ដោយ៖ សុខុម

ហាណូយ: ការអភិវឌ្ឍអគារដែលសន្សំសំចៃថាមពលគឺជានិន្នាការ (Trend) ដ៏ពេញនិយមដែលជៀសមិនរួចសម្រាប់ប្រទេសវៀតណាម ដើម្បីសម្រេចបាននូវគោលបំណងបរិស្ថានរបស់ខ្លួន។

យោងតាមសារព័ត៌មាន Vietnam News ចុះផ្សាយកាលពីថ្ងៃសុក្រ ទី២៤ ខែមិថុនា ឱ្យដឹងថា ថាមពលដែលប្រើប្រាស់ដោយអគារខ្ពស់ៗកប់ពពកក្នុងប្រទេសវៀតណាម មានចន្លោះពី៣៥%ទៅ៤០%នៃការប្រើប្រាស់ថាមពលសរុបនៅទូទាំងប្រទេស។

ការស្ទង់មតិមួយដែលធ្វើឡើងដោយក្រុមហ៊ុនសេវាកម្មអចលនទ្រព្យ Cushman & Wakefield (CWK) បង្ហាញថា អចលនទ្រព្យរួមចំណែកប្រមាណ៤០%នៃការបំភាយឧស្ម័នសរុបចូលទៅក្នុងបរិយាកាសក្នុងប្រទេសនេះ។

យោងតាមក្រុមប្រឹក្សាអគារបៃតងវៀតណាម (Vietnam Green Building Council) ឱ្យដឹងថា នៅទូទាំងប្រទេសវៀតណាម មានអគារបៃតង ឬអគារសន្សំសំចៃអគ្គិសនីប្រហែល២០០អគារ។

នៅសន្និសីទអង្គការសហប្រជាជាតិស្តីពីការប្រែប្រួលអាកាសធាតុឆ្នាំ២០២១ (COP26) វៀតណាម បានប្តេជ្ញាសម្រេចឱ្យបាននូវអព្យាក្រឹតកាបូននៅត្រឹមឆ្នាំ២០៥០។

ហើយដើម្បីសម្រេចគោលដៅបរិស្ថាននោះ វៀតណាម ចាំបាច់ត្រូវអភិវឌ្ឍអគារសន្សំសំចៃថាមពលបន្ថែមទៀតដែលមានគុណភាពខ្ពស់ ដើម្បីកាត់បន្ថយផលប៉ះពាល់ជាអវិជ្ជមានមកលើបរិស្ថាន ព្រមទាំងសន្សំសំចៃថ្លៃចំណាយលើថែទាំ ជួសជុល និងការប្រើប្រាស់ថាមពលនាពេលអនាគតផងដែរ៕

ដោយ៖ សុផារី

កោះកុង៖ គម្រោងសាងសង់ផ្លូវជាតិលេខ១០ តភ្ជាប់ពីសំឡូត ដល់កោះកុងនឹងរួមចំណែកដល់ការលើកកម្ពស់ប្រសិទ្ធភាពនៃការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សាហកម្ម និង ទេសចរណ៍បានឆាប់រហ័ស និងចំណាយតិច ជាពិសេសជាមួយប្រទេសថៃ។

លោក ហេង តុងហៃ ប្រធានសាខាក្រុមហ៊ុន Century 21 Zillion Holding ប្រចាំខេត្តប៉ៃលិន បានមានប្រសាសន៍តាមប្រព័ន្ធតេឡេក្រាមនៅរសៀលថ្ងៃទី២៤ ខែមិថុនានេះថា តាមរយៈប្រព័ន្ធហេដ្ឋារចនាសម្ព័ន្ធ ដែលរាជរដ្ឋាភិបាលបានកំពុងសាងសង់ នឹងជាកម្លាំងចលករក្នុងការកែប្រែមុខមាត់ខេត្តតាមបណ្តោយព្រំដែន ជាពិសេសនៅក្នុងខេត្តប៉ៃលិន ដោយផ្លូវជាតិលេខ១០នេះ នឹងធ្វើឱ្យខេត្តប៉ៃលិនកាន់តែមានទីតាំងកាន់ជិតខេត្តផ្សេងទៀតៗនៅក្នុងប្រទេសកម្ពុជា។

