ដោយ៖ ប៊ី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានផ្តល់សុន្ទរកថាគន្លឹះមួយបង្ហាញនូវបទពិសោធន៍របស់កម្ពុជា ក្នុងការដោះស្រាយបញ្ហា និងវិបត្តិទាំងឡាយកើតមានចំពោះសង្គម និងសេដ្ឋកិច្ចកម្ពុជាបង្កដោយជំងឺកូវីដ១៩ ជូនប្រទេសសមាជិកអង្គការអភិវឌ្ឍន៍ឧស្សាហកម្មសហប្រជាជាតិ (UNIDO)។

សុន្ទរកថាគន្លឹះរបស់សម្តេចតេជោប្រមុខរាជរដ្ឋាភិបាលកម្ពុជា ធ្វើឡើងតាមរយៈប្រព័ន្ធវីដេអូក្នុងកិច្ចប្រជុំ «កិច្ចប្រជុំកំពូលកម្មន្តសាល និងឧស្សាហូបនីយកម្មសកល ឆ្នាំ២០២០ (GMIS 2020)» របស់អង្គការ UNIDO ដែលធ្វើឡើងនៅទីក្រុងហ្សឺណែវ ប្រទេសស្វីស នាថ្ងៃទី០៥ ខែកញ្ញា ឆ្នាំ២០២០នេះ។ កិច្ចប្រជុំនេះធ្វើឡើងក្រោមប្រធានបទ «ការស្តារឡើងវិញនូវវិបុលភាពក្នុងពិភពលោកក្រោយពីជំងឺឆ្លងរាតត្បាត»។

ក្នុងសុន្ទរកថាគន្លឹះនេះ សម្តេចតេជោ ហ៊ុន សែន បានគូសរំលេចថា រយៈពេលជាង៩ខែកន្លងមកនេះ ពិភពលោកបាននិងកំពុងប្រយុទ្ធប្រឆាំងនឹងជំងឺកូវីដ-១៩ ដែលបានបង្ករជាវិបត្តិធ្ងន់ធ្ងរមិនធ្លាប់មានពីមុនមកលើសង្គម និងសេដ្ឋកិច្ច។ ទោះបីការខិតខំអភិវឌ្ឍវ៉ាក់សាំងបង្ការកំពុងមានវឌ្ឍនភាពល្អគួរជាទីសង្ឃឹម តែគ្មាននរណាដឹងថា ពេលណាវិបត្តិជំងឺកូវីដ-១៩នេះ នឹងបញ្ចប់នោះឡើយ ហើយក៏គ្មាននណារអាចទស្សន៍ទាយអំពីផលប៉ះពាល់មកលើគ្រប់ទិដ្ឋភាពនៃជីវភាពរស់នៅរបស់សង្គមជាតិនីមួយៗ បានជាក់ច្បាស់នោះដែរ។

សម្តេចតេជោ បានលើកឡើងថា សកម្មភាពសេដ្ឋកិច្ច និង សង្គមស្ទើរគ្រប់វិស័យ ទទួលរងផលប៉ះពាល់យ៉ាងខ្លាំង។ ជាពិសេសតាមរយៈវិធានការទប់ស្កាត់ការរីករាលដាលនៃជំងឺនេះ ដែលត្រូវបានដាក់ចេញដោយរដ្ឋាភិបាលនៃប្រទេសនីមួយៗ ដូចជា ការបិទប្រទេស និង ការរឹតត្បិតដល់ការធ្វើដំណើរ ជាដើម ។

ប្រមុខរាជរដ្ឋាភិបាល បានលើកឡើងទៀតថា ក្នុងបរិការណ៍នេះជីវិតសង្គមជាសកល ត្រូវបានគេប្រមើលឃើញថា អាចនឹងមានការប្រែប្រួលជារចនាសម្ព័ន្ធ ឬ ឈានដល់ប្រក្រតីភាពថ្មី (New Normal) មួយ ដែលរួមមាន៖ ការប្រែប្រួលនិម្មាបនកម្មសេដ្ឋកិច្ចសកល ដូចជា ការធ្លាក់ចុះនៃច្រវាក់តម្លៃសកល និង ច្រវាក់ផលិតកម្មសកល, ការថមថយរំហូរមូលធនសកល ដោយសារការធ្លាក់ចុះនៃតម្រូវការវិនិយោគ និង ការធ្លាក់ចុះរំហូរមនុស្ស, ការធ្លាក់ចុះផលិតភាពសកល និង ការកើនឡើងនៃវិសមភាពសង្គម។

