលរបស់បស្ចិមប្រទេស កំពុងបញ្ចេញនូវទស្សនវិជ្ជារចនាលើគម្រោងថ្មីៗ ក៏បានមានការលេចទ្បើងទន្ទឹមគ្នា ដែលមានការទាក់ទាញ និងបំផុសគំនិតប្រវត្តិសាស្រ្តដ៏យូរលង់ និងសំបូរបែបរបស់ប្រទេសកម្ពុជា ដែលបានគេឲ្យឈ្មោះថាជា គឺស្ថាបត្យកម្មបែបថ្មី។

បំល្លាស់ប្តូរនេះ ត្រូវបានពិពណ៌នាថា ជាការរួមបញ្ចូលគ្នានូវគោលការណ៍ទំនើប ដែលបានបង្កើតឡើងនៅភាគខាងលិច ជាមួយនឹងការរចនាបែបបុរាណរបស់ខ្មែរ ដែលមានតាំងពីបុរាណកាល រហូតដល់ស្ថាបត្យកម្មសម័យអង្គរ (ឧទាហរណ៍ប្រាសាទអង្គរវត្ត) ។

ការចាប់ផ្ដើមនៃស្ថាបត្យកម្មបែបថ្មី
បើទោះបីជាគំហើញនេះ មិនទាន់ហៅឈ្មោះជាផ្លូវការថាជា ស្ថាបត្យកម្មបែបថ្មី ក៏ដោយ ប៉ុន្តែវាត្រូវបានគេមើលឃើញថា បានចាប់ផ្ដើមតាំងពីកំឡុងឆ្នាំ១៩៥០មកម្ល៉េះ ក្រោយពេលប្រទេសកម្ពុជា ទទួលបានឯករាជ្យពីបារាំង រហូតដល់កំឡុងឆ្នាំ១៩៧០ មុនពេលសង្គ្រាមស៊ីវិលចាប់ផ្ដើម។

ស្ថិតនៅក្រោមការឧបត្ថម្ភ និងចក្ខុវិស័យរបស់អតីតសម្តេចព្រះនរោត្តម សីហនុ ដែលបានចាប់ផ្តើម ក្នុងការអភិវឌ្ឍទីក្រុងរបស់ប្រទេសកម្ពុជា ក្នុងទសវត្សឆ្នាំ១៩៥០។ បញ្ញវន្តខ្មែរជាច្រើន ជាពិសេសអ្នកដែលបានសិក្សា នៅបរទេសបានមកយកបទពិសោធន៍ និងចំណេះដឹងអំពីបេតិកភណ្ឌខ្មែរ ដើម្បីជួយអភិវឌ្ឍន៍ប្រទេសកម្ពុជា។
ជាពិសេសស្ថាបត្យករ បានក្លាយជាមនុស្សសំខាន់ ក្នុងការសម្រេចចក្ខុវិស័យរបស់ព្រះមហាក្សត្រ។

ចំនុចនេះហើយដែលបានបញ្ជាក់ថា លោក វណ្ណ ម៉ូលីវណ្ណ ជាបុរសដែលកំណត់ និងរៀបចំប្លង់មេ នៃរាជធានីភ្នំពេញ សម្រាប់ពាក់កណ្តាលសតវត្សរ៍បន្ទាប់។

លោក វណ្ណ ម៉ូលីវណ្ណ គឺជាសសរស្តម្ភមួយ នៅក្នុងប្រវត្តិសាស្ត្រស្ថាបត្យកម្មរបស់ព្រះរាជាណាចក្រកម្ពុជា។ គាត់ជាបុគ្គលមួយរូបដែលលេចធ្លោបំផុត ក្នុងនាមជាស្ថាបត្យកររដ្ឋក្រោមការ ដឹកនាំរបស់ព្រះមហាក្សត្រ។

លោក ម៉ូលីវណ្ណ បានរៀបចំប្លង់រចនាសម្ពន្ធ័ជាច្រើននៅក្នុង ប្រទេសកម្ពុជា រួមមានអគារពហុកីឡាជាតិ សាលសន្និសិទចតុមុខ និងវិមានឯករាជ្យ និងស្នាដៃសំណង់ជាច្រើនទៀត រហូតទទួលបានងារជាស្ថាបត្យករលេចធ្លោជាងគេនៅកម្ពុជា។

