ដោយៈ សុខុម

ហុងកុង: លោកស្រី Yang Huiyan ដែលជាសេដ្ឋីនីមានបំផុតប្រចាំអាស៊ី ជាមួយនឹងទ្រព្យសម្បត្តិសរុបរហូត ដល់ទៅជិត២៤ពាន់លានដុល្លារ អាមេរិក។

ប៉ុន្តែសេដ្ឋីនីរូបនេះ បានខាតបង់ទ្រព្យសម្បត្តិរបស់ខ្លួន ជាងពាក់​កណ្ដាល មកនៅត្រឹម១១ពាន់លានដុល្លារប៉ុណ្ណោះក្នុងឆ្នាំនេះ នៅពេលវិបត្តិអចលនទ្រព្យក្នុងប្រទេសចិន កាន់តែធ្ងន់ធ្ងរទៅៗ។

សេដ្ឋីនីវ័យ៤១ឆ្នាំរូបនេះ ជាម្ចាស់ក្រុមហ៊ុន Country Garden Holdings ដែលជាក្រុមហ៊ុនអភិវឌ្ឍន៍អចលនទ្រព្យ ដ៏ធំបំផុតរបស់ប្រទេសចិន បើគិតពីទំហំលក់។ នេះបើយោងតាមសារព័ត៌មាន CNN ចុះផ្សាយកាលពីថ្ងៃព្រហស្បតិ៍ ទី២៨ ខែកក្កដា។

ភាគហ៊ុនរបស់សេដ្ឋីនី Yang Huiyan ភាគច្រើនត្រូវបានផ្ទេរពីឪពុករបស់លោកស្រី គឺលោកYang Guoqiang ដែលជាស្ថាបនិកបង្កើតក្រុមហ៊ុន ដែលមានមូលដ្ឋាននៅក្រុងហ្វូសាន (Foshan) ខេត្តគ័ងតុង (Guangdong) ប្រទេសចិន ក្នុងឆ្នាំ១៩៩២ នេះឡើង។

ភាគហ៊ុនរបស់ក្រុមហ៊ុនCountry Garden បានធ្លាក់ថ្លៃជាងពាក់​កណ្ដាលក្នុងឆ្នាំនេះ នៅពេលវិស័យអចលនទ្រព្យក្នុងប្រទេសចិន បានជួបវិបត្តិធ្ងន់ធ្ងរដូចជាតម្លៃផ្ទះធ្លាក់ចុះ តម្រូវការទិញផ្ទះធ្លាក់ចុះ ខណៈក្រុមហ៊ុនអភិវឌ្ឍន៍ធំៗបំផុតរបស់ចិន ខកខានទូទាត់បំណុល ជាបន្តបន្ទាប់ចាប់តាំងពីឆ្នាំ២០២១។

ទោះជាយ៉ាងណា ថ្វីបើខាតបង់ទ្រព្យសម្បត្តិ ជាងពាក់កណ្តាលយ៉ាងណាក្ដី ក៏លោកស្រី Yang Huiyan នៅតែជារក្សាបានតំណែងជាសេដ្ឋីនីមានទ្រព្យសម្បត្តិច្រើនបំផុតប្រចាំអាស៊ីដដែល។ នេះបើយោងតាមសន្ទស្សន៍មហាសេដ្ឋី Bloomberg Billionaires Index។

ការធ្លាក់ចុះទ្រព្យសម្បត្តិយ៉ាងច្រើនសន្ធឹកសន្ធាប់នេះ បានធ្វើឱ្យគម្លាតទ្រព្យសម្បត្តិរបស់សេដ្ឋីនី Yang Huiyan និងសេដ្ឋីនី Fan Hongwei លើសខ្វះគ្នាត្រឹមតែប្រមាណ១០០លានដុល្លារប៉ុណ្ណោះ៕ CNN៕

ដោយៈ សុផារី

ព្រះសីហនុៈ ក្នុងប៉ុន្មានឆ្នាំចុងក្រោយនេះ ខេត្តព្រះសីហនុមានការអភិវឌ្ឍយ៉ាងកំហុក ជាពិសេសការវិនិយោគចាប់តាំងពីចុងឆ្នាំ២០១៧ ដល់ចុងឆ្នាំ២០១៩ សំណង់នៃគម្រោងអាគារពាណិជ្ជកម្ម បានកើនឡើងជាបន្តបន្ទាប់។

ក្រោយប្រឈមនឹងវិបត្តិកូវី១៩ ជាលទ្ធផលសំណង់អាគារតូច ធំរហូត​ដល់ជាង១០០០អាគារ បានកំពុងជាប់គាំង ហើយបន្សល់ទុកនូវបញ្ហាប្រឈមសម្រាប់ទឹកដីខេត្តជាប់មាត់សមុទ្រមួយនេះ។