លើសពីនោះទៀត ជំងឺកូវីដ១៩ ក៏បានបង្កផលប៉ះពាល់ធ្ងន់ធ្ងរដល់ការអភិវឌ្ឍន៍ និង ការអនុវត្តគោលនយោបាយឧស្សាហកម្ម និង សេដ្ឋកិច្ចឌីជីថល ក្នុងបរិបទបដិវត្តឧស្សាហកម្មទី៤ របស់ប្រទេសកំពុងអភិវឌ្ឍន៍ ជាពិសេសប្រទេសអភិវឌ្ឍន៍តិចតួច។

ប្រទេសកម្ពុជា ត្រូវបានវាយតម្លៃ និងចាត់ទុកជាប្រទេសបានដាក់ចេញនូវវិធានការល្អប្រសើរ ដើម្បីទប់ស្កាត់ការរីករាលដាលជំងឺកូវីដ១៩។ មកដល់ពេលបច្ចុប្បន្ន កម្ពុជារកឃើញអ្នកឆ្លងជំងឺកូវីដ១៩សរុបប្រមាណ ២៧៤នាក់។ ក្នុងនោះ ២៧២នាក់ បានព្យាបាលជាសះស្បើយ ខណៈអ្នកជំងឺតែពីរនាក់ទៀតប៉ុណ្ណោះ កំពុងព្យាបាល ហើយមិនមានអ្នកជំងឺណាម្នាក់ស្លាប់នោះឡើយ។

ទន្ទឹមនឹងការថ្លែងបង្ហាញចំណាប់អារម្មណ៍ពីផលប៉ះពាល់បង្កឡើងដោយសារជំងឺកូវីដ១៩ហើយនោះ សម្តេចតេជោ ហ៊ុន សែន ក៏បានថ្លែងថា ចែករំលែកនូវបទពិសោធន៍ក្នុងការទប់ស្កាត់ និងប្រយុទ្ធប្រឆាំងជាមួយជំងឺកូវីដ១៩ ក៏ដូចជាការដាក់ចេញនូវវិធានការ ដើម្បីដោះស្រាយបញ្ហាកើតមានក្នុងសង្គម និងសេដ្ឋកិច្ចកំលុងពេលរីករាលដាលជំងឺកូវីដ១៩ផងដែរ។

សម្តេចតេជោ ហ៊ុន សែន បានគូសរំលេចថា រាជរដ្ឋាភិបាលបានគ្រប់គ្រងសភាពការណ៍កូវីដ១៩ ប្រកបដោយប្រសិទ្ធភាព ដោយមកដល់ពេលនេះ កម្ពុជាមិនមានការឆ្លងជាសហគមន៍ ហើយក៏មិនបានឈានដល់ការបិទជាតំបន់ ឬ ប្រទេសទាំងមូលនោះទេ។

សម្តេចតេជោបន្ថែមថា ជាការពិតជំងឺកូវីដ១៩ បាននាំមកនូវបញ្ហាប្រឈមដ៏ស្រួចស្រាល់មួយចំនួន ជាអាទិ៍នៅក្នុងវិស័យវាយនភណ្ឌ វិស័យទេសចរណ៍ វិស័យអាកាសចរណ៍ និង វិស័យសេវាខ្លះទៀត។ ស្ថិតក្នុងសភាពការណ៍នេះ រាជរដ្ឋាភិបាលកម្ពុជាបានដាក់ចេញនូវវិធានការចំនួន៥ជុំ រួចមកហើយ សំដៅជួយរក្សាលំនឹងផលិតកម្ម និង អាជីវកម្ម សម្រាប់ផ្គត់ផ្គង់ទាំងក្នុង និងក្រៅប្រទេស ពិសេសគឺសំដៅធានាលំនឹងជីវភាពរស់នៅរបស់ប្រជាពលរដ្ឋ ដែលទទួលរងផលប៉ះពាល់ធ្ងន់ធ្ងរ។