ស្ថាបត្យកម្មបែបថ្មីនាបច្ចុប្បន្ន
យោងតាមអត្ថបទ គម្រោងលោកវណ្ណ ម៉ូលីវណ្ណ ដែលជាឯកសារ និងអត្ថបទសិក្សាអំពីស្នាដៃរបស់លោកវណ្ណ ម៉ូលីវណ្ណ និងស្ថាបត្យកម្មបែបទំនើបដទៃទៀត ស្ថាបត្យកម្មបែបថ្មីអាចត្រូវបានកំណត់លក្ខណៈ ដូចជា ការប្រើប្រាស់បេតុង។ ការបង្កើតលំហូរខ្យល់ធម្មជាតិ និងការដាក់ស្រមោលស្រប តាមអាកាសធាតុត្រូពិករបស់ប្រទេសកម្ពុជា។ ការប្រើគ្រឿងលំអ ដោយបំផុសគំនិតនៃការតុបតែងបែបប្រាសាទអង្គរ។

បច្ចុប្បន្ននេះ ស្ថាបត្យកម្មបែបថ្មីនេះ កំពុងបង្ហាញខ្លួនសារជាថ្មីម្ដងទៀតនៅក្នុងវិស័យ ស្ថាបត្យកម្ម និងសំណង់របស់ប្រទេសកម្ពុជា។ ក្រុមហ៊ុន The Room Design Studio ដែលត្រូវបានគែស្គាល់ថាជាក្រុមហ៊ុនស្ថាបត្យកម្ម និងរចនាផ្នែកខាងក្នុង ដែលនាំយកនូវគំនិតនៃការរចនាម៉ូដឈានមុខគេនិងលក្ខណៈទំនើបមកប្រទេសកម្ពុជា។

លោកសាស្រ្តាចារ្យទួស សាភឿនស្ថាបត្យករអាស៊ាន និងជាអគ្គលេខាធិការរងគណៈស្ថាបត្យករកម្ពជា បានមានប្រសាសន៍ថា ការរីកចម្រើននៃសេដ្ឋកិច្ចសង្គម បានផ្លាស់ប្តូរបែបផែននៃការរស់នៅ របស់ប្រជាជនកម្ពុជា ពិសេសការកើនឡើងនូវកំដៅផែនដី ដែលបណ្តាលមកពីការផ្លាស់ប្តូរអាកាសធាតុ បានធ្វើឲ្យស្ថាបត្យករចាប់ផ្តើមគិតគូ ពីលំនៅដ្ឋានបែបបៃតង មានន័យថា សាងសង់លំនៅដ្ឋានផ្សារភ្ជាប់ជាមួយធម្មជាតិ។

លោកបន្តថា “ការសាងសង់លំនៅដ្ឋាននាពេលបច្ចុប្បន្ន ដែលផ្សារភ្ជាប់ជាមួយធម្មជាតិ ជាលំនៅដ្ឋានបែបបៃតង កាត់បន្ថយការប្រើប្រាស់អគ្គិសនី ជាបែបផែននៃស្ថាបត្យកម្មសម័យថ្មី និងជារសនិយមថ្មីមួយ”៕

ក្រសួងពាណិជ្ជកម្មរកឃើញសារធាតុធ្វើឱ្យកើតជំងឺមហារីកក្នុងម្សៅលាបទារកចំនួន១២ប្រភេទនាំចូលពីប្រទេសថៃនិងម៉ាឡេស៊ី

ដោយៈ សុផារី

ភ្នំពេញ: អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ “ក.ប.ប.” នៃក្រសួងពាណិជ្ជកម្ម ការរកឃើញសារធាតុអាបេស្តូស នៅក្នុងផលិតផលម្សៅលាបទារកនិងកុមារ (Baby Talcum Powders) ចំនួន១២ប្រភេទ ដែលជាផលិតផលនាំចូលមកពីប្រទេសថៃ និងម៉ាឡេស៊ី។

សារធាតុអាសបេស្តុស មិនត្រូវអនុញ្ញាតឱ្យមានវត្តមាន នៅក្នុងផលិតផល គ្រឿងសម្អាងទេ។ វត្តមាននៃសារធាតុនេះ អាចនឹងបង្កគ្រោះថ្នាក់ខ្លាំងដល់សុខភាពមនុស្ស ជាពិសេសអាច បណ្តាលឱ្យកើតជំងឺមហារីក។

ក.ប.ប បានឱ្យដឹង តាមរយៈសេចក្ដីប្រកាសព័ត៌មានផ្លូវការ នៅថ្ងៃទី២៣ ខែសីហានេះថា ក្នុងគោលបំណង ការពារសុខុមាលភាព និងផលប្រយោជន៍អ្នកប្រើប្រាស់ ពិសេសទារកនិងកុមារ អគ្គនាយកដ្ឋាន ក.ប.ប. បានអនុវត្តការងារចុះយកសំណាកគំរូ និងធ្វើតេស្តវិភាគលើផលិតផលម្សៅលាបទារកនិងកុមារ (Baby Talcum Powders) មួយចំនួនដើម្បីវិភាគរកសារធាតុអាសបេស្តុស (Asbestos) ដែលជាសារធាតុបង្ក គ្រោះថ្នាក់ដល់សុខភាពអ្នកប្រើប្រាស់។