អ្នកជំនាញរូបនេះមានប្រសាសន៍ថា តាមរយៈផ្លូវជាតិលេខ១០នេះ វិស័យពាណិជ្ជកម្មរវាងប្រទេសកម្ពុជា និងប្រទេសថៃ នឹងមានការរីកចម្រើន ដោយសារអំណោយផលនៃផ្លូវថ្នល់មួយនេះ ។ មួយវិញទៀត វិស័យកសិកម្មក៏មានការឱកាសល្អប្រសើរក្នុងការវិនិយោគផងដែរ ក្នុងការបង្កបង្កើនផលសម្រាប់ការនាំចេញ ដោយសារដីនៅទំនេរមានច្រើន និងមានតម្លៃសមរម្យនៅឡើយ ហើយមានទីតាំងនៅជិតច្រកព្រំដែនផងដែរ។

ក្រៅពីវិស័យពាណិជ្ជកម្ម និងកសិកម្ម វិស័យទេសចរណ៍ក៏រំពឹងទទួលបានផលពីផ្លូវជាតិមួយនេះផងដែរ។ នៅក្នុងខេត្តប៉ៃលិនមានរមណីយដ្ឋានទេសចរណ៍ជាច្រើន ដូចជា ភ្នំយ៉ាត ទឹកធ្លាក់ភ្នំខៀវ ឬទឹកធ្លាក់៧ជាន់ ម្លប់សាវម៉ាវ ចម្លារខ្នុរ និងតំបន់អេកូទេសចរណ័ច្រើនទៀត។

លោកបានឱ្យដឹងថា “ផ្លូវបន្ទាត់នេះភ្ជាប់ខេត្តទិសនិរតី មកខេត្តទិសពាយ័ព្យ ដូច្នេះវាមានសារសំខាន់ណាស់សម្រាប់ទាក់ទាញទេសចរ មកទស្សនាកំសាន្តនៅក្នុងខេត្តប៉ៃលិន”។

លោកបានមានប្រសាសន៍ថា “វិស័យអចលនទ្រព្យនៅតាមបណ្តាខេត្តជាប់ព្រំដែន ជាពិសេសនៅក្នុងខេត្តប៉ៃលិន នឹងមានសកម្មភាពដោះដូរ នឹងមមាញឹកជាងមុន ហើយក៏មានតម្លៃប្រសើរទ្វេគុណជាងមុនដែរ ដោយហេតុថា បច្ចុប្បន្នហាងឆេងអចលនទ្រព្យនៅមានតម្លៃល្អប្រសើរនៅឡើយ ពិសេសនៅមានដីជាច្រើននៅទូលាយ ងាយស្រួលក្នុងការអភិវឌ្ឍន៍”។

លោក ស៊ុន ចាន់ថុល កាលពីថ្ងៃទី២៣ ខែមិថុនា ឆ្នាំ២០២២នេះ បានមានប្រសាសន៍ឱ្យដឹងថា ផ្លូវនេះគឺជាសរសៃឈាមសេដ្ឋកិច្ចជាតិដ៏មានសក្តានុពលរបស់កម្ពុជា ដែលអាចជួយសម្រួលដល់ការតភ្ជាប់ទំនាក់ទំនងគមនាគមន៍ ធ្វើសមាហរណកម្មតភ្ជាប់ផ្ទៃក្នុងប្រទេស និងជាមួយតំបន់ រួមចំណែកដល់ការលើកកម្ពស់ប្រសិទ្ធភាពនៃការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សាហកម្ម និងទេសចរណ៍បានឆាប់រហ័ស និងចំណាយតិច ជាពិសេសជាមួយប្រទេសជិតខាង។

