ដោយៈ វឌ្ឍនៈ

ភ្នំពេញៈ នៅក្នុងឆ្នាំ២០២២នេះ អ្នកជំនាញជាច្រើនបានរំពឹងទុកថាសកម្មភាពនៃការទិញលក់ដីធ្លី នឹងចាប់ផ្ដើមកក្រើកឡើងវិញ ដោយសារតែសញ្ញាវិជ្ជមាន នៃស្ថានភាពកូវីដ១៩ នៅក្នុងប្រទេសចាប់ផ្ដើមប្រសើរឡើងវិញជាបន្តបន្ទាប់។

ប៉ុន្តែអ្វីៗមិនទាន់មានសភាពរលូននៅឡើយទេ ដោយនៅតាមបណ្ដាខេត្តមួយចំនួន សំបូរទៅដោយអ្នកលក់ដី តែមិនសូវមានអ្នកស្វែងរកទិញដីនោះទេ។

លោកមាឃ រឹទ្ធីជ័យ ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តមណ្ឌលគីរីបានឱ្យដឹងកាលពី​ចុង​សប្តាហ៍មុនថា កាលពីមុននៅក្នុងខេត្តមណ្ឌលគីរី មានអ្នកស្វែងរកទិញដីច្រើន ដែលធ្វើឱ្យតម្លៃដីធ្លីបានហក់ឡើងជាបន្តបន្ទាប់ ទោះបីជាស្ថិតនៅក្នុងវិបត្តិកូវីដ១៩ក្ដី ប៉ុន្តែចូលដល់ឆ្នាំ២០២២ សកម្មភាពនៃការទិញលក់ដីធ្លីមិនសូវមានទេ នៅក្នុងខេត្តមួយនេះ ។

លោកបន្តថា “បច្ចុប្បន្ននេះ នៅក្នុងខេត្តមណ្ឌលគីរី សំបូរទៅដោយអ្នកលក់ដី ដោយឃើញដីជាច្រើនបានដាក់ផ្លាកលក់ មិនថាដីនៅក្នុងក្រុង ឬដីនៅតាមស្រុកឡើយ”។លោកបន្តថា “សម្បូរអ្នកលក់ ប៉ុន្តែសម្រាប់អ្នកទិញវិញមិនសូវមានច្រើនទេ ដូច្នេះហើយទើបធ្វើឱ្យចរន្ត នៃការដោះដូរដីនៅក្នុងខេត្តមណ្ឌលគីរីមានតិចតួច”។

លោកមាឃ រឹទ្ធីជ័យបានបន្តថា ថ្វីត្បិតតែ មានអ្នកលក់ដីច្រើនជាងអ្នកទិញបែបនេះក្ដី តែមិនបានធ្វើឱ្យតម្លៃដីធ្លីនៅក្នុងខេត្តនេះ ធ្លាក់ចុះនោះឡើយ តម្លៃនៅតែរក្សាស្ថិរភាពដដែល គ្រាន់តែមិនមានការព្រមព្រៀងឬដោះដូរ។
លោកបន្តថា ពីមុនមានអ្នកវិនិយោគ មកពីខេត្តផ្សេងទៀតស្វែងរកទិញដីនៅមណ្ឌលគីរីច្រើនណាស់។ ខ្លះទិញសម្រាប់អភិវឌ្ឍន៍ជារីសត ផ្ទះសំណាក់ ឬបង្កើតជារមណីយដ្ឋាននានា ដូចជាមកពីខេត្តសៀមរាប បាត់ដំបង ពីភ្នំពេញ ក្រុងព្រះសីហនុជាដើម តែក្រោយមកក៏ស្ងាត់ទៅវិញ ។

សម្រាប់ពេលនេះ បើសិនជាវិនិយោគិនមានទុនគ្រប់គ្រាន់ ក្នុងការបណ្ដាក់ទុនវិនិយោគលើដីធ្លី អាចមានឱកាសក្នុងការរកប្រាក់ចំណេញនៅពេលអនាគត និងអាចជ្រើសរើសទីតាំង ដែលមានសក្ដានុពលបានផងដែរ ។

នៅពេលមានការប្រកាសលក់ច្រើនដូចពេលនេះ អ្នកទិញអាចមានឥទ្ធិពលក្នុងការចរចាជាមួយអ្នកលក់ ។