យោងលទ្ធផលវិភាគរបស់មន្ទីរពិសោធន៍ បានបង្ហាញឱ្យឃើញថាសំណាកគំរូផលិតផលម្សៅលាបទារក និងកុមារមួយចំនួនមានវត្តមាន សារធាតុអាបេស្តុស (ដូចមានក្នុងតារាងឧបសម្ព័ន្ធ)។

ដើម្បីការពារសុខភាពអ្នកប្រើប្រាស់ ជាពិសេសទារកនិងកុមារ អគ្គនាយកដ្ឋាន ក.ប.ប. សូមដាក់ចេញ នូវវិធានការបណ្ដោះអាសន្នមួយចំនួន ដូចជា ទី១. ក្រុមហ៊ុននាំចូល និងចែកចាយផលិតផលម្សៅលាបទារក និងកុមារ ដូចមានក្នុងតារាងឧបសម្ព័ន្ធ នៃសេចក្តីជូនដំណឹងនេះត្រូវ ផ្អាកជាបណ្តោះអាសន្នការនាំចូល និងចែកចាយរាល់ផលិតផល ដែលមានក្នុងតារាងឧបសម្ព័ន្ធ មកក្នុងព្រះរាជាណាចក្រកម្ពុជា ប្រមូលពីទីផ្សារនូវផលិតផលម្សៅលាបទារកនិងកុមារ និងរាយការណ៍មកអគ្គនាយកដ្ឋានក.ប.ប. អំពីបរិមាណផលិតផលដែលប្រមូល។

២. អគ្គនាយកដ្ឋាន ក.ប.ប. ទុករយៈពេល ២(ពីរ)សប្តាហ៍គិតចាប់ពីថ្ងៃទី២២ ខែសីហា ឆ្នាំ២០២២ ដល់ថ្ងៃទី៥ ខែកញ្ញា ឆ្នាំ២០២២ ដើម្បីឱ្យក្រុមហ៊ុនសហការជាមួយ អគ្គនាយកដ្ឋាន ក.ប.ប. ក្នុងការនាំយកនូវសំណាកនៃផលិតផល ដែលត្រូវបានរកឃើញថា មានសារធាតុអាសបេស្តុសទៅអន្តរជាតិ។

៣. ក្រុមហ៊ុនត្រូវបន្តកិច្ចសហការជាមួយរោងចក្រផលិត និងសមត្ថកិច្ច ក.ប.ប. ដោយឈរលើ គោលការណ៍តម្លាភាព និងគាំទ្រដោយមូលដ្ឋានវិទ្យាសាស្ត្រ ដើម្បីធានាថារាល់ផលិតផលម្សៅ លាបទារក និងកុមារ ដែលត្រូវបានចែកចាយ និងដាក់លក់នៅលើទីផ្សារ មិនត្រូវមានសារធាតុ អាបេស្តុសឡើយ។

៤. អគ្គនាយកដ្ឋាន ក.ប.ប. នឹងជូនដំណឹងអំពីព័ត៌មានលម្អិត និងវិធានការបន្ថែមទៀត នៅពេលដែលទទួលបានលទ្ធផលវិភាគ ពីមន្ទីរពិសោធន៍ភាគីទី៣ ប្រកបដោយស្មារតីទទួលខុសត្រូវ និងមានតម្លាភាព៕

អន្ទាក់ការប្រាក់ វិបត្តិចំណូលធ្វើឲ្យប្រជាពលរដ្ឋទិញលំនៅដ្ឋានមួយចំនួនរងទឹកភ្នែក

ដោយៈ គង់ សូរិយា

ភ្នំពេញៈ ក្តីស្រម័យដ៏ត្រចះត្រចង់មួយបានរលាយបាត់ ហើយជំនួសមកវិញដោយទឹកភ្នែក បន្ទាប់ពីពួកគេបានបាត់បង់ទាំងចំណូល និងបាត់បង់ទាំងប្រាក់បង់ប្រចាំខែ នៅពេលផ្ទះរបស់ពួកគេត្រូវបានរឹបអូស ដោយម្ចាស់បុរីមួយចំនួន។