វិធានការអន្តរាគមន៍ទាំងនោះរួមមានជាអាទិ៍៖ ការអនុគ្រោះពន្ធ និង ការអនុគ្រោះការបង់ប្រាក់ភាគទានធានារ៉ាប់រងរបបហានិភ័យការងារ និង ថែទាំសុខភាព, ការជួយសម្រួលលក្ខខណ្ឌឥណទាន, ការបង្កើនសន្ទនីយភាពនៅលើទីផ្សារ, ការផ្ដល់ប្រាក់ឧបត្ថម្ភជូនកម្មករ-និយោជិត ក្នុងវិស័យកាត់ដេរ និង ទេសចរណ៍, ការរៀបចំកម្មវិធីហិរញ្ញប្បទានពិសេស ដើម្បីជួយស្តារលទ្ធភាពនិង លើកកម្ពស់អាជីវកម្មរបស់សហគ្រាសធុនតូច និង មធ្យម, ការរៀបចំវគ្គបណ្តុះបណ្តាលជំនាញ ជូនដល់កម្មករ-និយោជិត, និង ការរៀបចំគម្រោងហិរញ្ញប្បទានសម្រាប់ទុនបង្វិល ដើម្បីបំពេញតម្រូវការរបស់រោង-ចក្រ សហគ្រាស និង អាជីវកម្ម នៅក្នុងប្រទេស៕

ដោយវុត្ថា

ភ្នំពេញ៖តាមយោបល់និងរបាយការណ៍បណ្ដោះអាសន្នរបស់ក្រុមហ៊ុនទីប្រឹក្សាបច្ចេកទេសបានឱ្យដឹងថា ការសាងសង់ផ្លូវក្រវ៉ាត់ក្រុងសៀមរាបមានបីជម្រើស ដោយក្នុងនោះគួរសាងសង់ជាផ្លូវមាន៤គន្លង ដើម្បីឆ្លើយតបទៅនឹងទំហំចរាចរណ៍និងកំណើនសេដ្ឋកិច្ចនាពេលបច្ចុប្បន្ន និងអនាគត។

លោក សូរ វិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន នៅក្នុងកិច្ចប្រជុំពិនិត្យលើរបាយការណ៍បណ្តោះអាសន្ន  នៅថ្ងៃទី ៤ ខែកញ្ញា ឆ្នាំ ២០២០ម្សិលមិញនេះ ឱ្យដឹងថាការជ្រើសរើសខ្សែផ្លូវនៃការសិក្សា គម្រោងសាងសង់ផ្លូវក្រវ៉ាត់ទីក្រុងសៀមរាប ស្ថិតក្នុងក្របខណ្ឌកម្ចីមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF Loan)។

លោកបន្តថា ការឯកភាពយកការសាងសង់ផ្លូវក្រវ៉ាត់ក្រុងជម្រើសទី១ (សាងសង់ជាផ្លូវមាន៤គន្លង ) ដោយហេតុថាជម្រើសនេះមិនប៉ះពាល់ដល់តំបន់អភិរក្សរបស់អជ្ញាធរអប្សរា អាជ្ញាធរទន្លេសាប និងមានផលប៉ះពាល់ទ្រព្យសម្បត្តិរបស់ប្រជាពលរដ្ឋតិច ទោះបីជាផ្លូវវាងក្រុងជម្រើសទី១នេះឆ្ងាយពីទីក្រុងបន្តិចក្ដី។

ទោះជាយ៉ាងនេះក្ដី លោកបន្តថា ការជ្រើសរើសនេះ មិនមែនជាការសម្រេចចុងក្រោយឡើយ ដោយសារគម្រោងនេះត្រូវសិក្សាឱ្យបានលម្អិតបន្ថែមទៀត ដោយផ្ដោតជាសំខាន់ទៅលើផលប៉ះពាល់សង្គម សេដ្ឋកិច្ច និងថវិកាសម្រាប់សាងសង់។

លោកបន្តថា នេះគឺជាកិច្ចប្រជុំថ្នាក់បច្ចេកទេសរៀបចំឡើង ក្នុងគោលបំណងស្ដាប់ការធ្វើបទបង្ហាញរបស់ក្រុមហ៊ុនទីប្រឹក្សាបច្ចេកទេសអំពីលទ្ធផលនៃការសិក្សាលើគម្រោងសាងសង់ផ្លូវក្រវាត់ក្រុងសៀមរាប ក៏ដូចជាការប្រមូលធាតុចូលបន្ថែមទៀតពីភាគី និងស្ថាប័នពាក់ព័ន្ធ សំដៅឈានទៅធ្វើរបាយការណ៍បញ្ចប់នៃគម្រោងនេះ មុនពេលដាក់ជូនថ្នាក់ដឹកនាំសម្រេច។