លោក ស៊ុន ចាន់ថុល ឱ្យដឹងទៀតថា ផ្លូវជាតិមួយខ្សែនេះមិនត្រឹមតែផ្តល់អត្ថប្រយោជន៍ក្នុងការធ្វើដំណើរឆ្លងកាត់ប៉ុណ្ណោះទេ ប៉ុន្តែថែមទាំងអាចជាផ្នែកមួយទាក់ទាញអ្នកទេសចរ ដែលចូលចិត្តធ្វើដំណើរកម្សាន្ត អាចគយគន់ធម្មជាតិដ៏ស្រស់ត្រកាល ដោយសារផ្លូវនេះមានតំបន់ធម្មជាតិ ជាច្រើន ជាពិសេសព្រៃឈើក្រាស់ៗយ៉ាងស្រស់ស្អាត។

គម្រោងសាងសង់ផ្លូវជាតិលេខ១០ លាតសន្ធឹងកាត់ខេត្តកោះកុង ពោធិ៍សាត់ រហូតដល់ខេត្តបាត់ដំបង មានប្រវែងសរុបចំនួន១៩៧,៣៣ គីឡូម៉ែត្រ រហូតមកទល់នឹងពេលនេះ សម្រេចបាន៦៤,៣៣% ហើយ។ គម្រោងផ្លូវនេះគ្រោងចំណាយថវិកាសរុបប្រមាណជាង២៤០លានដុល្លារអាមេរិក សាងសង់ដោយក្រុមហ៊ុនសាជីវកម្មស្ពានថ្នល់ចិន (CRBC) ត្រួតពិនិត្យបច្ចេកទេសសាងសង់ដោយក្រុមហ៊ុនទីប្រឹក្សាបច្ចេកទេសក្វាងចូវ វ៉ានអានហើយគ្រោងនឹងបញ្ចប់នៅឆ្នាំ២០២៤៕

ដោយៈស៊ីវ ម៉េង

ភ្នំពេញៈ ប្រឡូក និងធ្វើការនៅក្នុងវិស័យអចលនទ្រព្យរយៈពេលជិត២០ឆ្នាំ លោកឧកញ៉ាបណ្ឌិតគីម ហ៊ាងបានក្លាយជាអ្នកមានដោយសារវិស័យនេះ។

លោកតែងតែចែករំលែកនូវទស្សនៈ បទពិសោធន៍របស់លោកក្នុងវិស័យនេះយ៉ាងមុចស្រួច និងមានភាពស៊ីជម្រៅ។

ជាមួយនឹងសហស្ថាបនិក និងជាអគ្គនាយកគេហទំព័រ Propertyarea.asia លោកឧកញ៉ាបណ្ឌិតគីម ហ៊ាង ប្រធាន KW Cambodia បាន​ថ្លែងឲ្យដឹងកាលពីសប្តាហ៍មុនថា សេដ្ឋកិច្ចកម្ពុជាមានកំណើនក្នុងរង្វង់៧ភាគរយ ក្នុងរយៈពេល២០ឆ្នាំចុងក្រោយនេះ ដែលធ្វើឲ្យកម្ពុជា ឈានពីប្រទេសតតិយ​លោក មកកាន់ប្រទេសមានប្រាក់ចំណូលមធ្យមកម្រិតទាប និងកំពុងឈានទៅកាន់ទៅកាន់ ប្រទេសមធ្យមកម្រិតខ្ពស់ និងប្រទេសមានប្រាក់ចំណូលខ្ពស់នាពេលខាងមុខ។

លោកឧកញ៉ាបន្តថា “ចំណែកកត្តាមួយទៀត គឺកម្ពុជាមានស្ថេរភាពនយោ​បាយ មិនដូចមនុស្សមួយចំនួនមិនធ្លាប់ស្គាល់កម្ពុជា ចេះតែនិយាយផ្តេសផ្តាសឡើយ ប៉ុន្តែក្រោមការដឹកនាំរបស់សម្តេចតេជោ នយោបាយកម្ពុជាមានលំនឹងល្អណាស់”។