និន្នាការទិញលំនៅដ្ឋាន ដោយគ្មានប្រាក់កក់បានចាប់ផ្តើមពេញនិយមនៅក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែជាមួយនឹងលក្ខខ័ណ្ឌដែលមានសភាពជាអន្ទាក់បំណុលនេះ បានធ្វើឲ្យមនុស្សជាច្រើនរងការឈឺចាប់ មិនហ៊ានបញ្ចេញព៌តមានឲ្យគេដឹង “ដោយសារខ្មាស់គេ” នៅពេលផ្ទះរបស់ពួកគេត្រូវបានរឹបអូស។

អ្នកជំនាញអចលនទ្រព្យម្នាក់បាននិយាយ ក្នុងលក្ខខ័ណ្ឌមិនបញ្ចេញឈ្មោះថា គាត់មានបុគ្គលិកម្នាក់ ទិញផ្ទះវីឡាភ្លោះនៅបុរីមួយស្ថិតនៅស្របតាមបណ្តោយផ្លួវជាតិលេខ៦អា ដោយមួយខែគាត់ត្រូវបង់ប្រាក់៣០០០ដុល្លារជាង ប៉ុន្តែពេលនេះគ្រួសាររបស់គាត់បានរងវិបត្តិ នៅទីបំផុតប្រាក់ដែលគាត់បង់ ក្នុងរយៈពេលជាង៣ឆ្នាំបានបញ្ចប់ ជាមួយនឹងផ្ទះត្រូវបានម្ចាស់បុរីរឹបអូស ហើយលុយដែលបានបង់ត្រូវដាច់។

អ្នកជំនាញដដែលបានសំណូមពរ ឲ្យគេហទំព័រPropertyarea.asia សរសរពីរឿងនេះ ដើម្បីទុកជាបទពិសោធន៍ដល់ប្រជាជនផង និងឲ្យមន្រ្តី រដ្ឋាភិបាលពិចារណាលើរឿងនេះផង ដើម្បីស្វែងរកដំណោះស្រាយតាមដែលអាចធ្វើទៅបាន។

គាត់បន្តទៀតថា “ខ្ញុំពិតជាអាណិតគាត់ ប៉ុន្តែមិនអាចជួយគាត់បាន ដោយសារប្រាក់គាត់ត្រូវបង់ មានរយៈពេលវែង និងមានចំនួនច្រើន”។

ទាក់ទងបញ្ហានេះ រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ លោកវង្ស៊ី វិស្សុតធ្លាប់បានលើកឡើងជាច្រើនឆ្នាំមកហើយ ដើម្បីឲ្យមានការយកចិត្តទុកដាក់លើបញ្ហានេះ ប៉ុន្តែរហូតមកទល់ពេលនេះ មិនទាន់ឃើញដំណោះស្រាយណាមួយ កើតមាននោះទេ។

អ្នកជំនាញអចលនទ្រព្យដដែលបានបន្តថា បញ្ហានេះបានកើតមានច្រើនណាស់ ព្រោះអ្នកស្រីបានជួបនិងធ្វើការពាក់ព័ន្ឋ ជាមួយវិស័យនេះជាច្រើនឆ្នាំមកនេះ ពិសេសក្នុងអំឡុងវិបត្តិកូវីដ១៩ រយៈពេលជិត៣ឆ្នាំមកនេះ មានប្រជាពលរដ្ឋជាច្រើន បានរងគ្រោះដោយសារបញ្ហានេះ នៅពេលប្រាក់ចំណូលរបស់ពួកគេមានបញ្ហា លំហូរសាច់ប្រាក់ត្រូវដាច់ និងសកម្មភាពអាជីវកម្មមួយចំនួនត្រូវបានផ្អាក។

ទោះជាយ៉ាងណា អ្នកជំនាញអចលនទ្រព្យ និងហិរញ្ញវត្ថុធ្លាប់បានលើកឡើងជារឿយៗផងដែរថា អ្នកទិញលំនៅដ្ឋានគួរពិចារណា ទៅលើលំហូរសាច់ប្រាក់របស់ខ្លួន និងគួរប្រើប្រាស់ឥណទានពីធនាគារពាណិជ្ជនានា ដែលមានអត្រាការប្រាក់ទាប ធៀបជាមួយអត្រាការប្រាក់ត្រូវបង់នៅតាមបុរីនានា។

ប៉ុន្តែយ៉ាងណាក៏ដោយ ប្រជាពលរដ្ឋមួយចំនួនគិតថា ការទិញផ្ទះបង់រំលស់សុទ្ឋ មានភាពប្រសើរជាងការជួលផ្ទះរបស់គេ ព្រោះពួកគេជួល១០ទៅ២០ឆ្នាំក៏នៅតែជាផ្ទះរបស់គេ ប៉ុន្តែបើសន្សំលុយបង់លំនៅដ្ឋាននៅតាមបុរីនានា ដោយមិនចាំបាច់បង់ប្រាក់កក់ នឹងជួយឲ្យពួកគេមានផ្ទះសម្រាប់ខ្លួនឯងនាពេលអនាគត ដោយពួកគេខសុខចិត្តរងភាពលំបាក។