បច្ចុប្បន្ននេះ មានសំណង់អាគារទាំងនោះ ដែលមិនទាន់បញ្ចប់ការសាងសង់ បាននិងកំពុងធ្វើឱ្យប៉ះពាល់ដល់រូបភាព នៃខេត្តព្រះសីហនុ និងធ្វើឱ្យប៉ះពាល់ដល់បច្ចេកទេសសំណង់ នាំឱ្យមានគ្រោះថ្នាក់ជាយថាហេតុ និងធ្វើឱ្យប៉ះពាល់ខ្លាំង ដល់សេដ្ឋកិច្ចសង្គមកម្ពុជាផងដែរ។ នេះបើយោងតាមការបញ្ជាក់ របស់លោកអភិបាលរងខេត្តព្រះសីហនុ លោក ឡុង ឌីម៉ង់ កាលពីដើមខែកក្កដាកន្លងមក។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានគូសបញ្ជាក់ប្រាប់ Property Area Asia នៅថ្ងៃទី២៧ ខែកក្កដាថា “បញ្ហាកំពុងប្រឈមនៅក្នុងខេត្តព្រះសីហនុនេះ បង្កការខាតបង់ដល់គ្រប់ភាគីទាំងអស់ មិនថារាជរដ្ឋាភិបាល អ្នកអភិវឌ្ឍន៍ និងម្ចាស់ដីជួល”។

លោកបន្តថា “ប្រសិនបើបញ្ហានេះ ត្រូវបានអូសបន្លាយពេលកាន់តែយូរ នោះនឹងបង្កបញ្ហាស្មុគស្មាញកាន់តែច្រើន”។

លោកបណ្ឌិតបានមានប្រសាសន៍ថា កិច្ចការសំខាន់ចំពោះមុខ ត្រូវការ ការសហការពីភាគីពាក់ព័ន្ធសំខាន់ៗទាំងអស់។ អ្នកពាក់ព័ន្ធសំខាន់ទី១ គឺរាជរដ្ឋាភិបាល ជាស្ថាប័នដែលមានភារកិច្ច និងកាតព្វកិច្ចពាក់ព័ន្ធ ដើម្បីធ្វើយ៉ាងណារកមធ្យោបាយ និងផ្តួចផ្តើមផ្លូវដំបូងគេ។ រាជរដ្ឋាភិបាល ជាអ្នកពាក់ព័ន្ធសំខាន់ ដែលអាចបង្កើតគោលនយោបាយលើកទឹកចិត្ត ឬជំរុញអ្នកវិនិយោគ ត្រឡប់ទៅបន្តនិតិវិធីរៀបចំសាងសង់អាគារបន្តទៀត។

លោកបណ្ឌិតបានបន្តថា “គោលនយោបាយនេះ ដើរតួនាទីសំខាន់ក្នុងការលើកទឹកចិត្ត ដល់អ្នកវិនិយោគពាក់ព័ន្ធនឹងអាគារទាំងនោះ ដែលអាចផ្តល់ដង្ហើម ដើម្បីត្រលប់ចូលមករួមគ្នា ដោះស្រាយបញ្ហាជាប់គាំងនេះបាន”។

ដំណោះស្រាយមួយទៀតនោះគឺ អ្នកអភិវឌ្ឍន៍បន្ត ដោយមានការចូលរួមសម្របសម្រួលពីសំណាក់ក្រសួង ឬស្ថាប័នពាក់ព័ន្ធនានារបស់រាជរដ្ឋាភិបាល។ ការសម្របសម្រួលរវាងអ្នកជាប់ពាក់ព័ន្ធ ជាពិសេសរវាងអ្នកអភិវឌ្ឍន៍ ម្ចាស់ដី និងជាងសំណង់ ត្រូវមានការជជែកពិភាក្សា ដោះស្រាយរួមគ្នា ព្រោះនេះជាសំណុំបញ្ហា ដែលជាប់ពាក់ព័ន្ធគ្នាជាចង្កោម។

អ្នកជំនាញសេដ្ឋកិច្ចរូបនេះលើកឡើងថា “ជំហានដំបូងនៃការដោះស្រាយបញ្ហានេះ គួរធ្វើយ៉ាងណា ឱ្យរាល់អាគារទាំងឡាយ ដែលជាប់គាំង ត្រលប់ទៅសាងសង់បន្តទៅវិញ។ ចំណែកដំណាក់កាលទី២ ក្រោយគម្រោ​ងសំណង់ទាំងនោះ ត្រូវបានសាងសង់រួចរាល់ ត្រូវគិតគូរធ្វើយ៉ាងណាបន្ត ដើម្បីឱ្យគម្រោងទាំងនេះមានដំណើរការទៅមុខ”។

