ដោយ ហ្សូលី

ភ្នំពេញ៖ ប្រេងឥន្ធនៈនៅគ្រប់ស្ថានីយ៍ទាំងអស់នៅក្នុងប្រទេសកម្ពុជា និងត្រូវទម្លាក់តម្លៃដើម្បីលើកកម្ពស់សេដ្ឋកិច្ចកម្ពុជា ដែលកំពុងប្រឈមនឹងហានិភ័យដោយសារមេរោគរាតត្បាតកូវីដ ១៩។ នេះបើតាមសេចក្តីប្រកាសរបស់ក្រសួងពាណិជ្ជកម្មចេញផ្សាយនៅថ្ងៃទី ០១ មេសា ឆ្នាំ ២០២០នេះ។

ការទម្លាក់តម្លៃប្រេងឥន្ទនៈនេះគឺដើម្បីជួយសម្រួលដល់ជីវភាពរស់របស់ប្រជាពលរដ្ឋកម្ពុជា និងជួយស្តារសេដ្ឋកិច្ចប្រទេសជាតិទាំងមូលផងដែរ។ នេះជាការអនុវត្តជាបន្ទាន់ក្រោមការបញ្ជារបស់ សម្តេច ហ៊ុន សែន នាយករដ្ឋមន្ត្រីនៃកម្ពុជា ដែលតម្រូវឱ្យបញ្ចុះតម្លៃលក់រាយប្រេងឥន្ធនៈនៅទូទាំងប្រទេសកម្ពុជា។

គោលបំណងនៃការទម្លាក់តម្លៃនេះទៀតសោត គឺដើម្បីធានាបាននៅនិរន្តភាពជូនដល់អ្នកប្រើប្រាស់ និងតម្រូវការរបស់ប្រជាជនកម្ពុជា ក្នុងស្ថានភាពដែលប្រទេសទាំងមូល រួមទាំងសកលលោកកំពុងទទួលរងនូវវិបត្តិជម្ងឺឆ្លងកូវីដ ១៩។

រដ្ឋាភិបាលកម្ពុជាបានត្រៀមខ្លួនរួចជាស្រេចក្នុងការទប់ទល់ហានិភ័យសេដ្ឋកិច្ច និងប្រយុទ្ធប្រឆាំងជម្ងឺ ដោយមានការរឹតបន្តឹងច្រកព្រំដែននៅតាមប្រទេសជិតខាង និងប្រទេសមួយចំនួនទៀតដែលមានករណីឆ្លងច្រើន។ មិនតែប៉ុណ្ណោះ រដ្ឋាភិបាលបានត្រៀមថវិកាប្រមាណចន្លោះពី ៨០០លាន ដល់ ២ពាន់លានដុល្លារ ដើម្បីរក្សាលំនឹងសេដ្ឋកិច្ច។ ក្រៅពីនេះសម្តេចក៏បានចាត់វិធានការឱ្យអគ្គិសនីកម្ពុជានិងរដ្ឋាករទឹកត្រូវផ្តល់ការយោគយល់ឱ្យកម្មករកម្មការិនីរោងចក្រដែលព្យួរការងារជំពាក់សិនផងដែរ។

បច្ចុប្បន្នកំណើនសេដ្ឋកិច្ចកម្ពុជានៅក្នុងឆ្នាំ ២០២០ បានធ្លាក់ក្នុងរង្វង់ត្រឹម ២.៥ ភាគរយ តែប៉ុណ្ណោះ ខណៈធនាគារពិភពលោកបានវិភាគថា ក្នុងឆ្នាំ ២០២១ ខាងមុខ កំណើនសេដ្ឋកិច្ចកម្ពុជានឹងអាចសម្រេចបានត្រឹម ៥.៩% ៕

ដោយ ប៊ី

ប៉េកាំង៖ ធនាគារកណ្តាលចិន បានបន្ទាបអត្រាការប្រាក់លើប្រាក់កម្ចីដល់ធនាគារកាលពីដើមសប្តាហ៍នេះ ដែលជាអត្រាការប្រាក់ទាបបំផុតក្នុងរយៈពេល ៥ ឆ្នាំ និងបញ្ចូលទឹកប្រាក់ ៥០ ពាន់លានយ័ន (៧ ពាន់លានដុល្លារអាមេរិក) ទៅក្នុងប្រព័ន្ធហិរញ្ញវត្ថុដើម្បីជួយស្តារសេដ្ឋកិច្ចខ្លួនដែលកំពុងរងគ្រោះដោយជំងឺ COVID-19។ នេះបើយោងតាមការចុះផ្សាយរបស់សារព័ត៌មាន CNA។

ធនាគារប្រជាជនចិន (PBoC) បានឱ្យដឹងថា ខ្លួនបានចាប់ផ្តើមប្រតិបត្តិការទិញមូលធនត្រឡប់វិញ ៥០ ពាន់លានយ័នកាលពីថ្ងៃ ចន្ទនេះ និងបានទម្លាក់អត្រាការទិញត្រឡប់វិញរយៈពេល ៧ ថ្ងៃពី ២,៤០ ភាគរយដល់ ២,២០ ភាគរយ។