អ្វីៗមិនប្រាកដថា នឹងរលូនទាំងអស់ដូចការគិតរបស់ពលរដ្ឋមួយចំនួននោះទេ ព្រោះនៅពេលវិបត្តិលំហូរសាច់ប្រាក់កើតឡើង ដោយសារបញ្ហាអ្វីមួយដូចជាវិបត្តិសេដ្ឋកិច្ច វិបត្តិជំងឺឆ្លងសកល នឹងធ្វើឲ្យក្រុមប្រជាពលរដ្ឋងាយរងគ្រោះ នឹងជួបគ្រោះលឿនជាងគេ។

ហេតុនេះ ការយោគយល់ពីម្ចាស់បុរី និងការរៀបចំគោលនយោបាយ ឲ្យមានភាពរ៉ឹងមាំពីស្ថាប័នពាក់ព័ន្ឋ ដើម្បីជួយលើកកំពស់សំណាញ់សុវត្ថិភាពសង្គម និងលើកកំពស់សុខមាលភាពជាតិ នឹងកាត់បន្ថយបាននូវភាពងាយរងគ្រោះរបស់ប្រជាពលរដ្ឋ និងអាចការពារពួកគេពីហានិភ័យទាំងឡាយបាន៕

កត្តាចំនួនពីរធ្វើឱ្យអចលនទ្រព្យអេកូទេសចរណ៍ខេត្តមណ្ឌលគិរីងើបឡើងវិញយឺត

ដោយៈ សុផារី

មណ្ឌលគិរីៈ ខេត្តមណ្ឌលគិរី ជាទីតាំងគោលដៅទេសចរណ៍គោលដៅមួយ ក្នុងចំណោមតំបន់ទេសចរណ៍នានានៅក្នុងប្រទេស ដែលមានភាពនិយម ក្នុងការវិនិយោគបង្កើតជាតំបន់អេកូទេសចរណ៍។

នៅក្នុងកំឡុងរដូវវស្សា នៃឆ្នាំ២០២២នេះ អចលនទ្រព្យប្រភេទអេកូទេសចរណ៍ នៅក្នុងខេត្តមណ្ឌលគិរី ហាក់មិនទាន់ងើបឡើងវិញច្រើនឡើយ ដោយសារបញ្ហាសេដ្ឋកិច្ច និងអាកាសធាតុ។

លោកមាឃ រិទ្ធីជ័យ ប្រធានសាខាក្រុមហ៊ុន Century 21 Zillion Holding ប្រចាំខេត្តមណ្ឌលគិរី បានមានប្រសាសន៍ប្រាប់តាមប្រព័ន្ធតេឡេក្រាម នៅថ្ងៃទី២៣ ខែសីហានេះថា ដោយសារកត្តាអាកាសធាតុ និងកត្តាសេដ្ឋកិច្ចនៅក្នុងមូលដ្ឋាន បានធ្វើឱ្យចរន្តនៃការទិញលក់ដីធ្លី ប្រភេទលំហែកាយមានការថមថយចុះ និងនៅមិនមានសន្ទុះឡើងវិញនៅឡើយទេ។

លោកបញ្ជាក់ថា “តំបន់ដែលមានសក្តានុពលខ្ពស់ជាងគេ លើការវិនិយោគអចលនទ្រព្យប្រភេទអេកូទេសចរណ៍ មាននៅក្នុងតំបន់ដាក់ដាំ ជាដើម។ យ៉ាងណាក្តី បច្ចុប្បន្ននេះមិនសូវមានសន្ទុះ ក្នុងការដោះដូរដីធ្លីច្រើននោះទេ”។

ជាមួយគ្នានេះ លោក ដារ៉ា អ្នកជំនាញអចលនទ្រព្យមូលដ្ឋានមួយរូបនៅក្នុងខេត្តមណ្ឌលគិរី បានមានប្រសាសន៍ប្រាប់ តាមប្រព័ន្ធតេឡេក្រាម នៅថ្ងៃទី២៣ ខែសីហានេះថា បច្ចុប្បន្ន អចលនទ្រព្យប្រភេទអេកូទេសចរណ៍ចាប់ផ្តើមមានសន្ទុះបណ្តើរៗ តែវាមិនទាន់មានសន្ទុះខ្លាំងឡើងវិញនៅឡើយទេ។