ភ្នាក់ងារអចលនទ្រព្យប្រចាំខេត្តឧត្តរមានជ័យលោក រ៉ៃ ឬទ្ធី ក៏បានឱ្យដឹងផងដែរថា បច្ចុប្បន្ននេះ បើអ្នកមានលុយក្នុងការប្រមូលទិញដី នៅក្នុងខេត្តឧត្តរមានជ័យ នឹងក្លាយជាអ្នកមាននៅពេលអនាគត ពីព្រោះថាឧត្តរមានជ័យ ជាខេត្តជាប់ព្រំដែនថៃ ហើយវានឹងមានសក្ដានុពល កាន់តែខ្លាំងនៅពេលរដ្ឋាភិបាលអភិវឌ្ឍន៍ច្រកព្រំដែនអន្តរជាតិបន្ថែម។

ភ្នាក់ងាររូបនេះបានឱ្យដឹងថា តម្លៃដីធ្លីនៅក្នុងខេត្តឧត្តរមានជ័យនាពេលនេះ នៅមានកម្រិតតិចតួចនៅឡើយតែនៅពេលអនាគត តម្លៃដីធ្លីនឹងមានសន្ទុះ ។ ដោយឃើញបែបនេះ អ្នកមានលុយក្នុងខេត្តផ្ទាល់បានប្រមូលទិញទុកយកចំណេញ ឬអាចទុកអភិវឌ្ឍន៍ដោយខ្លួនឯងនៅពេលខាងមុខ ។

លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ KFA ក៏បានផ្ដល់ជាយោបល់ថា ដីធ្លីនៅតែមានឱកាស ក្នុងការរកប្រាក់ចំណេញនៅពេលអនាគត ។ ក្នុងស្ថានភាពបែបនេះ អ្នកមានចំណូលល្មមៗ មិនគួរវិនិយោគទៅលើផ្ទះខុនដូនោះទេ តែអាចទិញដីតម្លៃសមរម្យ ទុកយកចំណេញនៅពេលខាងមុខបាន៕

ដោយ៖ លាងហួរ

ប៉េកាំង៖ ប្រទេសចិនបានបង្កើនការវិនិយោគលើផ្លូវថ្នល់ និងហេដ្ឋារចនាសម្ព័ន្ធដឹកជញ្ជូនផ្សេងទៀត នៅតំបន់ជនបទ ក្នុងឆមាសទីមួយនៃឆ្នាំ២០២២ ដែលជាផ្នែកនៃកិច្ចខិតខំប្រឹងប្រែង ដើម្បីអភិវឌ្ឍតំបន់ជនបទ។

លោក Gu zhifeng មន្ត្រីក្រសួងដឹកជញ្ជូន បានប្រាប់សន្និសីទកាសែតកាលពីថ្ងៃព្រហស្បតិ៍ថា ប្រទេសចិនបានបញ្ចប់ការវិនិយោគទ្រព្យសកម្មថេរ ដែលមានតម្លៃ១៨៣,៥ពាន់លានយ័ន (ប្រហែល២៧,២៤ពាន់លានដុល្លារអាមេរិក) នៅផ្លូវជនបទ ក្នុងអំឡុងខែមករាដល់ខែមិថុនា កើនឡើង១៥,៩ភាគរយ ធៀបនឹងឆ្នាំកន្លងទៅ។

ផ្លូវជនបទប្រមាណ៦ម៉ឺនគីឡូម៉ែត្រ និងស្ពានគ្មានសុវត្ថិភាពចំនួន៣២៨៣ត្រូវបានសាងសង់ឡើងវិញ កើនឡើង១៧,៧ភាគរយ និង៩,២ភាគរយរៀងធៀបនឹងឆ្នាំមុន។

យោងតាមលោក Gu zhifeng បានឱ្យដឹងថា គម្រោងសាងសង់ផ្លូវជនបទឡើងវិញបានបង្កើតការងារបណ្តោះអាសន្នដល់ប្រជាជននៅតាមជនបទប្រមាណ៤៩.០០០នាក់។