លោកបន្ថែមថា “ការវិនិយោគដីធ្លីមានភាពពេញនិយមនៅកម្ពុជា ដោយអ្នកមានប្រាក់ច្រើន ក្នុងរង្វង់៧០ភាគរយ ទទួលភាពមានបានដោយសារដីធ្លី”។

លោកឧកញ៉ាបណ្ឌិតគីម ហ៊ាង បានបន្តថា កត្តាសំខាន់ទី២ លំហូរទុនវិនិយោគពីបរទេសច្រើន ព្រោះប្រជាពលរដ្ឋកម្ពុជា មានបេះដូងទូលាយ មានភាពរួសរាយរាក់ទាក់ រៀនគ្រប់ភាសា ដែលធ្វើឲ្យកម្ពុជាមានភាពទាក់ទាញទុនវិនិយោគពីបរទេស គួរផ្សំនឹងការរីកចម្រើនសេដ្ឋកិច្ច ស្ថេរភាពនយោបាយ និងមូលដ្ឋានច្បាប់វិនិយោគដ៏ល្អ។

លោកបន្តថា ប្រភពទុនវិនិយោគចំនួនប្រភេទ៣ អាចជួយសេដ្ឋកិច្ចកម្ពុជាឲ្យរីកចម្រើនកាន់តែខ្លាំង មានដូចជា ទី១ អ្នកវិនិយោគក្នុងស្រុក ដែលពួកគាត់បញ្ចេញលុយវិនិយោគ ព្រោះនៅកម្ពុជាមានអ្នកមានក្នុងស្រុកច្រើន បើពួកគាត់បញ្ចេញទុនវិនិយោគច្រើន នឹងជួយសេដ្ឋកិច្ចយើងបានកាន់តែប្រសើរ។

ទី២ ទុនវិនិយោគពីបរទេស ដែលរយៈពេល១០ឆ្នាំចុងក្រោយនេះ អ្នកវិនិយោគចិនបានដើរតួនាទីសំខាន់ណាស់ ក្នុងសេដ្ឋកិច្ច ពិសេសក្នុងវិស័យអចលនទ្រព្យ និងទី៣ ពេលអញ្ជើញទៅកាន់អាមេរិក និងប្រទេសស្វីស
សម្តេចតេជោ នឹងពិចារណាពីលទ្ធភាព ក្នុងការធ្វើអត្តសញ្ញាណប័ណ្ណជូនពលរដ្ឋខ្មែរនៅក្រៅប្រទេស ដែលនេះជាសញ្ញាដ៏ល្អមួយ ដែលយើងរង់ចាំជាយូរមកហើយ។

ទី៣ បើពួកគាត់ (ខ្មែរនៅក្រៅប្រទេស) ទទួលបានអត្តសញ្ញាណប័ណ្ណ ហើយ យើងទាក់ទាញឲ្យពួកគាត់មកវិនិយោគនៅកម្ពុជា ពិតជាសំខាន់ណាស់ ព្រោះទុនវិនិយោគរបស់អ្នកមានខ្មែរនៅក្រៅប្រទេស ទំហំទុនវិនិយោគរបស់ពួកគាត់ មានមិនតិចជាងទុនវិនិយោគពីជនបរទេសនោះទេ។

លោកឧកញ៉ាបណ្ឌិតបន្តថា “ប្រសិនជាយើងមានប្រភពទុនទាំងបីនេះ នឹងធ្វើឲ្យសេដ្ឋកិច្ចរបស់យើង កាន់តែរីកចម្រើនលឿនជាងមុនបន្ថែមទៀតមិនខាន”៕

ដោយៈគង់ សូរិយា

ភ្នំពេញៈ អ្នកជំនាញបាននិងកំពុងមើលឃើញនិន្នាការថ្មី នៃការវិនិ​យោ​គដីធ្លី ដោយបច្ចុប្បន្ននេះ ចំនួនអ្នកវិ​និយោគកាន់តែច្រើន បានចាប់អារម្មណ៍លើការទិញដីធ្លី នៅខេត្តជាប់មាត់សមុទ្រចំនួនបី។