លោកដារ៉ា បានបញ្ជាក់ថា “បច្ចុប្បន្នរាល់ថ្ងៃនេះ វាចាប់ផ្តើមមានសន្ទុះមួយៗ វាទើបចាប់ផ្តើមឡើងវិញ ដោយសង្កេតឃើញការទិញលក់ដីធ្លីប្រភេទចំការ ប្រភេទលំហែរចាប់ផ្តើមបណ្តើរៗ ឡើងវិញហើយ តែវាមិនទាន់ផ្ទុះឡើងវិញ”។

បើយោងតាមលោកដារ៉ា តំបន់ពេញនិយម និងមានសក្តានុពលទេសចរណ៍ខ្ពស់ ហើយវាទាក់ទងការវិនិយោគអចលនទ្រព្យ មាននៅក្នុងស្រុកអូររាំង ដែលជាទីតាំងប្រមូលផ្ដុំតំបន់ទេសចរណ៍ រីសត ថែមទាំងមានទីតាំងនៅជិតព្រលានយន្តហោះផងដែរ។ ក្រៅពីស្រុកអូររាំង នៅក្រុងសែនមនោរម្យ សង្កាត់រមនា ជាទីតាំងសម្បូរដោយរីសតច្រើន ហើយជាតំបន់ដែលមានតម្លៃដីធ្លីខ្ពស់ជាងគេបង្អស់។

ជាមួយគ្នានេះ គំរោងសាងសង់ព្រលានយន្តហោះខេត្តមណ្ឌលគិរីក៏បានជាប់គាំងផងដែរ ដោយសារក្រុមហ៊ុនChina Power ដែលគ្រោងវិនិយោគសាងសង់ព្រលានយន្តហោះ លំដាប់អន្តរជាតិជាលើកដំបូង នៅភូមិភាគឦសាន្តនេះបានដកខ្លួនចេញ។ នេះបើតាមការបញ្ជាក់ឲ្យដឹងពីមន្រ្តីជាន់ខ្ពស់នៃរដ្ឋលេខាធិការដ្ឋានអាកាសចរណ៍ស៊ីវិល៕

ដំណើរឆ្ពោះទៅស៊ីហ្គេមៈកម្ពុជាទទួលបានជោគជ័យលើការចេញវិញ្ញាសារប្រកួត និងលក់សិទ្ឋផ្សាយបន្តផ្ទាល់

ដោយៈ ជេស៊ីកា

ភ្នំពេញៈ វានឹងជាព្រឹត្តិការណ៍ដ៏គួរឲ្យរំភើបមួយសំរាប់កម្ពុជា នៅពេលប្រទេសនេះបានទទួលសិទ្ឋ ធ្វើជាម្ចាស់ផ្ទះរៀបចំកីឡាស៊ីហ្គេមនាឆ្នាំ២០២៣ខាងមុខ។

មន្រ្តីជំនាញរបស់គណៈកម្មាធិការជាតិ រៀបចំការប្រកួតកីឡា ស៊ីហ្គេម លើកទី៣២ ឆ្នាំ ២០២៣ (CAMSOC) លោក វ៉ាត់ ចំរើន បានអះអាងថា កម្ពុជា ទទួលបានជោគជ័យបន្ថែមទៀត ទៅលើការកំណត់វិញ្ញាសារ ដែលត្រូវបានដាក់ឱ្យប្រកួតក្នុងស៊ីហ្គេមឆ្នាំ២០២៣ ហើយការលក់សិទ្ធិទូរទស្សន៍ ក៏កម្ពុជាទទួលបានការគាំទ្របន្ថែម ពីតំណាងប្រទេសទាំងអស់នៅអាស៊ានផងដែរ។

ជាប្រធានប្រតិភូកម្ពុជា ដែលបានទៅចូលរួមក្នុងកិច្ចប្រជុំក្របខ័ណ្ឌលេខាធិការដ្ឋាននៃសហព័ន្ធកីឡាអាស៊ីអាគ្នេយ៍ នៅទីក្រុងបាងកក ប្រទេសថៃ កាលពីសប្តាហ៍មុន លោក វ៉ាត់ ចំរើន បានថ្លែងថា យើងបានបង្ហាញទៅគ្រប់ប្រទេស អំពីការត្រៀមប្រភេទវិញ្ញាសាជាង៦០០ ហើយក្នុងវិញ្ញាសាទាំងអស់ហ្នឹង មានការជជែកវែកញែកគ្នា ដោយវិញ្ញាសាភាគច្រើន បានទទួលការគាំទ្រពីបណ្ដាប្រទេសទាំងអស់ គឺនៅមានវិញ្ញាសាតិចតួចទេ ដែលគេស្នើសុំឱ្យយើងមានការពិចារណាឡើងវិញ។