លោកបណ្ឌិតហុង វណ្ណៈបានបន្ថែមថា រាជរដ្ឋាភិបាលកម្ពុជាជាអ្នកមានតួនាទីសំខាន់មុនគេ ដែលត្រូវចាប់ផ្តើម ហើយបង្កើតក្រុមការងារសម្របសម្រួល ហើយដាក់គោលការណ៍ ឬយន្តការសម្របសម្រួល ដើម្បីបន្តដំណើរឈ្នះឈ្នះ ទាំងអស់គ្នា ជាជាងដាក់បញ្ហានេះឱ្យនៅជប់គាំង និងខាតបង់ទាំងអស់គ្នា។

លោកបណ្ឌិតបន្ថែមទៀតថា “គួរដល់ពេលវេលា ដែលអាចនឹងចាប់ផ្តើម។ ប្រសិនបើយើងចាប់ផ្តើមនៅពេលនេះ អត្ថប្រយោជន៍នឹងទទួលបាននៅចុងឆ្នាំ២០២២នេះ ឬឆ្នាំក្រោយ នឹងទទួលបានផលជាបណ្តើរៗ។ នៅឆ្នាំ២០២៤ យើងនឹងទទួលបានអត្ថប្រយោជន៍សេដ្ឋកិច្ច ពីដំណើរការនៃអាគារទាំងនោះនឹងធឹង”។

ជាមួយគ្នានេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍នៅថ្ងៃទី២៥ ខែកក្កដានេះថា នៅក្នុងក្រុងព្រះសីហនុ បញ្ហាសំខាន់ពីរត្រូវការដំណោះស្រាយជាអាទិភាព គឺ ទី១ អាគារដែលត្រូវបានសាងសង់រួចរាល់ហើយ ទី២ គឺការជាប់គាំងនៃអាគារមួយចំនួន។

លោកលើកឡើងថា “ខេត្តព្រះសីហនុ កំពុងប្រឈមនឹងការស្វែងរកអ្នកវិនិយោគបន្ត នៃគម្រោងដែលជាប់គាំងទាំងឡាយ”។

បើតាមអ្នកជំនាញអចលនទ្រព្យរូបនេះ បញ្ហាជាប់គាំងនៅក្នុងក្រុងព្រះសីហនុនេះ ទាមទារឱ្យមានការចូលរួម ពីសំណាក់រាជរដ្ឋាភិបាល ក្នុងការអនុវត្តគោលនយោបាយជាក់លាក់ណាមួយ ដើម្បីឱ្យគម្រោងដែលជាប់គាំងទាំងនោះមានដំណើរការឡើងវិញជាធម្មតា។

លោកបន្តថា “ជាដំណោះស្រាយ គឺត្រូវការការជ្រោមជ្រែងពីសំណាក់រាជរដ្ឋាភិបាល តាមរយៈយន្តការនៃការដោះដូរ ឬយន្តការផ្តល់សិទ្ធិក្នុងការកាន់កាប់ដើម្បីបញ្ជប់គម្រោង”។ លោកបន្តថា “បើមិនមានការជ្រោមជ្រែងពីសំណាក់រដ្ឋាភិបាល លើវិស័យអចលនទ្រព្យទេ នោះនឹងអាចមានភាពប្រឈមនឹងបញ្ហានាពេលអនាគត”។

បញ្ហាប្រឈមធំបំផុត ដែលអ្នកជំនាញរូបនេះសង្គេតឃើញជារួម គឺអ្នកជួលដី ជួលឱ្យជនជាតិចិន ដើម្បីសាងសង់អាគារខ្ពស់ៗ ហើយជាប់គាំងកណ្តាលទី។

លោកច្រឹក សុខនីមបានលើកឡើងថា តាមពិតទៅបញ្ហាទាំងនេះក៏ធ្លាប់កើតមានផងដែរ នៅតាមបណ្តាប្រទេសធំៗ ដែលធ្លាប់ធ្វើការអភិវឌ្ឍន៍អាគារខ្ពស់ៗដំបូងៗ ដូចជា សហរដ្ឋអាមេរិក ប្រទេសសិង្ហបុរី ថៃ ជាដើម ប៉ុន្តែនៅទីបំផុតត្រូវបានដោះស្រាយ ដោយគោលនយោបាយនៃរាជរដ្ឋាភិបាល។