ប្រជាជននៅតាមជនបទកាន់តែច្រើននឹងទទួលបានអត្ថប្រយោជន៍ពីគម្រោងបែបនេះ ខណៈ ដែលប្រទេសចិនគ្រោងនឹងសាងសង់ឡើងវិញ នូវផ្លូវជនបទប្រវែង១៥ម៉ឺនគីឡូម៉ែត្រ និងស្ពានគ្មានសុវត្ថិភាពចំនួន៨ពាន់ នៅតាមតំបន់ជនបទ នៅឆ្នាំ២០២២នេះ៕

ដោយ សុខុម

សេអ៊ូល: ទីផ្សារអចលនទ្រព្យនៃប្រទេសកូរ៉េខាងត្បូង បានដាំក្បាលចុះខ្លាំង ខណៈវិស័យនេះទទួលរងផលប៉ះពាល់ខ្លាំងពីការដំឡើងអត្រាការប្រាក់ក្នុងល្បឿនលឿនបំផុតមិនធ្លាប់មាន ហើយស្ថានភាពនេះបានដាក់សម្ពាធកាន់តែខ្លាំងលើពលរដ្ឋមួយកូរ៉េ ដែលស្ថិតក្នុងចំណោមអតិថិជនប្រើប្រាស់ដែលជំពាក់បំណុលច្រើនបំផុតក្នុងពិភពលោក។

យោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី២៩ ខែកក្កដា ឱ្យដឹងថា តម្លៃអាផាតម៉ិននៅទីក្រុងសេអ៊ូល កាលពីសប្តាហ៍មុនបានធ្លាក់ចុះខ្លាំងបំផុតមិនធ្លាប់មានក្នុងរយៈពេល២៦ខែមកនេះ ខណៈចំនួនប្រតិបត្តិការទិញលក់ក្នុងរដ្ឋធានីបានធ្លាក់ចុះរហូតដល់ទៅ៧៣%ក្នុងខែមិថុនា បើធៀបទៅនឹងឆ្នាំមុន។

បំណុលរហូតដល់ទៅ១,៩៧ទ្រីលានដុល្លារអាមេរិក ទាក់ទិននឹងទីផ្សារអចលនទ្រព្យនេះប្រឈមនឹងតេស្តសាកល្បងដ៏សំខាន់មួយ ខណៈអត្រាការប្រាក់កើនឡើងខ្ពស់ ដោយការកើនឡើងខ្ពស់នូវចំនួនទឹកប្រាក់ទូទាត់កម្ចីទិញផ្ទះទំនងជាបានធ្វើឱ្យតម្រូវការអចលនទ្រព្យធ្លាក់ចុះ។

ដោយជិត៣ភាគ៤នៃទ្រព្យសម្បត្តិគ្រួសារពលរដ្ឋកូរ៉េខាងត្បូង ជាប់ទាក់ទិននឹងអចលនទ្រព្យ ក្រុមអ្នកបង្កើតគោលនយោបាយព្រួយបារម្ភថា ការកើនឡើងកាន់តែខ្ពស់នូវអត្រាការប្រាក់លើកម្ចីទិញផ្ទះអាចធ្វើឱ្យការខកខានទូទាត់បំណុលកើនឡើង ហើយធ្វើឱ្យសេដ្ឋកិច្ចនេះកាន់តែឈានជិតទៅរកវិបត្តិហិរញ្ញវត្ថុ។

និយ័តករហិរញ្ញវត្ថុរំពឹងថា ចំនួនអ្នកដែលអាចខកខានទូទាត់ប្រាក់កម្ចីរបស់ខ្លួននឹងកើនឡើងពីកន្លះលានដល់១,៩លាននាក់ នៅពេលអត្រាប្រាក់លើកម្ចីទិញផ្ទះជាមធ្យមឈានដល់៧%ពីអត្រា៥-៦%នាពេលបច្ចុប្បន្ន៕

ដោយ៖ វឌ្ឍនៈ

កំពត៖ ក្នុងឆមាសទី១ ឆ្នាំ២០២២នេះ វិស័យសំណង់នៅក្នុងខេត្តកំពតនៅតែទទួលបានការវិនិយោគ ពីសំណាក់វិនិយោគិនជាតិ និងអន្តរជាតិជាបន្តបន្ទាប់។