លោក វ៉ាត់ ចំរើន បានបន្ថែមថា “ក្នុងនាមជាម្ចាស់ផ្ទះ យើងបានយកសំណូមពររបស់គេ មកធ្វើការជាមួយសហព័ន្ធកីឡាជាតិ មួយចំនួនរបស់យើងឡើងវិញ”។ លោកបន្តថា “នេះជាអ្វីដែលយើងបានខិតខំប្រឹងប្រែង ដើម្បីធ្វើការតស៊ូមតិបន្ដ តែវឌ្ឍនភាពរបស់យើង បានដើរទៅមុខយ៉ាងរលូន ព្រោះយើងបានសុំឱ្យប្រទេសទាំងអស់ គាំទ្រកម្ពុជានិងជួយកម្ពុជា ឱ្យធ្វើការប្រកួតទទួលបានជោគជ័យ”។

ប្រទេសទាំងអស់ បានសន្យានឹងជួយដល់កម្ពុជា ដែលខិតខំប្រឹងប្រែង ក្នុងការធ្វើម្ចាស់ផ្ទះស៊ីហ្គេម លើកដំបូងនេះ ឱ្យបានជោគជ័យ។

សម្រាប់វិញ្ញាសាជាង ៦០០ ដែលបានកំណត់នេះ គឺផ្តោតការប្រកួតប្រជែងនៅលើប្រភេទវិញ្ញាសាចំនួន៣៩ និងកីឡាសម្ដែង១ប្រភេទ ដែលត្រូវបានសម្រេចដាក់ក្នុងស៊ីហ្គេម ឆ្នាំ ២០២៣។

នៅក្នុងកិច្ចប្រជុំក្របខ័ណ្ឌលេខាធិការដ្ឋាន នៃសហព័ន្ធកីឡាស៊ីហ្គេម អង្គប្រជុំរបស់អាស៊ាន ក៏បានពិភាក្សាបន្ថែមលើការរៀបចំ ឱ្យមានការលក់សិទ្ធិទូរទស្សន៍ ក្រោមគំនិតផ្ដួចផ្ដើមដំបូងគេរបស់កម្ពុជានៅស៊ីហ្គេម ឆ្នាំ ២០២៣ ហើយគំនិតនេះ ទទួលបានការគាំទ្រពីប្រទេសជាសមាជិក ដោយគេបានចាត់ទុកថា “ជារបត់ថ្មី ដើម្បីជាគំរូសម្រាប់ស៊ីហ្គេម ជាបន្តបន្ទាប់ទៀត”។

លោកវ៉ាត់ ចំរើន បានបញ្ជាក់ថា ការរៀបចំឱ្យមានការលក់សិទ្ធិទូរទ ស្សន៍នេះ ត្រូវបានប្រទេសទាំងអស់ចាត់ទុកថា ជារបត់នៃការផ្លាស់ប្ដូរមួយដ៏សំខាន់ ក្នុងប្រវត្តិសាស្ត្ររបស់ស៊ីហ្គេម ព្រោះមានតែកម្ពុជាទេ ដែលអាចធ្វើជាគំរូ ក្នុងការលក់សិទ្ធិទូរទស្សន៍នេះ ដើម្បីឱ្យស៊ីហ្គេមបន្ដៗទៀត យកជាមេរៀន បទពិសោធន៍ ទាំងការផលិតឱ្យមានគុណភាព និងការផ្ដល់នូវតម្លាភាព ក្នុងការចែករំលែកភាគលាភ នៃការលក់សិទ្ធិទូរទស្សន៍ ចំពោះស៊ីហ្គេមនៅកម្ពុជានេះ៕

លោកហ៊ុន ម៉ានីៈសក្តានុពលធំជាងគេរបស់កម្ពុជាគឺប្រជាជនវ័យក្មេង

ដោយៈ គង់ សូរិយា

ព្រែវែងៈ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក)បានថ្លែងថា សក្តានុពលធំជាងគេរបស់កម្ពុជា គឺប្រជាជនរបស់កម្ពុជា ជាពិសេសទៅទៀតនោះ គឺប្រជាជនវ័យក្មេង។

លោកហ៊ុន ម៉ានីបានមានប្រសាសន៍បែបនេះ ក្នុងពិធីសំណេះសំណាលជាមួយថ្នាក់ដឹកនាំ សមាជិក-សមាជិកា ក្នុងរចនាសម្ព័ន្ធ ស.ស.យ.ក. ប្រចាំសាកលវិទ្យាល័យជា ស៊ីម កំចាយមារ ខេត្តព្រៃវែងនាព្រឹកថ្ងៃទី២៣ សីហានេះ។