អ្នកស្រីអាន សុធីតា អគ្គនាយិកាក្រុមហ៊ុន ProPNex Cambodia បានមានប្រសាសន៍ឲ្យដឹង កាលពីដើមសប្តាហ៍នេះថា សកម្មភាពវិនិយោគលើទីផ្សារដីធ្លី នៅក្នុងខេត្តកែប កំពត កោះកុងមានភាពល្អប្រសើរ ប៉ុន្តែខេត្តព្រះសីហនុ ត្រូវការរយៈពេលវែងបន្ថែមទៀត ដើម្បីឲ្យទីផ្សារអាចស្រូបយកអ្វីដែលបានដាក់ចូលទីផ្សារយ៉ាងច្រើនលើសលុបរួចទៅហើយ។

អ្នកស្រីបន្តថា “ដោយសាររដ្ឋាភិបាលបានវិនិយោគ និងកំពុងវិនិយោ​គលើហេដ្ឋារចនាសម្ព័ន្ឋធំៗ និងចាំបាច់ ទើបធ្វើឲ្យខេត្តទាំងបីនេះមានសញ្ញាវិជ្ជមានលើទីផ្សារដីធ្លីឡើងវិញ”។

អ្នកស្រីអាន សុធីតាបានបន្តថា ការវិនិយោគលើហេដ្ឋារចនាសម្ព័ន្ឋ​របស់រដ្ឋាភិបាល បាននិងកំពុងដើរតួនាទីស្នូល ក្នុងការជម្រុញវិស័យអចល​នទ្រព្យ ពិសេសផ្នែកដីធ្លី ស្របពេលខេត្តជាប់សមុទ្រទាំងបី កំពុងមានចរន្តទិញលក់ស្របគ្នា នឹងការងើបឡើងវិញនៃសេដ្ឋកិច្ច សង្គម។

ខេត្តកំពត
ខេត្តមួយនេះ កំពុងមានភាពទាក់ទាញកាន់តែខ្លាំង បន្ទាប់ពីផ្លូវជាតិលេខ៣បានបញ្ចប់ និងសម្ភោធដាក់ឲ្យដំណើរការ ព្រមទាំងហេដ្ឋារចនាសម្ព័ន្ឋជាច្រើនក្នុងខេត្តនេះកំពុងសាងសង់ ពិសេសការសាងសង់ទីក្រុងបូកគោថ្មី ការសាងសង់កំពង់ផែទឹកជ្រៅលំដាប់អន្តរជាតិ ដែលបោះទុន១៥០០លានដុ​ល្លារដោយក្រុមហ៊ុនទ្រីភាព គ្រុប បាននិងកំពុងបង្កើនល្បឿន និងការចាប់អារម្មណ៍យ៉ាងច្រើនពីអ្នកវិនិយោគជាតិ អន្តរជាតិ។

ខេត្តកែប
រដ្ឋាភិបាលបាននិងកំពុងសាងសង់កំពង់ផែ ការរៀបចំឆ្នេរមាស ការរៀបចំឆ្នេរអង្កោល និងផែនការអភិវឌ្ឍន៍ជាច្រើនទៀត ពិសេសការអភិវឌ្ឍន៍កោះទន្សាយរបស់ក្រុមហ៊ុនទ្រី ភាពគ្រុប។

ខេត្តកោះកុង
ខេត្តជាប់ព្រំដែនជាមួយប្រទេសថៃ និងធ្លាប់ជាខេត្តដាច់ស្រយាលនេះ កំពុងទាក់ទាញការវិនិយោគ និងពង្រីកសក្តានុពលដ៏ធំសម្បើម តាមរយៈការត្រៀមដាក់ដំណើរការព្រលានយន្តហោះលំដាប់អន្តរជាតិ នៅក្នុងគំរោងតារាសាគរនាពេលខាងមុខ។