លោកគូសបញ្ជាក់ថា “មួយរយៈទៅ គោលនយោបាយរបស់ រាជរដ្ឋាភិបាលបានចាប់ផ្តើមស្វែងរកកញ្ចប់ ឬវិនិយោគិនបន្ទាប់ ដើម្បីឈានជើងចូលវិនិយោគបន្តលើអចលនទ្រព្យទាំងអស់នេះ ឱ្យមានសកម្មភាពឡើងវិញធម្មតា”។

ចំណែកលោកឧកញ៉ា វណ្ណ សុខហេង ប្រធានសភាពាណិជ្ជកម្មខេត្តព្រះសីហនុ បានមានប្រសាសន៍នៅដើមខែកក្កដា ក្នុងកិច្ចសម្ភាសមួយថា បញ្ហាកំពុងកើតមានឡើង ទាក់ទងនឹងគម្រោងអាគារជាប់គាំង មានដូចជា ការប្តឹងផ្តល់គ្នារវាងម្ចាស់អាគារ និងម្ចាស់ដីជួល ដោយម្ចាស់ដីចង់ប្តឹងផ្តល់ទាមទារយកសម្បត្តិនោះជាកម្មសិទ្ធ និងការមិនមានប្លង់ត្រឹមត្រូវតាមផ្លូវច្បាប់។

ក្នុងការដោះស្រាយបញ្ហា​ ដែលកំពុងប្រឈមទាមទារឱ្យមានការចូលរួមពីចំណាក់រដ្ឋាភិបាល និងវិស័យឯកជន។ ក្នុងនោះ រដ្ឋាភិបាលគួរមានគោលនយោបាយមុតស្រួច ដើម្បីដោះស្រាយអាគារជាប់គាំង តាមរយៈការផ្តល់អាជ្ញាប័ណ្ណសំណង់ ដល់ក្រុមហ៊ុនអភិវឌ្ឍន៍ ក្រោយការត្រួតពិនិត្យច្បាស់លាស់។

លោកឧកញ៉ាបញ្ជាក់ថា “កាលណាក្រុមអ្នកអភិវឌ្ឍន៍ទាំងនោះមានច្បាប់សំណង់ហើយ គាត់មានសិទ្ធិក្នុងការតភ្ជាប់បណ្ដាញទឹក ភ្លើងចូលក្នុងអាគារ”។

ដំណោះស្រាយទី២ លោកឧកញ៉ាលើកទឹកចិត្ត ឱ្យវិនិយោគិនបន្តការវិនិយោគរបស់ខ្លួន ដើម្បីបញ្ចប់និងដំណើរការគម្រោងបាន។ សម្រាប់គម្រោងទាំងឡាយណា មិនមានទុនបន្តការសាងសង់បាន អាចពិចារណាលក់ចេញក្នុងតម្លៃថោកសមរម្យ ដើម្បីឱ្យវិនិយោគិនក្នុងស្រុកផ្សេងទៀត បន្តកែច្នៃអាគារទាំងនោះបាន សម្រាប់ការប្រើប្រាស់ផ្សេងៗទៀតបាន។

លោកឧកញ៉ាមានប្រសាសន៍ថា “ច្បាប់សំណង់អាគារគឺសំខាន់ណាស់។ យ៉ាងហោចណាស់ កែច្នៃអាគារពីខាងក្រៅ កុំឱ្យទឹកលិចចូល ហើយខូចសំណង់ បណ្តាលឱ្យមានការរលំ”។ លោកបន្តថា “បើយើងចាប់ផ្តើមធ្វើគោលនយោបាយពីសូន្យទៅ វាមិនងាយទេ។ រាប់ពាន់លានដុល្លារ ដែលងាប់នៅទីនេះ វាមិនងាយទេ។ ក្នុងរយៈពេលដ៏ខ្លី ប្រសិនបើយើងអាចដោះស្រាយបានពីឥឡូវទៅ ខ្ញុំជឿជាក់ថា ក្នុងរយៈពេល៤ទៅ៥ឆ្នាំ វានឹងប្រសើរឡើង”។

ជាមួយគ្នានេះ លោកឡុង ឌីម៉ង់ បានឱ្យដឹងថា រដ្ឋបាលខេត្តព្រះសីហនុកំពុងរកដំណោះស្រាយ ដោយពិនិត្យមើលលទ្ធភាព ដែលអាចចូលរួមចំណែកជួយសម្រុះសម្រួល។