លោកបានបន្តទៀតថា មនុស្សម្នាក់ៗត្រូវតែប្រឹងប្រែងដោយខ្លួនឯង ដើម្បីឆ្ពោះទៅមុខ និងត្រូវឆ្លៀតឱកាសរៀនសូត្រឲ្យបានច្រើន ទើបអាចអភិវឌ្ឍន៍ខ្លួនបានលឿន ដើម្បីសម្រេចគោលដៅខ្លួនឯង គ្រួសារ និងសង្គមជាតិ។

ទន្ទឹមនឹងនោះ លោកបានរំលឹកនូវគោលការណ៍រៀនសូត្របី ផ្នែកសំខាន់ ដើម្បីទទួលបានជោគជ័យ ដោយទី១ គឺការរៀនសូត្រតាមរយៈទ្រឹស្តី និងមេរៀនក្នុងថ្នាក់ ដែលមនុស្សគ្រប់គ្នា តែងតែទទួលបានពីការសិក្សាតាមសាលា ទី២ គឺការរៀនសូត្រ តាមរយៈការសង្កេតមើលអ្នកដែលជោគជ័យ ដើម្បីឲ្យយើងស្វែងយល់ និងអភិវឌ្ឍខ្លួនឯងតាមទម្លាប់ និងសកម្មភាពល្អៗ ដែលបុគ្គលជោគជ័យបានអនុវត្ត និងទី៣ គឺការរៀនសូត្រតាមរយៈបទពិសោធន៍ ដោយឲ្យការងារបង្រៀនយើង ដើម្បីទទួលបានឱកាសរៀនសូត្របន្ថែមទៀត ក្នុងការអភិវឌ្ឍខ្លួនតទៅមុខ។

នៅក្នុងវគ្គសំណួរចម្លើយ មាននិស្សិតមួយរូបបានចោទជាសំនួរទៅកាន់ លោក ហ៊ុន ម៉ានី ថា តើយុវជនកម្ពុជា ត្រូវត្រៀមខ្លួនយ៉ាងដូចម្តេចខ្លះដើម្បីក្លាយជាយុវជនបន្តវេន? លោកបានឆ្លើយតបដោយលើកយកចំណុច៣សំខាន់ៗ មកធ្វើការបកស្រាយយ៉ាងខ្លីប៉ុន្តែខ្លឹម ក្នុងនោះលោកបានបញ្ចាក់ថា ដើម្បីត្រៀមខ្លួនឲ្យក្លាយជាអ្នកបន្តវេន សម្រាប់ប្រទេសជាតិ គឺយុវជនចាំបាច់ត្រូវយល់ដឹងអំពី ភូមិសាស្រ្ត ប្រជាសាស្រ្ត និងបរិបទ។

បន្ទាប់ពីការបង្កើតក្រុមការងារយុវជន ស.ស.យ.ក. ប្រចាំសាកលវិទ្យាល័យជាស៊ីម កំចាយមារ កាលពីឆ្នាំ២០២១កន្លងមក នេះជាការជួបជុំ លើកទី១ រវាងលោក ហ៊ុន ម៉ានី និងសមាជិក សមាជិកា ស.ស.យ.ក ប្រចាំសាកលវិទ្យាល័យជាស៊ីម កំចាយមារ ក្នុងឯកសណ្ឋានតែមួយ ដើម្បីរួមគ្នា សម្រេចនូវបេសកម្ម និងបុព្វហេតុ ស.ស.យ.ក. ក៏ដូចជា ស.ស.យ.ក ប្រចាំសាកលវិទ្យាល័យជា ស៊ីម កំចាយមារផងដែរ៕

Philippine province to award $10.9 billion airport project to consortium

MANILA : A Philippine province is set to award a $10.9 billion airport project south of the capital Manila to a consortium led by Filipino tycoons, the provincial government said on Tuesday.

The SPIA Development Consortium is composed of Philippine firms Cavitex Holdings, House of Investments, MacroAsia, and partners Munich Airport International Airport and South Korea’s Samsung C&T Corp.

No challengers or prospective bidders purchased documents to bid for the Sangley airport, the Cavite provincial government said in a document of notice to the consortium. Tentative awarding is set for Sept. 14.

Holding firm House of Investments has been made aware of the impending formal award and is ready to proceed with the project, company CEO Lorenzo Tan told Reuters.

The Sangley project is one of two planned multi-billion dollar airports intended to take pressure off Manila’s ageing and congested airport. The second, north of the capital, is under construction.

In January 2021, Cavite cancelled its decision to award the airport project to a consortium of state-owned China Communications Construction Co and MacroAsia over insufficient documentation.

1...1,2861,2871,288...3,262 Page 1,287 of 3,262