ការសាងសង់កំពង់ផែទឹកជ្រៅ ការពង្រីកផ្លូវជាតិលេខ៤៨ជាពីរគន្លង ពិសេសការសាងសង់ផ្លូវជាតិលេខ១០ តភ្ជាប់ពីស្រុកសំឡូត ក្នុងខេត្តបាត់ដំបង ឆ្លងកាត់ខេត្តពោធិសាត់ និងឆ្ពោះត្រង់ទៅកាន់ខេត្តកោះកុងផងដែរ៕

ដោយ៖ សហការី

ក្រុងព្រះសីហនុ៖ ស្ថានទូតអូស្ត្រាលីប្រចាំប្រទេសកម្ពុជា បានប្រគល់ឯកសារយុទ្ធសាស្ត្រ និងលទ្ធផលសិក្សាគម្រោងសាកល្បងចំណតឆ្លាតវៃ ដល់រដ្ឋបាលខេត្តព្រះសីហនុ ដើម្បីប្រែក្លាយក្រុងព្រះសីហនុជាទីក្រុងឆ្លាតវៃឌីជីថលនាពេលអនាគត។

នេះបើតាមពិធីប្រគល់-ទទួល រវាងលោក Andreas Zurbrugg ជាភារៈធារីនៃស្ថានទូតអូស្រ្តាលី និង លោក គង់ វិតាណៈ អភិបាលរងខេត្តព្រះសីហនុ កាលពីថ្ងៃទី២៣ ខែមិថុនា ឆ្នាំ២០២២។

អូស្ត្រាលី បានជ្រើសរើសខេត្តព្រះសីហនុសម្រាប់ជាទិសដៅអាទិភាព ដើម្បីអភិវឌ្ឍទីក្រុងឆ្លាតវៃ តាំងតែពីឆ្នាំ២០២០ តាមរយៈកម្មវិធីវិនិយោគក្នុងវិស័យហេដ្ឋារចនាសម្ព័ន្ធ (3i) ដែលមានទំហំមូលនិធី៥១,៧លានដុល្លារអូស្រា្តលី។

របាយការណ៍យុទ្ធសាស្រ្តនេះ នឹងផ្តល់ជាគំរូដល់វិស័យពាណិជ្ជកម្ម និងភាពជាដៃគូររវាងរដ្ឋ-ឯកជន ក្នុងការយកមកអនុវត្ត ដើម្បីបង្កើតប្រាក់ចំណូល សម្រាប់ពង្រីកវិសាលភាពប្រព័ន្ធគ្រប់គ្រងចំណតឆ្លាតវៃទូទាំងក្រុង។

មួយវិញទៀត​ សំណុំឯកសារនេះ នឹងផ្តល់ជាគំរូអនុវត្តដែលអាចប្រើប្រាស់សម្រាប់អភិវឌ្ឍសេវាទីក្រុងឆ្លាតវៃផ្សេងៗទៀត ដែលមានការចូលរួមពីវិស័យឯកជន៕

ដោយ៖​សុផារី

ភ្នំពេញ៖ ក្រសួងសាធារណការ និងដឹកជញ្ជូន បានពិនិត្យលើជម្រើសគម្រោងផ្លូវរថភ្លើងក្រោមដី ឬផ្លូវរថភ្លើងលើអាកាសនៅក្រុងភ្នំពេញ និងគម្រោងដាក់ស្នើប្រមុខរាជរដ្ឋាភិបាលសម្រេចជ្រើសរើស លើជម្រើសដែលសាកសមនឹងចរាចរណ៍រាជធានីភ្នំពេញ។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី ២៤ ខែមិថុនាឆ្នាំ ២០២២ បានអញ្ជើញដឹកនាំកិច្ចប្រជុំស្តីពី លទ្ធផលសិក្សាបឋម លើការរៀបចំប្រព័ន្ធដឹកជញ្ជូនសាធារណៈ ផ្លូវរថភ្លើងក្រោមដី (Subway) ឬ ផ្លូវរថភ្លើងលើអាកាស (Monorail) ជាជម្រើស នៅក្នុងរាជធានីភ្នំពេញ ដោយមានការចូលរួមពី តំណាងសាលារាជធានីភ្នំពេញ តំណាងក្រុមហ៊ុនសាជីវកម្មស្ពានថ្នល់ចិន(CRBC) តំណាងក្រុមហ៊ុនគមនាគមន៍ និងសំណង់ចិន (CCCC)។