គិតមកដល់ពេលនេះ ក្នុងខេត្តកំពតទាំងមូលមានអគារសរុបមានចំនួន១៦១គម្រោង ដែលមានផ្ទៃក្រឡាសរុបស្មើនឹង៥២.៦៥៨ម៉ែត្រការ៉េ ក្រោមទុនវិនិយោគជាង១៨លានដុល្លារអាមេរិក។ ក្នុងចំណោមនោះ សំណង់មានលិខិតអនុញ្ញាតសាងសង់ចំនួន១៤២គម្រោង និងគ្មានលិខិតអនុញ្ញាតចំនួន១៩គម្រោង។

លោក ស៊ឹម សុខជា អនុប្រធានមន្ទីរបានបានប្រសាសន៍ថា ខេត្តកំពតនៅមានសំណង់គ្មានលិខិតអនុញ្ញាតិ សរុបចំនួន១៩គម្រោង ដែលមានផ្ទៃក្រឡាសរុបចំនួន៣.២៦០ម៉ែត្រការ៉េ បើគិតជាតម្លៃទុនវិនិយោគប៉ាន់ស្មានស្មើនឹងជិត១លាន២សែនដុល្លារ ក្នុងនោះក្រុងបូកគោមាន១០គម្រោង ស្រុកឈូកមាន៩គម្រោង។

មន្ត្រីជំនាញទទួលបន្ទុកផ្នែកសំណង់រូបនេះ បានបញ្ជាក់ថា តាមការសង្កេតពិនិត្យ ការយល់ដឹងរបស់ប្រជាពលរដ្ឋអំពីសំណង់នៅមានកម្រិត។ សំណង់មួយចំនួននៅតាមបណ្តាក្រុង/ស្រុក នៅតែសាងសង់លើសជាន់ លើសទំហំ ដែលបានចេញលិខិតអនុញ្ញាតដោយរដ្ឋបាលក្រុង/ស្រុក ហើយនៅតាមការដ្ឋានមួយចំនួនតូច មិនបានធ្វើរបាំងសុវត្ថិភាព ឬឧបករណ៍សុវត្ថិភាពដល់កម្មករ និងជាងឡើយ។ ក្រុមជាងសាងសង់មួយចំនួនមិនមានស្ថាបត្យករ ឬវិស្វករប្រចាំការនៅការដ្ឋាន ធ្វើតែតាមម្ចាស់សំណង់បង្គាប់ និងគ្មានលិខិតអនុញ្ញាតិជាដើម ទោះជាមន្ត្រីជំនាញចុះផ្សព្វផ្សាយពន្យល់លក្ខណៈបច្ចេកទេសញឹកញាប់ហើយក៏ដោយ។

ក្នុងឆ្នាំ២០២១ វិស័យសំណង់ខេត្តកំពត មាន៣១៩គម្រោង មានផ្ទៃក្រឡាសរុបស្មើនឹង១០៦.៩៥៩ម៉ែត្រការ៉េ គិតជាតម្លៃទុនវិនិយោគប៉ាន់ស្មានស្មើនឹងជាង៣៨លានដុល្លារ ក្នុងនោះសំណង់គ្មានលិខិតអនុញ្ញាតសាងសង់សរុបចំនួន២៨គម្រោង ផ្ទៃក្រឡាសរុបស្មើ៧.៨៧០ម៉ែត្រការ៉េ បើគិតជាតម្លៃទុនវិនិយោគប៉ាន់ស្មាន ស្មើនឹងជិត៣លានដុល្លារ។

លោកជិន ណារិន នាយកប្រតិបត្តិនៃក្រុមហ៊ុន Sunshine Realty បានឱ្យដឹងថា បច្ចុប្បន្ននេះ នៅក្នុងខេត្តកំពតក៏មានការអភិវឌ្ឍ ទៅលើផ្ទះលំហែកាយច្រើនផងដែរ ជាពិសេសនៅតំបន់ជិតៗតំបន់រមណីយដ្ឋាន ដោយសារតែខេត្តនេះជាតំបន់ ដែលមានសក្ដានុពលខ្ពស់ ក្នុងការអភិវឌ្ឍលើផ្ទះប្រភេទនេះ៕

ដោយ៖ វឌ្ឍនៈ

ភ្នំពេញ ៖ វិស័យអចលនទ្រព្យបាននិងកំពុងធ្វើឱ្យបុគ្គលជាច្រើន ទទួលបានជោគជ័យ ហើយកាលពីមុន អ្នកប្រឡូកក្នុងវិស័យអចលនទ្រព្យនៅកម្ពុជា ភាគច្រើនគឺជាបុរស តែមកដល់បច្ចុប្បន្ននេះ មានស្ត្រីកាន់តែច្រើនក៏បានចូលប្រឡូក ក្នុងវិស័យនេះ និងទទួលបានផ្លែផ្កាគួរជាទីគាប់ចិត្តផងដែរ។