លោកបានបញ្ជាក់ថា “យើងត្រូវការរកប្រភពចំណូល ពីវិនិយោគិនថ្មី ដើម្បីប្រមូលយកAsset ទាំងអស់នេះ និងដើម្បីបង្កើនតម្លៃបន្ថែមឡើងវិញ។ ខេត្តព្រះសីហនុ នឹងក្លាយជាតំបន់សេដ្ឋកិច្ចពិសេសពហុបំណង ដូចនេះមិនត្រឹមតែវិនិយោគិនចិនទេ យើងស្វាគមន៍រាល់អ្នកវិនិយោគ មកពីគ្រប់ប្រទេស ដែលមានបំណងចង់វិនិយោគនៅខេត្តព្រះសីហនុ”៕

ដោយៈ វឌ្ឍនៈ

ភ្នំពេញៈ ក្នុងពេលបច្ចុប្បន្ននេះ ការវិនិយោគលើដីធ្លីនៅក្នុងប្រទេសកម្ពុជា នៅតែហុចសក្ដានុពលខ្ពស់ និងអាចផ្ដល់ប្រាក់ចំណេញច្រើន ដល់អ្នកវិនិយោគ ហើយសម្រាប់ស្ថានភាពបែបនេះ អ្នកមានទុនមានលុយគ្រប់គ្រាន់ នឹងកាន់តែមានឱកាសខ្ពស់ ក្នុងការបង្កើតធនាគារដីដើម្បីបញ្ចេញនៅពេលអនាគត។

ការបង្កើតធនាគារដី( Landing Banking ) សំដៅដល់ការប្រមូលទិញដីទុក សម្រាប់បញ្ចេញលក់ នៅពេលអនាគត ឬនៅពេលដែលដីឡើងថ្លៃដោយសារតែ ការអភិវឌ្ឍដីធ្លីបានរាលដាលទៅដល់តំបន់នោះ។

លោកឧកញ៉ានួន រឹទ្ធី អគ្គនាយកនៃក្រុមហ៊ុន KFA បានមានប្រសា​សន៍ឱ្យដឹងតាមទូរស័ព្ទកាលពីថ្ងៃទី២៨ កក្កដាថា ការវិនិយោគដីធ្លីនៅតែជាឱកាសសម្រាប់រកប្រាកចំណេញ នៅពេលអនាគត ហើយអ្នកដែលមានទុនគ្រប់គ្រាន់អាចប្រមូលទិញដីក្នុងតម្លៃ សមរម្យនៅទីតាំងល្អ ដើម្បីទុកផ្ដល់ជូនវិនិយោគិន នៅពេលស្ថានភាពសេដ្ឋកិច្ចពិភពលោក ល្អប្រសើរឡើងវិញ ។

លោកបន្តថា “សម្រាប់អ្នកមិនមានទុន ឬក៏អ្នកចង់ស្វែងរកប្រភពទុនពីធនាគារមកវិនិយោគលើដីធ្លីនេះ ខ្ញុំមិនលើកទឹកចិត្តឱ្យវិនិយោគនោះទេ ពីព្រោះការវិនិយោគវាមើលមិនឃើញថា តើពេលណានឹងចំណេញ ហើយត្រូវប្រើរយៈពេលយូរប៉ុនណានោះដែរ”។

លោកឧកញ៉ាបន្តថា ដីដែលអាចទិញចំណេញគឺ ជាប្រភេទដីដែលមិនទាន់បានអភិវឌ្ឍន៍ ហើយនៅពេលដែលមានការអភិវឌ្ឍ ទៅដល់តំបន់នោះ នឹងធ្វើឱ្យដីធ្លីឡើងថ្លៃជាក់ជាមិនខាន គ្រាន់តែថាកម្រិតនៃការឡើងថ្លៃនោះវាឡើងបានប៉ុនណាតែប៉ុណ្ណោះ ។

ប្រធានក្រុមហ៊ុន Century 21 Zillion Holding ប្រចាំខេត្តមណ្ឌលគីរីបានមានប្រសាសន៍ផងដែរថា នៅខេត្តមណ្ឌលគីរីនាពេលនេះ អ្នកលក់ដីច្រើនជាងអ្នករកទិញ ដូច្នេះវាជាឱកាសដ៏ល្អ សម្រាប់អ្នកមានលុយក្នុងការប្រមូលទិញដីទុក សម្រាប់អភិវឌ្ឍន៍ ឬសម្រាប់វិនិយោគ នៅពេលស្ថានភាពសេដ្ឋកិច្ចប្រសើរ និងមានការហូរចូលវិនិយោគិនបរទេស ទៅកាន់មណ្ឌលគីរី ។