លោក ស៊ុន ចាន់ថុល បានសំដែងការស្វាគមន៍ចំពោះអង្គប្រជុំ និងបានជម្រាបជូនអំពី គម្រោងសិក្សារបស់រាជរដ្ឋាភិបាល ក្នុងការអភិវឌ្ឍប្រព័ន្ធដឹកជញ្ជូនសាធារណៈ ដែលអាចចូលរួមកាត់បន្ថយការកកស្ទះចរាចរណ៍ក្នុងក្រុង ប្រកបដោយប្រសិទ្ធភាព។

លោកបន្តថា​គម្រោងនេះនឹងដាក់ជូនប្រមុខរាជរដ្ឋាភិបាលធ្វើការពិនិត្យសម្រេចជ្រើសរើសយកប្រព័ន្ធដឹកជញ្ជូនសាធារណៈណាមួយ ដែលសមស្រប និងអាចទទួលយកបាន សម្រាប់រាជធានីភ្នំពេញ ដើម្បីដោះស្រាយបញ្ហានៃការកកស្ទះចរាចរណ៍ និងគ្រោះថ្នាក់ចរាចរណ៍ ដែលកំពុងកើតមាន នាពេលបច្ចុប្បន្ននេះ។

បន្ទាប់ពីការធ្វើបទបង្ហាញរបស់ក្រុមអ្នកជំនាញឯកទេស ក្រុមហ៊ុន ដែលបានសិក្សាទៅលើលទ្ធភាពសាងសង់ បណ្តាញ ផ្លូវរថភ្លើង ដែលបានគ្រោងតភ្ជាប់ស្ទើរគ្រប់ទីតាំង ជាពិសេសលើតំបន់ដែលមានដង់ស៊ីតេប្រជាជនខ្ពស់ នៃរាជធានីភ្នំពេញ រួចមកអង្គប្រជុំបានពិភាក្សាលម្អិតបន្ថែមទៅលើលទ្ធផលនៃការសិក្សាជាបឋមនេះ។

ក្រុមហ៊ុនបានសិក្សាដោយផ្អែកលើមូលដ្ឋាន នៃការប្រៀបធៀបតម្លៃឯកតាចំណាយលើការសាងសង់ផ្លូវរថភ្លើងក្រោមដី (Subway) ឬផ្លូវរថភ្លើងលើអាកាស (Monorail) រយៈពេលនៃការសាងសង់ តម្លៃប្រតិបត្តិការ និងចំណាយលើការថែទាំ ជាដើម។ល។

លោកទេសរដ្ឋមន្ត្រី បានជំរុញឱ្យក្រុមហ៊ុនសាជីវកម្មស្ពានថ្នល់ចិនធ្វើការសិក្សាឱ្យបាន ស៊ីជម្រៅបន្ថែមទៀតលើចំណុចដែលនៅខ្វះចន្លោះមួយចំនួនទៀត គឺធ្វើយ៉ាងណាឱ្យគម្រោងនៃការអភិវឌ្ឍប្រព័ន្ធដឹកជញ្ជូនសាធារណៈរបស់កម្ពុជាមានលក្ខណៈគ្រប់ជ្រុងជ្រោយ ដើម្បីចូលរួមចំណែក ក្នុងការអភិវឌ្ឍវិស័យនេះឱ្យកាន់តែមានការរីកចម្រើន និងដោះស្រាយបញ្ហាកកស្ទះចរាចរណ៍៕