លោករដ្ឋលេខាធិការក៏បានរំលឹកដែរថា ដោយឡែក សម្រាប់ គម្រោងធ្វើឱ្យប្រសើរឡើងវិញផ្លូវទាំង៣៨ខ្សែនៅក្នុងទីក្រុងសៀមរាប ទទួលបានគោលការណ៍ឯកភាពពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងកិច្ចប្រជុំគណៈរដ្ឋមន្ត្រីកាលពីម្សិលមិញនេះ ក្រោមការចំណាយថវិការបស់រដ្ឋចំនួន១៥០លានដុល្លារសម្រាប់ស្ដា ដើម្បីបង្កើនសោភ័ណភាព និងបង្កលក្ខណៈងាយស្រួលដល់ការធ្វើចរាចរណ៍ និងស័ក្ដិសមជាតំបន់ទេសចរណ៍ប្រចាំប្រទេស៕

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា តាមរយៈក្រសួងពាណិជ្ជកម្ម ត្រៀមបើកកិច្ចប្រជុំប្រឹក្សាចម្រុះក្របខណ្ឌពាណិជ្ជកម្ម និងវិនិយោគពិភាក្សាទ្វេភាគីរវាងកម្ពុជា និងសហរដ្ឋអាមេរិក នៅពេលខាងមុខ ដើម្បីពង្រឹងទំនាក់ទំនងពាណិជ្ជកម្ម និងវិនិយោគរវាងប្រទេសទាំងពីរ។

នៅក្នុងកិច្ចពិភាក្សារវាងរដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្ដិ និងលោក ប៉ាទ្រីក មើហ្វី (W. Patrick Murphy) ឯកអគ្គរដ្ឋទូតសហរដ្ឋអាមេ

រិកប្រចាំនៅកម្ពុជា នៅថ្ងៃទី៣ ខែកញ្ញា ឆ្នាំ២០២០ បានលើកឡើងពីសក្តានុពលពាណិជ្ជកម្មទ្វេភាគី ដែលបានកើនឡើងពី ៣,៣ ពាន់លានដុល្លារអាមេរិកក្នុងឆ្នាំ២០១៨ មកដល់ ៤,៧ពានលានដុល្លារអាមេរិកក្នុងឆ្នាំ២០១៩ ក្នុងអាត្រាកំណើនប្រមាណ ៤២ ភាគរយ។

លោករដ្ឋមន្ត្រីពាណិជ្ជកម្ម ប៉ាន សូរស័ក្ដិ ក៏បានលើកឡើងពីវឌ្ឍនភាពនៃកំណែទម្រង់ស៊ីជម្រៅរបស់រាជរដ្ឋាភិបាលកម្ពុជា ទាំងក្នុងក្របខ័ណ្ឌស្ថាប័ន និងគតិយុត្តិ ដែលធានាបង្កើនបរិយាកាសធុរកិច្ច និងវិនិយោគឱ្យកាន់តែប្រសើរនៅកម្ពុជា ជាពិសេស ការចូលជាធរមាននៃច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក និងការបង្កើតអនុក្រឹត និងបទបញ្ញត្តិពាក់ព័ន្ធ និងបានស្នើភាគីអាមេរិកបន្តជំរុញវិនិយោគិនរបស់ខ្លួនមកធ្វើធុរកិច្ច និងវិនិយោគក្នុងវិស័យពាណិជ្ជកម្មតាមប្រព័ន្ធអេឡិចត្រូនិកនេះឱ្យបានកាន់តែច្រើន។

ជាលទ្ធផលនៃកិច្ចប្រជុំពិភាក្សាខាងលើនេះ តំណាងរដ្ឋាភិបាលនៃប្រទេសទាំង២ បានសម្តែងនូវសុទិដ្ឋិនិយមក្នុងកិច្ចសហប្រតិបត្តិការរវាងរួមគ្នា ជាពិសេសក្នុងវិស័យពាណិជ្ជកម្ម និងវិនិយោគ ហើយថែមទាំងបានឯកភាពជាបឋមក្នុងការរៀបចំកិច្ចប្រជុំក្រុមប្រឹក្សាចម្រុះក្របខ័ណ្ឌពាណិជ្ជកម្ម និងវិនិយោគកម្ពុជា-អាមេរិកលើកទី៦ តាមរយៈ Video Conference នៅពេលខាងមុខនេះ៕