លោក Julian Evans-Pritchard សេដ្ឋវិទូជាន់ខ្ពស់ប្រចាំប្រទេសចិននៃក្រុមហ៊ុន Capital Economics បានថ្លែងថា វាជាការកាត់បន្ថយធំបំផុតចាប់តាំងពីឆ្នាំ ២០១៥ ហើយធ្វើឱ្យអត្រាការប្រាក់ត្រឡប់វិញរយៈពេល ៧ ថ្ងៃដល់កម្រិតទាបបំផុត។

លោកបាននិយាយថា ៖«តាមរយៈការផ្តល់មូលនិធិក្នុងអត្រាទាបមួយ ធនាគារ PBoC នឹងអាចរក្សាអត្រាការប្រាក់អន្តរធនាគារនៅកម្រិតទាប បើទោះបីជាសាច់ប្រាក់ងាយពីការកាត់បន្ថយ RRR (សមាមាត្រតម្រូវការបម្រុង) ត្រូវបានស្រូបយកដោយប្រព័ន្ធធនាគារ។ ។

ភ្នាក់ងារបង្កជំងឺដ៏សាហាវនេះបានសម្លាប់មនុស្សជិត ៤០ ០០០ នាក់នៅទូទាំងពិភពលោក ដែលធ្វើឱ្យប៉ះពាល់ដល់ការធ្វើអាជីវកម្ម និងអ្នកប្រើប្រាស់ ហើយការរីករាលដាលទូទាំងពិភពលោកបាត់បង់ក្តីសង្ឃឹមនៃការងើបឡើងវិញយ៉ាងឆាប់រហ័សនៅក្នុងប្រទេសចិនដែលពឹងផ្អែកលើការនាំចេញ៕

ដោយវុត្ថា

ភ្នំពេញ៖ រដ្ឋបាលរាជធានីភ្នំពេញបានចាប់ផ្តើមរៀបចំស្ថាបនាសួនច្បារថ្មីមួយទៀតដែលស្ថិតនៅតាមបណ្តោយ ផ្លូវលេខ ១០១៩ (វិថីភ្នំពេញ-ហាណូយ) ខាងមុខវិទ្យាស្ថានស្រាវជ្រាវ និងអភិវឌ្ឍន៍ព្រៃឈើ ក្នុងសង្កាត់ គោកឃ្លាង ខណ្ឌសែនសុខ រាជធានីភ្នំពេញ។

លោក ឃួង ស្រេង អភិបាលរាជធានីភ្នំពេញ  នៅក្នុងឪកាសដឹកនាំក្រុមការងារចុះពិនិត្យទីតាំង គម្រោងកាលពី ថ្ងៃទី៣១ ខែមីនា ឆ្នាំ២០២០ម្សិលមិញនេះ ឱ្យដឹងថា សួនច្បារថ្មីមួយនេះ មានបណ្តោយប្រវែង ៥៥០ម៉ែត្រ ទទឹង ១៦ម៉ែត្រ ដោយរៀបចំឱ្យមាន ជាទីធ្លាលំហែកម្សាន្ត កន្លែងហាត់ប្រាណ ឧបករណ៍ក្មេងលេង ដាំដើមឈើ ដាំស្មៅ បង្គន់សាធារណៈ ចំណតរថយន្ត ម៉ូតូ និងបង្គោល បំភ្លឺសួនច្បារផងដែរ ដើម្បីងាយស្រួលជូនបងប្អូនប្រជាពលរដ្ឋបានមក លំហែកម្សាន្ត និងបានហាត់ប្រាណនៅទីនេះ។

លោក សំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូនរាជធានីភ្នំពេញធ្លាប់បានបញ្ជាក់ឱ្យដឹងហើយថា សួនច្បារថ្មីនេះ បានចាប់ផ្ដើម អនុវត្តន៍ការដ្ឋានកាលពីថ្ងៃទី១៣ ខែកុម្ភៈ ឆ្នាំ២០២០ ហើយជាគម្រោងសួនច្បារនេះ គ្រោងនឹងស្ថាបនា ឱ្យបានរួចរាល់ក្នុងរយៈពេល ៤ទៅ៥ខែទៀត។

លោក សំ សាមុត បានបញ្ជាក់ថា ការស្ថាបនាសួនច្បារថ្មីនេះ ប្រើប្រាស់ ពេលមិនយូរប៉ុន្មានទេ។ ប៉ុន្តែអ្វីដែលយូរនោះ គឺការស្ថាបនាបង្គន់អនាម័យ សាធារណៈនៅ លើសួនច្បារនេះតែម្តង។  

លោកបន្តថា សួនច្បារនេះ មិនត្រឹមតែជាកន្លែងទាក់ទាញនូវ ភ្ញៀវជាតិអន្តរជាតិប៉ុណ្ណោះទេ ប៉ុន្តែវាក៏ជាកន្លែងមួយសម្រាប់ប្រជាពលរដ្ឋបាន ហាត់ប្រាណផងដែរ ព្រោះថា ការហាត់ប្រាណជាឱសថព្យាបាលជំងឺគ្រប់ប្រភេទដ៏ស័ក្តិសិទ្ធ សម្រាប់បងប្អូនប្រជាពលរដ្ឋទូទៅ៕