លោកបន្តថា នៅពេលអ្នកលក់ច្រើនជាងអ្នកទិញបែបនេះ វាជាឱកាសក្នុងការចរចា ឬអាចទិញដីនៅលើទីតាំង មានសក្ដានុពលហើយសម្រាប់តម្លៃវិញ ឃើញមិនមានការប្រែប្រួលឬធ្លាក់ចុះទេ តែយ៉ាងណាបើសិនជាអ្នកលក់ដីនោះ ចង់លក់ពិតប្រាកដ គេអាចពិគ្រោះគ្នា ដើម្បីឈានទៅដល់ការព្រមព្រៀង ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអច​លនវត្ថុកម្ពុជាបានលើកឡើងផងដែរថា នៅពេលមានការអភិវឌ្ឍ ឬពង្រីកក្រុង នឹងធ្វើឱ្យតំបន់នៅជាយក្រុង ឬតំបន់អភិវឌ្ឍន៍ថ្មីនោះឡើងថ្លៃដី ។ ការវិនិយោគដីធ្លីនៅពេលបច្ចុប្បន្ន នៅតែជាឱកាសសម្រាប់វិនិយោគិន ក្នុងការចាប់យកដើម្បីប្រាក់ចំណេញនៅពេលអនាគត៕

ដោយៈវឌ្ឍនៈ

ភ្នំពេញៈ កំណើនប្រជាពលរដ្ឋកម្ពុជាទិញខុនដូ មានការកើនឡើងក្នុងរយៈពេលពីរបីឆ្នាំចុងក្រោយនេះ ជាពិសេសនៅក្នុងវិបត្តិកូវីដ១៩ គឺចំពេលដែលវិនិយោគិនបរទេស ចូលមកកម្ពុជាមានការថមថយ។

ការកើនឡើងនៃពលរដ្ឋក្នុងស្រុកទិញខុនដូ នៅក្នុងប្រទេសកម្ពុជាកើនឡើងបែបនេះ ជំរុញឱ្យអ្នកអភិវឌ្ឍន៍ត្រូវធ្វើពិពិធកម្មទីផ្សាររបស់ខ្លួន ដើម្បីបំពេញតាមតម្រូវការអតិថិជន។

លោករិន ច័ន្ទរឹទ្ធ អគ្គនាយកនៃក្រុមហ៊ុនអចលនទ្រព្យ DNZ Realty បានមានប្រសាសន៍ឱ្យដឹងតាមទូរស័ព្ទ នៅថ្ងៃទី២៨ កក្កដានេះថា កំណើនប្រជាពលរដ្ឋកម្ពុជាទិញខុនដូ ស្នាក់នៅឬសម្រាប់វិនិយោគនៅកម្ពុជាកាន់តែមានចំនួនច្រើន ជាក់ស្ដែងគម្រោង Urban Village ដែលលោកទទួលលក់នោះ ក៏មានប្រជាជនក្នុងស្រុកជាច្រើន បានទិញសម្រាប់ស្នាក់នៅនិងទុកវិនិយោគដែរ ។

លោកបន្តថា “ថ្វីតែចំនួនប្រជាជនកម្ពុជាទិញខុនដូ នៅក្នុងប្រទេសកម្ពុជាមានច្រើនក៏ពិតមែន តែមិនមែនឱ្យអ្នកអភិវឌ្ឍន៍ ត្រូវតែអភិវឌ្ឍន៍ជាបែបខ្មែរផ្ដល់ជូនអតិថិជនខ្មែរនោះទេ”។ លោកបន្តថា “បើនិយាយពីខុនដូគឺគឺ គេនិយាយពីការរស់នៅ បែបទំនើប ស៊ីវិល័យដូចនឹងបរទេស អឺរ៉ុបនិងប្រទេសរីកចម្រើន ដូច្នេះបើសិនជាប្រជាពលរដ្ឋកម្ពុជា ទិញខុនដូកាន់តែច្រើនហើយ ងាកមកអភិវឌ្ឍន៍បែបខ្មែរផ្ដល់ជូន លោកគិតថាវាជារឿងដែលមិនសមហេតុផលនោះទេ”។

លោករិន ច័ន្ទរិទ្ឋបានបន្តថា ប្រជាពលរដ្ឋក្នុងស្រុកទិញខុនដូ បានន័យថាពួកគាត់ចង់រស់នៅបែបទំនើប ចង់យកបទពិសោធន៍ នៃការរស់នៅដូចនឹងបរទេសដែរ អញ្ចឹងការអភិវឌ្ឍខុនដូ គួរតែពង្រឹងការអភិវឌ្ឍឱ្យកាន់តែខ្លាំងបន្ថែមទៀត ។