យ៉ាងណាក្ដី ក្នុងការប្រឡូកក្នុងវិស័យនេះ ស្ត្រីក៏មានបញ្ហាប្រឈម និងផលលំបាកមួយចំនួន។ តើផលលំបាក និងបញ្ហាប្រឈមនោះមានអ្វីខ្លះ?

លោកជំទាវឧកញ៉ាគង់ សំណាង អគ្គនាយិកានៃក្រុមហ៊ុន Khmer Real Estate និងជាអគ្គនាយកក្រុមហ៊ុនអភិវឌ្ឍន៍បុរី វិមានសំណាង បានមានប្រសាសន៍ថា ស្ត្រីក្នុងមុខជំនួញអចលនទ្រព្យ គឺពិតជាមានផលលំបាក តែសម្រាប់លោកជំទាវ ផលលំបាកមានតិចជាងភាពងាយស្រួល។

លោកជំទាវឧកញ៉ាបានមានប្រសាសន៍ សម្រាប់លោកជំទាវ ផលល្អមានច្រើនជាងផលលំបាក ហើយផលលំបាកមានតែមួយទេ គឺនៅពេលចុះទៅជួបភ្ញៀវ និងពេលជិះស្វែងរកទ្រព្យ ដូចជា ដីធ្លីមកដាក់លក់។ ការចុះទៅជួបភ្ញៀវ និងរកទ្រព្យនេះដែរ គឺត្រូវការគ្នាច្រើន ពីព្រោះនៅពេលស្ត្រីចុះទៅជួបភ្ញៀវ តែម្នាក់ឯង ឬស្វែងរកអចលនទ្រព្យ តែម្នាក់ឯង ពិតជាប្រឈមនឹងបញ្ហាច្រើន។

លោកជំទាវឧកញ៉ា មានប្រសាសន៍ថា “សម្រាប់ផលល្អវិញ គឺស្ត្រីមានអាទិភាពក្នុងការចរចាជាមួយភ្ញៀវ ព្រោះអីស្ត្រីមានភាពទន់ភ្លន់ មានភាពបត់បែនចេះនិយាយពីចំណុចល្អ មិនល្អជាមួយភ្ញៀវ និងអាចជំរុញឱ្យភ្ញៀវ រវាងអ្នកទិញ និងអ្នកលក់ឆាប់ត្រូវរ៉ូវគ្នា”។

អ្នកស្រី អាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍ថា ស្ត្រីគឺមានភាពពិបាកមែន នៅពេលចុះទៅជួបភ្ញៀវ ជាពិសេសភ្ញៀវបុរសៗ។ ភ្ញៀវខ្លះគាត់ចង់ជួប និងពិសាបាយជាមួយ ពេលខ្លះមានទទួលគ្រឿងស្រវឹងខ្លះៗ ដើម្បីឱ្យការចរចាបានរលូន។

អ្នកស្រីបន្តថា នៅពេលចុះទៅខេត្តម្ដងៗ ស្ត្រីក៏ពិបាកក្នុងការធ្វើដំណើរតែម្នាក់ឯង ដូចជាបុរសដែរ ដូច្នេះពេលចុះខេត្ត គឺត្រូវការមានគ្នាច្រើន ដើម្បីជួយដោះស្រាយ នៅពេលជួបបញ្ហា ហើយស្ត្រីក៏មានបន្ទុកមួយទៀត គឺមើលថែគ្រួសារនិងកូនៗ ដែលជាបន្ទុកបន្ថែម។

អ្នកស្រីបន្តថា យ៉ាងណាក្ដី ពីមួយឆ្នាំទៅមួយឆ្នាំ ស្ត្រីកាន់តែច្រើនបានចូលប្រឡូកក្នុងវិស័យនេះ ពីព្រោះថាវិស័យនេះបានផ្ដល់ប្រយោជន៍ជាច្រើន ដល់ស្ត្រីក៏ដូចជាបុរស ក្នុងការរកប្រាក់ចំណូល៕