លោកបន្ថែមថា សម្រាប់ការធ្វើពិពិធកម្មទីផ្សារខុនដូវិញ លោកថាអ្នកអភិវឌ្ឍន៍គួរផ្ដល់ជាលក្ខខណ្ឌនៃការបង់ប្រាក់ តែមិនមែនបញ្ចុះតម្លៃខុនដូនោះឡើយ សម្រាប់គម្រោងដែលបានលក់យូរហើយ តែសម្រាប់គម្រោងមិនទាន់បានលក់គួរគិតគូរពីតម្លៃនេះ កុំយកចំណេញខ្លាំងពេក ដោយទុកលទ្ធភាពសម្រាប់អ្នកក្នុងស្រុកអាចទិញបានច្រើន ។

ជាមួយគ្នានេះ លោកពីន សារី ប្រធានផ្នែកលក់នៃក្រុមហ៊ុនERA Cambodia បានឱ្យដឹងថា បើយើងក្រលេកទៅមើលការអភិវឌ្ឍ យើងឃើញថា កម្ពុជាជាប្រទេសកំពុងអភិវឌ្ឍន៍មួយ។ ដូច្នេះយើងមិនអភិវឌ្ឍន៍ចុះក្រោមទេ មានតែឡើងលើ ហើយអ្វីដែលអ្នកអភិវឌ្ឍន៍កំពុងធ្វើ គឺត្រឹមត្រូវណាស់ ដែលពួកគាត់អភិវឌ្ឍន៍សម្រាប់បរទេសផង និងសម្រាប់វិនិយោគិនក្នុងស្រុកផង ។

លោកបន្តថា “ទីផ្សារខុនដូនៅកម្ពុជា នឹងកាន់តែមានតម្រូវការខ្ពស់ ស្របពេលកំណើនប្រជាជនកើនឡើង ជាបន្តបន្ទាប់ជាពិសេសនៅរាជធានីភ្នំពេញ”។ លោកបន្តថា “នៅពេលកំណើនប្រជាជន កើនឡើងខ្ពស់បែបនេះនឹងធ្វើឱ្យតម្រូវការលំនៅឋាន ក៏មានកំណើនដូចគ្នា ដោយខ្លះគាត់ចូលចិត្តស្នាក់នៅផ្ទះជាប់ដី និងខ្លះទៀតគាត់ក៏ចង់រស់នៅក្នុងផ្ទះបែបទំនើប គឺខុនដូនេះឯង”៕

ដោយៈ ស៊ីវ ម៉េង

       ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)លោកច្រឹក សុខនីមបានលើកឡើងនូវសុទិដ្ឋិនិយមថា ទីផ្សារអចលនទ្រព្យកម្ពុជា នឹងមានសភាពកាន់តែល្អប្រសើរនៅចុងឆ្នាំនេះ។

លោកបានមានប្រសាសន៍ឲ្យដឹងតាមទូរស័ព្ទ កាលពីម្សិលម៉ិញនេះថា  ស្ថានភាពបច្ចុប្បន្ន វាជាអន្តរកាលមួយដែលឥទ្ឋិពល នៃបញ្ហាជំងឺកូវីដ១៩នៅ​ប្រទេសចិន និងសង្រ្គាមរុស្ស៊ី អ៊ុយក្រែនមិនទាន់បញ្ចប់ ប៉ុន្តែអ្វីៗនឹងមានភាពប្រសើរឡើងនាពេលឆាប់ៗនេះ។

លោកបន្តថា “ស្ថានភាពទីផ្សារ និងការរីកចម្រើនលើវិស័យអចលនទ្រព្យនឹងបន្តរយៈពេលវែងតទៅទៀត ដោយសារស្ថានភាពសេដ្ឋកិច្ចនៅមានស្ថេរភាព តម្លៃ​អចលនទ្រព្យកម្ពុជា នៅមានតម្លៃទាបធផៀបជាមួយប្រទេសជិតខាងកម្ពុជា”។

លោកច្រឹក សុខនីមបានបន្តថា ក្នុងចំណោមផ្នែកសំខាន់ៗនៃវិស័យ​នេះ ដូចជាខុនដូ អាផាតម៉ិន ការិយាល័យជួល នៅតែមានទីផ្សារល្អ ខណៈដែលទីផ្សារដីធ្លី នៅតែបន្តរីកចម្រើន និងផ្តល់ឱកាសចំណេញដល់វិនិយោ​គិនរយៈពេលវែងបន្តទៀត។

ជាមួយគ្នានេះ លោកKen Lo អគ្គនាយកក្រុមហ៊ុនColdwell Banker ជាក្រុមហ៊ុនលំដាប់អន្តរជាតិមួយ ដែលបានចូលមកកាន់ទីផ្សារកម្ពុជាបានមានប្រសាសន៍ថា ភាពអំណោយផលនៃទីតាំងភូមិសាស្រ្ត ស្ថានភាពសេដ្ឋកិច្ចកម្ពុជា នៅតែមានកំណើនរ៉ឹងមាំ កត្តាសុខសន្តិភាព និងស្ថេរភាពនយោបាយ​រយៈពេលវែង រាជធានីភ្នំពេញ នៃប្រទេសកម្ពុជានឹងក្លាយជាមូលដ្ឋាន សម្រាប់ក្រុមហ៊ុនអន្តរជាតិធំៗ ជ្រើសរើសធ្វើជាទីតាំងការិយាល័យកណ្តាល​នាពេលអនាគត។

លោកបន្តថា “ការដែលខ្ញុំអះអាងបែបនេះ ដោយសារកម្ពុជា ជាចំណុចកណ្តាលនៃតំបន់អាស៊ាន ដែលការហោះហើរពីកម្ពុជាទៅកាន់បណ្តាប្រទេសក្នុងតំបន់ ចំណាយពេលមិនលើស២ម៉ោងឡើយ”។ លោកបន្តថា “ក្រោយឆ្នាំ២០២៣ សេដ្ឋកិច្ចកម្ពុជានឹងមានសន្ទុះខ្លាំង ដែលពេលនោះទំហំការិយាល័យ ដែលមានស្រាប់នាពេលបច្ចុប្បន្ន មិនអាចឆ្លើយតបនឹងតម្រូវការឡើយ”។

ជាមួយគ្នានេះ លោកKong Jian Mingប្រធានក្រុមហ៊ុនJOVAN Group ដែលបានបោះទុនប្រមាណ១០០០លានដុល្លារ សាងសង់បុរីឈ្មោះJOVAN CITY នៅជាយរាជធានីភ្នំពេញបានមានប្រសាសន៍ថា មិត្តភាពដែកថែប នៃទំនាក់ទំនងល្អ​រវាងមេដឹកនាំកម្ពុជា ចិន និងគោលនយោបាយខ្សែក្រវ៉ាត់ និងផ្លូវ នឹងធ្វើឲ្យកម្ពុជាក្លាយជាមូលដ្ឋាន នៃការវិនិយោគរបស់អ្នកវិនិយោគចិន កាន់តែច្រើននាពេលអនាគត។

លោកបន្តថា “នៅពេលខាងមុខទីក្រុងភ្នំពេញ នឹងមានមនុស្សរស់នៅចន្លោះពី៦ទៅ៨លាននាក់ វានឹងធ្វើឲ្យទីផ្សារបុរី និងសេវាកម្មជាច្រើនទៀតនឹងរីកចម្រើន និងមានតម្រូវការខ្ពស់នាពេលអនាកត”។

ជាមួយគ្នានេះ លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានថ្លែងថា អ្នកវិនិយោគចិនកាន់តែច្រើន បានចូលមកកាន់កម្ពុជា បណ្តើរៗហើយ ដោយសារគោលនយោបាយ និងទំនាក់ទំនងដ៏ល្អប្រសើររវាងមេដឹកនាំកម្ពុជា គឺសម្តេចតេជោហ៊ុន សែននាយករដ្ឋមន្រ្តីនៃកម្ពុជា និងមេដឹកនាំចិន។

លោកបន្តថា “កិច្ចព្រមព្រៀងពាណិជ្ជកម្មខសេរីកម្ពុជា ចិន កិច្ចព្រមព្រៀងRCEP ដែលបានចូលជាធរមាន បានធ្វើឲ្យកម្ពុជាក្លាយជាទីតាំងដ៏ល្អសំរាប់វិនិយោគ ផលិតកម្ម ដើម្បីនាំចេញ”។

យោងតាមប្រភពពីថ្នាក់ដឹកនាំសមាគមចិនមួយ នៅកម្ពុជាបាននិយា​យ​ឲ្យដឹងក្នុងលក្ខខ័ណ្ឌមិនបញ្ចេញឈ្មោះថា អ្នកវិនិយោគចិនកាន់តែច្រើននឹងមកកាន់កម្ពុជានៅចុងឆ្នាំនេះ ស្របពេលដែលរដ្ឋាភិបាលចិន នឹងបន្ឋូរបន្ថយនូវលំហូរមូលធន ចេញពីប្រទេសនាពេលខាងមុខនេះ ព្រោះប្រសិន​ជារដ្ឋាភិបាលចិនបន្តបិទខ្ទប់ប្រទេស និងលំហូរមូលធន នឹងធ្វើឲ្យ​សេដ្ឋកិច្ចចិន​ប្រឈមការលំបាកកាន់តែធ្ងន់ធ្ងរ៕